1. Мар милемлы юрттоз, куке малпаськомы, милемлы нокин юрттыны уз быгаты ни шуыса? (Псалтирь 117:5—7).

 ВАЛ-А улонады сыӵе вакытъёс, куке тӥ малпады, тӥледлы нокин юрттыны уз быгаты ни шуыса? Куддыръя тросэз озьы малпало, Иеговалэн оскымон ужась-тыршисьёсыз но (3 Экс. 19:14). Тӥ но сыӵе ик югдуре сюриды ке, эн вунэтэ Иеговалэсь сётэм кылзэ: «Уг кельты тонэ, уг кушты тонэ». Соин ик тӥ юн осконэн вераны быгатӥськоды: «Уг кышка, Кузё-Инмар мон палан» (Евр. 13:5, 6). Апостол Павел гожтӥз та кылъёсты Иудеяысь вын-агайёслы но сузэр-апайёслы асьме вакытысь 61-тӥ ар котырын. Павеллэн кылъёсыз тодамы вайыто сое, кыӵе шӧдонъёсыз вал 117-тӥ Псаломез гожъясьлэн. (Лыдӟе Псалтирез 117:5—7.)

2. Мае ми эскеромы та статьяын но малы?

² Псаломъёсты гожъясь сямен, апостол Павел ас вылаз шӧдӥз, Иегова солы Юрттӥсь вал шуыса. Кылсярысь, асьме вакытысь 58-тӥ ар котырын, Павел кораблен мыныку, зарезь вылын кужмо сильтӧл ӝутскиз (Ап. уж. 27:4, 15, 20). Та учырын, озьы ик солэсь азьвыл но, Иегова Павеллы пӧртэм сямен юрттӥз: 1) Иисус но кылчинъёс пыр, 2) кузёос пыр, 3) вын-агайёс но сузэр-апайёс пыр. Павеллэн улонысьтыз учыръёсты эскерыса, ми эшшо но юнгес оскомы Иеговалы, кудӥз кылзэ сётэ, юрттэт курыкумы, милемлы но ответ сётоз шуыса.

3. Мар сярысь Павел малпаз, вылды, но малы?

³ Павеллы юрттэт кулэ вал. Асьме вакытысь 56-тӥ ар котырын, куке Павел Иерусалимысь храме лыктӥз, со вылэ адямиос урдскизы. Соос Павелэз гыж кыскыса храмысь поттӥзы но сое виыны малпазы. Мукет нуналаз сое Сӥнедрион азе султытӥзы. Тушмонъёсыз сое кесяны дась вал (Ап. уж. 21:30—32; 22:30; 23:6—10). Соку Павел малпаз, вылды: «Кӧня эшшо мон чиданы быгато на меда?»

4. Кызьы Иегова юрттӥз Павеллы Иисус пыр?

⁴ Кызьы соос юрттӥзы Павеллы? Павелэз кырмемзы бере вуонояз уе со вӧзы Иисус султӥз но вераз: «Эн кышка, Павел! Кызьы Иерусалимын тон Мон сярысь ивортӥд, озьы ик Римын но тыныд ивортоно луоз» (Ап. уж. 23:11). Макем дырыз дыръя Иисус та кылъёсты вераз! Со Павелэз ушъяз Иерусалимын тодытэмез понна. Озьы ик со кылзэ сётӥз, Павел Риме умоен вуоз но отын тодытоз шуыса. Таӵе оскытонэз кылыса, Павел номырлэсь ӧз кышка ини, дыр,— нылпи кадь ик, кудзэ атаез ки вылаз ӝутӥз.

5. Кызьы Иегова юрттӥз Павеллы кылчин пыр? (Учке вылбамысь суредэз.)

⁵ Кыӵе эшшо шуг-секытэн пумиськиз на Павел? Иерусалимын луэм учыръёс бере ог кык ар ортчыса, Павелэз Италие ыстӥзы. Кораблен мыныкуз, зарезь вылын сокем кужмо сильтӧл ӝутскиз, корабль вылын ужасьёс но соин мынӥсьёс утиськыны осконзэс но ыштӥзы вал ини. Но Павел ӧз кышка. Малы? Кораблен мынӥсьёслы со валэктӥз: «Та уе Инмарлэн Кылчинэз мон азе султӥз,— Инмарлэн мон, Инмарлы мон ужаса-тыршыса улӥсько,— со мыным шуиз: „Эн кышка, Павел! Тыныд кесарь азе султоно на, но тани, Инмар ваньзэс тонэн ӵош уясьёсты улэп кельтоз”». Кык ар талэсь азьвыл Иегова Иисус пыр Павелэз оскытӥз вал, со умоен Риме вуоз шуыса. Нош табере Инмар сыӵе ик оскытон кылчин пыр сётӥз. Озьы ик луиз (Ап. уж. 27:20—25; 28:16).

