1. Кыӵе секыт уж сётэмын вал Иоаслы, Озиялы но Иосиялы?

 ПУКТЭ син азяды: тӥ Инмарлэн калыкезлэн эксэез луиды, нош тӥ воксё пичи на! Кызьы тӥ кивалтысалды? Иудеялэн куд-ог эксэйёсыз, кудъёсыз сярысь Библиын вераське, туж егит дыръязы кивалтыны кутскизы. Кылсярысь, Иоаслы 7 арес гинэ вал, Озиялы — 16, нош Иосиялы — 8. Малпаське, кыӵе секыт ужез соослы быдэстоно вал. Но вал адямиос, кудъёсыз соослы юрттӥзы шуг-секытъёс пыр потыны но Иеговалы ярамон улыны.

2. Малы умойгес тодматсконо Иоасэн, Озияен но Иосияен?

² Ми эксэйёс ӧвӧл ке но, ми тросэзлы дышетскыны быгатӥськомы Иоаслэсь, Озиялэсь но Иосиялэсь. Соос умой но, урод но ужпумъёс кутылӥзы. Та эксэйёсын умойгес тодматскыса, ми адӟомы, малы кулэ умой эшъёс бырйыны, зӥбыт-востэмесь луыны но котьку Иеговалэсь кивалтэтсэ утчаны.

3. Кызьы Иодай быдӟым священник юрттӥз Иоас эксэйлы?

³ Мар пумысен Иоаслэсь адӟем кароно. Егит дыръяз Иоас ассэ шонер возиз. Пичи дыръяз анай-атайтэк кыльыса, со Иодай быдӟым священниклэсь кылзӥськыса улӥз. Иодай та пияшез аслэсьтыз пизэ кадь будэтӥз. Со юрттӥз Иоаслы визьмо ужпум кутыны — Иеговалы ужаны-тыршыны но калыклы юрттыны солы ярамон луыны. Со сяна, Иоас Иеговалэсь храмзэ тупатъян борды басьтӥськиз (2 Пар. 24:1, 2, 4, 13, 14).

4. Кыӵе пайда ваёз Иеговалэсь кылзӥськон? (Мадёнъёс 2:1, 10—12).

⁴ Анай-атайды тӥледыз Иеговаез яратыны но солэсь кылзӥськыса  улыны дышето ке, учке со шоры дуно кузьым шоры кадь. (Лыдӟе Мадёнъёсты 2:1, 10—12.) Анай-атайёс пӧртэм амалъёсын дышетыны быгато. Тани кызьы Катялэн атаез юрттӥз солы умой ужпумъёс кутыны. Котькуд ӵукна, школае келякуз, атаез соин нуналлы кылбурез эскериз. Катя вера: «Школаын шуг-секытъёс кылдыку, мон со вераськонъёсмес тодам вайисько вал. Со юрттӥз мыным асме шонер возьыны». Анай-атайдылэн куронъёссы Библия вылэ пыкиськемын ке но, тӥляд малпанды кылдыны быгатэ, соос тӥледлы уг лэзё шуыса лэсьтыны сое, мае тӥляд лэсьтэмды потэ. Мар юрттоз тӥледлы сыӵе учыръёсын но кылзӥськыны? Настя сузэр тодаз вае, анай-атаез, дырзэс жалятэк, солы валэктӥзы шуыса, малы соос кыӵе ке куронъёс пукто. Настя вера: «Со юрттӥз мыным валаны, малы атае но анае мае ке лэсьтыны уг лэзё. Мон валай, соослэн котькуд вамышме чакламзы уг поты, соослэн монэ утемзы потэ шуыса».

5. Кызьы тӥ анай-атайдэс но Иеговаез шумпоттыны быгатӥськоды? (Мадёнъёс 22:6; 23:15, 24, 25).

