1. Кыӵе зэмлык гожтэмын Екклесиастын 7:20?

 СОЛОМОН эксэй гожтӥз: «Музъем вылын ӧвӧл чик сьӧлыкатэк, ӟечлык лэсьтыса гинэ шонер улӥсь адями» (Екк. 7:20). Зэм но, ми ваньмы сьӧлыкоесь (1 Иоанн 1:8). Соин ик милемлы туж кулэ, милемыз Иегова но мукет адямиос простить мед карозы шуыса.

2. Мае ми шӧдӥськомы, куке эшмы милемыз простить каре?

² Котькудӥзлэн ми пӧлысь матысь эшсэ вӧсь каремез вань, дыр. Кусыпъёсмес тупатон понна, ми эшмес туж куримы милемыз простить карыны. Нош куке со милемыз простить кариз, ми туж шумпотӥмы, дыр.

3. Мае ми эскеромы та статьяын?

³ Милям потэ, Иегова самой умой эшмы мед луоз шуыса. Но куддыръя ми вераськомы но лэсьтӥськомы сое, мар Инмарез вӧсь каре. Малы оскыны быгатӥськомы, Иеговалэн милемыз простить каремез потэ шуыса? Маин пӧртэм луэ Иеговалэн простить каремез милям простить кареммылэсь? Кинэ Иегова простить каре?

4. Кытысь ми тодӥськомы, Иегова простить карыны дась шуыса?

⁴ Библиын гожтэмын, Иегова простить карыны дась шуыса. Тани мар вераз Инмар ачиз сярысь Моисейлы  кылчинэз пыр: «Кузё-Инмар, Кузё-Инмар, адямиез яратӥсь, гажась-жалясь, кема чидась, туж гажась-жалясь, зэмлыко Инмар. Со сюрсэтӥ выжылы но гажан-жалянзэ возьматэ, Со янгышъёсты, йыружъёсты, сьӧлыкъёсты ӵуше-куштэ» (Пот. 34:6, 7). Иегова — ӟеч но гажась-жалясь Инмар. Со котьку дась простить карыны сьӧлыкам муртэ, со ӧпкеле ке (Неем. 9:17; Пс. 85:15).

5. Иегова ми сярысь ваньзэ тодэ бере, мар карыны солэн мылкыдыз ӝутске? (Псалтирь 102:13, 14)

⁵ Иегова милемыз кылдытӥз бере, со ми сярысь ваньзэ тодэ. Со пыр-поч тодэ котькуд адямиез (Пс. 138:15—17). Соин ик со адӟе вань тырмымтэосмес, кудъёсыз анай-атаймылэсь выжизы. Озьы ик со тодэ, мар милемын луиз улонмы ӵоже. Тае тодыса, солэн мылкыдыз ӝутске милемлы гажан-жалянзэ возьматыны (Пс. 77:39; лыдӟе Псалтирез 102:13, 14).

6. Кызьы Иегова возьматӥз, со милемыз простить карыны дась шуыса?

⁶ Иегова возьматӥз, со милемыз простить карыны дась шуыса. Со вала: нырысетӥ адями, Адам, сэрен ми сьӧлыкаськомы но кулӥськомы (Рим. 5:12). Сьӧлыклэсь но кулонлэсь мозмытскыны ми асьмеос ум быгатӥське (Пс. 48:8—10). Иегова милемыз яратэ, соин ик со трос лэсьтӥз, милемыз утён понна. Иоаннлэн 3:16 верамын, Иегова ми понна «Аслэсьтыз одӥг вордӥськем Пизэ сётӥз» шуыса (Матф. 20:28; Рим. 5:19). Вераны луоз, Иисус ми интые курадӟиз но кулӥз (Евр. 2:9). Соин ик ваньзы, кинъёс солы оско, сьӧлыклэсь но кулонлэсь мозмытскыны быгатозы. Малпалэ гинэ, макем Иеговалы вӧсь вал, куке солэсь Пизэ курадӟытӥзы но, йыруж лэсьтӥсез кадь, юбо борды кортӵогаса виизы. Иегова аслэсьтыз Пизэ кулыны сётӥз бере, адӟиське, со милемыз простить карыны дась шуыса.

