1, 2. Мар кароно пылатӥськон азьын?

 БЕРЛО вить аръёс ӵоже миллионлэсь но тросгес адямиос пылатӥськизы но Иеговалэн Адӟись-Ивортӥсьёсыз луизы. Тросэз, нырысетӥ даурын улӥсь Тимофей сямен, пичи дырысенызы ик зэмлыкен тодмо вал (2 Тим. 3:14, 15). Мукетъёсыз Иеговаен тодматскизы бадӟым будэм беразы, нош куд-огъёсыз — арлыдо дыръязы. Кылсярысь, одӥг кышномурт пылатӥськиз, куке солы 97 арес вал ини!

² Тӥ Библиез дышетӥськоды ке яке Адӟись-Ивортӥсьёслэн семьяязы будӥськоды ке, малпаськиды-а ини тӥ пылатӥськон сярысь? Со туж умой ужпум! Но нырысь улондэс Иеговалы сӥзёно. Та статья валэктоз, мар со сыӵе сӥзиськон. Озьы ик со валаны юрттоз, малы куд-огъёсыз сӥзиськыны но пылатӥськыны уг дӥсьто но кызьы вормоно сыӵе кышканэз.

МАР СО СЫӴЕ СӤЗИСЬКОН?

3. Кин сӥземын вал Иеговалы вашкала дыръёсы?

³ Мар со сыӵе сӥзиськон? Библиын «сӥзьыны» кыл возьматэ «кыӵе ке дун-чылкыт ужлы висъямез». Израиль калык Иеговалы сӥземын вал. Но соос пӧлысь куд-огъёсыз Инмарлы нимысьтыз ужан-тыршон понна быръемын вал. Кылсярысь, Аарон. Солэн йыркерттэтэз борды юнматэмын вал чилясь зарни пластина. Со возьматэ вал, Аарон  быръемын шуыса нимысьтыз ужлы — быдӟым священник луыса ужан-тыршонлы (Лев. 8:9). Тае ик вераны луэ назорейёс сярысь но. Нази́р еврей кыл берыктэмын «назорей» шуыса но возьматэ, со «висъямын; сӥземын» шуыса. Моисейлэн законэзъя назорейёслы куд-ог ужъёсты лэсьтыны уг яра вал (Лыд. 6:2—8).

4. а) Мар улонамы валтӥсез луэ Иеговалы сӥзиськеммы бере? б) Мае возьмато «аслэсьтыд ачид куштӥськы» кылъёс? (Озьы ик учке суредэз.)

⁴ Иеговалы сӥзиськыса, адями ужпум кутэ Иисус Христослэн дышетскисез луыны но Инмарлэсь эриксэ улоназ нырысетӥ интые пуктыны. Кызьы улыны кулэ Инмарлы сӥзиськем адями? Иисус шуиз: «Кин Мон сьӧры мыныны малпа, аслэсьтыд ачид куштӥськы» (Матф. 16:24). Грек кылъёсты, кудъёсыз татын «аслэсьтыд ачид куштӥськы» шуыса берыктэмын, озьы ик берыктыны луэ «ас мылпотонъёсыдъя эн улы ни» шуыса. Иеговалы сӥзиськем адямилы палэнтоно ваньзэ, мар Инмарлэн эрикезлы пумит мынэ (2 Кор. 5:14, 15). Озьыен, солы куштӥськоно «лулмугорлэн сьӧлыко ужъёсызлэсь», кылсярысь, азон-калгонлэсь (Гал. 5:19—21; 1 Кор. 6:18). Сыӵе курон-косонъёсъя улыны секыт-а? Ӧвӧл, тӥ Иеговаез яратӥськоды ке но оскиськоды ке, Инмарлэн курон-косонъёсыз тӥледлы пайда ваё шуыса (Пс. 118:97; Ис. 48:17, 18). Ни́колас агай тае тазьы валэктэ: «Иеговалэн куронъёсыз шоры луэ учкыны пытсэтысь решётка шоры кадь, кудӥз номыр карыны уг лэзьы. Озьы ик учкыны луэ решётка шоры кадь, кудӥз тонэ левъёслэсь уте».

5. а) Кызьы Иеговалы сӥзиськоно? б) Маин пӧртэм сӥзиськон но пылатӥськон? (Озьы ик учке суредэз.)

