1. Мае ми тодӥськомы?

 ИЕГОВАЛЭН ужась-тыршисьёсыз луыса, ми тодӥськомы, со милемыз яратэ шуыса. Озьы ик солэн потэ, ми шумпотыса мед уломы шуыса (Рим. 8:35—39). Ми ас выламы шӧдӥмы: Библиысь возетъёс милемлы котьку но пайда ваё (Ис. 48:17, 18). Но мар кароно, ми малпамтэ шорысь шуг-секытъёсын пумиськимы ке?

2. Кыӵе шуг-секытъёсын ми пумиськыны быгатӥськомы но кыӵе юанъёсмы милям кылдыны быгато?

² Шуг-секытъёсын Иеговалэн вань ужась-тыршисьёсыз пумиськыло. Кылсярысь, милемыз семьямы пӧлысь кин ке но вӧсь кариз. Секыт висьыны кутскеменымы, ми азьвыл мында ужаны-тыршыны ум быгатӥське ни. Ми инкуазь шимучырен пумиськимы. Яке милемыз осконмы понна уйыло-улляло. Таӵе шуг-секытъёсын пумиськыса, ми малпаськомы, вылды: «Малы мон таин пумиськи? Мае мон шонертэм лэсьтӥ? Возьматэ-а та, Иегова монэ бакель уг кары шуыса?» Тодмо-а тӥледлы таӵе шӧдонъёс? Тодмо ке, мылкыдды медаз куашка. Таӵе ик шӧдонъёссы вал Иеговалэн трос оскымон ужась-тыршисьёсызлэн но (Пс. 21:2, 3; Авв. 1:2, 3).

3. Малы милемыз дышетэ Псалтирь 33:20?

³ Лыдӟе Псалтирез 33:20. Висъялэ саклыктэс та псаломысь кык кулэ луись малпанъёслы: 1) шонер улӥсьёслэн но куректон-кайгуоссы вань; 2) Иегова милемыз шуг-секытъёслэсь  мозмытэ. Кызьы Иегова сое лэсьтэ? Со юрттэ милемлы улон шоры шонер учкыны. Иегова кылзэ сётэ, солы ужан-тыршон милемлы шумпотон ваёз шуыса. Озьы ке но со уг вера, та дуннеын ми шуг-секытъёстэк уломы шуыса (Ис. 66:14). Со мылкыдмес ӝутэ вуоно улонлы саклыкмес висъяны, малы ке шуоно выль дуннеын ми пырак дауръёс ӵоже шудо луомы (2 Кор. 4:16—18). Нош али Иегова милемлы юрттэ, номыр шоры учкытэк, солы ужаны-тыршыны (Бӧрд. 3:22—24).

4. Мае ми эскеромы та статьяын?

⁴ Ойдолэ эскеромы, малы ми дышетскыны быгатӥськомы Иеговалэн оскымон ужась-тыршисьёсызлэсь, кудъёсыз вашкала дыръя улӥзы но кудъёсыз асьме нуналъёсы уло. Ми адӟомы, Инмарлэн ужась-тыршисьёсыз малпамтэ шорысь шуг-секытъёсын пумиськыны быгато шуыса. Но куке адями Иеговалы оскиське, Инмар солы одно ик юрттыны тыршоз (Пс. 54:23). Та ужась-тыршисьёслэсь улонзэс эскерыкуды, малпаське: «Мар мон карысал, та выллем учыре сюрысал ке? Кызьы та учыр Иеговалы осконме юнматэ? Малы монэ дышетэ та учыр?»

5. Кыӵе шуг-секытъёсын пумиськиз Иаков Лаван сэрен? (Учке вылбамысь суредэз.)

