1, 2. а) Кыӵе шӧдонъёссы кылдо тросэзлэн анай-атайёслэн, куке нылпиоссы верало, пылатӥськыны малпазы шуыса? б) Малы пылатӥськыны дасяськемъёслэсь юало, сӥзиськизы-а соос Иеговалы? (Учке статья кутсконысь туспуктэмез.)

 МАРИЯЛЭН анаез но атаез учко нылзы шоры, кудӥз конгрессын пылатӥськыны дасяськемъёс пӧлын сылэ. Нылзы речь верасен сётэм кык юанъёслы бадӟым куараен но валамон ответ сётэ но собере пылатӥське.

² Мариялэн анай-атаез туж данъясько, соослэн нылзы аслэсьтыз улонзэ быдэсак Иеговалы сӥзьыны но пылатӥськыны ужпум кутӥз шуыса. Озьы ке но, кемалась ӧвӧл анайзэ сюлмаськытӥзы таӵе юанъёс: «Вазь ӧвӧл на меда Мариялы пылатӥськыны? Вала-а со, мар быдӟа кыл кутоно луоз? Умойгес уз луы-а, со бергес пылатӥськиз ке?» Та выллем юанъёс вылын тросэз анай-атайёс малпасько,  куке нылпиоссы верало, пылатӥськыны малпазы шуыса (Екк. 5:4). Анай-атайёсты валаны луэ, малы ке шуоно Инмарлы сӥзиськон но пылатӥськон христиан муртлэн улоназ самой кулэ луись вамышъёс. (Учке «Сӥзиськиды-а тӥ Иеговалы?» рамкаез.)

3, 4. а) Кыӵе пример вылын Пётр возьматӥз, пылатӥськыны туж кулэ шуыса? б) Малы пылатӥськонэз Ной улон нуналъёсы ковчег лэсьтонэн ӵошатыны луоз?

³ Апостол Пётр пылатӥськонэз Нойлэн ковчег лэсьтэменыз ӵошатӥз. Со гожтӥз: «Ной улон нуналъёсы Инмар чидаса возьмаз ковчеглэсь лэсьтӥськемзэ, кудаз туж ӧжытэз адями, тямыс лул, вуос пыр поттыса, утемын вал. Пылатӥськон, кудӥз со выллем луэ, озьы ик табере тӥледыз уте (мугорлэсь кырсьсэ миськыса ӧвӧл, нош Инмарлэсь чылкыт возьытлык курыса) Иисус Христослэн улӟыса султонэз пыр» (1 Пётр 3:20, 21, ВД). Ковчег яркыт возьматэ вал, Ной аслэсьтыз улонзэ Инмарлэсь эриксэ быдэсъянлы сӥзиз шуыса. Со Иеговалэсь сётэм ужзэ пыр-поч быдэстӥз. Ной но солэн семьяез оскемзэс ужъёсынызы возьматӥзы, солы луыса соос Ву тудӟонын утиськизы. Мае верамез потэ вал Пётрлэн та примерен?

⁴ Ковчегез адӟыса, адямиос валало вал, Ной Инмарлы оске шуыса. Озьы ик адямиос адӟо ке кинлэсь ке пылатӥськемзэ, соос валало, со аслэсьтыз улонзэ Иеговалы сӥзиз шуыса, малы ке шуоно со оске, Иисус Христос аслэсьтыз улонзэ курбонлы сётӥз но улӟытэмын вал шуыса. Пылатӥськемзы бере христианъёс, Ной сямен ик, Инмарлэсь кылзӥсько  но солэсь сётэм ужзэ быдэсто. Иегова Нойлы Ву тудӟонын улэп кыльыны юрттӥз. Азьланяз но со одно ик юрттоз пылатӥськем оскымон христианъёслы, та дунне бырыку, улэп кыльыны (Марк 13:10; Усьт. 7:9, 10). Адӟиське, сӥзиськон но пылатӥськон Инмарлэн ужась-тыршисезлэн улоназ бадӟым инты басьто шуыса. Соин ик со, кин пылатӥськыны уг дырты, пырак дауръёс ӵоже улыны луонлыксэ ыштыны быгатоз.

5. Мае ми эскеромы та статьяын?

⁵ Пылатӥськон адямилэн улоназ бадӟым инты басьтэ бере, ойдолэ эскеромы, куинь юанъёсты: мар Библиын верамын пылатӥськон сярысь? Кыӵе вамышъёс лэсьтоно пылатӥськемлэсь азьло? Малы, аслад пиналэныд яке кинэн ке но мукетыныз Библиез дышетыку, тодамы возёно, пылатӥськыны туж кулэ шуыса?

