1, 2. Кызьы воштӥське адямилэн улонэз пылатӥськемез бере?

 МАКЕМ ми шумпотӥськомы, куке пылатӥськиськомы но Иеговалэн семьяяз пыриськомы! Солэн эшез луыны — туж бадӟым дан. Ми соглаш Давид эксэен, кудӥз вераз, кызьы ассэ шӧдэ адями, кудзэ Иегова ас дораз ӧте: «Тынад быръем, матад карем адями шудо — со Тынад азбаръёсад улоз» (Пс. 64:5).

² Кинэ Иегова аслаз азбаръёсаз ӧте? Кызьы вераськиз кылем статьяын, Инмар матэ кариське соослы, кинъёс асьсэос солэн матаз карисько (Иак. 4:8). Иеговалы сӥзиськыса но пылатӥськыса, тӥляд соин кусыпъёсты юнгес луо. Тӥ оскыны быгатӥськоды, со тӥ вылэ трос бакель каронъёс кисьтоз шуыса (Иер. 17:7, 8; Мал. 3:10).

3. Кызьы улоно адямилы, кудӥз улонзэ Инмарлы сӥзе но пылатӥське? (Екклесиаст 5:3, 4).

³ Пылатӥськон — со кутсконэз гинэ. Пылатӥськеммы бере, номыр шоры учкытэк, милемлы сӥзиськыкумы сётэм кылмыя улоно но Инмарлы оскымон кылёно. (Лыдӟе Екклесиастэз 5:3, 4.) Иисуслэн дышетскисьёсыз луыса, милемлы тыршоно солэсь адӟем карыны но солэн курон-косонъёсызъя улыны (Матф. 28:19, 20; 1 Пётр 2:21). Ойдолэ та сярысь пыр-почгес вераськомы.

 НОМЫР ШОРЫ УЧКЫТЭК, ИИСУС СЬӦРЫ МЫНЭ

4. Кызьы валано, Иисуслэн дышетскисьёсыз «курадӟон юбозэс» нуо шуыса? (Лука 9:23, ВД).

⁴ Эн малпалэ, пылатӥськемды бере тӥ шуг-секытъёсын уд пумиське ни шуыса. Эн вунэтэ Иисуслэсь кылъёссэ. Со вераз, солэн дышетскисьёсыз «курадӟон юбозэс» басьтозы но со сьӧры мынозы шуыса (Лука 9:23, ВД). Возьматэ-а та, христианъёс котьку но курадӟыса улозы шуыса? Уг, уг возьматы. Иисуслэн верамез потэ вал, дышетскисьёсызлэн бакель каронъёссы но, шуг-секытъёссы но луозы шуыса. Куд-ог шуг-секытъёссы туж бадӟымесь луозы (2 Тим. 3:12).

5. Мар карыны кылзэ сётэ Иисус соослы, кинъёс со понна мае ке кельто?

⁵ Оло нош, тӥледлы семьяды пумитъяське ини. Яке тӥ мае ке кельтӥды, огшорыгес улон понна но тросгес дырдэс но кужымдэс Эксэйлыклэн ужезлы висъян понна (Матф. 6:33). Юн оске: Иегова адӟе ваньзэ, мае тӥ со понна лэсьтӥськоды (Евр. 6:10). Тӥ ас вылады шӧдӥды, дыр, ини, кызьы быдэсмо Иисуслэн кылъёсыз: «Кин Мон понна, Евангелие понна корказэ, я агай-вынъёссэ, я сузэр-апайёссэ, я атайзэ, я анайзэ, я кышнозэ, я нылпиоссэ, я музъемзэ кельтӥз ке, али, таӵе дыре, уллянъёс пӧлын улыса, сю пол тросгес коркаос, агай-вынъёс, сузэр-апайёс, атайёс, анайёс, нылпиос, музъем басьтытэк одӥгез но уз кыльы, вуоно даурын но быронтэм улон басьтытэк уз кыльы» (Марк 10:29, 30). Ӵошатоно ке соин, мае тӥ кельтӥськоды, Иегова тросгес бакель каре (Пс. 36:4).

6. Малы пылатӥськемды бере но тӥледлы «лулмугорлэн ортчыт кужмо кулэ каронъёсыныз» нюръяськоно?