⁵ Вашкала дыръёсы улӥсь Иеговалэн ужась-тыршисьёсыз малпамтэ шорысь шуг-секытъёсын пумиськылӥзы. Тодамы ваёмы Иаковез. Исаак атаез куриз сое Лаванлэн нылъёсыз пӧлысь аслыз кышно шедьтыны. Лаван соослэн ӵыжы-выжызы вал, кудӥз Иеговалы йыбыртъяз (Ул.-выл. 28:1—4). Исаак аслэсьтыз пизэ оскытӥз, Иегова сое жалятэк бакель кароз шуыса. Иаков атаезлэсь кылзӥськиз. Со Ханаанысь кошкиз но Лаван доры вуиз. Лаванлэн кык нылъёсыз вал — Лия но Рахиль. Иаков яратӥз Лаванлэсь пичи нылзэ, Рахилез. Сое кышно басьтон понна, со соглаш кариськиз солэн атаез вылэ сизьым ар ужаны (Ул.-выл. 29:18). Но югдур малпамтэ шорысь воштӥськиз. Лаван пӧяськыса Иаковлы Лия нылзэ кышнолы сётӥз. Лаван Иаковлы лэзиз, арня ортчыса, Рахиль нылзэ но кышно басьтыны. Но Рахиль понна Иаковлы эшшо сизьым ар ӵоже ужано вал (Ул.-выл. 29:25—27). Со сяна, Лаван ассэ шонертэм возиз, Иаковлэсь уждунзэ трос пол вошъяса. Ваньзэ лыдъяно ке, Иаков Лаван вылэ 20 ар ӵоже секыт ужаса улӥз! (Ул-выл. 31:41, 42).

6. Кыӵе эшшо шуг-секытъёсын пумиськиз на Иаков?

⁶ Иаков мукет шуг-секытъёсын пумиськиз на. Солэн бадӟым семьяез вал. Нылпиосыз котьку но огкылысь ӧз улэ. Иосиф вынзэс соос ляльчие но вузазы. Иаковлэн кык пиосыз, Симеон но Левий, семьязылэсь ӟеч нимзэ саптазы но Иеговаез сантэмазы. Озьы ик Иаковлэн яратоно кышноез, Рахиль, кыкетӥ нылпизэ вайыкуз, кулӥз. Со сяна, секыт сютэм аръёс сэрен Иаков бадӟым арлыдын Египетэ кошконо луиз (Ул.-выл. 34:30; 35:16—19; 37:28; 45:9—11, 28).

7. Кызьы Иегова Иаковлы возьматӥз, со солы ярамон шуыса?

⁷ Ваньмыз та шоры учкытэк, Иаков Иеговалы но солэн кылсётонъёсызлы оскыса улӥз. Нош Иегова Иаковез оскытӥз, со солы ярамон шуыса. Кылсярысь, Лаван ассэ шонертэм возиз ке но, Иегова Иаковлы трос пудо но ляльчиос сётӥз. Иаков Иеговалы туж тау кариз, луоз, куке пумиськиз Иосифен, кудзэ кема дыр ӵоже кулэмын шуыса малпаз. Мар юрттӥз Иаковлы  шуг-секытъёс дыръя оскымон кыльыны? Иеговаен матысь эшъяськон (Ул.-выл. 30:43; 32:9, 10; 46:28—30). Милям но Иеговаен матысь кусыпъёсмы луизы ке, соку быгатомы малпамтэ шорысь кылдэм шуг-секытъёсмес чиданы.

8. Мар каремез туж потэ вал Давид эксэйлэн?

⁸ Давид эксэй ӧз быгаты лэсьтыны ваньзэ, мае Иегова понна лэсьтэмез потэ вал. Кылсярысь, солэн туж потэ вал Инмарезлы храм пуктэмез. Та сярысь со Нафан пророклы вераз. Нафан солы шуиз: «Тынад сюлмад мар вань, лэсьты, уго Инмар тонэныд» (1 Пар. 17:1, 2). Та кылъёс Давидлэсь мылкыдзэ ик ӝутӥзы, дыр. Со соку ик малпаны кутскиз, вылды, мар кароно, храмез пуктон понна.

9. Кызьы Давид ассэ возиз, мылкыдзэ куашкатӥсь иворез кылыса?

⁹ Ӝоген Иеговалэн пророкез берытскиз но Давидлы мылкыдзэ куашкатӥсь ивор вераз. «Со уе ик» Иегова Нафанлы шуиз, храмез Давид уз пукты, нош одӥгез пиез пуктоз шуыса (1 Пар. 17:3, 4, 11, 12). Кызьы Давид ассэ возиз, тае кылыса? Со ужпумзэ воштӥз. Табере со люказ коньдон но ваньзэ, мар кулэ луоз Соломонлы, храмез пуктон понна (1 Пар. 29:1—5).

10. Кызьы Иегова Давидэз бакель кариз?

