1. Кыӵе уж сётӥз Инмар апостол Пётрлы кулэмез азьынгес?

 ТРОС аръёс ӵоже Пётр Иеговалы оскымон ужаз-тыршиз. Куке Иисус тодытыса ветлӥз, Пётр соин ӵош вал. Та апостол юрттӥз ӟеч иворез кылыны еврей луисьтэм адямиослы но. Берлогес со кивалтӥсь кенешын ужаз-тыршиз. Нош Пётрлэн кулэмез азьынгес Иегова солы эшшо одӥг уж сётӥз. Асьме вакытысь 62—64-тӥ аръёсы Инмар косӥз сое кык гожтэтъёсты гожтыны, кудъёсыз берлогес Библие пыртэмын вал. Али соос нимасько Пётрлэн 1-тӥ но 2-тӥ гожтэтъёсыз шуыса. Апостол оскиз: та гожтэтъёсыз кулэмез бере но христианъёслы юрттозы Инмарлы оскымон кыльыны (2 Пётр 1:12—15).

2. Малы вераны луэ, Пётрлэн гожтэтъёсыз дырыз дыръя гожтэмын вал шуыса?

² Пётр аслэсьтыз гожтэтъёссэ гожтӥз соку, куке вын-агайёсыз но сузэр-апайёсыз «пӧртэм визь сынаськонъёсын сэрен» куректыса улӥзы (1шуркынмонысенПётр 1:6). Кенешын кылдӥзы адямиос, кудъёсыз зэмос луисьтэм дышетонъёсты но азон-калгонэз вӧлмытӥзы (2 Пётр 2:1, 2, 14). Со сяна, ӝоген рим ожгарчиос Иерусалимез но храмез куашкатыны кулэ вал. Иерусалимын улӥсь христианъёслы азьланяз но сак луоно вал (1 Пётр 4:7). Пётрлэн гожтэтъёсыз вын-агайёсызлы но сузэр-апайёсызлы юрттӥзы ваньзэ тае чиданы но вуоно шуг-секытъёслы дасяськыны b.

3. Малы кулэ эскерыны Пётрлэсь гожтэтъёссэ?

³ Пётр аслэсьтыз гожтэтъёссэ нырысетӥ даурысь христианъёслы гожтӥз ке но, Иегова соосты Библие но пыртӥз.  Озьыен, соос милемлы но пайда вайыны быгато (Рим. 15:4). Ми но улӥськомы дуннеын, кытын туж вӧлмемын азон-калгон. Соин ик Иеговалы ужаны-тыршыны туж ик капчи ӧвӧл. Со сяна, ӝоген вуоз куректон, кудӥз нырысетӥ даурын луэм куректонлэсь бадӟымгес луоз. Пётрлэн кык гожтэтъёсаз кулэ луись тодэ вайытонъёс вань. Соос милемлы юрттозы Иеговалэсь нуналзэ возьманы, адямиослэсь кышканэз вормыны но ог-огмес ӟырдыт яратыны. Со сяна, та тодэ вайытонъёс тӧроослы юрттозы кенешысь вын-агайёс но сузэр-апайёс сярысь эшшо но умойгес сюлмаськыны.

4. Мар осконмес лябӟытыны быгатэ? (2 Пётр 3:3, 4).

⁴ Ми улӥськомы адямиос пӧлын, кудъёсыз Библиысь азьпалзэ ивортонъёслы уг оско. Трос аръёс ӵоже ини ми вераськомы, та дуннелы пум вуоз шуыса. Та понна тушмонъёсмы милемыз серем каро. Куд-огъёсыз верало, со ноку уз вуы шуыса. (Лыдӟе 2 Пётрлэсь 3:3, 4.) Озьы вераны быгато соос, кинъёслы ми тодытӥськомы, ӵош ужасьёсмы яке ӵыжы-выжыосмы. Соин сэрен милям осконмы лябӟыны быгатэ. Нош Пётр валэктӥз, мар кароно, озьы медам луы шуыса.

