1. Кыӵе нимысьтыз курон-косон сётӥз Иисус дышетскисьёсызлы? (Учке вылбамысь суредэз.)

 КУЛОН азяз ӝытазе Иисус дышетскисьёсызлы нимысьтыз курон-косон сётӥз. Со соослы вераз: «Кызьы Мон тӥледыз яратӥ, озьы ик тӥ но огдэс огды мед яратоды». Но ватсаз на: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:34, 35).

2. Малы ог-огмылы яратонмес возьматыны кулэ?

² Иисус шуиз, солэсь зэмос дышетскисьёссэ тодманы луоз шуыса, куке соос адямиосты яратозы озьы ик, кызьы Иисус соосты яратӥз. Со озьы вал нырысетӥ даурын, озьы ик со туннэ но. Соин ик туж кулэ ог-огмылы яратонмес возьматыны, куддыръя со капчи ӧвӧл ке но!

3. Мае ми эскеромы та статьяын?

³ Тырбыдэстэм луэммы люкетэ милемлы ог-огмес вань сюлмысьтымы яратыны. Озьы ке но ми тыршыны кулэ Христослэсь адӟем карыны. Та статьяысь ми тодомы, кызьы яратон юрттэ милемлы тупаса улон вайыны, вылтус шоры учкытэк улыны но куно карисесь луыны. Сое эскерыкуды асьтэлэсь юалэ: «Малы мон дышетскыны быгатӥсько вын-агайёслэсь но сузэр-апайёслэсь, кудъёсыз, шуг-секытъёс шоры учкытэк, яратонзэс возьматӥзы?»

4. Матфейлэсь 5:23, 24 лыдэ басьтыса, малы ми кусыпъёсмес тупатыны кулэ вын-агаенымы яке сузэр-апаенымы, кудӥзлэн милемлы кӧтӝожез вань?

⁴ Иисус дышетӥз, макем кулэ кусыпъёсмес тупатыны вын-агаен, кудӥзлэн милемлы кыӵе ке но кӧтӝожез вань. (Лыдӟе Матфейлэсь 5:23, 24.) Со пусйиз: Инмарез шумпоттэммы  потэ ке, милям мукетъёсыныз умой кусыпъёсмы луыны кулэ. Иегова шумпотэ, куке ми лэсьтӥськомы ваньзэ, мае быгатӥськомы, вын-агайёсын но сузэр-апайёсын тупаса улон понна. Куке ми кинлы ке кӧтӝожен улӥськомы но кусыпъёсмес тупатыны ум тыршиське, соку ужан-тыршонмы Иеговалы ярамон уз луы (1 Иоанн 4:20).

5. Малы Марклы одӥг агаен кусыпъёссэ тупатыны секыт вал?

⁵ Милемлы вын-агаенымы кусыпъёсмес тупатыны секыт луыны быгатэ. Малы? Эскеромы Марк b нимо агайлэсь учырзэ. Солэн кӧтыз ӝож луиз, куке одӥг агай солы но, кенешысь мукетъёсызлы но со сярысь уродзэ вераз. Кызьы ассэ возиз Марк? Со тодаз вае: «Мынам воже потӥз но мон пурӟи». Нош берлогес Марк со сярысь туж жаляз. Со тыршиз со агайлэсь прощенизэ курыны но кусыпъёссэс тупатыны, нош со агай сое простить ӧз кары. Нырысь Марк малпаз: «Солэн монэным тупамез уг поты ке, соку малы мон кусыпъёсмес тупатыны кулэ?» Нош ёросэз чаклась Марклэсь мылкыдзэ ӝутӥз азьланяз но тыршыны агаен кусыпъёссэс тупатыны. Мар кариз Марк?

6. а) Кызьы Марк тыршиз агаен кусыпъёссэ тупатыны? б) Кызьы Марк уже кутӥз Ефесъёслы 4:2, 32 возетэз?

⁶ Марк аслэсьтыз мылкыдзэ эскериз но валаз, солэн вылтӥяськон сямыз вань шуыса. Озьы ик со валаз, адямиос шоры солы мукет сямен учконо шуыса (Кол. 3:8, 9, 12). Со агай доры лыктыса, Марк эшшо одӥг пол солэсь прощенизэ куриз. Со сяна, со гожтӥз кӧня ке гожтэтъёс, кудъёсаз вераз, ассэ шонертэм воземез понна туж жаля шуыса, но куриз ваньзэ вунэтыны. Марк со агайлы кӧня ке пичи кузьымъёс но кузьмалляз, кудъёсыз, со малпамъя, солы кельшыны кулэ вал. Нош жаляса верано луэ, агайлэн сюлмыз ӧз небӟы. Озьы ке но Марк азьланяз но быдэсъяз Иисуслэсь курон-косонзэ, вын-агайдэ яратоно но простить кароно шуыса. (Лыдӟе Ефесъёслы 4:2, 32.) Тыршемды шоры учкытэк,  вын-агайлэн тӥледын тупамез уг поты ке, зэмос христиан яратон тӥлесьтыд мылкыддэс ӝутоз азьланяз но сое простить карыны но вӧсяськыны, кусыпъёсты мед тупалозы шуыса (Матф. 18:21, 22; Гал. 6:9).

