1, 2. Малы милемлы эскероно Самсонлэсь учырзэ?

 МАР сярысь тӥ малпаськоды, Самсон нимез кылыкуды? Тӥляд тодады лыктэ, вылды, Инмарлэн ужась-тыршисез, кудӥз туж кужмо вал. Со озьы ик вань. Но огпол Самсон шонертэм ужпум кутӥз, кудӥз урод бервылъёсы вуттӥз. Озьы ке но Иегова Самсонэз оскымон ужась-тыршисеныз лыдъяз. Соин ик Инмар Самсонлэсь учырзэ Библие пыртӥз, ми солэсь дышетскыны мед быгатомы шуыса.

² Самсон пыр Иегова паймымон ужъёс лэсьтылӥз, быръем израиль калыкезлы юрттон понна. Самсонлэн кулэмез бере сю аръёс ортчыса, Иегова апостол Павеллэсь мылкыдзэ ӝутӥз Самсонлэсь нимзэ пыртыны соос пӧлы, кинъёслэн юн осконзы вал (Евр. 11:32—34). Туж секыт дыръя но Самсон Иеговалы оскиськиз. Та статьяын ми эскеромы, малы дышетскеммы луэ Инмарлэн та ужась-тыршисезлэсь но кызьы солэн учырез милемыз юнматыны быгатэ.

3. Кыӵе уж сётӥз Иегова Самсонлы?

³ Самсон вордӥськиз, куке филистим калык Инмарлэсь калыксэ киултыса возиз (Суд. 13:1). Израиль калык туж курадӟиз, малы ке шуоно филистим калык туж лек вал. Иегова Самсонэз бырйиз «Израилез филистим калыклэсь мозмытыны» (Суд. 13:5). Со туж секыт уж вал! Сое  быдэстон понна, Самсонлы Иеговалы оскиськоно вал.

4. Кызьы Иегова Самсонлы юрттӥз филистим калыклэсь мозмытскыны? (Судьяос 15:14—16).

⁴ Эскеромы одӥг учырез, куке Самсон Иеговалы но солэн юрттэтэзлы оскиськиз. Одӥг пол филистим пиос, Самсонэз кутон понна, вуизы Лехи интые. Со Иудеяын вал, дыр. Иудейёс филистим калыклэсь кышкаса улӥзы. Соин ик соос малпазы Самсонэз, асьсэлэсь агай-вынзэс, тушмонъёссы кие сётыны. Соос Самсонэз кык выль гозыосын думылӥзы но филистим пиослы сётӥзы (Суд. 15:9—13). Но Самсон вылэ «Кузё-Инмарлэн Духез васькиз» но, гозыос ки вылысьтыз усьылӥзы. Собере со «ишаклэсь анлызэ шедьтӥз... сое басьтӥз но со выль лыэн сюрс... [филистим пиосты] вииз»! (Лыдӟе Судьяос книгаез 15:14—16.)

5. Кызьы Самсон возьматӥз Иеговалы оскиськемзэ?

⁵ Малы Самсон ишаклэсь анлызэ кутӥз? Со туж паймымон ожтӥрлык вал, малы ке шуоно соин нокинэ ӧд вормысалыд. Веранэз ик ӧвӧл, Самсон валаз, со Иеговалэн юрттэменыз гинэ вормоз шуыса. Инмарлэн та ужась-тыршисез кутӥз сое, мар солэн ки улаз вал. Татысь адӟиське: со быгатӥз филистим калыкез вормыны, малы ке шуоно Иеговалы оскиськиз.

6. Мар милемлы юрттоз Иеговаен сётэм ужъёсты быдэстыны?

⁶ Иеговалэн юрттэменыз ми быгатӥськомы быдэстыны ужъёсты, кудъёсыз нырысь быдэстонтэм кадь пото. Но Инмар милемлы паймымон амалэн юрттыны быгатэ. Оскиське Иеговалы! Инмар Самсонлы юрттӥз бере, со тӥледлы но юрттоз аслэсьтыз эриксэ быдэстыны (Мад. 16:3).

