1. Кыӵе со оскиськымон адями?

 ОСКИСЬКЫМОН адями тырше сётэм кылзэ быдэстыны но пӧяськытэк улыны (Пс. 14:4). Сыӵе адямилы оскиськыны луэ. Милям потэ, вын-агайёс но сузэр-апайёс милемлы мед оскиськозы шуыса. Мар со понна кароно?

2. Мар кароно, оскиськымон адями луон понна?

² Милям ужъёсмы возьматыны кулэ, милемлы оскиськыны луэ шуыса. Но со понна туж тыршоно. Со коньдон кадь: поттыны секыт, ыштыны капчи. Иеговалы быдэсак оскиськыны луэ. Со сётэм кылзэ котьку но быдэстэ, малы ке шуоно «Солэн вань ужъёсыз оскиськымонэсь» (Пс. 32:4). Инмар возьма, ми солэсь адӟем каромы шуыса (Еф. 5:31). Ойдолэ тодамы ваёмы Иеговалэсь ужась-тыршисьёссэ, кудъёсыз солэсь адӟем каризы но оскиськымон луэмзэс возьматӥзы. Озьы ик ми эскеромы вить сямъёсты, кудъёсыз юрттозы милемлы оскиськымон адями луыны.

3, 4. Кызьы Даниил пророк оскиськымон луэмзэ возьматӥз но кыӵе юанъёс аслыд сётыны кулэ?

³ Даниил пророк туж оскиськымон адями вал. Со вал иудейёс пӧлын, кудъёссэ вавилон пленэ нуизы. Ӝоген валамон луиз, Даниил — оскиськымон адями шуыса. Солы эшшо но тросгес оскиськыны кутскизы, куке Иеговалэн юрттэменыз со Навуходоносор эксэйлэсь уйвӧтъёссэ валэктыны быгатӥз. Огпол Даниил Навуходоносорлы вераны кулэ  вал, со Иеговалы ярамон ӧвӧл шуыса. Та ивор эксэйлы ӧз кельшысал. Уката но Навуходоносор туж ӝог пурӟись вал. Соин ик, эксэен вераськон понна, Данииллы кышкасьтэм луоно вал (Дан. 2:12; 4:17—19, 22). Трос аръёс ортчыса, Даниил нош ик возьматӥз, солы оскиськыны луэ шуыса. Со шонер валэктӥз кылъёсты, кудъёсыз Вавилонын эксэй юртысь борддор вылэ потӥзы (Дан. 5:5, 25—29). Эшшо берлогес Дарий эксэй но солэн кузёйыръёсыз адӟизы, Даниил «ваньзылэсь... вылӥынгес вал» шуыса. Соос валазы, Даниил «оскиськымон вал, нокыӵе но янгышез, сьӧлыкез» ӧй вал шуыса (Дан. 6:3, 4). Озьыен, мукет инмаръёслы йыбыртъясь кивалтӥсьёс но тодӥзы, Иеговалэн та ужась-тыршисезлы оскиськыны луэ шуыса.

⁴ Даниил сярысь малпаськыса, ми асьмелэсь юаны быгатӥськомы: «Мар мон сярысь малпало Адӟись-Ивортӥсь луисьтэм адямиос? Кызьы мон быдэсъясько мыным сётэм ужъёсты? Луэ-а мыным оскиськыны?» Малы аслыд таӵе юанъёс сётыны кулэ? Малы ке шуоно оскиськымон луэменымы ми Иеговаез данъяськомы.

5. Мар юрттӥз Хананийлы оскиськымон адями луыны?

⁵ Асьме вакытлэсь азьло 455-тӥ арын Неемия кивалтӥсь Иерусалимлэсь борддоръёссэ тупатӥз. Собере со утчаны кутскиз оскиськымон адямиосты, кудъёсыз кар сярысь сюлмаськысалзы. Одӥгез, кинэ со бырйиз, вал изкарен кивалтӥсь Хананий. Тани мар со сярысь вера Библия: «Со трос калык пӧлысь одӥгез тужгес  но оскиськымонэз, Инмарлэсь кышканэн улӥсь адями вал» (Неем. 7:2). Хананий солы сётэм котькыӵе ужез туж тыршыса быдэсъяз, малы ке шуоно со Иеговаез яратӥз но сое ӝоже уськытыны кышказ. Та милемлы но юрттоз Иеговалы ужан-тыршонын оскиськымонэсь луыны.

6. Кызьы Тихик возьматӥз, со апостол Павеллэн оскиськымон эшез вал шуыса?

