КОТЬКУД адямилэн потэ, сое умой, ӟечлыко адямиен мед лыдъялозы шуыса. Нош ӟечлыко луыны туннэ капчи ӧвӧл. Ми улӥськомы адямиос пӧлын, кудъёсыз ӟечлыкез уг ярато (2 Тим. 3:3). Соос асьсэос ужпум куто, мар шонер, нош мар шонертэм луэ, «уродлыкез ӟечлык шуо, ӟечлыкез уродлык шуо» (Ис. 5:20). Со сяна, ми вылын шӧдӥське азьвыл улонмы но тырбыдэстэм луэммы. Соин ик милям шӧдонъёсмы луыны быгато Энн a нимо сузэрлэн кадь, кудӥз трос дасо аръёс Иеговалы ужа-тырше ке но, вера: «Мыным секыт оскыны, мон умой адями луыны быгатӥсько шуыса».

Шумпотоно, ӟечлыкез будэтыны луэ шуыса. Со Инмарлэн святой духезлэн емышез пӧлы пыре, нош солэн юрттэменыз, котькыӵе шуг-секытъёсты чиданы луэ: дуннелэсь но котырысь адямиослэсь зӥбемзэс, тырбыдэстэм луэммес. Ойдолэ ӟечлык сярысь пыр-почгес вераськомы но тодомы, кызьы сое эшшо но умойгес возьматыны луэ.

Ӟечлык возьматэ ӟечсэ лэсьтыны тыршемез, нравственность ласянь дун-чылкыт луэмез, отын номыр но умойтэмез ӧвӧл. Ӟечлыко адями, мукетъёслы юрттон понна, котьку луонлык утча но соослы умой ужъёс лэсьтэ. Со умой сям, кудзэ уж вылын возьматоно.

Тӥ адӟиды, дыр, кызьы адямиос ӵыжы-выжыоссы но эшъёссы понна мылысь-кыдысь мае ке но умойзэ лэсьто. Но Инмарлэн син азяз ӟечлыко луон понна, со тырмыт ӧвӧл. Зэм но, нокин ми пӧлысь котьма ласянь ӟечлыко луыны уг быгаты, малы ке шуоно Библиын гожтэмын: «Музъем вылын ӧвӧл чик сьӧлыкатэк, ӟечлык лэсьтыса гинэ шонер улӥсь адями» (Екк. 7:20). Апостол Павел пӧяськытэк вераз: «Тодӥсько уго мон пушкын, мынам лулмугорам, ӟечез уг улы шуыса» (Рим. 7:18). Валамон, милемлы Иеговалэн, ӟечлыко Инмарлэн, юрттэмез кулэ шуыса.

Иегова тужгес но умой адӟем карон возьматэ, кызьы ӟечлыко луоно. Со сярысь Библиын гожтэмын: «Ӟеч, ӟеч карись Тон, Аслад законъёсыдлы монэ дышеты» (Пс. 118:68). Ойдолэ эскеромы Иеговалэн ӟечлыко луэмезлэсь кык палъёссэ, кудъёсыз сярысь та кылбурын гожтэмын.

Иегова ӟеч. Иегова сокем ӟечлыко, со ваньзэ лэсьтэ, ӟечлыксэ возьматыса. Вань мукет сямъёсыз герӟаськемын солэн ӟечлыко луэменыз. Тодамы ваёмы, мар луиз, куке Иегова Моисейлы вераз: «Мон тыныд вань ӟечлыкме возьмато» (Пот. 33:19, ВД). Иегова Моисейлы вань данлыксэ возьматӥз, озьы ик ӟечлыксэ, но вераз: «Кузё-Инмар, Кузё-Инмар, адямиез яратӥсь, гажась-жалясь, кема чидась, туж гажась-жалясь, зэмлыко Инмар. Со сюрсэтӥ выжылы но гажан-жалянзэ возьматэ, Со янгышъёсты, йыружъёсты, сьӧлыкъёсты ӵуше-куштэ, но вӧсь карытэк уг кельты» (Пот. 34:6, 7). Со возьматэ, Иегова котьма ласянь ӟечлыко шуыса. Иисус котькыӵе адямилэсь ӟечлыко вал ке но, со шуиз: «Одӥг Инмар сяна, нокин но ӟеч ӧвӧл» (Лука 18:19).

