1. Малы ми ум паймиське, та дунне милемыз адӟемпотостэм каре шуыса, Матфейлэсь 24:9 лыдэ басьтыса?

 ВАНЬМЫЛЭН милям потэ кинэ ке яратэммы, озьы ик милям потэ, милемыз но мед яратозы шуыса. Иегова адямиосты озьы кылдытӥз. Соин ик, куке милемыз адӟемпотостэм каро, милемлы вӧсь, нош куддыръя кышкыт но луэ. Тани мар вера Европаысь Джорджина b нимо сузэр: «Анае монэ адӟемпотостэм карыны кутскиз, малы ке шуоно мон ужпум кутӥ Иеговалы ужаны-тыршыны. Мон асме нокинлы кулэтэмен шӧдӥ но малпаны кутски, мон умой-а адями, ӧвӧл-а шуыса. Соку мыным 14 арес вал». Нош тани мар вера Данил агай: «Ожгарчиос монэ жугизы, ултӥязы, кышкатӥзы, малы ке шуоно мон Иеговалэн Адӟись-Ивортӥсез. Со туж кышкыт вал». Адӟемпотостэм карон вӧсь каре. Но ми талы ум паймиське, малы ке шуоно Иисус азьло ик вераз, милемыз адӟемпотостэм карозы шуыса. (Лыдӟе Матфейлэсь 24:9.)

2, 3. Малы та дунне Иисуслэсь дышетскисьёссэ адӟемпотостэм каре?

² Та дунне Иисуслэсь дышетскисьёссэ адӟемпотостэм каре. Малы? Малы ке шуоно, Иисус сямен ик, ми та «дуннелэн ӧвӧл» (Иоанн 15:17—19). Ми кивалтӥсьёсты гажаськомы ке но, соос пӧлысь нокин пала ум кариськиське, шаерлэсь флагзэ ум данъяське но гимнзэ ум кырӟаське. Ми йыбыртъяськомы Иеговалы гинэ. Ми оскиськомы, Инмар гинэ адямиосын кивалтыны быгатэ шуыса. Нош Шайтан но солэн «кидысэз-выжыез» лэсьто ваньзэ, адямиос мукет сямен мед малпалозы шуыса (Ул.-выл. 3:1—5, 15). Ми тодытӥськомы: Инмарлэн Эксэйлыкез гинэ вуоноезлы оскон сётыны быгатэ но ӝоген та Эксэйлык  быдтоз ваньзэс, кинъёс солы пумит ӝутско (Дан. 2:44; Усьт. 19:19—21). Зӥбыт-востэм адямиос понна со туж умой ивор, нош сьӧлыклэсь кышкасьтэмъёс понна — туж урод (Пс. 36:10, 11).

³ Со сяна, милемыз адӟемпотостэм каро, малы ке шуоно ми улӥськомы Инмарлэн вылӥ эсэпъёсызъя, кудъёсыз та дуннелэн эсэпъёсызлэсь туж пӧртэм луо. Кылсярысь, туннэ тросэз азон-калгон шоры умоен учко. Нош сыӵе ужъёс понна Иегова Содомез но Гоморраез быдтӥз! (Иуда 7). Малпалэ гинэ: азон-калгон шоры Инмар сямен учкеммы понна, милемыз серем каро но верало, ми укыр чурытэсь курон-косонъёсъя улӥськомы шуыса (1 Пётр 4:3, 4).

4. Мар милемлы кароно, адямиос милемыз адӟемпотостэм каро ке?

⁴ Мар милемлы кароно, Инмарлы оскымон кылён понна, адямиос милемыз адӟемпотостэм каро ке но ултӥяло ке? Со понна юн осконо, Иегова милемлы юрттоз шуыса. Оскон щит выллем. Со Шайтанлэсь «ӟырдатыса лэзьям вань ньӧлъёссэ кысыны» быгатэ (Еф. 6:16). Но оскон гинэ тырмыт ӧвӧл. Милемлы яратон но кулэ на. Малы? Малы ке шуоно яратон «уг керӟегъяськы» но «ваньзэ чида» (1 Кор. 13:4—7, 13). Ойдолэ эскеромы, кызьы Иеговаез, вын-агайёсмес но сузэр-апайёсмес, озьы ик тушмонъёсмес яратон юрттэ милемлы Инмарлы оскымон кыльыны, адямиос милемыз адӟемпотостэм каро ке но.

