«ТӤ ПӦЛЫСЬ кин ке но Францилы яке Англилы пумит ожмаськыны соглаш ӧз кариськы ке, тӥ ваньды кулоды!» — кеськиз нацистъёслэн офицерзы пытсэтэ пуктэм Иеговалэн Адӟись-Ивортӥсьёсызлы. Агайёсмы вӧзын ик ожтӥрлыкен солдатъёс сылӥзы ке но, одӥг агаймы но кышкатэмзылы ӧз сётскы. Агайёсмы туж кышкасьтэмесь вал! Та учыр умой возьматэ, кызьы Иеговалэн Адӟись-Ивортӥсьёсыз учко ожъёс шоры, кудъёссэ адямиос нуо: ми отчы ум пыриськиське. Милемыз кулонэн кышкато ке но, та дуннелэн бугыръяськонъёсыз дыръя ми нокин пала ум кариськиське.

1. ИНМАРЛЭН ВАНЬ УЖАСЬ-ТЫРШИСЬЁСЫЗ ОДӤГ КАЛЫКЫСЬ ВАЛ

Вашкала дыръя Иегова одӥг гинэ калыкез бырйиз, аслаз калыкез луон понна,— со вал израиль калык. Инмар соосты «вань калыкъёс пӧлысь бырйыса басьтэм люкетэныз» нимаз (Пот. 19:5). Озьы ик Иегова соосты одӥг интые улыны интыяз. Соин ик, куке Иегова израиль калыкез куриз мукет калыкъёсын ожмаськыны, соос огъя оскисьёсынызы ӧз ожмаське но соосты ӧз виылэ a.

Туннэ Инмарлэн калыкез «вань выжыос, калыкъёс» пӧлысь люкамын (Усьт. 7:9). Иеговалэн ужась-тыршисьёсыз ожмаськыны мынӥзы ке, соос асьсэлэн вын-агайёсынызы ожмаськозы, со сяна, соосты виылозы но.

 2. ИЕГОВА КОСӤЗ ИЗРАИЛЬ КАЛЫКЕЗ ОЖМАСЬКЫНЫ

Вашкала дыръя Иегова быръе вал, ку но кыӵе ужпумен израиль калык ожмаськыны мыноз. Кылсярысь, Инмар косӥз аслэсьтыз калыксэ ханаан калыкез быдтыны. Та калык периослы йыбыртъяз, туж азыса-калгыса улӥз но нылпиоссэ курбонэ вайылӥз. Соин ик Иегова аслэсьтыз калыксэ косӥз ханаан калыкез быдтыны, соос Сӥзем музъемез медаз сапталэ ини шуыса (Лев. 18:24, 25). Нош куке Инмарлэн ужась-тыршисьёсыз Сӥзем музъеме улыны интыяськизы, куддыръя Иегова соосты косэ вал та музъемез тушмонъёссылэсь утьыны (2 Экс. 5:17—25). Но Иегова израиль калыклы ноку ӧз лэзьы асьсэлы бырйыны, ожмаськоно-а, ӧвӧл-а. Куке соос ас тодэмзыя ожмаськыны ветлӥзы, со туж кышкыт бервылъёсы вуттылӥз (Лыд. 14:41—45; 2 Пар. 35:20—24).

Туннэ Иегова адямиосты ожмаськыны уг косы. Калыкъёс ожмасько, асьсэлы пайда утчаса, нош Инмарлэсь эриксэ быдэстон понна — уг. Ӵем дыръя соос ожмасько, выль музъемъёсты киултон понна, узырмон понна яке асьсэлэсь кивалтэтсэс юнматон понна. Вань соос но, кинъёс верало, Инмарлэн нимыныз ожмасько шуыса. Соослэн верамзыя, соос тушмонъёссэс виыло яке осконзэс утё. Но Иегова ачиз аслэсьтыз тушмонъёссэ быдтоз но ужась-тыршисьёссэ утёз. Со луоз вуоно ожмаськонын — Армагеддонын (Усьт. 16:14, 16). Со ожмаськонэ пыриськозы духовной кылдытэмъёс гинэ, нош адямиос — уз (Усьт. 19:11—15).

3. ИЗРАИЛЬ КАЛЫК ӦЗ БЫДТЫ СООСТЫ, КИНЪЁС ОСКОНЗЭС ВОЗЬМАТӤЗЫ

Вашкала дыръя израиль калык виылэ вал соосты гинэ, кинъёсты Иегова виыны косӥз, но улэп кельтэ вал соосты, кинъёс Инмарлы осконзэс возьматӥзы. Кылсярысь, Иегова Иерихон карез быдтыны косӥз ке но, израиль калык ӧз виы Раавез но солэсь матысьёссэ, малы ке шуоно со осконзэ возьматӥз (Иис. Н. 2:9—16; 6:15, 16). Берлогес быдэс Гаваон кар быдтэмын ӧй вал, малы ке шуоно отын улӥсьёс Инмарез гажамзэс возьматӥзы (Иис. Н. 9:3—9, 17—19).

