1. Мае бырйыны кулэ котькуд адямилы?

 КОТЬКУД адями бырйыны кулэ: со Иегова пала кариськоз яке Инмарлэн валтӥсь тушмонэз, Шайтан, пала. Та быръён возьматоз, ми пырак уломы-а, ум-а шуыса (Матф. 25:31—33, 46). Усьтӥськон книгаын верамъя, «туж бадӟым курадӟон-куректон» дыръя Инмарлэн оскымон ужась-тыршисьёсызлы утиськон понна пус пуктэмын луоз (Усьт. 7:14; Иез. 9:4, 6). Нош соос, кинъёслэн Шайтанлэн пусэз луоз, быдтэмын луозы (Усьт. 14:9—11).

2. а) Мар карыны мылкыдмес ӝутэ Еврейёслы 10:35—39? б) Кызьы милемлы юрттыны быгатэ Усьтӥськон книга?

² Лыдӟе Еврейёслы 10:35—39. Тӥ Иегова пала кариськиды ке, со туж визьмо. Табере тӥляд мукетъёсызлы но валэктэмды потэ, дыр, малы соослы но Иегова пала кариськоно. Тӥледлы туж юрттоз Усьтӥськон книга. Отын умой верамын, мар луоз Иеговалэн тушмонъёсыныз но кыӵе паймымон улон возьма соосты, кинъёс Иегова пала кариськозы. Со, мар эскериське та книгаын, улонэз утьыны быгатэ. Озьы ик со мылкыдмес юнматоз азьланяз но Иеговалы ужаны-тыршыны но мукетъёсызлы юрттыны шонер быръён лэсьтыны.

3. Мае ми эскеромы та статьяын?

³ Та статьяын ми эскеромы кык юанъёсты: 1) кыӵе улон возьма соосты, кинъёс Инмар пала карисько, но 2) мар луоз соосын, кинъёс Усьтӥськон книгаысь нап-горд пӧйшур пала кариськизы?

4. Кинэ Иоанн адӟиз инмын Иисусэн ӵош?

⁴ Апостол Иоанн адӟе кык группаысь адямиосты, кудъёсыз Иегова пала кариськыса уло но пырак улон басьто. Нырысетӥ группае пыро соос, кинъёс адямиос пӧлысь басьтэмын но Иисусэн ӵош инмын кивалтозы. Соос 144 000 кузя (Усьт. 7:4; 14:3, 4). Соос Иисусэн ӵош инмысь Сӥон гурезьын сыло (Усьт. 14:1). Та Эксэйлык музъемен кивалтоз (Усьт. 5:9, 10).

5. Мар ӝоген луоз 144 000 пӧлысь кылемъёсыныз?

⁵ Кылем дауръёсы Иегова трос сюрс христианъёсты святой духеныз зырӟиз (Лука 12:32; Рим. 8:17). Соосыз, кинъёс Иеговалы кулытозязы ик оскымон кылизы, али инмын. Апостол Иоаннлэн верамезъя, берпум нуналъёсы 144 000 зырӟем христианъёс пӧлысь музъем вылэ кӧняез ке гинэ кылёз (Усьт. 12:17, ВД). Бадӟым куректон азьын та христианъёслы «Улэп Инмарлэн печатез» пуктэмын луоз (Усьт. 7:2, 3). Собере бадӟым куректонлэн кыӵе ке но вакытаз соос инме басьтэмын луозы но Иисусэн ӵош кивалтыны кутскозы (Матф. 24:31; Усьт. 5:9, 10).

6, 7. а) Кинэ эшшо адӟе Иоанн но мае ми соос сярысь тодӥськомы? б) Малы Усьтӥськонысь 7-тӥ люкет тунсыко луоз зырӟемъёслы но, озьы ик «туж-туж трос калыклы» но?

⁶ Собере Иоанн адӟе мукет группаез, кудзэ со «туж-туж трос калык» шуыса нима. 144 000-эн ӵошатыса, соосты лыдъяны ик уг луы (Усьт. 7:9, 10). Тани мар вера Иоанн соос сярысь: «Та адямиос туж бадӟым курадӟон-куректон пыр потэмын, Ыжпилэн вирыныз соос дӥськутсэс миськизы, чылкыт, тӧдьы каризы» (Усьт. 7:14). «Туж-туж трос калыкез» музъем вылын паймымон улон возьма (Пс. 36:9—11, 27—29; Мад. 2:21, 22; Усьт. 7:16, 17).