7. а) Мар карыны милесьтым мылкыдмес ӝутӥз Иисус? б) Кыӵе учырен пумиськиз Лара?

⁷ Иисус милесьтым мылкыдмес ӝутӥз асьмеды мукетъёсыныз возьыны озьы ик, кызьы ми мукетъёсызлэсь асьсэды воземзэс возьмаськомы. Со ватсаз, милемлы яратыны кулэ ӧвӧл шуыса соосты гинэ, кин милемыз яратэ (Лука 6:31—33). Кызьы тӥ асьтэды возёды, куке кенешысь кин ке но тӥлесьтыд палэнскыны кутскоз но ӟечбуръяськемысь дугдоз? Зэм но, сыӵе учыръёс шер луыло, но ӵапак соин пумиськиз Лара. Со вера: «Одӥг сузэр мынэсьтым палэнскыны кутскиз, нош мон нокызьы но ӧй вала малы. Та монэ туж ӝоже уськытӥз. Кенешлэн пумиськонъёсыз шумпотон мыным ӧз вайылэ ини». Лара малпаз: «Мон солы номыр уродзэ ӧй лэсьты. Кенешын мукетъёсыз но адӟо, со ассэ валантэм возе шуыса».

8. Кызьы Лара одӥг сузэрен кусыпъёссэ тупатыны тыршиз но малы дышетэ милемыз солэн учырез?

⁸ Кусыпъёссэс тупатон понна, Лара Иеговалы вӧсяськиз но сузэрен вераськыны ужпум кутӥз. Соос ваньмыз сярысь вераськизы, ӟыгырскизы, но номыр уродэз ӧй но вал, кадь. «Нош кӧня ке дыр ортчыса,— тодаз вае Лара,— сузэр ассэ азьло сямен возьыны кутскиз. Мынам киосы ик лэзиськизы». Нырысь Лара малпаз: солэн сюлмыз буйгалоз соку гинэ, куке сузэр ассэ мукет сямен возьыны кутскоз. Нош собере со валаз: тужгес но умоез, мар карыны луэ та учырын,— азьланяз но сузэрлы яратонэз возьматыны но вань сюлмысь сое простить карыны (Еф. 4:32—5:2). Лара тодаз возиз, зэмос христиан «яратон уг кереты», со «ваньмызлы дурбасьтэ, юн оске, чылкыт сюлмын оскиське, ваньзэ чида» шуыса (1 Кор. 13:5, 7). Та возет Ларалы каньыл сюлмын улыны юрттӥз. Дыр ортчыса, со сузэр Лараен ассэ лякытгес возьыны кутскиз. Тӥ вын-агаен яке сузэр-апаен кусыпъёстэс тупатыны но солы яратондэс возьматыны тыршиськоды ке, соку оскыны быгатӥськоды,  «яратыса, тупаса улонлэн Инмарез тӥледын валче улоз» шуыса (2 Кор. 13:11).

9. Апостолъёслэсь ужъёссэс 10:34, 35 лыдэ басьтыса, малы милемлы адямиослэн вылтуссы шоры учконо ӧвӧл?

⁹ Иегова нокинлэн но вылтусыз шоры уг учкы. (Лыдӟе Апостолъёслэсь ужъёссэс 10:34, 35.) Куке ми но адямиослэн вылтуссы шоры ум учкиське, соку возьматӥськомы, Инмарлэн нылпиосыз луиськомы шуыса. Ми кылзӥськиськомы курон-косонлэсь, матысьтэ астэ ачид кадь ик яратоно шуыса, но духовной семьяямы тупаса улон вайиськомы (Иак. 2:8, 9; Рим. 12:9, 10).

10, 11. Кызьы Рита урод шӧдонъёссэ вормыны быгатӥз?