⁶ Тодамы ваёмы Тихик сярысь, кудӥз апостол Павеллэн оскиськымон эшез вал. Римын одӥг коркан жильыетын пукыкуз, Павел тодӥз, Тихиклы оскиськыны быгатэ шуыса. Тихик сярысь Павел вераз «Кузё-Инмарлы оскымон ужась-тыршись» сярысь кадь (Еф. 6:21, 22). Та агай пыр Ефес но Колоссы каръёсын улӥсь христианъёслы Павел аслэсьтыз гожтэтъёссэ ыстӥз. Озьы ик со сое куриз, соослы юрттыны но соосты юнматыны. Туннэ но милям вань трос оскиськымон вын-агайёсмы, кудъёсыз, Тихик сямен, ми сярысь сюлмасько (Кол. 4:7—9).

7. Малы дышетскыны луэ тӧроослэсь но кенешлы юрттӥсьёслэсь?

⁷ Ми туж дунъяськомы оскиськымон тӧроосмес но кенешлы юрттӥсьёсмес. Даниил, Хананий но Тихик сямен, соос туж тыршыса быдэсъяло соослы сётэм ужъёсты. Кылсярысь, арня куспын пумиськонэ лыктыса, милям малпанмы ик уг кылды, быдэс пумиськон яке пумиськонлэн оглюкетэз уз луы шуыса. Нош тӧроос туж шумпото, куке вын-агайёс но сузэр-апайёс дышетскон ужъёссэс тыршыса дасяло но соосты пумиськонын возьмато. Озьы ик, куке ми дышетскисьмес вань адямиослы дасям речез кылзыны ӧтиськомы, ми ум кышкаське, агайёс речь верасез ӧтьыны вунэтӥзы шуыса. Со сяна, ми тодӥськомы, тодытон понна публикациосмы котьку но луозы шуыса. Ми шумпотӥськомы, оскиськымон агайёс ми сярысь туж умой сюлмасько шуыса. Соос понна ми Иеговалы бадӟым тау шуиськомы. Нош мар вераны луоз ми сярысь? Кызьы возьматоно, милемлы оскиськыны луэ шуыса?

8. Мар сярысь вунэтоно ӧвӧл, куке мукетъёсызлэсь улэм-вылэмзы сярысь юалляськиськомы? (Мадёнъёс 11:13).

⁸ Ми яратӥськомы вын-агайёсмес но сузэр-апайёсмес. Соин ик милям тодэммы потэ, кызьы соос уло. Но мултэс трос юалляськоно ӧвӧл. Нырысетӥ даурын вал сыӵе христианъёс, кудъёсыз «супыльтӥсесь, котьмаин тунсыкъяськисесь» вал, «мае уг яра, сое вераса» ветлӥзы (1 Тим. 5:13). Милям уг поты, ми сярысь но озьы ик мед малпалозы шуыса. Нош кызьы асьмеды возёно, куке кин ке милемлы сюлэмзэ усьтэ но со сярысь мукетъёсызлы вераны уг лэзьы? Шуом, сузэр милемлы висёнэз яке сюлмаськонэз сярысь вера но куре, та вераськон ми куспын гинэ мед кылёз шуыса. Солэсь куронзэ гажаны кулэ b. (Лыдӟе Мадёнъёсты 11:13.) Нош табере ойдолэ эскеромы мукет учыръёсты, куке тодэммес мукетъёсызлы вераны уг яра.

9. Кызьы семьяысь котькудӥз возьматыны быгатэ, солы оскиськыны луэ шуыса?

⁹ Семьяын. Котькуд семьяын луыло сыӵе учыръёс, кудъёсыз сярысь мукетъёсызлы тодыны кулэ ӧвӧл. Шуом, одӥг сузэрлэн вань сыӵе сямыз, кудӥз сэрен картэз уг  керӟегъяськы, нош пальпотэ гинэ. Но кышноезлэн та сямыз сярысь со мукетъёсызлы уг вера, малы ке шуоно кышнозэ яратэ но сое вӧсь каремез уг поты (Еф. 5:33). Быдэ вуымтэ нылпиослэн туж потэ, соосты мед гажалозы шуыса. Умой луоз, анайзы но атайзы тае валазы ке. Соос нылпиоссылы гажамзэс возьматозы, нылпиоссылэн янгышъёссы сярысь мукетъёсызлы ӧз вералэ ке (Кол. 3:21). Нылпиослы но валаны кулэ, мар сярысь мукетъёсызлы вераны яра, нош мар сярысь — уг яра, семьязылы возьыт медаз луы шуыса (К. Зак. 5:16). Куке семьяын котькудӥз вала, мар сярысь мукетъёсызлы верано ӧвӧл, соку семья эшшо но юнгес луоз.

