1, 2. а) Мар каро куд-ог кивалтӥсьёс но кызьы асьсэды возё агайёс но сузэръёс? б) Малы ми шудо луыны быгатӥськомы, уйылон-уллянъёс шоры учкытэк? (Озьы ик учке вылбамысь туспуктэмъёсты.)

 ТУННЭ 30-лэсь но тросгес шаеръёсын но интыосын кивалтӥсьёс ужмес нуыны уг лэзё. Куд-ог шаеръёсын Иеговалэн Адӟись-Ивортӥсьёсыз пытсэт сьӧрын пуко. Мар уродзэ лэсьтӥзы агайёсмы но сузэръёсмы? Иеговалэн син азяз соос номыр уродзэ ӧз лэсьтэ. Соос Библиез лыдӟизы, ӟеч иворез веразы но пумиськонъёсы ветлӥзы. Озьы ик соос политика удысын нокин пала кариськытэк улӥзы. Лек уйылон-уллянъёс шоры учкытэк, Иеговалэн та ужась-тыршисьёсыз дун-шектэмесь луо, яке Иеговалы быдэсак оскымон кылё. Макем соос шумпото талы!

² Тӥляд куке но адӟемды вань, дыр, ини та журналлэн вылбамысьтыз туспуктэмъёсты. Малы та кышкасьтэм Адӟись-Ивортӥсьёс паль пото? Соос тодо: Иеговалы ярамон луо, малы ке шуоно, номыр шоры учкытэк, солы оскымон кылё (Пс. 14:1, 2). Иисус вераз: «Шонер улон понна уллямъёс шудоесь... [...] Шумпотэлэ, шулдыръяськелэ — Инмын басьтоно медды-кузьымды бадӟым» (Матф. 5:10—12).

3. Кызьы апостолъёс уйылон-уллянъёс шоры учкизы но малы? (Апостолъёслэн ужъёссы 4:19, 20).

³ Ми паймыны кулэ ӧвӧл, туннэ агайёсты но сузэръёсты уйыло-улляло шуыса. Нырысетӥ даурын но апостолъёсты  Христос сярысь тодытэмзы понна уйылӥзы-уллязы. Иудеяысь вылӥ суд соосты «Иисуслэн нимыз сярысь вераны» ӧз лэзьы (Ап. уж. 4:18; 5:27, 28, 40). Кызьы учкизы та шоры апостолъёс? (Лыдӟе Апостолъёслэсь ужъёссэс 4:19, 20.) Соос тодо вал: Христос сярысь «тодытыны... ивортыны» соосты косӥз со, кин судьяослэсь вылӥынгес вал (Ап. уж. 10:42). Соин ик Пётр но Иоанн юн мылкыдын веразы, соос Инмарлы тэрытскозы шуыса, нош судьяослы — уз. Озьы ик соос веразы, Иисус сярысь тодытэмысь уз дугдэ шуыса. Вераны луоз, апостолъёс судьяослэсь юазы: «Зэм ик-а тӥ малпаськоды, тӥ Инмарлэсь бадӟымгес шуыса?»

4. Кыӵе адӟем карон возьматӥзы апостолъёс вань зэмос христианъёслы но кызьы ми соослэсь адӟем-карыны быгатӥськомы? (Апостолъёслэн ужъёссы 5:27—29).

⁴ Апостолъёс умой адӟем карон возьматӥзы вань зэмос христианъёслы. Соос возьматӥзы, «адямиослы сярысь, Инмарлы золгес тэрытскыны кулэ» шуыса. (Лыдӟе Апостолъёслэсь ужъёссэс 5:27—29.) Апостолъёсты жугизы ке но, соос, «Иисуслэн нимыз понна сантэманэз ас вылазы чидано луизы шуыса, сӥнедрионысь шумпотыса кошкизы». Озьы ик соос тодытэмысь но ӧз дугдэ (Ап. уж. 5:40—42).

5. Кыӵе юанъёслы милемлы валэктонъёс шедьтоно?

⁵ Апостолъёслэн примерзы пумысен куд-ог юанъёс кылдо. Кылсярысь, кызьы апостолъёс «адямиослы сярысь, Инмарлы золгес тэрытскыны» но со дыре ик «вылӥ властьёслы-кивалтӥсьёслы тэрытскись» луыны быгатӥзы? (Рим. 13:1). Кызьы ми туннэ «кузёослы, кивалтӥсьёслы тэрытскыса» улыны но со дыре ик Инмарлы, Вылӥ Кивалтӥсьмылы, оскымон луыны быгатӥськомы? (Тит. 3:1).