⁵ Кызьы Иеговалы сӥзиськоно? Инмарлы вӧсяськоно но солы верано, тӥ солы гинэ йыбыртъялоды но солэсь эриксэ  улонады нырысетӥ интые пуктоды шуыса. Вераны луоз, тӥ Иеговалы кылдэс сётӥськоды, сое вань сюлмыныды, вань лулыныды, вань визьмыныды, вань кужмыныды яратоды шуыса (Марк 12:30). Сӥзиськон — со Иеговаен вераськон, кудӥз сярысь тӥ но Иегова гинэ тодӥськоды. Нош пылатӥськон ваньмыз азьын ортчытӥське. Пылатӥськыса тӥ ваньмыз азьын возьматӥськоды, Инмарлы сӥзиськиды шуыса. Табере тӥляд ужпумды — сӥзиськыкуды сётэм кылдыя улыны. Иегова но сое ик возьма (Екк. 5:3, 4).

МАЛЫ УЛОНЭЗ ИЕГОВАЛЫ СӤЗЁНО?

6. Мар адямилэсь мылкыдзэ ӝутэ Иеговалы сӥзиськыны?

⁶ Кыӵе валтӥсез муг, малы адями Иеговалы сӥзиське? Со Инмарез яратон. Сыӵе яратон шӧдонъёсын гинэ герӟаськемын ӧвӧл. Тӥ Иеговаез золгес яратӥды, куке со сярысь но солэн эрикез сярысь тросгес тодӥды (Кол. 1:9). Библиез эскерыса, тӥ валады: 1) Иегова зэм но вань, 2) Библия Инмарлэн валтэмез улсын гожтэмын но 3) Инмар эриксэ аслаз организациез пыр быдэстэ шуыса.

7. Мар возьматоз, тӥ Инмарлы сӥзиськыны дась шуыса?

⁷ Соос, кинъёс Иеговалы сӥзисько, Библилэсь валтӥсь дышетонъёссэ тодо, Инмарлэн куронъёсызъя уло но быгатэмзыя осконзы сярысь мукетъёсызлы верало (Матф. 28:19, 20). Соос Иеговаез золгес ярато. Соослэн потэ солы гинэ ужамзы-тыршемзы. Луэ-а тае ик вераны тӥ сярысь но? Луэ ке, тӥ шонер сюрес вылын. Тӥ уд пылатӥське, шумпоттон понна анай-атайдэс  яке сое, кин тӥледын Библиез дышетэ, яке эшъёсты пылатӥськизы шуыса. Тӥ Иеговаез яратӥды ке, тӥляд асьтэлэн сыӵе мылкыдды луоз.

8. Кызьы тау карон герӟаськемын Иеговалы сӥзиськонэн? (Псалтирь 115:3—5).

⁸ Тӥ малпаськиды ке со сярысь, мае Иегова тӥледлы лэсьтӥз ини, тӥляд потоз солы тау каремды но солы улондэс сӥземды. (Лыдӟе Псалтирез 115:3—5.) Библиын Иегова нимаське Атаен, кудӥз котькуд «ӟеч, дун-шектэм кузьымез» сётэ (Иак. 1:17). Самой бадӟым кузьым — со Пиезлэн, Иисус Христослэн, мозмытӥсь курбонэз, кудӥз тӥледлы луонлык сётэ Инмарлэн матысь эшъёсыз луыны но пырак улыны (1 Иоанн 4:9, 10, 19). Иеговалы сӥзиськыса, тӥ возьматоды, Инмарлэн та но мукет кузьымъёсыз понна тау кариськоды шуыса (К. Зак. 16:17; 2 Кор. 5:15). Та сярысь вераське «Пумтэм вапумъёс ӵоже шумпотыса улэ!» книгаысь 46-тӥ урокын, 4-тӥ пунктын, кудаз вань «Милям Инмарлы кузьымъёсмы» видеоролик.

ДАСЬ-А ТӤ ИНМАРЛЫ СӤЗИСЬКЫНЫ НО ПЫЛАТӤСЬКЫНЫ?

9. Малы адямиез косоно ӧвӧл Инмарлы сӥзиськыны?