6, 7. а) Мае возьматэ вал Иоаннлэн пылатэмез? б) Кыӵе дан сётэмын вал Иоаннлы?

⁶ Библиын пылатӥськон сярысь нырысетӥзэ верамын, куке вераськон мынэ Иоанн Пылатӥсьлэн ужамез-тыршемез сярысь (Матф. 3:1—6). Со доры адямиос пылатӥськыны лыкто вал. Озьы соос ӧпкелемзэс но Моисейлэн законэзлы пумит сьӧлыкъёссылэсь куштӥськемзэс возьмато вал. Но вераны кулэ, самой кулэ луись пылатон, кудӥныз Иоанн пылатӥз, ӧпкелёнэн герӟаськемын ӧй вал шуыса. Иоаннлы бадӟым дан сётэмын вал Инмарлэсь тырбыдэс Пизэ, Иисусэз, пылатыны (Матф. 3:13—17). Иисус ӧз сьӧлыка, соин ик солы сьӧлыкъёсыз понна ӧпкелёно ӧй вал (1 Пётр 2:22). Малы соку Иисус пылатӥськиз? Озьы со возьматӥз, аслэсьтыз улонзэ Инмарлэсь эриксэ быдэстонлы сӥзе шуыса (Евр. 10:7).

⁷ Иисус музъем вылын улыку, солэн дышетскисьёсыз но адямиосты пылатӥзы (Иоанн 3:22; 4:1, 2). Иисуслэн дышетскисьёсыныз пылатэм адямиос, Иоаннэн пылатэм адямиос сямен ик, пылатӥськеменызы возьмато вал, соос Моисейлэн законэзлы пумит сьӧлыкамзы понна ӧпкелё шуыса. Нош Иисус кулэм но улӟем бере христианъёс мукет муген пылатӥськыны кутскизы.

8. а) Кыӵе косон сётӥз улӟытэм Иисус аслаз дышетскисьёсызлы? б) Малы христианъёслы пылатӥськоно?

⁸ Асьме эраысь 33-тӥ арын улӟытэм Иисусэз 500-лэсь тросгес адямиос адӟизы — пиосмуртъёс, кышномуртъёс, озьы ик, нылпиос но, дыр. Ӵапак соку, шӧдске, Иисус аслаз дышетскисьёсызлы таӵе косон сётӥз: «Мынэлэ, вань калыкъёсты дышетэлэ; соосты Атайлэн, Пилэн, Святой Духлэн нимыз понна пылатэ, ваньзэ, мае Мон тӥледлы косӥ, соосты быдэсъяны дышетэ» (Матф. 28:19, 20; 1 Кор. 15:6). Озьыен, Иисуслэсь дышетскисьёсты дасяны косэмзэ трос сю со сьӧры мынӥсьёс кылӥзы. Озьы Иисус возьматӥз, соослы, кинъёслэн солэсь зӥбетсэ вылазы басьтэмзы потэ, яке солэн дышетскисьёсыз луэмзы потэ, пылатӥськыны кулэ шуыса (Матф. 11:29, 30). Но пылатӥськыны соос быгато вал соку гинэ, куке валало вал, Иисус Иеговалэсь малпанзэ быдэстонын нимысьтыз инты басьтэ шуыса,  но соин соглаш луо вал. Табере Инмарлы сыӵе гинэ пылатӥськон яра вал. Библиын трос примеръёс вань, кудъёсыз возьмато, нырысетӥ даурын Христослэн выль дышетскисьёсыз валало вал, пылатӥськыны туж кулэ шуыса. Но, соослы номыр уг люкеты вал ке, соос соку ик пылатӥсько вал (Ап. уж. 2:41; 9:18; 16:14, 15, 32, 33).

9, 10. Мае ми тодӥськомы пылатӥськон сярысь, эфиоп пилэн но апостол Павеллэн примерез вылын малпаськыса?

⁹ Лыдӟе Апостолъёслэсь ужъёссэс 8:35, 36. Эскеромы Эфиопияысь адямилэсь, иудей осконэ выжем муртлэсь, примерзэ. Со, Иерусалиме Инмарлы йыбырттыны ветлыса, дораз бертэ вал. Кылчинлэн кылъёсызлэсь кылзӥськыса, Филипп эфиоп пилэсь уробозэ сутӥз но «Иисус сярысь солы Ӟеч Ивор тодытӥз». Мар кариз эфиоп пи? Со туж шумпотӥз но усьтэм зэмлык понна тау кариз. Соин ик солэн мылкыдыз ӝутскиз Иеговалэн эрикезъя лэсьтыны но ӝегатскытэк пылатӥськыны.