6. а) Кинъёс со «вылӥ властьёс-кивалтӥсьёс», кудъёсыз сярысь гожтэмын Римъёслы 13:1, но кызьы милемлы соос шоры учконо? б) Мар огкадез вань адями кивалтӥсьёслэн?

⁶ Лыдӟе Римъёслы 13:1. Та кылбурын  «вылӥ властьёс-кивалтӥсьёс» — со адями кивалтӥсьёс. Христианъёслы но кулэ соослэсь кылзӥськыны. Малы ке шуоно кивалтӥсьёс йыруж лэсьтӥсьёсты кутыло, чаклало, адямиос катъёслэсь мед кылзӥськозы шуыса, нош куддыръя Иеговалэсь ужась-тыршисьёссэ но утё (Усьт. 12:16). Соин ик милемлы соослы сётъяно вытъёсты, тыриськонъёсты, озьы ик соосты гажаны но кулэ (Рим. 13:7). Но кивалтӥсьёс кивалтыны быгато, малы ке шуоно Иегова соослы кивалтыны лэзиз. Та малпанэз Иисус умой возьматӥз, Понтий Пилат кивалтӥсен вераськыкуз. Куке Пилат вераз, Иисусэз кортӵоганы яке лэзьыны солэн кужымез вань шуыса, Иисус солы шуиз: «Вылысен тыныд сётэмын ӧй ке луысал, Мон вылын тынад нокыӵе но кужымед ӧй луысал» (Иоанн 19:11). Пилат сямен ик, туала кивалтӥсьёс ваньзэ ас тодэмзыя лэсьтыны уг быгато.

7. Кыӵе учыръёсы ми адями кивалтэтъёслы ум тэрытскиське но мар сярысь соослы вунэтоно ӧвӧл?

⁷ Христианъёс адями кивалтӥсьёслэсь кылзӥсько соку гинэ, куке шаерзылэн катъёсыз пумит уг мыно Инмарлэн курон-косонъёсызлы. Нош куке адямиос лэсьтыны куро сое, мае Инмар лэсьтыны уг лэзьы, яке лэсьтыны уг лэзё сое, мае Инмар косэ, соку ми соослэсь кылзӥськыны ум быгатӥське. Кылсярысь, куке кивалтӥсьёс егит пиосмуртъёсты армие мыныны косо b. Яке куке уг лэзё Библимес но со вылэ пыкиськем публикациосмес лыдӟыны, ӟеч иворез вераны но ваньмы ӵош Иеговалы йыбыртъяны. Кивалтӥсьёс адямиосты зӥбыса возё ке, кылсярысь, Христослэсь дышетскисьёссэ уйыло-улляло ке, соос Инмар азьын кыл кутозы. Иегова ваньзэ адӟе! (Екк. 5:7).

8. Маин пӧртэм луо Иегова но «вылӥ властьёс-кивалтӥсьёс»?

⁸ «Вылӥ» кыл, кудӥз гожтэмын Римъёслы 13:1, уг возьматы «самой вылӥ» шуэмез. Библиын адями кивалтӥсьёс «вылӥ властьёс-кивалтӥсьёс» шуыса нимамын ке но, вань на со, кин эшшо но вылӥынгес луэ. Библиын Иегова трос пол «Вылысь Инмар» шуыса нимамын (Дан. 7:18, 22, 25, 27).

9. Мар возьматэмын вал Данииллы?

⁹ Даниил пророклы адӟонъёс пыр возьматэмын вал, Иегова котькинлэсь вылӥ инты басьтэ шуыса. Нырысь «зарезь вуысь ньыль бадӟымесь пӧйшуръёс потӥзы», кудъёсыз возьмато дунневыл державаосты: Вавилонэз, Мидо-Персиез, Грециез, Римез но Англо-Американской дунневыл державаез (Дан. 7:1—3, 17). Собере пророк Иеговаез инмысь престол вылын адӟиз (Дан. 7:9, 10). Со, мае Даниил берлогес адӟиз, туала кивалтӥсьёслы алон луэ.

10. Кинлы Иегова музъемен кивалтыны право сётоз но мар со вера Инмар сярысь? (Даниил 7:13, 14, 27).