7. Библиысь кыӵе учыръёс возьмато, Иегова простить карыны дась шуыса?

⁷ Библиын гожтэмын трос адямиос сярысь, кудъёссэ Иегова простить кариз (Еф. 4:32). Кин тӥляд тодады лыктэ? Оло нош, Манассия эксэй. Та адями туж лек вал но Иеговалы пумит сьӧлыказ. Со  зэмос луисьтэм инмаръёслы йыбыртъяз, озьы ик калыкезлэсь мылкыдзэ но ӝутӥз соослы йыбыртъяны. Манассия аслэсьтыз пиоссэ вииз, соосты зэмос луисьтэм инмаръёслы курбонлы сётыса. Озьы ик со Иеговалэн храмаз сульдэръёс пуктылӥз. Библиын верамын: «Кузё-Инмарлэн азяз со трос ярантэм ужъёс лэсьтӥз» (2 Пар. 33:2—7). Озьы ке но Манассия вань сюлмысьтыз ӧпкелиз, соин ик Иегова сое простить кариз. Со сяна, Инмар «сое Иерусалиме, эксэй пуконаз, берыктӥз» (2 Пар. 33:12, 13). Оло нош, тӥ тодады вайиды Давид эксэез. Со трос сьӧлыко ужъёс лэсьтӥз. Кылсярысь, аслаз кышноез вал ке но, со мукет пиосмуртлэсь кышнозэ аслыз кариз но адямиез вииз. Нош куке Давид аслэсьтыз янгышсэ валаз но вань сюлмысьтыз ӧпкелиз, Иегова сое простить кариз (2 Экс. 12:9, 10, 13, 14). Та учыръёс возьмато, Иегова простить карыны дась шуыса. Иеговалэн простить каремез пӧртэм луэ адямиослэн простить каремзылэсь. Та сярысь пыр-почгес вераськомы.

8. Малы Иегова — самой умой Судья?

⁸ Иегова — «Быдэс музъемлэн Судьяез» (Ул.-выл. 18:25). Судьяослы законъёсты умой тодыны кулэ. Тае ик вераны луоз Инмармы сярысь но, малы ке шуоно со судить но каре, закон но сётэ (Ис. 33:22). Иегова котькинлэсь умой тодэ, мар ӟечез, нош мар уродэз луэ. Мар эшшо карыны кулэ на умой судья? Ужпум кутэмезлэсь азьло со ваньзэ лыдэ басьтыны кулэ. Иегова — самой умой Судья, малы ке шуоно со ваньзэ тодэ.

9. Мае лыдэ басьтэ Иегова, куке ужпум кутэ, адямиез простить кароно-а, ӧвӧл-а?

⁹ Музъем вылысь судьяосын ӵошатыса, Иегова ваньзэ лыдэ басьтэ, мар герӟаськемын эскериськись ужен (Ул.-выл. 18:20, 21; Пс. 89:8). Инмар адямиослэсь тросгес тодэ. Со умой вала, кызьы адями пичи дырысеныз будэтэмын вал, кызьы дышетскиз, кытын улӥз, кыӵе солэн тазалыкез. Озьы ик Иегова адямилэсь сюлэмзэ адӟе. Со вала, малы адями озьы яке тазьы лэсьтӥз. Инмарлэсь номыре уд ваты (Евр. 4:13). Озьыен, куке Иегова ужпум кутэ, адямиез простить кароно-а, ӧвӧл-а, со ваньзэ лыдэ басьтэ.

10. Кытысь ми тодӥськомы, Иеговалэн ужпумъёсыз котьку но шонерлыкоесь шуыса? (Кыкетӥ Закон 32:4).

¹⁰ Иеговалэн, Вылӥ Судьялэн, ужпумъёсыз котьку но шонерлыкоесь. Инмар уг учкы адямилэн вылтусыз, узырлыкез, дано луэмез но быгатонлыкъёсыз шоры (1 Экс. 16:7; Иак. 2:1—4). Шонер ужпум кутыны Иеговалы нокин люкетыны уг быгаты (2 Пар. 19:7). Со ноку но дыртыса ужпум уг куты (Пот. 34:7). Зэм но, Иегова — самой умой Судья, малы ке шуоно со ваньзэ адӟе но тодэ. (Лыдӟе Кыкетӥ Законэз 32:4.)

