1. Кыӵе шуг-секытъёсын пумиськыны быгато Иеговалэн ужась-тыршисьёсыз?

 ВАНЬ-А тӥляд кыӵе ке шуг-секытты? Оло нош, тӥледыз кенешын кин ке но вӧсь кариз (Иак. 3:2). Оло нош, уж дорады яке школаын Иеговалы ужам-тыршемды понна тӥледыз серем каро (1 Пётр 4:3, 4). Яке семьядылэн потэ, тӥ кенешлэн пумиськонъёсаз медад ветлэ но мукетъёсыныз осконды сярысь медад вераське ни шуыса (Матф. 10:35, 36). Югдурды туж секыт ке, тӥ малпаны но быгатоды, шуг-секыттэс сэрттыны-пертчыны быгатоды шуыса соку гинэ, куке Иеговалы ужам-тыршемысь дугдоды. Озьы ке но юн оске: кыӵе гинэ шуг-секытэн медад пумиське, Иегова тӥледлы визьлык сётоз шонер ужпум кутыны, озьы ик со кужым сётоз шуг-секыттэс чиданы.

2. Кыӵе пайда милемлы вайыны быгатэ Инмарлэн Кылыз, Римъёслы 15:4 лыдэ басьтоно ке?

² Инмарлэн Кылаз вераське со сярысь, кызьы тырбыдэстэм адямиос пӧртэм шуг-секытъёссэс сэрттыны-пертчыны быгатӥзы. Малы Иегова сюлмаськиз, солэн Кылаз та учыръёс гожтэмын мед луозы шуыса? Кызьы вераське Римъёслы 15:4 (лыдӟе), сыӵе адямиослэсь адӟем карыса, ми малы ке но дышетскыны быгатомы. Та учыръёс милемыз буйгато но оскон сёто. Но Библиез лыдӟыны гинэ тырмыт ӧвӧл. Туж кулэ, со милесьтым малпаськон амалмес мед тупатоз но сюлмамы мед пыӵалоз шуыса. Мар кароно, кыӵе ке шуг-секыттэс сэрттон-пертчон понна, тӥледлы визь-кенеш кулэ ке? Тӥледлы юрттыны быгатэ таӵе амал: 1) вӧсяське, 2) син азяды пуктэ, 3) малпаське но 4) уже кутэ. Ойдолэ пыр-почгес  эскеромы та вамышъёсты b. Собере Давид эксэйлэн но апостол Павеллэн учыръёссы вылын учкомы, кызьы та амалэз улонамы пыртоно.

3. Мар кароно Библиез лыдӟемлэсь азьло но малы?

³ 1. Вӧсяське. Библиез лыдӟемлэсь азьло Иеговалы вӧсяське, валан понна, кызьы лыдӟем кылбуръёс тӥледлы юрттыны быгатозы. Кылсярысь, шуг-секыттэс сэрттон-пертчон понна, тӥледлы визь-кенеш кулэ ке, вӧсяське Иеговалы, со тӥледлы аслаз Кылысьтыз возет шедьтыны мед юрттоз шуыса. Озьы тӥ шонер ужпум кутыны быгатоды (Иак. 1:5; Флп. 4:6, 7).

4. Мар кароно, Библиысь учырез син азямы пуктон понна?

⁴ 2. Син азяды пуктэ. Иегова сётӥз милемлы паймымон быгатонлык, кудӥзлы луыса ми мае ке син азямы пуктыны быгатӥськомы. Тырше озьы ик карыны, куке тӥ Библиысь учырез лыдӟиськоды. Асьтэды пуктыны тырше адями интые, кудӥз сярысь вераське, ваньмыз шоры солэн синмыныз учке но солэсь шӧдонъёссэ валаны тырше.

5. Мар со малпаськон но мар юрттоз милемлы Библия вылын малпаськыны?