¹⁰ Иегова Давидлы вераз, со храмез уз пукты шуыса. Но та кылъёсты верамез бере ик Иегова Давидэн тупанкыл кутӥз. Инмар Давидлы кылзэ сётӥз, солэн выжыысьтыз одӥгез пумтэм вапумъёс ӵоже кивалтоз шуыса (2 Экс. 7:16). Сюрс ар ӵоже кивалтон дыръя Давид тодоз: со улэ Иисуслэн, аслаз выжыысьтыз потэм эксэйлэн, кивалтэмез улсын. Малпалэ гинэ, макем Давид шумпотоз! Малы дышетэ милемыз та учыр? Куддыръя Иеговалы ужан-тыршонын ми ум быгатӥське лэсьтыны сомында, кӧня милям потэ. Но Инмар дасяз милемлы мукет кузьымъёс, кудъёсыз сярысь ми ӧм но малпалэ.

11. Кызьы Иегова нырысетӥ даурысь христианъёсты бакель кариз, возьмакузы Эксэйлык ӧз вуы ке но? (Апостолъёслэн ужъёссы 6:7).

¹¹ Нырысетӥ даурысь христианъёс туж возьмазы Инмарлэсь Эксэйлыксэ. Но соос ӧз тодэ, ку со кивалтыны кутскоз (Ап. уж. 1:6, 7). Мар соос каризы? Соос тодытон ужлы саклыксэс висъязы. Ӟеч ивор вӧлмемъя соос эшшо но умой адӟизы, Иегова тыршемзэс бакель каре шуыса. (Лыдӟе Апостолъёслэсь ужъёссэс 6:7.)

12. Мар каризы нырысетӥ даурысь христианъёс сютэм вакыт дыръя?

¹² Нырысетӥ даурын христианъёс мукет шуг-секытэн пумиськизы на — «быдэс дунне вылын туж секыт сютэм ар» кутскиз (Ап. уж. 11:28). Малпалэ гинэ, макем соослы секыт вал! Картъёс но атайёс туж сюлмаськизы, луоз, семьязылэн сиёнэз уз луы шуыса. Нош мар вераны луоз егит агайёс но сузэръёс сярысь, кудъёсызлэн тросгес тодытэмзы потэ вал? Соос малпазы, вылды, пуктэм ужпумзэс али быдэстыны уз быгатэ шуыса. Но секыт югдурзы шоры учкытэк, соос тодытэмысь ӧз дугдэ но Иудеяын улӥсь вын-агайёссылы но сузэр-апайёссылы шумпотыса юрттӥзы соин, маин быгатӥзы (Ап. уж. 11:29, 30).

13. Кызьы Иегова христианъёсты бакель кариз сютэм вакыт дыръя?

¹³ Кызьы Иегова «секыт сютэм ар» дыръя христианъёсты бакель кариз? Соос, кинъёслы юрттэт ыстэмын вал, ас вылазы шӧдӥзы Иеговалэсь сюлмаськемзэ (Матф. 6:31—33). Вын-агайёсын но сузэр-апайёсын, кудъёсыз соослы юрттӥзы, кусыпъёссы эшшо но юнмазы, луоз. Нош соос, кинъёс  юрттӥзы, мукетъёсызлы мае ке сётыса, шумпотон басьтӥзы (Ап. уж. 20:35). Иегова ваньзэс бакель кариз воштӥськем югдурлы тупатскемзы понна.

14. Мар луиз Варнаваен но Павелэн но кыӵе пайда со вайиз? (Апостолъёслэн ужъёссы 14:21, 22).

¹⁴ Нырысетӥ даурын христианъёсты ӵем уйылӥзы-уллязы, ӵем дыръя чик малпамтэ шорысь. Эскеромы, мар луиз Варнаваен но апостол Павелэн, куке соос Листра карын тодытӥзы. Нырысь соосты туж умой пумитазы. Но берлогес, тушмонъёссылэн узатэменызы сэрен, Павелэз изъёсын жугизы но кулыны кельтӥзы (Ап. уж. 14:19). Озьы ке но Варнава но Павел мукет интые тодытыны кошкизы. Кыӵе пайда со вайиз? «Трос муртъёс дышетскись радэ пыризы», озьы ик Варнавалэн но Павеллэн кылъёссы но ужъёссы огъя оскисьёссэс юнматӥзы. (Лыдӟе Апостолъёслэсь ужъёссэс 14:21, 22.) Варнава но Павел малпамтэ шорысь кылдэм уйылон-уллянъёслы ӧз сётске бере, со тросэзлы пайда вайиз. Ми но, номыр шоры учкытэк, Иеговалэсь ужзэ быдэсъямы ке, Иегова милемыз бакель кароз.

