1. Малы ваньмылы милемлы визьлык кулэ? (Мадёнъёс 4:7).

 ДЫРЫН-ДЫРЫН ваньмылы милемлы ужпумъёс кутоно луэ. Сыӵе дыре милемлы визьлык кулэ. Соин ик со сярысь ми Иеговалэсь куриськомы (Иак. 1:5). Соломон гожтӥз: «Визьлык... ваньмызлэсь бадӟымез». (Лыдӟе Мадёнъёсты 4:7.) Татын Соломон ӧз вера адямиослэн визьлыксы сярысь, нош вераз визьлык сярысь, кудзэ сётэ Иегова (Мад. 2:6). Быгатэ-а Инмарлэн визьлыкез туннэ но пайда вайыны? Одно ик быгатэ. Та статьяысь ми сое тодомы.

2. Мар юрттоз визьлыко луыны?

² Вашкала дыръя улӥзы кык пиосмуртъёс, кудъёсыз туж визьлыкоесь вал. Соос сярысь тросгес тодыса, милям но визьлыкмы тросгес луоз. Нырысетӥез — со Соломон эксэй. Библиын верамын, «Инмар Соломонлы визьлык, туж бадӟым нодлык, трос тодон-валан сётӥз» шуыса (3 Экс. 4:29). Кыкетӥез — Иисус Христос. Со котькинлэсь визьлыко вал (Матф. 12:42). Иисус сярысь азьпалзэ ивортыса, тазьы верамын вал: «Со вылын  Кузё-Инмарлэн Духез улоз, бадӟым визьлыклэн но валанлэн духсы» (Ис. 11:2).

3. Мае ми эскеромы та статьяын?

³ Инмар Соломонлы но Иисуслы сётӥз визьлык, кудӥз юрттӥз соослы пайдаё визь-кенешъёс сётъяны. Та статьяын ми эскеромы соос пӧлысь куиньзэ: кызьы учконо коньдон, уж но ачид шоры.

4. Маин пӧртэм вал Соломонлэн но Иисуслэн югдуръёссы?

⁴ Соломон туж узыр вал (3 Экс. 10:7, 14, 15). Нош Иисуслэн ваньбурез но трос ӧй вал, улон интыез но ӧй вал (Матф. 8:20). Озьы ке но соос ваньбур шоры шонер учкизы, малы ке шуоно Иегова Инмар кыксылы ик визьлык сётӥз.

5. Кызьы Соломон учкиз коньдон шоры?

⁵ Соломон вераз, коньдон уте шуыса (Екк. 7:12). Зэм но, коньдонмы вань ке, милям ваньзэ кулэзэ басьтэммы луэ, озьы ик асьмеды шумпотэммы но луэ. Соломон узыр вал ке но, со валаз, коньдон валтӥсез уг луы шуыса. Кылсярысь, со гожтӥз: «Сӥё-сано ним бадӟым узырлыклэсь вылынгес» (Мад. 22:1). Соломонлэн верамезъя, адямиослы, кудъёсыз коньдонэз ярато, ӵем дыръя коньдонзы шумпотон уг вайы (Екк. 5:9, 11). Со сяна, со вераз, коньдонлы оскиськоно ӧвӧл шуыса, малы ке шуоно со шӧдтэк шорысь бырыны быгатэ (Мад. 23:4, 5).

6. Кызьы Иисус учкиз коньдон шоры? (Матфей 6:31—33).

⁶ Иисус но ваньбур шоры шонер учкиз. Кылсярысь, умой сиён-юон солы шумпотон вайиз (Лука 19:2, 6, 7). Огпол со вуэз ӟеч виналы пӧрмытӥз (Иоанн 2:10, 11). Нош кулон нуналаз Иисус вылын дуно дӥськут вал (Иоанн 19:23, 24). Со дыре ик Иисус коньдон сярысь гинэ малпаса ӧз улы. Со дышетскисьёсызлы  вераз: «Нокинлэн но кык кузёлы служить каремез уг луы... Уд быгатӥське Инмарлы но, маммоналы но [«узырлыклы-байлыклы», сноска] огдыре служить карыны» (Матф. 6:24). Иисус валэктӥз, Инмарлэн Эксэйлыкез улонамы валтӥсь инты басьтыны кулэ шуыса. Соку Иегова милемлы ваньзэ кулэзэ сётоз. (Лыдӟе Матфейлэсь 6:31—33.)

7. Кыӵе пайда вайиз Дэниеллы коньдон шоры шонер учкемез?

