ЭСКЕРОН ПОННА СТАТЬЯ 33
Иегова ужась-тыршисьёсыз сярысь сюлмаське
«Кузё-Инмарлэн синмыз Солэсь кышкасьёс... вылын улэ» (ПС. 32:18).
4-ТӤ КЫРӞАН «Иегова — мой Пастырь»
ТА СТАТЬЯЫН a
1. Малы Иисус Иеговаез куриз дышетскисьёссэ утьыны?
КУЛОН азяз уе Иисус инмысь Атаезлы нимысьтыз куронэн вазиськиз. Со куриз Иеговаез дышетскисьёссэ утьыны (Иоанн 17:15, 20). Валамон, Иегова котьку но сюлмаське аслаз калыкез сярысь. Но Иисус тодӥз, Шайтан дышетскисьёссэ туж лек уйылоз-уллялоз шуыса. Озьы ик со валаз, Иеговалэн юрттэменыз гинэ соос Шайтанлэсь урдскемзэ чиданы быгатозы шуыса.
2. Малы милемлы шуг-секытъёслэсь кышкано ӧвӧл? (Псалтирь 32:18—20).
2 Шайтанлэн дуннеяз улыса, Иеговалэн ужась-тыршисьёсыз трос шуг-секытъёсын пумиськыло. Куддыръя соос милемлы вормонтэм кадь пото но Иеговалы оскымон луэммес эскеро. Та статьяысь ми адӟомы, милемлы номырлэсь кышкано ӧвӧл шуыса. Иегова ми сярысь сюлмаське. Со милесьтым вань шуг-секытъёсмес адӟе но котьку юрттыны дась. Ойдолэ эскеромы Библиысь кык примеръёсты, кудъёсыз возьмато, «Кузё-Инмарлэн синмыз Солэсь кышкасьёс... вылын улэ» шуыса. (Лыдӟе Псалтирез 32:18—20.)
КУКЕ ШӦДӤСЬКОМЫ, ОГНАМЫ КЫЛИМЫ ШУЫСА
3. Ку ми шӧдыны быгатомы, огнамы кылимы шуыса?
3 Ми котырын трос вын-агайёс но сузэр-апайёс ке но, куддыръя ми шӧдӥськомы, огнамы кылимы шуыса. Кылсярысь, егитъёслэн сыӵе шӧдонъёссы кылдыны быгато, куке соос ӵош дышетскисьёссы азьын осконзы сярысь верало яке мукет кенеше выжо. Кин ке но ми пӧлысь урод шӧдонъёсыныз нюръяське но малпа, со ачиз соосты вормыны кулэ шуыса. Куддыръя ми кышкаськомы мукетъёсызлы сюлэммес усьтыны но малпаськомы, соос милемыз уг валало но ми сярысь уг сюлмасько шуыса. Ваньмыз таиз сэрен милям киосмы лэзиськыны быгато но милемлы кышкыт луэ. Соин ик, дуно вын-агайёс но сузэр-апайёс, тодады возе: Иеговалэн уг поты, милям таӵе шӧдонъёсмы мед луозы шуыса. Кытысь ми тае тодӥськомы?
4. Малы Илия пророк вераз: «Мон огнам кыли»?
4 Тодамы ваёмы, мар луиз Илия пророкен. Иезавель эксэй кышно сое виыны малпа вал (3 Экс. 19:1—9). Илия 40 нуналлэсь но тросгес пещераын ватскыса улӥз. Та дыре со Иеговалы вераз: «Мон огнам кыли» (3 Экс. 19:10). Зэмзэ вераса, та шаерын вал на мукет пророкъёс но. Кылсярысь, Авдий быгатӥз 100 пророкъёсты Иезавель эксэй кышнолэсь утьыны (3 Экс. 18:7, 13). Соку малы Илия шӧдӥз, со одӥгназ кылемын шуыса? Малпаз-а со, мукет пророкъёс, кудъёссэ Авдий утиз, улэпесь ӧвӧл ини шуыса? Оло со малпаз, Кармил гурезьын луэм учыр бере нокин но Иеговалы ужаны-тыршыны ӧз кутскы шуыса? Яке солы потӥз, нокин но уг тоды, сое виыны малпало но ваньзы сое вунэтӥзы шуыса? Библиын пыр-поч верамын ӧвӧл, малы Илиялэн таӵе шӧдонъёсыз кылдӥзы. Но ми тодӥськомы: Иегова Илиялэсь шӧдонъёссэ умой валаз но тодӥз, кызьы солы юрттоно.
