«Аминь» кыл возьматэ «озьы мед луоз; зэм ик» шуэмез. Со пӧрмемын еврей кыллэсь, кудӥз возьматэ «оскымон луыны» верамез. Куд-ог дыръя «аминь» кыл кутӥське вал судэн герӟаськем юанъёсын. Тае вераса, кылзэ сётэм адями возьматэ вал, зэмзэ вера шуыса, но, кылзэ ӧз быдэсты ке, бервылъёссэ чиданы дась шуыса (Лыд. 5:22). Куке адями, кылзэ сётыкуз, адямиос азьын «аминь» шуэ вал, сётэм кылзэ быдэстыны солэн тросгес мугез луылӥз (Неем. 5:13).

«Аминь» кыллэн кутӥськемез умой адӟиське Кыкетӥ Законысь 27-тӥ люкетын. Израиль калык, Сӥзем музъеме пыремез бере, Гевал но Гаризим гурезьёс вискын люкаськиз, Законэз кылзон понна. Но соослы сое кылзоно гинэ ӧй вал, соослы верано вал, соин соглаш луо шуыса. Кызьы соос сое лэсьтӥзы? Куке соос кылӥзы, кыӵе бервылъёсы вуттоз Законэз тӥямзы, соос «аминь» вераллязы (К. Зак. 27:15—26). Пуктэ син азяды, кызьы трос сюрс пиосмуртъёс, кышномуртъёс но нылпиос зол куараен та кылэз верало! (Иис. Н. 8:30—35). Оскыны луэ, соос вань улытозязы сое ӧз вунэтэ, дыр, шуыса. Но соос сётэм кылзэс быдэстӥзы, малы ке шуоно Библиын гожтэмын: «Иисуслэн вань улон нуналъёсаз Израиль Кузё-Инмарлы ужаса-тыршыса улӥз, Иисус кулэм бере улыны кылем тӧроослэн кивалтон нуналъёсазы но озьы вал, соос Кузё-Инмарлэсь Израильлы вань лэсьтэм ужъёссэ адӟизы уго» (Иис. Н. 24:31).

Иисус Христос но «аминь» кылэз вералляз (удмурт берыктэмын «зэм ик»), нош со сое туж аспӧртэмлыко амалэн лэсьтылӥз. Со «аминь» кылэз кинлэн ке кылъёсыз бере ӧз вералля, нош мае ке веран азяз вералляз. Озьы со возьматэ  вал, солэн кылъёсыз зэм луо шуыса. Куддыръя «аминь» кылэз со кык пол вералляз (удмурт берыктэмын «зэм ик, зэм ик» шуыса гожтэмын) (Матф. 5:18; Иоанн 1:51). Озьы со кылзӥсьёссэ оскытӥз, солэн кылъёсызлы быдэсак оскыны луэ шуыса. Иисус озьы лэсьтыны быгатэ вал, малы ке шуоно Инмар сое вань кыл сётонъёссэ быдэстыны пуктӥз (2 Кор. 1:20; Усьт. 3:14).

Израиль калык «аминь» кылэз кутылӥз соку но, куке ваньзы ӵош Иеговаез данъяллязы но солы вӧсяськизы (Неем. 8:6; Пс. 40:14). Вӧсяськонлэн пумаз «аминь» шуыса, кылзӥсьёс возьмато вал верам кылъёсын соглаш луэмзэс но шумпотэмзэс, озьы Иеговалы йыбырттонэ пыриськыны быгато шуыса. Кылсярысь, тани мар луиз, куке Давид эксэй Иеговалэсь ковчегзэ Иерусалиме вайиз. Со шулдыръяськон ортчытӥз, кытын кырӟазы соин гожтэм кырӟанэз, шуыны луоз, со вал Иеговалы сюлмысь вӧсяськемез. Со гожтэмын 1 Паралипоменонын 16:8—36. Та кылъёслы шумпотыса, «вань калык шуиз: „Аминь! Аллилуия!“». Та учыр нуналзэс эшшо но шулдыргес кариз.

Нырысетӥ даурын но христианъёс «аминь» кылэз вераллязы, куке Иеговаез данъязы. Та кыл ӵем пумиське гожтэтъёсын, кудъёсыз Библия пӧлы пыризы (Рим. 1:25; 14:26; 1 Пётр 4:11). Кызьы гожтэмын Усьтӥськон книгаын, инмын духовной кылдытэмъёс но Иеговаез данъяло, «Аминь! Аллилуия!» шуыса (Усьт. 19:1, 4). Нырысетӥ христианъёс, ваньзы ӵош вӧсяськемзы бере, ӵем дыръя «аминь» кылэз вераллязы (1 Кор. 14:16). Нош соос та кылэз малпаськытэк ӧз вералэ.

Тодыса, кызьы Иеговалэн ужась-тыршисьёсыз «аминь» кылэз трос дауръёс ӵоже кутылӥзы, ми валаськомы, малы сое вӧсяськонлэн пумаз вераны кулэ. Куке ми сое вераськомы ас поннамы вӧсяськеммы бере, ми возьматӥськомы, кылъёсмы вань сюлмысьтымы верамын вал шуыса.  Нош куке «аминь» кылэз ми вераськомы кинлэн ке вӧсяськемез бере (ас поннамы но), ми возьматӥськомы, ми соглаш луиськомы шуыса соин, мар верамын вал. Малы эшшо ми «аминь» кылэз вӧсяськонлэн пумаз вераськомы?

Ми бадӟым саклык висъяськомы солы, мар Инмарлы йыбыртъянэн герӟаськемын. Иеговалы вӧсяськон дыръя кылъёслы гинэ саклык висъяно ӧвӧл, нош солы но, кызьы ми асьмеды возиськомы. Вӧсяськонлэн пумаз милям вань сюлмысьтымы «аминь» шуэммы потэ ке, милемлы вӧсяськон шоры шонер учконо но сое сак кылзоно.

Ми ог-огенымы кусыпъёсмес юнматӥськомы. Куке кин ке но вӧсяське, ми ваньмы сое кылзӥськомы (Ап. уж. 1:14; 12:5). Но куке ми ваньмы ӵош «аминь» шуиськомы, со эшшо но милемыз огазея. Кызьы гинэ ми та кылэз медам вералэ, шара яке ас поннамы, со Иеговалэсь мылкыдзэ ӝутэ огъя куронмылы ответ сётыны.

Ми Иеговаез данъяськомы. Иегова дунъя ваньзэ, мае ми лэсьтӥськомы солы йыбыртъян понна (Лука 21:2, 3). Со адӟе, малы ми сое озьы лэсьтӥськомы но мар милям сюлмамы. Ми пумиськонэз телефон пыр кылзӥськомы ке но, ми оскыны быгатӥськомы, Иегова «аминь» шуэммес дунъя шуыса. Озьы ми но пумиськонэ лыктэмъёсын ӵош Иеговаез данъяськомы.

«Аминь» кыл номыре ик уг возьматы кадь потыны быгатоз, нош со озьы ӧвӧл. «Гожтэмъёсты валан» энциклопедиын валэктӥське, «аминь» кылын Инмарлэн ужась-тыршисьёсыз «осконзэс, быдэсак соглаш луэмзэс но вуоноезлы сюлмысь оскемзэс возьмато» шуыса. Иеговалы котьку мед кельшоз «аминь» шуэммес кылыны (Пс. 18:15).