1, 2. Валэктэ, малы выль югдуръёс сэрен Библиысь тодмо возетъёс шоры мукет сямен учкыны кутскиськомы.

 ТАНИ кема возьмам нунал. Кузпалъяськисьёс сак кылзо агаез, кудӥз сюанзы дыръя речь вера. Та агай номыр выльзэ уг вера ке но, кузпалъяськисьёс та нуналэ солэн малпанъёсыз шоры мукет сямен учко. Малы? Табере соос карт но кышно луо. Та малпанъёсты улоназы пыртыса гинэ, соос шудоесь луозы.

² Озьы ик луэ, куке кузпалъёс пинал возьмало. Соос трос пол кылӥзы ини речьёсты, кудъёсаз пиналъёсты будэтон сярысь Библиысь возетъёс эскериськизы. Но табере соос асьсэос анай-атай луозы. Соин ик та возетъёс шоры соос мукет сямен учко. Анай-атай луыны — со туж бадӟым дан! Куке югдуръёс воштӥсько, Библиысь тодмо кылбуръёс эшшо но дуногес пото. Соин ик Иеговалэн котькуд ужась-тыршисезлы Священной Гожтэмез лыдӟоно но со вылын «вань улоно нуналъёсыз ӵоже» малпаськоно (К. Зак. 17:19).

3. Мае ми эскеромы та статьяын?

³ Анай-атайёс, пиналъёстэс Иеговаен тодматыны — со туж бадӟым дан! Соослы Инмар сярысь тодон-валан сётэм сяна, туж кулэ юрттыны соослы Иеговаез яратыны.  Мар тӥледлы юрттоз? Ойдолэ эскеромы Библиысь ньыль возетъёсты, кудъёсыз тросэзлы анай-атайёслы пайда вайизы (2 Тим. 3:16).

4. Кыӵе возет анай-атайёслы пиналъёссэс дышетыны юрттоз Иеговаез яратыны? (Иаков 1:5).

⁴ 1-тӥ возет. Иеговалэсь кивалтэтсэ утчалэ. Куре Иеговалэсь визьлыксэ, кудӥз пиналъёстэс дышетыны юрттоз Иеговаез яратыны. (Лыдӟе Иаковлэсь 1:5.) Иегова гинэ самой умой визь-кенеш сётыны быгатэ. Солы трос мугъёс вань. Ойдолэ учкомы кыксэ гинэ. Нырысетӥез, Иегова — самой умой Атай (Пс. 35:10). Кыкетӥез, солэн визь-кенешъёсыз котьку но милемлы пайда ваё (Ис. 48:17).

5. а) Кызьы Иеговалэн организациез анай-атайёслы юрттэ? б) Мае тӥ тодӥды со сярысь, кызьы Аморим кузпалъёс пиналъёссэс будэтӥзы? (Учке сноскаез.)

⁵ Иеговалэн потэ, пиналъёсмы сое мед яратозы шуыса. Аслаз Кылыз но организациез пыр со милемлы юрттэт сётэ (Матф. 24:45). Анай-атайёс пайдаё визь-кенешъёс шедьтыны быгато «Семьялы юрттэт» рубрикаысь. Азьвыл со печатласькиз «Сайкалэ!» журналын, нош али сое шедьтыны луэ jw.org сайтысь. Отысь адӟыны луэ видеороликъёсты, кудъёсыз возьмато, кызьы уже кутоно Иеговалэсь визь-кенешъёссэ, пиналъёсты будэтыку b (Мад. 2:4—6).

6. Мар верало одӥг кузпалъёс юрттэт сярысь, кудзэ Иеговалэн организациез сётэ?

⁶ Тросэз атайёс но анайёс Иеговаез тау каро, со соослы организациез пыр юрттэ шуыса. Джо нимо агай вера: «Милям куинь пиналъёсмы. Соосты зэмлыкын будэтыны капчи ӧвӧл. Соин ик ми кышноеным ялан вӧсяськиськомы. Но тодӥськоды-а, ӵем дыръя луэ озьы: куке милям кыӵе ке шуг-секытмы кылдэ, соку ик кыӵе ке тупась статья яке видеоролик потэ. Иегова котьку но милемлы дырыз дыръя юрттэ». Джо но солэн кышноез адӟо, кызьы соослы но пиналъёссылы  ваньмыз та Иеговаен матысь кусыпъёс возьыны юрттэ.

