1. Кыӵе шӧдонъёссы кылдыло Иеговалэн куд-ог оскымон ужась-тыршисьёсызлэн?

 МИ ОСКИСЬКОМЫ, Иегова аслэсьтыз калыксэ яратэ шуыса. Библиын гожтэмын: «Кузё-Инмарлэн ӟеч эрикез Ас калыкез бордын улэ» (Пс. 149:4). Но кинлэн ке но таӵе юанэз кылдэ, вылды: «Нош монэ Иегова яратэ-а?» Библиын вераське трос адямиос сярысь, кудъёсыз Инмарлы оскымон ужазы-тыршизы, но со дыре ик соослы секыт вал оскыны, Иегова соосты яратэ шуыса (1 Экс. 1:6—10; Иов 29:2, 4; Пс. 50:13).

2. Мар кароно, Иеговалы ярамон луон понна?

² Библия возьматэ, сьӧлыко адямиос Иеговалы ярамон луыны быгато шуыса. Мар кароно со понна? Иисус Христослы осконо но пылатӥськоно (Иоанн 3:16). Озьы ми возьматомы: сьӧлыкъёсмы понна ӧпкелимы но Инмарлы кылмес сётӥмы солэсь эриксэ быдэсъяны (Ап. уж. 2:38; 3:19). Иегова туж шумпотэ, соин эшъяськон понна, ми та вамышъёсты лэсьтӥськомы ке. Сӥзиськыкумы сётэм кылмыя улыны тыршиськомы ке, Иегова милемыз аслыз ярамон адямиосын но матысь эшъёсыныз лыдъя (Пс. 24:14).

3. Кыӵе куинь юанъёсты ми эскеромы?

³ Соку малы куд-огъёсыз малпало, Иегова соосты уг яраты шуыса? Кызьы Инмар возьматэ соосты яратэмзэ? Малы ми оскыны быгатӥськомы, ми Иеговалы ярамон луиськомы шуыса?

МАЛЫ КУД-ОГЪЁСЫЗ УГ ОСКО, ИЕГОВА СООСТЫ ЯРАТЭ ШУЫСА

4, 5. Мар буйгатыны быгатэ соосты, кинъёс асьсэды номырлы ярасьтэмен лыдъяло?

⁴ Ми пӧлысь куд-огъёсыз пичи дырысенызы ик малпало, соос номырлы ярасьтэмесь шуыса (Пс. 87:16). Адриа́н агай вера: «Кӧня асме тодӥсько, мон котьку асме номырлы  ярасьтэм адямиен лыдъяй. Пичи дыръям мон вӧсяськи, ӵыжы-выжыосы райын мед улозы шуыса. Нош ачим сярысь мон малпасько вал, отчы уг сюры шуыса». То́ни агайлэн анай-атаез Адӟись-Ивортӥсьёс ӧй вал. Со вера: «Атае но анае мыным ноку ӧз вералэ, монэ ярато но монэн данъясько шуыса. Мар гинэ мон медам лэсьты, со котьку ӧжыт вал. Соослы ярамон луыны уг луы вал».

⁵ Милемлы потэ ке, ми номырлы ум яраське шуыса, тодамы вайылоно, Иегова ми сярысь озьы уг малпа шуыса. Малы ке шуоно со ачиз милемлы ӵектӥз соин эшъяськыны (Иоанн 6:44). Оло нош, ми ум но валаське, макем ми умоесь, но Иегова адӟе, кыӵеесь ми зэмзэ ик (1 Экс. 16:7; 2 Пар. 6:30). Со вера ке, милемыз яратэ шуыса, ми солы оскыны быгатӥськомы (1 Иоанн 3:19, 20).

6. Кызьы ассэ шӧдӥз апостол Павел азьвыл лэсьтэм сьӧлыкъёсыз сэрен?

