1, 2. Малы Усьтӥськон книга милемлы тунсыко потэ?

 ПУКТЭ син азяды: кин ке доры куное лыктыса, тӥ туспуктэмъёсты учкиськоды. Туспуктэмъёсысь тросэз адямиос тӥледлы тодмо ӧвӧл. Но одӥг туспуктэм тӥледлы тунсыко потэ. Малы? Малы ке шуоно отысь тӥ асьтэды адӟиськоды. Тӥ малпаськоды, кытын но ку со лэсьтэмын вал, мукет адямиосты тодманы тыршиськоды. Соглаш луоды, дыр, та туспуктэмез тӥ уд вунэтэ шуыса.

² Усьтӥськон книгаез та туспуктэмен ӵошатыны луэ. Солы кык мугъёс вань. Нырысетӥез, та книга милемлы гожтэмын вал. Усьтӥськон книгалэн кутсконаз вераське: «Иисус Христослэн усьтӥськонэз. Сое Солы Инмар сётӥз Аслаз ляльчиосызлы ӝоген мар луоноез возьматон понна» (Усьт. 1:1). Адӟиське, та книга вань адямиослы гожтэмын ӧй вал. Со гожтэмын милемлы, Инмарлэн ужась-тыршисьёсызлы. Соин ик Инмарлэн калыкез та азьпалзэ ивортонэ пыриське. Мукет сямен вераса, ми асьмеды та «туспуктэмысь» адӟиськомы кадь.

3, 4. Ку быдэсмо Усьтӥськон книгаысь азьпалзэ ивортонъёс но мар карыны со мылкыдмес ӝутыны кулэ?

³ Кыкетӥез муг, малы Усьтӥськон книга милемлы тунсыко потэ,— со дыр, ку быдэсмо та книгаысь азьпалзэ ивортонъёс. Арлыдо апостол Иоанн гожтӥз, та азьпалзэ ивортонъёс  «Кузё-Инмарлэн нуналаз» быдэсмо шуыса (Усьт. 1:10, сноска). Апостол Иоанн гожтӥз сое асьме вакытысь 96-тӥ арын, та нуналлэн вуэмезлэсь трослы азьлогес (Матф. 25:14, 19; Лука 19:12). Библиын валэктэмъя, «Кузё-Инмарлэн нуналыз» 1914-тӥ арын вуиз, куке Иисус Христос инмысь Эксэйлыкын Эксэй луиз. Соку Усьтӥськон книгаысь азьпалзэ ивортонъёс быдэсмыны кутскизы. Озьыен, ми тӥледын «Кузё-Инмарлэн нуналаз» улӥськомы!

⁴ Ми сыӵе паймымон вакытэ улӥськомы бере, милемлы валаны тыршоно сое, мар гожтэмын Усьтӥськонын 1:3: «Шудо лыдӟись мурт, шудоесь та азьпалзэ тодытыса веранлэсь кылъёссэ кылзӥсьёс, отысь вань гожтэмез чакласа-утьыса улӥсьёс, уго дыр матэ вуэмын ини». Висъялэ саклыктэс: та азьпалзэ ивортонысь кылъёсты лыдӟоно, кылзоно но быдэсъяно. Соин ик ойдолэ соосты пыр-почгес эскеромы.

5. Кызьы Усьтӥськон книга возьматэ, йыбыртъянмы Иеговалы ярамон луыны кулэ шуыса?

⁵ Усьтӥськон книга возьматэ: Иисус туж умой тодэ, мар луэ Инмарлэн калыкеныз (Усьт. 1:12—16, 20; 2:1). Та адӟиське Иисуслэн кылъёсысьтыз, кудъёссэ со вераз Пичи Азиысь сизьым кенешъёслы. Иисус валэктэ, мар соослы кароно, йыбыртъянзы Иеговалы ярамон мед луоз шуыса. Солэн кылъёсыз милемлы но пайда вайыны быгато. Малы со милемыз дышетэ? Иисус Христос туж умой тодэ, вань-а милям Иеговаен матысь кусыпъёсмы. Со милемлы кивалтэт сётэ но милемыз уте. Иисус ваньзэ адӟе. Со тодэ, мар милемлы кароно, азьланяз но Иеговалы ярамон луон понна. Ойдолэ эскеромы Иисуслэсь курон-косонъёссэ, кудъёсыз Усьтӥськон книгаын гожтэмын.

