1. Усьтӥськон книгаын верамъя, маин пумиськылэ Инмарлэн калыкез?

 УСЬТӤСЬКОН книга вера, инмын Инмарлэн Эксэйлыкез кылдытэмын ини, нош Шайтан музъем вылэ сэрпалтэмын шуыса (Усьт. 12:1—9). Инмын улӥсьёслы со шумпотон вайиз! Нош музъем вылын улӥсьёслы — куректон. Малы? Малы ке шуоно Шайтан Иеговалэн музъем вылын улӥсь ужась-тыршисьёсыз вылэ урдскылэ (Усьт. 12:12, 15, 17).

2. Мар юрттоз милемлы Шайтанлэсь урдскылэмзэ чиданы?

² Мар юрттоз милемлы Шайтанлэсь урдскылэмзэ чиданы? (Усьт. 13:10). Ми тодӥськомы, мар вуонояз луоз. Сое тодыса, капчигес Шайтанлэсь урдскылэмзэ чиданы. Кылсярысь, апостол Иоанн гожтӥз, улонмы умой пала воштӥськоз шуыса. Иегова вань тушмонъёссэ быдтоз. Ойдолэ эскеромы, кызьы Усьтӥськон книга та тушмонъёс сярысь вера но мар соосын луоз.

3. Вералэ Усьтӥськон книгаысь куд-ог символъёс сярысь.

³ Усьтӥськон книга возьматэ, мар ӝоген луоз. Инмарлэн тушмонъёсыз сярысь та книгаын «символъёс пыр» вераське (Усьт. 1:1). Нырысь вераське, «зарезьысь потӥсь сизьым йыро, дас сюро пӧйшур» сярысь (Усьт. 13:1). Собере ми адӟиськомы мукет пӧйшурез. Со музъемысь потэ но «лобась кый кадь вераське». Та пӧйшур «адямиос азе инмысь тылэз но васькытэ» (Усьт. 13:11—13). Собере потэ  куинетӥез, «нап-горд пӧйшур», кудӥз вылын азыса-калгыса улӥсь кышномурт пуке. Та куинь пӧйшуръёс возьмато Инмарлэсь но солэн Эксэйлыкезлэсь тушмонъёссэ, кудъёсыз кемалась ини пумитъяськыса уло. Ойдолэ тодомы, кыӵе тушмонъёс сярысь татын вераське (Усьт. 17:1, 3).

4, 5. Кызьы кылъёс, кудъёсыз гожтэмын Данииллэн 7:15—17, валаны юртто, мае возьмато Усьтӥськон книгаысь символъёс?

⁴ Тодон понна, кыӵе тушмонъёс сярысь вераське та книгаын, валаны кулэ, мае возьмато пӧйшуръёс но азыса-калгыса улӥсь кышномурт. Тае валаны Инмарлэн Кылыз ик юрттэ. Усьтӥськон книгаысь тросэз символъёс сярысь Библилэн мукет книгаосаз но вераське. Кылсярысь, Даниил пророк адӟиз, кызьы «зарезь вуысь ньыль бадӟымесь пӧйшуръёс потӥзы» (Дан. 7:1—3). Даниил валэктэ, соос ньыль эксэйёсты, яке ньыль кивалтэтъёсты, возьмато шуыса. (Лыдӟе Данииллэсь 7:15—17.) Та валаны юрттэ, Усьтӥськон книгаысь но пӧйшуръёс кивалтэтъёсты возьмато шуыса.

⁵ Ойдолэ эскеромы, мае возьмато Усьтӥськон книгаысь символъёс. Ми адӟомы, кызьы Библия ачиз тае валэктэ. Кутскомы эскерыны та куинь пӧйшуръёсты. Ми тодомы: 1) кинэ соос возьмато, 2) мар соосын луоз но 3) малы милемлы тае тодыны кулэ.

6. Кинэ возьматэ сизьым йыро пӧйшур? (Усьтӥськон 13:1—4).

⁶ Кинэ возьматэ сизьым йыро пӧйшур? (Лыдӟе Усьтӥськонэз 13:1—4.) Висъялэ саклыктэс: та пӧйшур леопардлы укша, солэн пыдъёсыз — гондырлэн кадесь, ымыз — левлэн кадь, со дас сюро. Ньыль пӧйшуръёслэн но, кудъёсыз сярысь Данииллэн книгаысьтыз 7-тӥ люкетын вераське, таӵе ик тодметъёссы вань. Но соослэн вань одӥг пӧртэмлыксы: Усьтӥськон книгаын вераське одӥг пӧйшур сярысь, нош Данииллэн книгаяз — ньыль пӧйшуръёс сярысь. Соин ик сизьым йыро пӧйшур одӥг гинэ кивалтэтэз яке дунневыл державаез уг возьматы. Та пӧйшурлы «вань выжыосты, калыкъёсты, пӧртэм кылын вераськисьёсты, улыосты-бечеосты ас киулаз возьыны эрик сётэмын вал» (Усьт. 13:7). Озьыен, та пӧйшур возьматэ вань кивалтэтъёсты, кудъёсыз музъем вылын кивалтӥзы b (Екк. 8:9).

