ЭСКЕРОН ПОННА СТАТЬЯ 39
Тӥляд нимды «улон книгаын» гожтэмын-а?
«Со азьын буре ваён книга гожтӥське, кытчы гожтэмын Кузё-Инмарлэсь кышканэн... улӥсьёслэн нимъёссы» (МАЛ. 3:16).
61-ТӤ КЫРӞАН Вперёд, Свидетели!
ТА СТАТЬЯЫН a
Авель улон дырысен Иегова адямиослэсь нимъёссэс «улон книгае» гожъя (Учке 1-тӥ но 2-тӥ абзацъёсты.)
1. Малахиялэн 3:16 верамъя, кыӵе книга Иегова гожтэ но мар отын гожтэмын?
СЮРС аръёс ӵоже ини Иегова нимысьтыз книга гожтэ. Отын гожтэмын нимъёс. Нырысетӥез соос пӧлысь — Авельлэн нимыз. Со вал Иеговалэн нырысетӥез оскымон ужась-тыршисез (Лука 11:50, 51) b. Трос дауръёс ӵоже Иегова отчы выль нимъёсты ватса. Али отын кӧня ке миллион нимъёс гожтэмын ини. Библиын та книга «буре ваён книга» но «улон книга» шуыса нимаське. Та статьяын ми сое «улон книга» шуыса нималомы (лыдӟе Малахиялэсь 3:16; Усьт. 3:5; 17:8).
2. Кинъёслэн нимъёссы улон книгаын гожтэмын но мар кароно, милям но ниммы отын гожтэмын мед луоз шуыса?
2 Та книгаын гожтэмын со адямиослэн нимъёссы, кудъёсыз Иеговалэсь кышкало но солэсь нимзэ данъяло. Соос пырак улыны быгатозы. Нош мар кароно милемлы, милям нимъёсмы улон книгаын гожтэмын мед луозы шуыса? Милемлы Иеговаен матысь кусыпъёс возёно, кудъёсыз луыны быгато Иисус Христослэн мозмытӥсь курбонэзлы луыса гинэ (Иоанн 3:16, 36). Кытын гинэ улыны ми медам оске, инмын яке музъем вылын, милям ваньмылэн потэ, нимъёсмы улон книгаын гожтэмын мед луозы шуыса.
3, 4. а) Милям ниммы али улон книгаын гожтэмын ке, возьматэ-а со, ми пырак уломы шуыса? Валэктэ. б) Мае ми эскеромы та но вуоно статьяосын?
3 Луэ-а вераны, соос, кинъёслэн нимъёссы али улон книгаын гожтэмын, одно ик пырак улозы шуыса? Тае валэкто Иеговалэн кылъёсыз, кудъёссэ со Моисейлы вераз: «Кин Мон азьын сьӧлыказ, сое Аслам книгаысьтым ӵушо» (Пот. 32:33). Озьыен, нимъёсты, кудъёсыз али улон книгаын гожтэмын, карандашен гожтэмез кадь ӵушыны луэ (Усьт. 3:5). Милям туж потэ, милесьтым нимъёсмес Иегова отчы пыраклы, «ручкаен», мед гожтоз шуыса. Нош со дырозь туж тыршоно.
4 Таин сэрен куд-ог юанъёс кылдо. Кылсярысь, мар Библиын вераське соос сярысь, кинъёслэн нимъёссы улон книгаын гожтэмын, но соос сярысь, кинъёслэн нимъёссы отын ӧвӧл? Ку пырак улон басьтозы соос, кинъёслэн нимъёссы та книгаын гожтэмын? Нош мар луоз соосын, кинъёслэн кулэмзылэсь азьло Иеговаен тодматскыны луонлыксы ӧй вал? Соослэн нимъёссы та книгае куке но гожтэмын луозы-а? Валэктонъёс ми шедьтомы та но вуоно статьяосысь.
КИНЪЁСЛЭН НИМЪЁССЫ УЛОН КНИГАЫН ГОЖТЭМЫН?
5, 6. а) Филиппыослы 4:3 верамъя, кинъёслэн нимъёссы улон книгаын гожтэмын? б) Ку соослэн нимъёссы та книгае пыраклы гожтэмын луозы?
