Мон вордӥськи 1983-тӥ арын. Мынам умой тазалыке вал. Куке мыным дас арес вал, мынам быдэс мугоры туж зол висьыны кутскиз. Нош кык ар пала ортчыса, мон шӧдӥ, вырыны уг быгатӥськы шуыса: одӥг ӵукна сайкаса, кызьы гинэ ӧй тыршы, пыдъёсме выртыны ӧй быгаты. Со дырысен мон ветлыны уг быгатӥськы. Со сяна, висеменым сэрен, мон будэмысь дугдӥ, но али мон со ӝужда ик, кыӵе вал пичи дыръям.

Одӥг пол ми доры лыктӥзы кык кышномуртъёс, Иеговалэн Адӟись-Ивортӥсьёсыз. Со дырлы мон кӧня ке толэзьёс ӵоже дорысьтым ӧй пота ни. Ӵем дыръя мон тодмотэм адямиослэсь ватскисько вал, нош со учыре соосын вераськыны малпай. Соос веразы рай сярысь. Та мыным тодам вайытӥз сое, мае мон кылӥ вить арес дыръям. Соку гуртамы толэзьлы быдэ Суринамысь Джетро нимо миссионер вуылэ вал. Со атаеным Библиез дышетӥз. Джетро котьку ассэ монэн лякытэн возиз. Со мыным кельше вал. Озьы ик песятае но песянае ветлӥзы Адӟись-Ивортӥсьёслэн пумиськонъёсазы, кудъёсыз милям гуртамы ортчытъяськизы, но куддыръя монэ сьӧразы басьтылӥзы. Соин ик, куке Флоренс, со кышномуртъёс пӧлысь одӥгез, юаз мынэсьтым, потэ-а мынам тросгес тодэме шуыса, мон соглаш кариськи.

Мукет дыръя Флоренс лыктӥз картэныз, Джастусэн. Соос монэн Библиез дышетыны кутскизы. Куке соос валатскизы, мон лыдӟиськыны уг быгатӥськы шуыса, соос монэ дышетыны кутскизы. Кӧня ке дыр ортчыса, мон ачим лыдӟиськыны быгатӥ ини. Берлогес та кузпалъёсты Суринаме ужаны-тыршыны ыстӥзы. Жаляса верано, Ореаллаын ӧй вал нокин, кин монэн азьланяз но Библиез дышетыны быгатысал. Но шумпотоно, Иегова монэ ноку ӧз вунэты шуыса.

Ӝоген гуртамы вуиз Флойд нимо пионер. Коркась корка тодытыкуз, со ми доры но пыриз. Куке со Библиез дышетон сярысь вераз, мон пальпотӥ. Со юаз: «Малы тон пальпотӥськод?» Мон солы верай, мон «Мар возьма милесьтым Инмар?» брошюраез дышетӥ ини но «Тодон-валан, кудӥз пырак улонэ нуэ» книгаез a дышетыны кутски шуыса. Озьы ик валэктӥ, малы дышетонмы дугдӥз. Флойд та книгаысь кылем люкетъёсты монэн дышетӥз, но собере сое мукет интые ужаны-тыршыны ыстӥзы. Озьы мон нош ик дышетӥсьтэк кыли.

Нош 2004-тӥ арын Ореаллае лыктӥзы кык нимысьтыз пионеръёс, Гранвилл но Джошуа. Тодытыкузы  соос мон доры пыризы но Библиез дышетыны ӵектӥзы. Мон нош пальпотӥ но кури соосты «Тодон-валан» книгаез монэн кутсконысеныз ик дышетыны. Мынам тодэме потӥз: дышетозы-а соос монэ солы ик, малы дышетӥзы азьвыл дышетӥсьёсы. Гранвилл вераз, гуртамы кенешлэн пумиськонъёсыз ортчытъясько шуыса. Мон ог дас ар ӵоже дорысьтым ӧй пота ини, но мынам туж потӥз пумиськонэ вуылэме! Гранвилл мыным юрттӥз: со мон доры пыриз, сӧсыръёслы тупатэм креслое пуксьытӥз но Эксэйлык юртэ нуиз.