⁶ Пылатӥськемды бере но тӥледлы «лулмугорлэн ортчыт кужмо кулэ каронъёсыныз» нюръяськоно (1 Иоанн 2:16). Тӥ сьӧлыктэмесь ӧд луэ ук. Куддыръя тӥляд апостол Павеллэн кадь ик шӧдонъёсты кылдыны быгато. Со шуиз: «Лулыным-сюлмыным мон Инмар законлы шумпотӥсько; нош мугор люкетъёсысьтым мукет законэз адӟисько, со визьмылэн законэзлы пумитъяське но монэ мугор люкетъёсам интыяськем сьӧлык законлэн киулаз кутыса возе» (Рим. 7:22, 23). Шонертэм мылпотонъёстэс адӟыса, тӥляд мылкыдды куашканы быгатэ. Но кидэс эн лэзе! Малпаське, мар карыны тӥ кылдэс сётӥды Иеговалы, солы сӥзиськыкуды. Та мылкыддэс юнматоз визь сынаськонъёслы сётскытэк улыны. Зэмзэ вераса, сӥзиськыкуды сётэм кылды тӥледлы юрттоз визь сынаськонъёсын нюръяськыны. Кызьы?

7. Кызьы сӥзиськыкуды сётэм кылды юрттэ Иеговалы оскымон кыльыны?

⁷ Улондэс Иеговалы сӥзьыса, тӥ асьтэлэсь асьтэос куштӥськиды. Тӥ палэнтӥды вань мылпотонъёстэс но пуктэм ужпумъёстэс, кудъёсыз Иеговаез ӝоже уськытыны быгатысалзы (Матф. 16:24). Тӥ ужпум пуктӥды Иеговалы оскымон луыны. Соин ик, шуг-секытэн пумиськыкуды, тӥ тододы, кызьы асьтэды возёно. Тӥляд юн мылкыдды луоз Инмарез шумпоттыны. Иов сямен, тӥ тыршоды, номыр шоры учкытэк, солы оскымон кыльыны (Иов 27:5).

8. Кызьы сӥзиськыкуды сётэм кылды юрттэ тӥледлы визь сынаськонъёслы сётскытэк улыны?

⁸ Тӥ тодады возиды ке, Иеговалэсь эриксэ нырысетӥ интые пуктыны кылдэс сётӥды шуыса, тӥледлы капчигес луоз визь сынаськонъёслы сётскытэк улыны. Кылсярысь, тӥ кузпалъяськем муртлы мултэс саклыктэс висъялоды-а? Уд! Малы ке шуоно тӥ Иеговалы кылдэс сётӥды ини сыӵе  ужъёслэсь палэнскыны. Тӥ умойтэм мылпотонъёстылы пуромыны ӧд лэзе ке, тӥ трос шуг-секытъёслэсь палэнскоды но сюлэмды куректыса уз улы. Тӥ туж шумпотоды, «сьӧлыклэсь кышкасьтэмъёслэн сюрес вылазы» ӧд султэ шуыса! (Мад. 4:14, 15).

9. Кызьы сӥзиськыкуды сётэм кылды юрттэ тӥледлы Иеговалы ужан-тыршонэз нырысетӥ интые пуктыны?

⁹ Нош мар тӥ кароды, тӥледлы ӵектӥзы ке уж, кудӥныз сэрен куд-ог пумиськонъёсты кельтылоно луоз? Иеговалы сӥзиськыкуды, тӥ ужпум кутӥды ини сыӵе ӵектонъёслы соглаш уд кариськылэ шуыса. Соин ик, куке тӥледлы сыӵе уж ӵектозы, тӥ уд малпаське ини. Кин ке но малпа, сыӵе ужлы соглаш кариськыса но, со Иеговаез нырысетӥ интые пуктыны быгатоз шуыса. Нош тӥ озьы уд малпаське. Эн вунэтэ Иисус сярысь. Солэн юн мылкыдыз вал котьку но Атайзэ шумпоттыны. Солэсь адӟем карыса, тӥ но быгатоды соку ик палэнтыны ваньзэ, мар Инмарез ӝоже уськытыны быгатэ (Матф. 4:10; Иоанн 8:29).

10. Кызьы Иегова тӥледлы юрттоз Иисус сьӧры мыныны пылатӥськемды бере?

¹⁰ Шуг-секытъёс но визь сынаськонъёс дыръя тӥ возьматыны быгатӥськоды, Иисус сьӧры мыныны юн мылкыдды вань шуыса. Юн оске: Иегова тӥледлы юрттоз. Библиын гожтэмын: «Оскиськымон Инмар. Со тӥледлы чиданы луонтэм визь сынаськон уз лэзьы. Чиданы-сылыны мед быгатоды шуыса, Со тӥледлы визь сынаськонэн ӵош утиськон но сётоз» (1 Кор. 10:13).

