1. Мае тодыны тыршо визьмо анай-атайёс нылпиоссы пылатӥськемлэсь азьло?

 БЛОССОМ БРАНДТ, кудӥз пылатӥськиз 1934-тӥ арын 31-тӥ толсуре, тодаз вайылӥз, анай-атаезлы трос толэзьёс ӵоже пылатӥськыны мылкыдыз сярысь вералляз шуыса. Анай-атаез соин трос пол со сярысь вераськылӥзы. Соослэн тодэмзы потэ вал, зэмзэ ик-а нылзы вала, мар быдӟа кыл кутоно луоз пылатӥськемез бере. Туннэ но анай-атайёслэн потэ, нылпиоссы визьмо ужпумъёс мед кутозы шуыса. Нокыӵе мугтэк нылпиослы верад ке, соослы пылатӥськыны вазь на шуыса, со Иеговаен кусыпъёссылы изъян вайыны быгатоз (Иак. 4:17). Визьмо анай-атайёс нылпиоссы пылатӥськемлэсь азьло ик тодыны тыршо, дась-а соос Христослэн дышетскисьёсыз луыны.

2. а) Мар сюлмаськытэ куд-огзэ ёросэз чакласьёсты? б) Мае ми эскеромы таяз статьяын?

 ² Куд-огзэ ёросэз чакласьёсты сюлмаськытэ, кенешъёсын вань шуыса христиан семьяосын будэм егит пиос но нылъёс, кудъёсызлы 20 арес пала ини, но соос та дырозь пылатӥськемын ӧвӧл на. Тросэз соос пӧлысь кенешъёслэн пумиськонъёсаз ветло но тодытон уже пырисько. Соос асьсэды Иеговалэн Адӟись-Ивортӥсьёсыз шуыса лыдъяло, но малы ке но асьсэлэсь улонзэс Иеговалы сӥзьыны но пылатӥськыны уг дырто. Малы? Куд-огъёссэ анай-атайёссы дыртыны ӧз лэзе пылатӥськыны. Та статьяын ми эскеромы ньыль юанъёсты, кудъёсыз анай-атайёсты сюлмаськыто.

3. Мар сюлмаськытӥз Блоссомлэсь анай-атайзэ?

³ Блоссомлэн анаез но атаез, кудъёсыз сярысь нырысетӥ абзацын вераськон мынӥз, сюлмаськизы: пичи ӧвӧл на-а соослэн нылзы, валан понна, малы пылатӥськоно но мар быдӟа кыл кутоно пылатӥськем бере. Соосты валаны луэ. Кызьы анай-атайёслы тодоно, дась-а соослэн пиналзы аслэсьтыз улонзэ Иеговалы сӥзьыны?

4. Кызьы Матфейлэсь 28:19, 20 гожтэм Иисуслэн косонэз анай-атайёслы нылпиоссэс дышетыны юрттэ?

⁴ Лыдӟе Матфейлэсь 28:19, 20. Кызьы верамын вал кылемаз статьяын, Библиын верамын ӧвӧл кӧня аресысен пылатӥськоно. Озьы ке но, умой луоз, анай-атайёс малпаськизы ке, мае возьматэ «дышетэлэ» кыл. Грек кыл, кудӥз Матфейлэсь 28:19 «дышетэлэ» шуыса берыктэмын, возьматэ, адямиез нимысьтыз ужпумен дышетоно, со бератаз Христослэн дышетскисез мед луоз шуыса. Нош дышетскись Иисус Христослэсь дышетонъёссэ тодэ, вала соосты но соосъя улыны мылкыд каре. Соин ик анай-атайёслы ужпум пуктоно — нылпиоссэс пичи дырысенызы ик дышетыны но юрттыны соослы Христослэн пылатӥськем дышетскисез луыны. Зэм, пичи нуныос пылатӥськыны уг быгато. Но, Библия верамъя, Библиысь зэмлыкез валаны но сое яратыны пичи нылпиос но быгато.

5, 6. а) Ку пылатӥськиз, луоз, Тимофей, Библиысь гожтэмез лыдэ басьтоно ке? б) Мар юрттоз шӧдӥсь-валась анай-атайёслы нылпиоссылы юрттыны?

