1. Мар кароно, ми визьлыко мед луомы шуыса? Кыӵе емышъёс со вае?

 ВИЗЬЛЫК Иегова бордысь потэ, но со сое мукетъёсызлы жалятэк сётэ. Иаковлэн 1:5 гожтэмын: «Тӥ пӧлысь кинлэн ке визьлыкез уг ке тырмы, Инмарлэсь мед куроз. Инмар жалятэк, пыкылытэк ваньмызлы сётэ». Одӥгез амал, кызьы Инмарлэсь визьлыксэ басьтоно,— лэзёно солы асьмеды тупатыны. Визьлык милемыз шонертэм ужъёслэсь утёз но Иеговаен умой кусыпъёс возьыны юрттоз (Мад. 2:10—12). Со сяна, милям пырак дауръёс ӵоже улыны оскиськонмы луоз (Иуда 21).

2. Мар юрттоз милемлы дунъяны Инмарлэсь тупатэмзэ?

² Но сьӧлыко луэммы, сямъёсмы яке мукетыз милемлы люкетыны быгатозы тупатэмез санэ басьтыны но со шоры шонер учкыны. Тупатэмез ми дунъяны кутскиськомы, куке адӟиськомы солэсь пайдазэ но валаськомы, макем юн яратэ милемыз Иегова. Мадёнъёсын 3:11, 12 верамын: «Пие, Кузё-Инмарлэсь вӧсь каронзэ кулэтэм эн кары... Кузё-Инмар уго кинэ яратэ, сое ик вӧсь но каре». Ноку но эн вунэтэ: Иегова милемлы умойзэ гинэ сӥзе. (Лыдӟе Еврейёслы 12:5—11.) Инмар милемыз котькинлэсь умой тодэ. Соин ик, куке со милемыз кыл кутытэ, со ассэ ноку но лек но  сюлэмтэм уг возьы. Та статьяын ми эскеромы тупатон сярысь ньыль юанъёсты: 1) Кыӵе инты басьтэ возиськыны быгатон астэ тупатонын? 2) Кызьы анай-атайёслы асьсэлэсь нылпиоссэс тупатоно? 3) Кызьы учконо визь-кенешъёс шоры, кудъёссэ милемлы христиан кенешын сёто? 4) Мар кыл кутытэмлэсь но вӧсьгес каре?

3. Кызьы пинал возиськись луыны дышетске? Вералэ пример.

³ Адями возиськыны быгатэ ке, соку со быгатэ воштыны но тупатыны аслэсьтыз ужъёссэ но малпанъёссэ. Возиськыны быгатонлыкен нокин но уг вордӥськы, солы дышетскыны кулэ. Кылсярысь, куке пинал велосипедэн ветлыны дышетске, атаез нырысь велосипедзэ кутэ, со медаз усьы шуыса. Собере, пиналызлэн ӧжыт пӧрме ке ини, атаез ӝамдэлы кизэ басьтэ. Нош куке атаез адӟе, пиналыз велосипед вылын умой возиське ини шуыса, со уг кышка но велосипедзэ лэзе. Со выллем ик, куке анай-атайёс чиданзэс возьмато но нылпиоссэс «Кузё-Инмарлэн дышетонэз, валэктон-визьманъёсыз вылэ пыкиськыса» дышето, соос озьы ик нылпиоссэс дышето возиськыны быгатыны но визьлыко луыны (Еф. 6:4).

4, 5. а) Малы возиськыны быгатон «выль адями» луонын бадӟым инты басьтэ? б) Малы кимес лэзёно ӧвӧл, ми «сизьым пол усимы» ке но?

⁴ Сое ик вераны луоз быдэ вуэм адями сярысь но, кудӥз кемалась ӧвӧл Иеговалы ужаны-тыршыны кутскиз. Со возиськыны быгатэ ини, дыр, но зэмлыкын со ляб сылэ на. «Выль адями» луыны дышетскыса но Христослэсь адӟем карыны тыршыса, со пумен зэмлыкын юн сылыны кутске (Еф. 4:23, 24). Зэмлыкын юн сылыны дышетсконын бадӟым инты басьтэ возиськыны быгатон. Солы луыса Иеговалы ужаны-тыршыны кутскем адями «сьӧлыклэсь кышкатэк улонлэсь, та дуннелэн куронъёсызлы тэрытскыса улонлэсь куштӥськыны но таяз улон даурын дун-шектэм, шонерлыко, вӧсяськыса улыны» дышетске (Тит. 2:12).