15. Малы дышетскыны луэ Макмиллан агайлэсь?

¹⁵ 1914-тӥ ар азьын Иеговалэн ужась-тыршисьёсыз бадӟым воштӥськонъёсты возьмазы. Тани Александр Макми́ллан агайлэн учырез. Соку, тросэз сямен, Макмиллан агай малпаз, ӝоген инме ӝутскоз шуыса. 1914-тӥ арын куарусёнэ верам речаз со шуиз: «Оло нош, та мынам берпуметӥ рече». Валамон, со озьы ӧй вал. Берлогес Макмиллан агай гожтӥз: «Ми пӧлысь куд-огъёсыз дыртӥзы малпаны, ӝоген ми инме ӝутскомы шуыса». Со ватсаз: «Ми вань сюлмысьтымы Иисус Христослы ужаны-тыршыны кулэ». Макмиллан агай верам кылъёсызъя улӥз. Со ӟырдыт мылкыдын ужаз-тыршиз. Со юнматъяз вын-агайёсты, кудъёсыз, армие мынымтэенызы сэрен, пытсэтын пукизы. Арлыдо дыръяз но та агай кенешлэн пумиськонъёсаз ветлылӥз. Кыӵе пайда вайиз Макмиллан агайлы, инме ӝутскемзэ возьмакуз, ӟырдыт мылкыдын ужамез-тыршемез? 1966-тӥ арын, кулон азязгес, со гожтӥз: «Кылем дыръёсын ӵошатыса, али мынам осконэ эшшо но юн». Та агай милемлы умой адӟем карон возьматӥз, уката но шуг-секытъёсмы малпаммылэсь кемагес кыстӥсько ке! (Евр. 13:7).

16. Кыӵе шуг-секытэн малпамтэ шорысь пумиськизы Херберт Дженнингс но солэн кышноез? (Иаков 4:14).

¹⁶ Иеговалэн тросэз ужась-тыршисьёсыз малпамтэ шорысь тазалыкен герӟаськем шуг-секытъёсын пумиськыло. Тани Хе́рберт Дже́ннингс агайлэн учырез b. Со вераз, кызьы соос кышноеныз ӵош Гана шаерын миссионеръёс луыса ужазы-тыршизы. Соос туж яратӥзы отын ужаны-тыршыны. Но кӧня ке дыр ортчыса, солэсь шедьтӥзы секыт психической висёнзэ. Дженнингс агайлэн верамезъя, самой со вакытэ соос понна «ӵуказе» нунал вуиз, кудӥз сярысь вераське Иаковлэн 4:14 (лыдӟе). Агай гожтӥз: «Ваньзэ лыдэ басьтыса, ми ужпум кутӥмы Ганаысь кошкыны, трос матысь эшъёсмес кельтыны но [эмъяськон понна] Канадае берытскыны». Иегова юрттӥз Дженнингс агайлы но солэн кышноезлы, секыт югдурзы шоры учкытэк, ужан-тыршонзэс азьланьтыны.

17. Кызьы Дженнингс агайлэн учырез мукетъёсызлы юрттӥз?

¹⁷ Дженнингс агайлэн аслаз улонэз  сярысь пыр-поч верамез мукетъёсызлы бадӟым пайда вайиз. Одӥг сузэр гожтӥз: «Херберт Дженнингс агайлэн улон сюресэз туж зол сюлмам пыриз. [...] Куке мон лыдӟи, кызьы Дженнингс агай миссионер луыса ужамысь-тыршемысь дугдӥз но эмъяськыны кутскиз, та юрттӥз мыным аслам югдуре шоры шонер учкыны». Нош одӥг агай вера: «10 ар ӵоже мон тӧро луыса ужай-тырши. Жаляса верано луэ, психической висёнэ сэрен мон ӧй быгаты ини быдэсъяны ужме, кудзэ туж дунъясько вал. Мон асме номырлы ярантэм адямиен шӧдӥ. Таин сэрен, Иеговалэн мукет ужась-тыршисьёсызлэн азинсконъёссы сярысь лыдӟыкум, мынам мылкыды ик куашка вал. Но Дженнингс агайлэн юн луэмез сярысь лыдӟыса, мынам мылкыды ӝутскиз». Агайёслэн но сузэръёслэн таӵе кылъёссы тодамы вайыто: малпамтэ шорысь шуг-секытъёсын пумиськыкумы но, ми быгатӥськомы мукетъёсты юнматыны. Соку но, куке улонмы малпаммыя уг мыны, ми быгатӥськомы мукетъёсызлы адӟем карон возьматыны, кызьы, номыр шоры учкытэк, юн осконэн улоно (1 Пётр 5:9).

