1. Мар кариз Пётр, куке паймымон амалэн трос чорыг кутӥз?

 ПЁТР уйбыт чорыгаз ке но, номыр ӧз куты. Нош Иисус солы вера: «Мур азегес полыса, чорыг кутылыны калтондэс вуэ лэзе» (Лука 5:4). Пётр ӧз оскы, соос мар ке но кутозы шуыса. Озьы ке но со Иисуслэсь кылзӥськиз. Соос сокем трос чорыг кутӥзы, калтонъёссы ӟезиськылыны ик кутскизы! Куке Пётр но мукет чорыгасьёс валазы, соос азьын паймымон уж лэсьтэмын вал шуыса, соос «туж куалектӥзы». Пётр кеськиз: «Кузё-Инмаре! Пот мон дорысь, мон сьӧлыко адями уго» (Лука 5:6—9). Шӧдске, Пётр малпаз, Иисус вӧзын луыны со ярамон адями ӧвӧл шуыса.

2. Кыӵе пайда ваёз Пётрлэсь учырзэ эскерон?

² Пётр зэмзэ ик «сьӧлыко адями» вал. Кызьы адӟиське Библиысь, куддыръя верам кылъёсыз но лэсьтэм ужъёсыз понна берло со жаля вал. Кылдыло-а тӥляд но таӵе ик шӧдонъёсты? Оло нош, кема дыр ӵоже ини тӥ кыӵе ке сямдэс вормыны тыршиськоды. Соку Пётрлэсь учырзэ эскерон тӥледыз юнматыны быгатоз. Малы ми тазьы вераны быгатӥськомы? Малпаське: Иегова Пётрлэн янгышъёсыз сярысь Библие гожтытэк но кельтыны быгатысал. Но со соосты Библие пыртӥз, ми соос вылын дышетскыны мед быгатомы шуыса (2 Тим. 3:16, 17). Ми адӟомы, Пётр ми кадь ик адями вал шуыса. Солэн но милям кадь ик янгышъёсыз но кышканъёсыз вал. Ми тодӥськомы, Иегова Пётрлэсь тырбыдэс луэмзэ ӧз возьма шуыса. Иегова тае милесьтым но уг  возьма. Солэн потэ, ми кимес медам лэзе но, янгышъёсмы шоры учкытэк, солы мед ужаломы-тыршомы шуыса.

3. Малы милемлы кимес лэзёно ӧвӧл?

³ Малы милемлы кимес лэзёно ӧвӧл? Адямиос верало: «Тыршид ке, ыль пу но кенжоз». Малпаське таӵе пример вылын. Арганэн умой шудон понна, арганчилы трос дышетсконо луэ. Та дыр куспын со трос пол янгышалоз, вылды. Но со ялан дышетскиз ке, умой шудыны быгатоз. Соку но со янгышаны быгатэ. Озьы ке но арганчи уг сётскы. Со азьланяз но тырше. Ӵапак озьы ик ми но малпаськомы ке, кыӵе ке урод сяммес вормимы ини шуыса, со нош ик потыны быгатэ. Озьы ке но ми тыршиськомы пуктэм ужпуммес быдэстыны. Куддыръя ми ваньмы верам кылъёсмы но лэсьтэм ужъёсмы понна берло жаляськомы. Но ми кимес ӧм лэзе ке, Иегова юрттоз милемлы умойгес но умойгес луыны (1 Пётр 5:10). Ми быгатӥськомы адӟем карыны Пётрлэсь. Янгышъёсыз шоры учкытэк, Иисус сое валаны тыршиз. Та малпан милемлы юрттыны быгатэ Иеговалы ужаны-тыршыны.

4. Кыӵе адямиен лыдъяз ассэ Пётр но кызьы оскытӥз сое Иисус? (Лука 5:5—10).

⁴ Библиын уг вераськы, малы Пётр ассэ «сьӧлыко адямиен» лыдъяз но кыӵе сьӧлыкъёсыз сярысь со вераз. (Лыдӟе Лукалэсь 5:5—10.) Оло нош, со бадӟым янгышъёс лэсьтылӥз. Иисус адӟиз, Пётр кышка шуыса, ассэ ярантэм адямиен лыдъяменыз, вылды. Но озьы ик Иисус тодӥз, Пётр Инмарлы оскымон кыльыны быгатоз шуыса. Соин ик Иисус сое лякытэн оскытӥз: «Эн курда». Иисуслэн та кылъёсыз Пётрлэсь улонзэ воштӥзы. Берлогес со но Андрей выныз чорыган ужзэс кельтӥзы но Мессия сьӧры мынӥзы. Та понна Иегова соосты туж бакель кариз (Марк 1:16—18).

5. Кызьы бакель каремын вал Пётр, кышкамез шоры учкытэк, Иисус сьӧры мынэмез понна?

