Пол: Ми туж шумпотэмын вал! Со вал 1985-тӥ арын шуркынмонэ. Милемыз ыстӥзы Либе́рие (Шундыпуксёнпал Африка) миссионеръёс луыса ужаны-тыршыны. Нырысь самолётмы пуксиз Сенега́лэ. Тодӥсько на, кызьы Энн шуиз: «Час ортчыса, ми Либериын луомы ини!» Но ӵапак соку ялон лэсьтӥзы: «Либерие мынӥсьёслы самолётысь потыны кулэ. Отын бугыръяськонъёс кутскизы, соин ик ми отчы пуксьыны ум быгатэ». Соин сэрен милемлы Сенегалэ кылёно луиз. 10 нунал ӵоже ми улӥмы отысь миссионеръёс дорын. Нош Либериысь ялан кышкыт иворъёс лыкто вал вием адямиосын тырмем грузовикъёс сярысь но комендантской час сярысь, кудзэ тӥяд ке, интыяд ик ыбыны быгато вал.

Энн: Ми дышемын ваньзэ малпаськыса-чакласькыса лэсьтыны. Пичи дыръям ик мон лудкеч кадь кышкась вал. Сюрес вамен потыкум но, мон сюлмаськисько. Ваньмыз шоры учкытэк, милям юн мылкыдмы вал Либерие мыныны, отын кышкыт вал ке но.

Пол: Мон но Энн вордӥськимы Шундыпуксёнпал Англиын но ог-огмылэсь 8 иськем кемын улӥмы. Школаез йылпумъяммы бере ик ми пионеръёс луимы. Мынам анай-атае но Эннлэн анаез котьку мылкыдмес ӝуто вал, вань дырмес сётыса, Иеговалы ужаны-тыршыны. Соос туж шумпотӥзы, куке ми та ужпуммес быдэстӥмы. 19 арес дыръям монэ Вефиле ӧтизы, нош Энн отын ужаны-тыршыны кутскиз кузпалъяськеммы бере, 1982-тӥ арын.

Энн: Вефильын милемлы туж умой вал, но милям котьку потэ вал мынэммы отчы, кытын ивортӥсьёс уг тырмо. Вефильын ми ужамы-тыршимы агайёсын но сузэръёсын, кудъёсыз азьвыл миссионеръёс вал. Соосын вераськыса, милям эшшо но зол потэ вал миссионеръёс луэммы. Куинь ар ӵоже ӝытлы быдэ ми со сярысь Иеговалы вӧсяськимы. Малпалэ гинэ, макем ми шумпотӥмы, куке милемыз ӧтизы Галаад школалэн 79-тӥ классаз дышетскыны! Дышетскеммы бере милемыз Либерие ыстӥзы.

Пол: Либерие самолётъёс лобаны кутскем бере ми отчы нырысетӥ самолётэн ик лобӟимы. Шаерын азьвыл сямен ик комендантской час вал, адямиос дорысьтызы потаны кышкало вал. Шӧдтэк шорысь  машиналэн глушителез пуштэм кадь куара поттэ вал ке, адямиос кышкатско но бызьыса кошко вал! Мултэс медам сюлмаське шуыса, ми котькуд ӝыт псаломъёсты ӵош лыдӟимы. Улон капчи ӧй вал ке но, ужан-тыршон милемлы туж кельше вал. Энн миссионер луыса ужаз-тыршиз, нош мон — Вефильын. Мон туж шумпотӥсько вал ужаны-тыршыны быгатӥ шуыса Джон Чару́к a агаен. Со кема дыр ӵоже Либериын улэ вал ини но умой тодэ вал, кыӵе шуг-секытъёсын пумиськыло отысь ивортӥсьёс. Мон тросэзлы солэсь дышетски.