7. Мае возьматэ пӧйшурлэн котькуд йырыз?

⁷ Мае возьматэ пӧйшурлэн котькуд йырыз? Тае валаны юрттэ Усьтӥськонысь 17-тӥ люкет. Отын пыр-почгес эскериське пӧйшурлэн тусбуез-суредэз, кудӥз сярысь гожтэмын Усьтӥськонын 13-тӥ люкетын. Иоанн гожтэ: «Сизьым йыръёс — со... сизьым эксэйёс... Соос пӧлысь витез сэрпалтэмын ини, одӥгез вань на, нош мукетыз ӧз на лыкты, нош лыктӥз ке, солы кема улоно уз луы» (Усьт. 17:9, 10). Вань кивалтэтъёс пӧлысь, кудъёссэ Шайтан уже кутӥз, сизьымез ӵошатӥсько «йыръёсын», малы ке шуоно соос туж кужмоесь вал. «Сизьым йыръёс» — со дунневыл державаос, кудъёсызлэн кивалтэмзы улсын Инмарлэн трос ужась-тыршисьёсыз улӥзы яке кудъёсыз Инмарлэсь калыксэ уйылӥзы-уллязы. Апостол Иоанн улон нуналъёсы вить державаос ортчемын вал ини.  Соос пӧлы пыро: Египет, Ассирия, Вавилон, Мидо-Персия но Греция. Рим, куатетӥез держава, кивалтӥз ӵапак Иоанн улон дыръя. Нош мае возьматэ сизьыметӥез йыр?

8. Мае возьматэ пӧйшурлэн сизьыметӥ йырыз?

⁸ Тае валаны юрттэ Данииллэн книгаез. Кыӵе дунневыл держава кивалтэ та дуннелэн берпуметӥ нуналъёсаз, «Кузё-Инмарлэн нуналаз»? (Усьт. 1:10, сноска). Со Великобритания но Огазеяськем Штатъёс. Озьыен, Англо-Американской дунневыл держава — со пӧйшурлэн сизьыметӥ йырыз, кудӥз сярысь гожтэмын Усьтӥськонын 13:1—4.

9. Мае возьматэ пӧйшур, кудӥзлэн «ыжпилэн выллемесь кык сюръёсыз» вань?

⁹ Усьтӥськонысь 13-тӥ люкетын вераське пӧйшур сярысь, кудӥзлэн «ыжпилэн выллемесь кык сюръёсыз» вань но кудӥз «лобась кый кадь вераське». Со «туж бадӟымесь паймымон тодметъёс лэсьтылэ — адямиос азе инмысь тылэз но васькытэ» (Усьт. 13:11—15). Таиз пӧйшур но Великобританиез но Огазеяськем Штатъёсты возьматэ. Нош Усьтӥськонысь 16-тӥ но 19-тӥ люкетъёсын кык сюро пӧйшур «ӧрекчи пророкен» нимаське (Усьт. 16:13; 19:20). Данииллэн книгаысьтыз азьпалзэ ивортонэз учконо ке, Англо-Американской дунневыл держава «паймымон куашкатонъёс лэсьтоз» (Дан. 8:19, 23, 24). Та быдэсмиз Кыкетӥ дунневыл ож дыръя, куке Великобритания но Огазеяськем Штатъёс кык атомной бомбаос куштӥзы. Вераны луоз, озьы соос «адямиос азе инмысь тылэз васькытӥзы».

10. Мае возьматэ «пӧйшурлэн тусбуез-суредэз»? (Усьтӥськон 13:14, 15; 17:3, 8, 11).

