1. Кызьы герӟаськемын шуд но Иеговалы йыбыртъян?

 ШУД — со ӝутскем мылкыд гинэ ӧвӧл, кудӥз туннэ вань, нош ӵуказе ӧвӧл. Адями быдэс улонэз ӵоже шудо луыны быгатэ. Иисус валэктӥз, мар адямиез шудо каре: «Шудоесь Инмарлэсь кылзэ кылзӥсьёс, сое быдэсъясьёс» (Лука 11:28). Иисус тодӥз: адямиос кылдытэмын вал Иегова Инмарзэс тодон но солы йыбыртъян мылкыдын. Иегова ачиз шудо Инмар бере, солы ужась-тыршисьёс но шудо луыны быгато (1 Тим. 1:11).

2, 3. а) Кин шудо, Иисуслэн верамезъя? б) Мае ми эскеромы та статьяын но малы со туж кулэ?

² Быгатэ-а адями шудо луыны соку гинэ, куке солэн нокыӵе шуг-секытъёсыз ӧвӧл? Уг. Гурезь йылын тодытыкуз, Иисус туж паймымон малпан вераз: «Бӧрдӥсьёс шудоесь». Озьыен, шудо луыны быгато бӧрдӥсьёс но, яке соос, кинъёс асьсэлэн сьӧлыкаменызы яке мукет шуг-секытъёсынызы сэрен куректо. Со сяна, Иисуслэн верамезъя, «шонер улон понна уллямъёс шудоесь», озьы ик соос но, кинъёсты солэн нимыз понна урод кылъёсын куарето (Матф. 5:4, 10, 11). Но кызьы таӵе секыт югдуръёсын но адями шудо луыны быгатэ?

³ Иисус дышетӥз: адями шудо уг луы соку гинэ, куке солэн ваньмыз умой, нош шудо луэ соку, куке Инмарез тодэ но солы йыбыртъя (Иак. 4:8). Мар со понна кароно? Та статьяын ми эскеромы куинь вамышъёсты, кудъёсыз юрттозы зэмзэ ик шудо луыны.

4. Кыӵе нырысетӥез вамыш, шудо луон понна? (Псалтирь 1:1—3).

⁴ НЫРЫСЕТӤ ВАМЫШ. Шудо луон понна, милемлы Библиез лыдӟоно но эскероно. Иисус Инмарлэсь Кылзэ ӵошатӥз сиёнэн. Адямиослы но, пудо-животъёслы но сиськыны кулэ, улыны мед быгатозы шуыса. Но адямиос гинэ Инмарлэсь Кылзэ лыдӟыны быгато. Тӥни малы Иисус вераз: «Нянен гинэ уз улы адями, Инмарлэн ымысьтыз потэм котькудӥныз кылыныз улоз со» (Матф. 4:4). Соин ик милемлы котькуд нунал лыдӟоно Инмарлэсь Кылзэ, Библиез. Псаломез гожъясь шудо адями сярысь тазьы вераз: «Кузё-Инмарлэн законэз бордын солэн вань мылкыдыз, Солэсь законзэ со уй но, нунал но дышетэ!» (Лыдӟе Псалтирез 1:1—3.)

5, 6. а) Мае тодыны луэ Библиысь? б) Кызьы Библиез лыдӟон милемлы юрттыны быгатэ?

⁵ Иегова милемыз туж яратэ. Соин ик Библия пыр со вераз, кызьы шудо луоно. Отын гожтэмын, мае со милесьтым возьма. Озьы ик верамын, кызьы Инмарлэн эшъёсыз луоно но мар кароно, со милесьтым сьӧлыкъёсмес мед куштоз шуыса. Со сяна, ми тодӥмы, кыӵе паймымон улон возьма милемыз азьпалан (Иер. 29:11). Ваньзэ тае ми Библиез дышетыса тодӥмы. Солы луыса милям сюлэммы шумпотонэн пачылме.

⁶ Библиын трос пайдаё визь-кенешъёс вань. Соослэсь кылзӥськыса, ми шудо луиськомы. Шуг-секытъёсын сэрен  мылкыдды куашказ ке, тросгес дыр висъялэ Библиез лыдӟон но со вылын малпаськон понна. Иисус вераз: «Шудоесь Инмарлэсь кылзэ кылзӥсьёс, сое быдэсъясьёс!» (Лука 11:28).

