Библия верамъя, мадиан пиос Иосифез Египетэ нуизы, но собере солэн Иаков атаез быдэс семьяеныз ӵош Ханаан музъемысь Египетэ улыны лыктӥз. Соос Гесем музъемын улыны кутскизы, кудӥз Нил шурлэн усёназ интыяськемын вал (Ул.-выл. 47:1, 6). Израиль пиос «тросгес но тросгес луизы, туж юнмазы». Соин сэрен египет калык кышканы кутскиз но израиль калыкез ляльчи кариз (Пот. 1:7—14).

Куд-ог критикъёс Библиысь та веранэз серем каро но сое выжыкылэн лыдъяло. Озьы ке но вань оскытыса веранъёс, кудъёсыз возьмато, вашкала Египетысь ляльчиос пӧлын семитъёс a вал шуыса.

Одӥгез оскытыса веран — со вашкала улосъёс, кудъёссэ шедьтӥзы археологъёс Египетлэн уйпалаз. Джон Бимсон, Библиез эскерись, вера, со интыын семитъёслэн ог 20 улосъёссы вал шуыса. Джеймс Хоффмайер, Египетэз эскерись тодосчи, вера: «Асьме вакытлэсь азьло 1800-тӥ ар котырысен 1540-тӥ арозь Египетэ ӵем дыръя улыны лыкто вал Азилэн шундыпуксён палысьтыз адямиос, кудъёсыз семитъёс пӧлы пыризы... Та вакыт тупа со вакытлы, куке, кызьы лыдъяло, улӥзы Авраам, Исаак но Иаков, озьы ик со тупа сыӵе дырлы но югдуръёслы, кудъёсыз сярысь Улон-вылон книгаын вераське».

Вань на эшшо одӥг оскытыса веран — со Египетлэн лымшор палысьтыз шедьтэм папирус, кудӥз гожтэмын вал асьме вакытлэсь азьло 2000 — 1600-тӥ аръёс котырын. Отын гожтэмын ляльчиослэн нимъёссы, кудъёсыз ужазы Египетлэн лымшор палысьтыз одӥгаз юртъерын. Та нимъёс пӧлысь 40-лэсь тросэзгес — со семит нимъёс. Со ляльчиос пӧраськисьёс, куиськисьёс но секыт ужез быдэсъясьёс луыса ужазы. Джеймс Хоффмайер таӵе йылпумъян лэсьтэ: «Фиваида улосын [Египетлэн лымшор палаз] одӥгаз гинэ юртъерын 40-лэсь тросгес семитъёс ужазы бере, вераны луоз, быдэс шаерын, тужгес но Нил шурлэн усён котыраз, соос эшшо но трос вал шуыса».

Дэвид Рол, археология удысысь тодосчи, гожтэ, куд-ог ляльчиослэн нимъёссы «Библилэн бамъёсысьтыз басьтэмын кадь» шуыса. Кылсярысь, папирусын пумисько нимъёс, кудъёсыз кельшо Библиысь нимъёслы: Иссахар, Асир но Шифра (Пот. 1:3, 4, 15). Дэвид Рол вера: «Со валамон возьматэ, израиль калык Египетын ляльчи вал шуыса».

Джон Бимсон йылпумъян лэсьтэ: «История умой возьматэ Библиысь веранлэсь зэм луэмзэ, израиль калык Египетын ляльчи вал но отысь потӥз шуыса».