6. Иисуслэн кыӵе кылсётонэз милемыз юнматыны быгатэ? Валэктэ.

⁶ Кызьы соос юртто милемлы? Иисус Павеллы юрттӥз бере, милемлы но юрттоз. Вань дышетскисьёсызлы со кылзэ сётӥз: «Вань нуналъёсы, дунне бырытозь, Мон тӥледын огазьын» (Матф. 28:20). Та кылъёс милемыз юнмато. Улонамы туж секыт вакытъёс луо. Кылсярысь, ми туж кайгыриськомы, куке матысь адямимы  кулэ. Соин сэрен сюлэммы трос аръёс ӵоже вӧсь луыны быгатэ. Озьы ик секыт луэ, куке пересьмиськомы яке кема дыр ӵоже мылкыдмы куашкамын. Но ми быгатӥськомы ваньзэ чиданы, малы ке шуоно Иисус «вань нуналъёсы» милемын огазьын, улонмылэн самой секыт вакытъёсаз но (Матф. 11:28—30).

7. Кызьы Иегова юрттэ милемлы, Усьтӥськонэз 14:6 лыдэ басьтыса?

⁷ Инмарлэн Кылыз оскытэ, Иегова милемлы кылчинъёс пыр юрттэ шуыса (Евр. 1:7, 14). Кылсярысь, кылчинъёс юртто милемлы, куке ми Эксэйлык сярысь ӟеч иворез тодытӥськомы ваньмызлы — «вань выжыослы, пӧртэм кылын вераськисьёслы, калыкъёслы, улыослы-бечеослы». (Лыдӟе Усьтӥськонэз 14:6; Матф. 24:13, 14.)

8. Кызьы Иегова юрттӥз Павеллы кузёос пыр?

⁸ Кызьы соос юрттӥзы Павеллы? Кызьы гожтэмын вал ини, асьме вакытысь 56-тӥ арын Иисус Павелэз оскытӥз, со Риме умоен вуоз шуыса. Нош Иерусалимысь куд-ог иудейёс Павелэз кутыны но виыны малпазы. Куке та сярысь тодӥз Клавдий Лисий, Римысь сюрс муртэн кивалтӥсь, со Павеллы юрттӥз. Клавдий Павелэз соку ик келяз Иерусалимысь Кесарие, кытчыозь 105 иськем мыноно вал. Павелэз утён понна, кӧня ке сю ожгарчиос пуктэмын вал. Кесариын Феликс «Павелэз Иродлэн преторияз пытсэтын возьыны косӥз» (Ап. уж. 23:12—35).

9. Кызьы Павеллы юрттӥз Фест кивалтӥсь?

⁹ Кык ар ортчыса, асьме вакытысь 58-тӥ арын, Павел пытсэтын вал на. Феликс интые Фест кивалтыны кутскиз. Иудейёс сое туж куризы Павелэз Иерусалимын судъяны. Но Фест соглаш ӧз кариськы. Со тодӥз, луоз, иудейёс Павелэз «сюрес вылысен... кескич амалэн виыны малпазы» шуыса (Ап. уж. 24:27—25:5).

10. Кыӵе ужпум кутӥз Фест, куке Павел кесарьлэсь судзэ куриз?

¹⁰ Берлогес Павел Кесариын суд азьын сылӥз. Фест, «иудейёслы кельшыны-яраны тыршыса», Павеллэсь юаз: «Та ужъя Иерусалимын суд лэсьтэмме возьмаськод-а, отчы мынэмед потэ-а?» Павел тодӥз, Иерусалимын сое виыны быгатозы шуыса. Озьы ик со тодӥз, мар кароно, утиськон понна, Риме вуон понна но ужан-тыршонзэ азьланьтон понна. Павел Фестлы вераз: «Кесарьлэсь судзэ курисько». Соку Фест кенешен вераськемез бере шуиз: «Тон кесарьлэсь судзэ курид бере, кесарь доры ик мынод». Фестлэн кутэм ужпумез Павеллы утиськыны юрттӥз. Ӝоген со Римын вал ини, сое виыны малпась тушмонъёсызлэсь кыдёкын (Ап. уж. 25:6—12).

11. Исаиялэн кыӵе кылъёсыз сярысь малпаськиз, дыр, Павел?

¹¹ Италие ыстэмзэс возьмакуз, Павел малпаськиз, дыр, Исаия пророклэн кылъёсыз сярысь, кудъёсыз Иеговалэн тушмонъёсызлы верамын вал: «Малпанъёстэс малпалэ, но соос куашкалозы; куспады кенеше, но со уз быдэсмы, уго Инмар — милемын!» (Ис. 8:10). Павел тодӥз, Иегова солы юрттоз шуыса. Та сое туж юнматӥз вуоно шуг-секытъёс азьын.