⁵ Иисус сьӧры мыныса, Пётр трос паймымон ужъёсты адӟиз. Солэн син азяз Иисус висисьёсты бурмытъяз, периосты улляз но кулэмъёсты улӟытъяз (Матф. 8:14—17; Марк 5:37, 41, 42) b. Озьы ик Пётр вал соос пӧлын, кинъёс азьын Иисус вуоно Эксэй кадь возьматскиз. Тае Пётр вань улытозяз тодаз возиз (Марк 9:1—8; 2 Пётр 1:16—18). Со Иисуслэн дышетскисез ӧй луысал ке, та паймымон ужъёсты ноку ӧй адӟысал. Пётр туж шумпотӥз, вылды, кышканъёсызлы но урод малпанъёсызлы ӧз сётскы но та бакель каронъёсты басьтӥз шуыса.

6. Капчи-а вал Пётрлы тырмымтэосызлэсь куштӥськыны? Валэктэ.

 ⁶ Пётр сомында паймымон ужъёсты адӟиз ке но, тырмымтэосыз выльысь но выльысь кыре потылӥзы. Тани куд-ог учыръёс. Куке Иисус вераз, Библиысь азьпалзэ ивортонъёсты быдэстон понна, солы курадӟоно но кулоно луоз шуыса, Пётр соглаш луымтэзэ возьматӥз (Марк 8:31—33). Пётр но мукет апостолъёс трос пол споръяськизы, кин соос пӧлын бадӟымез шуыса (Марк 9:33, 34). Куке Иисусэз тушмонъёсыз кутӥзы, Пётр мечсэ поттӥз но одӥг адямилэсь пельзэ ӵогыса куштӥз (Иоанн 18:10). Со уе ик кышкаменыз Пётр куинь пол вераз, Иисусэз уг тоды шуыса, Иисус матысь эшез вал ке но (Марк 14:66—72). Собере Пётр туж бӧрдӥз (Матф. 26:75).

7. Улӟемез бере кыӵе луонлык сётӥз Иисус Пётрлы?

⁷ Иисус аслаз апостолэзлы оскемысь ӧз дугды. Со тодӥз, Пётр сое азьло сямен ик яратэ шуыса. Тае возьматыны со солы луонлык сётӥз. Улӟемез бере Иисус Пётрен пумиськиз но солы шуиз: «Мынэсьтым ыжъёсме возьма». Пётр дась луыса та уж борды басьтӥськиз (Иоанн 21:15—17). Иерусалимын Витьтонэтӥ нуналэз пусйыку, Иисуслэн дышетскисьёсыз нырысьсэ святой духен зырӟемын вал. Пётр но соос пӧлын вал.

8. Кыӵе бадӟым янгыш лэсьтӥз Пётр Антиохияын?

⁸ Христиан мурт луэмез бере но Пётрлы урод сямъёсыныз нюръяськоно вал. Асьме вакытысь 36-тӥ арын вандӥськымтэ еврей луисьтэм Корнилий вылэ святой дух васькиз. Соку отын Пётр но вал. Та учыр умой возьматӥз, «Инмар адямиосты вылтус шоры учкыса улӥё-вылӥё уг кары» но мукет калыкъёсысь адямиос но христиан кенеше пырыны быгато шуыса (Ап. уж. 10:34, 44, 45). Талэсь азьвыл Пётр мукет калыкысь адямиосын ӧз сиськылы. Нош та учыр бере каньыл сюлмын сиськиз (Гал. 2:12). Но еврейёс пӧлысь куд-ог христианъёс малпазы, соослы мукет калыкысь адямиосын сиськыны уг яра шуыса. Куке тазьы малпаськисьёс пӧлысь куд-огъёсыз Антиохияе вуизы, Пётр еврей луисьтэм вын-агайёсызлэсь палэнскыны кутскиз. Со ассэ озьы возиз, малы ке шуоно еврей луись христианъёсты ӝоже уськытэмез уг поты вал, вылды. Куке апостол Павел адӟиз, кызьы ассэ возе Пётр, со солы ваньмыз азьын визь-кенеш сётӥз (Гал. 2:13, 14). Но, янгышамез шоры учкытэк, Пётр азьланяз но Инмарлы оскымон ужаз-тыршиз. Мар солы юрттӥз?

9. Кызьы кылъёс, кудъёсыз гожтэмын Иоаннлэсь 6:68, 69 возьмато, Пётр оскымон вал шуыса?

⁹ Пётр оскымон вал. Номыр шоры учкытэк, со Иисус сьӧры мынӥз. Солэн оскымон луэмез тужгес но умой адӟиськиз, куке мукет дышетскисьёс Иисуслэсь верамзэ ӧз валалэ. (Лыдӟе Иоаннлэсь 6:68, 69.) Иисуслэсь валэктэмзэ возьматэк, тросэз Иисус сьӧры мынэмысь дугдӥзы. Нош Пётр ӧз. Со туж умой валаз, Иисуслэн гинэ «быронтэм улонлэн кылъёсыз вань» шуыса.