Берлогес Гранвилл мынэсьтым мылкыдме ӝутӥз Инмарлы ужан-тыршон школае гожтӥськыны. Со вераз: «Тон ветлыны уд быгатӥськы, но вераськыны быгатӥськод. Куке но тон вань адямиослы дасям речь вералод. Одно ик вералод!» Солэн кылъёсыз монэ юнматӥзы.

Мон Гранвиллэн ӵош тодытыны кутски. Жаляса верано, сӧсыръёслы тупатэм креслоын выро-гопо сюресъёстӥ ветлыны капчи ӧй вал. Соин ик мон кури Гранвиллэз монэ пичи уробоен нуллыны. 2005-тӥ арын оштолэзе мон пылатӥськи. Ӝоген вын-агайёс дышетӥзы монэ публикациос понна кылкутыны но Эксэйлык юртысь куараез бадӟыматӥсь аппаратураез чакланы.

2007-тӥ арын семьямы бадӟым куректонэн пумиськиз. Атае, пыжен уякуз, шудтэм учыре шедиз но, кӧня ке нунал ортчыса, кулӥз. Со вакытэ милемлы туж секыт вал. Гранвилл милемын ӵош вӧсяськиз но, Библиысь буйгатӥсь кылъёсты вераса, юнматылӥз. Нош кык ар ортчыса, эшшо одӥг туж кышкыт учыр луиз — пыж, кудаз Гранвилл вал, выйиз, но со кулӥз.

Пичи кенешмы туж куректӥз. Мукет тӧромы милям ӧй вал, кенешлы юрттӥсь гинэ. Гранвиллэн кулэменыз, мынам сюлмы ик чигиськиз, малы ке шуоно со оскымон эше вал. Со котьку юрттӥз мыным Иеговаен кусыпъёсме юнматыны, озьы ик мукет удысъёсын но. Солэн кулэмез бере нырысетӥяз пумиськонын, «Возьмаськон башняез» эскерон дыръя, мон статьяез лыдӟисько вал. Нырысетӥ кык абзацъёсты лыдӟеме бере мынам пушкы тыриз но, синвуосы асьсэос васькыны кутскизы — мон лыдӟонме азьланьтыны ӧй быгаты ни.

Кӧня ке дыр ортчыса, милемлы юрттон понна, мукет кенешысь вын-агайёс лыктӥзы но, мынам мылкыды ӝутскиз. Со сяна, филиал Ореаллае ужаны-тыршыны ыстӥз нимысьтыз пионерез, Коджо нимо агаез. Мон шумпотӥ, анае но выны Библиез дышетыны кутскизы но пылатӥськизы шуыса. 2015-тӥ арын южтолэзе мон кенешлы юрттӥсь луыса ужаны-тыршыны кутски. Кӧня ке дыр ортчыса, мон нырысетӥзэ вань адямиослы дасям речьме верай. Со нуналэ мон пальпотыса тодам вайи Гранвиллэсь кылъёссэ, кудъёссэ со мыным вераз трос аръёс талэсь азьло: «Куке но тон вань адямиослы дасям речь вералод. Одно ик вералод!» Сюлэмы тау каронэн пачылмыса, мынам синвуосы ик быгыльскизы.

JW Broadcasting^® сайтысь мон тодӥ Иеговалэн Адӟись-Ивортӥсьёсыз сярысь, кудъёсызлэн мынам выллем югдурзы. Та вын-агайёс но сузэр-апайёс висё ке но, соос лэсьто сое, мае быгато, но шумпотыса уло. Соос кадь ик, мынам но вань кужмысьтым Иеговалы ужаме-тыршеме потэ. Соин ик мон пионер луи. Нош 2019-тӥ арын куарусёнэ мынам шумпотон понна бадӟым муге вал. Мон тӧро луыса ужаны-тыршыны кутски! Табере мон сюлмаськисько кенешмы сярысь, кудаз 40 пала ивортӥсьёс тыршо.

Мон туж тау карисько вын-агайёслы но сузэр-апайёслы, кудъёсыз монэн Библиез дышетӥзы но тодытыны юрттӥзы. Нош тужгес бадӟым тау шуисько Иеговалы, кудӥз монэ ноку ӧз вунэты.