1. Кызьы тӥ улӥды Библиез дышетэмдылэсь азьло?

 КЫЗЬЫ тӥ улӥды Библиез дышетэмдылэсь азьло? Тросэзлэн та сярысь тодазы вайылэмзы но уг поты. Ми малпаськимы но улӥмы, вылды, озьы, кызьы та дунне вера. Тӥ но озьы ик улӥды ке, соку тӥляд «оскиськонды ӧй вал, дунне вылын Инмарлы осконэз тодытэк улӥды» (Еф. 2:12). Но Библиез дышетыса, тӥляд улонды воштӥськиз.

2. Мае тӥ тодӥды, Библиез дышетыса?

² Библиез дышетыса, тӥ тодӥды, инмысь Атайды вань шуыса, кудӥз тӥледыз туж яратэ. Тӥляд потӥз соин эшъяськемды но солэн семьяяз пыремды. Тӥледлы бадӟым воштӥськонъёс лэсьтоно луиз. Тӥ кутскиды малпаськыны но улыны озьы, кызьы Иегова вера (Еф. 5:3—5).

3. Колоссыослы 3:9, 10 верамъя, мае лэсьтыны куре милемыз Иегова но мае ми эскеромы та статьяын?

³ Иегова милям Кылдытӥсьмы но Атаймы бере, солэн правоез вань вераны, кызьы ми асьмеды возьыны кулэ. Со куре, ми пылатӥськеммылэсь азьло «вужмем адями луонмылэсь дӥськутсэ» мед кылёмы шуыса b. (Лыдӟе Колоссыослы 3:9, 10.) Соослы, кинъёс пылатӥськыны малпало, та статья юрттоз куинь юанъёслы валэктонъёс шедьтыны: 1) мар со сыӵе «вужмем адямилэн» дӥськутэз? 2) Малы Иегова куре сое кыльыны? 3) Кызьы ми сое лэсьтыны быгатӥськомы?  Нош соослы, кинъёс пылатӥськизы ини, та статья юрттоз урод ужъёссы но сямъёссы доры берытскытэк улыны.

4. Вералэ, кыӵе со «вужмем адями».

⁴ «Вужмем адямилэн» дӥськутэз — со сьӧлыко адямилэн малпанъёсыз но ужъёсыз. Сыӵе адями ӝог пурӟе, мукетъёссэ тау уг кары, вылтӥяськыса улэ но ассэ гинэ яратэ. Солы кельше порнография, лек но азон-калгонэн герӟаськем фильмъёс. Но сыӵе адямилэн умой сямъёсыз но вань. Солы урод кылъёсыз но ужъёсыз понна возьыт но луэ. Озьы ке но воштӥськыны мылкыдыз солэн ӧвӧл (Гал. 5:19—21; 2 Тим. 3:2—5).

5. Мае возьматэ «вужмем адями луондылэсь дӥськутсэ кыле» шуыса веран? (Апостолъёслэн ужъёссы 3:19).

⁵ Ми ваньмы тырбыдэстэмесь бере, милям шонертэм малпанъёсмы но мылпотонъёсмы луыны быгато. Куддыръя ми мае ке шонертэмзэ вераломы яке лэсьтомы (Иер. 17:9; Иак. 3:2). Но «вужмем адямилэсь» дӥськутсэ кыльыса, адями шонертэм малпанъёсызлы но шӧдонъёсызлы соин кузёяськыны уг сёты ини. Со мукет адями луэ (Ис. 55:7; лыдӟе Апостолъёслэсь ужъёссэс 3:19).

6. Малы Иегова мылкыдмес ӝутэ урод малпанъёслэсь но сямъёслэсь куштӥськыны?

⁶ Иегова мылкыдмес ӝутэ урод малпанъёслэсь но сямъёслэсь куштӥськыны. Малы? Малы ке шуоно со милемыз туж яратэ. Солэн потэ, ми шумпотыса мед уломы шуыса (Ис. 48:17, 18). Со тодэ: озьы ӧм лэсьтэ ке, ми асьмелы но, мукетъёсызлы но вӧсь каромы. Нош куке адямиослы вӧсь, Иеговалы но вӧсь.

7. Кыӵе быръён милемлы лэсьтоно, Римъёслы 12:1, 2 верамъя?