5. Кызьы Атайзэ яратон Иисусэз юнматӥз?

⁵ Кулон азяз ӝытазе Иисус оскымон дышетскисьёсызлы шуиз: «Мон Атайме яратӥсько... [соин ик], кызьы куриз-косӥз Монэ Атае, озьы ик лэсьтӥсько» (Иоанн 14:31). Иеговаез яратон Иисусэз вуоно шуг-секытъёс азьын юнматӥз. Иеговаез яратон милемыз но юнматыны быгатэ.

6. Кызьы Иеговалэн калыкез учке та дуннелэн сое адӟемпотостэм каремез шоры, Римъёслы 5:3—5 лыдэ басьтоно ке?

⁶ Инмарез яратон котьку но юрттэ вал Иеговалэн ужась-тыршисьёсызлы уйылон-уллянъёсты чиданы. Кылсярысь, иудейёслэн вылӥ судзы апостолъёсты косӥз тодытэмысь дугдыны. Но Иеговаез яратон соослэсь мылкыдзэс ӝутӥз, «адямиослы сярысь, Инмарлы золгес тэрытскыны» (Ап. уж. 5:29; 1 Иоанн 5:3). Сыӵе юн яратон туннэ но вын-агайёсмес юнматэ. Соос Инмарлы оскымон кылё сыӵе шаеръёсын но, кудъёсаз кивалтӥсьёс асьсэды туж лек возё. Куке та дунне милемыз адӟемпотостэм каре, ӝожомыса улэм интые, ми шумпотӥськомы. (Ап. уж. 5:41; лыдӟе Римъёслы 5:3—5.)

7. Кызьы асьмеды возёно, куке семьямы пумит луэ, ми Иеговалы мед ужаломы-тыршомы шуыса?

⁷ Христиан муртлы тужгес но секыт, дыр, чиданы сое, куке солы пумит семьяез ӝутске. Куке ми зэмлыкен тодматскыны кутскиськомы, семьямы пӧлысь кин ке но малпаны быгатэ, милемыз пӧяло шуыса. Нош кин ке но малпаны быгатэ, ми визьмес ыштӥмы шуыса. (Ӵошатэ Марклэсь 3:21.) Соос асьсэды лек но возьыны быгато. Но милемыз та паймытыны кулэ ӧвӧл, малы ке шуоно Иисус вераз: «Адямилэн тушмонъёсыз — семья пушказ» (Матф. 10:36). Зэм но, кызьы гинэ ӵыжы-выжыосмы милемын асьсэды медам возе, соос шоры ми ум учке тушмонъёсмы шоры кадь. Макем золгес ми Иеговаез яратӥськомы, сокем золгес ми адямиосты но яратӥськомы (Матф. 22:37—39). Но кинлы ке ярамон луон понна гинэ, ми Библиысь возетъёсты но катъёсты ум тӥялэ.

8, 9. Мар юрттӥз Джорджиналы Инмарлы оскымон кыльыны, туж зол пумитъяськонъёс шоры учкытэк?

⁸ Джорджина, кудӥз сярысь вераськиз ини, Инмарлы оскымон кыльыны быгатӥз, анаез солы туж пумитъяськиз ке но. Джорджина вера: «Иеговалэн Адӟись-Ивортӥсьёсыныз  Библиез эскерыны ми кутскимы анаеным ӵош. Ӝыны ар ортчыса, мынам мылкыды ӝутскиз кенешлэн пумиськонъёсаз ветлыны. Нош анаелэн мылкыдыз чылкак воштӥськиз. Мон тодӥ, со зэмос йыбырттонлэсь палэнскемъёсын кусып возьыны кутскиз шуыса. Со соос кадь малпаськыны кутскиз. Со монэ ултӥяз, йырситӥм кысказ, кекатӥз, Библия вылэ пыкиськыса гожтэм публикациосме куяз. Куке мыным 15 арес тырмиз, мон пылатӥськи. Анае турттӥз люкетыны мыным Иеговалы ужаны-тыршыны. Соин ик со интыяз монэ интернатэ, кудаз секыт нылпиос улӥзы. Со интернатысь куд-ог нылъёс наркотикъёсын выро вал но катэз тӥяло вал. Туж секыт, куке тыныд пумит ӝутске адями, кудӥз тонэ яратыны но тон сярысь сюлмаськыны кулэ».