10. Кызьы ассэ возе зэмос эш? (Мадёнъёс 17:17).

¹⁰ Эшъёсын. Куддыръя ми пӧлысь тросэзлэн сюлмаськонъёсыз сярысь матысь эшезлы верамез потэ. Но кинлы ке сюлэмез усьтыны котьку ик капчи ӧвӧл. Нош ми тодӥмы ке, эшмы вераны лэзьымтэ мае ке мукетъёсызлы вераз шуыса, туж вӧсь луыны быгатэ. Ми туж дунъяськомы зэмос эшъёсты, кудъёсыз кылзэс пинь сьӧразы возьыны быгато. (Лыдӟе Мадёнъёсты 17:17.)

11. а) Малы ми тӧроослы но соослэн кышнооссылы оскиськыны быгатӥськомы? б) Малы милям дышетскеммы луэ тӧролэсь, кудӥз аслаз семьяезлы вераны лэзьымтэзэ уг вера? (Учке суредэз.)

¹¹ Кенешын. Тӧроос, кудъёсыз вераны лэзьымтэ мае ке мукетъёсызлы уг верало, вын-агайёс но сузэр-апайёс понна «тӧллэсь утиськон маке кадь» но «жобаськись куазьлэсь утись шобырет кадь» (Ис. 32:2). Мае гинэ ми соослы медам вералэ, ми тодӥськомы: соос сяна, та сярысь нокин уз тоды. Соин ик ми капчиен соослы вазиськыны быгатӥськомы. Ми ум косӥське соосты вераны сое, мае соос мукетъёсызлы вераны кулэ ӧвӧл. Ми тау кариськомы тӧроослэн кышнооссылы, соос картъёссылэсь вын-агайёс но сузэр-апайёс сярысь мултэс уг юаллясько шуыса. Ми шумпотӥськомы, куке тӧроос уг верало кышнооссылы сое,  мар сярысь вын-агайёсын но сузэр-апайёсын вераськизы. Тани мар вераз одӥг тӧролэн кышноез: «Мон тау карисько аслам картэлы. Со уг вера мыным, мар сярысь вераськиз агайёсын но сузэръёсын, кудъёсызлы юрттэт кулэ. Мон кинэн вераськемзэ уг но тодӥськы. Кыӵе умой, со уг вера шуыса мыным сое, мае мыным тодыны кулэ ӧвӧл. Соин ик кенешысь агайёсын но сузэръёсын мон каньыл сюлмын вераськыны быгатӥсько. Озьы ик мон тодӥсько: мон картэлы сюлмаськонъёсы но шуг-секытъёсы сярысь верай ке, со сяна та сярысь нокин уз тоды». Ваньмылэн потэ, милемлы мед оскиськозы шуыса. Кыӵе сямъёс со понна кулэ? Ойдолэ эскеромы соос пӧлысь витьсэ.

12. Малы вераны луоз, яратон — оскиськымон луон понна валтӥсез шуыса?

¹² Яратон — со валтӥсез, мар кулэ, оскиськымон луон понна. Иисус Христос вераз кык самой кулэ луись курон-косонъёс сярысь — Иеговаез но матысьёсмес яратон сярысь (Матф. 22:37—39). Иеговаез яратон мылкыдмес ӝутэ со кадь оскиськымон луыны. Нош вын-агайёс но сузэр-апайёс милемлы гинэ мае ке веразы ке, соосты яратон мылкыдмес ӝутоз тае мукетъёсызлы вератэк улыны. Милям уг поты соосты возьытэ вуттэммы яке вӧсь кареммы (Иоанн 15:12).

13. Кызьы зӥбыт-востэм сям юрттэ милемлы оскиськымон луыны?

¹³ Зӥбыт-востэм луон — эшшо одӥгез сям, кудӥз юрттоз милемлы оскиськымон луыны. Зӥбыт-востэм адями, мукетъёсты паймытон понна, уз тыршы ваньмызлэсь азьло кыӵе ке иворъёсты вераны (Флп. 2:3). Сыӵе сямо адями, тодэ ке сое, мае мукетъёсызлы вераны уг яра, тодэмзэ уз возьматы. Озьы ик ми зӥбыт-востэм луэммес возьматомы, Библиысь юанъёсты эскерыкумы, ӧм вералэ ке асьмелэсь малпанъёсмес, кудъёсыз Библиын яке публикациосамы уг эскерисько.

14. Кызьы валась луон юрттоз милемлы оскиськымонэсь луыны?