⁵ 3. Малпаське. Куке ми малпаськиськомы, ми валаны тыршиськомы сое, мае лыдӟиськомы, но сое, кызьы та тодон-валанъёс милемын герӟаськемын. Малпаськон милемлы валаны юрттэ, кызьы малпанъёс ог-огенызы герӟаськемын. Солы луыса ми лыдӟеммес умойгес валаськомы. Библиез малпаськытэк лыдӟон — со емышъёс кадь, кудъёсыз дасямын кыӵе ке сиёнэз пӧран понна. Куке тӥ малпаськиськоды, вераны луоз, та емышъёсты тӥ ӵош пӧзьтӥськоды но, тӥляд туж ческыт сиёнды пӧрме. Мар юрттоз тӥледлы Библия вылын малпаськыны? Тырше валэктонъёс шедьтыны таӵе юанъёслы: мар лэсьтӥз та учырысь адями, шуг-секытсэ сэрттон-пертчон понна? Кызьы солы Иегова юрттӥз? Малы дышетэ монэ та учыр но кызьы со мыным юрттыны быгатэ шуг-секытъёс дыръя?

6. Малы милемлы уже кутоно сое, мае тодӥмы?

⁶ 4. Уже кутэ. Иисуслэн верамезъя, ми басьтэм тодон-валанъёсмес уже ум ке кутӥське, ми кельшиськомы адямилы, кудӥз аслэсьтыз корказэ луо вылэ пуктӥз. Со туж тыршыса ужаз, но юнме гинэ. Малы? Малы ке шуоно «зорыны кутскем но, шуръёс тудӟыса, тӧлъёс пельтыса, со корка вылэ урдскиллям; корка куашкам, куашканэз солэн шимес вылэм» (Матф. 7:24—27). Озьы ик ми но, вӧсяськиськомы ке, асьмеды пуктӥськомы ке адями интые, кудӥз сярысь тодӥмы, лыдӟеммы вылын малпаськиськомы ке, нош басьтэм тодон-валанъёсмес уже ум ке кутӥське, ми юнме тыршиськомы. Малы ке шуоно, шуг-секытъёсын пумиськыкумы, милям осконмы ляб луоз. Мукет паласен учкыса, ми Библиез эскеримы ке но басьтэм тодон-валанъёсмес уже кутӥмы ке, соку быгатомы шонер ужпумъёс кутыны, каньыл сюлмын улыны но осконмес юнматыны (Ис. 48:17, 18). Нош табере, та амалэз уже кутыса, ойдолэ малпаськомы, малы ми дышетскыны быгатӥськомы Давид эксэйлэсь.

7. Библиысь кыӵе учырез ми али эскеромы?

⁷ Тӥледыз куке но эшты яке ӵыжы-выжыды вӧсь кариз-а? Соку тӥледлы юрттоз Давидлэн учырез. Сое вӧсь кариз Авессалом пиез, куке со интые эксэй луыны турттӥз (2 Экс. 15:5—14, 31; 18:6—14).

8. Мае тӥ курыны быгатӥськоды Иеговалэсь?

⁸ 1. Вӧсяське. Давидлэн учырез сярысь  лыдӟемлэсь азьло пыр-поч вералэ Иеговалы, кызьы тӥледыз вӧсь каризы но мае тӥ шӧдӥськоды (Пс. 6:7—10). Собере куре Иеговалэсь, со тӥледлы мед юрттоз шуыса шедьтыны возетъёсты, кудъёсыз юрттысалзы тӥледлы шуг-секытты пыр потыны.

9. Мар луиз Давид но Авессалом куспын?

⁹ 2. Син азяды пуктэ. Малпаське, мар луиз Давид эксэен но асьтэды со интые пуктыны тырше. Кӧня ке аръёс ӵоже Авессалом тыршиз калыкез ас палаз берыктыны (2 Экс. 15:7). Куке со валаз, тупась дыр вуиз шуыса, со Израильлэн пӧртэм интыосаз лушкемен аслэсьтыз адямиоссэ ыстӥз. Озьы со калыкез дасяз, сое эксэе мед пуктозы шуыса. Со сяна, Авессалом ас палаз берыктӥз Ахитофелэз но, кудӥз Давидлэн одӥгез матысь эшез но визь-кенеш сётъясез вал. Авессалом ассэ эксэен ялӥз. Собере со турттӥз кутыны но виыны аслэсьтыз атайзэ, кудӥз со дыре секыт висе вал, дыр (Пс. 40:2—10). Давид Авессаломлэн пумит ӝутскемез сярысь тодӥз но Иерусалимысь кошкиз. Собере Давидлэн но Авессаломлэн ожгарчиоссы вискын ожмаськон потӥз. Давидлэн ожгарчиосыз Авессаломлэсь ожгарчиоссэ вормизы, нош ачиз Авессалом виемын вал.

