1, 2. Мае ми шӧдӥськомы, куке мукет адямиос милемын асьсэды шонертэм возё?

 ИИСУС вераз палкышно сярысь мадён, кудӥз туж куре вал судьяез солы юрттыны но со пала дурбасьтыны. Иисуслэн дышетскисьёсыз со кышномуртэз туж умой валало вал, малы ке шуоно со вакытэ мукет адямиос огшоры адямиосын ӵем дыръя асьсэды лек возё вал (Лука 18:1—5). Та югдур милемлы но тодмо, малы ке шуоно ваньмы ми шонерлыктэм ужъёсын пумиськылӥськомы.

² Та дуннеын адямиос ог-огзэс ултӥяса но вылтӥяськыса уло. Соин ик, куке соос милемын асьсэды озьы возё, ми ум паймиське (Екк. 5:7). Нош куке сыӵе югдур кенешын кылдэ, со милемыз туж вӧсь карыны быгатэ. Соку тодамы возёно, агайёс но сузэръёс — сьӧлыко адямиос шуыса. Соос милемыз юри вӧсь уг каро. Мар милемлы юрттоз буйгатскыны? Иисуслэн примерез. Ми эскеромы, кызьы со ассэ возиз, куке тушмонъёсыз асьсэды соин лек возизы. Иисуслэсь адӟем карыса, христианъёслы тушмонъёсынызы но асьсэды лякыт возёно бере, агайёсынызы но сузэръёсынызы — уката но. Нош мар шӧдэ Иегова, куке огъя оскисьёсмы яке мукет адямиос милемыз вӧсь каро? Жаля-а со милемыз?

 3. Кытысь ми тодӥськомы, Иегова сюлмаське шуыса, куке ми шонерлыктэм ужъёсын пумиськиськомы?

³ Инмар адӟе ваньзэ, маин ми пумиськиськомы. Со ми понна сюлмаське. «Кузё-Инмар шонерлыкез яратэ» (Пс. 36:28). Иисус вераз, ас дыраз Инмар ми пала ӝегатскытэк дурбасьтоз шуыса (Лука 18:7, 8). Ӝоген Иегова вань курадӟонъёсмес  быдтоз. Со ноку уз лэзьы ни, ми шонерлыктэм ужъёслэсь мед курадӟомы шуыса (Пс. 71:1, 2).

 4. Кызьы Иегова милемлы юрттэ, куке ми шонерлыктэм ужъёсын пумиськиськомы?

⁴ Ми туж возьмаськомы со дырез, ку Иегова вань шуг-секытъёсмес быдтоз (2 Пётр 3:13). Но со милемлы али ик ини юрттэ. Инмар милемыз дышетэ, шонерлыктэм ужъёсын пумиськыкумы, асьмеды шонер возьыны, асьмеды воземенымы сэрен югдур эшшо но урод медам луы шуыса. Со понна со аслэсьтыз Пизэ музъем вылэ ыстӥз. Иисус милемлы самой умой адӟем карон возьматӥз, кызьы асьмеды возёно, куке мукетъёсыз асьсэды милемын урод возё. Со сяна, Инмар пайдаё визь-кенешъёс сётэ, кудъёсыз милемлы юрттыны быгато, шонерлыктэм ужъёсын пумиськыкумы.

ШОНЕРЛЫКТЭМ УЖЪЁСЫН ПУМИСЬКЫКУДЫ, САК ЛУЭ

 5. Малы милемлы сак луоно, шонерлыктэм ужен пумиськыкумы?

⁵ Шонерлыктэм ужен пумиськыку, куддыръя милемлы чидантэм вӧсь луэ, сюлэммы ик чигиське (Екк. 7:7, ВД). Та выллем шӧдонъёссы вал Инмарлэн мукет но оскымон ужась-тыршисьёсызлэн, кылсярысь, Иовлэн но Аввакумлэн (Иов 6:2, 3; Авв. 1:1—3). Сыӵе шӧдонъёс валамон ке но, милемлы сак луоно. Малы ке шуоно, шӧдонъёслы сётскыса, ми быгатӥськомы шонертэм ужъёс лэсьтыны но югдурез эшшо но секытгес карыны.