Куке ми шӧдӥськомы, огнамы кылимы шуыса, кызьы милемыз буйгатыны быгатэ Иеговалэн Илия пророклы юрттэмез? (Учке 5-тӥ но 6-тӥ абзацъёсты.)
5. Кызьы Иегова оскытӥз Илияез, со огназ ӧвӧл шуыса?
5 Иегова Илиялы пӧртэм амалъёсын юрттылӥз? Со Илиялэсь мылкыдзэ ӝутӥз сюлэмзэ усьтыны. Иегова кык пол юаз солэсь: «Илия, малы тон татын?» (3 Экс. 19:9, 13). Куке Илия шӧдонъёсыз сярысь вералляз, Иегова сое сак кылзӥз. Собере Инмар, кужымзэ возьматыса, оскытӥз Илияез, со соин артэ шуыса. Озьы ик со оскытӥз сое, со огназ ӧвӧл, соин ӵош Израильысь мукет адямиос но Иеговалы йыбыртъяло шуыса (3 Экс. 19:11, 12, 18). Пуктэ син азяды, макем капчи луиз Илиялы, куке со инмысь Атаезлы сюлэмзэ усьтӥз, нош Иегова солы ответ сётӥз. Со сяна, Инмар Илиялы кӧня ке кулэ луись ужъёс сётӥз. Со косӥз сое вӧйын зырӟыны Азаилэз Сирияын эксэй луыны, Ииуез — Израильын эксэй луыны но Елисеез — пророк луыны (3 Экс. 19:15, 16). Таӵе ужъёсты сётыса, Иегова юрттӥз Илиялы умоезлы саклыксэ висъяны. Озьы ик Инмар сётӥз Илиялы Елисеез, кудӥз солы матысь эш но юрттӥсь луиз. Нош кызьы Иегова милемлы юрттыны быгатэ, куке ми шӧдӥськомы, огнамы кылимы шуыса?
6. Мар сярысь тон вӧсяськыны быгатӥськод, куке шӧдӥськод, огнад шуыса? (Псалтирь 61:9).
6 Иегова ӧте тонэ солы вӧсяськыны. Со адӟе вань шуг-секытъёстэ но оскытэ, котькыӵе дыре со тонэ кылзыны дась шуыса (1 Фес. 5:17). Иеговалы ужась-тыршисьёсызлэн вӧсяськонъёссы туж кельшо (Мад. 15:8). Мар сярысь тон вӧсяськыны быгатӥськод, куке шӧдӥськод, огнад кылид шуыса? Илия сямен, сюлэмдэ Иеговалы усьты. (Лыдӟе Псалтирез 61:9.) Вера солы вань шуг-секытъёсыд сярысь но шӧдонъёсыд сярысь. Кур Иеговаез юрттыны тыныд урод шӧдонъёсыныд нюръяськыны. Школаын тодытыкуд, тон шӧдӥськод ке, огнад шуыса, но тыныд кышкыт ке, Иеговалэсь кышкасьтэм сям кур. Озьы ик солэсь визьлык кур шонер кылъёсын но лякытэн вераськыны (Лука 21:14, 15). Йырад урод малпанъёс бергало ке, кур Иеговаез юрттыны тыныд юн осконэн христиан муртэн вераськыны. Кур Иеговаез, со адями тонэ валаны мед быгатоз шуыса. Эн возьдаськы вераны Иеговалы ваньзэ, мар тынад сюлмад. Тыршы адӟыны, кызьы со вӧсяськонъёсыдлы ответ сётэ. Мукетъёсызлэсь юрттэмзэс эн палэнты. Соку тыныд туж ик мӧзмыт уз луы ни.
Тыршиськоды-а тӥ тросгес ужаны- тыршыны но мукетъёсыныз ӵош тодытыны? (Учке 7-тӥ абзацез.)
7. Малы тонэ дышетэ Маурисио агайлэн учырез?
