1. Маин пумиськылӥзы нырысетӥ даурысь христианъёс?

 АПОСТОЛ ПЁТР асьме эраысь 62—64-тӥ аръёс котырын «мурт шаерын — Понтын, Галатияын, Каппадокияын, Асияын, Вифинияын — пазьгиськыса улӥсьёслы» гожтэт гожтӥз (1 Пётр 1:1). Пӧртэм калыкъёсысь потэм христианъёсты, кудъёсыз улӥзы Пичи Азиын, буйгатоно но соослы юрттоно вал. Соосты котькытын ултӥязы но уйылӥзы-уллязы. Со христианъёс туж секыт вакытэ улӥзы но бадӟым шуг-секытъёсын пумиськылӥзы. Пётр гожъяз соослы, «котьмарлы но пум вуэ ини» шуыса,— Иерусалим куашкатозь дас арлэсь ӧжытгес кылемын ни вал. Мар юрттысал вань христианъёслы со огыр-бугыр вакытэз чиданы? (1 Пётр 4:4, 7, 12).

2, 3. Малы Пётр христианъёсты куно карисесь луыны ӧтиз? (Учке статья кутсконысь суредэз.)

² Христиан кенешысь вын-агайёс но сузэр-апайёс ог-огзэс умой тодо вал ини ке но, Пётр ӧтиз соосты: «Огдэс огды сюлмысь яратыса улэ... Тӥ доры пырисьёс луизы ке... сюдэ-вордэ соосты. Огдылы огды юрттӥське» (1 Пётр  4:8—10). Соос озьы улысалзы ке, кызьы со юрттысал соослы?

³ Озьы соос кусыпъёссэс юнматыны быгатысалзы. Тӥ соглаш луоды, дыр, со зэмзэ но озьы шуыса. Тӥ но шумпотӥськоды, луоз, тӥледыз куное ӧтё ке. Куное ветлэм бере тодэ ваёнъёс кема сюлэмез шунто на. Куке ми кенешысь кинэ ке дорамы куное ӧтиськомы, ми соосын умойгес тодматскиськомы, но со милемыз ог-огмылы матэгес каре. Макем тросгес шуг-секытъёссы вал нырысетӥ христианъёслэн, сокем юнгес кусыпъёссы луыны кулэ вал соослэн. Туннэ но, берпуметӥ нуналъёсы, со озьы ик луыны кулэ (2 Тим. 3:1).

4. Кыӵе юанъёсты ми эскеромы та статьяын?

⁴ Кыӵе милям луонлыкъёсмы вань ог-огмылы куно карись сяммес возьматыны? Мар милемлы люкетыны быгатоз мылысь-кыдысь куно карись сяммес возьматыны но мар кароно, милемлы номыр медаз люкеты шуыса? Мар юрттоз милемлы умой куно луыны?

5. Кызьы ми куно карись сяммес возьматыны быгатӥськомы христиан пумиськонъёсын?

⁵ Кенешлэн пумиськонъёсыз. Ми шумпотыса пумитаськомы соосты, кинъёс, ми кадь ик, христиан пумиськонэ дышетскыны лыктӥзы. Милемыз мылысь-кыдысь пумита Иегова но солэн организациез (Рим. 15:7). Нош куке Эксэйлык юртэ кин ке нырысьсэ лыктэ, ми но соосты мылысь-кыдысь пумитаны быгатӥськомы. Милемлы асьмелы соос доры мыноно но тодматсконо, кыӵе гинэ соослэн вылтуссы медаз луы (Иак. 2:1—4). Тӥ адӟиськоды ке, выль адями огназ лыктӥз шуыса, ӵектэ солы вӧзады пуксьыны. Со шумпотоз, дыр, тӥ солы программаез валаны юрттӥды ке, озьы ик, Библиысь кылбуръёсты шедьтыны, кудъёссэ лыдӟыны кулэ. Со туж умой луонлык куно карись сяммес возьматыны (Рим. 12:13).

6. Кинэ нырысь ик куное ӧтёно?