 6. Малы милемыз дышетэ Авессаломлэн учырез? (Озьы ик учке суредэз.)

⁶ Куке милемын яке яратоно адямиенымы кин ке ассэ шонертэм возе, милям мылкыдмы кылдыны быгатэ ваньзэ ас киямы басьтыны но вӧсь карись адямиез кылкутытыны. Но соин сэрен эшшо но трос шуг-секытъёс кылдыны быгато. Тодамы ваёмы, мар луиз Давид эксэйлэн Авессалом пиеныз. Со лекомиз, куке тодӥз, Амнон агаез Фамарь сузэрзэс эриктэмаз шуыса. Моисейлэн законэзъя Амнонэз сыӵе сьӧлыкез понна виыны кулэ вал (Лев. 20:17). Авессаломлэсь шӧдонъёссэ валаны луэ ке но, Амнонэз виыны солэн правоез ӧй вал (2 Экс. 13:20—23, 28, 29).

 7. Кыӵе шӧдонъёсыз кылдӥзы 72-тӥ псаломез гожъясьлэн, шонерлыктэм ужъёсты адӟыса?

⁷ Ми малпамъя, милемыз вӧсь карись  адями кылкутытэмын ӧвӧл ке, милям малпанмы кылдыны быгатэ, асьмеды шонер воземмы нокыӵе пайда уг вайы шуыса. Ӵапак озьы малпа вал 72-тӥ псаломез гожъясь но. Со адӟе вал, лек адямиос шонерлыко адямиосты ултӥяса возё но со дыре ик майбыр уло шуыса (Пс. 72:12). Солэн сокем мылкыдыз куашказ, Инмарлы ужан-тыршон солы шумпотон уг вайы ни вал. Псаломез гожъясь вераз: «Кызьы меда тае валано шуыса, мон малпай; но мон понна со секыт вал» (Пс. 72:14, 16). Озьы ик со ватсаз: «Нош мон — ӧжытак гинэ пыдъёсы либрак ӧз луэ, ӧжытак гинэ пыдъёсы ӧз волегӟе» (Пс. 72:2). Та выллем югдуре сюриз одӥг агаймы. Нималомы сое Альбе́рто.

 8. Мар луиз одӥг агаен, куке со шонерлыктэм ужен пумиськиз?

⁸ Альберто агаез шонерлыктэм янгыше уськытӥзы, со кенешлэсь коньдонзэ лушказ шуыса. Соин сэрен со тӧро луэмысь дугдӥз, нош кенешысьтыз куд-ог агайёс но сузэръёс сое гажамысь дугдӥзы. Альберто тодаз вае: «Мынам кӧты ӝож вал, мынам туж воже потэ вал». Урод шӧдонъёсыныз сэрен Альберто кенешысь кошкиз но вить ар ӵоже пумиськонъёсы ӧз ветлы. Та учыр возьматэ, мар луыны быгатэ, шонерлыктэм  ужен пумиськыса, ми вожпотонмылы сётскимы ке.

КЫЗЬЫ ИИСУС АССЭ ВОЗИЗ, ШОНЕРЛЫКТЭМ УЖЪЁСЫН ПУМИСЬКЫКУЗ

 9. Кыӵе шонерлыктэм ужъёсын пумиськылӥз Иисус? (Озьы ик учке суредэз.)

⁹ Иисус самой умой адӟем карон возьматӥз, кызьы астэ возёно, шонерлыктэм ужъёсын пумиськыку. Соин асьсэды шонертэм возизы трос адямиос, озьы ик семьяез но. Ӵыжы-выжыосыз малпазы, со визьзэ ыштӥз шуыса. Религиозной кивалтӥсьёс веразы, солы периос кужым сёто шуыса. Нош рим ожгарчиос сое мыскыл каризы, жугизы но виизы (Марк 3:21, 22; 14:55; 15:16—20, 35—37). Иисус ваньзэ тае чидаз но пунэмзэ берыктыны ӧз тыршы. Малы та милемыз дышетэ?

10. Кызьы ассэ возиз Иисус, шонерлыктэм ужъёсын пумиськыкуз? (1 Пётр 2:21—23).