6. а) Усьтӥськонын 2:3, 4 верамъя, мае тупатыны кулэ вал Ефес карысь христианъёслы? б) Малы дышето милемыз Иисуслэн кылъёсыз?

⁶ Лыдӟе Усьтӥськонэз 2:3, 4. Иеговаез яратонмы медаз сӥя. Иисуслэн кылъёсысьтыз адӟиське, Ефес карысь христианъёс, шуг-секытъёссы шоры учкытэк, азьло сямен ик Иеговалы ужазы-тыршизы шуыса. Озьы ке но соос ыштӥзы яратонзэс, кудӥз соослэн кутсконаз вал. Иегова соосты ужась-тыршисьёсыныз лыдъямысь медаз дугды шуыса, соослы яратонзэс юнматоно вал. Малы со милемыз дышетэ? Юн луыны гинэ тырмыт ӧвӧл. Малпаськоно, малы ми юн луыны тыршиськомы. Инмар ужъёсмылы гинэ саклыксэ уг висъя, озьы ик солы но, мар милесьтым мылкыдмес ӝутэ та ужъёсты лэсьтыны. Малы ке шуоно Иеговалэн потэ, ми сое яратыса но солы тау карыса мед йыбыртъяломы шуыса (Мад. 16:2; Марк 12:29, 30).

7. а) Усьтӥськонын 3:1—3 верамъя, кыӵе шуг-секытэз вал Сардис карысь кенешлэн? б) Мар милемлы кароно, сыӵе шуг-секытлэсь палэнскон понна?

⁷ Лыдӟе Усьтӥськонэз 3:1—3. Милемлы азьланяз но сак луоно. Сардис карысь христианъёслэн мукет шуг-секытсы вал. Азьвыл соос ӟырдыт мылкыдын Иеговалы ужазы-тыршизы ке но, собере мылкыдзы пуксиз. Соин ик Иисус косӥз соосты сайканы. Малы со милемыз дышетэ? Библиын гожтэмын: «Инмар шонер лэсьтӥсьтэм ӧвӧл уго, Со уг вунэты тӥлесьтыд уждэс» (Евр. 6:10). Ми Иегова понна трос лэсьтӥмы ини ке но, милемлы азьланяз но ӟырдыт мылкыдын солы ужано-тыршоно но сак луоно (1 Кор. 15:58; Матф. 24:13; Марк 13:33).

8. Малы дышето милемыз Иисуслэн кылъёсыз, кудъёссэ со вераз Лаодикия карысь христианъёслы? (Усьтӥськон 3:15—17).

 ⁸ Лыдӟе Усьтӥськонэз 3:15—17. Милемлы вань сюлмысьтымы ужано-тыршоно. Иисуслэн верамезъя, Лаодикия карысь христианъёс Иеговалы ужан-тыршонын пӧсесь но, кезьытэсь но ӧй вал. Соос шунытэсь вал. Соос мылзы потытэк ужазы-тыршизы. Соин ик Иисус вераз, та кенеш шудтэм но мискинь шуыса. Та христианъёслы мылкыдзэс будэтоно вал азьло сямен ик ӟырдыт мылкыдын Иеговалы ужаны-тыршыны (Усьт. 3:19). Малы со милемыз дышетэ? Кин ке но мылыз потытэк ужаны-тыршыны кутскиз ке, солы тау карон мылкыдзэ будэтоно ваньмыз понна, мае Иегова но солэн организациез сётэ (Усьт. 3:18). Милемлы чакласьконо, ужан-тыршон интые, узырмыны мылкыд нырысетӥ интые медаз поты шуыса.