7. Мар кароно, Библиез лыдӟон тросгес пайда мед ваёз шуыса?

⁷ Библиез дыртыса эн лыдӟе, малы ке шуоно, озьы лыдӟиды ке, со тӥледлы шумпотон уз вайы. Шуом, тӥледлы яратоно сиёндэс дасязы. Дыртэменыды яке йырады кыӵе ке но малпанъёс бергамен тӥ та сиёнэз ӝог, кушатэк сииды. Нош сием берады тӥ валады, сое сыӵе ӝог сиёно ӧй вал шуыса. Кулэ вал дыртытэк, ческытсэ шӧдыса сиыны. Вал-а тӥляд улонады учырды, куке тӥ Библиез но озьы ик ӝог лыдӟиды но валаса ӧд вуэ, мар сярысь отын вераське? Библиез лыдӟон шумпотон мед ваёз шуыса, тросгес дыр висъялэ. Син азяды пуктыны тырше, мар сярысь отын вераське, но со сярысь малпаське. Библиез озьы лыдӟон тӥледыз шудогес кароз.

8. Кызьы «оскиськымон, визьмо ляльчи» солы сётэм ужез быдэсъя? (Озьы ик учке сноскаез.)

⁸ Иисус «оскиськымон, визьмо ляльчиез» пуктӥз милемлы ас дыраз духовной сиён сётъяны (Матф. 24:45) b. Милям трос духовной сиёнмы вань. «Оскиськымон, визьмо ляльчи» сое Библия вылэ пыкиськыса дася (1 Фес. 2:13). Тӥни малы та духовной сиён юрттэ милемлы Библиысь Иеговалэсь малпанъёссэ валаны. Соин ми лыдӟиськомы «Возьмаськон башня» но «Сайкалэ!» журналъёсты, озьы ик jw.org сайтысь статьяосты. Со сяна, ми вань пумиськонъёслы дасяськиськомы но котькуд толэзе JW Broadcasting^® программаез учкиськомы, со милемлы валамон кылын вань ке. Библиез лыдӟимы но сое эскеримы ке, ми быгатомы мукет вамышез лэсьтыны, кудӥз юрттэ милемлы шудо луыны.

9. Кыӵе кыкетӥез вамыш, кудӥз юрттэ милемлы шудо луыны?

⁹ КЫКЕТӤ ВАМЫШ. Шудо луон понна, милелы Иеговалэн куронъёсызъя улоно. Псаломез гожъясь вераз: «Шудо Кузё-Инмарлэсь кышканэн улӥсь, шудо Солэн сюресъёстӥз ветлӥсь» (Пс. 127:1). «Кузё-Инмарлэсь кышкан» юрттэ милемлы палэнскыны ваньмызлэсь, мар Иеговалы уг кельшы (Мад. 16:6). Соин ик ми вань кужмысьтымы тыршиськомы Иеговалэн куронъёсызъя улыны, кудъёсыз сярысь Библиын гожтэмын (2 Кор. 7:1). Ми шудогес луиськомы, лэсьтӥськомы ке сое, мар Иеговалы кельше, но палэнскиськомы ке солэсь, мае Иегова адӟонтэм каре (Пс. 36:27; 96:10; Рим. 12:9).

10. Мае возьма милесьтым Иегова, Римъёслы 12:2 гожтэмъя?

¹⁰ Лыдӟе Римъёслы 12:2. Иеговалэсь куронъёссэ тодэм сяна, озьы ик та куронъёсъя улыны но кулэ. Эскеромы таӵе примерез. Адями быгатэ тодыны кивалтӥсьёслэсь куронъёссэс со пумысен, кыӵе ӝоглыкен сюрес вылын ветлоно. Но солэн кылзӥськемез уг поты ке, со та куронъёсты тӥялоз. Милям ужъёсмы возьмато, кызьы ми учкиськомы Иеговалэн куронъёсыз шоры (Мад. 12:28). Давид Иеговалэсь сюресъёссэ самой умоен лыдъяз, соин ик со Инмарлы вераз: «Тон мыным улон сюрес возьматод: шумпотонлэн  пачыл луэмез Тынад син азяд, шудо улон пумтэм дауръёслы Тынад бур ки улад» (Пс. 15:11).

