1. Кызьы юрттэ милемлы Иегова?

 ТА ДУННЕЫН улон секытгес но секытгес луэ. Но милемлы юрттон понна, Иегова сётӥз милемлы агайёсмес но сузэръёсмес (Пс. 132:1). Озьы ик со юрттэ семьяослы шудо луыны (Еф. 5:33—6:1). Со сяна, Инмар милемыз дышетэ каньыл сюлмын улыны.

2. Малы Иеговалы ужаны-тыршыны котьку ик капчи ӧвӧл?

² Озьы ке но Иеговалы ужаны-тыршыны котьку ик капчи ӧвӧл. Куддыръя агайёслэн яке сузэръёслэн кылъёссы милемыз вӧсь каро. Куддыръя милям мылкыдмы куашка асьмелэн янгышъёсмы сэрен, тужгес но выльысь но выльысь соосты лэсьтӥськомы ке. Но кимес лэзёно ӧвӧл. Азьланяз но Иеговалы ужано-тыршоно, соку но, куке: 1) агай яке сузэр милемыз вӧсь каре, 2) кузпалмы милемыз вӧсь каре яке 3) ми асьмеос янгышаськомы. Эскеромы, кызьы та выллем учыръёсын асьсэды возизы Инмарлэн куинь ужась-тыршисьёсыз вашкала дыръя. Озьы ик тодомы, малы ми соослэсь дышетскыны быгатӥськомы.

ИЕГОВАЛЫ УЖАЛЭ-ТЫРШЕ, АГАЙ ЯКЕ СУЗЭР ТӤЛЕДЫЗ ВӦСЬ КАРЕ КЕ НО

3. Кыӵе шуг-секытъёсын пумиськыло Инмарлэн ужась-тыршисьёсыз?

³ Шуг-секыт. Куддыръя агайёслэн яке сузэръёслэн сямъёссы милемлы уг кельшо. Яке соослэн кылъёссы но ужъёссы милемыз вӧсь каро. Оло нош, милемлы уг кельшо тӧроослэн кутэм ужпумъёссы. Таин сэрен куд-огъёсыз малпало: «Инмарлэн организацияз тазьы луыны быгатэ шат?» Агайёсынызы но сузэръёсынызы Инмарлы огкылысь ужам-тыршем интые, соос палэнскыны кутско агайёслэсь но сузэръёслэсь, кудъёсыз соосты вӧсь каризы, яке пумиськонъёсы но ветлэмысь дугдо (Соф. 3:9). Шонер-а со?  Библиын вераське адями сярысь, кудӥз та выллем шуг-секытъёсын пумиськиз. Ойдолэ тодомы, кызьы со ассэ возиз.

4. Кыӵе шуг-секытъёсын пумиськылӥз апостол Павел?

⁴ Библиысь учыр. Апостол Павел тодэ вал, агайёсыз но сузэръёсыз тырбыдэстэмесь шуыса. Кылсярысь, христиан мурт луэмез бере куд-огъёсыз ӧз оске, со Иисуслэн дышетскисез шуыса (Ап. уж. 9:26). Берлогес куд-огъёсыз со сярысь уродзэ веразы, мукетъёсыз солы медаз оске шуыса (2 Кор. 10:10). Павел адӟиз, кызьы тӧро ассэ шонертэм возиз, нош соин сэрен мукетъёсызлэн осконзы лябӟыны быгатэ вал (Гал. 2:11, 12). Нош огпол Павеллэн Марк нимо ӵош ужасез шонертэм ужпум кутӥз, кудӥз сэрен Павел солы оскемысь дугдӥз (Ап. уж. 15:37, 38). Котькуд та учыр бере Павел быгатэ вал со агайёсын кусып воземысь дугдыны. Но со тыршиз агайёсызлэсь но сузэръёсызлэсь умойзэ адӟыны но Иеговалы ужамысь-тыршемысь ӧз дугды. Мар солы юрттӥз?

5. Мар юрттӥз Павеллы агайёсызлэсь но сузэръёсызлэсь палэнскытэк улыны? (Колоссыослы 3:13, 14). (Озьы ик учке суредэз.)