5 Кинъёслэн нимъёссы улон книгаын гожтэмын? Та юанлы валэктон шедьтон понна, вераськомы вить группаосысь адямиос сярысь. Соос пӧлысь кинлэн ке но нимыз улон книгаын гожтэмын, нош кинлэн ке но — ӧвӧл.
6 Нырысетӥ группае пыро соос, кинъёс быръемын инмын Иисусэн ӵош кивалтыны. Соослэн нимъёссы али улон книгаын гожтэмын-а? Гожтэмын. Куке апостол Павел Филиппы карысь кенешлы гожтэтсэ гожъяз, со вераз, зырӟем христианъёслэн нимъёссы улон книгаын гожтэмын шуыса. (Лыдӟе Филиппыослы 4:3.) Соослэн нимъёссы та книгаысь ӵушемын медаз луэ шуыса, соослы азьланяз но Инмарлы оскымон луоно вал. Талы луыса, куке соослы печать пуктэмын луоз — кулэмзы азьын яке бадӟым куректон кутскон азьын,— соослэн нимъёссы та книгае пыраклы гожтэмын луозы (Усьт. 7:3).
7. Кызьы Усьтӥськон 7:16, 17 валаны юрттэ, ку мукет ыжъёслэн нимъёссы улон книгае пыраклы гожтэмын луозы?
7 Кыкетӥ группа — со туж трос мукет ыжъёс. Соослэн нимъёссы али улон книгаын гожтэмын-а? Гожтэмын. Армагеддон бере но нимъёссы отын гожтэмын луозы-а? Луозы (Усьт. 7:14). Иисуслэн верамезъя, та адямиос «мынозы... быронтэм улонэ» (Матф. 25:46). Но Армагеддон пыр потэмзы бере ик соослы быронтэм улон сётэмын уз луы. Соослэн нимъёссы улон книгаын азьло сямен ик карандашен кадь гожтэмын луозы на. Сюрс ар ӵоже кивалтэмез дыръя Иисус «соосты возьмалоз, улэп вуэн ошмесъёс доры соосты Со нуллоз». Соос Христослэсь кылзӥськизы но Иегова соосты оскымон ужась-тыршисьёсыныз лыдъяз ке, соку нимъёссы улон книгае пыраклы гожтэмын луозы. (Лыдӟе Усьтӥськонэз 7:16, 17.)
8. Кинъёслэн нимъёссы улон книгаын гожтэмын ӧвӧл но мар соосты возьма?
8 Куинетӥ группае пыро соос, кинъёс Армагеддонын пыраклы быдтэмын луозы. Соослэн нимъёссы улон книгаын ӧвӧл. Иисус соосты кечъёсын ӵошатӥз. Солэн верамезъя, сыӵе адямиос «мынозы пумтэм курадӟонэ» (Матф. 25:46). Апостол Павел но соос сярысь гожтӥз: «Сыӵе адямиослэн азьпал адӟонзы — пумтэм вапумъёслы бырон» (2 Фес. 1:9; 2 Пётр 2:9). Тае ик вераны луэ соос сярысь но, кинъёс святой духлы пумит сьӧлыкаса улӥзы. Соосты пырак улон уг возьма, нош пыраклы быдтон возьма. Валамон, соос улӟытэмын уз луэ шуыса (Матф. 12:32; Марк 3:28, 29; Евр. 6:4—6). Нош табере пыр-почгес вераськомы кык группаосысь адямиос сярысь, кудъёсыз музъем вылын улыны улӟытэмын луозы.
СООС, КИНЪЁС УЛӞЫТЭМЫН ЛУОЗЫ
9. Кыӵе кык группаос музъем вылын улыны улӟытэмын луозы но кыӵе пӧртэмлыкъёссы соослэн вань? (Апостолъёслэн ужъёссы 24:15).
9 Библиын верамъя, «шонер улэмъёс но, шонер улымтэос но» улӟытэмын луозы. Озьы ик отын вераське, та адямиос музъем вылын пырак дауръёс ӵоже улыны быгатозы шуыса. (Лыдӟе Апостолъёслэсь ужъёссэс 24:15.) «Шонер улэмъёс» — со адямиос, кудъёсыз Иеговалы оскымон ужаса-тыршыса улӥзы. Нош «шонер улымтэос» Иеговалэн ужась-тыршисьёсыз ӧй вал. Соос шонер ужъёс лэсьтыса ӧз улэ. Шонер улэмъёс но, шонер улымтэос но улӟытэмын луозы бере, луэ-а вераны, соослэн нимъёссы улон книгаын гожтэмын шуыса? Тае валан понна, ойдолэ котькуд группа сярысь нимаз вераськомы.