¹⁴ Валась луон христиан муртлы валаны юрттэ, ку «шып улонлэн... дырыз», ку «вераськонлэн... дырыз» (Екк. 3:7). Трос калыкъёслэн вань таӵе веранзы: «Кыл — азвесь, нош шып улон — зарни». Соин ик Мадёнъёсын 11:12 вераське: «Визьнодо адями шып улэ». Тани Андрей c агайлэн учырез. Кӧня ке дыр ӵоже со тӧро луыса ужа-тырше ини. Ӵем дыръя мукет кенешъёсысь тӧроос солэсь юрттэтсэ куро секыт юанъёсты сэрттыны-пертчыны. Учке, мар вера агай, кудӥз Андреен ӵош тӧроослэн кенешазы ужа-тырше: «Мукет кенешъёс сярысь вераны лэзьымтэзэ со ноку уг вера». Андрей вала бере, мае вераны яра, нош мае — уг яра, аслаз кенешысьтыз тӧроос сое туж гажало. Соос солы оскисько но тодо, юанъёс сярысь, кудъёссэ соос эскеро, тӧроослэн кенешсы сяна, нокин уз тоды шуыса.

15. Кызьы пӧяськытэк улон юрттэ оскиськымон луыны? Вералэ пример.

¹⁵ Пӧяськытэк улон — эшшо одӥгез, мар юрттоз оскиськымон луыны. Ми оскиськомы пӧяськисьтэм адямилы, малы ке шуоно тодӥськомы, со котьку но шонерзэ вера шуыса (Еф. 4:25; Евр. 13:18). Пуктэ син азяды таӵе учырез. Тӥледлы кенешлэн пумиськоназ дышетскон уж сётӥзы. Дасяськыкуды тӥ куриськоды кинэ ке тӥледыз кылзыны но вераны, мае умойгес карыны луоз. Кинлы  тӥ вазиськоды? Солы, кин вералоз сое, мае тӥляд кылэмды потэ, яке солы, кин лякытэн тӥледлы шонерзэ вералоз? Библиын гожтэмын: «Шекъёсты калык азьын шарае поттон умойгес лушкемен яратон сярысь. Яратӥсь муртлэн пыкылонъёсыз сюлмысь потэмын луо» (Мад. 27:5, 6). Куддыръя эшмылэсь визь-кенеш басьтыны секыт ке но, со милемлы пайда ваёз.

16. Малы милемлы асьмеды киямы кутоно, Мадёнъёсын 10:19 верамъя?

¹⁶ Оскиськымон адями луон понна, милемлы асьмеды киямы кутоно. Милям потэ ке вераны лэзьымтэзэ вераммы, та сям юрттоз кылмес кутыны. (Лыдӟе Мадёнъёсты 10:19.) Тужгес но кулэ асьмеды киямы кутыны социальной сетьёсын. Ми ӧм ке чаклаське, соку трос адямиослы вераны лэзьымтэ иворез вераломы. Кыӵе ке ивор интернетэ сюриз ке, ми ум тодӥське ини, мар карозы соин мукет адямиос но кыӵе бервылъёсы со вуттоз. Ку эшшо кулэ шып улыны? Куке тушмонъёсмы тодыны тыршо сое, мар вын-агайёсмылы но сузэр-апайёсмылы изъян вайысал. Со озьы луыны быгатэ, ми улӥськомы ке шаерын, кытын кивалтӥсьёс ужмес нуыны уг лэзё яке ужмес нуыны люкето, озьы ик милемлы полициын юанъёс сётъяло ке. Та выллем учыръёсын ми быгатӥськомы уже кутыны таӵе визь-кенешез: «Аслэсьтым ымме кортнаса уло» (Пс. 38:2). Озьыен, милемлы котьку но оскиськымон луыны тыршоно семьяямы, эшъёсынымы, кенешамы но мукет учыръёсын. Нош со понна милемлы асьмеды киямы кутоно.

17. Мар милемлы кароно, кенешын ваньмы ог-огмылы оскиськыны мед быгатомы шуыса?

¹⁷ Ми туж тау кариськомы Иеговалы, со милемыз аслаз семьяяз вайиз шуыса. Отын ваньзы ог-огзэс яратыса но ог-огзылы оскыса уло. Милемлы ваньмылы ялан тыршоно оскиськымон адямиос луыны. Котькудмылы тыршоно яратонмес возьматыны, зӥбыт-востэм но валась луыны, пӧяськытэк улыны но асьмеды киямы кутыны. Соку кенешын ваньмы ог-огмылы оскиськыны быгатомы. Соин ик ойдолэ Иегова Инмармылэсь адӟем каромы но вань ужъёсынымы возьматомы, милемлы оскиськыны луэ шуыса.