ТРОС вын-агайёс но сузэр-апайёс, кудъёсыз куке но мукет шаеръёсы кошкизы, тросгес коньдон поттон понна, али берен берытско вордскем шаеразы, кытын тросгес ивортӥсьёс кулэ. Таӵе вамыш лэсьтыны соослэсь мылкыдзэс ӝутӥз Иеговаез но матысьёссэс яратон (Матф. 22:37—39). Малэсь соос куштӥськизы но кызьы Иегова соосты бакель кариз? Тодомы та сярысь, Камерунысь (шундыпуксёнпал Африка) вын-агайёслэсь но сузэр-апайёслэсь учыръёссэс эскерыса.

Онесим нимо агай 1998-тӥ арын Камерунысь кошкиз но 14 ар ӵоже кунгож сьӧрын улӥз. Одӥг пол кенешлэн пумиськоназ со тодытон уж сярысь тунсыко пример кылӥз. Речь верась шуиз: «Пуктэ син азяды кык эшъёсты, кудъёсыз чорыганы лыктӥзы но пӧртэм интыосы визнанъёсынызы пуксизы. Одӥгез адӟиз ке, эшез тросгес чорыг кутэ шуыса, со эшез доры матэгес лыктоз, дыр, тросгес чорыг кутон понна. Озьы-а?»

Та пример Онесимлэсь мылкыдзэ ӝутӥз Камерунэ берытскон сярысь малпаськыны. Со шаерысь трос адямиослэн Библиез дышетэмзы потэ вал. Соин ик отысь ивортӥсьёслы юрттэт кулэ вал. Но Онесим сюлмаськиз, сомында аръёс ӵоже кунгож сьӧрын улыса, быгатоз-а со вордскем шаераз улонлы выльысь дышыны. Соин ик со Камерунэ нырысь ӝыны арлы ветлӥз. Нош собере, 2012-тӥ арын, отчы улыны берытскиз.

Онесим пальпотыса тодаз вае: «Мыным нош ик дышоно вал пӧсь куазьлы но чылкак мукет улонлы. Эксэйлык юртын нош ик пуконо луиз чурыт скамьяос вылын. Но мон тырши саклыкме висъяны солы, мар сярысь вераськиз кенешлэн пумиськонъёсаз, но небыт креслоос сярысь ӧй малпаськи ни».

Онесим 2013-тӥ арын кышно басьтӥз Жеральдина нимо сузэрез, кудӥз Камерунэ берытскиз Франциын укмыс ар ӵоже улэмез бере. Соос Иеговалы ӵош ужазы-тыршизы но Иеговалэсь эриксэ улоназы котьку нырысетӥ интые пуктӥзы. Кызьы Иегова соосты бакель кариз? Онесим вера: «Ми дышетскимы Эксэйлыкез тодытӥсьёслы школаын, нош али Вефильын ужаськомы-тыршиськомы. Берпуметӥ ар куспын милям кенешамы 20 адями пылатӥськиз. Зэм но, али мон „трос чорыго“ интыын ужасько-тыршисько» (Марк 1:17, 18). Жеральдина ватса: «Иегова монэ сокем бакель кариз, кызьы мон ӧй но малпа».

Жюдит нимо сузэрлэн, кудӥз Америкалэн Огазеяськем Штатъёсаз улыны кошкиз, туж потэ вал тодытон уже тросгес пыриськемез. Со тодаз вае: «Камерунэ семьяе доры бертылэмелы быдэ мон со интыын улӥсьёсын Библиез дышетыны кутскылӥ. Соосын люкиськыкум, мон бӧрдытэк уг чидаськы вал». Нош вордскем шаераз улыны вылысь берытскыны Жюдит ӧз дӥсьты. Солэн умой ужез вал, кудӥзлы луыса со Камерунын  улӥсь атайзэ эмъян понна коньдон тырыны быгатэ вал. Озьы ке но со Иеговалы оскиськиз но вордскем шаераз берытскиз. Жюдит вера, Огазеяськем Штатъёсын ӵошатыса, Камерунысь огшоры улонлы дышыны солы секыт вал шуыса. Со туж куриз Иеговаез, со солы воштӥськонъёслы дышыны мед юрттоз шуыса, но Иегова вӧсяськонъёсызлы ответ сётӥз: солы туж юрттӥзы вын-агайёс но сузэр-апайёс, озьы ик ёросэз чаклась но солэн кышноез.