5. Мар милемлы юрттоз чидаса возьманы дырез, куке та дуннелы пум вуоз? (2 Пётр 3:8, 9).

⁵ Куд-огъёсыз малпаны быгато: «Малы Иегова та лек дуннеез та дырозь ӧз быдтыны на?» Но Пётрлэн кылъёсыз тодамы вайыто, Инмар но адямиос дыр шоры туж пӧртэм сямен учко шуыса. (Лыдӟе 2 Пётрлэсь 3:8, 9.) Инмар понна сюрс ар одӥг нунал кадь. Иегова чида, малы ке шуоно солэн уг поты, кин ке но мед быроз шуыса. Но куке солэн нуналыз вуоз, та дуннелы пум понэмын луоз. Соин ик, дыр вань на бере, ойдолэ вань адямиослы ӟеч иворез вераны тыршомы.

6. Мар милемлы юрттоз Иеговалэсь нуналзэ тодамы возьыны? (2 Пётр 3:11, 12).

⁶ Пётр мылкыдмес ӝутэ Иеговалэсь нуналзэ тодамы возьыны. (Лыдӟе 2 Пётрлэсь 3:11, 12.) Кызьы сое карыны луэ? Со понна котькуд нунал ми быгатӥськомы малпаськыны умой улон сярысь, кудӥз милемыз выль дуннеын возьма. Пуктэ син азяды: тӥ чылкыт омырен шокаськоды, пайдаё сиён сииськоды, улӟытэм матысь адямиостэс пумитаськоды но вераськоды, кызьы быдэсмизы азьпалзэ ивортонъёс, соослы, кинъёс трос дауръёс солэсь азьло улӥзы. Таӵе малпаськон тӥледлы юрттоз чидаса возьманы но оскыны, со дыр ӝоген вуоз ини шуыса. Ми тодӥськомы ке, мар азьланяз луоз, соку милемыз уз пӧялэ соос, кинъёс уг оско, Иеговалэн нуналыз ӝоген вуоз ини шуыса (2 Пётр 3:17).

7. Кызьы ми асьмеды возьыны быгатӥськомы, адямиослэсь кышкаменымы?

⁷ Ми тодӥськомы, Иеговалэн нуналыз матын шуыса. Соин ик адямиослы ӟеч иворез вераськомы. Но куддыръя ми ум дӥсьтӥське мукетъёсыныз Библия сярысь вераськыны. Малы? Малы ке шуоно кышкаськомы солэсь, мар ми сярысь малпалозы яке мар милемын карозы. Таӵе учыре Пётр но сюриз. Иисусэз судъян уе Пётр кӧня ке пол вераз, со Иисуслэн дышетскисез ӧвӧл но сое уг тоды шуыса (Матф. 26:69—75). Но берлогес Пётр юн осконэн гожтӥз: «Соослэн кышкатонзылэсь эн курдалэ, кер но эн потэ» (1 Пётр 3:14). Пётрлэн кылъёсыз возьмато, ми адямиослэсь кышканмес вормыны быгатӥськомы шуыса.

8. Мар милемлы юрттоз адямиослэсь кышканмес вормыны? (1 Пётр 3:15).

⁸ Мар милемлы юрттоз адямиослэсь кышканмес вормыны? Пётр гожтӥз: «Христосэз  асьтэлэн сюлмады Кузё-Инмарез кадь сӥё-дано каре». (Лыдӟе 1 Петрлэсь 3:15 сноскаысь c.) Мар со понна кароно? Милемлы малпаськоно, Иисус Христос милям Эксэймы луэ но солэн бадӟым кужымез вань шуыса. Ӟеч иворез вераны луонлык кылдыку, тӥ сюлмаськиськоды ке, тодады вае асьмелэсь Эксэймес. Пуктэ син азяды, кызьы со инмысь престол вылын пуке, нош котыраз трос миллион кылчинъёс. Тодады возе, солы «инмын но, музъем вылын но... котькыӵе кужым сётэмын» но со «вань нуналъёсы, дунне бырытозь... тӥледын огазьын» шуыса (Матф. 28:18—20). Пётр милесьтым мылкыдмес ӝутэ котьку дась луыны осконмес утьыны. Потэ-а тӥляд тодытэмды школаын, ужан интыяды яке мукет интыын? Азьло ик малпаське, ку сыӵе луонлык кылдыны быгатэ но мар тӥ вералоды. Иеговалэсь кышкасьтэм сям куре но оске, со тӥледлы котькыӵе кышканъёстэс вормыны юрттоз шуыса (Ап. уж. 4:29).