⁵ Асьмеды ваньмес сьӧлык пала кыске (Екк. 7:20). Но, ми сьӧлыкаськомы ке, со уг возьматы, ми тупатскыны ум быгатэ ни но возиськеммы уг луы шуыса. «Шонер улӥсь мурт сизьым пол усиз ке но, султоз»,— верамын Мадёнъёсын 24:16. Мар юрттоз меда милемлы «султыны»? Асьмелэн кужыммы уз, нош Инмарлэн святой духез. (Лыдӟе 2 Коринфъёслы 4:7.) Возиськыны быгатон духлэн емышез пӧлы пыре.

6. Мар юрттоз милемлы Инмарлэсь Кылзэ умойгес дышетыны? (Учке статья кутсконысь туспуктэмъёсты.)

⁶ Возиськыны мед быгатомы шуыса, кулэ на Инмарлы ӟырдыт вӧсяськыны, Библиез дышетыны но лыдӟеммы вылын малпаськыны. Нош Инмарлэсь Кылзэ дышетон тӥледлы секытэн ке сётӥське? Оло нош, тӥ дышетскыны туж ик уд яратӥське. Соку тодады возе: Иегова тӥледлы юрттоз, тӥ юрттыны лэзиды ке (1 Пётр 2:2). Со понна, нырысетӥез, мар кулэ — со Иеговалы вӧсяськоно но куроно, со милемлы возиськись луыны мед юрттоз шуыса, Библиез дышетыны дыр шедьтон вылысь. Кыкетӥез — вӧсяськеммыя лэсьтоно но пичиен-пичиен ке но дышетоно. Пумен тӥ шӧдоды, Библиез дышетон тӥледлы капчиенгес сётӥське но тросгес шумпотон  вае ини шуыса. Соку тӥ чидатэк возьмалоды со дырез, куке чалмыт интыын быгатоды Иеговалэн дуно кылъёсыз вылын малпаськыны (1 Тим. 4:15).

7. Кызьы возиськыны быгатон Инмарлы ужан-тыршонын пуктэм ужпумъёсты быдэстыны юрттэ?

⁷ Возиськыны быгатытэк, Инмарлы ужан-тыршонын пуктэм ужпумъёсты быдэстыны секыт. Эскеромы одӥг вын-агайлэсь примерзэ, кудӥзлэн семьяез вал. Со шӧдӥз, ужаны-тыршыны мылкыдыз сӥяны кутскиз шуыса. Со сое сюлэмшугъяськытэ вал, соин ик со пионер луыны ужпум пуктӥз. Вын-агай пионер луыса ужан-тыршон сярысь статьяосты лыдӟыны но аслаз мылкыдыз сярысь Иеговалы вӧсяськыны кутскиз. Ваньмыз со сое юнматӥз но Иеговалы эшшо но матэгес кариськыны юрттӥз. Со сяна, быгатэмезъя со юрттӥсь пионер луыса ужаз-тыршиз. Кыӵе емышъёс со вайиз? Шуг-секытъёс шоры учкытэк, вын-агай аслэсьтыз пуктэм ужпумзэ быдэстыны тыршиз но пионер луиз.

8—10. Мар юрттоз анай-атайёслы нылпиоссэс будэтыны, соос Иеговалы мед ужалозы-тыршозы шуыса? Вералэ пример.

⁸ Инмар анай-атайёслы туж кулэ луись уж сётӥз — нылпиосты «Кузё-Инмарлэн  дышетонэз, валэктон-визьманъёсыз вылэ пыкиськыса» будэтыны (Еф. 6:4). Но асьме вакытэ со туж секыт (2 Тим. 3:1—5). Вордӥськыкузы нылпиос ӟечсэ но уродзэ висъяны уг быгато. Соослэн возьытлыксы вань, но сое дышетоно, будэм беразы нылпиос умой адямиос луыны мед быгатозы шуыса (Рим. 2:14, 15).