МАР ЮРТТОЗ ИИСУС СЬӦРЫ МЫНЫНЫ

11. Кыӵе одӥгез тужгес но умой амал, кудӥз юрттэ Иисус сьӧры мыныны? (Озьы ик учке суредэз.)

¹¹ Иисус вань сюлмысьтыз Иеговалы ужаз-тыршиз но ялан солы вӧсяськиз (Лука  6:12). Мар юрттоз тӥледлы Иисус сьӧры мыныны пылатӥськемды бере? Одӥгез тужгес но умой амал — азьланяз но лэсьтыны ужъёсты, кудъёсыз юрттозы тӥледлы Иеговалы матэгес кариськыны. Библиын гожтэмын: «Ма кемозь асьмеос вуимы-будӥмы ни, озьы ик малпаськыны но со куронъёсъя ик улыны но кулэ» (Флп. 3:16). Куддыръя тӥ кылоды вын-агайёс но сузэр-апайёс сярысь, кудъёсыз ужпум кутӥзы тросгес ужаны-тыршыны. Оло нош, кин ке но Эксэйлыкез тодытӥсьёслы школаез йылпумъяз яке кошкиз отчы, кытын ивортӥсьёс уг тырмо. Тӥ но сыӵе ик ужпумъёсты пуктыны быгатӥськоды ке, со туж умой! Иеговалэн калыкез котьку тырше Инмар понна тросгес лэсьтыны (Ап. уж. 16:9). Нош мар кароно, тӥ али сыӵе ужпумъёсты пуктыны уд ке быгатӥське? Эн малпалэ, тӥ мукетъёсызлэсь уродгес шуыса. Валтӥсез — тӥ христиан сюрес вылысь уд кожиське (Матф. 10:22). Куке тӥ тыршиськоды лэсьтыны ваньзэ, мае быгатӥськоды, Иегова туж шумпотэ. Та юрттоз тӥледлы пылатӥськемды бере но Иисус сьӧры мыныны (Пс. 25:1).

12, 13. Мар кароно, Иеговалы ужан-тыршон азьвыл мында шумпотон уг вайы ни ке? (1 Коринфъёслы 9:16, 17). (Озьы ик учке  «Сюрес вылысь эн коже» рамкаез.)

¹² Нош мар кароно, тӥ шӧдӥськоды ке, вань сюлмысьтыды уд вӧсяськиське яке ужан-тыршон но Библиез лыдӟон азьвыл мында шумпотон уг вайы ини шуыса? Та уг возьматы, Иегова тӥледлы святой духсэ уг сёты ни шуыса. Ми тырбыдэстэм адямиос бере, шӧдонъёсмы вошъяськыны быгато. Мылкыдды куашка ке, малпаське апостол Павел сярысь. Со туж тыршиз Иисуслэсь адӟем карыны, озьы ке но со тодӥз, Инмарлы ужамез-тыршемез котьку ик  уз поты шуыса. (Лыдӟе 1 Коринфъёслы 9:16, 17.) Со шуиз: «Кин ке косэмъя лэсьтӥсько ке, соку мон оскем ужез быдэсъясь гинэ луисько». Мукет сямен вераса, Павел дась вал кылзӥськыны соку но, куке солэн мылыз уг поты вал.

¹³ Павел сямен, тӥ но шӧдонъёсты вылэ пыкиськыса гинэ ужпумъёс эн кутэ. Мылды уг поты ке но, тырше лэсьтыны сое, мар шонер луэ. Дыр ортчыса, шонер ужъёс лэсьтыны мылкыдды но луоз. Нош али тырше ас поннады Библиез эскерыны, вӧсяськыны, пумиськонъёсы ветлыны но тодытыны. Та тӥледлы юрттоз пылатӥськемды бере но Иисус сьӧры мыныны. Со сяна, тыршемды вын-агайёстэс но сузэр-апайёстэс юнматоз (1 Фес. 5:11).

«АСЬТЭДЫЗ АСЬТЭОС ЧАКЛАЛЭ-ЭСКЕРЕ»

14. Кызьы астэ чаклано-эскероно но малы? (2 Коринфъёслы 13:5).