Иегова ӟеч карись. Иеговалэн вань ужъёсыз возьмато, со ӟечлыко шуыса. Библиын  гожтэмын: «Кузё-Инмар ваньмызлы ӟеч, вань ужъёсызлы берекет сётэ» (Пс. 144:9). Со ымныр шоры уг учкы но вань адямиослы ӟечлыксэ возьматэ, улон но со понна ваньзэ кулэзэ сётыса (Ап. уж. 14:17). Озьы ик со ӟечлыксэ возьматэ, куке милемыз простить каре. Псаломъёсты гожъясь вераз Иегова сярысь: «Тон ӟечлыко, туж гажась, жалясь луиськод» (Пс. 85:5). Оскыны луэ, «дун-шектэм улӥсьёслы Со ӟечлык сётытэк уг кельты» шуыса (Пс. 83:12).

Ми Инмарлы укшатыса кылдытэмын, соин ик ми ӟечлыко луыны но ӟеч ужъёс лэсьтыны быгатӥськомы (Ул.-выл. 1:27). Но со ас понназ луыны уг быгаты. Инмарлэн Кылыз ӧте милемыз: «Ӟеч уж лэсьтыны дышетске» (Ис. 1:17). Кызьы милемлы солы дышетсконо? Эскеромы куинь амалъёсты.

Нырысетӥез, ми святой дух сярысь вӧсяськыны быгатӥськомы, кудӥз христианъёслы ӟечлыко луыны юрттэ (Гал. 5:22, ВД). Святой духлэн юрттэменыз, ми ӟечсэ яратыны но уродзэ адӟемпотостэм карыны дышетскомы (Рим. 12:9). Библиын гожтэмын, Иегова милемыз «ӟеч кыл вераны, ӟеч уж лэсьтыны» юнматыны быгатоз шуыса (2 Фес. 2:16, 17).

Кыкетӥез, милемлы Инмарлэсь Кылзэ лыдӟоно, Иегова милемыз «вань ӟеч сюресъёслы» мед дышетоз но «ӟеч ужъёсты лэсьтыны» мед дасялоз шуыса (Мад. 2:9; 2 Тим. 3:17). Милесьтым сюлэммес шыкысэн ӵошатыны луэ. Библиез лыдӟыса но со вылын малпаськыса, ми шыкысмес тырмытӥськомы Инмар но солэн эрикез сярысь умой малпанъёсын, кудъёссэ котькыӵе дыре кутыны быгатӥськомы (Лука 6:45; Еф. 5:9).

Куинетӥез, ми Библиысь ӧтёнъя лэсьтыны тыршиськомы: «Ӟечлэсь адӟем кар» (3 Иоанн 11). Библиын вань трос адӟем карымон примеръёс. Веранэз ӧвӧл, тужгес но умой адӟем карон милемлы Иегова но Иисус возьмато. Кин эшшо ӟечлыко луэменыз тодмо вал? Тӥляд тодады лыктэ, дыр, кык ним — Тавифа но Варнава (Ап. уж. 9:36; 11:22—24). Соос сярысь Библиысь лыдӟыса, тӥ тросэзлы дышетскыны быгатӥськоды. Саклыктэс висъялэ солы, кызьы соос мукетъёслы уж вылын юрттылӥзы. Малпаське, кызьы тӥ ӵыжы-выжыосты яке кенешысь вын-агайёсты но сузэр-апайёсты пӧлысь кинлы ке но юрттыны быгатысалды. Со сяна, малпаське, кызьы Инмар бакель кариз Тавифаез но Варнаваез ӟеч ужъёссы понна. Сыӵе ик бакель каронъёс возьмало тӥледыз но.

 Туннэ но вань вын-агайёс но сузэр-апайёс, кудъёсыз мукетъёслы ӟеч ужъёс лэсьто. Кылсярысь, малпаське тӧроос сярысь, кудъёсыз ӟечлыкез ярато но сюлмысьтызы тыршо, кенешлы пайда ваён понна. Инмарлы оскымон сузэр-апайёс сярысь но вунэтоно ӧвӧл, кудъёсыз ӟечлы дышето, озьы ик асьсэлэн улонэнызы но (Тит. 1:8; 2:3). Розлин нимо сузэр вера: «Мон эшъяськисько сузэрен, кудӥз кенешын ваньмызлы тодмо мукетъёсызлы юрттэменыз но соослэсь мылкыдзэс ӝутэменыз. Со соосты валаны тырше но ӵемысь соослы пичи кузьымъёс лэсьтэ яке соослы кызьы ке но юрттэ. Со зэм но ӟечлыко адями».