10. Кытысь адӟиське, Иисус Пётрлы оске вал шуыса? (Озьы ик учке суредэз.)

¹⁰ Пётр трос янгышаз ке но, Иисус солэсь ӧз палэнскы. Учкомы, мар луиз Иисуслэн кулэмезлэсь кӧня ке часлы азьлогес. Иисус тодӥз, Пётр но мукет апостолъёс сое кельтозы шуыса. Озьы ке но Иисус Пётрлы шуиз, со оске, берлогес Пётр юнматскоз но Инмарлы оскымон ужалоз-тыршоз шуыса (Лука 22:31, 32). Иисус вала вал, «дух сэзь, нош лулмугор кужымтэм» шуыса (Марк 14:38). Соин ик, Пётр Иисуслэсь куштӥськиз ке но, Иисус дышетскисезлы оскемысь ӧз дугды. Улӟемез бере Иисус Пётрлы возьматскиз,  куке со огназ вал, вылды (Марк 16:7; Лука 24:34; 1 Кор. 15:5). Куректыса улӥсь апостолэз та туж юнматӥз, луоз.

11. Кызьы Иисус Пётрлы валаны юрттӥз, Иегова сое уз кельты шуыса?

¹¹ Иисус Пётрлы валаны юрттӥз, Иегова сое уз кельты шуыса. Улӟемез бере Иисус паймымон амалэн Пётрлы но мукет апостолъёслы трос чорыг кутыны юрттӥз (Иоанн 21:4—6). Та Пётрез оскытӥз, улон понна ваньзэ кулэзэ сётыны Иеговалы секыт ӧвӧл шуыса. Пётрлэн тодаз лыктӥзы, луоз, Иисуслэн кылъёсыз, соослы, кинъёс «нырысь ик Инмарлэсь Эксэйлыксэ» утчало, Иегова ваньзэ кулэзэ сётоз шуыса (Матф. 6:33). Соин ик Пётр аслэсьтыз улонзэ чорыган ужлы ӧз сӥзьы, нош тодытон ужлы сӥзиз. Асьме вакытысь 33-тӥ арын Витьтонэтӥ нуналэ Пётр кышкатэк речь вераз. Соку кӧня ке сюрс адямиос ӟеч иворез кылзӥзы но пылатӥськизы (Ап. уж. 2:14, 37—41). Собере Пётр юрттӥз Самарияын улӥсьёслы но еврей луисьтэм адямиослы Христослэн дышетскисьёсыз луыны (Ап. уж. 8:14—17; 10:44—48). Кызьы адӟиське, Иегова Пётр пыр трос пӧртэм адямиосты кенеше вайиз.

12. Кызьы Пётрлэн примерез юнматыны быгатэ соосты, кинъёс кыӵе ке урод сямынызы нюръясько?

¹² Иегова милемлы но юрттоз солы оскымон ужаны-тыршыны. Со секыт луэ, тужгес но кыӵе ке урод сяммы ялан потылэ ке. Милям малпанмы но кылдыны быгатэ, апостол Пётрлы сярысь, милемлы секытгес шуыса. Но Иегова милемлы юрттоз (Пс. 93:17—19). Кылсярысь, одӥг агай Иеговалэн Адӟись-Ивортӥсез луэмезлэсь азьло трос аръёс ӵоже гомосексуалист вал. Со быдэсак воштӥськиз но Библиысь куронъёсъя улыны кутскиз. Озьы ке но куддыръя урод мылпотонъёсыз нош ик потылӥзы. Мар солы юрттӥз юн луыны? Та агай вера: «Мон валай, святой духлэн юрттэмезлы луыса мон зэмлыклэн сюрестӥз мыныны быгатӥсько шуыса... ...Иегова лэзиз мыным солэн ужась-тыршисез луыны. Янгышъёсы шоры учкытэк, со мыным котьку но юрттэ».

13. Апостолъёслэсь ужъёссэс 4:13, 29, 31 лыдэ басьтыса, мар пумысен ми быгатӥськомы Пётрлэсь адӟем карыны? (Озьы ик учке суредэз.)