⁹ Кызьы Джорджина ваньзэ тае чиданы быгатӥз? Со вера: «Ӵапак со нуналэ, куке анае мыным пумит ӝутскиз, мон быдэс Библиез лыдӟыса быдтӥ. Мон быдэсак оски, зэмлыкез шедьтӥ шуыса, но шӧдӥ, Иегова монэн ӵош шуыса. Мон ӵем вӧсяськи Инмарлы. Со монэ кылӥз. Интернатын улыкум, одӥг сузэр ӵем дыръя монэ ас дораз куное ӧтьылӥз. Ми Библиез ӵош эскеримы. Вань со дыр ӵоже мыным туж юрттӥзы вын-агайёс но сузэр-апайёс. Мон понна соос зэмос семья луизы. Мон валай: кинъёс гинэ милемлы пумит медам ӝутске, Иегова соослэсь кужмогес».

10. Малы ми юн оскыны быгатӥськомы?

¹⁰ Кызьы гожтӥз апостол Павел, номыр но уг быгаты «асьмемыз Инмарлэн яратонэзлэсь люкыны», кудӥз улэ Иисус Христос бордын (Рим. 8:38, 39). Куддыръя милемлы секыт луэ ке но, Иегова милемын ӵош, милемыз буйгатон но юнматон понна. Кызьы возьматэ Джорджиналэн учырез, Иегова юрттэ милемлы вын-агайёсмы но сузэр-апайёсмы пыр.

11. Кызьы яратон, кудӥз сярысь вераське Иоаннлэн 15:12, 13, Иисуслэн дышетскисьёсызлы юрттӥз? Вералэ пример.

¹¹ Кулон азяз ӝытазе Иисус дышетскисьёсызлы тодазы вайытӥз, макем кулэ ог-огзэс яратыны. (Лыдӟе Иоаннлэсь 15:12, 13.) Со тодӥз: астэ жалятэк яратон юрттоз огкылысь улыны но Шайтанлэн дуннеезлэсь адӟемпотостэм каремзэ чиданы. Эскеромы Фессалоника карысь христианъёслэсь учырзэс. Та карын кенеш кылдэм бере ик христианъёсты уйылыны-улляны кутскизы. Озьы ке но вын-агайёс но сузэр-апайёс адӟем карымон осконзэс, яратонзэс но юн луэмзэс возьматӥзы (1 Фес. 1:3, 6, 7). Павел куриз соосты азьланяз но ог-огзэс «эшшо но золгес яратыса  улыны» (1 Фес. 4:9, 10). Яратон соослэсь мылкыдзэс ӝутыны кулэ вал юнматыны соосты, кинъёслэн мылкыдзы усиз, но лябъёслы юрттыны (1 Фес. 5:14). Фессалоникаысь христиан муртъёс Павеллэсь визь-кенешсэ уже кутӥзы. Кытысь ми сое тодӥськомы? Кыкетӥ гожтэтаз, кудзэ со ог ар ортчыса гожтӥз, Павел соослы вераз: «Куспады ог-огдэс яратонды... будэ» (2 Фес. 1:3—5). Та яратон юрттӥз соослы шуг-секытъёсты но уйылон-уллянъёсты чиданы.

12. Кызьы одӥг шаерысь вын-агайёс но сузэр-апайёс ожмаськон дыръя ог-огзылы яратонзэс возьматӥзы?