7 Иегова милемлы туж кулэ луись уж оскиз. Юн оскы, со адӟе но дунъя ваньзэ, мае тон лэсьтӥськод кенешын но, ужан-тыршонын но (Пс. 109:3). Кызьы Иеговалы ӟырдыт мылкыдын ужан-тыршон юрттоз тыныд вормыны шӧдондэ, тон огнад кылид шуыса? Учкомы Маурисио b нимо егит агайлэсь примерзэ. Пылатӥськемез бере ик одӥгез эшез Иеговалэсь палэнскыны кутскиз. Маурисио тодаз вае: «Эшелэн Иеговалэсь палэнскемез сэрен, мон аслым ачим оскемысь дугдӥ. Мон малпай: „Нош мон быгато-а Иеговалы оскымон кыльыны? Ярамон луо-а Иеговалэн семьяяз пырыны?“ Мыным потӥз, мон чылкак огнам но монэ нокин уг вала шуыса». Мар юрттӥз Маурисио агайлы? Со вера: «Мон кутски ӵемгес тодытыны. Солы луыса мон ачим сярысь гинэ малпаськемысь но мултэс сюлмаськемысь дугдӥ. Агайёсын но сузэръёсын тодытыса, мон шумпотӥ. Мыным туж ик мӧзмыт ӧй вал ини». Зэм, али ми ӵош пумиськыса тодытыны ум быгатӥське, но ми шумпотӥськомы ӵош гожтэтъёс гожъяны но телефон пыр тодытыны. Нош мар эшшо юрттӥз на Маурисио агайлы? Со азьланьтэ: «Мон кенешлэн ужъёсаз тросгес пыриськыны кутски. Дышетскон ужъёслы мон тыршыса дасяськи. Соосты быдэсъякум, мон шӧдӥ, кызьы Иегова но мукетъёсыз монэ дунъяло».
КУКЕ ШУГ-СЕКЫТЪЁСЫН ПУМИСЬКИСЬКОМЫ
8. Мае ми шӧдыны быгатомы шуг-секытъёс дыръя?
8 Ми тодӥськомы, берпум нуналъёсы шуг-секытъёсын пумиськыломы шуыса (2 Тим. 3:1). Озьы ке но куддыръя соос шӧдтэк шорысь кылдо. Ми пумиськыны быгатӥськомы коньдонэн герӟаськем шуг-секытъёсын, секыт висёнэн яке матысь адямимы кулэ. Сыӵе дыре милемлы туж секыт луэ, уката но, куке шуг-секытъёс огзы бӧрсьы огзы яке ваньзы огдыре кылдо. Но ойдолэ тодамы возёмы: Иегова ваньзэ тае адӟе. Солэн юрттэменыз ми ваньзэ чидаломы.
9. Кыӵе шуг-секытъёсын пумиськиз Иов?
9 Ойдолэ тодамы ваёмы, кызьы Иегова юрттӥз Иовлы, оскымон ужась-тыршисезлы. Вакчи дыр куспын Иов трос куректонъёсын пумиськиз. Одӥг нуналэ со ыштӥз вань пудозэ, вань ляльчиоссэ, нош тужгес но кышкытгес, вань яратоно нылпиоссэ (Иов 1:13—19). Но та ваньмыз ӧвӧл на. Со вакытэ ик Иов кышкыт висёнэн висьыны кутскиз (Иов 2:7). Куректэмезлы чидатэк, Иов кеськиз: «Синазькыль луиз мыным улон» (Иов 7:16).
Иеговалэн Иовез оскытэмез потэ вал, со сое яратэ шуыса. Соин ик Инмар Иовлэсь саклыксэ висъяз, кызьы со кылдытэмъёсыз сярысь сюлмаське. (Учке 10-тӥ абзацез.)
10. Кызьы Иегова юнматӥз Иовез, со шуг-секытъёссэ чиданы мед быгатоз шуыса? (Учке вылбамысь суредэз.)