⁹ Тӥ малпаськоды, вылды, улондэс Инмарлы сӥзьыны но пылатӥськыны дась ӧвӧл на шуыса. Оло нош, Инмарлэн куронъёсызъя улон понна, тӥледлы мае ке воштыны кулэ на. Яке, оскондэс юнматон понна, тӥледлы дыр кулэ на (Кол. 2:6, 7). Иеговаез юн яратон понна, кинлы ке но тросгес дыр кулэ, кинлы ке но — ӧжытгес. Озьы ик егитъёс но сӥзиськыны но пылатӥськыны одӥг арескын дась уг луо. Тырше валаны, кыӵе воштӥськонъёс тӥледлы лэсьтыны кулэ на, но асьтэды мукетъёсыныз эн ӵошатэ (Гал. 6:4, 5).

10. Мар тӥ карыны быгатӥськоды, сӥзиськыны но пылатӥськыны дась ӧвӧл на ке? (Озьы ик учке  «Соослы, кинъёс Иеговалэн Адӟись-Ивортӥсьёсызлэн семьяязы будо» рамкаез.)

¹⁰ Тӥ улондэс Иеговалы сӥзьыны дась ӧвӧл на ке, азьланяз но тырше та ужпумез быдэстыны. Инмарлы вӧсяське но солэсь юрттэтсэ куре кулэ луись воштӥськонъёс лэсьтыны (Флп. 2:13; 3:16). Юн оске, со вӧсяськемдэс кылоз но тӥледлы юрттоз шуыса (1 Иоанн 5:14).

МАЛЫ КУД-ОГЪЁСЫЗ УГ ДӤСЬТО?

11. Кызьы Иегова милемлы юрттэ солы оскымон кыльыны?

¹¹ Куд-огъёсыз Инмарлы сӥзиськыны но пылатӥськыны дась ини, но та вамышъёсты лэсьтыны уг дӥсьто. Соос кышкало, вылды, пылатӥськемзы бере бадӟым сьӧлык лэсьтозы но соосты кенешысь поттозы шуыса. Тӥляд но таӵе ик малпанъёсты кылдо ке, юн оске, Иегова тӥледлы «котьмар ласянь Солы тэрытскыса» улыны юрттоз шуыса (Кол. 1:10). Озьы ик со тӥледлы кужым сётоз асьтэды шонер возьыны. Трос вын-агайёс но сузэр-апайёс ас вылазы шӧдӥзы ини, Инмар вылэ оскиськыны луэ шуыса (1 Кор. 10:13). Христиан кенешысь туж ӧжытсэ гинэ потто. Та возьматэ, Иегова аслаз ужась-тыршисьёсызлы солы оскымон кыльыны юрттэ шуыса.

12. Мар юрттоз бадӟым сьӧлыкъёслэсь палэнскыны?

¹² Котькуд тырбыдэстэм адями визь сынаськонъёсын пумиськылэ (Иак. 1:14). Но тӥ асьтэос бырйиськоды, соослы сётсконо-а, ӧвӧл-а. Тӥ асьтэос ужпум кутӥськоды, кызьы асьтэды возёно. Куд-огъёсыз та пумысен воксё мукет сямен малпасько ке но, тӥ быгатӥськоды шонертэм мылпотонъёстэс палэнтыны. Тани куд-ог визь-кенешъёс, кудъёсыз тӥледлы юрттозы  сьӧлыклэсь палэнскыны. Котькуд нунал Иеговалы вӧсяське. Ас поннады Библиез эскере. Христиан пумиськонъёсы ветлэ. Тодэмдэс мукетъёсызлы вералэ. Соку тӥляд кужымды луоз сӥзиськыкуды сётэм кылдыя улыны. Со сяна, ноку эн вунэтэ: Иегова тӥледлы юрттоз (Гал. 5:16).

13. Кыӵе адӟем карон возьматӥз милемлы Иосиф?

¹³ Тӥледлы капчигес луоз сӥзиськыкуды сётэм кылдыя улыны, азьло ик ужпум кутӥды ке, кызьы асьтэды возёды, визь сынаськон кылдыку. Библиын вераське трос адямиос сярысь, кудъёсыз визь сынаськонлы дась вал. Эскеромы Иосифлэсь учырзэ. Потифарлэн кышноез кӧня ке пол тыршиз сое азон-калгон сьӧлыке кыскыны. Но Иосиф умой тодӥз, кызьы ассэ возёз. Библиын гожтэмъя, со пумит кариськылӥз но Потифарлэн кышноезлы вералляз: «Таӵе уродлэсь но урод ужез лэсьтыны, Инмар азьын сьӧлыканы быгатӥсько шат?» (Ул.-выл. 39:8—10). Татысь адӟиське: Потифарлэн кышноез сое ёртэмлэсь азьло ик ини Иосиф тодӥз, кызьы ассэ возёз. Соин ик сыӵе учырын но солы капчигес вал ассэ шонер возьыны.