11, 12. а) Малы сак луоно, куке сюлмаськонъёсмы трос? б) Кызьы Филиппыослы 4:8 юрттоз милемлы шулдыръяськонъёсты визьмо бырйыны?

¹¹ Куддыръя сюлмаськонъёсынымы сэрен милям кӧня ке дырлы ке но шуг-секытъёсмылэсь пегӟеммы потоз, дыр. Тае валаны луэ. Но милемлы сак луоно, медам лэсьтэ шуыса сое, мае Иегова адӟемпотостэм каре (Еф. 5:10—12, 15—17).

¹² Филиппыослы гожтэтаз апостол Павел христианъёслэсь мылкыдзэс ӝутӥз малпаськыны «шонерлыкоез, чылкытэз... ӟечлыкоез, ушъяны ярамонэз сярысь». (Лыдӟе Филиппыослы 4:8.) Павел шулдыръяськонъёс сярысь ӧз гожъя ке но, солэн кылъёсыз юрттозы милемлы шулдыръяськонъёсты визьмо бырйыны. Тырше лыдӟыны та кылбурез кӧня ке воштыса, кылсярысь, тазьы: «Малпаське чылкыт кырӟанъёс сярысь, ӟечлыко фильмъёс но книгаос сярысь, ушъяны ярамон видеошудонъёс сярысь». Со юрттоз милемлы валаны, кызьы учке Иегова шулдыръяськонъёсмы шоры. Милям потэ Иеговалэн куронъёсызъя улэммы (Пс. 118:1—3). Соку милям чылкыт возьытлыкмы луоз. Озьы ик ми быгатомы куинетӥ вамышез лэсьтыны, кудӥз юрттоз милемлы зэмзэ ик шудо луыны (Ап. уж. 23:1).

13. Кыӵе куинетӥез вамыш, кудӥз юрттэ милемлы шудо луыны? (Иоанн 4:23, 24).

¹³ КУИНЕТӤ ВАМЫШ. Лэсьтэ ваньзэ, Иеговалы йыбыртъян улонады нырысетӥ интыын мед луоз шуыса. Иегова милемыз кылдытӥз бере, милемлы кулэ солы гинэ йыбыртъяны (Усьт. 4:11; 14:6, 7). Соин ик Инмарлы ужан-тыршон улонамы валтӥсь инты басьтыны кулэ. Инмармы возьма, ми солы «духен но зэмлыкен» йыбыртъяломы шуыса. (Лыдӟе Иоаннлэсь 4:23, 24.) Милям потэ святой духлэн кивалтэмезлэсь кылзӥськеммы. Соку ми Иеговалы Библиысь зэмлыкъёсъя ужаломы-тыршомы. Соку но, куке кивалтӥсьёс ужмес нуыны уг лэзё, Иеговалы йыбыртъянэз нырысетӥ интые пуктоно. Ӵапак али 100-лэсь но тросгес агайёсмы но сузэръёсмы Иеговалэн Адӟись-Ивортӥсьёсыз луэмзы понна гинэ пытсэт сьӧрын пуко c. Но та шоры учкытэк, соос шумпотонзэс уг ышто но лэсьто ваньзэ, мае быгато: вӧсясько, Библиез эскеро, мукетъёсызлы Инмар но солэн Эксэйлыкез сярысь верало. Адямиос милемыз уйыло-улляло яке урод кылъёсын верало ке но, ми шудоесь, малы ке шуоно Иегова милемыз уг кельты, нош азьланяз со милемыз одно ик бакель кароз (Иак. 1:12; 1 Пётр 4:14).

14. Мар луиз Таджикистанысь егит агаен?