¹⁴ Пылатӥськемды бере асьтэды ялан эскере. (Лыдӟе 2 Коринфъёслы 13:5.) Дырын-дырын малпаське: «Вӧсяськисько-а мон котькуд нунал? Тыршисько-а мон Библиез лыдӟыны но эскерыны, пумиськонъёсы ветлыны но тодытыны? Та ужъёс мыным шумпотон но пайда ваё-а?» Уг ке, тырше мае ке воштыны. Кылсярысь, юалэ асьтэлэсь: «Быгатӥсько-а мон Библилэсь валтӥсь дышетонъёссэ валэктыны? Мар мон карыны быгатӥсько, ужан-тыршон тросгес шумпотон мед ваёз шуыса? Вӧсяськисько-а мон Иеговалы вань сюлмысьтым? Возьмато-а вӧсяськонъёсы, мон Иегова вылэ быдэсак оскиськисько шуыса? Уг кельтылӥськы-а мон пумиськонъёсты? Мар мыным юрттоз пумиськонъёсын эшшо но сак кылзыны но эскеронъёсы пыриськыны?»

15, 16. Малы тӥ дышетскиськоды агайлэсь, кудӥз визь сынаськонэн пумиськиз?

¹⁵ Озьы ик ляб интыосмес тодыны кулэ. Ро́берт агай тае ас вылаз шӧдӥз. Со тодаз вае: «Куке мыным ог 20 арес вал, уж бере монэн ӵош ужась кышномурт монэ ас дораз ӧтиз. Со вераз, ми ӵош гинэ луомы но „дырмес туж умой ортчытомы“ шуыса. Нырысь мон кыӵе ке мугъёс утчай, малы со доры уг мыны, нош собере шонерак верай зэмос мугзэ». Робертэз ушъяны луэ, малы ке шуоно со визь сынаськонлы ӧз сётскы! Но берлогес, ортчемез шоры учкыса, со валаз, со югдурын ассэ мукет сяменгес возьыны быгатэ вал шуыса. «Куке Иосифез Потифарлэн кышноез ёртэ вал, Иосиф солэсь ӵектонзэ соку ик палэнтӥз,  нош мон ӧй [Ул. выл. 39:7—9]. Зэмзэ вераса, мон туж пайми, макем секыт мыным вал со кышномуртлэсь ӵектонзэ палэнтыны. Со учыр бере мон валай, Иеговаен кусыпъёсме юнматоно шуыса».

¹⁶ Роберт сямен, тӥ но быгатӥськоды асьтэды эскерыны. Тӥ визь сынаськонлы ӧд сётске ке но, юалэ асьтэлэсь: «Кӧня мыным дыр кулэ луиз, визь сынаськонэз палэнтон понна?» Тӥледлы туж ик уг кельшы ке, кызьы тӥ асьтэды возиды, мылкыдды медаз куашка. Шумпотэ, табере тӥ ляб интыдэс тодӥськоды шуыса. Со сярысь Иеговалы вӧсяське но мылкыддэс юнматэ Инмарлэсь кылзӥськыса улыны (Пс. 138:23, 24).

17. Кызьы Роберт Иеговалэсь ӟеч нимзэ утиз?

¹⁷ Робертлэн учырез милемыз эшшо малы ке дышетыны быгатэ. Роберт азьланьтэ: «Куке мон со кышномуртлэсь ӵектонзэ палэнтӥ, со мыным шуиз: „Тон эскеронэз ортчид!“ Мон солэсь юай, мар сярысь со вера. Со валэктӥз, солэн тодмоез, кудӥз азьвыл Адӟись-Ивортӥсь вал, вераз солы, вань егит Адӟись-Ивортӥсьёс лушкемен шонертэм ужъёсын выро шуыса. Соин ик соос монэ но эскерыны малпазы. Мон туж шумпотӥсько, Иеговалэсь нимзэ ӧй сапта шуыса!»

18. Мар карыны тӥляд мылкыдды вань пылатӥськемды бере но? (Озьы ик учке  «Статьяос, кудъёсыз тӥледлы кельшозы» рамкаез.)

¹⁸ Улондэс Иеговалы сӥзьыса но пылатӥськыса, тӥ возьматӥськоды, котьку, номыр шоры учкытэк, солэсь нимзэ данъямды потэ шуыса. Юн оске: Иегова тодэ, кыӵе шуг-секытъёсын но визь сынаськонъёсын тӥ пумиськылӥськоды. Иегова солы оскымон кыльыны тыршемдэс бакель кароз. Тӥляд ваньмыз пӧрмоз, малы ке шуоно Инмар тӥледлы святой духсэ сётоз (Лука 11:11—13). Иеговалэн юрттэменыз, тӥ быгатоды пылатӥськемды бере но Иисус сьӧры мыныны.