¹² Тани Даниллэн учырез, кудӥз сярысь вераськиз ини. Солэн караз ожмаськон кутскиз ке но, со кышноеныз кенешлэн пумиськонъёсаз ветлэмысь ӧз дугды. Котькуд тупась учыре соос тыршизы тодытыны, озьы ик вын-агайёслы но сузэр-апайёслы сиён-юонэн юрттӥськыны. Одӥг пол соос доры лыктӥзы ожгарчиос киязы ожтӥрлыкен. Данил вера: «Соос косӥзы, мон осконэлэсь мед куштӥськом шуыса. Мон пумит кариськи. Соку соос монэ жугизы но веразы, монэ интыям ик ыбозы шуыса. Но соос мынэсьтым ӧжыт палэнэгес ыбизы. Кошкыкузы соос милемыз кышкатӥзы, соос берытскозы но кышноме эриктэмалозы шуыса». Куке вын-анайёс но сузэр-апайёс тодӥзы, мар милемын луиз, соос соку ик поездэн милемыз мукет каре келязы. Ноку но уг вунэты, макем бадӟым яратонзэс возьматӥзы милемлы дуно вын-агайёсмы. Нош выль интыын вын-агайёс сётӥзы милемлы сиён-юон, озьы ик юрттӥзы уж но улон инты шедьтыны. Солы луыса берлогес ми быгатӥмы ас дорамы ӧтьыны мукет Адӟись-Ивортӥсьёсты, кудъёсыз ожмаськон сэрен дорысьтызы кошконо луизы». Таӵе учыръёс возьмато: адямиослэн милемыз адӟемпотостэм каремзы шоры учкытэк, христиан яратон юрттэ Инмарлы оскымон кыльыны.

13. Кызьы святой дух юрттэ милемлы Иеговалы оскымон кыльыны, адямиос милемыз адӟемпотостэм каро ке но?

¹³ Иисус аслаз дышетскисьёсызлы вераз: «Тушмонъёстэс яратэлэ» (Матф. 5:44, 45). Капчи-а со? Ӧвӧл. Но Инмарлэн святой духез милемлы юрттыны быгатэ. Инмарлэн духезлэн емышез пӧлы пыре яратон, чидан, лякытлык, зӥбыт-востэм луон но астэ кияд кутыны быгатон (Гал. 5:22, 23). Таӵе сямъёс юртто милемлы Инмарлы оскымон кыльыны, тушмонъёсмы милемыз адӟемпотостэм каро ке но. Тросэз соос пӧлысь, кинъёс азьвыл милемлы пумитъяськизы, вын-агайёсмы но сузэр-апайёсмы луизы. Соин ик тӥледлы секыт ке яратыны соосты, кинъёс  Иеговалы оскемды понна тӥледыз адӟемпотостэм каро, святой духез курыса вӧсяське (Лука 11:13). Юн оске: котькыӵе югдурын самой умоез, мае ми карыны быгатӥськомы,— со Инмарлэсь кылзӥськон (Мад. 3:5—7).

14, 15. Кызьы визь-кенешъёс, кудъёсыз гожтэмын Римъёслы 12:17—21, Ясминлы юрттӥзы картэзлы яратонзэ возьматыны?

¹⁴ Нош тани Ясмин сузэрлэн учырез. Куке со Иеговалэн Адӟись-Ивортӥсез луиз, картэз малпаз, кышнозэ пӧяло шуыса. Соин ик сое дугдытыны турттӥз. Со Ясминэз ултӥяз, озьы ик ӵыжы-выжыоссы пыр, священник пыр но туно-пеллё пыр тыршиз сое кышкатыны но янгыше уськытыны, со семьязэс люке шуыса. Нош одӥг пол картэз кенешлэн пумиськоназ лыктӥз но, урод кылъёс вераса, вын-агайёс шоры кесяськыны кутскиз. Картэз ассэ тазьы возиз бере, Ясмин ӵем бӧрдэ вал.

¹⁵ Вын-агайёс но сузэр-апайёс Ясминэз буйгатылӥзы но солы юрттӥзы. Нош тӧроос солэсь мылкыдзэ ӝутӥзы уже кутыны визь-кенешез, кудӥз гожтэмын Римъёслы 12:17—21 (лыдӟе). Ясмин вера: «Со секыт вал. Но мон Иеговалэсь юрттэт кури но лэсьтӥ ваньзэ, мае быгатӥ, та визь-кенешъёсты уже кутон понна. Кылсярысь, куке картэ кухняын юри жагтӥське вал, мон тырши ваньзэ чылкыт карыны. Монэ ултӥякуз, мон тырши асме киям кутыны но лякытэн вераськыны. Нош висьыкуз мон солы юрттӥськисько вал».

16, 17. Малы дышетэ тӥледыз Ясминлэн учырез?