⁶ Куное ӧтён. Вашкала дыръёсы адями аслэсьтыз кунооссэ номырзэ жалятэк куноятэ вал (Ул.-выл. 18:1—8; Суд. 13:15; Лука 24:28—30). Кин ке мукетъёссэ асэныз ӵош сиыны-юыны ӧте вал ке, со возьматэ вал, солэн тупаса улэмез потэ шуыса. Кинэ ми куное ӧтьыны быгатӥськомы? Нырысь ик кенешысьтымы вын-агайёсмес но сузэр-апайёсмес. Малы ке шуоно секыт дыръёс вуэм бере, огмылы огмы юрттӥськытэк, улыны ум быгатэ. Соин ик милемлы вын-агайёсын но сузэр-апайёсын тупаса улоно но кусыпъёсмес юнматоно. Кивалтӥсь кенеш тунсыко воштӥськон лэсьтӥз: США-ысь вефиль семьяын статья дышетон кутске вал 18 час 45 минутэ, нош, 2011-тӥ арысен кутскыса, солэн дырыз воштэмын вал 18 час 15 минутлы. Малы? Ялонын верамын вал, со пумиськон вазьгес йылпумъяськиз ке, Вефильысь вын-агайёслэн но сузэр-апайёслэн ог-огзы доры куное ветлыны тросгес дырзы луоз шуыса. Мукет филиалъёс но озьы ик каризы. Солы луыса Вефильысь вын-агайёслэн но сузэр-апайёслэн кусыпъёссы эшшо но юнмазы.

7, 8. Кызьы куно карон сяммес возьматыны луоз кенешамы речен лыктэм вын-агайёслы?

⁷ Куке кенешамы речь вераны лыкто мукет кенешъёсысь вын-агайёс, ёросэз чакласьёс, нош куддыръя филиалысьтымы вын-агайёс но, милям луонлыкмы  кылдэ куно карись сяммес возьматыны. (Лыдӟе 3 Иоаннлэсь 5—8.) Кылсярысь, ми быгатомы соосты куное ӧтьыны. Ойдолэ ум ыштэ сыӵе луонлыкез.

⁸ Тани мае тодаз вае США-ысь одӥг сузэр: «Трос аръёс ӵоже ми картэным речь вераны лыктэм вын-агайёсты но соослэсь кышнооссэс дорамы куное ӧтчаллямы. Со котьку милемлы трос шумпотон вае вал — дыр туж шулдыр ортче вал, нош тужгес но кулэез, озьы милям осконмы юнма вал. Ми ноку но ӧм жалялэ со сярысь!»

9, 10. а) Кыӵе вын-агайёслы но сузэр-апайёслы улон инты кулэ луэ? б) Быгато-а юрттыны соос, кинъёслэн корказы бадӟым ӧвӧл? Вералэ пример.

⁹ Улон интылы ёрмись вын-агайёс но сузэр-апайёс. Вашкала дыръёсы кузёос кунооссылы ӵем дыръя доразы кӧлыны ӵекто вал (Иов 31:32; Флм. 22). Асьме дыре но куддыръя озьы ик кароно. Кылсярысь, ёросэз чаклась кенеше ке лыктэ, ӵемысь со вын-агайёсмы дорын улэ. Улон инты кулэ луэ Библейской школаосын дышетскисьёслы но пуктӥськон-лэсьтӥськон уже лыктэмъёслы. Озьы ик, улон инты кулэ инкуазь шимучыръёсын сэрен улон интытэк кылем вын-агайёслы но сузэр-апайёслы, соослэсь коркаоссэс тупатытозь. Малпано ӧвӧл, юрттыны быгатозы шуыса соос гинэ, кинъёслэн коркаоссы бадӟым. Соос одӥг пол гинэ ӧз пырталэ ни, дыр, улон интылы ёрмись вын-агайёсты но сузэр-апайёсты. Нош быгатысалды-а тӥ юрттыны, улон интыды бадӟым ӧвӧл ке но?

¹⁰ Лымшор Кореяысь одӥг вын-агай тодаз вае, кызьы соос кышноеныз доразы улыны ӧтчазы Библейской школаосын дышетскисьёсты. Со гожтэ: «Нырысь мон уг дӥсьтӥськы вал, малы ке шуоно ми кышноеным кемалась ӧвӧл кузпалъяськимы но пичи коркан улӥмы. Озьы ке но, ми дышетскисьёсты дорамы улыны ӧтимы. Со милемлы туж бадӟым шумпотон вайиз. Ми, алигес кузпалъяськемъёс, адӟимы, макем шудоесь луыны быгато кузпалъёс, соос Иеговалы ужало-тыршо но солы ужан-тыршонын ӵош ужпумъёс ке пукто».