⁷ Оло нош, Библиез дышетыны кутскыкумы, эшъёсмы но ӵыжы-выжыосмы милемын соглаш ӧй вал но милемыз серем каризы (1 Пётр 4:3, 4). Куд-огъёсыз веразы, дыр: «Тон ачид аслыд кузё! Тон ачид бырйыны быгатӥськод, кызьы улоно». Нош зэм ик-а соос, кинъёс Иеговалэсь уг кылзӥсько, нокинлэсь кылзӥськытэк улыны быгато? Зэмзэ вераса, со озьы ӧвӧл, малы ке  шуоно соос Шайтанлэн ки улаз возисько но та дуннелэн верамезъя уло. (Лыдӟе Римъёслы 12:1, 2.) Озьыен, ваньмылы бырйыны кулэ: нуллоно-а «вужмем адямилэсь» дӥськутсэ, кудӥз Шайтан дуннелэн верамезъя вуремын, яке кылзӥськоно-а Иеговалэсь, кудӥз милемлы выль адями луыны юрттоз (Ис. 64:8).

8. Кызьы Иегова юрттэ милемлы «вужмем адямилэсь» дӥськутсэ кыльыны?

⁸ Иегова вала, бадӟым воштӥськонъёс син куспын лэсьтыны ми ум быгатэ шуыса (Пс. 102:13, 14). Но со юрттэ милемлы визьмогес но кужмогес луыны аслаз Кылыз, святой духез но организациез пыр. Тӥ но тае ас вылады шӧдӥды, луоз. Ойдолэ эскеромы, мар юрттоз «вужмем адямилэсь» дӥськутсэ кыльыны, урод малпанъёсмы но ужъёсмы доры берытскытэк улыны но пылатӥськонлы дасяськыны.

9. Кызьы тӥледлы Инмарлэн Кылыз юрттыны быгатэ?

⁹ Библиез кутыса асьтэды эскере. Инмарлэн Кылыз синучкон кадь: со валаны юрттэ, кызьы ми малпаськиськомы, кызьы асьмеды возиськомы но мае тупатыны кулэ (Иак. 1:22—25). Тӥледлы визь-кенеш сётыны быгатэ адями, кудӥз тӥледын Библиез дышетэ, яке кенешысь мукет христиан мурт. Кылсярысь, Библиысь кыӵе ке кылбурез кутыса, соос тӥледлы возьматыны быгато, мар тӥляд пӧрме ини, нош мае тӥледлы тупатоно на. Тӥ кыӵе ке сямлэсь куштӥськыны тыршиськоды ке, соос валэктозы тӥледлы, кызьы публикациосысьтымы пайдаё визь-кенеш шедьтыны луоз. Со сяна, Иегова но котьку юрттыны дась. Со котькинлэсь умой тодэ, мар тӥледлы кулэ но мар тӥляд сюлмады (Мад. 14:10; 15:11). Соин ик одно ик тырше котькуд нунал вӧсяськыны но солэсь Кылзэ эскерыны.

10. Малы дышетэ тӥледыз Эли нимо пиосмуртлэн учырез?

¹⁰ Эн вунэтэ, Иеговалэн курон-косонъёсыз самой умоесь шуыса. Иеговалэн вань курон-косонъёсыз милемлы пайда ваё. Соос, кинъёс солэсь кылзӥсько, асьсэды гажало, валало, малы уло, но шудоесь луо (Пс. 18:8—12). Нош соос, кинъёс Иеговалэсь уг кылзӥсько, асьсэлы ик урод каро. Эли нимо пиосмуртлэн учырез возьматэ, кыӵе бервылъёсы вуттэ Инмарлэсь кылзӥськытэк улон. Пичи дырысеныз ик анаез но атаез дышетӥзы сое Иеговаез яратыны. Но будэмъяз со урод адямиосын эшъяськиз. Эли наркотикъёсын выриз, азыса-калгыса но лушкаськыса улӥз. Солэн верамезъя, со пурӟись но лек адями луиз. Со вера: «Атае но анае монэ умоезлы гинэ дышетӥзы, нош мон чылкак мукет сямен улӥ». Но Эли ӧз вунэты, малы сое пичи дыръяз дышетӥзы. Дыр ортчыса, со нош ик Библиез дышетыны кутскиз, бадӟым воштӥськонъёс лэсьтӥз, урод сямъёсызлэсь куштӥськиз но 2000-тӥ арын пылатӥськиз. Иеговалэн юрттэменыз, со быдэсак воштӥськиз. Эли вера: «Табере мон каньыл сюлмын но чылкыт возьытлыкен улӥсько» c. Та учыр возьматэ, соос, кинъёс Иеговалы ужамысь-тыршемысь дугдо, асьсэлы ик урод каро шуыса. Но Иегова соослы но юрттыны дась.

