1. Мар каризы ини тросэз егитъёс, христиан сюрес вылэ султон понна?

 КОТЬКУД ар кӧня ке сюрс егитъёс пылатӥсько. Тон но соос пӧлын ке, Иегова, вын-агайёс но сузэр-апайёс тон понна туж шумпото! (Мад. 27:11). Ойдо малпаськомы, мар тон карид ини, христиан сюрес вылэ султон понна. Кӧня ке аръёс ӵоже тон Библиез тыршыса эскерид, дыр. Со юрттӥз тыныд оскыны, Библия — со Инмарлэн Кылыз шуыса. Со сяна, тон тодӥд но яратӥд Библилэсь Авторзэ. Нош али тон Иеговалы сӥзиськид но пылатӥськид. Тон шонер быръён лэсьтӥд!

2. Мае ми эскеромы та статьяын?

² Егитъёс, пылатӥськемдылэсь азьло тӥ пумиськылӥды, дыр, шуг-секытъёсын, кудъёсыз Иеговалы оскондэс эскеризы. Будэмдыя тӥ мукет шуг-секытъёсын пумиськоды на, малы ке шуоно Шайтан тыршоз, тӥ Иеговаез яратэмысь но солы ужамысь-тыршемысь мед дугдоды шуыса (Еф. 4:14). Но солы эн сётске! Мар юрттоз тӥледлы быдэс улонды ӵоже Иеговалы оскымон луыны? Азьланяз но оскондэс юнматыны тырше (Евр. 6:1). Ойдолэ тодомы, мар со понна кароно.

3. Мар кароно вань христианъёслы пылатӥськемзы бере но?

³ Ваньмылы милемлы кылзӥськоно визь-кенешлэсь, кудзэ апостол Павел Ефес карысь вын-агайёслы но сузэр-апайёслы сётӥз. Со соослэсь мылкыдзэс ӝутӥз «быдэ  вуыны» (Еф. 4:13). Мукет сямен вераса, соослы азьланяз но осконзэс юнматоно вал. Павел христианъёслэсь быдэ вуэмзэс ӵошатӥз нылпилэн будэменыз. Анай-атайёс асьсэлэсь нылпизэс туж ярато но соин данъясько. Но дыр ортчыса, нылпи будэ. Солы ассэ пичи мурт сямен возёно ӧвӧл ини (1 Кор. 13:11). Озьы ик кароно христианъёслы но. Пылатӥськеммы бере милемлы азьлань мыноно. Мар милемлы юрттоз? Ойдолэ эскеромы куд-ог визь-кенешъёсты.

4. Филиппыослы 1:9 верамъя, мар юрттоз тыныд оскондэ юнматыны? Валэкты.

⁴ Иеговаез эшшо но золгес яраты. Тон Иеговаез туж яратӥськод ини, но быгатӥськод эшшо но золгес яратыны. Кызьы? Тае валэктэ апостол Павел. (Лыдӟе Филиппыослы 1:9.) Со вӧсяськиз, Филиппы карысь христианъёслэн яратонзы «эшшо но эшшо мед будоз» шуыса. Озьыен, ми быгатӥськомы Иеговаез эшшо но золгес яратыны. Со понна «тодон-валан басьтоно». Ми Иеговаез умойгес тодыны тыршимы ке, соку эшшо но золгес сое яратомы, солэсь умой сямъёссэ но ӟеч ужъёссэ дунъяломы. Милям мылкыдмы будоз Инмарез шумпоттыны. Озьы ик ми тыршомы Инмарлэсь курон-косонъёссэ валаны но солы ярамон луыны.

5, 6. Мар юрттоз милемлы Иеговаез эшшо но золгес яратыны? Валэкты.

⁵ Со сяна, Иеговаез эшшо но золгес яратон понна, солэн Пиеныз тодматсконо, малы ке шуоно со котькинлэсь умой Атаезлэсь сямъёссэ возьматӥз (Евр. 1:3). Иисусэз тодон понна, ньыль Евангелиосты эскероно. Умой луысал Библиез котькуд нунал лыдӟыны. Библиысь Иисус сярысь лыдӟыса, валаны тыршы, кыӵе сямо со вал. Адямиос Иисуслы вазиськыны ӧз кышкалэ. Куке со доры нылпиосты вайылӥзы, со соосты ӟыгыръяз но кияз басьтылӥз (Марк 10:13—16). Иисуслэн дышетскисьёсыз но со вӧзын асьсэды умой шӧдӥзы. Соос быгатӥзы солы асьсэлэсь малпанъёссэс вераны (Матф. 16:22). Та пумысен Иисус Атаезлэсь быдэсак адӟем кариз. Иегова вӧсяськонъёсмес сак кылзэ. Ми быгатӥськомы солы сюлэммес усьтыны. Ми оскиськомы, со милемыз уз пыкылы шуыса. Инмысь Атаймы милемыз яратэ но ми сярысь сюлмаське (1 Пётр 5:7).