Иегова ужась-тыршисьёссэ ӧте: «Ӟечлыкез утчалэ» (Ам. 5:14). Ми ӟечлыкез утчаськомы ке, соку ми Инмарлэсь эсэпъёссэ яратомы но милям ӟеч ужъёс лэсьтыны мылкыдмы луоз.

Малпано ӧвӧл: ӟечлыко адямиен лыдъяны луэ шуыса сое гинэ, кин мукетъёссэ паймытыны яке дуно кузьымъёс карыны быгатэ. Сяська мед будоз шуыса, ми со вылэ одӥг пол трос ву ум кисьтӥське, нош со интые трос пол пичиен ву киськаськомы. Озьы ик ӟечлыко адями луон понна, трос ӟеч ужъёс лэсьтоно.

Библия ӧте милемыз «котькыӵе ӟеч ужез быдэстыны... дасесь» луыны (Тит. 3:1). Ми мукет адямилэн ужъёсыныз тунсыкъяськиськомы ке, соку солы кызьы ке но юрттыны быгатомы (Рим. 15:2). Ми быгатӥськомы солы сётыны сое, мармы милям вань (Мад. 3:27). Кылсярысь, сое ӧтьыны луэ ӵош сиськыны яке мар ке но умоез сярысь вераськыны. Со висьыны усиз ке, солы открытка кузьманы, со доры ветлыны яке солы жингыртыны луоз. Озьыен, вань трос амалъёс, кызьы ӟеч но «осконэз юнматӥсь-дышетӥсь кылъёс» вераны, «кылзӥськисьёслы соос пайда мед ваёзы» шуыса (Еф. 4:29).

Милям, Иегова сямен, ваньмызлы ӟеч ужъёс лэсьтэммы потэ. Соин ик ми ымныр шоры ум учкиське. Со понна одӥгез тужгес но умой луонлык — ваньмызлы Инмарлэн Эксэйлыкез сярысь вераны. Ми, Иисуслэн косэмезъя, ӟеч ужъёс лэсьтыны тыршиськомы соослы но, кинъёс милемыз адӟемпотостэм каро (Лука 6:27). Ӟеч уж лэсьтыны — со котьку но умой ужпум, малы ке шуоно солы «пумит закон уг мыны» (Гал. 5:22, 23). Курадӟеммы яке милемлы уродзэ лэсьтэмзы шоры учкытэк, ми ӟеч ужъёс лэсьтӥськомы ке, ми мукетъёссэ зэмлык пала кыскыны но Инмарез данъяны быгатомы (1 Пётр 3:16, 17).

Мадёнъёсын 14:14 гожтэмын, «ӟеч мурт... аслаз улон сюрес вылаз будэтэм емышеныз кӧтсэ тыроз» шуыса. Мае со возьматэ? Ми мукетъёслы ӟеч ужъёс лэсьтӥськомы ке, соос милемлы сыӵе ик ужъёсын берыктозы, дыр (Мад. 14:22). Нош ӧз берыктэ ке, ӟеч ужмылы луыса соослэн сюлэмзы небӟыны быгатоз (Рим. 12:20).

Соос, кинъёс лек ужъёс лэсьтэмысь дугдӥзы но ӟечез яратӥзы, умой пала воштӥськизы. Тани Нэнси нимо сузэрлэн учырез. Со вера: «Мон возьыттэм вал, нокинлэсь ӧй кылзӥськылы, азыса-калгыса улӥ. Нош куке мон Инмарлэсь ӟечез сярысь эсэпъёссэ тодӥ но соосъя улыны кутски, мон шудогес луи но ачим асме гажаны кутски».

Тужгес но кулэ луись муг, малы ми ӟечлыкез будэтӥськомы,— со Иеговаез шумпоттон. Тросэз милесьтым ужъёсмес уг адӟо ке но, соосты адӟе Иегова. Со адӟе котькуд ӟеч ужмес, озьы ик малпанмес но (Еф. 6:7, 8). Кыӵе бакель карон милемыз возьма? «Ӟеч муртлы Кузё-Инмар ӟеч эриксэ возьматэ»,— гожтэмын Мадёнъёсын 12:2. Соин ик ойдолэ азьланяз но ӟечлыкез будэтомы. Иегова кылзэ сётэ «котькудӥзлы ӟеч лэсьтӥсьлы дан, сӥ-сан, каньыллык» сётыны (Рим. 2:10).