11. Мае адӟемпотостэм каре Иегова?

¹¹ Дышетске адӟемпотостэм карыны сое, мае Иегова адӟемпотостэм каре (Пс. 96:10). Библиын верамъя, Иегова адӟемпотостэм каре сое, кинлэн «синъёсыз вылтӥяськисесь,  со ӧрекчаськись кыло, киосыз янгыштэм вирез кисьто» (Мад. 6:16, 17). Иегова адӟемпотостэм каре «вир кисьтӥсьёсты, кескич муртъёсты» (Пс. 5:7). Сыӵе адямиос Инмарлы туж юрӟым пото. Ной улон нуналъёсы со вань лек адямиосты быдтӥз, малы ке шуоно «музъемвыл соослэн сьӧсь ужъёсынызы пачылмиз» (Ул-выл. 6:13). Малахия пророк но вераз, мае Иегова адӟемпотостэм каре. Инмарлэн вожез потэ, куке адями янгыш луисьтэм кузпалэныз люкиське. Сыӵе муртлэн йыбыртъямез Иеговалы юрӟым потэ. Сое со кыл кутытоз (Мал. 2:13—16; Евр. 13:4).

12. Мае возьматэ «урод ужез адӟонтэм каре» шуыса веран?

¹² Иегова куре милемыз: «Урод ужез адӟонтэм каре» (Рим. 12:9). Мае возьматэ «адӟонтэм» кыл? Адями мае ке адӟонтэм каре ке, со сярысь солэн малпамез но уг поты. Кылсярысь, нокинлэн йыраз но уз лыкты сисьмем емышез сиыны. Со сярысь малпаса гинэ но, юрӟым луэ ини! Ӵапак сыӵе ик шӧдонъёсмы милям луыны кулэ, куке малпаськомы ужъёс сярысь, кудъёсыз Иеговалы юрӟым пото.

13. Малы милемлы урод малпанъёсты палэнтыны кулэ?

¹³ Палэнтэ урод малпанъёсты. Кыӵе ке ужез лэсьтэмлэсь азьло, милям со сярысь малпанмы кылдэ. Соин ик Иисус дышетӥз милемыз палэнтыны урод малпанъёсты, кудъёсыз секыт сьӧлыке вуттыны быгатысалзы (Матф. 5:21, 22, 28, 29). Ваньмылэн милям Иеговаез шумпоттэммы потэ. Соин ик милемлы чик ӝегатскытэк урод малпанъёсты палэнтоно.

14. Мае возьмато верам кылъёсмы но кыӵе юанъёс вылын малпаськыны кулэ?

¹⁴ Чаклалэ, кызьы тӥ вераськиськоды. Иисус вераз: «Ымтӥ потӥсез — сюлэмысь потэ» (Матф. 15:18). Зэм но, милям кылъёсмы возьмато, кыӵеесь ми луиськомы. Соин ик малпаське таӵе юанъёс вылын: «Кыӵе ке мугъёсын сэрен мынам шонерзэ вераме уг поты ке, малпасько-а мон, пӧяськыны яра шуыса? Флиртовать карисько-а мон кузпалы луисьтэм адямиен? Быгатӥсько-а мон тупась учыре кырсь кыл вераны яке кинэ ке мыскылляны? Пурӟисько-а мон, куке кин ке монэ йыркуръяськытэ?» Умой луысал та юанъёс вылын малпаськыны. Умойтэм кылъёсты ӵошатыны луэ бирдыосын.  Сыӵе кылъёсын вераськыса, ми ас выламы «вужмем адямилэсь» дӥськутсэ бирдыяськомы кадь. Сыӵе дӥськутэз кылён понна, лек но кырсь кылъёсын вераськоно ӧвӧл.

15. Мае возьматэ «вужмем вашкала адями луонмы... кортӵогаськыса кулӥз-быриз» шуыса веран?

¹⁵ Дась луэ кулэ луись воштӥськонъёс лэсьтыны. Апостол Павел возьматӥз, воштӥськыны туж кулэ шуыса. Со вераз: «Вужмем вашкала адями луонмы... кортӵогаськыса кулӥз-быриз» (Рим. 6:6). Та кылъёс тодэ вайыто Иисус Христосэз, кудӥз, Инмарлэсь эриксэ быдэстон понна, юбо борды кортӵогаса казнить каремын вал. Милемлы но дась луоно куштӥськыны ваньмызлэсь, мае Иегова адӟемпотостэм каре. Соку ми быгатомы чылкыт возьытлыкен улыны но оскыны, пырак дауръёс ӵоже музъем вылын уломы шуыса (Иоанн 17:3; 1 Пётр 3:21). Эн вунэтэ: Иеговалэн курон-косонъёсыз уг вошъясько. Милемыз шумпоттон понна, Инмар соосты уз вошты. Милемлы асьмелы воштӥськыны но соослэсь кылзӥськыны кулэ (Ис. 1:16—18; 55:9).