 Туннэ ожмаськонъёсы пыриськисьёс нокинэ уг жаляло: оскисьёсты но, оскисьтэмъёсты но. Ӵем дыръя ожъёсын чик янгыштэм, огшоры калык быре.

4. ИЗРАИЛЬ КАЛЫК ИНМАРЛЭН КУРОНЪЁСЫЗЪЯ ОЖМАСЬКЫНЫ КУЛЭ ВАЛ

Вашкала дыръя Иегова калыксэ косӥз солэн куронъёсызъя ожмаськыны. Кылсярысь, кыӵе ке карез быдтон азьын, «отын улӥсьёс» израиль калыклы «сётӥськыны» но улэп кыльыны быгато вал (К. Зак. 20:10). Озьы ик Иегова куриз, израиль ожгарчиослэн мугорзы но ужъёссы чылкытэсь мед луозы шуыса (К. Зак. 23:9—14). Бускель калыкъёс пленэ нуэм кышномуртъёсты эриктэмало вал, нош Иегова аслаз ужась-тыршисьёсызлы асьсэды озьы возьыны ӧз лэзьы. Со сяна, израиль пиосмурт кыӵе ке кышномуртэз пленэ басьтэ вал ке, толэзь ортчыса гинэ, со солэн кышноез луыны быгатэ вал (К. Зак. 21:10—13).

Туннэ быдэс дунне вылысь шаеръёс куспазы верасько, кызьы ожмаськыны яра, нош кызьы — уг яра. Соос озьы каро, огшоры калыкез утён понна, но ӵем дыръя соос вераськемзыя уг лэсьто.

5. ИНМАР АЧИЗ АСЛАЗ КАЛЫКЕЗ ПОННА ОЖМАСЬКИЗ

Вашкала дыръя израиль калык мед вормоз шуыса, Иегова ачиз соос понна ожмаськиз, ӵем дыръя, паймымон ужъёс лэсьтыса. Кылсярысь, кызьы Инмар юрттӥз аслаз калыкезлы Иерихонэз киултыны? Иеговалэн косэмезъя ожгарчиос бадӟым кужмо куараен черектӥськизы но, кар борддор куашказ. Талы луыса соос капчиен городэз киултӥзы (Иис. Н. 6:19). Нош кызьы израиль калык аморейёсты вормиз? «Кузё-Инмар соос вылэ инмысен бадӟымесь йӧ комокъёс куяз, озьы соос кулылӥзы; израиль ожгарчиослэн мечен виылэмзылэсь но тросгес быризы, йӧ комокъёс вылазы усьылыку» (Иис. Н. 10:6—11).

ЗЭМОС ХРИСТИАНЪЁС — ТУПАСА УЛОНЭЗ ВАИСЬЁС

Кызьы ми адӟимы, милям югдуръёсмы вашкала Израильлэн югдуръёсызлэсь туж пӧртэмесь. Но вань на мукет мугъёс, малы ми ожмаськыны ум мынӥське. Кылсярысь, Инмар азьло ик вераз, солэн сюрес вылтӥз мынӥсьёс «азьланяз ожмаськыны уз ни дышетске», уката но ожмаськонъёсы уз пыриське шуыса (Ис. 2:2—4). Озьы ик Иисус дышетскисьёсызлы вераз: «Тӥ дуннелэн ӧвӧл» (Иоанн 15:19). Соин ик соос та дуннеын бугыръяськонъёс дыръя нокин пала уг карисько.

Со сяна, Иисус Христос дышетскисьёсызлэсь мылкыдзэс ӝутӥз эшшо мар ке но карыны. Со дышетӥз соосты палэнтыны малпанъёсты, кудъёсыз сэрен йыркуръяськон, вожпотон яке лекъяськон кылдэ (Матф. 5:21, 22). Озьы ик Иисуслэн дышетскисьёсызлы тупаса улон ваёно но тушмонъёссэс яратоно (Матф. 5:9, 44).

Кызьы тае уже кутоно? Ми пӧлысь нокинлэн но ожмаськонэ пыриськемез уз поты, дыр. Но кыӵе ке агайлы яке сузэрлы ми вожмес поттыса ум улӥське-а? Ойдолэ туж тыршомы, сыӵе шӧдонъёсмы медаз луэ шуыса! (Иак. 4:1, 11).

Та дуннеысь калыкъёс ожмаськыку, ми нокин пала ум кариськиське. Ми туж тыршиськомы, вын-агайёс но сузэр-апайёс тупаса но ог-огзэс яратыса мед улозы шуыса (Иоанн 13:34, 35). Ойдолэ туж тыршомы нокин пала кариськытэк улыны, Иегова музъемлэн пумысеныз пумозяз ик ожмаськонъёсты дугдытытозь (Пс. 45:10).