7. Кыӵе учыр возьматэ, Иеговалэсь кивалтэтсэ утчано шуыса?

⁷ Вын-агайёс но сузэр-апайёс, кудъёсыз Инмарлэсь юртъёссэ пуктон ужъёсы пырисько, Иеговалы оскиськемзэс возьмато. Азьвыл ми асьмеос проектировать каримы но пуктылӥмы Эксэйлык юртъёсты но  Инмарлы йыбыртъянэн герӟаськем мукет юртъёсты. Но Иеговалэн организациез будэмъя воштӥськонъёс лэсьтоно луиз. Кылкутӥсь агайёс Инмарлэсь кивалтэтсэ утчазы но выль амалъёслы дышетскизы. Кылсярысь, ми кутскимы юртъёсты басьтылыны но соосты тупатъяны. Ро́берт агай, кудӥз пӧртэм шаеръёсын трос пуктӥськон ужъёсы пыриськиз, вера: «Нырысь та амалэн соглаш кариськыны ваньмызлы капчи ӧй вал. Со туж пӧртэм вал азьвыл ужам амалмылэсь. Но вын-агайёс дась вал дышетскыны. Валамон луиз, Иегова выль амалъёсты бакель каре шуыса». Та одӥгез гинэ учыр, кызьы Иегова аслаз калыкезлы кивалтэт сётэ, аслэсьтыз эриксэ быдэстон понна. Дырын-дырын ваньмылы асьмелэсь юано: «Утчасько-а мон Иеговалэсь кивалтэтсэ но дась-а мон тупатскыны, Инмарлы самой умой амалэн ужан-тыршон понна?»

8. Мар кариз Самсон, сюзэ юзматон понна?

⁸ Тӥ лыдӟиды, луоз, Самсонлэн мукет паймымон ужъёсыз сярысь но. Кылсярысь, со номыртэк левез вормиз, нош берлогес Аскалон карын 30 филистим пиосты вииз (Суд. 14:5, 6, 19). Со тае лэсьтыны быгатӥз Иеговалэн юрттэменыз гинэ. Кытысь адӟиське, Самсон тае валаз шуыса? Огпол сюрс филистим пиосты вормемез бере солэн туж потӥз ву юэмез. Сюзэ юзматон понна, со ачиз ву ӧз утча, нош Иеговалы вӧсяськиз (Суд. 15:18).

9. Кызьы Иегова Самсонлэн вӧсяськонэзлы ответ сётӥз? (Судьяос 15:19).

⁹ Иегова Самсонлэсь куронзэ кылӥз но паймымон амалэн ву поттӥз. «Сюэз юзматозь юэм бераз.... [Самсонлы] кужым пыриз, улӟиз». (Лыдӟе Судьяос книгаез 15:19.) Аръёс ортчыса но, куке Самуил пророк Судьяос книгаез гожъяз, со ошмес вал на, дыр. Со ошмес израиль калыклы тодаз вайытӥз, луоз, Иеговалэн оскымон ужась-тыршисьёсыз секыт дыръя солы, юрттэт курыса, вазиськыны быгато шуыса.

10. Мар кароно, Иегова милемлы мед юрттоз шуыса? (Озьы ик учке суредэз.)

¹⁰ Кыӵе гинэ быгатонлыкъёсмы но ужан-тыршонын азинсконъёсмы медам луэ, милемлы но Иеговалэсь юрттэтсэ утчано. Зӥбыт-востэм луоно но валано, Иеговалы оскиськыса гинэ, ми азинлыкоесь луомы шуыса. Самсонлы выльысь кужым пыриз, куке со Инмарен сётэм вуэз юиз. Ӵапак озьы ик ми но юнматскомы соку, куке уже кутомы ваньзэ, мае Иегова сётэ (Матф. 11:28).

11. Кытысь адӟиськоз Иеговалы оскиськеммы? Вералэ пример.

