1940-тӥ ар берегес ик анае но атае Иеговалэн Адӟись-Ивортӥсьёсыныз Библиез дышетыны кутскизы. Соос дышетэмысь дугдӥзы ке но, анаелы азьланяз но «Возьмаськон башня» но «Сайкалэ!» журналъёсты вайылӥзы. 1950-тӥ арын Нью-Йоркын калыккуспо конгресс ортчиз. Ми быдэс семьяенымы отчы мынӥмы.

Соберегес ик ми доры ӵем пыраны кутскиз Лоренс Джеффрис агай. Со туж тыршиз монэ зэмлыкен тодматыны. Мыным уг кельшы вал, Иеговалэн Адӟись-Ивортӥсьёсыз политикае уг пырисько но армиын служить уг каро шуыса. Мон солэсь юай: «Америкаын ваньзы ожмаськыны пумит луизы ке, кин асьмелэсь шаермес утёз?» Джеффрис агай чидаса кылзӥз монэ но вераз: «Пукты син азяд: Америкаын вань адямиос Иеговалы ужало-тыршо. Кызьы малпаськод, мар кароз Инмар, тушмонъёс урдскизы ке?» Соин вераськыса, мон валай, шонертэм малпаськисько шуыса. Собере мынам мылкыды ӝутскиз зэмлыкен умойгес тодматскыны.

Мон трос лыдӟыны кутски азьвыл поттэм «Возьмаськон башня» но «Сайкалэ!» журналъёсты, кудъёссэ анае подвалын возиз. Дыр ортчыса, мон валай, зэмлыкез шедьтӥ шуыса. Соин ик, куке Джеффрис агай мыным ӵектӥз Библиез дышетыны, мон соглаш луи. Озьы ик мон кенешлэн пумиськонъёсаз ялан ветлыны кутски. Мынам сюлмы зэмлыкен пачылмиз, соин ик мон ивортӥсь луи. Куке мон валай, «Кузё-Инмарлэн быдӟым нуналыз» матын шуыса, мынам ужпумъёсы  воштӥськизы (Соф. 1:14). Университетын дышетскеме мынам уг поты вал ини. Мынам потэ вал мукетъёссэ Библиысь зэмлыклы дышетэме.

1956-тӥ арын 13-тӥ инвожое мон школаме йылпумъяй но, куинь нунал ортчыса, ёросысь конгрессын пылатӥськи. Мон ужпум кутӥ быдэс улонэ ӵоже Иеговалэсь дышетскыны но со сярысь мукетъёссэ дышетыны. Соку мон ӧй но малпа, кӧня кузьымъёс дасяз мыным Иегова.

Пылатӥськеме бере ӝыны ар ортчыса, мон пионер луи. 1956-тӥ арын толсур понна поттэм «Эксэйлыклы ужан-тыршонамы» печатламын вал «Багатӥськоды-а тӥ ужаны-тыршыны отын, кытын юрттэт кулэ?» статья. Мон быгатӥсько вал. Мынам потэ вал юрттэме отын, кытын ӟеч иворез тодытӥсьёс ӧжыт вал (Матф. 24:14).

Мон кошки Эджфилдэ (Лымшор Каролина штат). Со интыысь кенешын ньыль ивортӥсьёс гинэ вал. Мон лыктэм бере ми вить кузя луимы. Кенешлэсь пумиськонъёссэ ми одӥг агайлэн корказ ортчытъямы. Котькуд толэзе мон 100 час ужасько-тыршисько вал. Мон ӟырдыт мылкыдын тодытӥ но речьёс ӵем вералляй. Тунсыко: кенешын тросгес ужъёсты быдэсъяса, мон Иеговаез умойгес но умойгес тодӥ.

Одӥг кышномуртлэн, кудӥныз мон Библиез дышетӥ, Джонстонын кулэмъёсты ватонъя бюроез вал. Со милесьтым кӧня ке иськем кемын вал. Соку мон уж утчасько вал. Соин ик со ӵектӥз мыным со дорын арняяз кӧня ке нунал ужаны. Эшшо та лякыт сямо кышномурт милемлы пичи корказэ сётӥз, отын пумиськонъёсмес ортчытъяны мед быгатомы шуыса.