¹⁰ Собере ми адӟиськомы эшшо одӥг пӧйшурез. Со туж кельше сизьым йыро пӧйшурлы, но таиз нап горд буёло. Со нимаське «[сизьым йыро] пӧйшурлэн тусбуез-суредэз» но «тямысэтӥез эксэй» шуыса c. (Лыдӟе Усьтӥськонэз 13:14, 15; 17:3, 8, 11.) Библиын та эксэй сярысь гожтэмын: «Пӧйшур вал, но со ӧвӧл ни... Но со эшшо лыктоз на». Та кылъёс туж умой тупало Огазеяськем Нациослэн Организацизылы, кудӥз быдэс дунне вылысь кивалтэтъёслы юрттӥське. Нырысь со нимаськиз Нациослэн Лигазы. Кыкетӥ дунневыл ож дыръя со ужамысь дугдӥз, но берлогес нош ик ужаны кутскиз. Али со ООН шуыса нимаське.

11. Мар карозы пӧйшуръёс но малы милемлы соослэсь кышкано ӧвӧл?

¹¹ Та пӧйшуръёс, яке кивалтэтъёс, пӧяськыса адямиослэсь мылкыдзэс ӝутозы Иеговалы но солэн калыкезлы пумитъяськыны. Вераны луоз, соос «потӥзы быдэс дунне вылысь музъем выл эксэйёс доры, соосты Дунне Кутӥсь Инмарлэн быдӟым нуналаз ожмаськонэ [Армагеддонэ] люкан понна» (Усьт. 16:13, 14, 16). Но милемлы кышкано ӧвӧл, малы ке шуоно Иегова Инмармы утёз котькинэ, кин солэн кивалтэтэз пала кариськоз (Иез. 38:21—23).

12. Мар луоз вань пӧйшуръёсын?

¹² Мар луоз вань пӧйшуръёсын? Усьтӥськонын 19:20 гожтэмын: «Пӧйшур но со азьын паймымон ужъёс лэсьтӥсь ӧрекчи пророк соин ӵош кутэмын вал; паймымон ужъёсын со пӧйшурлэсь пуссэ басьтӥсьёслэсь, солэн суредам тусбуезлы-суредэзлы  йыбыртъясьёслэсь визьзэс тугаса улӥз. Соосты кыксэс ик сераен ӝуась ты пушкы улэпкын куштӥзы». Кивалтэтъёс, кудъёсыз Инмарлы пумитъяськозы, кивалтон дыръязы ик пыраклы быдтэмын луозы.

13. Мар карыны косо кивалтӥсьёс христианъёсты?

¹³ Малы милемлы тае тодыны кулэ? Ми христианъёс луиськомы бере, милемлы оскымон луоно Инмарлы но солэн Эксэйлыкезлы (Иоанн 18:36). Соин ик ми политикае ум пыриськиське. Куддыръя со туж секыт, малы ке шуоно кивалтӥсьёс косо, ми соос пала мед кариськомы шуыса. Соослы, кинъёс кивалтӥсьёс пала карисько, пӧйшурлэн пусэз пуктӥське (Усьт. 13:16, 17). Сыӵе адямиослы Иеговалэн вожез потэ. Соос пырак уз улэ (Усьт. 14:9, 10; 20:4). Соин ик, кивалтӥсьёс туж зол зӥбизы ке но, милемлы политикае пыриськоно ӧвӧл.

14. Мар туж паймытӥз Иоаннэз? (Усьтӥськон 17:3—5).

¹⁴ Лыдӟе Усьтӥськонэз 17:3—5. Собере Иоанн адӟиз «нап-горд пӧйшур вылын пукись кышномуртэз». Та «туж азыса-калгыса улэм кышномуртлэн» нимыз — Быдӟым Вавилон. «Музъем выл эксэйёс соин азыса-калгыса улӥзы». Иоанн шуиз: «Сое адӟи но туж-туж пайми» (Усьт. 17:1, 2, 6).

15, 16. Мар со сыӵе Быдӟым Вавилон но малы озьы вераны луоз?

¹⁵ Мар со сыӵе Быдӟым Вавилон? Та кышномурт кивалтӥсьёсын азыса-калгыса улӥз (Усьт. 18:9). Вераны луоз, со «музъем выл эксэйёс» вылын пуке, малы ке шуоно та кышномурт соосын кивалтыны тырше. Соин ик азыса-калгыса улӥсь кышномурт политикаез уг возьматы. Озьы ик та кышномурт вузкарон системаез но возьматыны уг быгаты, малы ке шуоно Усьтӥськон книгаын вузкарон системаез «музъем выл вузчиос» возьмато (Усьт. 18:11, 15, 16).