9. Кыӵе кышкытлыклэсь вань христианъёслы палэнсконо, лыдэ басьтоно ке Иисуслэсь кылъёссэ, кудъёссэ со вераз Пергам но Фиатира каръёсысь кенешъёслы?

⁹ Палэнтоно дышетонъёсты, кудъёссэ зэмос йыбырттонлэсь палэнскемъёс вӧлмыто. Иисуслэн верамезъя, Пергам карысь куд-ог христианъёс сэрен кенешын люкиськонъёс кылдӥзы (Усьт. 2:14—16). Собере со Фиатира карысь христианъёсты ушъяз, соос «шайтан дышетонлэсь мурдалазэ» палэнтӥзы шуыса, но мылкыдзэс ӝутӥз зэмлыкъя улыны (Усьт. 2:24—26). Нош ляб осконэн христианъёсты, кудъёсыз зэмос йыбырттонлэсь палэнскемъёслэн дышетонъёссылы оскизы, Иисус ӧпкельыны куриз. Малы со милемыз дышетэ? Милемлы палэнтоно вань дышетонъёсты, кудъёсыз Иеговалэн дышетэмезлы пумит мыно. Зэмос йыбырттонлэсь палэнскемъёс Инмарлэсь кылзӥськем гинэ каро, нош, зэмзэ вераса, солэсь уг кылзӥсько (2 Тим. 3:5). Сыӵе сьӧлтэтэ медам сюре шуыса, милемлы Библиез мур эскероно (2 Тим. 3:14—17; Иуда 3, 4).

10. Малы эшшо дышето на милемыз Иисуслэн кылъёсыз, кудъёссэ со вераз Пергам но Фиатира каръёсысь кенешъёслы?

¹⁰ Милемлы азон-калгонлэсь палэнсконо. Пергам но Фиатира каръёсысь кенешъёслэн эшшо одӥг шуг-секытсы вал. Иисус вераз, куд-ог вын-агайёс но сузэр-апайёс азыса-калгыса улӥзы шуыса (Усьт. 2:14, 20). Малы со милемыз дышетэ? Кӧня аръёс ӵоже  гинэ христиан мурт Иеговалы медам ужа-тыршы но кӧня гинэ дано ужъёсты со кенешын медам быдэсъя, азыса-калгыса улэмез шоры Иегова синзэ уз ворса (1 Экс. 15:22; 1 Пётр 2:16). Та дуннеысь адямиос кызьы гинэ медам улэ, Иегова возьма, ми солэн вылӥ эсэпъёсызъя уломы шуыса (Еф. 6:11—13).

11. Мае ми тодӥмы статьямылэн та люкетысьтыз? (Озьы ик учке  «Малы ми дышетскиськомы?» рамкаез.)

¹¹ Вакчияк йылпумъян лэсьтомы. Ми адӟимы, Иеговалы солэн курон-косонъёсызъя йыбыртъяно шуыса. Нош ми мае ке мукет сямен лэсьтӥськомы ке, соку ик тупатскыны тыршоно (Усьт. 2:5, 16; 3:3, 16). Но Иисуслэн кылъёсыз, кудъёссэ со Пичи Азиысь кенешъёслы вераз, эшшо малы ке дышето на.

12. Малы дышето милемыз Иисуслэн кылъёсыз, кудъёссэ со вераз Смирна но Филадельфия каръёсысь кенешъёслы? (Усьтӥськон 2:10).

¹² Табере эскеромы, мар вераз Иисус Смирна но Филадельфия каръёсысь кенешъёслы. Со христианъёсты оскытӥз, соос уйылон-уллянъёслэсь кышканы кулэ ӧвӧл но Инмар оскымон луэмзы понна бакель кароз шуыса. (Лыдӟе Усьтӥськонэз 2:10; 3:10). Малы со милемыз дышетэ? Уйылон-уллянъёс одно ик луозы. Ми соослы дась луыны кулэ (Матф. 24:9, 13; 2 Кор. 12:10). Малы милемлы та сярысь тодамы возёно?