⁵ Павел яратэ вал агайёссэ но сузэръёссэ, соин ик со соослэсь умой сямъёссэс адӟыны тыршиз. Озьы ик яратон юрттӥз Павеллы лэсьтыны сое, мар сярысь со ачиз гожтӥз Колоссыослы 3:13, 14 (лыдӟе). Павел агайёссэ дышетӥз мукетъёссэ простить карыны. Тани кызьы со ачиз аслэсьтыз визь-кенешсэ уже кутӥз Маркен герӟаськем учырын. Куке Павел нырысетӥзэ пӧртэм шаеръёстӥ тодытыса ветлӥз, Марк сое кельтӥз. Озьы ке но Павел кӧтсэ ӝож ӧз кары. Берлогес Колоссы карысь кенешлы со шуныт кылъёсын гожтэт гожтӥз. Отын со Маркез юрттэмез понна ушъяз но вераз, сое дунъя шуыса (Кол. 4:10, 11). Римысь пытсэтын пукыкуз, Павел куриз, со доры Марк мед лыктоз шуыса (2 Тим. 4:11). Адӟиське, Павел агайёссэ но сузэръёссэ простить карылӥз но соослэсь ӧз палэнскылы. Малы та милемыз дышетэ?

6, 7. Мар милемлы юрттоз агайёсмес но сузэръёсмес яратыны, тырмымтэоссы шоры учкытэк? (Еврейёслы 13:1).

⁶ Малы ми дышетскиськомы. Иеговалэн потэ, ми агайёсмес но сузэръёсмес яратэмысь медам дугдэ шуыса. (Лыдӟе Еврейёслы 13:1.) Соос милемыз кылъёсынызы вӧсь каро ке, малпано ӧвӧл, соос юри озьы каризы шуыса (Мад. 12:18). Ми оскиськомы, соослэн шонерзэ лэсьтэмзы потэ шуыса, но котьку ик уг пӧрмы. Инмар яратэ  аслэсьтыз оскымон ужась-тыршисьёссэ, соос янгышало ке но. Библиын гожтэмын: «Пумтэм дауръёс ӵоже йыркуръяськыса, Со уг улы» (Пс. 102:9). Милемлы инмысь Атаймылэсь адӟем кароно но мукетъёссэ простить кароно (Еф. 4:32—5:1).

⁷ Озьы ик тодады возе: та дуннелэн пумыз матэктэмъя агайёсын но сузэръёсын кусыпъёсмы юнгес луыны кулэ. Уйылон-уллянъёс эшшо но золгес луыны быгато. Осконмы понна ми пытсэтэ но сюрыны быгатӥськомы. Соку агайёсмы но сузэръёсмы милемлы эшшо но кулэ луозы (Мад. 17:17). Тани мар луиз Испаниысь Хосе́п a нимо тӧроен. Со но мукет агайёс пытсэтын пукизы киязы ожтӥрлык кутыны пумит луэмзы понна. Со вера: «Пытсэтын ми ваньмы ӵош улӥмы. Соин ик ог-огмес вӧсь карыны быгатӥськомы вал. Милемлы дышетсконо вал ог-огмес соку ик простить карыны. Та юрттэ вал милемлы огкылысь улыны но ог-огмы сярысь сюлмаськыны, малы ке шуоно котырамы Адӟись-Ивортӥсь луисьтэм адямиос улӥзы. Огпол мон киме вӧсь кари но, мыным сое бинизы. Куд-ог ужъёсты лэсьтыны мон ачим уг быгатӥськы вал. Соин ик одӥг агай мыным юрттэ вал, кылсярысь, дӥськутме миське вал. Шуг-секытэн пумиськыса, мон ас вылам шӧдӥ, мар со сыӵе зэмос яратон». Ойдолэ секыт дырез ум возьмалэ, нош али ик ини тыршомы мукетъёсыныз тупаса улыны!

ИЕГОВАЛЫ УЖАЛЭ-ТЫРШЕ, КУЗПАЛДЫ ВӦСЬ КАРЕ КЕ НО

8. Кыӵе шуг-секытъёссы кылдыны быгато кузпалъёслэн?