Собере ми доры Бруклинысь лыктӥз Джолли Джеффрис агай, кудӥзлэн атаез монэн Библиез дышетӥз. Ми соин ӵош пионеръёс луыса ужамы-тыршимы. Нош улӥмы ми одӥг агайлэн пичи трейлераз.

Лымшор штатъёсын уждунъёс туж пичиесь вал. Быдэс нунал ужам понна милемлы кык-куинь доллар гинэ сёто вал. Тодӥсько на, кызьы мон берпуметӥ коньдонме сиён басьтон понна быдтӥ. Магазинысь потыкум, мыным кеськиз пиосмурт: «Тыныд уж кулэ-а? Одӥг час ужам понна доллар сётӥсько». Мон соглаш кариськи но арняяз куинь нунал ӵоже пуктӥськон ужъёс бере жуг-жагез октӥ-калтӥ. Мон валай: Иеговалэн потэ, мон Эджфилдэ мед кылём шуыса. Мынам коньдонэ ӧжыт вал ке но, 1958-тӥ арын мон мынӥ Нью-Йоркын ортчись калыккуспо конгрессэ.

Конгресслэн кыкетӥ нуналаз мон пумитай Руби Уодлингтон сузэрез, кудӥз пионер луыса ужаз-тыршиз Галлатинын (Теннесси штат). Рубилэн но, мынам но миссионеръёс луэммы потэ вал. Соин ик ми мынӥмы Галаадын дышетскыны мылкыд карисьёслэн пумиськоназы, кудӥз со конгрессын ортчиз. Берлогес ми ог-огмылы гожтэтъёс гожъяны кутскимы. Одӥг пол монэ ӧтизы Галлатинын речь вераны. Берлолы кельтытэк, мон Рубилы ӵектӥ мыным бызьыны. Мон солэн кенешаз выжи но, 1959-тӥ арын ми кузпалъяськимы.

23 арес дыръям монэ куризы тӧроослэн кенешсылэсь ужзэ радъяны. Со дыре Чарлз Томпсон ёросэз чаклась луиз. Нырысь ик со Галлатинысь кенеше лыктӥз. Та агай трос аръёс ӵоже ужа-тырше вал ини, озьы ке но со мынэсьтым юаз, мар кулэ татысь агайёслы но кызьы соос сярысь сюлмаськизы мукет ёросэз чакласьёс. Та агаен ӵош ужаса-тыршыса, мон валай: ужпум кутэмлэсь азьло туж кулэ юанъёс сётъяны но ваньзэ пыр-поч эскерыны.

1964-тӥ арын куартолэзе монэ ӧтизы одӥг толэзь ӵоже Эксэйлыклы ужан-тыршон школаын дышетскыны. Та школа ортчиз Саут-Лансингын. Дышетӥсьёс мынэсьтым мылкыдме ӝутӥзы эшшо но тросгес Иегова сярысь тодыны но соин кусыпъёсме юнматыны.

1965-тӥ арын толшоре мон Рубиен ӵош ёросэз чаклась луыса ужаны-тыршыны кутски. Милям ёросмы туж бадӟым вал: Ноксвиллысен (Теннесси штат) Ричмондозь (Виргиния штат). Отчы пыро вал Уйпал Каролина, Кентукки но Шундыпуксёнпал Виргиния штатъёс. Со дыре Огазеяськем штатъёсын лымшор палаз сьӧд но тӧдьы куо агайёс ӵош пумиськылыны ӧз быгатэ. Соин ик мон ветлӥ со кенешъёсы гинэ, кудъёсаз сьӧд куо Адӟись-Ивортӥсьёс гинэ пыро вал. Вын-агайёс туж куанер улӥзы, соин ик ми ог-огмылы юрттӥськыны дышетскимы. Одӥг ёросэз чаклась, кудӥз трос аръёс ӵоже ужаз-тыршиз ини, мыным туж кулэ луись малпан вераз: «Мукетъёслы агай лу. Кенешын астэ кузё кадь эн возьы. Мукетъёслы юрттыны быгатод соку гинэ, куке соос шӧдозы, тон соослэн агайзы шуыса».