⁵ Анай-атайды тӥледыз, Библия вылэ пыкиськыса, дышето. Тӥ соослэсь кылзӥськиды ке, соос шумпотозы! Нош самой валтӥсез, тӥ Инмарез шумпоттоды. Со сяна, соин кусыпъёсты эшшо но юнэсь луозы. (Лыдӟе Мадёнъёсты 22:6; 23:15, 24, 25.) Соин ик егит Иоаслэсь адӟем кароно.

6. Кинэ кылзыны кутскиз Иоас но кытчы со вуттӥз? (2 Паралипоменон 24:17, 18).

⁶ Мар пумысен Иоаслэсь адӟем кароно ӧвӧл. Иодайлэн кулэмез бере Иоас эшъяськыны кутскиз соосын, кинъёс сое уродэзлы дышетӥзы. (Лыдӟе 2 Паралипоменонэз 24:17, 18.) Со кылзӥз Иудеяысь кивалтӥсьёсты, кудъёсыз Иеговаез ӧз яратэ. Иоаслы соослэсь палэнын возиськоно вал, малы ке шуоно соос урод ужъёс лэсьтӥзы (Мад. 1:10). Но со соосты кылзӥз. Куке Иодайлэн Захария пиез Иоасэз визьманы турттӥз, Иоас сое виыны косӥз (2 Пар. 24:20, 21; Матф. 23:35). Макем кышкыт уж со лэсьтӥз! Егит дыръяз Иоас умой ужъёс лэсьтӥз, нош берло зэмос йыбырттонлэсь палэнскиз но адямиез вииз. Нош сое ассэ аслаз ляльчиосыз ик виизы (2 Пар. 24:22—25). Иоас азьланяз но Иеговаез но солэсь эшъёссэ кылзысал ке, со воксё мукет сямен улысал. Малы та тӥледыз дышетыны быгатэ?

7. Кин тӥледлы умой эш луоз? (Озьы ик учке суредэз.)

⁷ Мар кароно, Иоас сямен медам янгышалэ шуыса? Быръе сыӵе эшъёсты, кудъёсыз Иеговаез ярато но сое шумпоттыны тыршо.  Сыӵе эшъёс юрттозы тӥледлы умой ужъёс лэсьтыны. Огъёзъёсынымы гинэ эшъяськоно ӧвӧл. Эн вунэтэ: Иоас но трослы егитгес вал Иодай эшезлэсь. Эшъёсты умоесь-а, ӧвӧл-а шуыса валан понна, юалэ асьтэлэсь: «Соосын эшъяськон Иеговалы осконме юнматэ-а? Тыршо-а мынам эшъёсы Иеговалэсь кылзӥськыны но ӝуто-а соос мынэсьтым мылкыдме солэсь кылзӥськыса улыны? Кельше-а соослы Иегова сярысь но зэмлык сярысь вераськыны? Адӟиське-а, соос Инмарлэсь курон-косонъёссэ гажало шуыса? Верало-а соос мыным сое гинэ, мае мынам кылэме потэ? Яке соос дӥсьтозы мыным визь-кенеш сётыны, мон Иеговалэсь палэнскыны кутски ке?» (Мад. 27:5, 6, 17). Шонерзэ верано ке, эшъёсты Иеговаез уг ярато ке, соос тӥледлы кулэ ӧвӧл. Нош эшъёсты Иеговаез ярато ке, соослэсь эн палэнске. Соос котьку но тӥледлы юрттозы! (Мад. 13:21).

8. Тӥляд социальной сетьёсты вань ке, мар сярысь аслэсьтыд юаны кулэ?

⁸ Социальной сетьёс юртто ӵыжы-выжыосынымы но эшъёсынымы умой кусыпъёс возьыны. Тросэз социальной сетьёсты куто мукетъёссэ паймытон понна. Соос возьмато, мае соос басьтӥзы яке мар карыса уло. Тӥляд но социальной сетьёсты вань ке, юалэ асьтэлэсь: «Малы мон отчы туспуктэмъёсме яке видео поттӥсько? Потэ-а мынам эшъёсылы мае ке умойзэ возьматэме яке мынам потэ ушъяськеме? Кызьы со, мае мон учкисько социальной сетьёсысь, шӧдӥське малпанъёсы, вераськонъёсы но ужъёсы вылын? Сое учкыса, уг кутскиськы-а мон уродэз шоры умоен учкыны?» Нейтан Норр агай, кудӥз Кивалтӥсь кенешын ужаз-тыршиз, куке но вераз: «Эн тырше адямиослы ярамон луыны. Соку тӥ нокинлы ярамон уд луэ. Иеговалы ярамон луэ. Соку тӥ ярамон луоды ваньмызлы, кинъёс сое ярато».