⁷ Усьтӥськон книгаын 7-тӥ люкетаз вераське соос сярысь, кинъёс инмын эксэйёс луозы, озьы ик соос сярысь, кинъёс музъем вылын пырак улозы. Тырше адӟыны асьтэды та «туспуктэмысь». Макем шумпотозы соос, Иегова пала кариськыны ужпум кутӥзы шуыса! Нош мар эшшо вераське на бадӟым куректон сярысь Усьтӥськон книгаын? (Матф. 24:21).

8. Кызьы бадӟым куректон кутскоз но кызьы тросэз адямиос асьсэды соку возёзы?

⁸ Кызьы вераськиз ини кылем статьяын, ӝоген кивалтӥсьёс урдскозы Быдӟым Вавилон вылэ, кудӥз возьматэ зэмос луисьтэм религилэсь дунневыл империзэ (Усьт. 17:16, 17). Озьы кутскоз бадӟым куректон. Возьматэ-а со, тросэз адямиос Иеговалы ужаны-тыршыны кутскозы шуыса? Усьтӥськон книгаын 6-тӥ люкетын верамъя, со озьы уз луы. Со дыре соос, кинъёс Иеговалы ужатэк-тыршытэк улозы, утиськон утчалозы политикаысь но вузкарон системаысь, кудъёсыз соослы гурезьёс кадь юнэсь пото. Та адямиос Инмарлэн Эксэйлыкез пала уз кариське бере, Иегова соосты аслаз тушмонъёсыныз лыдъялоз (Лука 11:23; Усьт. 6:15—17).

9. Малы бадӟым куректон дыръя Иеговалэн ужась-тыршисьёсыз мукет адямиослэсь висъяськозы но кытчы со вуттоз?

⁹ Бадӟым куректон дыръя Иеговалэн ужась-тыршисьёсыз туж висъяськозы мукет адямиослэсь, малы ке шуоно быдэс музъем вылын соос гинэ асьсэлэн Инмарзылы йыбыртъялозы но пумит луозы «пӧйшур» пала кариськыны (Усьт. 13:14—17). Таин сэрен Иеговалэн тушмонъёсызлэн  туж вожзы потоз. Соин ик калыкъёслэн огазеяськонзы быдэс дунне вылысь Инмарлэн ужась-тыршисьёсыз вылэ урдскоз. Та урдскон Библиын нимаське Магог музъемысь Гоглэн урдскемез шуыса (Иез. 38:14—16).

10. Кызьы Иегова учкоз калыкез вылэ урдскон шоры? (Усьтӥськон 19:19—21).

¹⁰ Кызьы Иегова учкоз та урдскон шоры? Иезекииль гожтӥз: «Вожпотонэ йыркурен ӝуатскоз» (Иез. 38:18, 21—23). Усьтӥськонын 19-тӥ люкетын та сярысь пыр-почгес вераське. Гоглэн урдскемез бере Иегова соку ик ыстоз Иисусэз, аслэсьтыз калыксэ утён понна но тушмонъёссэ быдтон понна. Иисусэн ӵош ожмаськозы «инмысь ожмаськисьёс» — Инмарлы оскымон кылчинъёс но 144 000 (Усьт. 17:14; 19:11—15). Маин йылпумъяськоз та ожмаськон? Вань организациос но адямиос, кудъёсыз Иеговалы пумит мыно, быдтэмын луозы! (Лыдӟе Усьтӥськонэз 19:19—21.)

11. Мар самой валтӥсез луэ Усьтӥськон книгаын?

¹¹ Пуктэ син азяды, макем шумпотозы Иеговалэн ужась-тыршисьёсыз, кудъёсыз музъем вылын улозы. Кин ке но вералоз, дыр: «Ми Армагеддон пыр потӥмы!», «Мон ас синъёсыным адӟи, кызьы Иегова вань тушмонъёссэ быдтӥз!». Нош мар луоз со дыре инмын? Ваньзы шумпотозы, Быдӟым Вавилон быдтэмын шуыса. Озьы ик отын эшшо малы ке шумпотозы на (Усьт. 19:1—3). Соку ортчоз «Ыжпилэн сюан нуналыз» — со самой валтӥсез, мар сярысь вераське Усьтӥськон книгаын (Усьт. 19:6—9).