9. Кыӵе учырын Пётр вын-агайёсызлы но сузэр-апайёсызлы яратонзэ ӧз возьматы? (Озьы ик учке суредэз.)

⁹ Пётр яратонзэ возьматыны котьку ик ӧз быгаты. Со Иисусэн ӵош вал, куке Иисус шуиз: «Тӥледлы выль курон-косон сётӥсько:  огдэс огды яратэ; кызьы Мон тӥледыз яратӥ, озьы ик тӥ но огдэс огды мед яратоды» (Иоанн 13:34). Но берлогес Пётр еврей луисьтэм вын-агайёсыныз но сузэр-апайёсыныз сиськемысь дугдӥз. Со кышказ, мар со сярысь малпалозы еврей луись христианъёс. Апостол Павел Пётрлэсь ассэ воземзэ чеберъяськонэн нимаз но солы визь-кенеш сётӥз (Гал. 2:11—14). Пётр солэсь кылзӥськиз. Аслаз гожтэтъёсаз со пусъе, милемлы вын-агайёсмес но сузэр-апайёсмес яратыны гинэ тырмыт ӧвӧл, яратонмес уж вылын возьматоно шуыса.

10. Мар милемлы юрттоз ог-огмес вын-агайёсты кадь яратыны? Валэктэ (1 Пётр 1:22).

¹⁰ Пётр нырысетӥ даурысь христианъёслэсь мылкыдзэс ӝутӥз ог-огзэс вын-агайёсты кадь яратыны. (Лыдӟе 1 Петрлэсь 1:22.) Ми но быгатомы ог-огмес яратыны, «зэмлыклы тэрытскыса» улӥмы ке, яке Библиысь вань дышетонъёсты улонамы пыртӥмы ке. Кылсярысь, Библиын вераське, «Инмар адямиосты вылтус шоры учкыса улӥё-вылӥё уг кары» шуыса (Ап. уж. 10:34, 35). Ми кенешысь куд-огъёссэ гинэ яратӥмы ке, соку уз луы вераны, ми Иисуслэсь «огдэс огды яратэ» курон-косонэзлэсь кылзӥськиськомы шуыса. Зэм, куд-ог агайёсын но сузэръёсын милям матысьгес кусыпъёсмы луыны быгато. Иисуслэн но вань дышетскисьёсыныз одӥг кадь матысь кусыпъёсыз ӧй вал (Иоанн 13:23; 20:2). Но Пётр тодамы вайытэ, милемлы кенешысь ваньзэс вын-агайёсты кадь яратыны тыршоно шуыса. Соку котькудӥз ассэ яратӥсь семья пӧлын кадь шӧдоз (1 Пётр 2:17).

11. Мае возьмато «чылкыт сюлэмен яратэлэ» кылъёс?

¹¹ Пётр милемыз ӧте: «Огдэс огды чылкыт сюлэмен яратэлэ». Татын та кылъёс возьмато, сюлэммес паськыт усьтоно шуыса, яратон понна соосты но, кинъёсты яратыны капчи ӧвӧл. Шуом, кин ке но милемыз вӧсь кариз. Нырысь ик милям пунэмзэ берыктэммы потоз, вылды. Но Иисус Пётрлы валаны юрттӥз, Иеговалы сыӵе ужъёс уг кельшо шуыса (Иоанн 18:10, 11). Пётр гожтӥз: «Уродлы пумит уродэн яке керетонлы пумит керетыса пунэмзэ эн берыктэ. Нош тӥ, эшшо ке, бакель каре» (1 Пётр 3:9). Озьыен, чылкыт сюлэмен яратон тӥлесьтыд мылкыддэс мед ӝутоз асьтэды лякытэн возьыны соосын но, кинъёс тӥледыз вӧсь каризы.