9. Мар карыны быгатӥз Озия Иеговалэн юрттэменыз? (2 Паралипоменон 26:1—5).

⁹ Мар пумысен Озиялэсь адӟем кароно. Егит дыръяз Озия зӥбыт-востэм вал но Инмарлэсь кышкаса улӥз. Со 68 ар улӥз. Трос аръёс ӵоже Иегова сое бакель карылӥз. (Лыдӟе 2 Паралипоменонэз 26:1—5.) Озия Иудеялэсь трос тушмонъёссэ вормиз но трос лэсьтӥз, Иерусалиме тушмонъёс пырыны медаз быгатэ шуыса (2 Пар. 26:6—15). Инмарлэн юрттэменыз со трос лэсьтыны быгатӥз. Та сярысь малпаськыкуз, Озия туж шумпотэ вал, дыр (Екк. 3:12, 13).

10. Мар луиз Озияен?

¹⁰ Мар пумысен Озиялэсь адӟем кароно ӧвӧл. Озия эксэй курон-косонъёс сётъяны дышемын вал. Соин ик со малпаз, вылды, солы котьмае карыны яра шуыса. Огпол Озия ас вылаз оскиськиз. Со Иеговалэн храмаз пыриз фимиам ӵындытыны. Нош эксэйёслы сое карыны уг яра вал (2 Пар. 26:16—18). Куке Азария быдӟым священник сое дугдытыны турттӥз, Озиялэн туж вожез потӥз. Жаляса верано луэ, Озия Инмарен кусыпъёссэ тӥяз. Со понна кымесаз гижлочер потӥз (2 Пар. 26:19—21). Со азьланяз но зӥбыт-востэм луысал ке, со воксё мукет сямен улысал!

11. Мар юрттоз милемлы зӥбыт-востэмесь луыны? (Озьы ик учке суредэз.)

¹¹ Куке Озия кужмо но азинлыко луиз, со вунэтӥз, ваньзэ тае солы Иегова сётӥз шуыса. Малы та милемыз дышетэ? Милемлы тодамы вайылоно: ваньмыз умоез, мармы милям вань улонамы но ужан-тыршонамы,— со Иеговалэсь. Азинсконъёсынымы ушъяськем интые, милемлы Иеговаез данъяно (1 Кор. 4:7) b. Милемлы зӥбыт-востэм луоно но валано: ми тырбыдэстэмесь, соин ик янгышаломы.  Одӥг агай, кудӥзлы 60 ареслэсь тросгес ини, вера: «Куке мон янгышасько но адямиос монэ тупато, мон уг куатаськиськы. Соос мыным визь-кенеш сёто ке, мон сое лыдэ басьтӥсько но уже кутыны тыршисько. Та юрттэ мыным умойгес луыны». Ми Иеговалэсь кылзӥськимы ке но асьмелы укыр трос саклык ӧм висъялэ ке, ми зэмзэ ик шудоесь луомы (Мад. 22:4).

12. Кызьы егит Иосия возьматӥз, Иеговалы ужамез-тыршемез потэ шуыса? (2 Паралипоменон 34:1—3).