14. Кызьы дышетсконо палэнтыны сое, мае Иегова адӟемпотостэм каре?

¹⁴ Кызьы тӥ Иосифлэсь адӟем карыны быгатӥськоды? Али ик ужпум кутэ, мар кароды, визь сынаськон кылдыку. Дышетске соку ик палэнтыны сое, мае Иегова адӟемпотостэм каре. Эн ик малпалэ со сярысь, мар Инмарез ӝоже уськытысал (Пс. 96:10; 118:165). Соку тӥ визь сынаськонлы уд сётске. Тӥ азьло ик умой тододы, мар карыны.

15. Кызьы адями возьматыны быгатэ, Иеговаез утча шуыса? (Еврейёслы 11:6).

¹⁵ Шуом, тӥ оскиськоды, зэмлыкез шедьтӥды шуыса, но вань сюлмыныды Иеговалы ужамды-тыршемды потэ, озьы ке но сӥзиськыны но пылатӥськыны уд дӥсьтӥське. Мар соку кароно? Тӥ быгатӥськоды адӟем карыны Давид эксэйлэсь. Вӧсяське Иеговалы: «Чакла-эскеры монэ, Инмаре, тод, мар мынам сюлмам. Чакла-эскеры монэ, тод мынэсьтым малпанъёсме. Учкы, кышкыт сюрес вылын ӧвӧл-а мон,— бырисьтэм улон сюрес вылтӥ ну монэ» (Пс. 138:23, 24). Таӵе вӧсяськон возьматоз, тӥ Иеговалэсь юрттэтсэ утчаськоды но улондэс  Инмарлы сӥзьыны но пылатӥськыны тыршиськоды шуыса. Нош Иегова «Ассэ утчасьёсты» бакель каре. (Лыдӟе Еврейёслы 11:6.)

АЗЬЛАНЯЗ НО ИЕГОВАЛЫ МАТЭ КАРИСЬКЕ

16, 17. Кызьы Иегова ас дораз вае соосты, кинъёс Иеговалэн Адӟись-Ивортӥсьёсызлэн семьяязы будо? (Иоанн 6:44).

¹⁶ Иисуслэн верамезъя, нокин уз быгаты солэн дышетскисез луыны, Иегова сое ас дораз ӧз вайы ке. (Лыдӟе Иоаннлэсь 6:44.) Малпаське та мур малпан сярысь. Котькуд адямилэсь, кудзэ Иегова ас дораз вае, со мае ке умойзэ адӟе. Инмар соосты яратэ но соос сярысь шуэ: «Соос Мынам адямиосы» (Мал. 3:16, 17). Тӥ но солы туж дуно потӥськоды.

¹⁷ Нош мар вераны луоз егитъёсмы сярысь? Тон Адӟись-Ивортӥсьёслэн семьяязы будӥськод ке, тон малпаськод, вылды, кенеше анай-атаед сьӧры гинэ ветлӥськод шуыса. Соку тодад вай Библиысь таӵе кылъёсты: «Инмарлы матэ кариське, Со но тӥляд матады лыктоз» (Иак. 4:8; 1 Пар. 28:9). Куке тон тыршиськод Иеговалы матэ кариськыны, со но тынад матад лыктэ. Иегова тонэ Адӟись-Ивортӥсьёслэн семьяязы будэмед понна ас дораз ӧз вайы. Солэн тонэн эшъяськемез потэ. Кызьы гожтэмын Иаковлэн 4:8, куке адями Иеговалэн матаз кариське, со но солэн матаз кариське. (Ӵошатэ 2 Фессалоникаослы 2:13.)

18. Мае ми эскеромы вуоно статьяын? (Псалтирь 39:9).

¹⁸ Улондэс Иеговалы сӥзьыса но пылатӥськыса, тӥ Иисуслэсь адӟем кариськоды. Со дась вал быдэстыны ваньзэ, мар сярысь Атаез куриз (лыдӟе Псалтирез 39:9; Евр. 10:7). Вуоно статьяын ми эскеромы, мар тӥледлы юрттоз пылатӥськемды бере Иеговалы оскымон ужаны-тыршыны.