⁹ Анай-атайёс пиналзэс яратыса визьмало но тупато ке, со юрттэ нылпизылы ассэ утемын шуыса шӧдыны. Дыр ортчыса, со валаны кутске, котьмар карыны эрикез ӧвӧл шуыса но котькуд ужлэн умой яке урод бервылъёсыз вань шуыса. Анай-атайёслы туж кулэ Иеговалэсь юрттэтсэ курыны. Вунэтоно ӧвӧл: пӧртэм калыкын нылпиосты пӧртэм амалэн будэто, озьы ик, пӧртэм арлыдо адямиос но нылпи будэтон шоры пӧртэм сямен учко. Соин ик анай-атайёслы Инмарлэн визьлыкезлы оскиськоно. Соку соослы кулэ уз луы ни асьсэлэн янгышъёссы вылын дышетскыны яке нылпиоссэс, та дуннеын вӧлмем дышетонъёс вылэ пыкиськыса, дышетыны.

¹⁰ Тодамы ваёмы Нойлэсь примерзэ. Иегова Ноез ковчег лэсьтыны косыку, Ной аслаз валанэз но быгатонлыкъёсыз вылэ оскиськыны уг быгаты вал, малы ке шуоно азьвыл со ноку но ковчег ӧз лэсьтылы. Солы Иегова вылэ оскиськоно но ваньзэ «озьы ик» лэсьтоно вал, кызьы вераз Иегова (Ул.-выл. 6:22). Озьы лэсьтэменыз, солэн семьяез утиськиз. Со сяна, Ной умой атай вал. Мар юрттэ вал солы умой атай луыны? Та удысын но со Инмарлэн визьлыкезлы оскиськиз. Солы луыса Ной быгатӥз нылпиоссэ умой дышетыны но соослы умой пример возьматыны. Ву тудӟонлэсь азьло улӥсь лек адямиос пӧлын со туж секыт вал (Ул.-выл. 6:5).

11. Малы нылпиоссэс дышетон понна анай-атайёслы кужымзэс жаляно ӧвӧл?

¹¹ Анай-атайёс, мар юрттоз тӥледлы лэсьтыны ваньзэ «озьы ик», кызьы косэ Иегова? Санэ понэ визь-кенешъёсты, кудъёссэ сётэ Иегова аслаз Кылыз но организациез пыр. Дыр ортчыса, нылпиосты сое дунъялозы, луоз. Тани мар гожтӥз одӥг вын-агай: «Мон туж тау карисько анай-атаелы, соос монэ озьы будэтӥзы шуыса. Соос котьку мынэсьтым сюлэмме вырӟытыны тыршизы. Инмарлы ужан-тыршонын азинлыкъёсы — со анаелэн но атаелэн тыршемзы». Но куд-ог нылпиос, анай-атайёссы тыршо ке но, Иегова дорысь кошко. Тӥ вань кужымдэс понӥды ке, нылпиосты зэмлыкез мед яратозы шуыса, асьтэды янгыш кароно ӧвӧл. Оскемысь эн дугдэ, нылпиды куке но одно ик «дораз», Иегова доры, бертоз шуыса.

12, 13. а) Кызьы анай-атайёс Инмарлэсь кылзӥськемзэс возьматыны быгато, куке пизэс яке нылзэс кенешысь потто? б) Кыӵе пайда вайиз одӥг семьялы, анайлэн но атайлэн Иеговалэсь кылзӥськемзы?

¹² Куке пиналэз кенешысь потто, анай-атайёс понна со одӥгез тужгес но бадӟым шуг-секыт. Соку соослэн Инмарлэсь кылзӥськемзы эскериське. Одӥг сузэр, кудӥзлэсь нылзэ кенешысь поттӥзы но со дорысьтыз кошкиз, вера: «Мон публикациосысьтымы мугъёс утчай, кудъёсыз лэзьысалзы монэ нылыным но солэн нылыныз вераськыны». Сузэрлэн верамезъя, картэз лякытэн валэктӥз солы, соос нылзы понна кыл уг куто ни но Инмарлы нылзэс тупатыны люкетоно ӧвӧл шуыса.