¹⁰ Лыдӟе 1 Пётрлэсь 2:21—23 a. Шуг-секытъёсын пумиськыкумы, милемлы Иисуслэсь адӟем кароно. Со тодэ вал, ку шып улоно, нош ку мар ке но верано (Матф. 26:62—64). Солы пумит верам котькуд кыл бере со ассэ шонере поттыны ӧз туртты (Матф. 11:19). Нош мар ке но веракуз, со тушмонъёссэ ӧз ултӥя но соосты ӧз кышкаты. Мар юрттӥз Иисуслы ассэ шонер возьыны? Со «ваньзэ шонер Судить Карисьлэн кияз сётӥз». Иисус тодэ вал но юн оске вал, Иегова вань шуг-секытъёссэ адӟе но ваньзэ ас дыраз тупатоз шуыса.

11. Мае лыдэ басьтоно, куке ми малпаськомы, мае ке верано-а, ӧвӧл-а шуыса? (Озьы ик учке суредъёсты.)

¹¹ Шонерлыктэм ужъёсыным пумиськыкумы, Иисуслэсь адӟем карыса, милемлы  чаклано, мае ми вераськомы. Куддыръя, югдур эшшо но секыт медам луы шуыса, умойгес луоз шып улыны (Екк. 3:7; Иак. 1:19, 20). Нош куд-ог учыръёсы мар ке но вераны кулэ. Кылсярысь, куке кин ке пала дурбасьтоно яке зэмлыкез утёно (Ап. уж. 6:1, 2). Соку асьмеды зӥбыт-востэм возёно но гажаса вераськоно (1 Пётр 3:15) b.

12. Кызьы возьматыны луэ, ми «ваньзэ шонер Судить Карисьлэн кияз» сётӥмы шуыса?

¹² Иисуслэсь адӟем карыса, ми «ваньзэ шонер Судить Карисьлэн кияз» сётӥськомы. Куке адямиос асьсэды милемын урод возё, ми Иеговалы оскиськиськомы. Ми тодӥськомы, со вань шуг-секытъёсмес тодэ но ваньзэ ас дыраз тупатоз шуыса. Та милемлы юрттэ ваньзэ чиданы. Ми Иеговалы оскиськимы ке но возьмамы ке, ку со ваньзэ тупатоз, ми адямиослы вожмес ум поттэ но соосты адӟемпотостэм ум каре. Нош ми адямиослы вожмес поттыса улӥмы ке, ми урод ужъёс лэсьтомы, шумпотонмес ыштомы но Иеговаен кусыпъёсмес сӧромы, вылды (Пс. 36:8).

13. Мар милемлы юрттоз чиданы шонерлыктэм ужъёсты?

¹³ Валамон, али быдэсак Иисус кадь луыны ми ум быгатӥське. Куддыръя ми кылъёсынымы но ужъёсынымы мукетъёссэ вӧсь кариськомы но со сярысь жаляськомы (Иак. 3:2). Нош куддыръя милемыз вӧсь каро. Куд-ог яраосмы та дуннелэн пумозяз уз бурме. Тӥ но сыӵе учырен пумиськиды ке, юн оске, Иегова шуг-секытъёстэс тодэ шуыса. Солэн Пиез, кудӥз ачиз но трос чидаз, тӥлесьтыд шӧдонъёстэс туж умой вала (Евр. 4:15, 16). Иисусэз музъем вылэ ыстэм сяна, Иегова Библие визь-кенешъёс гожтӥз, кудъёсыз милемлы юртто асьмеды шонер возьыны, шонерлыктэм ужъёсын пумиськыкумы. Ойдолэ эскеромы Римъёслы гожтэтысь сыӵе визь-кенешъёс пӧлысь кыксэ.

«ИНМАРЛЭН ВОЖПОТОНЭЗЛЫ ИНТЫ КЕЛЬТЭ»

14. Мае возьмато «Инмарлэн вожпотонэзлы инты кельтэ» шуэм кылъёс? (Римъёслы 12:19).