13, 14. Кызьы югдуръёс, кудъёсыз сярысь вераське Усьтӥськонысь 12-тӥ люкетын, Инмарлэн калыкез вылын шӧдӥськизы?

¹³ Апостол Иоаннлэн верамезъя, Инмарлэн калыкез уйылон-уллянъёсын пумиськоз «Кузё-Инмарлэн нуналаз» — ӵапак асьме нуналъёсы. Усьтӥськон книгаысь 12-тӥ люкетын вераське, Инмарлэн Эксэйлыкез кивалтыны кутскем бере ик инмын ожмаськон кутскиз шуыса. Михаил (Иисус Христослэн мукет нимыз) но солэн ожгарчиосыз ожмаськизы Шайтанэн но солэн периосыныз (Усьт. 12:7, 8). Михаил Инмарлэсь тушмонъёссэ вормиз но музъем вылэ сэрпалтӥз (Усьт. 12:9). Соин сэрен музъем куректонэн тырмиз (Усьт. 12:12). Кызьы ваньмыз та Инмарлэн калыкез вылын шӧдӥськиз?

¹⁴ Усьтӥськон книга талы но валэктон сётэ. Шайтан инме берытскыны уг быгаты бере ини, аслэсьтыз вожпотонзэ со музъем вылын улӥсь зырӟем христианъёс вылэ кисьтэ. Малы соос вылэ? Соосты Инмарлэн Эксэйлыкез ыстӥз но Иисус Христос сярысь тодытыны куриз (2 Кор. 5:20; Еф. 6:19, 20; Усьт. 12:17). Мар кариз Шайтан, зырӟем христианъёсын нюръяськон понна?

15. Кинэ возьмато «кык адӟисьёс-ивортӥсьёс», кудъёсыз сярысь вераське Усьтӥськонысь 11-тӥ люкетын, но мар соосын луиз?

 ¹⁵ Шайтан Инмарлэн тушмонъёсызлэсь мылкыдзэс ӝутӥз урдскыны зырӟем христианъёс вылэ, кудъёсыз Эксэйлык сярысь тодытон ужен кивалтӥзы. 1918-тӥ арын тямыс вын-агайёсты шонертэм янгыше уськытӥзы но трос аръёслы пытсэтэ пуктӥзы. Усьтӥськон книгаын та вын-агайёс нимасько «кык адӟисьёсын-ивортӥсьёсын», кудъёсыз виемын вал (Усьт. 11:3, 7—11) b. Адями синмын учкыса, малпаны луэ вал, соослэн ужзы дугдӥз шуыса.

16. Кызьы 1919-тӥ арын югдур малпамтэ шорысь воштӥськиз но мар каре Шайтан со дырысен?

¹⁶ Собере Усьтӥськонысь 11-тӥ люкетын вераське, ӝоген «кык адӟисьёс-ивортӥсьёс» улӟо шуыса. Кызьы быдэсмиз та азьпалзэ ивортон? Югдур малпамтэ шорысь воштӥськиз. Ар но ӧз ортчы, 1919-тӥ арын южтолэзе, та вын-агайёсты пытсэтысь лэзизы. Соосты янгыше ӧз уськытэ ини. Вын-агайёс соку ик ужзы борды басьтӥськизы: соос нош ик кивалтыны кутскизы тодытон но дышетон ужен. Но та уг возьматы, Шайтан киоссэ лэзиз шуыса. Инмарлэн вань ужась-тыршисьёсыз вылэ со «шур кадь» уйылон-уллянъёс лэзиз (Усьт. 12:15). Соин ик ваньмылы «чиданлык но оскон» кулэ (Усьт. 13:10).