12. Ку луоз Ыжпилэн сюан нуналыз? (Усьтӥськон 21:1, 2).

¹² Ку ортчоз та сюан? 144 000 зырӟемъёс ваньзы ӵош инмын люкаськозы Армагеддонлэн самой кутскон азяз ик. Сюанын шулдыръяськон понна та туж ик тупась дыр уз луы. (Лыдӟе Усьтӥськонэз 21:1, 2.) Соин ик Ыжпилэн сюан нуналыз ортчоз Армагеддон бере гинэ, куке Инмарлэн вань тушмонъёсыз быдтэмын луозы (Пс. 44:4, 5, 14—18).

13. Мар луоз Ыжпилэн сюанэз дыръя?

¹³ Мар луоз та сюан дыръя? Кызьы огшоры сюанын пиосмурт но кышномурт огазеясько, озьы ик Ыжпилэн сюанэз дыръя Иисус Христос эксэй но 144 000, солэн «выль кенэз», огазеяськозы. Соку кылдоз выль кивалтэт, кудӥз 1 000 ар ӵоже музъемен кивалтоз (Усьт. 20:6).

14, 15. Маин ӵошатӥсько 144 000 зырӟемъёс Усьтӥськонысь 21-тӥ люкетын? (Учке вылбамысь суредэз.)

¹⁴ Собере Усьтӥськонын 21-тӥ люкетын 144 000 зырӟемъёс ӵошатӥсько туж чебер городэн, кудӥзлэн нимыз Выль Иерусалим (Усьт. 21:2, 9). Город «дас кык инъет вылын сылэ, соос бордын Ыжпилэн дас кык» апостолъёсызлэн нимъёссы гожтэмын (Усьт. 21:10—14; Еф. 2:20). Пуктэ син азяды, макем тунсыко потӥзы Иоаннлы та изъёс, малы ке шуоно одӥгез бордын гожтэмын вал солэн нимыз. Со туж бадӟым дан!

¹⁵ Нокыӵе но город Выль Иерусалимен уз ӵошатӥськы. Со ньыль сэрего. Солэн кузьдалаез, пасьталаез но ӝуждалаез огкадесь. Солэн валтӥсь ульчаез лэсьтэмын чылкыт зарнилэсь. Нош городлэн 12 капкаез — «со дас кык марӟан пырыос». Солэн борддоръёсыз но инъетэз дуно изъёсын чеберъямын (Усьт. 21:15—21). Иоанн городысь храмез адӟыны тыршиз, нош со отын ӧй вал. Та валамон, малы ке шуоно соос, кинъёс  Выль Иерусалиме пыро, Иегова вӧзын сылозы (Евр. 7:27; Усьт. 22:3, 4). Иоанн гожтэ: «Дунне Кутӥсь Инмар Кузё-Инмар, Ыжпи — со солэн храмез. Город шундылэн но, толэзьлэн но югытсылы ёрмыса уг улы, уго Инмарлэн пиштӥсь данлыкез сое югдытыса возе, нош солэн югыт сётӥсез — Ыжпи» (Усьт. 21:22, 23).

16. Мар возьма адямиосты Инмарлэн Эксэйлыкезлэн 1000 ар ӵоже кивалтэмез дыръя?

¹⁶ Зырӟем христианъёс шумпотыса малпасько Выль Иерусалим сярысь. Та город сярысь азьпалзэ ивортон шумпоттэ соосты но, кинъёс пырак дауръёс ӵоже музъем вылын улыны оско. Малы ке шуоно Инмарлэн Эксэйлыкезлэн 1000 ар ӵоже кивалтэмез дыръя Выль Иерусалим музъем вылын бадӟымесь воштӥськонъёс лэсьтоз. Та воштӥськонъёс туж трос луозы, соин ик соос «улон вуэн чылкыт шур» шуыса нимасько. Та шурлэн кык палтӥз ик «улон писпуос будо», соослэн куаръёссы «калыкъёслы бурмон сёто» (Усьт. 22:1, 2). Адямиос, кудъёсыз со дыре музъем вылын улозы, ас вылазы шӧдозы Инмарлэн Эксэйлыкезлэсь бакель каронъёссэ. Пумен-пумен котькудӥз Инмарлы оскымон адями тырбыдэс луоз. Милям улонамы висёнъёс, вӧсь луон но бӧрдон уз луэ ини (Усьт. 21:3—5).