12. Кызьы Юлий ассэ возиз Павелэн но кинлэсь юрттэмзэ Павел адӟиз, вылды, та учырын?

¹² Павелэз Италие ыстӥзы. Сое чаклан понна, пуктӥзы Юлиез, Римысь сю солдатэн кивалтӥсез. Со дырысен Павеллэн улонэз быдэсак Юлий киын вал: та кивалтӥсь  быгатэ вал жильыетын пукись адямилэсь улонзэ чиданы луонтэм карыны яке сое жаляны. Кызьы ассэ возиз Юлий? Мукет нуналаз, куке корабль, Риме мыныкузы, нырысетӥзэ дугдӥз, Юлий «адямиез яратӥсь луэмзэ возьматӥз» но «Павелэз эшъёсыз доры ветлыны лэзиз, соос мед юрттӥськысалзы солэн кыӵе ке кулэяськонъёсыз вань ке шуыса». Берлогес со Павеллэсь улонзэ но утиз. Кызьы? Корабль, кудӥныз соос мынӥзы, пазьгиськиз. Жильыетын пукисьёс медаз пегӟе шуыса, ожгарчиос соосты виылыны малпазы. Нош Юлий, «Павеллэсь улонзэ утемез потыса, соосты та малпанзылэсь куштӥськытӥз». Та лякыт кивалтӥсь пыр Павел Иеговалэсь юрттэмзэ адӟиз, вылды (Ап. уж. 27:1—3, 42—44).

13. Мар карыны кузёослэсь мылкыдзэс ӝутыны быгатэ Иегова?

¹³ Кызьы соос юртто милемлы? Кулэ дыръяз Иегова кужмо святой духсэ уже кутыны быгатэ, кузёослэсь мылкыдзэс ӝутон понна солэсь эриксэ быдэстыны. Соломон эксэй гожтӥз: «Эксэйлэн сюлмыз — Кузё-Инмарлэн кияз визыл кошкись ву кадь: кытчы берыктэмез потэ, сое Со отчы берыктэ» (Мад. 21:1). Мае возьмато та кылъёс? Адямиос, музъемез гудыса, шурез мукет ӧре лэзё. Озьы ик Иегова но святой духез пыр кивалтӥсьёслэсь малпанзэс «мукет ӧре» лэзьыны быгатэ, соос солэн калыкезлы пайда вайись ужпумъёс мед кутозы шуыса. (Ӵошатэ Ездралэсь 7:21, 25, 26.)

14. Кин сярысь ми вӧсяськыны быгатӥськомы, Апостолъёслэсь ужъёссэс 12:5 лыдэ басьтыса?

¹⁴ Мар карыны быгатӥськомы ми? Ми вӧсяськыны быгатӥськомы «эксэйёс понна, вань кузёос понна», куке соослы ужпум кутоно, кудӥз Иеговалэн Адӟись-Ивортӥсьёсызлэн улонэнызы но ужан-тыршонэнызы герӟаськемын (1 Тим. 2:1, 2; Неем. 1:11). Нырысетӥ даурысь христианъёс сямен, ми но Иеговалы ӟырдыт вӧсяськиськомы пытсэтын пукись вын-агайёс но сузэр-апайёс понна. (Лыдӟе Апостолъёслэсь ужъёссэс 12:5; Евр. 13:3.) Озьы ик ми вӧсяськыны быгатӥськомы пытсэтысь возьмасьёс сярысь, кудъёсыз вын-агайёсмес но сузэр-апайёсмес чаклало. Ми Иеговаез сюлворыса курыны быгатӥськомы возьмасьёслэсь мылкыдзэс ӝутыны, Юлий сямен, Инмарлэн ужась-тыршисьёсыныз асьсэды лякытэн возьыны (Ап. уж. 27:3).

15, 16. Кызьы Иегова Павеллы юрттӥз Аристарх но Лука пыр?

¹⁵ Кызьы соос юрттӥзы Павеллы? Павел Риме мыныку, Иегова солы юрттылӥз вын-агайёс но сузэр-апайёс пыр. Тани куд-ог учыръёс.