⁶ Иисус адямиосты жаляз. Апостол Матфей гожтӥз: «Иисус люкаськем калыклэсь возьмаськисьтэк кылем ыжъёс кадь катьтэммемзэ, пазьгиськемзэ адӟыса жаляз соосты» (Матф. 9:36). Нош кызьы ми шоры учке Иегова? Иисус вераз: «Тӥляд Инмысь Атайдылэн та покчиос пӧлысь огзэс но быдтэмез уг поты» (Матф. 18:14). Та кылъёс милемыз шумпотто, малы ке шуоно соос возьмато, Иегова милемыз туж яратэ шуыса! Иисусэз умойгес тодыса, ми Иеговаез эшшо но золгес яратӥськомы.

7. Кыӵе пайда ваёз, тон юн осконэн вын-агайёсын но сузэр-апайёсын эшъяськид ке?

⁷ Мар эшшо кароно на, Иеговаез золгес яратон понна но осконэз юнматон понна? Умойгес тодматскы кенешысьтыд вын-агайёсын но сузэр-апайёсын, кудъёсызлэн юн осконзы. Тон адӟод, соос шумпотыса уло шуыса. Соос нокӧня но уг жаляло, Иеговалы ужаны-тыршыны кутскизы шуыса. Кур соосты вераны учыръёсты, кудъёсыз луизы соосын, Иеговалы ужакузы-тыршыкузы. Кулэ луись  ужпум кутэмедлэсь азьло соослэсь визь-кенеш кур, малы ке шуоно Библиын гожтэмын: «Визь-кенеш сётӥсьёс трос ке, калык ӟеч улэ» (Мад. 11:14).

8. Мар кароно, Библиысь дышетонъёслы осконэд лябӟиз ке?

⁸ Оскондэ лябӟытӥсь малпанъёсты палэнты. Кыкетӥ абзацын вераськиз ини, Шайтан оскондэ лябӟытыны тыршоз шуыса. Кызьы? Кылсярысь, эволюцилы дышетыса, со тыршоз Библиысь зэмлыкъёслы оскондэ лябӟытыны. Пичи дыръяд эволюция сярысь тон номыре ӧд но кылы, дыр. Нош али тонэ со сярысь школаын дышето, луоз. Дышетӥсьёс со сярысь туж оскымон кадь вераны быгато. Но соос асьсэос, Кылдытӥсь вань-а, ӧвӧл-а шуыса, ноку пыр-поч ӧз но эскере, вылды. Малпаськы, мар гожтэмын Мадёнъёсын 18:18: «Ченгешонэз-кыстаськонэз нырысь кутскись мурт шонер лэсьтэ кадь потэ, но соин вожвылъяськись мурт лыктэ но юалляськыса сое эскере-чакла». Соин ик эн оскы ваньмызлы, малы тонэ школаын дышето, нырысь пыр-поч эскеры, мар со сярысь Инмарлэн Кылыз вера. Эскеры публикациосмес. Вераськы вын-агайёсын но сузэр-апайёсын, кудъёсыз азьвыл эволюцилы оскизы. Юа, малы соос али оско, Кылдытӥсь вань шуыса. Соосын вераськыса, тон эшшо но умойгес валалод, Инмар зэм но вань шуыса.

9. Малы тон дышетскыны быгатӥськод Мелисса сузэрлэсь?

⁹ Мелисса b сузэр эскериз, малы оскыны луэ, Кылдытӥсь вань шуыса. Та юрттӥз солы осконзэ лябӟытӥсь малпанъёссэ палэнтыны. Со вера: «Школаын эволюция сярысь туж оскымон дышето. Нырысь мынам уг поты вал та юанэз эскереме, малы ке шуоно мон кышкай, ачим но эволюцилы оскыны кутско шуыса. Но собере мон малпай: „Иеговалэн уг поты, ми солы малпаськытэк мед ужаломы-тыршомы шуыса“. Соин ик мон ужпум кутӥ та юанэз эскерыны. Мон лыдӟи „Сюлмаськись Кылдытӥсь — вань-а со?“ книгаез, озьы ик „Улон кылдытэмын-а вал?“ но „Улонлэн кылдэмез. Вить юанъёс, кудъёсызлы  валэктонъёс шедьтоно“ брошюраосты. Та мыным туж юрттӥз! Мон туж жалясько, та юанэз азьлогес ӧй эскеры шуыса».

10, 11. Мар юрттоз тыныд азон-калгон сьӧлыклэсь палэнскыны? (1 Фессалоникаослы 4:3, 4).