10 Иегова адӟиз ваньзэ, маин пумиськиз Иов. Со яратӥз аслэсьтыз ужась-тыршисьсэ, соин ик юнматӥз сое, вань куректонъёссэ чиданы мед быгатоз шуыса. Иегова вераськиз Иовен. Со солы тодаз вайытӥз паймымон визьлыкез сярысь, озьы ик со сярысь, макем со сюлмаське аслаз кылдытэмъёсыз сярысь. Инмар пӧртэм пудо-животъёслы Иовлэсь саклыксэ висъяз (Иов 38:1, 2; 39:9, 13, 19, 27; 40:10; 40:20, 21). Озьы ик, Иовез юнматон но буйгатон понна, Иегова со доры Елиуй нимо пиосмуртэз ыстӥз. Елиуй Иовез оскытӥз, Иегова ужась-тыршисьёссэ чидамзы понна котьку но бакель каре шуыса. Со сяна, Иегова Елиуйлэсь мылкыдзэ ӝутӥз Иовлы лякытэн визь-кенеш сётыны. Елиуй юрттӥз Иовлы ачиз сярысь укыр трос малпаськытэк улыны. Со солэсь саклыксэ висъяз, ӵошатоно ке Иеговаен, быдэс Дуннеез Кылдытӥсен, ми туж пичиесь шуыса (Иов 37:14). Эшшо Инмар Иовлы уж сётӥз: солы кулэ вал вӧсяськыны куинь эшъёсыз понна, кудъёсыз Иеговалы пумит сьӧлыказы (Иов 42:8—10). Нош кызьы Иегова милемыз юнматэ, куке ми шуг-секытъёсын пумиськиськомы?
11. Кызьы милемлы юрттыны быгатэ Библия, куке ми шуг-секытъёсын пумиськиськомы?
11 Туннэ Иегова милемын уг вераськы озьы, кызьы со вераськиз Иовен. Но ми кылӥськомы солэсь куаразэ, куке Библиез лыдӟиськомы (Рим. 15:4). Со буйгатэ милемыз, вуоноезлы оскон сётыса. Эскеромы Библиысь куд-ог малпанъёсты, кудъёсыз юнматозы милемыз секыт дыръя. Иегова кылзэ сётэ: нокыӵе куректонъёс «асьмемыз Инмарлэн яратонэзлэсь люкыны уз быгатэ» (Рим. 8:38, 39). Озьы ик Иегова оскытэ милемыз, со «ваньмызлы вӧсяськисьёслы... матын улэ» шуыса (Пс. 144:18). Инмысь Атаймылэн верамезъя, ми со вылэ оскиськимы ке, пӧртэм шуг-секытъёсты шумпотыса пумиталомы но соосты чиданы быгатомы (1 Кор. 10:13; Иак. 1:2, 12). Озьы ик Библия тодамы вайытэ, пырак улонэн ӵошатыса, милям шуг-секытъёсмы огдырлы гинэ шуыса (2 Кор. 4:16—18). Иегова оскытэ милемыз: со быдтоз Шайтанэз но лек ужъёсын вырисьёсты, кудъёсыз сэрен вань шуг-секытъёсмы кылдо (Пс. 36:10). Быгатӥськоды-а тӥ дышетыны Библиысь кӧня ке кылбуръёсты, кудъёсыз тӥледыз буйгатозы но вуоно шуг-секытъёсты чиданы юрттозы?
12. Мар карыны Иегова милесьтым мылкыдмес ӝутэ?
12 Иегова мылкыдмес ӝутэ дыр висъяны, Библиез ялан эскерон но со вылын малпаськон понна. Басьтэм тодон-валанмес улонамы пыртыса, осконмы юнгес луэ но Инмысь Атаймылы матэгес луиськомы. Ваньмыз та милемлы кужым сётэ котькыӵе шуг-секытъёсты вормыны. Со сяна, соослы, кинъёс Библиысь юрттэт утчало, Иегова святой духсэ кузьма. Та дух милемлы «мертантэм бадӟым кужым» сётэ, ми котькыӵе визь сынаськонъёс пыр потыны мед быгатомы шуыса (2 Кор. 4:7—10).
13. Кызьы духовной сиён, кудзэ сётэ «оскиськымон, визьмо ляльчи», юрттэ милемлы куректонъёсмес чиданы?