12. а) Мар карыны мылкыдмес ӝутыны быгатэ сюлмысь яратон? б) Мае тӥляд уже кутэмды потэ «Дорожите нашим единством» видеороликысь?

¹² Нырысетӥ гожтэтаз апостол Пётр валэктӥз: сюлмысь яратон милемлы юрттоз «трос сьӧлыкъёсты» простить карыны (1 Пётр 4:8). Оло нош, Пётр тодаз вайиз, кызьы трос аръёс солэсь азьвыл Иисус сое дышетӥз простить карыны. Соку Пётр малпа вал, вылды, вын-агаез сизьым пол простить карыны — со туж умой шуыса. Но Иисус солы шуиз: «Уг шуиськы тыныд „сизьым пол“, но сизьымдонэз сизьым пол йылэтытозь». Татысь адӟиське: лыдъяно ӧвӧл, кӧня пол тон адямиез простить карид (Матф. 18:21, 22). Тӥледлы та туж секыт потэ ке, кидэс эн лэзе! Ми ваньмы сьӧлыкоесь, соин ик простить карыны секыт луэ. Но милемлы лэсьтоно ваньзэ, мае быгатӥськомы, мукетъёссэ простить карон но соосын кусыпъёсмес тупатон понна d.

13. Малы куддыръя тӧроослы туж ик капчи ӧвӧл агайёс но сузэръёс сярысь сюлмаськыны?

¹³ Пётр ноку ӧз вунэты, кызьы Иисус улӟемез бере солы вераз: «Мынэсьтым ыжъёсме возьма» (Иоанн 21:16). Тон тӧро ке, тон  тодӥськод, та курон-косон тыныд но сётэмын шуыса. Но та ужез быдэстон понна, куддыръя тӧроослы дыр шедьтыны секыт луэ. Нырысь ик соослы тыршоно семьязылэн улон понна ваньмыз кулэез мед луоз, семьяысьтызы котькудӥз мед шӧдоз, сое ярато шуыса. Озьы ик соос тыршо, семьязылэн Иеговаен матысь кусыпъёсыз мед луоз шуыса. Со сяна, тӧроос мылысь-кыдысь тодытон уже пырисько но пумиськонъёслы но конгрессъёслы тыршыса дасясько. Куд-огъёсыз эмъюртъёсын герӟаськонъя комитетъёсын ужало-тыршо яке пуктӥськон-тупатъян интыысь ёзэтлы юрттӥсько. Зэм но, тӧроослэн туж трос ужъёссы!

14. Мар юрттоз тӧроослы Инмарлэсь уллёзэ возьманы? (1 Пётр 5:1—4).

¹⁴ Апостол Пётр тӧроосты ӧте: «Инмарлэсь уллёзэ... чаклалэ-уте». (Лыдӟе 1 Пётрлэсь 5:1—4.) Дуно тӧро, ми тодӥськомы, тон вын-агайёстэ но сузэр-апайёстэ яратӥськод но соос сярысь сюлмаськемед потэ шуыса. Но трос ужъёсыд яке жадеменыд сэрен, оло нош, куд-дыръя тон малпаськод, аслэсьтыд ужъёстэ быдэстыны уд быгатӥськы шуыса. Мар соку кароно? Вера аслад сюлмаськонъёсыд сярысь Иеговалы. Пётр гожтӥз: «Ужаськод-тыршиськод ке, ужа-тыршы сыӵе кужымен, кудзэ тыныд Инмар сётэ» (1 Пётр 4:11). Вын-агайёслэн но сузэр-апайёслэн шуг-секытъёссы выль дуннеын гинэ сэрттэмын-пертчемын луозы, вылды. Эн вунэты: «возьмасьёслэн Кузёйырзы», Иисус Христос, быгатэ соослы юрттыны озьы, кызьы тон уд быгатӥськы. Мае ке но со али лэсьтэ ини, нош мае ке вуонояз лэсьтоз на. Нош али Инмар тӧроослэсь возьма, соос вын-агайёссэс но сузэр-апайёссэс яратозы, соос сярысь сюлмаськозы но соослы адӟем карон возьматозы шуыса.