11. Малы куно карись сяммес возьматоно кенешысьтымы выль вын-агайёслы но сузэр-апайёслы?

¹¹ Кенешын выль вын-агайёс но сузэр-апайёс. Оло нош, тӥляд ёросады мукет кенешъёсысь вын-агайёс, сузэр-апайёс яке быдэс семьяос но лыктӥзы. Яке тӥ доры пионеръёсты ыстӥзы, кенештылы юрттон вылысь. Ваньзылы соослы выль улон интылы, выль кенешлы, оло нош, выль кыллы но калык сямъёслы дышыны кулэ. Соосты ас дорады сиськыны, кытчы ке ветлыны яке ӵош шутэтскыны ӧтьыса, тӥ юрттоды соослы эшъёс шедьтыны но выль югдуръёссылы дышыны.

12. Вералэ учырез, кудӥз возьматэ, кинэ ке куно карон понна, трос дасяськытэк но луоз шуыса.

¹² Тӥляд кинэ ке куно каремды потэ ке, со уг возьматы, тӥледлы трос дасяськыны кулэ шуыса. (Лыдӟе Лукалэсь 10:41, 42.) Тани мае тодаз вае одӥг вын-агай со дыр сярысь, куке соос кышноеныз миссионеръёс луыса ужаны-тыршыны кутскизы: «Ми егитэсь вал, улонэз адӟымтэ на. Но ми туж дормылэсь мӧзмимы. Одӥг ӝытэ кышное, вордскем палъёсмылэсь мӧзмеменыз, туж зол бӧрдӥз. Мон сое нокызьы буйгатыны ӧй быгаты. Но  тани, сизьым но ӝыны час котырын ӧсамы йыгаськись луиз. Со вал кышномурт, кудӥз Библиез дышетыны кутскиз. Со выль миссионеръёсын тодматскыны лыктэм но сьӧраз куинь апельсин ваем. Ми сое пырыны ӧтимы но ву ӵектӥмы. Собере ми пӧзьтӥмы чай но пӧсь шоколад. Соку ми суахили кылын ум вераськиське на вал, нош со — англи кылэз уг тоды. Со учыр выль кенешысь вын-агайёсын но сузэр-апайёсын эшъяськонлэн кутсконэз луиз».

13. Кыӵе емышъёс вайыны быгатэ куно карон сям?

¹³ Нош тӥледлы куно карись луыны секыт ке? Соку тӥ луонлыктэс ыштӥськоды, луоз, дырдэс шулдыр ортчытыны но оскымон эшъёс шедьтыны. Куно карон — со огнад кылёнлэсь туж умой эмъюм. Малы соку куд-огъёсызлы куно карись луыны секыт? Солы трос мугъёс луыны быгато.

14. Мар кароно, милемлы потэ ке, милям дырмы но, кужыммы но ӧвӧл шуыса куное ветлыны но ас дорамы куно ӧтчаны?

¹⁴ Дыр но кужым. Иеговалэн ужась-тыршисьёсызлэн трос пӧртэм ужъёссы. Соин ик куд-огъёсыз малпало, куно ӧтчаны соослэн дырзы но, кужымзы но ӧвӧл шуыса. Тӥ но озьы малпаськоды ке, умой луысал эскерыны, мае тӥ воштыны быгатысалды, дырды но кужымды мед кылёз шуыса куное ветлыны но асьтэ доры куно ӧтчаны. Библия христианъёсты куно карись луыны ӧте (Евр. 13:2). Солы нимысьтыз дыр висъяны тыршоно. Но со понна тӥледлы куд-ог ужъёслэсь куштӥськоно луоз, дыр.

15. Мар сярысь сюлмасько куд-ог христианъёс, соослэн куно каремзы потэ ке?

