1 Коринфъёслы 15:8 Павел гожтӥз: «Ваньмыз бере возьматскиз мыным — пӧрмостэм, дырыз вуытэк вордӥськем нунылы». Татын Павел вера, инме ӝутскем Иисусэз адӟиз шуыса. Кызьы ми валамы Павеллэсь кылъёссэ азьвыл? Ми малпамы: со вордӥськиз, яке улӟиз, инмын улон понна, дырыз вуытэк, сыӵе улӟытон кутскемлэсь трос сю аръёслы азьлогес. Но куке та кылбурез ми мургес эскеримы, ми адӟимы, сое мукет сямен валано шуыса.

Соку мар сярысь вераз Павел, куке ассэ «дырыз вуытэк вордӥськем нуныен» нимаз?

Павел малпамтэ шорысь христиан мурт луиз, соин сэрен со вӧсь луиз. Куке нылпи дырыз вуытэк вордӥське, анай-атайлы со малпамтэ шорысь луэ. Савл (кудӥз берлогес Павел шуыса тодмо луиз) мынэ вал Дамаске, отын улӥсь христианъёсты кутон понна. Со ӧз но малпа, инмысь улӟем Иисусэз адӟоз шуыса. Со ачиз но, Дамаскысь христианъёс но ӧз ик малпалэ, Павел христиан мурт луоз шуыса. Со сяна, вераны луоз, улӟем Иисусэн пумиськон Павелэз вӧсь кариз, малы ке шуоно со огдырлы адӟемысь дугдӥз (Ап. уж. 9:1—9, 17—19).

Павел «тупасьтэм дыре» христиан мурт луиз. Грек кылэз, кудӥз берыктӥське «дырыз вуытэк вордӥськем» шуыса, озьы ик берыктыны луэ «тупасьтэм дыре вордӥськем» шуыса. Библилэн одӥг берыктэмаз та малпан тазьы гожтэмын: «Мон нуны кадь, кудӥз вордӥськиз соку, куке нокин ӧз возьма» (The Jerusalem Bible). Куке Павел улӟем Иисусэз адӟиз, Иисус инме ӝутскемын вал ини. Ӵошатоно ке христианъёсын, кудъёсыз сярысь Павел аслаз гожтэтаз вераз, куке Иисус музъем вылын улӥз, Павел сое ноку ӧз адӟы (1 Кор. 15:4—8). Нош Дамаске мыныкуз, Павел быгатӥз соин адӟиськыны, со «тупасьтэм дыр» потыны быгатэ вал ке но.

Павеллэн кылъёсыз возьматӥзы, со зӥбыт-востэм вал шуыса. Куд-ог эскерисьёслэн верамзыя, та кылъёсты вераса, Павел ассэ ултӥя кадь. Та малпан шонер ке, Павел ассэ апостол луыны ярамон шуыса ӧз лыдъя. Та адӟиське таӵе кылъёсысьтыз: «Мон уго апостолъёс пӧлысь ваньмызлэсь пичиез, апостол шуыса лыдъяны но сылӥсьтэм, малы ке шуоно Инмарлэсь Черксэ улляса ветлӥ. Нош Инмарлэн сётэм дэлетэныз-ӟечлыкеныз мон луи сыӵе, кыӵе али вань» (1 Кор. 15:9, 10).

Озьыен, 1 Коринфъёслы 15:8 Павел та сярысь вераз, дыр: Иисус солы малпамтэ шорысь возьматскиз, со «тупасьтэм дыре» христиан мурт луиз яке Иисусэз адӟыны со ярамон ӧй вал. Мар сярысь гинэ Павел медам малпа, валамон, та учыр солэн сюлмаз ик пыриз шуыса. Та учыр бере Павел юн оскиз, Иисус улӟиз шуыса. Соин ик, мукетъёсызлы Иисуслэн улӟемез сярысь веракуз, та учыр сярысь со трос пол вералляз, вылды (Ап. уж. 22:6—11; 26:13—18).