¹⁴ Лыдӟе Римъёслы 12:19. Апостол Павел христианъёсты ӧтиз: «Инмарлэн вожпотонэзлы инты кельтэ». Мае возьмато та кылъёс? Ми Иеговалы лэзиськомы ужпум кутыны, ку но кызьы шонерлыкез тупатоно. Тани мар вера Джон агай, кудӥз шонерлыктэм ужен пумиськиз: «Мыным туж кулэ вал асме киям кутыны, вожпотэменым номыр уродзэ медам лэсьты шуыса. Кылъёс, кудъёсыз гожтэмын Римъёслы 12:19, юрттӥзы мыным чидаса возьманы Иеговаез».

15. Малы умойгес луоз возьманы, ку Иегова шуг-секытмес сэрттоз-пертчоз?

¹⁵ Ми возьмамы ке, ку Иегова югдурмес тупатоз, ми пайда басьтомы. Ас выламы оскиськыса, ми юнме гинэ кужыммес быдтомы но сюлмаськыса уломы. Иегова милемлы юрттэт ӵектэ. Со вера кадь: «Кӧня ке чида, мон тыныд одно ик юртто». Ми солэн кылъёсызлы оскимы ке, соку номыр сярысь ум сюлмаське, малы ке шуоно ми тодӥськомы, Иегова котькинлэсь умой ваньзэ тупатоз шуыса. Ӵапак озьы лэсьтӥз Джон агай. Со вераз: «Мон возьмало, ку Иегова шуг-секытме сэрттоз-пертчоз. Малы ке шуоно, монэн ӵошатыса, солэн трослы умойгес пӧрмоз».

«УРОДЛЫКЕЗ ӞЕЧЛЫКЕН ВОРМЫ»

16, 17. Кызьы вӧсяськон юрттэ уродлыкез ӟечлыкен вормыны? (Римъёслы 12:21).

¹⁶ Лыдӟе Римъёслы 12:21. Озьы ик Павел  христианъёсты ӧтиз уродлыкез ӟечлыкен вормыны. Гурезь йылын тодытыкуз, Иисус шуиз: «Тушмонъёстэс яратэлэ, тӥледыз... уллясьёс понна вӧсяськелэ» (Матф. 5:44). Иисус ачиз но та кылъёсъя улӥз. Тодады вае, мае со чидано луиз, куке рим ожгарчиос сое юбо борды кортӵогазы. Син азе пуктыны ик секыт, макем сое вӧсь каризы но ултӥязы.

¹⁷ Но Иисус ӧз лэзьы шонерлыктэм ужъёслы яратонзэ кысыны. Иисус ожгарчиослы уродэн берыктыны ӧз малпа. Со интые Иисус соос понна тазьы вӧсяськиз: «Атае! Соосты простить кар, мар лэсьтэмзэс соос уг тодо уго» (Лука 23:34). Ми милемыз вӧсь карись адямиос понна вӧсяськимы ке, соку каньыл сюлмын уломы но сыӵе адямиослы вожмес ум поттэ.

18. Кызьы вӧсяськон юрттӥз Альберто но Джон агайёслы?

¹⁸ Вӧсяськон юрттӥз кык агайёслы, кудъёсыз сярысь та статьяын вераськиз. Альберто агай вера: «Мон вӧсяськи агайёс понна, кудъёсыз асьсэды монэн шонерлыктэм возизы. Мон кӧня ке пол кури Иеговаез юрттыны мыным кӧтӝожме вунэтыны». Али Альберто нош ик оскымон Иеговалы ужа-тырше. Нош тани мар вера Джон агай: «Мон трос пол вӧсяськи агай понна, кудӥз монэ туж вӧсь кариз. Со вӧсяськонъёс юрттӥзы мыным со шоры шонер учкыны но каньыл сюлмын улыны».

19. Мар милемлы кароно, та дуннеын улытозямы? (1 Пётр 3:8, 9).

¹⁹ Та дуннеын ми ялан шонерлыктэм ужъёсын пумиськыломы. Соин ик ойдолэ азьланяз но Иеговалы вӧсяськомы но солэсь юрттэтсэ куромы, озьы ик, шонерлыктэм ужъёсын пумиськыкумы, асьмеды Иисус кадь возёмы. Со сяна, ойдолэ Библиысь возетъёсъя улэмысь ум дугдэ. Соку Иегова милемыз одно ик бакель кароз. (Лыдӟе 1 Пётрлэсь 3:8, 9.)