16. Малы азьланяз но сьӧлыко мылпотонъёсын нюръяськыны кулэ?

¹⁶ Азьланяз но нюръяське сьӧлыко мылпотонъёсыныды. Таӵе мылпотонъёсын нюръяськыны пылатӥськем бере но кулэ. Тае ас вылаз шӧдӥз Маурисиу нимо пиосмурт. Егит дыръяз со гомосексуалист вал. Собере со Иеговалэн Адӟись-Ивортӥсьёсыныз Библиез дышетыны кутскиз, воштӥськонъёс лэсьтӥз но 2002-тӥ арын пылатӥськиз. Та агай трос аръёс ӵоже ини Иеговалы ужа-тырше ке но, куддыръя со сьӧлыко мылпотонъёсыныз нюръяськоно луэ. Но со киоссэ уг лэзьы. Та агай вера: «Монэ юнматэ таӵе малпан: куке мон сьӧлыко мылпотонъёсыным нюръяськисько, мон Иеговаез шумпоттӥсько» d.

17. Малы дышетэ тӥледыз Набиха кышномуртлэн учырез?

¹⁷ Иеговалэсь юрттэтсэ куре но святой духезлы оскиське (Гал. 5:22; Флп. 4:6). «Вужмем адямилэсь» дӥськутсэ мед кылёмы но выльысь сое медам дӥсялэ ини шуыса, туж тыршыны кулэ. Тае адӟыны луэ Набиха нимо кышномуртлэн учырысьтыз. 6 арес дыръяз соос дорысь атайзы кошкиз. Набиха тодаз вае: «Соку мыным туж  секыт вал. Мынам сюлмы туж вӧсь луиз». Соин ик Набиха ваньмызлы пумитъяськыны кутскиз но туж лек луиз. Со наркотикъёсын вузкарыны кутскиз. Кӧня ке арлы сое пытсэтэ пуктӥзы. Арняяз одӥг пол пытсэтэ Иеговалэн Адӟись-Ивортӥсьёсыз ветло вал. Набиха Библиез дышетыны соглаш кариськиз. Соку солэн улонэз воштӥськыны кутскиз. Набиха вера: «Куд-ог урод сямъёсылэсь куштӥськыны мыным капчи вал, но тамак кысконме куштыны мыным туж секыт вал...» Набихалы арлэсь но тросгес кулэ луиз, та урод сямызлэсь куштӥськон понна. Мар солы юрттӥз? Со вера: «Тамак кысконлэсь куштӥськыны тужгес но мыным юрттӥз Иеговалы вӧсяськон. Мон оскисько: Иеговалы ярамон луон понна, мон воштӥськыны быгатӥ бере, котькудӥз быгатоз!» e

18. Мар карыны быгатӥзы Инмарлэн трос ужась-тыршисьёсыз? (1 Коринфъёслы 6:9—11).

¹⁸ Ойдолэ малпаськомы нырысетӥ даурысь христианъёс сярысь. Кыӵеесь вал соос пӧлысь куд-огъёсыз пылатӥськемзылэсь азьло? Кин ке но азыса-калгыса улӥз, кин ке но гомосексуалист вал, кин ке но лушкаськиз. Но святой духлэн юрттэменыз соос быдэсак воштӥськыны быгатӥзы. Иегова лэзиз соослы Иисус Христосэн ӵош кивалтыны. (Лыдӟе 1 Коринфъёслы 6:9—11.) Туннэ но трос миллион адямиос быдэсак воштӥськыны быгатӥзы f. Соос туж урод сямъёссылэсь куштӥськизы. Та учыръёс возьмато: тӥ но быгатӥськоды воштӥськыны но пылатӥськон понна куронъёслы тупаны.

19. Мар сярысь вераськоз вуонояз статьяын?

¹⁹ Пылатӥськон понна «вужмем адямилэсь» дӥськутсэ кыльыны гинэ тырмыт ӧвӧл. Со сяна, «выль адями» луыны кулэ. Вуонояз статьяын вераськоз, кызьы сое лэсьтоно но кызьы милемлы мукетъёсыз юрттыны быгато.