10. Кызьы Давид ассэ возьыны быгатысал, шуг-секытъёсын пумиськыкуз?

¹⁰ Малпалэ гинэ, мар шӧдӥз Давид, куке таӵе учыре сюриз. Со яратэ вал Авессаломез но оскиз Ахитофеллы. Та солэн матысь адямиосыз вал ке но, соос солэсь сюлэмзэ туж вӧсь каризы. Со сяна, сое виыны но турттӥзы. Давид малпаны быгатысал, мукет эшъёсыз но Авессаломен ӵош солы пумит ӝутскизы шуыса, озьы ик табере нокинлы оскыны уг луы ни но огназ пегӟоно шуыса. Яке со кайгырыса улыны быгатэ вал. Но Давид вань шуг-секытъёссэ чиданы быгатӥз. Мар солы юрттӥз?

11. Кызьы ассэ возиз Давид, секыт югдуре сюрыса?

¹¹ 3. Малпаське. Табере малпалэ, малы тӥледыз дышетыны быгатэ та учыр? Со понна валэктон шедьтыны тырше таӵе юанлы: мар лэсьтӥз Давид, шуг-секытэз пыр потон понна? Со укыр зол сюлмаськыса ӧз улы но дыртыса, малпаськытэк ужпумъёс ӧз куты. Озьы ик со кышканлы ӧз сётскы но шонер ужпум кутыны тыршиз. Давид юрттэт куриз Иеговалэсь но эшъёсызлэсь. Со соку ик кутэм ужпумезъя лэсьтыны тыршиз. Кылдэм югдур сэрен Давидлы туж вӧсь вал ке но, со ӧз малпа, табере нокинлы но оскыны уг луы ини шуыса. Со азьланяз но оскиз Иеговалы но, эшъёсызлы но.

12. Кызьы Иегова Давидлы юрттӥз?

¹² Нош кызьы Иегова Давидлы юрттӥз? Эскерон ортчытыса, тӥ тододы, шуг-секытъёсыз пыр потон понна, Инмар солы кужым сётӥз шуыса (Пс. 3:1—9). Со сяна, Иегова бакель кариз Давидлэсь кутэм ужпумъёссэ. Озьы ик со юрттӥз Давидлэн оскымон эшъёсызлы, кудъёсыз ожмаськизы, эксэйзэс утён понна.

13. Кызьы тӥ Давидлэсь адӟем карыны быгатӥськоды, тӥледыз кин ке но вӧсь кариз ке? (Матфей 18:15—17).

¹³ 4. Уже кутэ. Юалэ асьтэлэсь: «Кызьы мон Давидлэсь адӟем карыны быгатӥсько?» Шуг-секытэз сэрттон-пертчон понна, ӝоггес мар ке но карыны тыршоно. Тӥледыз вӧсь карись адямиен кусыпъёстэс тупатон понна, югдурез лыдэ басьтыса, тӥ быгатӥськоды лэсьтыны Иисуслэн визь-кенешезъя, кудӥз гожтэмын Матфейлэсь ӟеч иворын, 18-тӥ люкетын, яке лэсьтыны возетъя, кудзэ та кылбуръёсысь шедьтыны луэ. (Лыдӟе Матфейлэсь 18:15—17.) Озьы ке но дыртыса но малпаськытэк ужпумъёс эн кутэ. Иеговалэсь юрттэт куре, буйгатскон понна но валан понна, мар карыны луоз. Азьланяз но эшъёстылы оске но соослэсь юрттэмзэс эн палэнтэ (Мад. 17:17). Нош тужгес но валтӥсез, уже  кутэ визь-кенешъёсты, кудъёссэ Иегова аслаз Кылыз пыр сётэ (Мад. 3:5, 6).