¹² Мар пумысен Иосиялэсь адӟем кароно. 16 арес дыръяз Иосиялэн потӥз Иеговаез умойгес тодэмез но солэсь эриксэ быдэсъямез. Но та егит эксэйлэн шуг-секытъёсыз но вал. Тросэз адямиос зэмос луисьтэм инмаръёслы йыбыртъязы. Тае быдтон понна, кышкасьтэм луоно вал. Иосия ассэ озьы ик возиз. Солы 20 арес но ӧй вал на, куке со шаерез сульдэр-идолъёслэсь сузяны кутскиз. (Лыдӟе 2 Паралипоменонэз 34:1—3.)

13. Мар тӥледыз возьма, улондэс Иеговалы сӥзиды ке?

¹³ Егит агайёсмы но сузэръёсмы, тӥ быгатӥськоды Иосиялэсь адӟем карыны но Иегова сярысь тросгес тодыны. Соку тӥляд мылкыдды луоз улондэс Инмарлы сӥзьыны. Кызьы соку улонды воштӥськоз? Лу́ка агай 14 арес дыръяз пылатӥськиз. Со таӵе ужпум кутӥз: «Та дырысен Иеговалы ужан-тыршон улонам валтӥсез луоз. Мынам котьку но сое шумпоттэме потэ» (Марк 12:30). Тӥ но таӵе ик ужпум пуктӥды ке, тӥ трос бакель каронъёс басьтоды!

14. Кызьы егит агайёсмы но сузэръёсмы Иосия эксэйлэсь адӟем каро?

¹⁴ Кыӵе шуг-секытъёсын пумиськыло егит агайёсмы но сузэръёсмы? Йо́хан агай, кудӥз 12 арес дыръяз пылатӥськиз, вера, кыӵе шуг-секытъёсын школаын пумиськылэ. Ӵош дышетскисьёсыз электронной сигаретъёсты кыско, озьы ик солы но ялан ӵекто. Мар юрттэ Йоханлы соослы сётскытэк улыны? Со тодаз возе, соосты кыскон тазалыкезлы но Иеговаен кусыпъёсызлы изъян вайыны быгатэ шуыса. Ре́йчел сузэрлэн, кудӥз 14 арес дыръяз пылатӥськиз, школаын мукет шуг-секытъёсыз вань. Со валэктэ, мар юрттэ солы соос пыр потыны: «Мае ке выльзэ тодыкум, мон валаны тыршисько, кызьы со  герӟаськемын Библиысь тодон-валанъёсын. Кылсярысь, со, мае ми эскериськомы история урокын, тодам вайытыны быгатэ Библиысь кыӵе ке учырез яке азьпалзэ ивортонэз. Нош кинэн ке вераськыку, мон ӵем дыръя малпасько, Библиысь кыӵе кылбур солы возьматыны быгатӥсько». Егит агайёсмы но сузэръёсмы, тӥляд шуг-секытъёсты Иосия эксэйлэн шуг-секытъёсызлэсь пӧртэм луыны быгато. Но тӥ, со сямен ик, быгатӥськоды визьлыкоесь но Инмарлы оскымонэсь луыны. Егит дыръяды шуг-секытъёсты пыр потэмды юрттоз тӥледлы вуонояз но соос пыр потыны.

15. Мар юрттӥз Иосиялы Иеговалы оскымон ужаны-тыршыны? (2 Паралипоменон 34:14, 18—21).

¹⁵ Иосия эксэй 26 арес дыръяз храмез тупатъяны кутскиз. Соку шедьтэмын вал «Моисейлэн киыныз сётэм Кузё-Инмарлэн законэныз книга». Куке эксэй кылӥз, мар отын гожтэмын, со соку ик сое быдэсъяны кутскиз. (Лыдӟе 2 Паралипоменонэз 34:14, 18—21.) Потэ-а тӥляд Библиез котькуд нунал лыдӟемды? Тӥ озьы лэсьтыны тыршиськоды ке ини, кельше-а тӥледлы? Люкады-а ини тӥ кылбуръёсты, кудъёсыз тӥледлы юртто? Лука агай, кудӥз сярысь вераськиз ини, Библиысь тунсыко кылбуръёсты аслыз гожтыса кельтэ. Быгатӥськоды-а тӥ озьы ик карыны? Талы луыса тӥ уд вунэтэ тӥледлы кельшись кылбуръёсты яке малпанъёсты. Библиен тодматскыса но сое яратыса, тӥляд эшшо но золгес потоз Иеговалы ужамды-тыршемды. Иосиялы сямен ик, Инмарлэн Кылыз тӥледлы но юрттоз шонер ужъёс лэсьтыны.