¹⁴ Улонысь учыръёс возьмато, куинь вамышъёс, кудъёссэ ми эскеримы, котькыӵе югдуръёсын шудо луыны юртто шуыса. Тани мар луиз Таджикистанысь 19-аресъем Джовидон Бободжонов агаен, армие мынымтэез понна. 2019-тӥ арын 4-тӥ коньывуонэ сое кужмысь дорысьтыз нуизы но йыруж лэсьтӥсез кадь пытсэт сьӧры пуктӥзы. Та сярысь мукет шаеръёсын но тодмо луиз. Иворъёсын верамъя,  сое жугизы, присяга мед сётоз но военной дӥськут мед дӥсялоз шуыса. Суд бере сое колоние нуизы. Кӧня ке толэзьёс ортчыса, шаерысьтызы президент Джовидонэз мозмытыны косӥз. Вань та шуг-секытъёсыз дыръя Джовидон Инмарлы оскымон вал но шумпотонзэ ӧз ышты. Мар солы юрттӥз? Со котьку но тодаз возиз, Иегова сярысь тодон-валан басьтоно но солы йыбыртъяно шуыса.

15. Кызьы Джовидон пытсэтын Библиез лыдӟиз но сое эскериз?

¹⁵ Пытсэтын Джовидонлэн Библиез но публикациосмы ӧй вал. Озьы ке но со Библиез лыдӟемысь но сое эскеремысь ӧз дугды. Кызьы озьы? Со интыысь агайёс но сузэръёс солы сиён-юон вайылӥзы, нош пакетъёс вылэ нуналлы кылбурез гожъязы. Соин ик Джовидон котькуд нунал Библиез лыдӟыны но со вылын малпаськыны быгатӥз. Тани, мар со вераз пытсэтысь потэмез бере: «Соослы, кинъёс бадӟым шуг-секытъёсын ӧз пумиськылэ на, тужгес но кулэ али Иеговаен кусыпъёссэс юнматыны, солэсь Кылзэ но публикациосмес лыдӟыса».

16. Мар сярысь малпаськыны тыршиз Джовидон?

¹⁶ Джовидон Иеговалэн куронъёсызъя  улӥз. Со сьӧлыко мылпотонъёсызлы ӧз сётскы но урод ужъёс ӧз лэсьты. Агаймы котьку но малпаськиз Иегова сярысь, озьы ик со сярысь, мае со дунъя. Джовидонэз шумпоттӥзы Иеговалэн кылдытэмъёсыз. Со тодаз вае: «Ӵукнаосы монэ тылобурдоослэн чирдэмзы сайкатъяз, нош уйёсы мон толэзь но кизилиос шоры шумпотыса учкылӥ. Иеговалэн та кузьымъёсыз юрттӥзы мыным шумпотыса улыны но кужым сётӥзы». Ми Иеговалы духовной сиён но мукет кузьымъёсыз понна тау кариськомы ке, милям сюлэммы шумпотонэн пачылме. Таӵе шумпотон милемлы кужым сётэ вань шуг-секытъёсмы пыр потыны.

17. Джовидонлэн кадь секыт югдурен пумиськимы ке, кыӵе пайда ваёз милемлы ваньзэ чидаммы? (1 Пётр 1:6, 7).

¹⁷ Джовидон Иеговалы йыбыртъянэз улоназ нырысетӥ интые пуктӥз. Со тодаз возиз, макем кулэ Инмарезлы оскымон кыльыны. Иисус шуиз: «Инмаредлы Кузё-Инмарлы йыбыртъя, Солы Огназлы гинэ ужаса-тыршыса ул» (Лука 4:8). Офицеръёслэн но солдатъёслэн потэ вал, Джовидон Иеговалы оскемысь мед дугдоз шуыса. Нош со котькуд нунал но котькуд уй Иеговалэсь сюлворыса юрттэт куриз, солы оскымон кыльыны мед быгатоз шуыса. Секыт югдурез шоры учкытэк, Джовидон ӧз сётскы. Али со шудо, малы ке шуоно солэн вань эскерем чаклам осконэз, кудӥз ӧй вал пытсэтэ пуктэмзылэсь азьло но жугемзылэсь азьло. (Лыдӟе 1 Пётрлэсь 1:6, 7.)

18. Мар кароно, азьланяз но шудо луон понна?

¹⁸ Иегова тодэ, мар милемыз зэмзэ ик шудо каре. Та статьяысь куинь вамышъёс юрттозы милемлы азьланяз но шудо луыны, шуг-секытъёс шоры учкытэк. Соку ми вераны быгатомы: «Шудо калык, кудӥзлэн Инмарез Кузё-Инмар луэ» (Пс. 143:15).