¹³ Кӧня ке ар ортчыса, соослэсь нылзэс выльысь кенеше пыртӥзы. Со сузэр вера: «Табере нылы котькуд нунал  кадь мыным жингыртэ но гожъя! Со туж гажа монэ но картме, малы ке шуоно со вала, ми Инмарлэсь кылзӥськимы шуыса. Милям соин кусыпъёсмы туж матын». Пидэс яке нылдэс кенешысь поттӥзы ке, кылзӥськоды-а тӥ Мадёнъёсын 3:5, 6 гожтэм визь-кенешлэсь: «Вань сюлмыныд Кузё-Инмарлы оскиськы, визьмыд вылэ эн пыкиськы»? Тодады возе: Иеговалэн кыл кутытэмез солэсь туж визьмо луэмзэ но туж юн яратэмзэ возьматэ. Ноку но эн вунэтэ, со аслэсьтыз Пизэ асьмеос понна сётӥз шуыса, озьы ик тӥляд пиналды понна но. Инмарлы нокин но медаз быры кадь потэ. (Лыдӟе 2 Пётрлэсь 3:9) Соин ик оске, Иеговалэн кыл кутытэмез но солэн визь-кенешъёсыз пайда ваё шуыса. Вӧсь каронэз чидано луиськоды ке но, Иеговалэсь кылзӥське, солы пумит эн мынэ.

14. Кыӵе пайда ваё милемлы Иеговалэн визь-кенешъёсыз, кудъёссэ со «оскиськымон но визьмо юртэн кивалтӥсь» пыр сётэ?

¹⁴ Иегова кылзэ сётӥз христиан кенеш сярысь сюлмаськыны, утьыны сое но дышетыны аслэсьтыз калыксэ. Аслэсьтыз сётэм кылзэ со пӧртэм амалъёсын быдэстэ. Кылсярысь, со Иисус Христосэз косӥз кенеш сярысь сюлмаськыны. Нош Иисус Христос «оскиськымон но визьмо юртэн кивалтӥсез» пуктӥз, кудӥз ас дыраз духовной сиён сётъя (Лука 12:42). Со пӧртэм сиёнэн ӵош ми пайдаё визь-кенешъёс басьтӥськомы, кудъёсыз милемлы тупатскыны юртто. Луо-а сыӵе дыръёс, куке, речез кылзыса яке журналысь статьяез лыдӟыса, тӥ валаськоды, тӥледлы сямъёстэс яке малпанъёстэс воштоно шуыса? Луо ке, шумпотэ, малы ке шуоно со возьматэ, тӥ Иеговаез тӥледыз тупатыны лэзиськоды шуыса (Мад. 2:1—5).

15, 16. а) Кыӵе учыре тӧроослэн ужамзы-тыршемзы милемлы пайда ваёз? б) Мар кароно, тӧроослэсь ужзэс капчиятон понна?

¹⁵ Со сяна, Иисус Христос христиан кенешлы «саламъёс-кузьымъёс сётъяз», яке тӧроосты, кудъёсыз Инмарлэн ужась-тыршисьёсыз сярысь сюлмасько (Еф. 4:8, 11—13). Кыӵе учыре тӧроослэн ужамзы-тыршемзы милемлы пайда ваёз? Кылсярысь, куке ми тӧроослэсь но соослэсь оскемзэс адӟем кариськомы. Со сяна, Библия вылэ пыкиськыса сётэм визь-кенешъёссылэсь кылзӥськиськомы ке. (Лыдӟе Еврейёслы 13:7, 17.) Тодады возе, тӧроос ярато милемыз но соослэн потэ, ми Инмарен кусыпъёсмес мед юнматомы шуыса. Соин ик, соос адӟо ке, ми христиан пумиськонъёсты келляны кутскимы яке милям ужан-тыршонэ пыриськыны мылкыдмы сӥяз шуыса, соос соку ик милемлы юрттозы. Соос тыршозы кылзыны милемыз, буйгатыны но Библиысь тупась визь-кенешез эскерыны. Лыдъяськоды-а тӥ, тӧроослэн юрттэмзы пыр Иегова милемыз яратэмзэ возьматэ шуыса?