Со дырез тодаз вайыса, Жюдит вера: «Куинь ар куспын пылатӥськизы ньыль адямиос, кудъёсыныз мон Библиез дышетӥ». Со нимысьтыз пионер луыса ужаз-тыршиз, нош али Сам-Кастель картэныз мыныса-ветлыса ужан-тыршонэ пыриське. Нош мар луиз Жюдитлэн атаеныз? Ӵыжы-выжыосыныз ӵош Жюдит быгатӥз шедьтыны кунгож сьӧрысь эмъюртэз, кудӥз соглаш кариськиз дун тырытэк атаезлы операция лэсьтыны. Шумпотыса вераны луэ, операция умой ортчиз.

Виктор агай Камерунысь Канадае кошкиз. Со дышетскиз университетын. Но «Возьмаськон башняысь» вылӥ образование сярысь статьяез лыдӟыса, со ужпум кутӥз университетын дышетсконзэ куштыны но, профессия басьтон понна, вакчи курсъёс ортчыны. Со тодаз вае: «Талы луыса мон вазьгес ужаны кутски, но быгатӥ быдэстыны сое, мар сярысь кемалась малпай вал ини,— пионер луи». Кӧня ке дыр ортчыса, Виктор Каролина сузэрез кышно басьтӥз. Соос малпазы Камерунэ ветлыны. Куке соос отысь филиалын вал, вын-агайёс соослэсь мылкыдзэс ӝутӥзы Камерунын ужан-тыршон сярысь малпаськыны. Виктор азьланьтэ: «Ми валамы, милемлы номыр уг люкеты шуыса. Ми огшоры улӥмы, соин ик дась луыса та ӧтёнлы вазиськимы». Каролиналэн тазалыкеныз герӟаськем куд-ог шуг-секытъёсыз вал ке но, соос ужпум кутӥзы Камерунэ кошкыны.

Камерунын Виктор но Каролина азьланьтӥзы пионеръёс луыса ужаны-тыршыны но тунсыкъяськись адямиосын Библиез дышетӥзы. Кӧня ке дыр ӵоже соос люкам коньдонэнызы улӥзы. Нош собере кӧня ке толэзьлы ветлӥзы Канадае, коньдон поттон понна, но берен берытскизы. Кызьы Иегова соосты бакель кариз? Соос Эксэйлыкез тодытӥсьёслы школаын дышетскизы, нимысьтыз пионеръёс луыса ужазы-тыршизы, нош али Иеговалы ужан-тыршонэн герӟаськем пуктӥськон-лэсьтӥськон бордын ужало. Виктор вера: «Ми дышем сямъя улонмес кельтӥмы, Иеговалы оскиськимы но, со милемлы юрттӥз».

Ален агай, кудӥз Германиын университетын дышетскиз, 2002-тӥ арын лыдӟиз «Егитъёс, малы тӥ улондэс сӥзёды?» буклетэз. Та буклет солэсь мылкыдзэ ӝутӥз выль ужпумъёс пуктыны. 2006-тӥ арын со Ужан-тыршонэз умоятон школаын дышетскиз но, сое ужаны-тыршыны ыстӥзы Камерунэ, кытын со вордӥськиз вал.

Камерунын Ален шедьтӥз уж, кудаз сокем трос ужано ӧй вал. Берлогес со интыяськиз сыӵе уже, кудаз тросгес уждун тыризы. Но со сюлмаськиз, та уженыз сэрен ужан-тыршонлы дырыз ӧжытгес кылёз шуыса. Соин ик, куке солы ӵектӥзы нимысьтыз пионер луыса ужаны-тыршыны, со соку ик соглаш кариськиз. Уж дорысьтыз кузёез Аленлы вераз, уждунзэ но будэтоз шуыса, нош Ален кутэм ужпумзэ ӧз вошты. Дыр ортчыса, со кышно басьтӥз Стефани нимо сузэрез, кудӥз трос аръёс ӵоже Франциын улӥз. Кыӵе шуг-секытъёсын пумиськиз Стефани, Камерунэ кошкыса?