16. Малы Иосия бадӟым янгыш лэсьтӥз но малы со милемыз дышетэ?

¹⁶ Мар пумысен Иосиялэсь адӟем кароно ӧвӧл. Куке Иосиялы ог 39 арес вал, со лэсьтӥз янгыш, кудӥз сое кулонэ вуттӥз. Иеговалэсь кивалтэтсэ утчам интые, со ас малпамезъя лэсьтӥз (2 Пар. 35:20—25). Та милемыз тросэзлы дышетэ. Кӧня гинэ арес милемлы медам луы но кӧня гинэ ми Библиез медам дышетэ, котькуд учырын милемлы  валаны тыршоно, мар та сярысь малпа Иегова. Со понна ялан Инмарлэсь кивалтэтсэ куроно, солэсь Кылзэ эскероно но юн осконэн агайёсын но сузэръёсын кенешоно. Соку ми бадӟым янгышъёс ум лэсьтэ, дыр, но шудоесь луомы (Иак. 1:25).

17. Малы дышетскыны луэ Иудеяысь куинь эксэйёслэсь?

¹⁷ Егит дыръя трос умойзэ лэсьтыны луэ. Иоаслэн, Озиялэн но Иосиялэн учыръёссы возьмато, егитъёс визьмо ужпумъёс кутыны но ас улонэнызы Иеговаез шумпоттыны быгато шуыса. Зэм, та куинь эксэйёс куддыръя шонертэм ужпумъёс кутылӥзы, кудъёсыз урод бервылъёсы вуттылӥзы. Но ми соос сямен ӧм янгышалэ ке но умой ужъёссэс адӟем каримы ке, ми шудо уломы.

18. Библиысь кыӵе учыръёс возьмато, тӥ шудо луыны быгатӥськоды шуыса? (Озьы ик учке суредэз.)

¹⁸ Библиын гожтэмын Инмарлэн мукет егит ужась-тыршисьёсыз сярысь но, кудъёсыныз солэн матысь кусыпъёсыз вал но кудъёсыз шудо улӥзы. Соос пӧлысь одӥгез — Давид. Егит дыръяз ик со Иеговаен эшъяськиз, нош берлогес солэн оскымон эксэез луиз. Куддыръя Давид янгышаз ке но, Инмар сое аслаз ярамон адямиеныз лыдъяз (3 Экс. 3:6; 9:4, 5; 14:8). Давидлэн улонэз но ужан-тыршонэз сярысь тросгес тодыса, Иеговалы ужаны-тыршыны мылкыдды юнмалоз. Со сяна, эскерыны луэ Марклэсь яке Тимофейлэсь учыръёссэс. Тӥ адӟоды, соос егит дыръязы ик Иеговалы ужаны-тыршыны кутскизы но пумозяз солы оскымон кылизы шуыса. Соос самой умой улон сюрес бырйизы!

19. Кыӵе луоз тӥляд улонды?

¹⁹ Егит агайёс но сузэръёс, али кутэм ужпумъёсыныды герӟаськемын со, кыӵе луоз тӥляд улонды азьланяз. Ас вылады оскиськем интые, Иеговалы оскиськиды ке, со быдэс улонды ӵоже тӥледлы кивалтэт сётоз (Мад. 20:24). Тӥ зэмзэ ик шудоесь луоды. Эн вунэтэ: Иегова дунъя ваньзэ, мае тӥ со понна лэсьтӥськоды. Соин ик самой умой улон сюрес, кудзэ тӥ бырйыны быгатӥськоды,— со инмысь яратӥсь Атаймылы, Иеговалы, ужан-тыршон!