⁶ Куд-огъёсыз зэмлыкез тодэмзылэсь азьло выризы сыӵе ужъёсын, кудъёсыз понна соослы али но возьыт на (1 Пётр 4:3). Оскымон христианъёслы но сьӧлыко мылпотонъёсынызы нюръяськоно луэ. Малпаськоды-а тӥ, Иегова тӥледыз простить уз кары шуыса? Малпаськоды ке, тӥледыз буйгатоз, вылды, таӵе малпан: сыӵе ик шӧдонъёссы вал Иеговалэн мукет ужась-тыршисьёсызлэн но. Кылсярысь, апостол Павел куректӥз азьвыл лэсьтэм янгышъёсыз сэрен но ассэ куанер, мискинь адямиен лыдъяз (Рим. 7:24). Павел сьӧлыкъёсыз понна ӧпкелиз но пылатӥськиз ке но, со ассэ «апостолъёс пӧлысь ваньмызлэсь пичиеныз» но «ваньмызлэсь сьӧлыко» адямиен лыдъяз (1 Кор. 15:9; 1 Тим. 1:15).

7. Мар сярысь тодамы возёно, ми сьӧлыкамы ке?

⁷ Инмысь Атаймы кылзэ сётӥз ӧпкелисьёсты гажаны-жаляны но простить карыны (Пс. 85:5). Соин ик, ми лэсьтэм сьӧлыкъёсмы понна вань сюлмысьтымы ӧпкелиськомы ке, ми оскыны быгатӥськомы, Иегова сётэм кылзэ быдэстӥз но милемыз простить кариз шуыса (Кол. 2:13).

8, 9. Мар кароно, ми малпаськомы ке, Иеговалы ярамон луон понна, тырмыт ум лэсьтӥське шуыса?

⁸ Милям ваньмылэн потэ Иеговалы ужан-тыршонын лэсьтэммы ваньзэ, мае быгатӥськомы. Но куд-огъёсыз малпало, Иеговалы ярамон луон понна, соос тырмыт лэсьтыны ноку уз быгатэ шуыса. Ама́нда сузэр вера: «Ӵем дыръя мон малпасько, Иеговалы самой умойзэ сётон понна, ялан тросгес но тросгес сётоно шуыса. Куддыръя мон ас азям быдэстыны луонтэм ужпумъёсты пуктӥсько. Нош куке соосты быдэстэме уг луы, мынам мылкыды воксё куашка. Мыным потэ, мон шоры учкыса, Иеговалэн но мылкыдыз куашка шуыса».

⁹ Мар кароно, ми малпаськомы ке, Иеговалы тырмыт ум сётӥське шуыса? Тодады возе: Инмар укыр троссэ уг куры. Со милесьтым лэсьтыны луонтэмзэ ноку уг возьма. Со шумпотэ, куке ми лэсьтӥськомы сое, мае быгатӥськомы. Озьы ик малпаське соос сярысь, кинъёс, кужымзэс жалятэк, Иеговалы ужазы-тыршизы. Кылсярысь, Павел. Со, ассэ жалятэк, трос аръёс ӵоже Иеговалы ужаз-тыршиз, сюрс иськемъёсты ортчиз но трос кенешъёсты кылдытӥз. Но куддыръя солэн югдуръёсыз воштӥсько вал. Соин ик азьвыл мында со тодытыны уг быгаты ни вал. Возьматэ вал-а та, со Иеговалы ярамон ӧвӧл ни шуыса? Уг. Павел лэсьтӥз сое, мае быгатӥз, соин ик Инмар сое бакель кариз (Ап. уж. 28:30, 31). Ми быгатомы куддыръя тросгес лэсьтыны, куддыръя — ӧжытгес. Но со валтӥсез ӧвӧл. Иегова понна валтӥсез — малы  ми солы ужаськомы-тыршиськомы. Нош табере ойдолэ тодомы, кызьы Инмар оскытэ, милемыз яратэ шуыса.

КЫЗЬЫ ИНМАР ОСКЫТЭ, МИЛЕМЫЗ ЯРАТЭ ШУЫСА?