7. Малы анай-атайёс пиналъёссылы умой адӟем карон возьматыны кулэ? (Римъёслы 2:21).

⁷ 2-тӥ возет. Пиналъёстылы адӟем карон возьматэ. Пиналъёс анай-атайёссылэсь адӟем каро. Атайёс но, анайёс но тырбыдэстэмесь (Рим. 3:23). Озьы ке но соос асьсэды адӟем карымон возьыны кулэ. (Лыдӟе Римъёслы 2:21.) Тани мар вераз та пумысен одӥг атай: «Пиналъёс губка кадесь. Соослы ваньмыз пыӵа. Мынам кылъёсы ужъёсыным уг тупало ке, соос одно ик та сярысь вералозы». Озьыен, тӥляд потэ ке, пиналъёсты Иеговаез мед яратозы шуыса, тӥледлы но сое юн яратыны кулэ.

8, 9. Малы дышето тӥледыз Эндрюлэн но Эммалэн веранъёссы?

⁸ Анай-атайёс пӧртэм сямен пиналъёссэс дышетыны быгато Иеговаез яратыны. Тани мар вера 17 аресъем Эндрю пияш: «Атае но анае мыным ялан тодам вайылӥзы, Иеговаен вераськыны кулэ шуыса. Котькуд ӝыт атае монэн ӵош вӧсяськиз, мон вӧсяськи вал ке но ини. Атае но анае милемлы сузэреным вераллязы: „Тӥ быгатӥськоды вӧсяськыны сомында, кӧня тӥляд потэ“. Соин ик вӧсяськыны мон дышемын. Мон Иеговаен яратӥсь Атаеным кадь вераськисько». Анай-атайёс, эн вунэтэ: тӥ Иеговаез яратӥськоды ке, та юрттоз пиналъёстылы но сое яратыны.

⁹ Нош тани Эммалэн учырез. Пичи дыръяз соосты атайзы кельтӥз но, анайзы пунэмен басьтэм коньдонзэс огназ тыроно луиз. Эмма вера: «Ӵем дыръя ми коньдонмес мырдэм тырмытӥськомы вал. Нош анае ялан вералляз, Иегова ужась-тыршисьёссэ уг кельты шуыса. Солэн кылъёсысьтыз но ужъёсысьтыз адӟиськиз, со талы оске шуыса. Ми адӟимы: анаймы зэмлыкъя улэ вал». Эммалэн учырез возьматэ, секыт югдуръёсы но анай-атайёс пиналъёссылы умой адӟем карон возьматыны быгато шуыса (Гал. 6:9).

10. Ку Израильысь анай-атайёс пиналъёсынызы вераськылӥзы? (Кыкетӥ Закон 6:6, 7).

¹⁰ 3-тӥ возет. Ялан вераське пиналъёсыныды. Та сярысь Иегова вераз законын, кудзэ со израиль калыклы сётӥз. (Лыдӟе Кыкетӥ Законэз 6:6, 7.) Со дыре улон мукет вал. Анай-атайёс нылпиосынызы тросгес дырзэс ортчытъязы. Кылсярысь, пияшъёс атайёсынызы бусыын ужазы, нош нылашъёс анайёсынызы корка котырын выризы. Зэм но, ужакузы соос трос вераськылӥзы. Со анай-атайёслы пиналъёссэс дышетыны юрттӥз Иеговаез яратыны. Кылсярысь, соос вераллязы, кызьы Иегова ӟеч сямзэ возьматэ но семьязы сярысь сюлмаське.

11. Ку христиан луись анай-атайёс пиналъёсынызы вераськыны быгато?