¹⁰ Нош табере малпалэ, мар луиз христианъёсты уйылӥсь-уллясь одӥг иудей пиосмуртэн. Со вордӥськиз Инмарлы сӥзем калыкын, кудӥзлэн дыр ортчемъя Инмарен кусыпъёсыз сӧриськизы. Со адями иудей сямъёсты туж чакла вал. Одӥг пол со тодӥз сое, мар солэсь улонзэ быдэсак воштӥз. Солы улӟытэм Иисус Христос вазиськиз. Мар кариз со пиосмурт? Со Анания нимо христиан муртлэсь верам кылъёссэ сюлмаз понӥз но пылатӥськиз (Ап. уж. 9:17, 18; Гал. 1:14). Тӥ валады, луоз, вераськон Савл сярысь мынэ шуыса, кудӥз бератаз апостол Павел шуыса тодмо луиз. Висъялэ саклыктэс: со ӝегатскытэк пылатӥськиз, куке валаз, кыӵе инты басьтэ Иисус Инмарлэн малпаназ. (Лыдӟе Апостолъёслэсь ужъёссэс 22:12—16.)

11. а) Мар Библиез дышетӥсьёслэсь мылкыдзэс ӝутэ пылатӥськыны? б) Кыӵе шӧдонъёсмы милям кылдо, куке выль дышетскисьёс пылатӥсько?

¹¹ Сыӵе ик мылкыдзы шӧдӥське асьме нуналъёсы Библиез дышетӥсь адямиослэн — кызьы егитъёсызлэн, озьы ик арлыдоосызлэн но. Осконзы но Библиысь зэмлык понна сюлмысь тау каронзы соослэсь мылкыдзэс ӝуто улонзэс Иеговалы сӥзьыны но пылатӥськыны. Пылатӥськон сярысь речь — котькуд конгрессын одӥгез тужгес но яркыт речь. Иеговалэн Адӟись-Ивортӥсьёсыз туж шумпото, куке Библиез дышетӥсьёс Инмарлы матэ карисько но пылатӥськыны малпало. Нош макем шумпото анай-атайёс, куке асьсэлэсь нылпиоссэс пылатӥськыны дасяськемъёс пӧлысь адӟо! 2017-тӥ ужан-тыршон арын 284 000-лэсь тросгес выль дышетскисьёс пылатӥськизы. Озьы соос возьматӥзы, улонзэс Иеговалы сӥзизы шуыса (Ап. уж. 13:48). Веранэз ӧвӧл, выль дышетскисьёс валало, Христослэн дышетскисез луон понна, одно ик пылатӥськоно шуыса. Нош кыӵе вамышъёс лэсьтоно пылатӥськон азьын?

12. Кыӵе вамышъёс лэсьтоно пылатӥськон азьын?

¹² Пылатӥськон азьын адямилы Инмар сярысь но солэн малпанэз сярысь  шонер тодон-валан басьтоно, тодоно, мар со кариз адямиосты утён понна, нош озьы ик, солы осконзэ будэтоно (1 Тим. 2:3—6). Адямилэн осконэз луиз ке, со юрттоз солы Инмарлы ярантэм ужъёслэсь палэнтӥськыны но солэн шонерлыко эсэпъёсызъя улыны (Ап. уж. 3:19). Иеговалы адямилэн сӥзиськемез уз яра, со ӧз куштӥськы ке ужъёслэсь, кудъёсыз Инмарлэн законъёсызлы пумит луо (1 Кор. 6:9, 10). Нош Иеговалэн вылӥ эсэпъёсызъя улэм сяна, эшшо мар ке но кароно на. Солы, кинлэн улонзэ Инмарлы сӥземез потэ, кенешлэн пумиськонъёсаз ветлоно. Со сяна, солы ялан тодытон уже пыриськоно но мукетъёссэ Библиысь зэмлыклы дышетоно. Ваньзэ сое одно ик быдэсъяно, адями Христослэн дышетскисез луыны мылкыд каре ке (Ап. уж. 1:8). Соку гинэ выль дышетскись быгатэ вӧсяськыса улонзэ Иеговалы сӥзьыны но собере пылатӥськыны.

13. Малы солы, кин Библиез дышетон ортчытэ, тодаз возёно, пылатӥськытэк Христослэн дышетскисез луыны уг луы шуыса?