¹³ Кызьы ми адӟимы, адямиослэсь кышкаменыз, Пётр кӧня ке пол бадӟым янгышъёс лэсьтылӥз. Но вӧсяськыса со быгатэ вал кышкасьтэм луыны. (Лыдӟе Апостолъёслэсь ужъёссэс 4:13, 29, 31.) Ми но  быгатӥськомы кышканъёсмес вормыны. Тани мар луиз Хорст нимо егит агаен, кудӥз улӥз Германиын, отын нацистъёс кивалтыку. Кӧня ке пол школаын зӥбемзылы сётскыса, со «Хайль Гитлер!» шуыса вералляз. Соку анай-атаез сое ӧз тышкаське. Соос соин ӵош вӧсяськизы но Иеговаез куризы, пизылы кышкасьтэм луыны мед юрттоз шуыса. Анай-атаезлэн юрттэмзылы луыса но Иеговалы оскиськемезлы луыса Хорст быгатӥз Инмарлы оскымон кыльыны. Берлогес со вераз: «Иегова монэ ноку ӧз кельтылы» c.

14. Кызьы яратӥсь тӧроос юрттыны быгато соослы, кинъёс кизэс лэзьыны дась ини?

¹⁴ Иегова но Иисус милемыз ноку уз кельтэ. Иисуслэсь куштӥськемез бере Пётрлы быръёно вал: кизэ лэзёно яке азьланяз но Христос сьӧры мыноно. Иисус Иеговаез туж куриз, Пётрлэн осконэз медаз лябӟы шуыса. Иисус Пётрлы вераз, со сярысь вӧсяськиз шуыса, но оскытӥз, берлогес Пётр вын-агайёссэ юнматыны быгатоз шуыса (Лука 22:31, 32). Иисуслэсь та кылъёссэ тодаз вайылыкуз, Пётр юнматске вал, луоз. Милемлы но та выллем быръён лэсьтоно луиз ке, Иегова ми сярысь яратӥсь тӧроос пыр сюлмаськыны быгатоз. Соос милемлы юрттозы оскымонэсь кыльыны (Еф. 4:8, 11). Тани кызьы ассэ возе Пол нимо тӧро, кудӥз трос аръёс ӵоже ини Иеговалы ужа-тырше. Усем мылкыдын улӥсь вын-агайёсты но сузэр-апайёсты со куре тодазы вайыны, кызьы Иегова соосты ас дораз вайиз. Собере со соосты оскытэ, Иегова соосты яратэ но ноку уз кельты шуыса. Пол вера: «Мон адӟи, тросэз агайёс но сузэръёс, кудъёсыз кизэс лэзьыны дась вал ини, Иеговалэн юрттэменыз нош ик юнматскизы шуыса».

15. Кызьы апостол Пётрлэн но Хорст Хеншель агайлэн учыръёссы возьмато, кылъёс, кудъёсыз гожтэмын Матфейлэсь 6:33, зэм луо шуыса?

 ¹⁵ Иегова Пётрлы но мукет апостолъёслы улон понна ваньзэ кулэзэ сётӥз. Ӵапак озьы ик Инмар ми сярысь но сюлмаськоз, солы ужан-тыршон улонамы нырысетӥ интыын луиз ке (Матф. 6:33). Тодамы ваёмы Хорст агайлэсь учырзэ. Кыкетӥ дунневыл ож бере солэн пионер луэмез потӥз. Но со туж куанер улӥз но малпаз, пионер луиз ке, улон понна коньдон поттыны уз быгаты шуыса. Мар кариз Хорст? Со малпаз эскерыны, Иегова со сярысь сюлмаськоз-а, уз-а. Куке кенешазы ёросэз чаклась вуиз, со быдэс арня ӵоже ужаз-тыршиз. Арня пумын Хорст туж паймиз: ёросэз чаклась солы коньдонэн конверт сётӥз, нош кинлэсьсэ ӧз вера. Со коньдон тырмысал кӧня ке толэзь ӵоже пионер луыса ужаны-тыршыны. Та кузьым Хорст агаез оскытӥз, Иегова со сярысь сюлмаськоз шуыса. Со дырысен агаймы Эксэйлыклэсь ужзэ котьку но нырысетӥ интые пуктылӥз (Мал. 3:10).

16. Малы эскерыны кулэ Пётрлэсь улонзэ но гожтэтъёссэ?

¹⁶ Куке но Пётр Иисусэз куриз: «Кузё-Инмаре! Пот мон дорысь». Но со туж шумпотӥз, Иисус солэсь ӧз кылзӥськы шуыса! Иисус Пётрез дышетэмысь ӧз дугды. Талы луыса со оскымон апостол луиз но христианъёслы умой адӟем-карон возьматӥз. Иисуслэн Пётрез дышетэмез милемлы но пайда вайыны быгатэ. Со дышетонъёс пӧлысь куд-огъёсыз но трос мукетыз гожтэмын Пётрлэн кык гожтэтъёсаз. Нырысь ик соос гожтэмын вал нырысетӥ даурысь кенешъёслы, нош берлогес Библие пыртэмын вал. Вуоно статьяын ми эскеромы со гожтэтъёс пӧлысь куд-ог тодэ ваёнъёсты но учкомы, малы соос милемыз туннэ дышетыны быгато.