⁸ Шуг-секыт. Котькуд кузпалъёслэн шуг-секытъёссы вань. Библия вера, кузпалъяськись адямиослэн шуг-секытъёссы луозы шуыса (1 Кор. 7:28). Малы? Малы ке шуоно карт но кышно — кык тырбыдэстэм адямиос, кудъёсызлэн пӧртэм сямъёссы. Соос пӧртэм калыкъёсысь но пӧртэм семьяосысь луыны быгато. Дыр ортчемъя шарае потыны быгато сыӵе сямъёссы, кудъёсыз кузпалъяськемзылэсь азьло ӧз шӧдӥське. Таин сэрен тупамтэос кылдо. Огкыл шедьтэм интые, кузпалъёс ог-огзэс янгыше уськытыны кутско. Соос малпаны быгато, та учырын нимаз улыны яке люкиськыны гинэ луэ на шуыса. Нош соку соос шудогес луозы-а? b Ойдолэ тодамы ваёмы вашкала дыръя улӥсь кышномуртэз, кудӥз Иеговалы оскымон кылиз, картэныз улонэз туж секыт вал ке но. Озьы ик тодомы, малы солэсь дышетскеммы луэ.

9. Кыӵе шуг-секытъёсыз вал Авигеялэн семьяяз?

⁹ Библиысь учыр. Авигея Наваллы быземын вал. Библия вера, со «жалянэз валасьтэм, лек сямо» пиосмурт вал шуыса (1 Экс. 25:3). Авигеялы сыӵе пиосмуртэн улыны секыт вал, дыр. Быгатэ вал-а со картэз дорысь кошкыны? Быгатэ вал, куке Давид, Израильлэн вуоно эксэез, солэсь картсэ виыны малпаз, малы ке шуоно Навал сое но солэсь ожгарчиоссэ ултӥяз (1 Экс. 25:9—13). Авигея быгатэ вал бызьыса кошкыны но Давидлы луонлык сётыны Навалэз виыны. Но Авигея Давидэз дугдытӥз, со Навалэз медаз виы шуыса (1 Экс. 25:23—27). Малы со ассэ озьы возиз?

10. Малы, вылды, Авигея семьязэ утьыны тыршиз, картэныз улонэз секыт вал ке но?

¹⁰ Авигея Иеговаез яратӥз но семьяослы  пуктэм курон-косонъёсызлэсь кылзӥськиз. Со тодӥз, дыр, кыӵе курон-косон сётӥз Инмар Адамлы но Евалы, куке нырысетӥ кузпалъёсты огазеяз (Ул.-выл. 2:24). Авигея вала вал, Иегова кузпалъяськонэз святоен лыдъя шуыса. Солэн Инмарез шумпоттэмез потэ вал. Соин ик со лэсьтӥз ваньзэ, мае быгатӥз, матысьёссэ, озьы ик картсэ но, утён понна. Авигея ӝегатскытэк тыршиз Давидэз дугдытыны, со Наваллы пунэмзэ медаз берыкты шуыса. Озьы ик со дась вал курыны сое простить карыны лек уж понна, кудзэ ачиз ӧз лэсьты. Валамон, Иегова та кышкасьтэм кышномуртэз яратӥз. Малы дышетскыны быгато картъёс но кышноос Авигеялэсь?

11. а) Мае возьма Иегова кузпалъёслэсь? (Ефесъёслы 5:33). б) Малы тӥледыз дышетэ Кармен сузэрлэн учырез? (Озьы ик учке суредэз.)