18. Малы дышетскыны луэ Нигериысь палкышнолэсь? (Озьы ик учке туспуктэмъёсты.)

¹⁸ Иеговалэн трос ужась-тыршисьёсыз пӧртэм шимучыръёслэсь курадӟо. Тани кыӵе учыр луиз COVID-19 пандемия дыръя. Нигериысь одӥг палкышнолэн сиёнэз но, коньдонэз но быриз. Одӥг ӵукна нылыз солэсь юаз, мар соос сиёзы берпуметӥ кылем риссэс пӧрамзы бере. Сузэрмы нылызлы валэктӥз: соослэн сиёнзы но, коньдонзы но ӧвӧл ни ке но, соос быгато Сарептаысь палкышнолэсь адӟем карыны — кылем риссэс пӧраны но быдэсак Иеговалы оскиськыны (3 Экс. 17:8—16). Мае нуназе сиёзы шуыса малпамзылэсь азьло агайёс но сузэръёс соослы сиён-юон ыстӥзы. Та сиён-юон соослы ог кык арнялы тырмиз. Сузэрмылэн  верамезъя, со ӧз но малпа, макем сак кылзӥз Иегова нылызлы верам кылъёссэ. Татысь адӟиське: Иеговалы оскиськимы ке, малпамтэ шорысь кылдэм шуг-секытъёс Инмарен кусыпъёсмес юнматыны быгато (1 Пётр 5:6, 7).

19. Кыӵе шуг-секытэн пумиськиз Алексей Ершов?

¹⁹ Берло аръёсы трос вын-агайёсмы но сузэр-апайёсмы малпамтэ шорысь уйылон-уллянъёсын пумиськизы. Эскеромы Россиысь Алексей Ершовлэсь учырзэ. Со пылатӥськиз 1994-тӥ арын. Соку та шаерын кивалтӥсьёс Иеговалэн калыкезлы ужзэ нуыны лэзё вал. Но берлогес Россиын югдур воштӥськиз. 2020-тӥ арын Алексейлэн квартираяз обыск лэсьтэмын вал. Трос арбериоссэ конфисковать каризы. Кӧня ке толэзьёс ортчыса, агайлы пумит уголовной уж усьтӥзы. Со сяна, агаймес янгыше уськытыкузы, лыдэ басьтӥзы видеогожтэмъёсты. Соосты лэсьтӥз адями, кудӥз арлэсь но кемагес Библиез дышетэмъяськиз, нош собере агаймес кивалтӥсьёслы вузаз. Макем кырсь уж со лэсьтӥз!

20. Кызьы Алексей Ершов Иеговаен кусыпъёссэ юнматэ?

²⁰ Но Алексей Ершов уйылон-уллянъёслы ӧз сётскы. Со интые, Иеговаен кусыпъёсыз эшшо но юнгес луизы. Алексей вера: «Ми кышноеным эшшо но ӵемгес ӵош вӧсяськыны кутскимы. Мон валасько, ваньзэ чидан понна, мыным Иеговалэн юрттэтэз кулэ шуыса». Со ватса: «Мыным юрттэ ас поннам Библиез эскерон. Мон малпаськисько вашкала дыръя улэм ужась-тыршисьёс сярысь. Библиын гожтэмын трос учыръёс, кудъёсыз возьмато, макем кулэ каньыл сюлмын но Иеговалы оскиськыса улыны».

21. Малы дышетэ милемыз та статья?

²¹ Малы дышетэ милемыз та статья? Та дуннеын улон малпамтэ шорысь воштӥськыны быгатэ. Но Иегова котьку юрттэ соослы, кинъёс со вылэ оскисько. Кызьы вераське та статьялы валтӥсь кылбурын, «шонер улӥсьлэн трос куректон-кайгуэз, нош соослэсь ваньмызлэсь сое Кузё-Инмар мозмытоз» (Пс. 33:20). Ойдолэ азьланяз но, шуг-секытъёсмылы саклыкмес висъям интые, Иеговалэсь юрттэмзэ адӟыны тыршомы. Соку ми но, апостол Павел сямен, вераны быгатомы: «Мертантэм бадӟым кужым асьме бордысь уг, Инмар бордысь потэ» (2 Кор. 4:7).