Энн: Малы ми соку ик яратӥмы Либериын ужан- тыршонэз? Агайёс но сузэръёс понна. Соос милемлы бадӟым яратонзэс возьматӥзы но Инмарлы оскымон ужазы-тыршизы. Соос милемлы соку ик семья кадь луизы. Соос туж тыршизы милемлы юрттӥськыны но умой визь-кенешъёс сётъязы. Нош макем умой вал отын тодытыны! Адямиослы уг кельшы вал, куке, соос малпамъя, ми соос дорысь укыр ӝог кошкиськомы вал. Ӵем дыръя, урамтӥ мыныку, кылыны луэ вал, кызьы отысь адямиос Библия сярысь верасько. Соин ик туж капчи вал соосын вераськон кутскыны. Библиез дышетонъёс туж трос вал, ми мырдэм вуиськомы вал соосты ортчытъяны. Макем умой дыр со вал!

Пол: Ньыль ар ортчыса, 1989-тӥ арын, улон эшшо но кышкыт луиз — Либериын граждан ож кутскиз. 1990-тӥ арын 2-тӥ пӧсьтолэзе со интыез, кытын филиал сылэ вал, кивалтӥсьёслы пумит мынӥсьёс киулазы басьтӥзы. Куинь толэзь ӵоже ми нокинэн герӟаськыны ӧм быгатэ, ӵыжы-выжыосынымы но, валтӥсь кивалтонниен но. Котькытын йыружъёс вӧлмизы, адямиос сютэм улӥзы, трос кышномуртъёсты эриктэмазы. Сыӵе улон 14 ар ӵоже кыстӥськиз.

Энн: Одӥг выжыысь адямиос мукет выжыысь адямиосты виылӥзы. Котькытын вал йыр вандӥсьёс. Соослэн туж трос ожтӥрлыксы вал, соос котькуд корка пырало но, мае басьтэмзы потэ, басьто вал. Куд-огъёсызлы адямиез вием курегез вандэм кадь гинэ потэ вал. Блокпостъёсын (соос Вефиль котырын но вал) туж трос ыбылэм адямиос люкаськемын вал. Соос пӧлын вал агайёсмы но сузэръёсмы, озьы ик кык миссионеръёс.

Йыр вандӥсьёс куд-ог выжыосты адӟемпотостэм карылӥзы. Соос сыӵе выжыосысь адямиосты утчало но виыло вал. Соин ик тросэз Адӟись-Ивортӥсьёс, озьы ик миссионеръёс но Вефильын ужасьёс, асьсэ дорын агайёсты но сузэръёсты ватыса  возизы. Филиалын кинэ ке интыязы нырысетӥ этаже, нош мукетъёссэ — вылӥысь этаже. Кылсярысь, ми улӥмы одӥг комнатаын семьяен ӵош, кудаз сизьым адями вал.

Пол: Котькуд нунал ожтӥрлыкен адямиос лыктылӥзы эскерыны, ми соослэсь кинэ ке ум ватӥське-а шуыса. Соин ик Вефильын ньыль дежурнойёс вал: кыкез сылӥзы капка дорын, нош кыкез соос шоры укноысен учкизы. Капка дорын сылӥсь агайёслэн кизыя валаны луэ вал, лыктэм адямиос кышкытлык ваё-а, уг-а. Дежурнойёслэн киоссы азьпалазы вал ке, ваньмыз умой вал. Нош тыбыр сьӧразы вал ке, агайёсты но сузэръёсты ӝоггес ватоно вал.

Энн: Трос арня ортчыса, йыр вандӥсьёс филиалэ пырыны быгатӥзы. Ми одӥг сузэрен ванной комнатае ватскимы. Отын сылэ вал шкаф, кудӥзлэн пыдэсаз ватскон инты лэсьтэмын вал. Со отчы пырыса гинэ вуиз, ӧсэ йыгаськыны кутскизы. Йыр вандӥсьёс адӟиллям мынэсьтым отчы лыктэмме. Соосты ӝегатон понна, Пол соослы шуиз: «Кышное туалетын». Мон шкафлэсь пыдэссэ шыпытэн ворсаны но дӥськутэз ӝогак берен шкафе тырыны ӧй быгатысал. Сюлмаськеменым мон дыр куалекъяны кутски. Сыӵе дыръям мон ӧсэз усьтысал ке, соос ваньзэ валасалзы. Соин ик мон Иеговалы сюлворыса вӧсяськи. Мон ӧсэз усьтӥ но, нокыӵе кариськытэк, ӟечбуръяськыны тырши. Одӥг пиосмурт, монэ донгыса, шкаф доры ик мынӥз но дӥськут пӧлын бугыръяськыны кутскиз. Со туж паймиз, номыр ӧз шедьты шуыса. Собере пиосмуртъёс мукет комнатаосты но сигез эскеризы. Но отысь но номыр ӧз шедьтэ.