¹¹ Малы ми дышетскиськомы. Иеговалэн потэ, шуг-секытъёссы шоры учкытэк, кузпалъёс ӵош мед улозы шуыса. Инмар туж шумпотэ, куке соос шуг-секытъёссэс сэрттыны-пертчыны тыршо но ог-огзылы яратэмзэс но гажамзэс возьмато. (Лыдӟе Ефесъёслы 5:33.) Тани Ка́рмен сузэрлэн учырез. Кузпалъяськемзы бере ог куать ар ортчыса, со Иеговалэн Адӟись-Ивортӥсьёсыныз Библиез дышетыны кутскиз, нош берлогес пылатӥськиз. Кармен вера: «Картэлы со туж ӧз кельшы. Солэн вожез потӥз. Со монэ ултӥя но кышкатэ вал, мон дорысь кошкоз шуыса». Та шоры учкытэк, Кармен лэсьтӥз ваньзэ, мае быгатӥз, семьязэ утён понна. 50 ар ӵоже со тыршиз картэзлы яратэмзэ но гажамзэ возьматыны. Со азьланьтэ: «Дыр ортчемъя мон картме умойгес валаны кутски но дыши соин лякытэн вераськыны. Мон туж тырши семьяме утьыны, малы ке шуоно тодӥсько вал, Иегова сое святоен лыдъя шуыса. Мон Иеговаез яратӥсько, соин ик картэ дорысь кошкыны мынам малпанэ ӧз ик кылдылы» c. Кузпалэныды кусыпъёсты туж ик умоесь ӧвӧл ке, Иеговалы оскиське. Со тӥледлы ваньзэ чиданы юрттоз.

ИЕГОВАЛЫ УЖАЛЭ-ТЫРШЕ, ТӤ АСЬТЭОС ЯНГЫШАДЫ КЕ НО

12. Кыӵе шуг-секытъёсыз кылдо солэн, кин бадӟым сьӧлык лэсьтӥз?

¹² Шуг-секыт. Бадӟым сьӧлык лэсьтэмез бере адямилы ассэ гажаны секыт ини. Библия вера, сьӧлыкам мурт сюлмыз чигиськыса улэ шуыса (Пс. 50:19). Робе́рто агай трос аръёс ӵоже туж тыршиз кенешлы юрттӥсь луыны. Но берлогес со бадӟым сьӧлык  лэсьтӥз но валаз, Иеговалы оскымон ӧз кыльы шуыса. Со вера: «Мыным туж возьыт вал. Мон асме номырлы ярасьтэм адямиен шӧдӥ. Мон бӧрдыса ик Иеговалы вӧсяськи. Мон малпай, Иегова монэ ноку уз кылзы ни шуыса, малы ке шуоно мон солы оскымон ӧвӧл ни». Бадӟым сьӧлык лэсьтэммы бере милям кимы ик лэзиськыны быгатэ, малы ке шуоно ми малпаськомы, вылды, Иегова милемыз кельтӥз шуыса (Пс. 37:5). Тӥляд но таӵе ик шӧдонъёсты кылдо ке, тодады вае нырысетӥ даурысь христиан муртэ, кудӥз бадӟым сьӧлык лэсьтэмез бере но Иеговалы ужамысь-тыршемысь ӧз дугды.

13. Кыӵе бадӟым сьӧлык лэсьтӥз апостол Пётр но кыӵе янгышъёс со солэсь азьвыл лэсьтӥз?

¹³ Библиысь учыр. Иисуслэн кулон азяз уе апостол Пётр кӧня ке пол янгышаз но соин сэрен бадӟым сьӧлык лэсьтӥз. Нырысь Пётр ушъяськиз, мукет апостолъёс Иисуслэсь куштӥськизы ке но, со солэсь уз куштӥськы шуыса (Марк 14:27—29). Собере Гефсиман садын со кӧня ке пол умме усиз (Марк 14:32, 37—41). Берлогес, куке Иисусэз кутыны лыктӥзы, Пётр бызьыса кошкиз (Марк 14:50). Нош собере со куинь пол вераз, Иисусэз уг тоды шуыса. Адямиосты оскытон понна, со кылзэ но сётӥз (Марк 14:66—71). Куке Пётр валаз, макем бадӟым сьӧлык со лэсьтӥз, со зар-зар бӧрдыны кутскиз (Марк 14:72). Кӧня ке час ортчыса, солэсь эшсэ, Иисусэз, казнить каризы. Малпалэ гинэ, макем куректӥз Пётр! Со ассэ номырлы ярасьтэм адямиен шӧдӥз, вылды.