14. Кыӵе учыръёсын тӥледыз юнматыны быгато кылъёс, кудъёсыз гожтэмын 2 Тимофейлы 1:12—16 но 4:6—11, 17—22?

¹⁴ Мар кароно, семьяды пумит ке, тӥ Иеговалы мед ужалоды-тыршоды шуыса? Нош мар кароно, тӥ улӥськоды ке шаерын, кытын кивалтӥсьёс Инмарлэсь ужзэ нуыны люкето яке уг лэзё? Соку тӥледыз юнматыны быгатозы кылъёс, кудъёсыз гожтэмын 2 Тимофейлы 1:12—16 но 4:6—11, 17—22 c. Павел соосты гожтӥз, пытсэтын пукыкуз.

15. Мае тӥ курыны быгатӥськоды Иеговалэсь?

¹⁵ 1. Вӧсяське. Та кылбуръёсты лыдӟемлэсь азьло Иеговалы пыр-поч вералэ, мар тӥледыз сюлмаськытэ но мае тӥ шӧдӥськоды. Собере Иеговалэсь куре, со тӥледлы мед юрттоз шуыса Павеллэн кылъёсысьтыз шедьтыны возетъёсты, кудъёсызлы луыса тӥ валаны быгатоды, кызьы асьтэды возёно кылдэм югдурады.

16. Кыӵе югдуре сюриз Павел?

¹⁶ 2. Син азяды пуктэ. Пуктэ асьтэды Павел интые. Со Римын пытсэтын пукиз но жильыямын вал. Сое азьвыл но пытсэтэ пуктылӥзы, но табере со тодӥз, сое казнить карозы шуыса. Солэсь куд-ог вын-агайёс палэнскизы. Со сяна, солэн тазалыкез но ляб вал (2 Тим. 1:15).

17. Кызьы ассэ возьыны быгатэ вал Павел кылдэм югдураз?

¹⁷ Павел малпаськыса улыны быгатэ вал, со мукет ужпум кутысал ке, али пытсэтын ӧй пукысал шуыса. Озьы ик со вожзэ поттыны быгатэ вал, Асиысь агайёс сое кельтӥзы шуыса, но мукет эшъёсызлы оскемысь дугдыны быгатэ вал. Но озьы ӧз луы. Малы Павел оскиз, эшъёсыз сое уз кельтэ, нош Инмар сое бакель кароз шуыса?

18. Кызьы Павел ассэ возиз, шуг-секытэн пумиськыкуз?

¹⁸ 3. Малпаське. Таӵе юанлы валэктон шедьтэ: «Мар лэсьтӥз Павел, шуг-секытэз пыр потон понна?» Павел тодӥз ке но, сое казнить карозы шуыса, со тодаз возиз: тужгес но валтӥсез — Иеговаез данъяны. Азьло сямен ик, со луонлыкъёс утчаз мукетъёсызлы юрттыны. Со Иегова вылэ оскиськиз но вӧсяськемысь ӧз дугды (2 Тим. 1:3). Павел укыр зол ӧз сюлмаськы, куд-ог вын-агайёс сое кельтӥзы шуыса, но тау кариз, оскымон эшъёсызлэн юрттэмзы понна. Со сяна, со азьло сямен ик Инмарлэсь Кылзэ эскериз (2 Тим. 3:16, 17; 4:13). Нош тужгес но валтӥсез, со быдэсак оскиз, Иегова но Иисус сое ярато, соос солэсь ӧз палэнске но оскымон ужам-тыршемез понна одно ик бакель карозы шуыса.

19. Кызьы Иегова Павеллы юрттӥз?

¹⁹ Иегова Павеллы азьло ик вераз, осконэз понна сое уйылозы-уллялозы шуыса (Ап. уж. 21:11—13). Кызьы Инмар аслаз ужась-тыршисезлы юрттӥз? Со Павеллэн вӧсяськемезлы ответ сётӥз, озьы ик сое юнматӥз но (2 Тим. 4:17). Иегова Павелэз оскытӥз: со сое бакель кароз но инмын улыны луонлык сётоз, кудӥз понна со туж тыршиз. Озьы ик со Павеллэн оскымон эшъёсызлэсь мылкыдзэс ӝутӥз солы юрттыны.