Пол: Кӧня ке толэзь ӵоже милям туж ӧжыт сиёнмы вал. Соин ик ӵем дыръя ӵукнаосы ми ӧм сиськылэ. Вефильын ӵукна йыбырттон гинэ ортчытӥське вал. Ми тодӥськомы вал, Библиез лыдӟон но эскерон милемлы та нуналлы кужым сётоз шуыса.

Филиалын сиён но ву бырысал ке, милемлы сиён утчаны кошконо луысал но кельтоно луысал вын-агайёсмес но сузэр-апайёсмес, кудъёсыз ми дорын ватскыса улӥзы. Соку соосты виыны быгато вал. Но Иегова милемлы котьку юрттылӥз, куддыръя туж паймымон амалэн! Со котьку ми сярысь сюлмаськиз но милемлы юрттӥз кышканлы сётскытэк улыны.

Улон секытгес но секытгес луэ вал ке но, зэмлык яркытгес но яркытгес пиштэ вал. Агайёслы но сузэръёслы трос пол, ваньзэ куштыса, кошконо луэ вал. Озьы ке но соос ваньзэ чидазы но юн осконэн улӥзы. Куд-огъёсыз веразы, граждан ож соослы бадӟым куректонлы дасяськыны юрттӥз шуыса. Кышкасьтэм тӧроос но егит агайёс, асьсэды жалятэк, кенешъёс сярысь сюлмаськизы. Тросэзлы Адӟись-Ивортӥсьёслы коркаоссэс кельтоно луиз ке но, соос тодытэмысь но ӵош люкаськылэмысь ӧз дугдэ. Соос огшоры Эксэйлык юртъёсты лэсьтылӥзы солэсь, мае нюлэскысь шедьтыны луэ вал. Улон огыр-бугыр вал ке но, пумиськонъёс но тодытон уж агайёсты буйгато вал. Гуманитарной юрттэт сётъякумы, тросэз, дӥськут интые, тодытон понна сумка курылӥзы. Сыӵе учыръёс сюлэммес бугырто вал! Либериын улӥсьёслэн сюлэмзы вӧсь луэмын вал ке но, соос шумпотыса ӟеч иворез кылзӥзы.  Соосты паймытэ вал, бугыръяськонъёс шоры учкытэк, Адӟись-Ивортӥсьёс шумпотыса уло шуыса. Соос та пеймыт дуннеын югытлык кадь вал (Матф. 5:14—16). Ӟырдыт мылкыдын тодытэмзэс адӟыса, куд-ог йыр вандӥсьёс но Иеговалэн Адӟись-Ивортӥсьёсыз луизы.

Пол: Либериысь милемлы кӧня ке пол кошкылоно луиз: куинь пол — вакчи дырлы, кык пол — быдэс арлы. Одӥг сузэр, кудӥз миссионер луыса ужаз-тыршиз, туж умой вераз милям шӧдонъёсмы сярысь: «Кызьы милемыз дышетӥзы Галаадын, ми вань сюлмынымы яратӥмы агайёсты но сузэръёсты со интыысь, кытын ужамы-тыршимы. Соин милям сюлэммы ик позырске вал, секыт югдур кылдыку, соосты кельтоно луэ вал ке». Шумпотыса вераны луэ, артысь шаеръёсын улыкумы, ми соослы юрттӥськыны быгатӥмы.