¹¹ Но али улон чылкак воштӥськиз. Тросаз шаеръёсын анай-атайёс ужаны ветло, нош нылпиоссы дышетско. Соин ик анай-атайёс пиналъёссэс лумбыт уг адӟо. Атайлы но, анайлы но дыр шедьтыны кулэ, пиналъёсынызы вераськон понна (Еф. 5:15, 16; Флп. 1:10). Соослы юрттыны быгатэ семьяен йыбырттон. Тани мар вераз Алекс нимо егит агаймы: «Атаелэн трос ужъёсыз вал ке но, со котькуд арняе семьяен йыбырттонмес ортчытъяз. Нош эскерон ортчытэммы бере  ми семьяеным котьмар сярысь вераськыны быгатӥмы».

12. Мар сярысь тодазы возёно атайёслы, семьяен йыбырттонзэс ортчытыкузы?

¹² Мар кароно атайёслы, семьяен йыбырттонзы пиналъёссылы тунсыко мед потоз шуыса? Милям вань «Пумтэм вапумъёс ӵоже шумпотыса улэ!» книгамы. Тырше сое быдэс семьяеныды эскерыны, малы ке шуоно та книга юрттоз пиналъёсыныды вераськыны. Анай-атайёслэн потэ, пиналъёссы шӧдонъёссы но сюлмаськонъёссы сярысь мед вералозы шуыса. Соин ик, семьяен йыбырттонды дыръя пиналды Библилы пумит мае ке вера ке, эн тышкаське сое. Со интые, шумпотэ, малы ке шуоно со аслэсьтыз сюлэмзэ усьтэ. Семьяен йыбырттонды дыръя пиналъёсты асьсэлэсь малпанъёссэс вераны медаз кышкалэ. Соку гинэ тӥ быгатоды пиналъёстылы юрттыны.

13. Кызьы эшшо анай-атайёс пиналъёссылы юрттыны быгато Иеговаен эшъяськыны?

¹³ Анай-атайёс, котькуд тупась учыре пиналъёстылы юрттыны тырше Иеговаен эшъяськыны. Библиез дышетыкуды гинэ, соослы Инмар сярысь верано ӧвӧл. Лиза, кудӥзлэн нылыз но кык пиосыз вань, вера: «Пиналъёсмы Иеговаез умойгес мед тодозы шуыса, ми картэным соослэсь саклыксэс висъяськомы вал кылдытэмъёслы. Кылсярысь, соос ӵем дыръя серекъяло вал пунымылэн выросъёсыз вылын. Та учыре ми котьку но соосты дышетыны тыршимы: Кылдытӥсьмы но серекъяны яратэ, озьы ик со улонэз но яратэ».

14. Малы анай-атайёс пиналъёссылы юрттыны кулэ умой эшъёс бырйыны? (Мадёнъёс 13:21).

¹⁴ 4-тӥ возет. Юрттэ пиналъёстылы умой эшъёс шедьтыны. Инмарлэн Кылаз верамын, эшъёсмы умой пала яке урод пала кыскыны быгато шуыса. (Лыдӟе Мадёнъёсты 13:21.) Анай-атайёс, тодӥськоды-а тӥ, кинэн пиналъёсты эшъясько? Тӥ соослэн эшъёсынызы дырдэс ортчытъяды-а? Кызьы тӥ пиналъёстылы юрттыны быгатӥськоды  эшъяськыны соосын, кинъёс Иеговаез ярато? (1 Кор. 15:33). Кылсярысь, семьяеныды ӵош сыӵе вын-агайёсын но сузэр-апайёсын дырдэс ортчытъялэ (Пс. 118:63).

15. Кызьы анай-атайёс пиналъёссылы юрттыны быгато умой эшъёс шедьтыны?