10. Кызьы ми «кылыны» быгатӥськомы Иеговалэсь верамзэ, со милемыз яратэ шуыса? (Иоанн 16:27).

¹⁰ Со сётӥз милемлы Библиез. Иеговалы кельше ужась-тыршисьёсызлы вераны, со соосты яратэ шуыса. Библиын гожтэмын кык учыръёс, куке Иегова Иисусэз яратоно Пиеныз нимаз (Матф. 3:17; 17:5). Потэ-а тӥляд, Иегова тӥледлы но сыӵе ик шуныт кылъёс мед вералоз шуыса? Туннэ Инмар милемын Иисусэн кадь уг вераськы — со милемын вераське Библия пыр. Ми «кылыны» быгатӥськомы Иеговалэсь шуныт кылъёссэ, Евангелиосысь Иисуслэсь кылъёссэ лыдӟыса. (Лыдӟе Иоаннлэсь 16:27.) Иисус котьку ассэ возиз озьы, кызьы Атаез ассэ возьысал. Солэн дышетскисьёсыз сьӧлыкоесь вал ке но, соос Иеговалы оскымон ужазы-тыршизы. Иисус соос сярысь умойзэ вералляз но соосты ушъяз. Соин ик, куке лыдӟиськомы, мае Иисус аслаз дышетскисьёсызлы вераз, ми син азямы пуктыны быгатӥськомы, сое Иегова милемлы вера шуыса (Иоанн 15:9, 15).

11. Малы шуг-секытъёс уг возьмато, Иегова милесьтым палэнскиз шуыса? (Иаков 1:12).

¹¹ Со милемлы ваньзэ кулэзэ сётэ. Иегова милемлы котьку но юрттэ. Кылсярысь, со сюлмаське, милям улон понна ваньмыз кулэез мед луоз шуыса. Но та уг возьматы, Инмар милемыз вань шуг-секытъёслэсь утёз шуыса. Иов сямен, ми но шугадӟонъёсын пумиськыны быгатӥськомы (Иов 1:8—11). Шуг-секытъёс уг возьмато, Иегова милесьтым палэнскиз шуыса. Секыт дыръя милям возьматэммы луэ, макем ми сое яратӥськомы но солы оскиськомы. (Лыдӟе Иаковлэсь 1:12.) Озьы ик шуг-секытъёс дыръя ми Иегова сярысь выльзэ тодыны быгатӥськомы. Ми адӟомы, со яратӥсь но оскиськымон Инмар шуыса, кудӥз милемлы юрттэ шуг-секытъёсмес пумозяз чиданы.

12. Малы тӥледыз дышетэ Дмитрийлэн учырез?

¹² Эскеромы Дмитрий агайлэсь учырзэ. Огпол со ужтэк кылиз, нош выльзэ шедьтыны нокызьы но уг быгаты вал. Со малпаз Иеговалы тросгес ужаны-тыршыны. Озьы солэн возьматэмез потэ вал, солы быдэсак  оскиське шуыса. Но толэзьёс ортчыса но, выль уж ӧй вал. Собере Дмитрий секыт висьыны усиз, валес вылысьтыз султылыны но ӧз быгаты ни. Со малпаны кутскиз, со табере умой карт но атай ӧвӧл ни шуыса, озьы ик Иеговалы но ярамон ӧвӧл ни шуыса. Одӥг пол со доры пыриз пичи нылыз но солы бумага сётӥз. Отын гожтэмын вал таӵе кылъёс: «Каньыл сюлмын но оскиськыса улон бордын тӥляд кужымды» (Исаия 30:15, ВД). Та бумагаез со валес вылэ понӥз но вераз: «Атай, тыныд ӝож луиз ке, та кылъёсты тодад вай». Дмитрий валаз, Иегова семьязы сярысь сюлмаське шуыса. Соослэн сиёнзы, дӥськутсы, улон интызы вань. Агаймы тодаз вае: «Нош мыным кулэ вал каньыл сюлмын улыны но Иеговалы оскиськыны». Тӥ но, та выллем учыре сюриды ке, Иеговалы оскиське. Со тӥледлы юрттоз но ваньзэ чиданы кужым сётоз.