¹⁶ Ясмин картэзлы яратэмзэ возьматӥз но, со туж умой емышъёс вайиз. Ясмин вера: «Картэ мыным тросгес оскыны кутскиз, малы ке шуоно тодӥз, мон котьку но шонерзэ верасько шуыса. Со гажаса монэ кылзыны кутскиз, куке ми вераськимы Инмарлы оскон сярысь. Озьы ик со валаз, семьяын тупаса улон понна, солы аслыз но маке кароно шуыса. Мон туж шумпотӥсько, куке адӟисько, макем воштӥськизы кусыпъёсмы. Табере ми семьяямы тупаса но шумпотыса улӥськомы. Тае адӟыса, картэ ачиз мынэсьтым мылкыдме ӝутэ кенешлэн пумиськонъёсаз ветлыны. Мон оскисько, мынам картэ но монэн ӵош Иеговалы ужаны-тыршыны кутскоз шуыса».

¹⁷ Ясминлэн учырез возьматэ, яратон «чылкыт сюлмын оскиське, ваньзэ чида» шуыса (1 Кор. 13:4, 7). Адӟемпотостэм карон кусыпъёсты сӧре но туж вӧсь каре. Нош яратон трослы кужмогес. Со адӟемпотостэм каронэз сӥятэ. Со сяна, со Иеговалэсь сюлэмзэ шумпоттэ. Тушмонъёсмы милемыз адӟемпотостэм каро ке но, ми быгатӥськомы шумпотыса улыны. Малы?

18. Малы ми шумпотыса улыны быгатӥськомы, милемыз адӟемпотостэм каро ке но?

¹⁸ Иисус вераз: «Шудоесь тӥ... тӥледыз Адями Пи понна адямиос адӟонтэм каризы ке» (Лука 6:22). Зэм но, милям уг поты, милемыз адӟемпотостэм мед карозы шуыса. Озьы ик уйылон-уллянъёс но милемлы шумпотон уг ваё. Соку малы ми таӵе югдуръёсы но шумпотыса улыны быгатӥськомы? Нырысетӥез, Инмарлы ярамон луо соос, кинъёс шуг-секытъёс дыръя солы оскымон кылё (1 Пётр 4:13, 14). Кыкетӥез, милям осконмы эскериське но юнгес луэ (1 Пётр 1:7). Куинетӥез, азьланяз ми басьтомы номырин ӵошатонтэм кузьым — пырак улон (Рим. 2:6, 7).

19. Малы апостолъёс шумпотыса улӥзы, соосты жугемзы бере но?

¹⁹ Иисуслэн улӟемез бере ӝоген апостолъёс валазы, солэн кылъёсыз зэм луо шуыса. Апостолъёсты жугизы но тодытыса ветлыны ӧз лэзе ке но, соослэн сюлмазы шумпотон вал. Малы? Малы ке шуоно Иисуслэн нимыз понна соос «сантэманэз ас вылазы чидано луизы» (Ап. уж. 5:40—42). Тушмонъёссылэсь кышкан сярысь, Иисусэз яратонзы апостолъёслэн юнгес вал. Соос возьматӥзы сое, куке «дугдылытэк дышетылӥзы, Иисус Христос сярысь Ӟеч Ивор тодытыса ветлӥзы». Озьы ик туннэ но тросэз вын-агайёс Иеговалы оскымон ужало-тыршо, шуг-секытъёс шоры учкытэк. Соос тодо, Инмар уз вунэты соослэсь ужзэс но яратонзэс, кудзэ соос солэн нимыз понна возьматӥзы (Евр. 6:10).

20. Мае ми эскеромы вуоно статьяын?

²⁰ Шайтан та дуннеен кивалтэ бере, адямиос милемыз адӟемпотостэм карозы (Иоанн 15:19). Нош милемлы кышкано ӧвӧл. Вуоно статьяын эскеромы, Иегова аслэсьтыз оскымон ужась-тыршисьёссэ юнматоз но утёз шуыса (2 Фес. 3:3). Ойдолэ азьланяз но яратомы Иеговаез, вын-агайёсмес но сузэр-апайёсмес, озьы ик тушмонъёсмес но. Соку ми огкылысь уломы, осконмес юнматомы, Иеговаез данъяломы но возьматомы, яратон адӟемпотостэм каронлэсь трослы кужмогес шуыса.