Одӥг пол ми пичи кенеше лыктӥмы. Руби Библиез дышетыны кутскиз кышномуртэн, кудӥзлэн аресъем нылыз вал. Отын та кышномуртэн нокин но Библиез дышетыны ӧз быгаты, соин ик Руби гожтэтъёс пыр дышетонзэ азьланьтӥз. Куке ми мукет дыръя та интые лыктӥмы, со кышномурт котькуд пумиськонэ ветлӥз. Собере со интые ыстӥзы кык сузэръёсты, кудъёсыз нимысьтыз пионеръёс вал. Соос та кышномуртэн дышетонэз азьланьтӥзы. Ӝоген со пылатӥськиз. 30 ар ортчыса, 1995-тӥ арын, Паттерсонысь Вефильын Руби доры егит сузэр лыктӥз. Ӵапак солэн анаеныз Руби Библиез дышетӥз вал. Та егит сузэр но солэн картэз Галаад школалэн 100-тӥ классаз дышетскизы.

Милям кыкетӥ ёросмы интыяськемын вал Флорида штатлэн шораз. Милемлы маин ке ветлоно вал, соин ик ми дунтэм машина басьтӥмы. Но нырысетӥ арняяз ик машинамы сӧриськиз, нош сое тупатыны коньдонмы ӧй вал. Мон жингыртӥ одӥг агайлы, кудӥз милемлы юрттыны быгатэ вал. Со ми доры машина тупатӥсез ыстӥз, но коньдон ӧз басьты. Агай вераз: «Эн сюлмаське. Мон коньдондэс уг басьты». Со сяна, та агай ачиз милемлы кӧня ке коньдон сётӥз. Та учыр оскытӥз милемыз, Иегова аслаз ужась-тыршисьёсыз сярысь сюлмаське шуыса, озьы ик тодамы вайытӥз, шырыт сямоесь луоно шуыса.

Куке ми кенешъёсы ветлӥмы, ми котьку но дугдылӥмы вын-агайёс но сузэр-апайёс доры. Соин ик милям трос умой эшъёсмы вал. Одӥг пол мон кенеш сярысь отчёт гожъяны кутски но сое печатлан машинкае кельтӥ. Кӧня ке дыр ортчыса берытски но адӟи, кузёосмылэн куинь аресъем пизы мыным отчётме «йылпумъяны» юрттӥз шуыса. Собере ми трос аръёс ӵоже та пияшен со учыр вылын серекъямы.

1971-тӥ арын монэ ыстӥзы Нью-Йорке, улосэз чаклась луыса ужаны-тыршыны. Ми туж паймимы! Соку мыным 34 арес гинэ вал. Мон вал соослэн нырысетӥез сьӧд куо улосэз чакласьсы. Озьы ке но агайёс монэ туж шумпотыса пумитазы.

Мыным туж кельше вал котькуд шутэтскон нуналъёсы ёросысь конгрессъёсын Иегова сярысь дышетыны. Тросэз ёросэз чакласьёс мынэсьтым трослы азьлогес ужаны-тыршыны кутскизы. Соос пӧлысь одӥгез пылатӥськон азям речь вераз. Нош мукетыз агай, Теодор Ярач, берлогес Кивалтӥсь кенешын ужаз-тыршиз. Озьы ик отын Бруклинысь Вефильын ужась трос агайёс вал. Мон туж тау карисько ёросэз чакласьёслы но Вефильын ужасьёслы, соосын ӵош ужаны туж капчи вал шуыса! Мон ас синъёсыным адӟи, кызьы та яратӥсь тӧроос  Инмарлэн Кылызлы оскисько но солэн организациезлы юрттӥсько. Сыӵе зӥбыт-востэм агайёсын ужан-тыршон шумпотон гинэ вайиз.

1974-тӥ арын Кивалтӥсь кенеш мукет ёросэз чакласьёсты куриз улосысь чакласьёс луыны. Мон выльысь ёросэз чаклась луи. Таяз учыре монэ Лымшор Каролина штатэ ыстӥзы. Со дыре кенешъёсын но ёросъёсын сьӧд но тӧдьы куо агайёс ог-огзылэсь люкемын ӧй вал ини. Ми талы туж шумпотӥмы.