⁵ Тимофей егит дыръяз ик ини Иеговалы ужаны-тыршыны ужпум кутӥз. Апостол Павеллэн верамезъя, Тимофей пичи дырысеныз ик священной Гожтэмъёсты тодэ вал. Тимофейлэн семьяяз ваньзы Иеговалэн ужась-тыршисьёсыз ӧй вал ке но, солэн анаез но песянаез, кудъёсыз еврей калыкысь вал, Тимофеез Инмарлэсь Кылзэ яратыны дышетӥзы. Соин ик Тимофейлэн осконэз юн луиз (2 Тим. 1:5; 3:14, 15). Куке Тимофейлы 20 арес котыр вал, со Христослэн дышетскисез вал ини, но Павел сое ас сьӧраз тодытыса ветлыны басьтӥз (Ап. уж. 16:1—3).

⁶ Зэм, вань пиналъёс одӥг кадь ӧвӧл, соин ик кин ке ӝоггес Инмарен кусыпъёссэ юнматэ, кин ке калленгес. Куд-огъёсыз пичи дырысенызы ини Библиысь зэмлыкез умой валало, визьмо ужпумъёс куто но пылатӥськыны  мылкыдзы сярысь верало. Мукетъёсызлы пылатӥськыны ужпум кутон понна ӧжыт будоно на, дыр. Соин ик шӧдӥсь-валась анай-атайёс нылпиоссэс кужмысь пылатӥськыны уг косо. Соос нылпиоссылы пылатӥськонлы дасяськыны юртто, лыдэ басьтыса сое, кыӵе нылпиоссылэн кусыпъёссы Инмарен. Веранэз ӧвӧл, анай-атайёс туж шумпото, куке нылпиоссы визьмо ужпумъёс куто. (Лыдӟе Мадёнъёсты 27:11.) Но анай-атайёслы вунэтоно ӧвӧл, соос азьын ужпум сылэ шуыса — юрттыны нылпиоссылы Христослэн дышетскисьёсыз луыны. Сое соослы котьку тодазы возёно но юано асьсэлэсь: «Тырмыт-а мынам нылпиелэн тодон-валанэз, ассэ Инмарлы сӥзён но пылатӥськон понна?»

7. Кулэ-а солы, кин пылатӥськыны малпа, Библиысь ваньзэ тодыны? Валэктэ.

⁷ Паймымон ӧвӧл, анай-атайёс, кудъёсыз Инмар азьын кыл куто нылпиоссэс дышетон понна, вань кужымзэс поно ке, нылпиоссы Библиысь зэмлыкез умой мед тодозы шуыса. Но Инмарлы сӥзиськон но пылатӥськон понна, Библиез пыр-поч тодытэк но луоз, малы ке шуоно пылатӥськем бере но вань христианъёслы асьсэлэсь тодон-валанзэс будэтоно. (Лыдӟе Колоссыослы 1:9, 10.) Нош кӧня тодон-валан кулэ пылатӥськон понна?

8, 9. Малы дышетэ милемыз Филиппы карысь тюрьмаын возьмаськисен луэм учыр?

⁸ Тодамы ваёмы нырысетӥ дауре улӥсь семьяез (Ап. уж. 16:25—33). Павел асьме эраысь 50-тӥ ар котырын тодытыса кыкетӥзэ ветлон дыръяз Филиппы каре вуылӥз. Отын Павелэз но Сӥлаез кырмизы но янгыше уськытӥзы. Уйин туж кужмо музъем зурказ но, тюрьмалэн вань ӧсъёсыз усьтӥськизы. Тюрьмаын возьмаськись, пытсэтын пукисьёс ваньзы пегӟизы шуыса малпаменыз, ӧжыт гинэ ассэ ӧз быдты. Но Павел сое дугдытӥз. Павеллэн но Сӥлалэн луонлыксы кылдӥз тюрьмаын возьмаськисьлы но солэн семьяезлы Иисус сярысь вераны. Соослы со ивор туж дуно потӥз, но соос соку ик пылатӥськизы. Малы дышетэ милемыз та учыр?

⁹ Тюрьмаын возьмаськись азьвыл ожгарчи вал, дыр. Со Гожтэмъёсты уг тоды вал. Соин ик, Христослэн дышетскисез луон понна, солы тодоно вал Библиысь валтӥсь дышетонъёсты, валано вал, мае Инмар возьма аслаз ужась-тыршисьёсызлэсь, но мылкыд кароно вал Христослэн дышетонъёсызъя улыны. Вакчи дыр куспын со Священной Гожтэмъёсысь валтӥсь дышетонъёсты тодӥз, валаз, макем соос дуно луо, но валаз, солы ӝегатскытэк пылатӥськоно шуыса. Пылатӥськемез бере но со тодон-валан басьтэмысь ӧз дугды, луоз. Нош табере малпалэ, мар карыны тӥ быгатӥськоды, адӟиськоды ке, пиналды Библиысь валтӥсь дышетонъёсты умой тодэ но соосты яратэ шуыса, озьы ик, вала, малы кулэ сӥзиськыны но пылатӥськыны. Соку тӥ малпалоды, дыр, со кенешысьтыды тӧроослы вазиськыны быгатэ шуыса, кудъёсыз учкозы, тупа-а со пылатӥськон понна  куронъёслы, уг-а a. Пылатӥськемез бере пиналды, мукет христианъёс сямен ик, вань улытозяз гинэ ӧвӧл, нош пырак дауръёс ӵоже, Иегова сярысь тодон-валан басьтэмысь уз дугды (Рим. 11:33, 34).