17. Кин улоз музъем вылын Эксэйлыклэн 1000 ар ӵоже кивалтэмез дыръя? (Усьтӥськон 20:11—13).

¹⁷ Кин улоз музъем вылын Эксэйлыклэн 1000 ар ӵоже кивалтэмез дыръя? Нырысь ик туж-туж трос калык, кудӥз Армагеддон пыр потоз, озьы ик соослэн нылпиоссы, кудъёсыз выль дуннеын вордӥськозы. Со сяна, Усьтӥськонын 20-тӥ люкетын верамын, кулэмъёс улӟозы шуыса. (Лыдӟе Усьтӥськонэз 20:11—13.) Кинъёс улӟозы? «Шонер улэмъёс», яке Инмарлэн ужась-тыршисьёсыз, кудъёсыз кулӥзы ини, озьы ик «шонер улымтэос», кудъёсыз быдэс улонзы ӵоже Иегова сярысь умой-умой тодыны ӧз быгатэ (Ап. уж. 24:15; Иоанн 5:28, 29). Вераны кулэ, 1000 ар ӵоже кивалтон дыръя вань адямиос уз улӟе. Иегова уз улӟыты соосты, кинъёс солы ужаны-тыршыны пумит луизы. Соослэн Инмар пала кариськыны луонлыксы вал ке но, соос озьы ӧз лэсьтэ. Соин ик соос рай музъем вылын уз улэ (Матф. 25:46; 2 Фес. 1:9; Усьт. 17:8; 20:15).

18. Мар луоз 1 000 арлэн пумаз?

¹⁸ 1 000 арлэн пумаз музъем вылысь вань адямиос тырбыдэс луозы. Адамлэн сьӧлыкезлэн вань бервылъёсыз быдэсак быдтэмын луозы (Рим. 5:12). Со дырлы вань адямиос сьӧлыкъёссылэсь мозмытскемын луозы бере, Библиын верамын, соос улӟозы шуыса (Усьт. 20:5).

19. Малы адямиос берпуметӥзэ эскеремын луозы?

¹⁹ Шайтан Иисус вылэ урдскылыны тыршиз ке но, Инмарлэн Пиез Иеговалы оскымон кылиз. Нош табере пуктэ син азяды: Христослэн 1000 ар ӵоже кивалтонэз йылпумъяськиз. Тӥ тырбыдэс луиды, нош Шайтан пыдэстэм дуннеысь мозмытэмын но адямиосты берпуметӥзэ эскере (Усьт. 20:7). Кызьы тӥ малпаськоды, быгатоды-а тӥ Иисус сямен оскымон кыльыны? Ми пӧлысь котькудӥз возьматыны быгатоз, со Иеговалы оскымон луыны тырше шуыса. Ваньзы, кинъёс берпуметӥзэ эскерон дыръя Инмар пала кариськозы, пырак улозы но быдэсак эрико луозы (Рим. 8:21). Нош соос, кинъёс Иеговалы пумит ӝутскозы, Шайтанэн но солэн периосыныз ӵош пыраклы быдтэмын луозы (Усьт. 20:7—10).

20. Мае тӥ шӧдӥськоды, Усьтӥськон книгаысь азьпалзэ ивортонъёсты эскерыса?

²⁰ Кельшиз-а тӥледлы учкыны «туспуктэмез», кудӥз Усьтӥськон шуыса нимаське? Шумпотӥды-а тӥ отысь асьтэды но адӟыны? Соглаш луоды, дыр, милям мукетъёсызлы но юрттэммы потэ Иегова пала кариськыны. Соку соос но милемын ӵош быгатозы Иеговалы йыбыртъяны (Усьт. 22:17). Та куинь статьяос юрттӥзы милемлы адӟыны, мар луоз вуонояз. Табере, апостол Иоанн сямен, милям вераммы потэ: «Кузё-Инмаре Иисус, лыкты!» (Усьт. 22:20).