11. Маин пӧртэм луэ Иеговалэн простить каремез адямиослэн простить каремзылэсь?

¹¹ Иеговалэн простить каремез пӧртэм луэ адямиослэн простить каремзылэсь. Сое адӟыны луэ Еврей Гожтэмъёсысь. Одӥг библейской справочникын верамъя, куддыръя Еврей Гожтэмъёсын кутӥськись кыл герӟаськемын Иеговалэн «сьӧлыкась адямиез простить каременыз». Отын верамын: «Та кыл уг кутӥськы соку, куке вераськон мынэ адямиослэн  ог-огзэс простить каремзы сярысь. Адямиослэсь простить каремзэс ӵошатыны ик уг луы Инмарлэн простить каременыз» b. Иегова гинэ быгатэ быдэсак простить карыны ӧпкелись сьӧлыкам муртэ. Мае возьматэ Иеговалэн простить каремез?

12, 13. а) Мае шӧдэ адями, кудзэ Иегова простить каре? б) Кызьы Иегова простить каре?

¹² Куке ми валаськомы, Иегова милемыз простить кариз шуыса, милям сюлэммы каньыл луэ но милемыз возьытлыкмы уг йырйы ини. Тае шӧдыны луэ соку гинэ, куке милемыз ачиз Иегова простить каре (Ап. уж. 3:19). Сьӧлыкаммылэсь азьло кадь ик, милям выльысь Иеговаен матысь кусыпъёсмы луыны быгато.

¹³ Куке Иегова милесьтым сьӧлыкъёсмес простить каре, со ноку но милемыз со понна кыл уг кутыты ини (Ис. 43:25; Иер. 31:34). Библиын верамын: «Макем кыдёкын шундыӝужан шундыпуксёнысен, сокем кыдёке законлы пумит улэмъёсмес Со палэнтӥз» (Пс. 102:12) c. Куке ми малпаськиськомы Иеговалэн вань сюлмысьтыз простить каремез сярысь, милям сюлэммы шумпотонэн пачылме (Пс. 129:4). Нош кинэ Иегова простить каре?

14. Мае ми тодӥмы со сярысь, кызьы Иегова простить каре?

¹⁴ Кызьы ми адӟимы, адями секыт сьӧлык лэсьтэ ке но, Иегова сое простить карыны быгатэ. Инмар Кылдытӥсь, Закон Сётӥсь но Судья луэ. Соин ик Иегова туж трос тодэ но, ужпум кутыкуз, ваньзэ тае лыдэ басьтэ. Ойдолэ пыр-почгес эскеромы, мае Иегова лыдэ басьтэ.

15. Мае Иегова лыдэ басьтэ, куке ужпум кутэ, адямиез простить кароно-а, ӧвӧл-а? (Лука 12:47, 48).

¹⁵ Нырысетӥез, Иегова учке, тодӥз-а сьӧлыкам адями, шонертэм лэсьтэ шуыса. Та сярысь Иисус вераз Лукалэсь 12:47, 48 (лыдӟе). Кин ке юри Иеговалэсь законзэ тӥя ке, со бадӟым сьӧлык  лэсьтэ, малы ке шуоно адями валаса вылысь Инмарлы пумит мынэ. Оло нош, Иегова сое простить но уз кары (Марк 3:29; Иоанн 9:41). Зэм но, куддыръя ми шонертэм лэсьтӥськомы, тодӥськомы ке но, Иеговалы со уг кельшы шуыса. Луоз-а вераны, Иегова милемыз простить уз кары шуыса? Одно ик озьы вераны уг луы. Тае валан понна, эскеромы, мае эшшо Иегова лыдэ басьтэ.

16. Мар кароно ӧпкелён понна но малы сотэк Иегова простить уг кары?