¹¹ Эскеромы Россиысь Алексей агайлэсь учырзэ, кудӥз лек уйылон-уллянъёсын пумиськылэ. Мар солы юрттэ туж секыт дыръя но юн осконэн улыны? Соос кышноеныз ялан Библиез эскеро но Инмарлы йыбыртъяло. Алексей вера: «Мон азьло сямен ик тыршисько ас поннам Библиез эскерыны но сое котькуд нунал лыдӟыны. Котькуд ӵукна ми кышноеным ӵош нуналлы кылбурез эскериськомы но Иеговалы вӧсяськиськомы». Малы та милемыз дышетэ? Ас выламы оскиськем интые, Иеговалы оскиськоно. Со понна юн оскон кулэ. Кызьы сое будэтоно? Библиез эскероно, вӧсяськоно, пумиськонъёсы ветлоно но тодытоно. Нош Иегова тыршеммес бакель кароз. Инмар Самсонлы кужым сётӥз бере, со милемыз но юнматоз.

12. Кыӵе урод ужпум кутӥз Самсон но маин Далида пӧртэм вал Самсонлэн улонысьтыз мукет кышномуртъёслэсь?

¹² Самсон ми кадь ик тырбыдэстэм адями вал. Соин ик куддыръя шонертэм ужпумъёс кутылӥз. Одӥгез туж урод бервылъёсы вуттӥз. Кӧня ке аръёс ӵоже ини со судья вал. Соку Самсон «синмаськиз Сорек нёжалын улӥсь ныллы». Солэн нимыз Далида вал (Суд. 16:4). Солэсь азьвыл Самсонлэн филистим нылэз кышно басьтэмез потэ вал. Соку со Иеговалэн кивалтэтэзъя лэсьтӥз, кудӥз «филистим калыклы пунэм берыктыны амал утча» вал. Берлогес филистим калыклэн Газа караз Самсон азыса-калгыса улӥсь кышномурт доры пыриз. Со уе Инмар Самсонлы кужым сётӥз но, со кар капкаез нуиз. Таин сэрен каре тушмонъёс пырыны быгато вал (Суд. 14:1—4; 16:1—3). Но Далидаен учыр воксё мукет вал. Та кышномурт израиль калыкысь вал, вылды. Соин ик соин кузпалъяськон филистим калыкен нюръяськыны ӧй юрттысал.

13. Кыӵе урод уж лэсьтӥз Далида Самсонлы?

¹³ Филистим кузёйыръёс Далидалы трос коньдон сётӥзы. Со понна Далида соглаш кариськиз тодыны, малы Самсон сокем кужмо. Тае тодон понна, Далида сое ялан ёртыса возиз. Самсон Далидаез туж яратӥз, вылды. Соин ик со ӧз вала солэсь кескич малпанзэ но вераз, кытысь потэ солэн кужымез. Жаляса верано луэ, янгышаменыз сэрен Самсон огдырлы кужымзэ ыштӥз но со дыре Иеговалы ярамон ӧй вал ни (Суд. 16:16—20).

14. Кытчы вуттӥз Самсонлэн Далидалы оскиськемез?

¹⁴ Самсонлэн, Иеговалы интые, Далидалы оскиськемез туж урод бервылъёсы вуттӥз.  Филистим пиос сое кутӥзы но синъёссэ бышказы. Самсонэз Газаысь пытсэтэ куштӥзы. Ӵапак та карлэсь капказэ со куке но ишкалтӥз но нуиз вал. Сое ляльчи каризы но пызь изыны косӥзы. Собере филистим калык празднике люкаськиз, Дагон инмарзылы бадӟым курбон ваён понна. Соос оскизы, та инмарзы Самсонэз соос кие сётӥз шуыса. Самсонэз пытсэтысь поттӥзы, сое серекъян-мыскыллян понна (Суд. 16:21—25).

15. Кызьы Самсон возьматӥз, Иеговалы выльысь оскиське шуыса? (Судьяос 16:28—30). (Учке вылбамысь суредэз.)

¹⁵ Самсон бадӟым янгыш лэсьтӥз ке но, киоссэ ӧз лэзьы. Солэн азьло сямен ик потэ вал Инмарен сётэм ужзэ быдэстэмез. (Лыдӟе Судьяос книгаез 16:28—30.) Соин ик со Иеговаез куриз: «Филистим калыклы пунэмме берыктыны мед быгатысал». Зэмос Инмар Самсонлэн вӧсяськонэзлы ответ сётӥз но солы паймымон кужымзэ берыктӥз. Талы луыса Самсон азьло сярысь но тросгес филистим пиосты вииз.