¹⁰ Лыдӟе Данииллэсь 7:13, 14, 27. Инмар адями кивалтӥсьёслэсь кивалтыны правозэс басьтэ но сётэ соослы, кинъёс кивалтыны ярамонгес луо но кинъёслэн тросгес кужымзы вань. Кинъёслы? «Адями Пилы укшасьлы», Иисус Христослы, но «Вылысь Инмарлэн дун-сьӧлыктэм» улӥсьёсызлы, 144 000 зырӟем христианъёслы, кудъёсыз «пумтэм вапумъёс ӵоже» кивалтозы (Дан. 7:18). Зэм но, Иегова —  Вылысь Инмар, соин ик со гинэ быгатэ таӵе воштӥськонъёс лэсьтыны.

11. Мар эшшо Даниил гожтӥз на Иегова сярысь?

¹¹ Даниил «Инмысь Инмар» сярысь азьлогес но вераз вал: «Со... эксэйёсты куштэ, эксэйёсты пуктэ». Со сяна, пророк гожтӥз: «Вылысь Инмар адями эксэйлыкез киулаз возе... сое сётэ солы, кинлы сётэмез потэ» (Дан. 2:19—21; 4:14). Вал-а сыӵе учыръёс, куке Иегова кивалтӥсьёсты куштӥз яке пуктӥз? Сыӵе учыръёс трос вал!

12. Вералэ учыръёсты, куке Иегова возьматъяз, со «вылӥ властьёслэсь-кивалтӥсьёслэсь» вылӥынгес шуыса. (Учке суредэз.)

¹² Иегова трос пол возьматъяз, со «вылӥ властьёслэсь-кивалтӥсьёслэсь» вылӥынгес шуыса. Эскеромы Библиысь куинь учыръёсты. Египетысь фараон Иеговалэсь ужась-тыршисьёссэ ужатыса возиз но кошкыны ӧз лэзьы. Нош Инмар аслэсьтыз калыксэ мозмытӥз но фараонэз «Горд Кам зарезе выйытӥз» (Пс. 135:15; Пот. 14:26—28). Вавилонысь Валтасар эксэй юон дыр ортчытӥз но «инъёслэн Кузё-Инмарзылэсь» ассэ вылӥе пуктӥз. Со сяна, со но солэн куноосыз, Иеговаез данъям интые, «азвесьлэсь... лэсьтэм инмаръёсты» данъязы (Дан. 5:22, 23). Нош Иегова та вылтӥяськись адямилы кужымзэ возьматӥз. «Со уе ик Валтасар... виемын вал», нош солэн эксэйлыкез «мидянъёслы, персъёслы сётэмын» вал (Дан. 5:28, 30, 31). Палестинаысь Ирод Агриппа I эксэй кораса виыны косӥз апостол Иаковез. Та эксэй апостол Пётрез но пытсэт сьӧры пуктӥз, сое виыны малпаса. Нош Иегова Пётрез виыны ӧз сёты. Иеговалэн кылчинэз Иродэз погыртӥз но, со кулӥз (Ап. уж. 12:1—5, 21—23).

13. Вералэ учыръёсты, куке Иегова юрттӥз Израиль калыклы огазеяськем кивалтӥсьёсты вормыны.

¹³ Иегова аслэсьтыз вылӥ луэмзэ огазе кариськем кивалтӥсьёслы но возьматъяз. Израиль калыклы со юрттӥз 31 огазеяськем эксэйёсты вормыны но Сӥзем музъемлэсь бадӟым люкетсэ киултыны (Иис. Н. 11:4—6, 20; 12:1, 7, 24). Озьы ик Иегова вормыны юрттӥз Сирияысь Венадад эксэез но со пала кариськем 32 мукет эксэйёсты (3 Экс. 20:1, 26—29).

14, 15. а) Мар веразы Навуходоносор но Дарий Иеговалэн кивалтэмез сярысь? б) Мар вераз псаломез гожъясь Иегова но солэн калыкез сярысь?

 ¹⁴ Иегова трос пол возьматъяз, со — Вылысь Инмар шуыса. Одӥг пол Навуходоносор эксэй аслаз кужыменыз но дано луэменыз ушъяськиз, нош Иеговаез ӧз данъя. Со понна со визьзэ ыштӥз. Куке Навуходоносорлэн визьмыз берытскиз, со «Вылысь Инмарез» данъяз но вераз: «[Иеговалэн] кузё луонэз — пумтэм вапумъёс ӵожелы». Озьы ик со ватсаз: «Ӧвӧл одӥг мурт но, кудӥз мед быгатысал Солэн киызлы пумит султыны» (Дан. 4:27, 30—32). Нош мукет учыре, куке Иегова Даниилэз оскымон луэмез понна левъёслэсь утӥз, Дарий эксэй таӵе курон-косон сётӥз: адямиос «Данииллэн Инмарез азьын гажаса, куалекъяса мед улозы, малы ке шуоно Со улэп Инмар, пумтэм вапумъёс Улӥсь». Иегова сярысь эксэй вераз: «Солэн эксэйлыкез куашкасьтэм, пумтэм вапумъёс ӵожелы со Кузё луэ» (Дан. 6:7—10, 19—22, 26, 27).