¹⁶ Ӵем дыръя Библиын «азон-калгон» кыл герӟаськемын соосын, кинъёс верало, Инмарлы ужало-тыршо шуыса, нош асьсэос зэмос луисьтэм инмаръёслы йыбыртъяло но та дуннеен эшъясько (1 Пар. 5:25; Иак. 4:4). Нош Инмарлы оскымон ужась-тыршисьёс сярысь Библиын вераське «сьӧлыкамтэ дун-чылкыт вылькен» сярысь кадь (2 Кор. 11:2; Усьт. 14:4). Вашкала Вавилонысь потӥзы тросэз зэмос луисьтэм дышетонъёс. Соин ик Быдӟым Вавилон возьматэ зэмос луисьтэм йыбыртъянэз. Озьыен, азыса-калгыса улӥсь кышномурт возьматэ зэмос луисьтэм религилэсь дунневыл империзэ (Усьт. 17:5, 18; лыдӟе jw.org сайтысь «Что такое Вавилон Великий?» статьяез).

17. Мар луоз Быдӟым Вавилонэн?

¹⁷ Мар луоз Быдӟым Вавилонэн? Усьтӥськонын 17:16, 17 тазьы вераське: «Дас сюръёс, кудъёссэ тон пӧйшур вылысь адӟид, соос адӟемпотостэм карозы азыса-калгыса улӥсь кышномуртэз, таркалозы сое, гольык карозы, солэсь лулмугорзэ сиёзы, сое тыл пушкын сутозы; малы ке шуоно Инмар соослэн сюлмазы Аслэсьтыз эриксэ, одӥг эриксэ быдэстон мылкыд понӥз». Озьыен, Иегова калыкъёслэсь мылкыдзэс ӝутоз «нап горд пӧйшурез», яке ООН-эз, узатыны зэмос луисьтэм религилэн дунневыл империез вылэ урдскыны но быдэсак сое быдтыны (Усьт. 18:21—24).

18. Кызьы ми возьматыны быгатӥськомы, милям Быдӟым Вавилонлэн ужъёсаз пыриськеммы уг поты шуыса?

¹⁸ Малы милемлы тае тодыны кулэ? Туж тыршоно, осконмы «Инмар азьын... ярамон дун-чылкыт» мед луоз шуыса  (Иак. 1:27). Чылкыт луон понна, пыриськоно ӧвӧл Быдӟым Вавилонлэн ужъёсаз, солэн дышетонъёсызлы осконо ӧвӧл, спиритизмен выроно ӧвӧл, праздникъёсаз но сьӧлыко ужъёсаз пыриськоно ӧвӧл. Озьы ик ми азьланяз но адямиослэсь мылкыдзэс ӝутомы Быдӟым Вавилонысь потыны, соос соин ӵош медаз быре шуыса (Усьт. 18:4).

19. Кин со «бадӟым горд лобась кый»?

¹⁹ Усьтӥськон книгаын вераське «бадӟым горд лобась кый» сярысь, кудӥз Иисусэн но солэн ожгарчиосыныз ожмаське (Усьт. 12:3, 7—9). Со Инмарлэн калыкезлы пумитъяське но кужым сётэ пӧйшуръёслы, кудъёсыз кивалтэтъёсты возьмато (Усьт. 12:17; 13:4). Та «туж бадӟым лобась кый, вашкала кый... диавол, шайтан шуыса» нимаське (Усьт. 12:9; 20:2). Иеговалэн тушмонъёсыз солэсь кылзӥськыса уло.

20. Мар луоз «туж бадӟым лобась кыен»?

²⁰ Мар луоз «туж бадӟым лобась кыен»? Кызьы вераське Усьтӥськонын 20:1—3, Шайтанэз 1 000 арлы пыдэстэм дуннее сэрпалтозы. Мукет кылъёсын вераса, со пытсэтын кадь пукоз. Соку со калыкъёсты пӧяны уз быгаты ини. Собере Шайтан но периос «сераё, тылын ӝуась тыэ куштэмын» луозы, яке пыраклы быдтэмын луозы (Усьт. 20:10). Пуктэ син азяды, кыӵе умой улон луоз Шайтантэк но периостэк!

21. Малы ми шумпотӥськомы, Усьтӥськон книгаез эскерыса?

²¹ Ми шумпотӥмы валаны, мае возьмато Усьтӥськон книгаысь символъёс! Ми тодӥмы Иеговалэсь тушмонъёссэ но сое, мар соосын луоз. Зэм но, «шудо лыдӟись мурт, шудоесь та азьпалзэ тодытыса веранлэсь кылъёссэ кылзӥсьёс»! (Усьт. 1:3). Нош мар возьма Инмарлэсь оскымон ужась-тыршисьёссэ, куке солэн тушмонъёсыз быдтэмын луозы? Тае ми вуоно статьяысь тодомы.