13. Кин пыр но кызьы Иегова милемлы яратэмзэ возьматыны быгатэ?

¹³ Со милемлы сётӥз агайёсмес но сузэръёсмес. Иегова милемлы яратэмзэ возьматэ агайёс но сузэръёс пыр. Кылсярысь, со кинлэсь ке мылкыдзэ ӝутыны быгатэ кулэ дыръяз милемлы ӟеч кыл вераны. Азиысь сузэр тае ас вылаз шӧдӥз. Со ужзэ ыштӥз но секыт висьыны усиз. Собере солэн картэз бадӟым сьӧлык лэсьтӥз но тӧро луыса ужаны-тыршыны ӧз быгаты ни. Сузэр вера: «Мон уг валаськы вал, малы мон сыӵе югдуре сюри. Оло нош, мон мае ке шонертэм лэсьтӥ но, Иегова монэ бакель уг кары ни?» Сузэрмы туж куриз Иеговаез возьматыны солы, со сое яратэ шуыса. Кызьы Иегова ответ сётӥз? Сузэр вера: «Тӧроос монэ буйгатӥзы но оскытӥзы, Иегова монэ яратэ шуыса». Кӧня ке дыр ортчыса, со нош ик Иеговалэсь юрттэтсэ куриз. Сузэр вера:  «Со нуналэ ик мон кенешысь агайёслэсь но сузэръёслэсь гожтэт басьтӥ. Шуныт кылъёссэс лыдӟыкум, мон валай, Иегова монэ кылӥз шуыса». Та учыр возьматэ: ӵем дыръя Иегова милемлы яратэмзэ возьматэ мукетъёсызлэн ӟеч кылъёссы пыр (Пс. 9:38, 39).

14. Кызьы эшшо Иегова милемлы яратэмзэ возьматэ на?

¹⁴ Озьы ик Иегова милемлы яратэмзэ возьматэ, куке агайёслэсь яке сузэръёслэсь мылкыдзэс ӝутэ кулэ дыръяз милемлы визь-кенеш сётыны. Кылсярысь, нырысетӥ даурын святой духлэн валтэмез улсын апостол Павел агайёслы но сузэръёслы 14 гожтэт гожтӥз. Отын со шонерак, но со дыре ик лякытэн соослы визь-кенешъёс сётӥз. Малы Иегова Павеллэсь мылкыдзэ ӝутӥз со гожтэтъёсты гожтыны? Иегова — умой Атай. Со аслэсьтыз нылпиоссэ яратэ, соин ик соосты визьма-нодъя (Мад. 3:11, 12). Куке милемлы, Библия вылэ пыкиськыса, визь-кенеш сёто, милемлы но шумпотоно но ӝоже усёно ӧвӧл, малы ке шуоно со возьматэ, Иегова милемыз яратэ шуыса (Евр. 12:6). Мар эшшо возьматэ на, Иегова милемыз яратэ но аслыз ярамон адямиосын лыдъя шуыса?

МАР ЭШШО ВОЗЬМАТЭ НА, ИЕГОВА МИЛЕМЫЗ ЯРАТЭ ШУЫСА?

15. Кинлы Иегова святой духсэ сётэ но малы ми оскыны быгатӥськомы?

¹⁵ Аслыз ярамон адямиослы Иегова святой духсэ сётэ (Матф. 12:18). Та дух юрттэ милемлы умой сямъёсты будэтыны. Юалэ асьтэлэсь: «Кыӵе сямъёсы мынам вань ини?» Кылсярысь, ӵошатэ, кыӵе тӥ али но кыӵе тӥ вал, Библиез дышетыны кутскыкуды? Тӥ чидасьгес луиды-а? Тӥ тыршиды ке святой духлэн емышез пӧлы пырись сямъёсты возьматыны, тӥ оскыны быгатоды, Иегова тӥледыз яратэ шуыса. (Учке  «Кыӵе сямъёсты будэтыны юрттэ Инмарлэн святой духез?» рамкаез.)