⁷ Библиысь возетъёс дышето коньдон шоры шонер учкыны. Соос трос вын-агайёслы но сузэр-апайёслы юрттӥзы ини. Кылсярысь, тани мар вера Дэниел агай, кудӥз кышнояськемын ӧвӧл на: «Школаын дышетскыкум ик, мон малпай, ужан-тыршон улонам валтӥсь инты басьтоз шуыса». Дэниел огшоры улӥз, соин ик Иегова понна трос лэсьтыны быгатӥз, озьы ик Вефильын но ужаз-тыршиз. Со вера: «Мон чик но уг жаляськы, таӵе сюрес бырйи шуыса. Коньдон улонам валтӥсез луысал ке, мон узыр адями луысал. Но Иеговалы ужаса-тыршыса, мынам трос эшъёсы вань. Мон шудо луи. Нокыӵе коньдон милемыз шудо уг кары. Иеговаен гинэ ми шудо луиськомы». Озьыен, Иеговалы ужан-тыршон улонамы нырысетӥ интыын луыны кулэ.

8. Мар возьматэ, Соломон уж шоры шонер учкиз шуыса? (Екклесиаст 5:17, 18).

⁸ Соломон эксэй вераз, уж шумпотон вае шуыса. Солэн верамезъя, со «Инмарлэн сётэм кузьымез-медэз луэ». (Лыдӟе Екклесиастэз 5:17, 18.) Со гожтӥз: «Котькудӥз но уж табыш сётэ» (Мад. 14:23). Соломон тае ас вылаз шӧдӥз. Со трос ужаз: виноград садъёс мерттылӥз, коркаос но городъёс пуктылӥз (3 Экс. 9:19; Екк. 2:4—6). Та ужъёс секытэсь вал ке но, Соломонлы соос шумпотон вайизы. Но со валаз: зэмзэ ик шудо луон понна, Иеговалы ужано-тыршоно. Кылсярысь, сизьым ар ӵоже Соломон Иерусалимын храм пуктӥз (3 Экс. 6:38; 9:1). Соломон трос пӧртэм ужъёс лэсьтӥз ке но, со валаз: адями понна валтӥсез — Иеговалы ужаны-тыршыны. Со гожтӥз: «Инмарлэсь кышка но Солэн курон-косонъёсызъя ул,— та бордын адямилэн вань улонэз возиське» (Екк. 12:13).

9. Малы вераны луоз, Иисуслэн улоназ уж валтӥсез ӧй вал шуыса?

⁹ Иисус но туж ужась вал. Пичи дырысеныз ик со тӥрен ужаны дышетскиз (Марк 6:3). Со бадӟым семьяын будӥз бере, анаез но атаез шумпотӥзы, дыр, пизы семьязэс сюдыны-вордыны юрттэ шуыса. Иисус тырбыдэс вал. Соин ик адямиослы ужам ужез туж кельшиз. Солы аслыз но ужез трос шумпотон вайиз. Иисус усто ужась вал ке но, со Иеговалы ужан-тыршонлы но дырзэ висъяз (Иоанн 7:15). Берлогес Иисус вань дырзэ тодытон ужлы сӥзиз. Соку со адямиослы шуиз: «Сисьмыса быроно сиён сярысь эн сюлмаське, быронтэм улонлэн сиёнэз сярысь сюлмаське, кудзэ тӥледлы Адями Пи сётоз» (Иоанн 6:27). Гурезь йылын тодытыкуз но, Иисус вераз: «Асьтэлы ваньбур Инме люкалэ» (Матф. 6:20).

10. Мар каро куд-огъёсыз, уж дорысьтызы кузёоссы Иеговалэн Адӟись-Ивортӥсьёсыз сярысь умой мед малпалозы шуыса?

 ¹⁰ Иеговалэн визьлыкез уж шоры шонер учкыны юрттэ. Христианъёс луиськомы бере, ми пӧяськытэк ужаськомы (Еф. 4:28). Уж дорысьтымы кузёосмы адӟо, макем ми тыршыса ужаськомы. Куд-ог агайёс но сузэръёс, кузёоссы Иеговалэн Адӟись-Ивортӥсьёсыз сярысь умой мед малпалозы шуыса, берозь ужало. Соку семьязылы но кенешсылы соослэн дырзы ӧжыт кыле. Соин ик вунэтоно ӧвӧл, Иеговалы ужан-тыршон нырысетӥ интыын луыны кулэ шуыса.

11. Малы дышетскиз Уильям агай?

¹¹ Ужын зарни шорзэ шедьтоно. Талы дышетскиз Уильям нимо егит агай но. Солы умой адӟем карон возьматӥз одӥг тӧро, кудӥз азьло солэн кузёез вал. Уильям со сярысь вера: «Со туж тыршись ужась. Со ужзэ умой быдэсъя бере, адямиослы ужам ужез кельше. Но со быгатэ вал дырыз дыръя уж дорысьтыз кошкыны но дырзэ семьяезлы но Иеговалы висъяны. Со туж шудо адями!» b

12. Кытысь адӟиське, нырысь Соломон ачиз шоры шонер учкиз, нош собере учконэз воштӥськиз шуыса?