10. Малы «шонер улэмъёс» улӟытэмын луозы но кыӵе дано уж сётэмын луоз соос пӧлысь куд-огъёсызлы? (Озьы ик музъем вылэ улӟытон сярысь лыдӟыны луэ та журналысь «Лыдӟисьёслэн юанъёссы» статьяысь.)
10 «Шонер улэмъёс» — со ньылетӥ группа. Кулэмзылэсь азьло ик соослэн нимъёссы улон книгае гожтэмын вал ини. Кулэмзы бере Иегова соослэсь нимъёссэс отысь ӵушиз-а? Ӧз, малы ке шуоно соосты Инмар тодаз возе. Иисус шуиз: «Инмар — кулэмъёслэн Инмарзы ӧвӧл, Со — улэпъёслэн Инмарзы. Инмар азьын ваньмыз улэпесь» (Лука 20:38). Озьыен, куке шонер улэмъёс музъем вылэ улӟытэмын луозы, соослэн нимъёссы улон книгаын луозы на. Озьы ке но соос «карандашен» гожтэмын луозы на (Лука 14:14). Шонер улэмъёс пӧлысь куд-огъёсыз «кивалтӥсь карыса... быдэс музъем вылэ» пуктэмын луозы (Пс. 44:17).
11. Мае тодоно луоз «шонер улымтэослы», нимъёссы улон книгае гожтэмын мед луозы шуыса?
11 Табере вераськомы витетӥ группа сярысь — «шонер улымтэос» сярысь. Соос шонерлыко ӧз улэ (малы ке шуоно Иеговалэн курон-косонъёсыз сярысь ӧз тодэ, вылды). Соин ик соослэн нимъёссы улон книгаын ӧвӧл. Но Инмар соосты улӟытоз но шонерлыко улыны луонлык сётоз, нимъёссы улон книгае гожтэмын мед луозы шуыса. Шонер улымтэослы туж юрттоно луоз. Азьвыл соос пӧлысь куд-огъёсыз туж урод ужъёс лэсьтыса улӥзы. Соин ик соосты дышетоно луоз Иеговалэн шонерлыко возетъёсызъя улыны. Со понна Инмарлэн Эксэйлыкез самой бадӟым дышетон программа радъялоз.
12. а) Кин дышетоз шонер улымтэосты? б) Мар луоз соосын, кинъёс воштӥськыны пумит кариськозы?
12 Кин дышетоз шонер улымтэосты? Туж-туж трос калык но улӟытэм шонер улэмъёс. Шонер улымтэ адямиослэн нимъёссы улон книгае гожтэмын мед луозы шуыса, соослы Иеговаен эшъяськоно но солы улонзэс сӥзёно луоз. Инмысь судьяос — Иисус Христос но зырӟем христианъёс — сак учкозы, соос басьтэм тодон-валанзэс улоназы пырто-а, уг-а (Усьт. 20:4). Соослы, кинъёс воштӥськыны пумит кариськозы, пырак улон сётэмын уз луы, соослы 100 арес ке но луиз (Ис. 65:20). Иегова но Иисус адямилэсь сюлэмзэ адӟо. Соос уз лэзе, выль дуннеын кин ке но мукетъёсызлы изъян мед ваёз шуыса (Ис. 11:9; 60:18; 65:25; Иоанн 2:25).
КИН КЕ НО БЫРОНТЭМ УЛОНЭ ПЫРЫНЫ УЛӞОЗ, НОШ КИН КЕ НО — СУД УЛЭ СЮРОНЛЫ
13, 14. а) Кызьы ми азьвыл валамы Иисуслэсь кылъёссэ, кудъёсыз гожтэмын Иоаннлэсь 5:29? б) Мае лыдэ басьтоно, та кылъёсты шонер валан понна?