¹⁶ Павеллэн кык оскымон эшъёсыз, Аристарх но Лука, соин ӵош Риме мыныны малпазы b. Павелэн ӵошатыса, соос ӧз тодэ, Риме умоен вуозы-а, уз-а шуыса. Озьы ке но, Павелэн ӵош луон понна, соос улонзэс но ыштыны дась вал. Зарезь вылын кужмо сильтӧл ӝутскем бере гинэ Павел вераз, соос утиськозы шуыса. Куке Аристарх но Лука Кесариын корабле пуксизы, Павел Иеговалы вань сюлмысьтыз тау кариз, луоз, солы юрттон понна, сокем кышкасьтэм вын-агайёсты ыстӥз шуыса (Ап. уж. 27:1, 2, 20—25).

17. Кызьы Иегова Павеллы юрттӥз вын-агайёс но сузэр-апайёс пыр?

¹⁷ Риме мыныкуз, Павеллы вын-агайёс но сузэр-апайёс юрттылӥзы. Кылсярысь, Сӥдон карын Юлий Павеллы «эшъёсыз доры ветлыны лэзиз, соос мед юрттӥськысалзы солэн кыӵе ке кулэяськонъёсыз вань ке шуыса». Берлогес Путеол карын Павел но соин ӵош мынӥсьёс вын-агайёсты шедьтӥзы. Со вын-агайёс соосты ас доразы сизьым нунал ӵоже улыны куризы. Та каръёсысь вын-агайёс но сузэр-апайёс сюлмаськизы Павел но соин ӵош мынӥсьёс сярысь, нош Павел соослэсь мылкыдзэс ӝутылӥз, ужан-тыршонэз дыръя луэм учыръёсты вераса. (Ӵошатэ Апостолъёслэсь ужъёссэс 15:2, 3.) Шутэтскемзы бере Павел, Аристарх но Лука ӵош сюрессэс азьланьтӥзы (Ап. уж. 27:3; 28:13, 14).

18. Малы Павел Инмарлы тау кариз но мылкыдыз капчи луиз?

¹⁸ Павел, Риме мыныкуз, малпаськиз, вылды, со сярысь, мае гожтӥз та карысь  кенешлы куинь ар талэсь азьло: «Тӥ доры лыктыны кемалась мылкыды вань» (Рим. 15:23). Но соку со ӧз ик малпа, дыр, отчы лыктыкуз, жильыямын луоз шуыса. Макем шумпотӥз, луоз, Павел, куке, Риме вуыкуз, адӟиз христианъёсты, кудъёсыз сое пумитаны потӥзы! Библиын гожтэмын: «Соосты адӟыса, Павеллэн мылкыдыз капчи луиз. Со Инмарлы тау кариз» (Ап. уж. 28:15). Висъялэ саклыктэс: Павел Инмарлы тау кариз. Малы? Малы ке шуоно вын-агайёслэн юрттэмзы пыр со Иеговалэсь юрттэмзэ адӟиз.

19. 1 Пётрлэсь 4:10 лыдэ басьтыса, кызьы Иегова ми пыр юрттыны быгатэ соослы, кинъёслы юрттэт кулэ?

¹⁹ Мар карыны быгатӥськомы ми? Тодӥськоды-а тӥ кинэ ке, кин курадӟе висёнъёс яке мукет шуг-секытъёс сэрен? Яке сое, кинлэн матысь адямиез кулӥз? Тӥ тодӥды ке, кинлы ке юрттэт кулэ шуыса, куре Иеговалэсь, та адямилы мае ке ӟечсэ вераны яке лэсьтыны тӥледлы мед юрттоз шуыса. Оло нош, ӵапак тӥляд кылъёсты но ужъёсты вын-агайлэсь яке сузэр-апайлэсь мылкыдзэ ӝутозы. (Лыдӟе 1 Пётрлэсь 4:10.) c Тӥляд юрттэмдылы луыса, соос нош ик оскозы: Иегова соослы но вера, «Уг кельты тонэ, уг кушты тонэ» шуыса. Макем ми соку шумпотомы, дыр!

20. Малы ми юн осконэн вераны быгатӥськомы: «Кузё-Инмар мон палан»?

²⁰ Павел, Аристарх но Лука сямен, ми но пумиськыны быгатӥськомы зарезь вылысь сильтӧл выллем шуг-секытъёсын. Но ми кышканы кулэ ӧвӧл, малы ке шуоно милемын Иегова. Со юрттэ милемлы Иисус но кылчинъёс пыр. Со сяна, кулэ дыръяз Иегова милемлы кузёос пыр юрттэ. Озьы ик ми пӧлысь тросэз ас вылазы шӧдӥзы, кызьы Иегова святой духсэ кутэ, ужась-тыршисьёсызлэсь агайёслы но сузэръёслы юрттыны мылкыдзэс ӝутон понна. Соин ик ми, Павел сямен, юн осконэн вераны быгатӥськомы: «Кузё-Инмар мон палан: адями мыным мар кароз?» (Евр. 13:6).