1, 2. Мар кароно, выль дуннеез возьмакумы?

 КУКЕ ми лыдӟиськомы Иеговалэн кылсётонэз сярысь музъемез райлы пӧрмытыны, милям сюлэммы каньыл луэ (2 Пётр 3:13). Ми ум тодӥське, ку со луоз. Но музъем вылысь югдур возьматэ, сыӵе улон ӝоген вуоз ини шуыса (Матф. 24:32—34, 36; Ап. уж. 1:7).

² Нош со дыр вуытозь, кӧня гинэ арес милемлы медам луы, милемлы осконмес юнматоно, Иегова сётэм кылзэ быдэстоз шуыса. Малы? Малы ке шуоно юн оскон но лябӟыны быгатэ. Апостол Павел ляб осконэз нимаз «канжаськытӥсь сьӧлыкен» (Евр. 12:1). Тазьы со возьматӥз, та сьӧлтэтэ сюрыны капчи шуыса. Осконмес юнматон понна, ялан тодамы вайылоно, малы оскыны луэ, выль дунне ӝоген вуоз шуыса (Евр. 11:1).

3. Мае ми эскеромы та статьяын?

³ Та статьяын ми эскеромы куинь амалъёсты, кудъёсыз осконмес юнматозы, Иегова музъемез райлы пӧрмытоз шуыса: 1) дун тырон сярысь малпаськоно, 2) эскероно, кызьы Иегова кужымзэ возьматылӥз, но 3) лэсьтоно ужъёсты, кудъёсыз Иеговаен кусыпъёсмес юнматозы. Собере учкомы, кызьы осконмес юнмато Иеговалэн кылъёсызлы, кудъёссэ со Аввакумлы вераз. Но нырысь ойдолэ эскеромы улонысьтымы куд-ог учыръёсты, кудъёсаз юн осконо, Иегова аслэсьтыз кылсётонзэ быдэстоз шуыса.

 УЧЫРЪЁС, КУДЪЁСАЗ ЮН ОСКОН КУЛЭ

4. Кыӵе ужпумъёсты кутон понна, юн оскон кулэ?

⁴ Котькуд нунал ми кутӥськомы ужпумъёсты, кудъёсыз понна юн оскон кулэ. Кылсярысь, ми бырйиськомы, кинэн эшъяськоно, кызьы шутэтсконо, кытын дышетсконо. Озьы ик сыӵе ужпумъёс герӟаськемын кузпалъяськонэн, нылпиосын яке ужен. Умой луысал аслэсьтыд юаны: «Кутэм ужпумъёсысьтым адӟиське-а оскеме, та дунне ӝоген быроз но со интые Инмарлэн выль дуннеез ӝоген вуоз шуыса? Яке мон малпаськисько адямиос сямен, кудъёсыз уг оско, выль дунне вуоз шуыса, но та нуналэн гинэ уло?» (Матф. 6:19, 20; Лука 12:16—21). Ми визьмо ужпумъёс кутомы, юн оскимы ке, ӝоген выль дунне вуоз шуыса.

5, 6. Малы секыт дыръя юн оскон кулэ? Вералэ пример.

⁵ Шуг-секытъёсын пумиськыкумы но, юн оскон кулэ. Соос пӧлы пыртыны луэ уйылон-уллянъёсты, эмъяны луонтэм висёнъёсты яке мукет югдуръёсты, кудъёсыныз сэрен мылкыдмы куашканы быгатэ. Оло нош, нырысь ми малпаськомы, ваньзэ чидаммы луоз шуыса. Но шуг-секыт кема кыстӥське ке — нош ӵем дыръя озьы ик луэ — ваньзэ чидан понна но Иеговалы шумпотыса ужан-тыршон понна, юн оскон кулэ (1 Пётр 1:6, 7; Рим. 12:12).