¹⁰ Сьӧлыкез палэнты. Егит дыръязы нылъёслэн туж зол мылкыдзы вань пиосын кӧланы, нош пиослэн — нылъёсын. Со сяна, мукетъёсыз но тыныд секс ӵектыны быгато. Шайтан шумпотоз, тон кырсь мылпотонъёсыдлы сётскид ке. Мар юрттоз тыныд сыӵе мылпотонъёслы сётскытэк улыны? (Лыдӟе 1 Фессалоникаослы 4:3, 4.) Шӧдонъёсыд сярысь Иеговалы вера, солэсь кужым кур (Матф. 6:13). Эн вунэты: Иеговалэн тонэ кылкутытэмез уг поты, солэн тыныд юрттэмез потэ (Пс. 102:13, 14). Озьы ик тыныд Библия кужым сётыны быгатэ. Мелисса, кудӥз сярысь вераськиз ини, кырсь мылпотонъёсыныз нюръяськиз. Со вера: «Котькуд нунал Библиез лыдӟон юрттӥз мыным шонертэм мылпотонъёсыным нюръяськыны. Библиез лыдӟон юрттӥз мыным тодам возьыны, мон Иеговалы сӥзиськи но мынам солы ужаме-тыршеме потэ шуыса» (Пс. 118:9).

¹¹ Эн тыршы шуг-секытэныд огнад нюръяськыны. Со сярысь анай-атаеныд вераськы. Сыӵе юанъёс сярысь вераськыны капчи ӧвӧл ке но, со туж кулэ. Мелисса азьланьтэ: «Мон Иеговалэсь кышкасьтэм сям кури но шуг-секытэ сярысь атаелы верай. Вераськеммы бере мыным капчигес луиз. Мон валай, Иегова монэн данъяське шуыса».

12. Кызьы шонер ужпумъёс кутоно?

¹² Библиысь возетъёсъя ул. Будэмъяд тон эрикогес луиськод но тросгес ужпумъёс ачид кутыны быгатӥськод. Озьы ке но тынад визьлыкед тырмыт ӧвӧл на. Соку кызьы палэнсконо янгышъёслэсь, кудъёсыз Иеговаен кусыпъёстэ сӧрыны быгато? (Мад. 22:3). Кари сузэр валэктэ, мар юрттӥз солы шонер ужпумъёс кутыны. Со валаз, юн осконэн христиан муртлы котькуд учырлы закон кулэ ӧвӧл шуыса. Со вера: «Законъёсты утчам интые, Библиысь возетъёсты валаны тыршоно». Библиез лыдӟыкуд, малпаськы: «Лыдӟем кылбуръёсме лыдэ басьтыса, кызьы малпаське Иегова? Вань-а та кылбуръёс пӧлын возетъёс, кудъёсыз юрттозы мыным асме шонер возьыны? Кыӵе пайдаез луоз, мон та возетъёсъя улӥ ке?» (Пс. 18:8; Ис. 48:17, 18). Библиез лыдӟыса но отысь возетъёс вылын малпаськыса, тыныд капчигес луоз шонер ужпумъёс кутыны но Иеговаез шумпоттыны. Осконэд будэмъя, тон умойгес валалод, кызьы Иегова малпаське. Со сяна, котькуд учырлы тыныд закон кулэ уз луы ини.

13. Кызьы тыныд умой эшъёс юрттыны быгато? (Мадёнъёс 13:21).

¹³ Эшъяськы соосын, кинъёс Иеговаез ярато. Кызьы вераськиз ини, умой эшъёс осконэз юнматыны быгато. (Лыдӟе Мадёнъёсты 13:21.) Сара сузэр шӧдӥз, шумпотонзэ ыштыны кутскиз шуыса. Но со умой сузэръёсын эшъяськиз. Со вера: «Ӵапак дырыз дыръя мон юн осконэн сузэръёсын эшъяськи. Егит сузэрен ми котькуд арняе „Возьмаськон башняез“ эскеримы. Нош мукетыз сузэр юрттӥз мыным пумиськонъёсын валэктонъёс сётъяны. Соос юрттӥзы мыным ас поннам Библиез эскеронлы но вӧсяськонлы тросгес саклыкме висъяны. Мынам Иеговаен  кусыпъёсы юнмазы, озьы ик мон нош ик шумпотыса улыны кутски».

14. Кызьы Джулиен агай умой эшъёс шедьтӥз?

¹⁴ Кызьы умой эшъёс шедьтоно? Джулиен нимо тӧро егит дырзэ тодаз вае: «Ужан-тыршон юрттӥз мыным оскымон эшъёс шедьтыны. Куке мон ӟырдыт мылкыдын тодытэмзэс адӟи, мон валай, кыӵе шумпотон вае тодытон уж. Мон но аслым ужпум пуктӥ вань дырме сётыса ужаны-тыршыны. Озьы ик мон валай, пӧртэм арлыдо вын-агайёс но сузэр-апайёс пӧлысь умой эшъёс шедьтыны быгатӥсько шуыса. Берлогес, Вефильын ужакум-тыршыкум но, мынам умой эшъёсы вал. Соос юрттӥзы мыным шутэтскон амалъёсты визьмо бырйыны. Нош со Иеговаен кусыпъёсме эшшо но юнматӥз».