¹⁵ Со, кызьы тӥ асьтэ шоры учкиськоды. Нош тӥ кышкаськоды ке куно ӧтьыны? Куд-огъёсыз туж возьдаськисесь но сюлмасько, уз тодэ шуыса, мар сярысь вераськыны, но кунооссылы мӧзмыт луоз шуыса. Нош соос, кинъёс узыр уг уло, кышкало, уз быгатэ шуыса ӵектыны сое, мае ӵекто мукетъёсыз. Тодады возе: коркады кызьы ке нимысьтыз чеберъямын луыны кулэ ӧвӧл, умойгес луоз отын чылкыт но ӝикыт луиз ке, но тӥ капчи мылкыдо луиды ке.

16, 17. Мар кароно, куно карон пумысен медад сюлмаське шуыса?

¹⁶ Тросэз сюлмасько, кинэ ке куно каремзы потэ ке. Великобританиысь одӥг тӧро вера: «Куноосты пумитаны дасяськыку, ӵем дыръя сюлмаськоно. Со озьы ик, кызьы ми ӟеч иворез вераны мынэмлэсь азьло сюлмаськиськомы, нош собере туж бадӟым шумпотон басьтӥськомы. Мыным туж кельше куноосын вераськыны, соосын ӵош кофе юыса». Эн вунэтэ, куноосын нырысь ик сюлмысь тунсыкъяськоно шуыса (Флп. 2:4). Тросэз ярато улонысьтызы учыръёссэс вераны. Соин ик, огазе люкаськыса, ми вын-агайёсмы но сузэр-апайёсмы сярысь троссэ тунсыкозэ тодыны быгатӥськомы. Тани мар гожтӥз эшшо одӥгез тӧро: «Кенешысьтым вын-агайёсты но сузэр-апайёсты куное ӧтьыса, мон соосын матэгес тодматскисько но соосты умойгес валаны кутскисько. Тужгес но тунсыко мыным потэ со, кызьы соос зэмлыкез тодӥзы». Куке тӥ зэмзэ ик тунсыкъяськиськоды мукетъёсыныз, соку вераськон но пӧрме.

¹⁷ Сузэр, кудӥз пионер луыса ужа-тырше но ас дораз пӧртэм Библейской  школаосын дышетскисьёсты улыны ӧтчалляз ини, вера: «Нырысь мон сюлмаськи, малы ке шуоно коркае мынам узыр ӧвӧл, корка пушкам но ваньмыз выль ӧвӧл ни. Но Библейской школаысь одӥг дышетӥсьлэн кышноез монэ буйгатӥз. Со вераз, куке соос пӧртэм интыостӥ ветлыса ужало-тыршо, соослы сыӵе вын-агайёс но сузэр-апайёс дорын улыны кельше шуыса, кудъёсыз узыр ӧвӧл ке но, туж тыршо Иегова доры матэ кариськыны но соослэн кадь ик ужпумъёс пукто — Иеговалы ужаны-тыршыны но огшоры улыны. Соку мон тодам вайи анаелэсь кылъёссэ, кудъёссэ со ӵемысь вера вал милемлы, нылпиослы: „Эсьмаса, одӥг тэркы вож емышен куно мед карозы, но вӧзаз яратонэз мед луоз“» (Мад. 15:17). Тӥ яратэменыды куно карыны тыршиськоды ке, сюлмаськыны муг ӧвӧл!

18, 19. Кызьы куно кареммы мукетъёсыз шоры мукет синмын учкыны юрттоз?

¹⁸ Со, кызьы тӥ мукетъёсыз шоры учкиськоды. Вань-а тӥляд кенешады сыӵе адями, кудӥз тӥледлы туж ик уг кельшы? Вань ке, номыр карытэк кусыпъёсты ас кожазы гинэ уз тупалэ. Оло нош, тӥ туж пӧртэмесь, соин ик тӥ уд дӥсьтӥське со вын-агаез яке сузэр-апаез куное ӧтьыны. Яке кӧтӝождэс нокызьы вунэтыны уд быгатӥське.