10, 11. а) Мар малпало куд-ог анай-атайёс? б) Мае тодазы возёно анай-атайёслы?

¹⁰ Куд-ог анай-атайёс малпало, нылпиоссылы вылӥ образование басьтэмзылэсь но умой уж шедьтэмзылэсь азьло пылатӥськыны дыртоно ӧвӧл шуыса. Озьы соос нылпиоссылы умой карыны малпало, дыр. Но со нылпиоссылы пайда ваёз-а? Пумит уз луы-а со Библилы? Кыӵе визь-кенеш сётэ Библия? (Лыдӟе Екклесиастэз 12:1.)

¹¹ Тодамы возьыны кулэ: со, мае ӵектэ та дунне, пумит луэ Иеговалэн эрикезлы но малпанъёсызлы (Иак. 4:7, 8; 1 Иоанн 2:15—17; 5:19). Нылпиосты Шайтанлэсь, солэн дуннеезлэсь но Инмарлы ярантэм малпаськон амаллэсь ваньмызлэсь умой утёз Иеговаен эшъяськон. Анай-атайёс нылпиоссылэсь саклыксэс висъяло ке солы, мар та дуннеысь адямиослы дуно потэ, со быгатоз нылпиоссылы люкетыны но Иеговаен кусыпъёссэс сӧрыны. Яратӥсь анай-атайёслэн уг поты, дыр, Шайтанлэн дуннеез аслэсьтыз малпанзэ нылпиоссылы мед пыӵатоз шуыса со пумысен, мар кулэ шудо луон понна. Зэмзэ ик шудо луыны быгатомы соку гинэ, куке улонамы нырысетӥ интыын луоз Иегова. (Лыдӟе Псалтирез 1:2, 3.)

12. Малы куд-ог анай-атайёслэн потэ, нылпиоссы пылатӥськыны медаз дыртэ шуыса?

¹² Тани мар вераз одӥг сузэр, кудӥзлэн  уг поты вал, нылыз мед пылатӥськоз шуыса: «Мыным туж возьыт, но зэмзэ верано ке, мон кышкасько вал, сое кенешысь поттозы шуыса». Та сузэр кадь ик, куд-ог анай-атайёс малпало, нырысь нылпиоссылы будоно, асьсэды умой возьыны кутсконо, нош собере ини пылатӥськоно шуыса (Ул.-выл. 8:21; Мад. 22:15). Соос тазьы малпаны быгато: «Мынам пиналы пылатӥськемын ӧвӧл ке, сое кенешысь уз поттэ». Нош малы озьы малпаны шонертэм луоз? (Иак. 1:22).

13. Зэмзэ ик-а пылатӥськымтэ адями Иегова азьын кыл уг куты? Валэктэ.

¹³ Веранэз ӧвӧл, анай-атайёслэн потэ, нылпиоссы, пылатӥськемзылэсь азьло, нырысь мед будозы но улонзэс Иеговалы сӥзьыны дась мед луозы шуыса. Но шонертэм луысал малпаны, адями пылатӥськемын ӧвӧл ке, Инмар азьын кыл уг куты шуыса. Малы? Малы ке шуоно ми Иегова азьын пылатӥськемын шуыса гинэ кыл ум кутӥське. Пинал Инмар азьын кыл кутэ со дырысен, куке со валаны кутске, мае Иегова шонерен лыдъя, нош мае шонертэмен. (Лыдӟе Иаковлэсь 4:17.) Соин ик, пиналзэс пылатӥськемлэсь кутэм интые, анай-атайёслы пиналзылы умой пример возьматыны тыршоно. Визьмо анай-атайёс пиналзэс пичи дырысеныз ик Инмарлэсь вылӥ эсэпъёссэ яратыны дышето (Лука 6:40). Со юрттэ пиналзылы сьӧлыклэсь палэнскыны, малы ке шуоно со ачиз тырше Иеговалэн эрикезъя улыны (Ис. 35:8).