15. Кыӵе визь-кенеш сётӥз апостол Павел Тимофейлы? (2 Тимофейлы 2:20—22).

¹⁵ Нош мар кароно, тон шӧдӥд ке, кенешысь куд-ог вын-агайёс яке сузэр-апайёс тынэсьтыд оскондэ лябӟыто шуыса? Нырысетӥ даурын но христиан кенешын ваньзылэн юн осконзы ӧй вал. Апостол Павел тае валаз но Тимофеез куриз сыӵе адямиослэсь палэнскыны. (Лыдӟе 2 Тимофейлы 2:20—22.) Иеговаен кусыпъёсмы туж дуно. Ми туж тыршимы соосты юнматыны. Соин ик нокинлы эн лэзе Иеговаен кусыпъёстэс лябӟытыны (Пс. 25:4).

16. Кыӵе ужпумъёс пуктоно?

¹⁶ Кулэ луись ужпумъёс пукты. Бырйы сыӵе ужпумъёс, кудъёсыз оскондэ юнматозы но тыныд умойгес луыны юрттозы (Еф. 3:16). Кылсярысь, тросгес саклыктэ висъя ас поннад Библиез эскеронлы но Библиез лыдӟонлы (Пс. 1:2, 3). Со сяна, тыршы ӵемгес но вань сюлмысьтыд вӧсяськыны. Озьы ик тыршы шутэтскон амалъёсты визьмо бырйыны но дырдэ шонер радъяны (Еф. 5:15, 16). Иегова адӟиз ке, тон оскондэ юнматыны тыршиськод шуыса, со туж шумпотоз.

17. Кыӵе пайда ваёз, тон мукетъёсызлы юрттӥд ке?

¹⁷ Тон оскондэ юнматод, куке мукетъёсызлы юрттод. Та сярысь Иисус шуиз: «Басьтон сярысь, сётыны умойгес»  (Ап. уж. 20:35). Мукетъёсызлы дырдэ но кужымдэ ӧд жаля ке, тон шумпотод. Кылсярысь, ужпум пуктыны луэ юрттыны кенешысьтыды арлыдоослы но соослы, кинъёслэн тазалыксы ляб. Соос шумпотозы, тон магазинэ ветлӥд ке яке соослы электрон тӥрлыкенызы ужаны юрттӥд ке. Агайёс быгато асьсэлы ужпум пуктыны кенешлы юрттӥсь луыны, вын-агайёслы но сузэр-апайёслы эшшо но тросгес лэсьтон понна (Флп. 2:4). Нош кызьы яратонмес возьматоно Адӟись-Ивортӥсь луисьтэм адямиослы? Соослы ӟырдыт мылкыдын Эксэйлык сярысь ӟеч иворез вера (Матф. 9:36, 37). Быгатӥськод ке, ужпум пукты вань дырдэ сётыса ужаны-тыршыны.

18. Кызьы вань дырдэ сётыса ужан-тыршон юрттоз тыныд оскондэ юнматыны?

¹⁸ Вань дырдэ сётыса ужан-тыршон юрттоз тыныд оскондэ ӝоггес юнматыны. Малпа гинэ, кыӵе луонлыкъёс соку тон азьын усьтӥськозы! Пионер луид ке, тон быгатод Эксэйлыкез тодытӥсьёслы школаын дышетскыны, Вефильын ужаны-тыршыны яке организацимылэн пуктӥськон-тупатъян ужъёсаз пыриськыны. Кейтлин нимо егит сузэр, кудӥз пионер луыса ужа-тырше, вера: «Юн осконэн вын-агайёсын но сузэр-апайёсын тодытон юрттӥз мыным осконме юнматыны. Соос шоры учкыса, мон Библиез мургес эскерыны кутски но эшшо но умойгес дышетӥсь луи».

19. Кыӵе кузьымъёс дасяз тыныд Иегова?

¹⁹ Иегова тыныд трос кузьымъёс дасяз. Но тыныд азьланяз но оскондэ юнматыны кулэ. Соку егит дырыд юнме уз ортчы (1 Иоанн 2:17). Тон трос янгышъёслэсь палэнскод но шумпотыса улод (Мад. 16:3). Озьы ик мукет вын-агайёслэн но сузэр-апайёслэн мылкыдзы ӝутскоз тынэсьтыд адӟем карыны (1 Тим. 4:12). Нош тужгес но валтӥсез: тон каньыл сюлмын но шумпотыса улод, малы ке шуоно Иегова матысь эшед луоз (Мад. 23:15, 16).