¹³ Куке ми юрттӥськомы нылпиосмылы но мукет адямиослы, кудъёсыныз Библиез дышетӥськомы, вылӥын верам вамышъёсты лэсьтыны, милемлы тодамы возёно, пылатӥськытэк Христослэн зэмос дышетскисез луыны уг луы шуыса. Сое тодамы возимы ке, котькуд тупась учырын саклык висъяны быгатомы, сӥзиськыны но пылатӥськыны туж кулэ шуыса. Милям туж потэ, нылпиосмы но соос, кинъёсын ми Библиез дышетӥськомы, Инмарлы  матэ мед кариськозы но мед пылатӥськозы шуыса.

14. Малы милемлы нокинэ но пылатӥськыны кужмысь косоно ӧвӧл?

¹⁴ Веранэз ӧвӧл, нокин но: анай-атайёс но, со но, кин Библиез дышетон ортчытэ,— адямиез пылатӥськыны кужмысь косыны кулэ ӧвӧл. Иегова нокинэ но солы ужаны-тыршыны кужмысь уг косы (1 Иоанн 4:8). Соин ик, Библиез дышетыку, валэктоно, макем кулэ адямилы аслыз Инмарен кусыпъёссэ юнматыны. Дышетскись зэмлыкез валамез понна сюлмысь тау каре ке но солэн Христослэсь зӥбетсэ вылаз басьтэмез потэ ке, соку со ачиз мылкыд кароз пылатӥськыны (2 Кор. 5:14, 15).

15, 16. а) Кӧня арескын пылатӥськыны яра? Валэктэ. б) Малы адямилы, кудӥз мукет религиын дыръяз пылатӥськемын вал ини, Иеговалэн Адӟись-Ивортӥсез луон понна, выльысь пылатӥськоно?

¹⁵ Адямиос пӧртэмесь. Соин ик кин ке но ӝоггес Инмар доры матэ кариське, кин ке но калленгес. Нош кинлэн ке пылатӥськемез потэ ке, солэн арлыдыз шоры уг учко. Тросэз егит дыръязы пылатӥсько но вань улытозязы Иеговалы оскымон кылё. Но вань сыӵеосыз но, кин зэмлыкез тодӥз но пылатӥськыны кулэ шуыса валаз, куке солы трос арес вал ини — куд-огъёсызлы сю ареслэсь но тросгес!

¹⁶ Одӥг арлыдо кышномурт юаз сузэрлэсь, кудӥз соин Библиез дышетӥз, кулэ-а солы выльысь пылатӥськыны, талэсь азьло, мукет религиын дыръяз, со пылатӥськиз вал ке ини. Сузэр соин Библиысь тупась кылбуръёсты эскериз. Соос вылын малпаськыса, кышномурт валаз, мар Библиын верамын пылатӥськон сярысь, но ӝоген со Иеговалэн Адӟись-Ивортӥсез кадь пылатӥськиз. Солы 80 арес котырын вал ке но, со ӧз малпа, пылатӥськыны бер ини шуыса. Иеговалы адямилэн пылатӥськемез яра соку гинэ, куке адямилэн шонер тодон-валанэз вань Иеговалэн эрикез сярысь. Соин ик солы, кин азьло мукет религиын пылатӥськиз ини, выльысь пылатӥськыны кулэ. (Лыдӟе Апостолъёслэсь ужъёссэс 19:3—5.)

17. Мар сярысь малпаськоно пылатӥськон нуналэ?

¹⁷ Пылатӥськон трос шумпотон вае, но со дыре ик трос малпаськон но. Сӥзиськемъя улон понна, трос кужым пононо. Тӥни малы, Иисус верамъя, соос, кинъёслэн Иисуслэн дышетскисьёсыз луэмзы потэ, ас вылазы солэсь зӥбетсэ басьто. Христослэн дышетскисьёсыз асьсэлы улыны кулэ ӧвӧл ни, нош «Со понна, кин соос понна кулӥз но улӟыса султӥз» (2 Кор. 5:15; Матф. 16:24).

18. Кыӵе юанъёсты ми эскеромы мукетаз статьяын?

¹⁸ Ӵапак со сярысь малпаськиз Мариялэн анаез, аслыз юанъёс сётъяса, кудъёсыз гожтэмын статьялэн кутсконаз. Тӥляд нылпиосты вань ке, тӥ малпаськоды, дыр: «Дась-а мынам пиналы пылатӥськыны? Тырмыт-а со тодэ Иегова сярысь, солы аслэсьтыз улонзэ сӥзён понна? Оло нош, нырысь солы дышетсконо но умой уж шедьтоно? Нош мар луоз, пылатӥськемез бере со секыт сьӧлыказ ке?» Вуоно статьяын ми эскеромы та юанъёсты но вераськомы со сярысь, мар кароно анай-атайёслы, пылатӥськон шоры шонер учкон понна.