13 Иегова «оскиськымон, визьмо ляльчилы» духовной сиён дасяны юрттэ (Матф. 24:45). Та ляльчи сётэ милемлы трос статьяос, видео но кырӟанъёс, кудъёсыз милесьтым осконмес но Иеговаен кусыпъёсмес юнмато. Ойдолэ котьку но уже кутомы сое, мае сётэ милемлы Иегова! Кемалась ӧвӧл Огазеяськем Штатъёсысь одӥг сузэр вераз, малы со тау каре духовной сиён понна. Со вера: «Мон Иеговалы 40 ар ӵоже ужасько-тыршисько ини. Та аръёс куспын мон трос куректонъёсын пумиськылӥ». Кылсярысь, та сузэрлэн песятаез кудӟем водитель сэрен кулӥз, анаез но атаез туж секыт висьыса кулӥзы, нош ачиз со кык пол раклэсь эмъяськиз ини. Мар юрттӥз солы ваньзэ тае чиданы? Сузэр валэктэ: «Иегова котьку но мон сярысь сюлмаське. Духовной сиён, кудзэ со сётэ оскиськымон, визьмо ляльчи пыр, юрттэ мыным сётскытэк улыны. Тӥни малы мон шӧдӥсько сое ик, мае шӧдӥз Иов, кудӥзлэн кулытозяз ик Иеговалы оскымон луэмез потэ вал» (Иов 27:5).
Кызьы ми кенешысь агайёслы но сузэръёслы юрттыны быгатӥськомы? (Учке 14-тӥ абзацез.)
14. Кызьы Иегова секыт дыръя юнматэ милемыз агайёсмы но сузэръёсмы пыр? (1 Фессалоникаослы 4:9).
14 Иегова дышетэ милемыз, аслэсьтыз ужась-тыршисьёссэ, секыт дыръёсы ог-огмес яратыны но буйгатыны (2 Кор. 1:3, 4; лыдӟе 1 Фессалоникаослы 4:9). Елиуй сямен, агайёсмы но сузэръёсмы юртто милемлы юн «осконэн улыны» (Ап. уж. 14:22). Кылсярысь, куке Дианалэн картэз секыт висьыны усиз, кенешсы юрттӥз солы Иеговаен матысь кусыпъёс возьыны. Со вера: «Милемлы капчи ӧй вал. Но вань та секыт толэзьёс ӵоже ми шӧдӥмы, кызьы Иегова милемыз яратэ но китӥмы кутыса возе. Агайёс но сузэръёс котьку но милемын артэ вал. Соос милемлы жингыртӥзы, ми доры куное ветлӥзы но милемыз ӟыгыръязы. Ваньмыз та юрттӥз милемлы сётскытэк улыны. Мон ачим машина уг нуллӥськы бере, агайёс но сузэръёс монэ кенеше но ужан-тыршонэ нуллӥзы, куке мон быгатӥ». Кыӵе умой, милям сыӵе яратӥсь но сюлмаськись агайёсмы но сузэръёсмы вань шуыса!
ТАУ КАРИСЬКОМЫ ИЕГОВАЛЫ ЯРАТЭМЕЗ НО СЮЛМАСЬКЕМЕЗ ПОННА
15. Малы ми оскиськомы, котькыӵе шуг-секыт пыр потыны быгатомы шуыса?
15 Куке но ми ваньмы шуг-секытъёсын пумиськомы, дыр. Но кызьы ми адӟимы, соку ми огнамы ум кыле. Яратӥсь Атаймы, Иегова, сюлмаське ми сярысь. Со котьку но милемын артэ, милемыз кылзыны но юнматыны дась (Ис. 43:2). Ми оскиськомы, Иеговаен котькыӵе шуг-секытъёсыз чидаломы шуыса. Со понна Инмар сётэ милемлы ваньзэ, мар кулэ. Ми быгатӥськомы солы вӧсяськыны. Со сётӥз милемлы Библиез но трос духовной сиён. Озьы ик милям вань яратӥсь агайёсмы но сузэръёсмы, кудъёсыз юртто милемлы секыт дыръя.
16. Мар кароно, Иегова ми сярысь котьку но мед сюлмаськоз шуыса?
16 Ми туж шумпотӥськомы, инмысь Атаймы ми сярысь сюлмаське шуыса! «Со бордын милям сюлэммы шумпотэ» (Пс. 32:21). Ми Иеговалэсь яратэмзэ но сюлмаськемзэ дунъяськомы ке, соку тау каромы ваньмыз понна, мае со милемлы сётэ. Нош мар эшшо кароно на, Иегова азьланяз но ми сярысь мед сюлмаськоз шуыса? Котьку но кылзӥськоно Иеговалэсь но лэсьтоно сое, мар шонер луэ солэн син азяз. Соку Иегова ми сярысь пырак дауръёс ӵоже сюлмаськоз! (1 Пётр 3:12).
30-ТӤ КЫРӞАН Мынам Утисе, Атае но Эше