16. Кинлы Иегова оскиз ӟеч иворез но кыӵе шӧдонъёсты тӥляд кылдо та пумысен? (1 Фессалоникаослы 2:4).

¹⁶ Аслыз ярамон адямиослы Иегова ӟеч иворез оскиз. (Лыдӟе 1 Фессалоникаослы 2:4.) Ойдолэ учкомы, кызьы тае валаз Джо́селин нимо сузэр. Одӥг ӵукна со воксё мылкыдтэк сайказ. Со вера: «Мон шӧдӥ, мынам чик но кужыме ӧвӧл, мон номыр карыны уг быгатӥськы шуыса. Но мон пионер луыса ужасько-тыршисько вал но тодытон уже мыныны вераськемын вал. Соин ик мон  вӧсяськи но дасяськыны кутски». Со ӵукна Джоселин пумитаз Мэри нимо кышномуртэз, кудӥз соглаш кариськиз Библиез дышетыны. Кӧня ке толэзь ортчыса, Мэри вераз, куке Джоселин со доры йыгаськиз, со Инмарлы юрттэт курыса вӧсяське вал шуыса. Со учырез тодаз вайыса, Джоселин вера: «Мон шӧдӥ кадь, кызьы Иегова мыным вера: „Тон ваньзэ шонер лэсьтӥд! Мон тонэ яратӥсько“». Тодытыкумы ми котьку но сыӵе умой адямиосты ум пумиталэ, вылды. Но ми вань сюлмысьтымы тодытӥмы ке, ми оскыны быгатомы, Иегова шумпотэ шуыса.

17. Мае валаз Виктория, дун тырон сярысь малпаськыкуз? (Псалтирь 5:13).

¹⁷ Иегова, дун тыронлы луыса, аслыз ярамон адямиослэсь сьӧлыкъёссэс простить каре (1 Тим. 2:5, 6). Но пылатӥськемды бере но тӥ малпаськоды, вылды, Иегова тӥледыз простить уз кары шуыса. Ойдолэ тодамы возёмы: ми асьмелы котьку ик оскыны ум быгатӥське, нош Иеговалы котьку оскыны луэ. Соосты, кинъёс дун тыронлы оско, Иегова шонерлыко адямиосын лыдъя но соосты бакель карыны кылзэ сётэ (лыдӟе Псалтирез 5:13; Рим. 3:26). Тани Викториялэн учырез. Одӥг пол, дун тырон сярысь малпаськыкуз, со валаз: «Иегова монэ туж кема чида ини. Нош мон солы верасько вал кадь: „Тон монэ туж ик уд яратӥськы. Пиедлэн курбонэз но монэ сьӧлыкъёсылэсь мозмытыны уз быгаты“». Виктория валаз: дун тырон — со Иеговалэн кузьымез, кудзэ со солы кузьмаз. Озьы со адӟиз, Иегова сое туж яратэ шуыса. Ми но, дун тырон сярысь малпаськимы ке, адӟомы, Иегова милемыз но туж яратэ но аслыз ярамон адямиосын лыдъя шуыса.

18. Малы ми оскыны быгатӥськомы, инмысь Атаймес яратӥськомы ке?

¹⁸ Та статьяысь визь-кенешъёсты уже кутыса но, куддыръя милям мылкыдмы куашканы быгатэ но осконмы лябӟыны быгатэ, Иегова милемыз яратэ шуыса. Соку тодады возе, Иегова яратэмдэс туж дунъя шуыса (Иак. 1:12). Соин ик азьланяз но Иеговаен кусыпъёстэс юнматэ но тырше адӟыны, кызьы со тӥледлы яратэмзэ возьматэ. Ноку эн вунэтэ, со «ваньмылы асьмелы матын улэ» шуыса (Ап. уж. 17:27).