¹⁵ Энтони агайлэн но солэн кышноезлэн куинь нылъёссы но кык пиоссы вань. Соос пиналъёссылы юрттыны быгатӥзы умой эшъёс шедьтыны. Энтони вера: «Арлыдоос но, егитъёс но Иеговаез ярато но солы шумпотыса ужало-тыршо. Пиналъёсмы будыку, ми кышноеным ялан дорамы ӧтьылӥмы вын-агайёсты но сузэр-апайёсты сиськыны но, семьяен йыбырттонамы но. Та туж умой амал умой эшъёс шедьтыны! Озьы ик ми ас дорамы ӧтьылӥмы ёросэз чакласьёсты, миссионеръёсты но мукет вын-агайёсты но сузэр-апайёсты. Соосын вераськон пиналъёсмылы трос пайда вайиз. Вын-агайёслэн но сузэр-апайёслэн ӟырдыт мылкыдын ужамзы-тыршемзы юрттӥз пиналъёсмылы Иеговаез яратыны». Анай-атайёс, юрттэ пиналъёстылы умой эшъёс шедьтыны.

16. Мар сярысь анай-атайёслы тодазы возёно, пиналзылэн Иеговалы ужамез-тыршемез уг поты ке?

¹⁶ Мар кароно, тӥ лэсьтӥды ке ваньзэ, мае быгатӥды, нош пиналдылэн Иеговалы ужамез-тыршемез ӧз поты? Та уг возьматы, тӥ урод анай-атайёс луиськоды шуыса. Иегова котькуд адямилы бырйыны эрик сётӥз, озьы ик тӥляд пиналдылы но. Соин ик котькуд адями ачиз быръе, Инмарлы йыбыртъяно-а, ӧвӧл-а. Тӥляд пиналды Иеговалы ужамысь-тыршемысь дугдӥз ке, юн оске, со куке но берытскоз шуыса. Тодады вае Иисуслэсь йыромем пи сярысь мадёнзэ (Лука 15:11—19, 22—24). Та мадёнысь пиосмурт шонерлыко сюрес вылысь кожиз ке но, берло со валатскиз но атаез доры берытскиз. Кин ке но малпаны быгатоз: «Та чебер выжыкыл гинэ. Улонын воксё мукет  сямен луэ». Но со озьы ӧвӧл. Тае возьматэ Эли́ нимо егит пиосмуртлэн учырез.

17. Мае возьматэ Эли агайлэн учырез?

¹⁷ Тани мар вера Эли: «Мынам анае но атае Иеговалэн Адӟись-Ивортӥсьёсыз. Соос туж тыршизы дышетыны монэ Иеговаез но Библиез яратыны. Нош куке мыным ог 15 арес вал, мон пумитъяськыны кутски». Эли лушкемен урод ужъёсын вырыны кутскиз. Анаез но атаез солы юрттыны тыршизы ке но, солэн соосты кылзэмез но ӧз поты. Эли дорысьтыз кошкиз но урод ужъёс пӧлы выйиз. Озьы ке но куддыръя одӥг эшезлы со ӟеч иворез вералляз. Эли азьланьтэ: «Эшелы Иегова сярысь веракум, мон ачим но Инмар сярысь тросгес малпаськыны кутски. Каллен-каллен зэмлык кидысъёс, кудъёссэ мыным куке но анае но атае кизизы, будыны кутскизы». Дыр ортчыса, Эли кенеше берытскиз c. Пуктэ син азяды, кыӵе шумпотӥзы солэн анаез но атаез, кудъёсыз сое пичи дырысеныз ик Иеговаез яратыны дышетӥзы! (2 Тим. 3:14, 15).

18. Мар тӥ верасалды анай-атайёслы, кудъёсыз пиналъёссэс Иеговаез яратыны дышето?

¹⁸ Анай-атайёс, тӥледлы туж бадӟым дан сётэмын будэтыны Иеговалэсь вуоно ужась-тыршисьёссэ! (Пс. 77:4—6). Та капчи уж ӧвӧл. Тӥледыз ушъяммы потэ, та ужез тӥ туж тыршыса быдэсъяськоды шуыса. Азьланяз но пиналъёстэс «Кузё-Инмарлэн дышетонэз, валэктон-визьманъёсыз вылэ пыкиськыса... будэтэ» (Еф. 6:4). Озьы тӥ яратӥсь инмысь Атаймылэсь сюлэмзэ шумпоттоды!