20. Кызьы ми адӟем карыны быгатӥськомы Павеллэсь, Римъёслы 8:38, 39 лыдэ басьтыса?

²⁰ 3. Уже кутэ. Юалэ асьтэлэсь: «Кызьы мон Павеллэсь адӟем карыны быгатӥсько?» Павел сямен ик, ми валаськомы, осконмы понна милемыз уйылозы-уллялозы шуыса (Марк 10:29, 30). Шуг-секытъёс дыръя Иеговалы оскымон луон понна, милемлы со вылэ оскиськоно, вӧсяськоно, озьы ик солэсь Кылзэ ялан эскероно. Со сяна, милемлы  ноку вунэтоно ӧвӧл: улонамы тужгес но валтӥсез — инмысь Атаймес данъяны. Ми юн оскыны быгатӥськомы: Иегова милемыз ноку уз кельты но милемыз номыр «Инмарлэн яратонэзлэсь люкыны» уз быгаты. (Лыдӟе Римъёслы 8:38, 39; Евр. 13:5, 6.)

21. Мар юрттӥз Аялы но Хекторлы шуг-секытъёссэс вормыны?

²¹ Кыӵе гинэ югдуре ми медам сюре, милемыз юнматыны быгато Иеговалэн ужась-тыршисьёсызлэн учыръёссы, кудъёсыз гожтэмын Библиын. Кылсярысь, Япониысь Ая нимо сузэрлы, кудӥз пионер луыса ужа-тырше, Ионалэн учырез юрттӥз трос калыко интыосын кышкатэк тодытыны. Нош Хекторлэсь, Индонезиысь егит пияшлэсь, Руфьлэн учырез мылкыдзэ ӝутӥз Иегова сярысь тодыны но солы ужаны-тыршыны, анай-атайёсыз талы пумит вал ке но.

22. Мар карыны луэ, библейской постановкаос но «Соослэсь осконзэс адӟем каре» люкетысь статьяос тӥледлы эшшо но тросгес пайда мед ваёзы шуыса?

²² Библиысь учыръёс тӥлесьтыд оскондэс юнматыны быгато. Соосты шедьтон понна, учке видео, кылзэ библейской постановкаосты, лыдӟе «Соослэсь осконзэс адӟем каре» люкетысь статьяосты d. Та пыр-поч дасям материал юрттоз тӥледлы Библиысь учыръёсты син азяды пуктыны. Но со азьын эн вунэтэ Иеговалы вӧсяськыны, со тӥледлы мед юрттоз шуыса шедьтыны кулэ луись малпанъёсты, кудъёсыз тӥледлы пайда ваёзы. Асьтэды пуктэ адямиос интые, кудъёсыз сярысь вераське кыӵе ке учырын. Малпаське, мар каризы Иеговалэн та оскымон ужась-тыршисьёсыз но кызьы Инмар юрттӥз соослы шуг-секытъёссы пыр потыны. Собере басьтэм тодон-валанъёстэс уже кутэ. Иеговаез тау каре юрттэмез понна. Озьы ик луонлыкъёс утчалэ мукетъёсызлэсь мылкыдзэс ӝутыны но соослы юрттыны.

23. Мар карыны Иегова кылзэ сётэ, Исаиялэн 41:10, 13 гожтэмъя?

²³ Шайтанлэн дуннеяз улыса, ми шуг-секытъёсын пумиськоно луиськомы. Куддыръя ми мар карыны но ум тодӥське (2 Тим. 3:1). Но сюлмаськонъёслы яке кышканъёслы сётсконо ӧвӧл. Иегова адӟе, маин ми пумиськоно луиськомы. Со кылзэ сётэ, милемлы юрттэт кулэ луиз ке, со милемыз кужмо бур киыныз кутыса возёз шуыса. (Лыдӟе Исаиялэсь 41:10, 13.) Ми быдэсак оскиськомы, Иегова милемлы юрттоз шуыса, озьы ик, котькыӵе шуг-секытъёс пыр потон понна, Библия милемлы кужым сётоз шуыса.