14. Мар юрттӥз Пётрлы азьланяз но Иеговалы ужаны-тыршыны? (Учке суредэз.)

¹⁴ Озьы ке но Пётр кизэ ӧз лэзьы но Иеговалы ужамысь-тыршемысь ӧз дугды. Мар солы юрттӥз? Пётр мукетъёсызлэсь ӧз палэнскы. Со вын-агайёсыз доры мынӥз. Соос сое буйгатӥзы (Лука 24:33). Со сяна, Пётрлы улӟем Иисус возьматскиз, сое юнматон понна, вылды (Лука 24:34; 1 Кор. 15:5). Берлогес, Пётрез янгыше уськытэм интые, Иисус солы бадӟым уж оскиз (Иоанн 21:15—17). Пётр тодӥз, бадӟым сьӧлык лэсьтӥз шуыса. Озьы ке но со азьланяз но тыршиз шонер ужъёс лэсьтыны. Малы? Малы ке шуоно тодӥз, Иисус сое номырлы ярасьтэм адямиен уг лыдъя шуыса. Со сяна, Пётрлэн вын-агайёсыз но сое юнматӥзы. Малы ми дышетскиськомы Пётрлэсь?

15. Малы ми оскыны кулэ? (Псалтирь 85:5; Римъёслы 8:38, 39). (Озьы ик учке суредэз.)

¹⁵ Малы ми дышетскиськомы. Иеговалэн потэ, ми мед оскомы, со милемыз яратэ, гажа-жаля но простить каре шуыса. (Лыдӟе Псалтирез 85:5; Римъёслы 8:38, 39.) Валамон,  сьӧлыкаммы бере милемлы туж возьыт. Но малпано ӧвӧл, Иегова милемыз уг яраты ни но ноку простить уз кары ни шуыса. Со интые, соку ик юрттэт утчано. Роберто, кудӥз сярысь гожтэмын вал ини, вера: «Мон сьӧлыкай, малы ке шуоно ас вылам оскиськи но малпай, визь сынаськонэн ачим нюръяськыны быгато шуыса». Агаймы валаз, солы тӧроослы вазиськоно шуыса. Со азьланьтэ: «Тӧроос пыр Иегова оскытӥз, монэ яратэ шуыса. Мон адӟи, агайёс но монэ ярато шуыса. Соос мыным валаны юрттӥзы, Иегова монэ ӧз кельты шуыса». Ми но оскыны быгатӥськомы, Иегова милемыз туж яратэ шуыса. Ми ӧпкелиськомы ке, юрттэт утчаськомы ке но туж тыршиськомы ке янгышъёсмес выльысь лэсьтытэк улыны, со милемыз одно ик простить кароз (1 Иоанн 1:8, 9). Ми оскиськомы ке, Иегова милемыз яратэ шуыса, янгышаммы шоры учкытэк, ми азьланяз но солы ужаны-тыршыны быгатомы.

16. Малы тӥляд потэ, номыр шоры учкытэк, Иеговалы ужамды-тыршемды?

¹⁶ Иегова туж шумпотэ, та берпум нуналъёсы солэсь эриксэ быдэсъяны тыршиськомы шуыса. Асьмелэн яке мукетъёсызлэн янгышъёссы сэрен со котьку ик капчи ӧвӧл. Но Иеговалэн юрттэменыз милям ваньмыз пӧрмоз. Ми быгатӥськомы агайёсмес но сузэръёсмес эшшо но золгес яратыны но, соос милемыз вӧсь каро ке, соосты простить карыны. Кузпалъёс быгато шуг-секытъёссэс ӵош сэрттыны-пертчыны. Озьы соос Иеговалы, семьяез Кылдытӥсьлы, яратэмзэс но гажамзэс возьматозы. Нош сьӧлыкамы ке, ми быгатӥськомы Иеговалэсь юрттэтсэ утчаны, юн оскыны, со милемыз яратэ но простить каре шуыса, но азьланяз но солы ужаны-тыршыны. «Ӟеч уж лэсьтыны» ӧм жаде ке, Иегова милемыз бакель кароз шуыса осконмы уз лябӟы! (Гал. 6:9).