¹⁵ Псаломез гожъясь вераз: «Кузё-Инмар язычникъёслэсь кенешъёссэс куашкатъя, калыкъёслэсь урод малпанъёссэс быдтэ. Шудо со калык, кинлэн Инмарез Кузё-Инмар луэ, адямиос, кудъёссэ Со Аслыз люкетлы бырйиз» (Пс. 32:10, 12). Соин ик милемлы туж тыршоно Иеговалэн син азяз дун-шектэмесь луыны!

16. Мар кароз Иегова «бадӟым куректон» дыръя но малы ми талы оскиськомы? (Учке суредэз.)

¹⁶ Ми тодӥмы, мар кариз Иегова азьвыл дыръёсы. Нош мар луоз азьланяз? Ми оскиськомы, Иегова «бадӟым куректон» дыръя аслэсьтыз оскымон ужась-тыршисьёссэ утёз шуыса (Матф. 24:21; Дан. 12:1). Куке калыкъёслэн огазеяськонзы, Магог музъемысь Гог, Иеговалэн оскымон калыкез вылэ урдскоз, Инмар соосты  утёз. Та огазеяськон пӧлы Огазеяськем Нациослэн Организациысьтызы вань 193 шаеръёс пыризы ке но, Вылысь Инмармы но солэн ожгарчиосыз трослы кужмогес. Иегова кылзэ сётэ: «Мон Аслэсьтым быдӟымлыкме, дун-сьӧлыктэм луэмме тодыто, трос калыкъёслэн син азязы Асме возьмато, соку тодозы, Мон — Кузё-Инмар» (Иез. 38:14—16, 23; Пс. 45:11).

17. Библиын гожтэмъя, мар возьма «музъем выл эксэйёсты» но дун-шектэм адямиосты?

¹⁷ Инмарлэн калыкез вылэ Гог урдскем бере Армагеддон ож кутскоз. Соку Иегова «музъем выл эксэйёсты» быдтоз (Усьт. 16:14, 16; 19:19—21). Куке Инмарлэн тушмонъёсыз быдтэмын луозы, музъем вылын шонер улӥсьёс но дун-шектэм муртъёс гинэ улозы (Мад. 2:21).

18. Мар карыны дась вал тросэз зэмос христианъёс но малы? (Даниил 3:95).

¹⁸ Трос дауръёс ӵоже тросэз зэмос христианъёс Иеговалы, Вылысь Инмарзылы, оскымон кылён понна, дась вал пытсэтын но пукыны, улонзэс но сётыны. Соослэн юн мылкыдзы вал Иеговалэн син азяз дун-шектэмесь луыны. Сыӵе ик мылкыдзы вал Седрахлэн, Мисахлэн но Авденаголэн, кудъёссэ Вылысь Инмар ӝуась гурын утиз, малы ке шуоно соос Инмарзылы оскымон кылизы. (Лыдӟе Данииллэсь 3:95.)

19. Мае лыдэ басьтоз Иегова, адямиосты судить карыкуз, но мар милемлы кароно?

¹⁹ Давид эксэй гожтӥз, макем кулэ Инмар азьын дун-шектэм луыны: «Кузё-Инмар калыкъёсты судить каре. Монэ судить карыкуд, Кузё-Инмаре, шонер, дун-шектэм улэмме санэ пон» (Пс. 7:9). Мукет псаломаз со Иеговалэсь куриз: «Дун-шектэм, шонер улон монэ мед утёз» (Пс. 24:21). Ойдолэ тыршомы, номыр шоры учкытэк, Иеговалы оскымон луыны! Ми озьы лэсьтӥмы ке, милям псаломъёсты гожъясьлэн кадь шӧдонъёсмы луозы: «Шудоесь Кузё-Инмарлэн законэзъя дун-шектэмъёслэн сюрестӥзы ветлӥсьёс» (Пс. 118:1).