1976-тӥ арлэн пумаз монэ Джорджия штатэ ыстӥзы. Мынам ёросэ интыяськемын вал Атланта но Колумбус каръёс вискын. Ноку но уг вунэты, кызьы мон, вить сьӧд куо нылпиосты ватыку, речь верай. Йыруж лэсьтӥсьёс соослэсь корказэс сутӥзы. Анайзы туж зол сутӥськиз но эмъюртэ сюриз. Иеговалэн туж трос Адӟись-Ивортӥсьёсыз — сьӧдъёсыз но, тӧдьыосыз но — эмъюртэ мынӥзы, та нылпиослэсь анай-атайзэс юнматон понна. Агайёс но сузэръёс туж бадӟым яратонзэс возьматӥзы. Куке Инмарлэн ужась-тыршисьёсыз ог-огзылы гажан-жалянзэс возьмато, соос туж секыт куректонъёсты но чиданы быгато.

1977-тӥ арын милемыз куризы кӧня ке толэзьлы Бруклинысь Вефиле лыктыны, одӥг проектэн юрттон понна. Куке та проект йылпумъяське вал ини, милемын Кивалтӥсь кенешысь кык агайёс пумиськизы но юазы, потэ-а милям Рубиен Вефиле кылеммы. Ми соглаш луимы.

Собере 24 ар ӵоже мон ужан-тыршонэз радъясь ёзэтын ужай. Ӵем дыръя та ёзэтысь агайёслы секыт юанъёсты эскероно луэ. Соосты сэрттон-пертчон понна, Кивалтӥсь кенеш сётэ кивалтэт, кудӥз Библиысь возетъёс вылэ пыкиське. Со юрттэ ужан-тыршонэз радъясь ёзэтлы юанъёслы валэктонъёс сётъяны, озьы ик ёросэз чакласьёсты, тӧроосты но пионеръёсты дышетыны. Солы луыса тросэзлэн осконзы будэ. Нош ваньмыз та Иеговалэсь организацизэ юнматэ.

1995-тӥ арысен 2018-тӥ арозь валтӥсь кивалтонни монэ пӧртэм филиалъёсы ыстылӥз. Мон пумиськылӥ филиаллэн комитетъёсыныз, Вефильын ужасьёсын но миссионеръёсын. Кинлэн ке шуг-секытъёсыз вал ке, мон быгатӥ соосыз юнматыны но соослы юрттыны. Соослэн учыръёссы монэ но Рубиез котьку юнмато вал. Кылсярысь, 2000-тӥ арын ми Руандае ветлӥмы. Милям сюлмамы ик пыриз, куке тодӥмы, мар пыр ортчоно луиз вын-агайёслы но Вефильысь семьялы 1994-тӥ арын луэм геноцид дыръя. Тросэзлэн матысь адямиоссы быризы ке но, агайёс осконзэс но шумпотонзэс ӧз ыштэ.

Али милемлы 80 ареслэсь тросгес ини. Берло 20 аръёс ӵоже мон Огазеяськем штатъёсысь филиаллэн комитетаз ужасько-тыршисько. Мон университетын ӧй дышетскы. Озьы ке но Иегова но солэн организациез мыным самой умой образование сётӥзы. Та юрттэ мыным мукетъёссэ дышетыны Библиысь зэмлыкъёслы, кудъёсызлы луыса адямиос пырак улыны быгатозы (2 Кор. 3:5; 2 Тим. 2:2). Мон ас синъёсыным адӟи, кызьы Библиысь зэмлык адямиослы юрттэ улонзэс умой пала воштыны но Кылдытӥсен эшъяськыны (Иак. 4:8). Ми Рубиен котьку но асьмелы тодамы вайытӥськомы, макем бадӟым дан Иеговалэсь дышетскыны но мукетъёссэ зэмлыклы дышетыны. Иеговалэн ужась-тыршисез понна со котьмалэсь бадӟым шумпотон!