¹⁰ Куд-огъёсызлы мукет адямиослэн вылтуссы шоры учкытэк улыны секыт. Тани Рита сузэрлэн учырез. Егит дыръяз мукет шаерысь одӥг кышномурт ассэ соин умойтэм возиз. Кызьы со шӧдӥськиз Рита вылын? Со вера: «Мон адӟемпотостэм карыны кутски ваньзэ, мар герӟаськемын со шаерен. Мон малпай, со шаерысь вань адямиос — вын-агайёс но, сузэр-апайёс но — та кышномурт кадесь шуыса». Кызьы Рита урод шӧдонъёссэ вормыны быгатӥз?

¹¹ Рита валаз, мае ке но воштоно шуыса. «Арлы быдэ потӥсь книгаысь» со лыдӟыны кутскиз тодытон ужын луэм учыръёс сярысь но со шаерысь отчётъёс сярысь. Рита вера: «Мыным туж тыршоно луиз со шаерысь адямиос сярысь умой малпаськыны. Мон адӟи, отысь вын-агайёс но сузэр-апайёс вань сюлмысьтызы Иеговалы ужало-тыршо шуыса, но валай, соос но дунневыл вынлыкмылэн оглюкетэз луо шуыса». Берлогес Рита валаз: солы эшшо мар ке но кароно на. Со валэктэ: «Котьку но, со шаерысь вын-агайёсты но сузэр-апайёсты пумитакум, мон лэсьтӥ ваньзэ, соосын асме лякытэн возён понна. Мон тырши соосын вераськыны но соосты умойгес тодыны». Кыӵе со емышъёс вайиз? «Дыр ортчемъя,— вера Рита,— вань урод шӧдонъёсы быризы».

12. Кыӵе шексэ шедьтӥз аслэсьтыз Сара?

¹² Куд-огъёсыз уг но валало, дыр, соослэн мукетъёсыз сярысь азьло ик урод малпанъёссы вань шуыса. Кылсярысь, Сара нимо сузэр малпаз, со адямиослэн вылтуссы шоры уг учкы шуыса, малы ке шуоно со ӧз чакла, кыӵе калыкысь адями потэмын, кӧня солэн коньдонэз вань но кыӵе ужъёсты со кенешын быдэсъя. «Озьы ке но,— азьланьтэ Сара,— мон валаны кутски, мынам азьло ик урод малпанъёсы вал шуыса». Малы со озьы вера? Саралэн но солэн семьяезлэн вылӥ образованизы вал, но солэн сыӵе ик адямиосын кусып воземез потӥз. Одӥг пол со эшезлы вераз: «Мон дырме ортчытӥсько со вын-агайёсын но сузэр-апайёсын, кудъёсызлэн вылӥ образованизы вань, нош мукетъёсызлы дырме чик но уг висъяськы». Веранэз ӧвӧл, Саралы воштӥськоно вал. Мар со кариз?

13. Малы дышетэ милемыз Саралэн учырез?

¹³ Ёросэз чаклась юрттӥз Саралы вын-агайёс но сузэр-апайёс шоры шонер учкыны. Со тодаз вае: «Агай ушъяз монэ, мон Иеговалы оскымон ужасько-тыршисько, пумиськонъёсын малпам валэктонъёс сётъясько но Библиез умой тодӥсько шуыса. Нош собере со валэктӥз: тодон-валан гинэ басьтыны тырмыт ӧвӧл, озьы ик будэтоно христиан сямъёсты но, кылсярысь, зӥбыт-востэм луонэз, гажан-жалянэз, но валано, ваньзэ лэсьтыны ум быгатӥське шуыса». Сара ёросэз чакласьлэн верамезлэсь кылзӥськиз. Сузэрмы вера: «Мон валай: тужгес но кулэез — яратонэз но ӟечлыкез возьматыны». Солы луыса вын-агайёсын но сузэр-апайёсын со ассэ ӟечен возьыны кутскиз. Сара валэктэ: «Мон валаны  тырши, кыӵе сямъёссэс Иегова дунъя». Нош мар вераны луоз ми сярысь? Милемлы малпано ӧвӧл, вылӥ образованимылы луыса ми мукетъёсызлэсь умойгес луиськомы шуыса! Ми вынлыкмес вань сюлмысьтымы яратӥськомы ке, соку азьло ик урод малпанъёслэсь палэнскыса уломы (1 Пётр 2:17).

14. Еврейёслы 13:16 лыдэ басьтыса, мар шӧдэ Иегова, куке ми мукетъёссэ куно кариськомы?