13 Иисус но вераз адямиос сярысь, кудъёсыз музъем вылэ улӟытэмын луозы: «Дыр вуэ, куке ваньмыз шайгуосын кыллисьёс Инмар Пилэсь куаразэ кылозы; соку ӟеч уж лэсьтӥсьёс быронтэм улонэ пырыны улӟозы, нош урод уж лэсьтӥсьёс янгыше сюронлы улӟозы» (Иоанн 5:28, 29). Мар сярысь вераз Иисус?
14 Азьвыл ми малпамы, Иисус вераз ужъёс сярысь, кудъёссэ адямиос улӟемзы бере лэсьтозы: кин ке ӟеч ужъёс лэсьтоз, нош кин ке — урод ужъёс. Но Иисус ӧз вера: улӟытэм адямиос лэсьтозы ӟеч ужъёс яке лэсьтозы урод ужъёс. Грек кылын та кылбур ортчем дырын гожтэмын. Иисус вераз соос сярысь, кинъёс «ӟеч ужъёс лэсьтӥзы», но соос сярысь, кинъёс «урод ужъёс лэсьтӥзы». Озьыен, татын вераське ужъёс сярысь, кудъёссэ адямиос кулэмзылэсь азьло лэсьтӥзы. Та шонер луэ, малы ке шуоно выль дуннеын нокинлы но урод ужъёс лэсьтыны лэземын уз луы. Озьыен, шонер улымтэос урод ужъёс кулэмзылэсь азьло лэсьтӥзы. Соку кызьы валано та кылбурысь Иисуслэсь кылъёссэ?
15. Кин улӟоз, пырак улон басьтон понна, но малы?
15 Шонер улэмъёс, кудъёсыз ӟеч ужъёс лэсьтӥзы, улӟозы, пырак улон басьтон понна, малы ке шуоно соослэн нимъёссы улон книгае гожтэмын ини. Озьыен, «ӟеч уж лэсьтӥсьёсты» улӟытон, кудӥз сярысь вераське Иоаннлэсь 5:29,— со «шонер улэмъёсты» улӟытон, кудӥз сярысь вераське Апостолъёслэн ужъёсазы 24:15. Та тупа солы, мар гожтэмын «Выль дунне» берыктэмын Римъёслы 6:7: «Уго кулэм мурт сьӧлыкезлэсь мозмытэмын». Озьыен, шонер улэмъёслэсь сьӧлыкъёссэс Иегова кулэмзы бере простить каре. Но ӟеч ужъёссэс со уг вунэты (Евр. 6:10). Соин ик соослэн нимъёссы улон книгае кылё. Но Инмар нимъёссэс улон книгаысь медаз ӵушы шуыса, шонер улэмъёслы улӟемзы бере но Инмарлы оскымон кыльыны кулэ.
16. Кинъёс улӟозы «янгыше сюронлы», яке суд улэ сюронлы?
16 Нош мар вераны луоз соос сярысь, кинъёс урод ужъёс лэсьтыса улӥзы? Кулэмзы бере соослэн сьӧлыкъёссы простить каремын луозы ке но, кулэмзылэсь азьло соос Иеговалы ужаса-тыршыса ӧз улэ. Соин ик соослэн нимъёссы улон книгаын ӧвӧл. Озьыен, «урод уж лэсьтӥсьёс» — со «шонер улымтэос», кудъёсыз сярысь вераське Апостолъёслэн ужъёсазы 24:15. «Урод уж лэсьтӥсьёс» «янгыше сюронлы», яке суд улэ сюронлы улӟозы c. Мае со возьматэ? Иисус сак учкоз, кыӵе ужъёс соос лэсьтозы (Лука 22:30). Соослэсь нимъёссэс улон книгае гожтоно-а, ӧвӧл-а шуыса валан понна, дыр кулэ луоз. Иегова шонер улымтэослэсь нимъёссэс аслаз книгаяз гожтоз соку гинэ, куке соос урод ужъёссылэсь куштӥськозы но солы улонзэс сӥзёзы.
17, 18. Мар кароно луоз ваньмызлы музъем вылэ улӟытэмъёслы но кыӵе «ужъёс» сярысь вераське Усьтӥськонын 20:12, 13?