15. Кызьы одӥг тӧро вын-агайёс но сузэр-апайёс сярысь сюлмаське? (Озьы ик учке суредэз.)

¹⁵ Уи́льям агай, кудӥз кемалась ини тӧро луыса ужа-тырше, вала, макем кулэ вын-агайёс но сузэр-апайёс сярысь сюлмаськыны. Куке COVID-19 пандемия кутскиз, со но мукет тӧроос ужпум кутӥзы арняяз огпол тодытон понна группаысьтызы котькуд агаен но сузэрен герӟаськылыны. Со валэктэ, малы соос сыӵе ужпум кутӥзы: «Тросэз вын-агайёс доразы огназы улоно луизы. Нош сыӵе югдурын капчи уродэз сярысь гинэ малпаськыны». Куке вын-агайлэн яке сузэр-апайлэн шуг-секытъёсыз кылдо, Уильям  соосты сак кылзэ но валаны тырше, мар соослы кулэ но кызьы соослы юрттоно. Собере со тупась информация утча — ӵем дыръя сайтысьтымы видео. Уильям вера: «Тӧроослэн юрттэмзы али туж кулэ. Ми туж тыршиськомы адямиосты Иеговаен тодматыны. Но со дыре ик туж кулэ агайёс но сузэръёс сярысь сюлмаськыны но соослы юрттыны азьланяз но Иеговалы ужаны-тыршыны».

16. Малы милемыз дышето Пётрлэн гожтэтъёсыз?

¹⁶ Ми эскеримы Пётрлэн гожтэтъёсысьтыз куд-ог урокъёсты гинэ. Тӥ саклыктэс висъяды, дыр, солы, мае эшшо умойгес каремды потэ на. Кылсярысь, потэ-а тӥляд ӵемгес малпаськемды со сярысь, мар выль дуннеын кароды? Оло нош, тӥ асьтэлы ужпум пуктӥды тодытыны ужан интыяды, школаын яке мукет интыосын. Адӟиськоды-а тӥ, кызьы эшшо вын-агайёслы но сузэр-апайёслы яратондэс возьматыны быгатӥськоды? Тӧроос, дась-а тӥ азьланяз но мылысь-кыдысь но тыршыса Иеговалэн ыжъёсыз сярысь сюлмаськыны? Асьтэды эскерыкуды, тӥ адӟоды, вылды, тӥледлы мае ке но умоятоно шуыса. Но мылкыдды медаз куашка! Иисус Христос тӥледлы юрттоз (1 Пётр 2:3). Пётр милемыз оскытэ: «Инмар... тӥледыз юнматоз, кужмоятоз, чигиськисьтэм-куасаськисьтэм кароз» (1 Пётр 5:10).

17. Кыӵе пайда ваёз, ми ӧм ке сётске но Иеговалы лэзимы ке милемлы юрттыны?

¹⁷ Куке но Пётр шӧдӥз, Инмарлэн Пиез вӧзын луыны со ярамон адями ӧвӧл шуыса (Лука 5:8). Озьы ке но Иеговалэн но Иисуслэн юрттэмзылы луыса со кизэ ӧз лэзьы но азьланяз но Христос сьӧры оскымон мынӥз. Со понна Пётрлы дан сётэмын вал «Утисьмылэн Иисус Христослэн пумтэм вапумъёсысь Эксэйлыказ» пырыны (2 Пётр 1:11). Тӥ Пётрлэсь адӟем кариськоды ке — кидэс уд ке лэзиське но Иеговалы лэзиськоды ке тӥледлы юрттыны,— тӥ но пырак улон басьтоды. «Озьы асьтэ осконэн» улондэс утёды (1 Пётр 1:9).