¹² Куке Соломон Иеговалы оскымон ужаз-тыршиз, со ачиз шоры шонер учкиз. Кивалтыны кутскыкуз, со зӥбыт-востэм вал но Иеговалэсь юрттэт куриз (3 Экс. 3:7—9). Соломон валаз, вылтӥяськыса улоно ӧвӧл шуыса. Со гожтӥз: «Кулонлэн-быронлэн азьпалтӥз вылтӥяськон ветлэ, усёнлэн-погранлэн мугез — возьытэз тодытэк улон» (Мад. 16:18). Жаляса верано луэ, берлогес Соломон вылтӥяськыса но Инмарлэсь кылзӥськытэк улыны кутскиз.  Кылсярысь, Законын верамын вал: «Эксэйлэн укыр трос кышноосыз луыны кулэ ӧвӧл,— сюлмыз соин медаз сӧриськы» (К. Зак. 17:17). Но Соломон талэсь ӧз кылзӥськы. «Солэн сизьым сю кышноез, куинь сю ляльчи кышноосыз вал» (3 Экс. 11:1—3). Со малпаз, дыр, татын номыр уродэз ӧвӧл шуыса. Но берлогес со ас вылаз шӧдӥз, кытчы вуттӥз солэн кылзӥськымтэез (3 Экс. 11:9—13).

13. Кыӵе пайда ваёз Иисуслэн зӥбыт-востэм луэмез сярысь малпаськон?

¹³ Иисус зӥбыт-востэм вал. Со ноку но ачиз сярысь укыр трос ӧз малпа. Музъем вылэ лыктэмезлэсь азьло со Иеговаен ӵош трос бадӟым ужъёс лэсьтӥз. Библиын верамын: «Ваньмыз Со пыр кылдытэмын — мар вань Инмын, мар вань музъем вылын» (Кол. 1:16). Пылатӥськон дыръяз Иисус тодаз вайиз, луоз, мар со кариз инмын Атаеныз ӵош (Матф. 3:16; Иоанн 17:5). Озьы ке но со вылтӥяськись ӧз луы. Со ноку но адямиосты ӧз ултӥя. Иисус шуиз, со «Ас вылаз ужатыны ӧз лыкты, Со Ачиз адямиослы ужаны-тыршыны, Аслэсьтыз лулзэ сётыса, троссэ сьӧлыкъёслэсь мозмытыны лыктӥз» шуыса (Матф. 20:28). Озьы ик со ноку но ас тодэмъяз ӧз лэсьты (Иоанн 5:19). Милемлы адӟем кароно Иисуслэсь зӥбыт-востэм сямзэ!

14. Кызьы Иисуслэн кылъёсыз юртто милемлы асьмеос шоры шонер учкыны?

¹⁴ Иисус дышетскисьёссэ асьсэос шоры шонер учкыны дышетӥз. Со соосты оскытӥз: «Тӥляд йырысьтыды йырсиосты но ваньмыз лыдъямын» (Матф. 10:30). Озьыен, Инмысь Атаймы милемыз туж умой тодэ но дунъя. Со милемлы ужась-тыршисьёсыз луыны лэзе бере но выль дуннеын пырак улон кузьманы малпа бере, малпано ӧвӧл, со шонертэм лэсьтэ шуыса.

15. а) Кыӵе визь-кенеш сётэмын вал одӥг «Возьмаськон башняын»? б) Учке 24-тӥ бамысь суредъёсты. Кыӵе бакель каронъёсты ышто соос, кинъёс асьсэос сярысь гинэ малпало?

 ¹⁵ Одӥг пол «Возьмаськон башняын» таӵе визь-кенеш сётэмын вал: «Милям уг поты вылтӥяськеммы но, асьмеды ултӥяммы но. Милемлы кулэ асьмеос шоры шонер учкыны, умой но урод сямъёсмес лыдэ басьтыса. Тани мар вераз та сярысь одӥг сузэр: „Мон ваньмызлэсь умой адями ӧвӧл, но ваньмызлэсь урод но ӧвӧл. Вань адямиослэн сямен ик, мынам умой но, урод но сямъёсы вань“» c. Та кылъёс возьмато, малы ачид шоры шонер учкыны кулэ.

16. Малы Иегова дышетэ милемыз визьлыко луыны?

¹⁶ Библия пыр Иегова дышетэ милемыз визьлыко луыны, малы ке шуоно со милемыз яратэ но солэн потэ, ми шудоесь мед луомы шуыса (Ис. 48:17, 18). Иеговалы ужаса-тыршыса улон — со самой визьлыко быръён. Соку гинэ ми шудо луомы. Коньдон, уж но асьмеос шоры шонер учкимы ке, ми трос шуг-секытъёслэсь палэнскомы. Мадёнъёсын 23:15 Иегова вазиське милемлы: «Сюлмыд визьлыко луиз ке, соку мынам но сюлмы шумпотоз». Ойдолэ котьку но тыршомы Иеговаез шумпоттыса улыны!