¹⁶ Эн вунэтэ, тӧроослы куддыръя туж секыт ми доры лыктыны но кыӵе ке визь-кенеш сётыны шуыса. Малпалэ ай, макем секыт вал, вылды, Нафан пророклы вераськыны Давидэн, куке Давид аслэсьтыз секыт сьӧлыксэ ватыны тыршиз! (2 Экс. 12:1—14). Апостол Павеллы но капчи ӧй вал тупатыны Пётрез, 12 апостолъёс пӧлысь одӥгзэ, куке со мукет калыкысь потэм христианъёслэсь палэнскыны кутскиз (Гал. 2:11—14). Мар кароно, кенешысьтыды тӧроослэсь ужзэс капчиятон понна?  Зӥбыт-востэмесь, тау карисесь но лякыт сямо луэ. Тӧроослэн юрттэмзы шоры шонер учке но тодады возе, озьы Иегова аслэсьтыз яратэмзэ возьматэ шуыса. Со тӥледлы гинэ пайда уз вайы, нош юрттоз тӧроослы шумпотыса ужзэс быдэсъяны.

17. Кызьы тӧроос одӥг сузэрлы яратыса юрттӥзы?

¹⁷ Одӥг сузэрлы Иеговаез яратыны люкетӥз со, мар вал азьвыл солэн улоназ. Со вера: «Азьвылэз сярысь тодэ ваёнъёс но мукет шуг-секытъёс монэ мур кайгыронэ вуттӥзы. Мон валай, мыным тӧроосын вераськоно шуыса. Тӧроос монэ номыр понна янгыше ӧз уськытэ. Соос буйгатӥзы но юнматӥзы монэ. Котькуд пумиськон бере тӧроос пӧлысь одӥгез ке но, макем трос солэн ужез медаз луы, мон доры лыктыса, тунсыкъяське вал, кызьы мынам ужъёсы мыно. Азьвыл улонэ сэрен мыным секыт вал оскыны, монэ Инмар яратыны быгатэ шуыса. Но Иегова тӧроос но быдэс кенеш пыр выльысь но выльысь монэ яратэмзэ возьматылӥз. Мон вӧсяськисько Иеговалы, котьку соин артэ луыны мед быгато шуыса».

18, 19. Мар милемыз кыл кутытэмлэсь но вӧсьгес карыны быгатэ? Вералэ пример.

¹⁸ Куддыръя кинлэн ке тупатэмез туж вӧсь каре, но воштӥськыны ӧм тырше ке, тросгес вӧсь луонэз чидано луомы (Евр. 12:11). Ойдолэ эскеромы Каинлэсь но Седекия эксэйлэсь примерзэс. Куке Каин Авелез туж адӟемпотостэм карыны кутскиз, Инмар вераз солы: «Малы ӝоже усид, йырдэ ошид? Ӟеч уж лэсьтӥськод ке, малы йырдэ ошыса возиськод? Нош ӟеч уж уд ке лэсьтӥськы, ӧс выжыын сьӧлык кылле, со тонэ ас дораз ӧте, но тон солы сётӥськытэк, сое вормыса ул» (Ул.-выл. 4:6, 7). Каин Инмарлэсь ӧз кылзӥськы, но сое сьӧлык вормиз. Кӧня курадӟонъёс но вӧсь луонэз со чидано луиз! Нош Каин Инмарлэсь кылзӥськысал ке, ваньмызлэсь солэсь палэнскыны быгатысал (Ул.-выл. 4:11, 12).

¹⁹ Седекия кышкась, ляб сямо, сьӧлыкась эксэй вал. Со кивалтӥз Иерусалимлэн самой урод вакытаз. Иеремия пророк выльысь но выльысь Седекияез воштӥськыны ӧтиз, но со солэсь ӧз кылзӥськы. Солэн кылзӥськымтэез туж урод бервылъёсы вуттӥз (Иер. 52:8—11). Иеговалэн уг поты, ми мед курадӟомы шуыса. (Лыдӟе Исаиялэсь 48:17, 18.)

20. Кыӵе улон возьма соосты, кинъёс Инмарлэн тупатэмез шоры шонер учко, но соосты, кинъёс тупатэмзэ санэ уг поно?

²⁰ Асьме вакытэ тросэз кыл кутытонлы, тупатонлы но возиськыны быгатонлы саклыксэс уг висъяло. Ӝоген ваньзы, кинъёс тупатскыны пумит луо, со понна кыл кутозы (Мад. 1:24—31). Соин ойдолэ та кылъёслэсь кылзӥськомы: «Визь-кенешъёсты пеляды понэ, визьлыкоесь луэ». Мадёнъёсын 4:13 верамын: «Дышетон-нодъян бордын юн возиськы, эн куштӥськы солэсь, уть сое, малы ке шуоно со — тынад улонэд».