Энн: 1996-тӥ арын куартолэзе ми Либериын тодытон уж сярысь вань кулэ луись документъёсты машинае понӥмы но кык мукет Адӟись-Ивортӥсьёсын кышкыттэмгес интые кошкимы, филиаллэсь 16 иськем кеме. Но сюрес вылын ми йыр вандӥсьёсты пумитамы. Соос омыре ыбылыны кутскизы. Милемыз дугдытӥзы, Полэз сяна, ваньмес машинаысь донгаса поттӥзы но, машинаямы пуксьыса, кытчы ке кошкизы. Ми куиньнамы номыре валатэк кылимы. Шӧдтэк шорысь ми адӟимы, кызьы ми доры Пол лыктэ. Солэн кымесысьтыз вир вия вал. Нырысь ми малпамы, солэн йыраз ыбизы шуыса. Кышкаменымы ми ӧм но валалэ, сое ыбысалзы ке, со кулэмын луысал ини шуыса. Одӥг йыр вандӥсь, Полэз машинаысь донгыса поттыкуз, сое шуккем. Но шуккиськем интыез бадӟым ӧй вал.

Собере ми адӟимы грузовикез, кудӥныз солдатъёс отын улӥсьёсты ожмаськонлэсь палэнэгес нуо вал. Отын туж трос адямиос вал бере, ми отчы пуксьыны ӧм быгатэ, кузовез борды кырмиськыны гинэ быгатӥмы. Грузовик интыысьтыз туж ӝог вырӟиз бере, ми ӧжыт гинэ ӧм усе. Ми туж куримы водителез дугдыны, но кышкаменыз со милемыз ӧз но кылы. Паймоно кадь, кызьы ми усьыса ӧм кыле. Куке грузовик кулэ интые вуиз, кырмиськыса но кышкаса мынэменымы, ми ваньмы куалекъяськомы вал.

Пол: Милям дӥськутмы саптаськемын но кесяськемын вал. Ми паймыса ог-огмы шоры учкимы но малпамы, кызьы улэп кылимы. Со уез ми кырын ортчытӥмы. Нош мукет нуналаз ыбылыса пасьям вертолётэн милемыз Сьерра-Лео́не шаере нуизы. Ми шумпотӥмы, улэп кылимы шуыса. Озьы ке но сюлэммы туж шуг вал Либериысь агайёс но сузэръёс понна.

Энн: Ми вуимы Фрита́ун карысь филиалэ. Отын ми сярысь туж умой сюлмаськизы. Ми кышкыттэм интыын вал ини ке но, монэ курадӟытыны кутскизы Либерия сярысь кышкыт тодэ ваёнъёс. Мон котькуд нунал кышкаса улӥсько вал. Нош уйёсы кӧшкемыт уйвӧтъёсты адӟыса, быдэсак пӧсяса сайкалляй. Куддыръя шокаме ик ӧз луылы. Соку Пол монэ китӥм кутэ но вӧсяське вал. Сыӵе учыръёсы, мон куалекъямысь дугдытозь, ми Эксэйлык кырӟанъёсты кырӟаськомы на вал. Мон кышкасько вал, визьтэм кылё но миссионер луыса ужаме-тыршеме уз луы ини шуыса.

Ноку уг вунэты, мар луиз бератаз. Со арняе ик, ку монэ тодэ ваёнъёс курадӟытыны кутскизы, ми басьтӥмы кык журнал. Одӥгез соос пӧлысь — 1996-тӥ арын 8-тӥ инвожо понна поттэм «Сайкалэ!» журнал. Отын вал «Как справиться с приступами панического страха» статья. Сое лыдӟыса, мон валай, мар монэн луэ. Кыкетӥез журнал — 1996-тӥ арын 15-тӥ куартолэзь понна поттэм «Возьмаськон башня», кудаз вал «Откуда у них берутся силы?» статья. Отын вераськиз, бубылилэн бурдъёсыз быдэсак кадь быремын ке но, со лобаны быгатэ на шуыса. Озьы ик ми но, кужыммы быре ини ке но, Иеговалэн духезлы луыса ми мукетъёсызлы юрттыны быгатӥськомы. Со журналъёс пыр Иегова милемлы дырыз дыръя духовной сиён сётӥз (Матф. 24:45). Мон шедьтӥ на мукет та выллем статьяосты но дырын дырын выльысь соосты лыдӟылӥ. Дыр ортчыса, кышкыт тодэ ваёнъёс монэ сокем ӧз курадӟытэ ини.