16. Малы милемыз дышетыны быгатэ Самсонлэн янгышамез?

¹⁶ Самсонлэн янгышамез секыт бервылъёсы вуттӥз ке но, солэн азьло сямен ик Иеговалэсь эриксэ быдэсъямез потэ вал. Янгышаменымы сэрен милемыз тупатоно ке яке ми кенешын дано ужъёсмес ыштӥмы ке, Самсон сямен, милемлы но сётсконо ӧвӧл. Эн вунэтэ: Инмармы милемыз простить карыны дась (Пс. 102:8—10). Азьвыл янгышаммы шоры учкытэк, Самсонлы кадь ик, Иегова милемлы но выль ужъёс но кужым сётыны быгатэ.

17, 18. Малы Майкл агайлэн учырез милемыз юнматыны быгатэ? (Озьы ик учке суредэз.)

¹⁷ Эскеромы, мар луиз Майкл нимо егит агаен. Со кенешлы юрттӥсь но пионер луыса ужаз-тыршиз. Но одӥг янгышез сэрен кенешын дано ужъёссэ ыштӥз. Со вера: «Та дырозь мон, вань дырме но кужымме сётыса, Иеговалы ужасько-тыршисько вал. Но янгышаме бере мон малпай, табере номырлы уг яраськы ни шуыса. Мон ӧй малпа, Иегова мынэсьтым палэнскиз шуыса. Но мыным секыт вал оскыны, куке но Иеговаен матысь кусыпъёсы луозы на но мон трос ужаны-тыршыны быгато на шуыса».

 ¹⁸ Но Майкл ӧз сётскы. Со азьланьтэ: «Мон вань кужмысьтым тырши Иеговаен кусыпъёсме тупатыны. Мон ялан вань сюлмысьтым солы вӧсяськи, солэсь Кылзэ эскери но лыдӟеме вылын малпаськи». Дыр ортчыса, Майкл агайлы кенешын дано ужъёс выльысь оскизы. Али со тӧро но пионер луыса ужа-тырше. Майкл вера: «Мыным туж юрттӥзы агайёс но сузэръёс, тужгес но тӧроос. Та мыным валаны юрттӥз, Иегова монэ азьло сямен ик яратэ шуыса. Мон нош ик быгатӥсько чылкыт возьытлыкен солы ужаны-тыршыны. Та учыр монэ дышетӥз: Иегова простить каре котькинэ, кин вань сюлмысьтыз ӧпкеле». Янгышаммы шоры учкытэк, Иегова милемлы но оскыны но милемыз бакель карыны быгатэ. Но со понна милемлы тупатсконо но азьло сямен ик солы оскиськоно (Пс. 85:5; Мад. 28:13).

19. Кызьы тӥледыз юнматӥз Самсонлэн учырез?

¹⁹ Та статьяын ми эскеримы Самсонлэн улонысьтыз куд-ог учыръёсты. Со сьӧлыко адями вал. Далидалы оскиськыса, бадӟым янгыш но лэсьтӥз. Озьы ке но Самсон Иеговалы ужамысь-тыршемысь ӧз дугды. Инмар но Самсонлэсь ӧз палэнскы но солы эшшо одӥг бадӟым уж оскиз. Иегова Самсонэз юн осконэн адямиен лыдъяз. Малы ке шуоно со пыртэмын Инмарлэн оскымон ужась-тыршисьёсыз пӧлы, кудъёсыз сярысь вераське Еврейёслы гожтэтысь 11-тӥ люкетын. Ми туж шумпотӥськомы ужаны-тыршыны инмысь яратӥсь Атаймылы, кудӥз секыт дыръя дась милемыз юнматыны. Соин ик, Самсон сямен, ойдолэ ми но Иеговаез куромы: «Тодад вай вал монэ, кужым сёт вал мыным» (Суд. 16:28).