17. Кыӵе юрттэт басьтэ Инмарлэн калыкез, Шайтанлэн уйылэмез-уллямез шоры учкытэк?

¹⁷ Усьтӥськонысь 12-тӥ люкетысь ми тодӥськомы: Инмарлэн калыкезлы юрттэт вуоз отысь, кытысь со ӧз но возьма. Библиын вераське, «музъем» «шур» выллем уйылон-уллянъёсты ньылоз шуыса (Усьт. 12:16). Кызьы быдэсмо та кылъёс? «Музъемен» ниманы луэ Шайтанлэн дуннеысьтыз куд-ог люкетъёссэ, кылсярысь, судъян системаез. Та система Шайтан пала дурбасьтыны кулэ ке но, куддыръя судъёс Инмарлэсь калыксэ но утё. Иеговалэн Адӟись-Ивортӥсьёсыз трос судъёсын вормизы ини. Сыӵе вакытэ соос дырзэс визьмо куто но лэсьто ваньзэ, мае быгато, Иеговалы ужан-тыршон понна (1 Кор. 16:9). Кытысь со адӟиське?

18. Кыӵе кулэ луись ужез ми нуиськомы та берпум нуналъёсы?

¹⁸ Иисуслэн верамезъя, та дуннелэн пумыз  вуэмлэсь азьло солэн дышетскисьёсыз быдэс дунне вылын Эксэйлык сярысь ӟеч иворез тодытозы (Матф. 24:14). Нош Усьтӥськонын 14:6 вераське кылчин сярысь, кудӥз бордын «вань дауръёс ӵоже улӥсь Евангелие вал — музъем вылын улӥсьёслы, вань выжыослы, пӧртэм кылын вераськисьёслы, калыкъёслы, улыослы-бечеослы сое тодытон понна». Озьыен, ӟеч иворез тодытыны милемлы кылчинъёс юртто.

19. Ӟеч иворез тодытэм сяна, мае эшшо тодытыны кулэ на соос, кинъёс Иеговаез ярато?

¹⁹ Инмарлэн ужась-тыршисьёсыз ӟеч иворез гинэ уг тодыто. Озьы ик соос кылчинъёслы юртто нуыны ужез, кудӥз сярысь вераське Усьтӥськонын 8—10-тӥ люкетъёсын. Кылчинъёс верало, мар луоз Инмарлэн Эксэйлыкезлэн тушмонъёсыныз. Соин ик Иеговалэн Адӟись-Ивортӥсьёсыз Шайтанлэн дуннеезлы судъян иворез верало. Та иворез ӵошатыны луэ йӧзорен но тылын (Усьт. 8:7, 13). Адямиос тодыны кулэ, ӝоген та дуннелы пум вуоз шуыса. Соку гинэ соос быгатозы быдэсак воштӥськыны но «Кузё-Инмарлэн вожпотон нуналаз» утиськыны (Соф. 2:2, 3). Но тросэзлэн та иворез кылзэмзы уг поты. Соин ик, сое веран понна, милемлы кышкасьтэм луыны кулэ. Нош бадӟым куректон дыръя та ивор эшшо но шонерак верамын луоз. Адямиослы сое кылыны эшшо но вӧсь луоз (Усьт. 16:21).

20. Мар сярысь вераськоз вуоно кык статьяосын?

²⁰ Усьтӥськон книгаысь «азьпалзэ тодытыса веранлэсь кылъёссэ» валаны кулэ, малы ке шуоно та азьпалзэ ивортон ми вылын но быдэсме (Усьт. 1:3). Куддыръя уйылон-уллянъёсты чиданы но Инмарлэсь иворъёссэ вераны капчи ӧвӧл. Но Усьтӥськон книгаез эскерон милемыз юнматоз. Вуоно кык статьяосысь ми тодомы: 1) мар луоз Инмарлэн тушмонъёсыныз но 2) кызьы Иегова оскымон ужась-тыршисьёссэ бакель кароз.