¹⁶ Кыкетӥез, Иегова учке, сьӧлыкам мурт вань сюлмысьтыз ӧпкеле-а шуыса. Мар кароно ӧпкелён понна? Со понна воштыны кулэ малпаськон амалэз, мылкыдэз но ужпумъёсты. Ӧпкелись адями жаля, секыт сьӧлык лэсьтӥз шуыса, озьы ик Инмарен кусыпъёсыз сӧриськизы шуыса. Тодамы ваёмы: Манассия но, Давид но бадӟым сьӧлыкъёс лэсьтӥзы, нош Иегова соосты простить кариз, малы ке шуоно соос вань сюлмысьтызы ӧпкелизы (3 Экс. 14:8). Озьыен, Инмар простить каре, куке адӟе, адями ӧпкеле шуыса. Нош лэсьтэм сьӧлыкъёс сярысь жаляны гинэ тырмыт ӧвӧл. Эшшо мае ке кароно на d. Та сярысь вераське мукет абзацын.

17. Мар кароно воштӥськон понна но малы со туж кулэ? (Исаия 55:7).

¹⁷ Куинетӥез, Иегова сак учке, воштӥськиз-а адями. Со возьма, адями сьӧлыкамысь мед дугдоз но шонер сюрес вылэ мед султоз шуыса. (Лыдӟе Исаиялэсь 55:7.) Адямилы кулэ малпаськон амалзэ воштыны но ваньмыз шоры Иеговалэн синъёсыныз учкыны (Рим. 12:2; Еф. 4:23). Солы кельтоно малпанъёссэ но ужъёссэ, кудъёсыз Иеговалы уг кельшо (Кол. 3:7—10). Ваньмыз со юнме луысал, Иисус аслэсьтыз улонзэ ми понна ӧз сётысал ке. Ӵапак солы луыса Иегова милемыз простить каре но сьӧлыкъёсмылэсь чылкытатэ. Ми тыршиськомы ке воштӥськыны, та курбонлы луыса Иегова милемыз одно ик простить кароз (1 Иоанн 1:7).

18. Мае ми тодӥмы со сярысь, кызьы Иегова простить каре?

¹⁸ Ойдолэ вакчияк тодамы ваёмы, мае ми эскеримы та статьяын. Иегова вань сюлмысьтыз простить каре — нокин но соин уз ӵошатӥськы. Кытысь ми тае тодӥськомы? Нырысетӥез, со котьку дась простить карыны. Кыкетӥез, со ми сярысь ваньзэ тодэ. Со котькинлэсь умой тодэ, ми зэмзэ ик ӧпкелиськомы-а, ум-а. Куинетӥез, Иегова милемыз быдэсак простить каре, сьӧлыкъёсмес со тодаз но уг вайы ини. Солы луыса ми быгатӥськомы чылкыт возьытлыкен улыны но тодыны, Иеговалы ярамон луиськомы шуыса.

19. Тырбыдэстэм луэммы сэрен сьӧлыкаськомы ке но, малы ми шумпотыны быгатӥськомы?

¹⁹ Ми али тырбыдэстэмесь бере, ми сьӧлыкатэк улыны ум быгатӥське. Но милемыз юнматыны быгато кылъёс, кудъёсыз гожтэмын «Гожтэмъёсты валан» энциклопедиысь «Раскаяние» статьяын, 7-тӥ абзацын: «Иегова аслэсьтыз ужась-тыршисьёссэ гажа-жаля бере, соослы мултэс сюлмаськыны кулэ ӧвӧл янгышъёссы понна, кудъёссэ тырбыдэстэм луэмзы сэрен лэсьто (Пс 102:8—14; 129:3). Соос Инмарлэсь кылзӥськыса улыны тыршо ке, та соослы шумпотон вайыны кулэ (Фп 4:4—6; 1Ин 3:19—22)». Та малпан сюлэммес ик буйгатэ!

20. Мае ми эскеромы вуоно статьяын?

²⁰ Ми тау кариськомы Иеговалы, со милемыз простить карыны дась шуыса, куке ми ӧпкелиськомы. Кызьы ми солэсь адӟем карыны быгатӥськомы? Маин кельшо но маин пӧртэм луо Иеговалэн простить каремез но милям простить кареммы? Малы та сярысь тодыны кулэ? Та юанъёслы валэктон шедьтомы вуоно статьяысь.