¹⁴ Иегова туж шумпотэ, куке ми мукетъёссэ куно кариськомы. (Лыдӟе Еврейёслы 13:16.) Инмар сое йыбырттонмылэн оглюкетэныз лыдъя, тужгес но соку, куке ми кулэяськись адямиосты куно кариськомы (Иак. 1:27; 2:14—17). Тӥни малы Библия милесьтым мылкыдмес ӝутэ: «Пыдйылчиосты гуртады вайыса сюдэ-вордэ» (Рим. 12:13). Куно карись адями мукетъёсызлы саклыксэ висъя, яратэмзэ но сюлмаськемзэ возьматэ. Иегова шумпотэ, куке ми мукетъёссэ маин ке куно кариськомы но соосын дырмес ортчытъяськомы (1 Пётр 4:8—10). Нош ваньмызлы куно карись луыны капчи ӧвӧл.

15, 16. а) Малы куд-огъёсыз куно карыны уг дӥсьто? б) Мар юрттӥз Эдиталы куно карись луыны?

¹⁵ Куд-огъёсыз куно карыны уг дӥсьто. Но солы пӧртэм мугъёс луыны быгато. Тани Эдита нимо палкышнолэн учырез. Адӟись-Ивортӥсь луэмезлэсь азьло со тырше вал адямиосын ӧжытгес пумиськылыны. Эдита малпаз, мукетъёсыз, соин ӵошатыса, умойгес куно карыны быгатысалзы шуыса.

¹⁶ Адӟись-Ивортӥсь луыса, Эдита аслыз ужпум пуктӥз куно карись луыны. Тани мар со вера: «Куке ми дорын Эксэйлык Юрт пуктӥськыны кутскиз, тӧро вераз мыным, милемлы юрттыны одӥг кузпалъёс лыктозы шуыса. Со юаз мынэсьтым, яра-а соослы мон дорын кык арня ӵоже улыны. Мон тодам вайи, кызьы Иегова Сарептаысь палкышноез бакель кариз, но соглаш кариськи» (3 Экс. 17:12—16). Жаляз-а Эдита, со сыӵе ужпум кутӥз шуыса? Со тодаз вае: «Кык арня интые, соос мон дорын кык толэзь ӵоже  улӥзы. Со дыр куспын ми туж эшъяськимы». Озьы ик Эдита кенешысь трос эшъёс шедьтӥз. Али Эдита пионер луыса ужа-тырше, но солы кельше соин ӵош тодытӥсьёсты дораз ӧтьыны но маин ке куно карыны. Со вера: «Мукетъёсызлы мар ке но сётыса, трос бакель каронъёс басьтыны луэ. Сое мон ас вылам шӧдӥ» (Евр. 13:1, 2).

17. Мае валазы Люк но солэн кышноез?

¹⁷ Тӥ асьтэды куно карись адямиен лыдъяськоды, вылды. Нош быгатӥськоды-а тӥ эшшо но куно карись луыны? Тани Люк нимо агайлэн но солэн кышноезлэн учырзы. Соос куное ӵем ӧтьылӥзы анай-атайёссэс, ӵыжы-выжыоссэс, матысь эшъёссэс но ёросэз чакласез кышноеныз. Но Люк вера: «Ми валамы, ӧтиськомы шуыса соосты гинэ, кинэ умой тодӥськомы». Мар каризы Люк но солэн кышноез, эшшо но куно карись луон понна?

18. Мар юрттӥз Люклы но солэн кышноезлы эшшо но куно карись луыны?

¹⁸ Ваньмыз воштӥськиз, куке Люк кышноеныз малпаськизы Иисуслэн кылъёсыз вылын: «Тӥледыз яратӥсьёсыз гинэ яратӥды ке, тӥляд кыӵе медды-кузьымды луоз?» (Матф. 5:45—47). Соос валазы: соослы адӟем кароно Иеговалэсь, кудӥз вань адямиослы шырыт сямзэ возьматэ. Соин ик Люк кышноеныз асьсэлы ужпум пуктӥзы куное ӧтьылыны со вын-агайёсты но сузэр-апайёсты, кудъёсыз соос дорын ӧй вал на. Люк вера: «Милемлы ваньмылы туж кельше дырез ӵош ортчытъяны. Сыӵе пумиськонъёс милемыз юнмато но мылкыдмес ӝуто».

19. Кызьы возьматоно, ми Христослэн дышетскисьёсыз луиськомы шуыса? Мар карыны тӥляд мылкыдды вань?

¹⁹ Ми эскеримы, кызьы вань сюлмысь яратон юрттэ милемлы тупаса улон вайыны, вылтус шоры учкытэк улыны но куно карись луыны. Ойдолэ номырлы но ум лэзе люкетыны вын-агайёсмес но сузэр-апайёсмес вань сюлмысьтымы яратыны. Озьы лэсьтыса, ми шудо луомы но возьматомы, ми зэмзэ но Христослэн дышетскисьёсыз луиськомы шуыса (Иоанн 13:17, 35).