¹⁹ Библия верамъя, куно карон — со туж умой амал котькыӵе адямиен тупан понна, тушмонэн гинэ но. (Лыдӟе Мадёнъёсты 25:21, 22.) Мылысь-кыдысь куно карон юрттэ адямиен тупаны но кусыпъёсты тупатыны. Куно  карыса, адямилэсь умой сямъёссэ адӟыны луэ, со сямъёссэ, кудъёссэ адӟиз Иегова, куке солы зэмлыкез усьтӥз (Иоанн 6:44). Кинэ ке сюлмысь куное ӧтьыса, юн эшъяськонлы инъет поныны луэ. Потэ ке, тӥледыз зэмос яратон мед валтоз шуыса, кылзӥське Филиппыослы 2:3 гожтэм визь-кенешлэсь: «Асьтэдыз покчи каре, нош мукетъёссэ асьтэ сярысь умоесьгес шуыса лыдъялэ». Вын-агайёслэсь но сузэр-апайёслэсь маин тӥлесьтыд умойгес луэмзэс адӟыса (кылсярысь, юн осконзэс, юн, кышкасьтэм луэмзэс но мукет умой сямъёссэс), тӥ быгатоды соосты сюлмысь яратыны, но тӥляд ӧсты соослы котьку усьтэмын луоз.

20. Куное мыныны ми соглаш луимы ке ини, кызьы ми гажаммес возьматыны быгатомы? Малы со кулэ?

²⁰ Псаломъёсты гожъясь Давид гожтӥз: «Кузё-Инмаре, Тынад улон интыяд кинлэн улэмез луоз?» (Пс. 14:1). Собере со гожтӥз со сярысь, кыӵе сямъёсты адӟемез потысал Иеговалэн аслаз куноезлэсь. Одӥгез сыӵе сям — сётэм кылдэ быдэстон. Сыӵе адями сярысь Давид гожтӥз: «Уродлы ке но кыл сётэ, солэсь уг ни куштӥськы» (Пс. 14:4). Милемыз куное ӧтизы но ми соглаш луимы ке ини, сётэм кылмылэсь куштӥськоно ӧвӧл, солы муг ӧвӧл ке. Куно ӧтем кузёос куно лыктонлы дасяськыны кутскизы ини, вылды, соин ик, ми ӧм лыктэ ке, тыршемзы юнме луоз (Матф. 5:37). Вал учыръёс, куке кин ке но куное ӧз мыны, малы ке шуоно сое, солэн малпамезъя, умойгес интые ӧтизы. Но вераны луоз-а, озьы со яратэмзэ но гажамзэ возьматӥз шуыса? Милемыз куное ӧтё ке, со понна тау кароно но учконо ӧвӧл, узыр-а, куанер-а мурт милемыз ӧтиз (Лука 10:7). Нош югдуръёсмы воштӥськизы но ми куное мыныны ум ке быгатӥське, умойгес луысал азьло ик вераны, ми ум лыктэ шуыса.

21. Мае лыдэ басьтоно, умой куно луон понна?

²¹ Со сяна, калык сямъёсты лыдэ басьтоно. Куд-ог шаеръёсын шумпото шӧдтэк шорысь лыктэм кунолы но. Нош мукетъёсаз куное лыктыны малпаськод ке, лыктэмлэсь азьло одно ик верано. Кытын ке но кунооссэс самой умой сиёнэн утялто, нош кытын ке кунооссылы но, семьязылы но одӥг кадь сиён-юон пукто. Куд-ог интыосын куноос сьӧразы мар но со ваё, нош мукет интыосын ваньмыз сярысь кузёос сюлмасько. Куд-ог калыкъёсын куноос нырысь ӧтемлы соглаш уг карисько, малы ке шуоно со умой ӧвӧл, нош мукетъёсаз пумит луыны умой ӧвӧл. Ойдолэ тыршомы, милемыз куное ӧтемъёс ӝоже усёно медаз луэ шуыса.

22. Малы сокем кулэ куно карись луыны?

²² Пётр гожтӥз: «Котьмарлы но пум вуэ ини» (1 Пётр 4:7). Туннэ та дуннелэн пумыз эшшо но матынгес. Ӝоген ми пумиськомы бадӟым куректонэн, кыӵеез ноку но ӧй вал на. Макем золгес та дунне зӥбе, сокем юнгес луыны кулэ милям вын-агайёсынымы но сузэр-апайёсынымы кусыпъёсмы. Али тужгес но кулэ христианъёслы санэ поныны Пётрлэсь сётэм визь-кенешсэ: «Тӥ доры пырисьёс луизы ке... сюдэ-вордэ соосты. Огдылы огды юрттӥське» (1 Пётр 4:8—10). Со визь-кенешлэсь кылзӥськон шумпотон вае. Со визь-кенеш ноку уз вужмы.