Стефани вера: «Мон аллергиен курадӟыны кутски, озьы ик тазалыкеным герӟаськем куд-ог  шуг-секытъёс кылдӥзы. Но мон ялан эмъяськисько, соин ик та шуг-секытъёс монэ ӧжытгес курадӟыто ини». Иегова та кузпалъёсты чидамзы понна бакель кариз. Ален вера: «Одӥг пол ми мынӥмы палэнэ интыяськем Кате гуртэ. Отын ми куд-ог адямиосын Библиез дышетыны кутскимы, нош собере дышетонмес телефон пыр азьланьтӥмы. Со дышетскисьёс пӧлысь кыкез пылатӥськизы но, Кате гуртын группа кылдытэмын вал». Стефани ватса: «Адямиослы улонзэс Иеговалы сӥзьыны юрттэмлэсь бадӟым шумпотон ӧвӧл ни. Сыӵе шумпотонэз ми татын трос пол шӧдӥмы». Али Ален но Стефани мыныса-ветлыса ужан-тыршонэ пырисько.

Жизель нимо сузэр пылатӥськиз Италиын, кытын эмъясьлы дышетске вал. Солэн сюлмаз ик пыриз кузпалъёслэн примерзы, кудъёсыз соин Библиез дышетӥзы. Со кузпалъёс пионеръёс луыса ужазы-тыршизы но огшоры улӥзы. Жизельлэн но ужан-тыршонэ тросгес пыриськемез потӥз, соин ик, берпуметӥ курсын дышетскыкуз, пионер луиз.

Жизельлэн, тодытон уже тросгес пыриськон понна, Камерунэ берытскыны мылкыдыз вал, но сое мар ке но сюлмаськытӥз. Со вера: «Мон сюлмаськи, Италиысь кошкыса, отын улыны правоме ышто, озьы ик отын улӥсь ӵыжы-выжыосы но эшъёсы доры берытскыны уг быгаты ни шуыса». Озьы ке но 2016-тӥ арын куартолэзе Жизель Камерунэ берытскиз. Дыр ортчыса, со Леонс агайлы бызиз, но, филиаллэн ӵектэмезъя, соос кошкизы Айос каре, кытын тросгес тодытӥсьёс кулэ вал.

Кызьы соос улӥзы Айос карын? Жизель тодаз вае: «Ӵемысь быдэс арняосын ми тылтэк улӥмы. Соин ик телефонъёсмес зарядить карыны ӧм быгатэ — ӵем дыръя соос ӧз ужалэ. Мон дышетски тылскем вылын пӧраськыны, нош вулы ми ветлӥмы пеймыт дыръя, куке ошмес дурын адямиос трос ӧй вал ни. Вуэз ми пичи уробоен нуллӥмы, сюресмес фонарикен югдытыса». Кызьы кузпалъёс та шуг-секытъёс пыр потыны быгатӥзы? Жизель вера: «Милемлы Иеговалэн духез юрттӥз, ми асьмеос ог-огмес юнматылӥмы, нош эшъёсмы но ӵыжы-выжыосмы мылкыдмес лӧпкытъязы но куддыръя коньдонэн юрттӥзы».

Шумпотэ-а Жизель вордскем шаераз берытскемезлы? Со юн мылкыдын вера: «Ми туж шумпотӥськомы! Шуг-секытъёс палэнтӥ ӧз ортче ке но, ми соосты вормимы. Табере ми Леонсэн тодӥськомы: ми лэсьтӥмы сое, мае кулэ вал лэсьтыны. Ми оскиськомы Иеговалы но шӧдӥськомы, со милемын шуыса». Жизель но Леонс Эксэйлыкез тодытӥсьёслы школаын дышетскизы но, соосты огдырлы нимысьтыз пионеръёс луыса ужаны-тыршыны куризы.

Чорыгасьёс сямен, кудъёсыз урод куазен но зарезь вылэ кышкатэк пото, вын-агайёс но сузэр-апайёс, кудъёсыз вордскем шаеразы берытско, дась луыса тросэзлэсь куштӥсько но юртто соослы, кинъёслэн Эксэйлык сярысь иворез кылэмзы потэ. Иегова ноку уз вунэты соослэсь тыршемзэс но яратонзэс, кудзэ соос солэн нимыз понна ужаса-тыршыса возьматӥзы (Неем. 5:19; Евр. 6:10). Тӥ кунгож сьӧрын улӥськоды ке но вордскем шаерады тросгес тодытӥсьёс кулэ ке, быгатӥськоды-а тӥ берен берытскыны? Берытскыса тӥ адӟоды, кызьы Иегова тӥледыз жалятэк бакель кароз (Мад. 10:22).