17 Вань улӟытэмъёслы — шонер улэмъёслы но, шонер улымтэослы но — выль книгаосын гожтэм законъёслэсь кылзӥськоно луоз. Та книгаос усьтэмын луозы Сюрс ар ӵоже кивалтон дыръя. Апостол Иоанн гожтӥз: «Соку мон кулэмъёсты адӟи, покчиоссэ но, быдӟымъёссэ но — Инмар азьын сылӥсьёсты. Книгаос усьтэмын вал, мукетыз но — улон книга — усьтэмын вал. Кулэмъёсты лэсьтэм ужъёссыя судить каризы, книгаосын кызьы соос сярысь гожтэмын вал» (Усьт. 20:12, 13).
18 Кыӵе «ужъёссыя» улӟытэмъёс судить каремын луозы? Вераське-а татын ужъёс сярысь, кудъёссэ соос кулэмзылэсь азьло лэсьтӥзы? Уг! Эн вунэтэ: кулэмзы бере соослэн сьӧлыкъёссы простить каремын луозы. Соин ик, татын кулэмзылэсь азьло лэсьтэм ужъёссы сярысь гожтэмын ӧвӧл. Татын вераське, дыр, со сярысь, кызьы улӟытэмъёс учкозы выль дуннеын дышетон программа шоры. Инмарлы оскымон адямиослы но, кылсярысь, Нойлы, Самуиллы, Давидлы но Данииллы, Иисус Христос сярысь тодон-валан басьтоно но солэн курбонэзлы осконо луоз. Нош шонер улымтэослы эшшо но тросгес тодон-валан басьтыны кулэ луоз!
19. Мар возьма соосты, кинъёслэн уз поты, нимзы улон книгае пыраклы гожтэмын мед луоз шуыса?
19 Мар возьма соосты, кинъёслэн уз поты, нимзы улон книгае пыраклы гожтэмын мед луоз шуыса? Усьтӥськонын 20:15 гожтэмын: «Кин улон книгае гожтэмын ӧй вал, сое тылын ӝуась тыэ куштӥзы». Соос пыраклы быдтэмын луозы. Соин ик, лэсьтоно ваньзэ, мае быгатӥськомы, ниммы улон книгае гожтэмын мед луоз но отысь ноку ӵушемын медаз луы шуыса!
Христослэн сюрс ар ӵоже кивалтонэз дыръя агай номырин ӵошатонтэм дышетон программае пыриське (Учке 20-тӥ абзацез.)
20. Кыӵе уж нуиськоз Сюрс ар ӵоже кивалтон дыръя? (Учке вылбамысь суредэз.)
20 Сюрс ар ӵоже кивалтон туж паймымон луоз! Соку номырин ӵошатонтэм дышетон программа ортчытӥськоз. Озьы ик инмысь судьяос шонер улэмъёслэсь но, шонер улымтэослэсь но ужъёссэс сак чаклалозы (Ис. 26:9; Ап. уж. 17:31). Кызьы со дышетон ортчытӥськоз? Вуоно статья юрттоз милемлы та дышетон программаез умойгес валаны но сое эшшо но золгес дунъяны.
147-ТӤ КЫРӞАН Инмар оскытэ, ми пырак уломы шуыса
a Иоаннлэсь 5:28, 29 гожтэмын Иисуслэн улӟытон сярысь кылъёсыз. Со вераз соос сярысь, кинъёс быронтэм улонэз басьтон понна улӟытэмын луозы, но соос сярысь, кинъёс суд улэ сюрон понна улӟытэмын луозы. Ойдолэ тодомы, кызьы та кылбуръёсты ми али валаськомы.
b Та книга гожтӥське «дунне кылдэм дырысен». «Дунне» кыл возьматэ адямиосты, кудъёссэ Христослэн курбонэз сьӧлыкъёссылэсь мозмытыны быгатэ (Матф. 25:34; Усьт. 17:8). Соин ик шонер улӥсь Авель — со нырысетӥез адями, вылды, кудӥзлэн нимыз улон книгаын гожтэмын.
c Азьвыл ми малпамы, татын янгыше уськытон сярысь вераське шуыса. Зэм но, та кылбурын таӵе малпан луыны быгатэ. Но Иисус та сярысь гинэ ӧз вера, вылды. Кыллюкамъёсын гожтэмъя, та кылбурын вераськыны быгатэ кинэ ке судъян сярысь но, яке кинлэсь ке ужъёссэ чаклан сярысь.