Пол: 2004-тӥ арын ог 20 ар тырмиз, кызьы милемыз Либерие ыстӥзы. Со дыр ӵоже Либерия милемлы дор кадь луиз. Ожмаськон дугдӥз. Филиалын пуктӥськон-лэсьтӥськон ужъёс кутскыны кулэ вал. Но шӧдтэк шорысь милемлы мукет шаере мыныны ӵектӥзы.

 Милемлы со секытэн сётӥськиз. Ми туж дышимы Либериысь агайёслы но сузэръёслы. Соос милемлы семья кадь луизы. Туж секыт вал соос дорысь кошкыны. Одӥг пол, куке ми Галаадэ кошкимы, милемлы ӵыжы-выжыосмес кельтоно луиз ини. Соку ми ваньзэ Иеговалэн кияз сётӥмы но, со милемыз бакель кариз. Сое тодэ вайыса, милемлы капчигес луиз выль ӵектонлы соглаш кариськыны. Озьы ми Га́на шаере вуимы.

Энн: Кошкон азямы ми туж трос бӧрдӥмы. Но ми туж паймимы, куке Фрэнк нимо арлыдо агай милемлы визьмо визь-кенеш сётӥз. Со шуиз: «Тӥледлы милемыз вунэтоно!» Собере со валэктӥз: «Тӥ милемыз котьку тодады возёды, но али тӥледлы вань сюлэмдэс выль ужлы сётоно. Со ужез тӥледлы сётӥз Иегова. Соин ик табере вань яратондэс Ганаысь агайёслы но сузэръёслы сётэ». Та кылъёс туж дырыз дыръя вал. Ганаын милемыз ӧжытэз тодо вал но ваньмыз ми понна выль вал ке но, отчы лыктыса, ми соку ик эшъёс утчаны кутскимы.

Пол: Кема ик дыр ӧз ортчы, ми туж яратӥмы Ганаысь агайёсты но сузэръёсты. Соос отын туж трос вал! Соослэн юн осконзы но Иеговалы оскымон луэмзы милемлы адӟем карымон вал. Ганаын ми 13 ар улӥмы. Собере милемыз ыстӥзы выль интые — Ке́ния шаерысь филиалэ (Шундыӝужанпал Африка). Либериысь но Ганаысь эшъёсмылэсь ми мӧзмимы ке но, ӝог эшъяськимы Кениысь агайёсын но сузэръёсын. Ми выльысь ужаны-тыршыны кутскимы филиалын, кытын уж туж трос вал!

Энн: Улонамы трос кышкыт учыръёс вал. Ӵем дыръя соос, пытьы кельтытэк, уг ортчо. Али ке но мон ыбем яке пуштэм куараез кылӥсько ке, мынам соку ик ӧскеме потэ но суйы-пыды зубектэ. Но Иегова котьку юрттэ, агайёс но сузэръёс пыр но. Мон сое ас вылам шӧдӥ. Мон валай: номыр шоры учкытэк, Иеговалы вӧсяськиськод ке, лыдӟиськиськод ке, пумиськонъёсы но тодытыны ветлӥськод ке, Иегова кужым сётэ котькыӵе ужез быдэстыны.

Пол: Куддыръя милесьтым юало: «Кельше-а тӥледлы татын?» Тодӥськоды-а, туж чебер шаерын но югдур шӧдтэк шорысь воштӥськыны быгатэ. Шаерез сярысь, ми юнгес яратӥськомы агайёсты но сузэръёсты. Соос туж пӧртэмесь ке но, милемыз огазея Иеговаез яратон. Ми малпаськомы вал, милемыз пӧртэм шаеръёсы ыстыло, отысь агайёсты но сузэръёсты юнматон понна. Но зэмзэ вераса, соос милемыз юнмато вал!

Шаерысь шаере ветлыса, ми адӟимы: агайёс но сузэръёс — со зэмзэ ик Иеговалэсь паймымон кузьым! Кытын гинэ ми медам луэ, агайёслы но сузэръёслы луыса ми асьмеды ас дорамы кадь шӧдомы. Ми тодӥськомы: Иеговалы оскиськид ке, со кужым сётоз ваньзэ чиданы (2 Кор. 4:7).