14. Кызьы тӧроос юрттыны быгато анай-атайёслы, кудъёсыз нылпиоссылы пылатӥськонлы дасяськыны юртто?

¹⁴ Тӧроос анай-атайёслы юрттозы, нылпиосын Инмарлы ужан-тыршонын ужпумъёс сярысь лякытэн вераськизы ке. Одӥг сузэр ӵемысь тодаз вайылӥз, кызьы одӥг пол, куке солы куать  арес гинэ вал, соин Расселл вын-агай вераськиз. Со вералляз: «15 минут ӵоже со монэн Иеговалы ужан-тыршонын пуктэм ужпумъёсы сярысь вераськиз». Кыӵе емышъёс со вайиз? Сузэр 70 арлэсь кемагес пионер луыса ужаз-тыршиз! Зэм, ӟеч но ушъяса верам кылъёсты адями трос аръёс ӵоже уг вунэты (Мад. 25:11). Со сяна, тӧроос анай-атайёсты но соослэсь нылпиоссэс ӧтьыны быгато Эксэйлык юртын ужаны но нылпиослы сыӵе уж сётыны, кудзэ соос быдэстыны быгатозы.

15. Кызьы вын-агайёс но сузэр-апайёс егитъёслы юрттыны быгато?

¹⁵ Вын-агайёс но сузэр-апайёс быгатозы кенешысь егитъёсын тунсыкъяськыны но Инмар доры матэ кариськыны тыршемзы понна ушъяны соосты. Кылсярысь, пинал кенешын умой малпам но сюлмысь валэктон сётӥз яке сцена вылын дасям ужзэ возьматӥз. Оло нош, со школаын кинлы ке ӟеч иворез вераз яке визь сынаськонлы ӧз сётскы. Тырше соку ик ушъяны сое. Луоз ужпум пуктыны пумиськон азьын яке пумиськон бере кудӥныз ке нылпиен сюлмысь тунсыкъяськыны но соин вераськыны. Солы луыса нылпиос валалозы, соос но бадӟым кенешлэн оглюкетэз луо шуыса (Пс. 34:18).

16, 17. а) Малы нылпиослы пылатӥськыны кулэ? б) Мар понна шумпотэмзы потэ вань анай-атайёслэн? (Учке статья кутсконысь туспуктэмез.)

¹⁶ Нылпиосты «Кузё-Инмарлэн дышетонэз, валэктон-визьманъёсыз вылэ пыкиськыса» будэтон — со анай-атайёслы Инмарен сётэм дано уж (Еф. 6:4; Пс. 126:3). Вашкала израиль калыкын пинал вордскем дырысеныз ик Иеговалы сӥзиськем калыклэн люкетэз луэ вал. Нош туннэ христиан семьяын вордскем нылпиен озьы ӧвӧл. Со сяна, Иеговаез но зэмлыкез яратон нылпилы анай-атаезлэсь уг выжы. Нылпизы вордӥськем дырысен ик анай-атайёслы тодазы возёно, соослэн ужпумзы — Христослэсь дышетскисьсэ будэтыны но юрттыны солы улонзэ Иеговалы сӥзьыны но пылатӥськыны. Солэсь мар ке кулэезгес вань на-а? Адями Инмарлы сӥзиськиз, пылатӥськиз но Инмарлы оскымон ужаз-тыршиз ке, соку гинэ со бадӟым куректон дыръя утиськыны быгатоз (Матф. 24:13).

¹⁷ Блоссом Брандт пылатӥськыны ужпум кутэм бере солэн анаезлэн но атаезлэн тодэмзы потӥз, нылзы улоназ самой кулэ луись вамыш лэсьтыны дась шуыса. Куке соос адӟизы, нылзы дась шуыса, соос пумит ӧз луэ. Блоссом вера, мар кариз атаез пылатӥськон азяз ӝытэ: «Со ваньмес пыдесъяськыны куриз но Инмарлы вӧсяськиз. Атае вераз Иеговалы, со туж шумпотэ шуыса, солэн пичи нылыз аслэсьтыз улонзэ Иеговалы сӥзьыны ужпум кутӥз шуыса». 60 арлэсь тросгес ортчыса но, Блоссом ӧз вунэты сое, мар луиз со ӝытэ. Дуно анай-атайёс, сюлмысь оскиськомы, тӥ но туж шумпотоды шуыса, куке адӟоды, кызьы тӥляд нылпиосты пылатӥськозы, Иеговалы сӥзиськемзэс возьматыса!