⁶ Куке шуг-секытъёслэн йылзы-пумзы уг адӟиськы, секыт оскыны, Иеговалэн выль дуннеез вуоз шуыса. Но та уг возьматы, милям осконмы ляб шуыса. Эскеромы тае пример вылын. Ӟар кезьыт толалтэ малпан кылдыны быгатэ, гужем ноку уз вуы шуыса. Но ми тодӥськомы: гужем котьку но вуэ. Ӵапак озьы ик, куке мылкыдмы туж зол куашкамын, куддыръя милемлы потэ, выль дунне ноку уз вуы шуыса. Но юн осконмы вань ке, ми тодӥськомы: Инмарлэн кылсётонъёсыз быдэсмозы (Пс. 93:3, 14, 15; Евр. 6:17—19). Таӵе юн оскон милемлы юрттоз Иеговалы ужан-тыршонэз котьку но нырысетӥ интые пуктыны.

7. Кыӵе малпаськон амаллэсь палэнскыны кулэ?

⁷ Эшшо одӥгез удыс, кудаз юн оскон кулэ,— со тодытон уж. Тросэз адямиос, кудъёсызлы ми тодытӥськомы, малпало, Инмарлэн выль дуннеез сярысь ӟеч ивор — выжыкыл гинэ шуыса (Иез. 33:32; Матф. 24:14). Милям та адямиос кадь малпаськеммы уг поты. Соин ик осконмес ялан юнматыны кулэ. Ойдолэ эскеромы куинь амалъёсты, кызьы сое лэсьтыны луэ.

МАЛПАСЬКЕ ДУН ТЫРОН СЯРЫСЬ

8, 9. Кызьы дун тырон сярысь малпаськон осконмес юнматэ?

⁸ Осконмес юнматон понна одӥгез амал — дун тырон сярысь малпаськон. Дун тырон возьматэ, Инмарлэн кылсётонъёсыз одно ик быдэсмозы шуыса. Милемлы мур малпаськоно, малы Иегова дун тыриз но мар со та понна кариз. Та осконмес юнматэ, Инмар милемлы выль дуннеын пырак улон одно ик сётоз шуыса. Малы тазьы вераны луэ?

⁹ Мар кариз Иегова, дун тырон понна? Инмар яратоно Пизэ, самой матысь эшсэ, музъем вылэ ыстӥз, со адями кадь мед вордӥськоз шуыса. Музъем вылын улыкуз, Иисус пӧртэм шуг-секытъёсты чидаз. Со курадӟиз но кулӥз. Макем бадӟым дун тыриз Иегова! Инмарлэн улонмес огдырлы гинэ умойгес каремез потысал ке, со ӧз лэзьысал, Пиез сокем курадӟыса мед кулоз шуыса (Иоанн 3:16; 1 Пётр 1:18, 19). Иегова  сыӵе бадӟым дун тыриз бере, со милемлы выль дуннеын пырак улон кузьмалоз.

ЭСКЕРЕ, КЫЗЬЫ ИЕГОВА КУЖЫМЗЭ ВОЗЬМАТЫЛӤЗ

10. Мае лэсьтыны быгатэ Иегова, Ефесъёслы 3:20 лыдэ басьтоно ке?

¹⁰ Осконмес юнматон понна кыкетӥез амал — эскероно, кызьы Иегова кужымзэ возьматылӥз. Солэн кужымез вань аслэсьтыз кылсётонъёссэ быдэстыны. Ми валаськомы, выль дуннеын пырак улон тросэзлы выжыкыл кадь потэ шуыса. Но Иегова ваньзэ лэсьтыны быгатэ! Соин ик ӵем дыръя со кылзэ сётэ лэсьтыны сое, мар адямиослы быдэсмонтэм потэ (Иов 42:2; Марк 10:27). Тае тодыса, ми ум паймиське, куке Иегова мае ке паймымонзэ лэсьтыны кылзэ сётэ. (Лыдӟе Ефесъёслы 3:20.)

11. Вералэ Инмарлэн куд-ог паймымон кылсётонъёсыз сярысь. (Учке « Иеговалэн куд-ог паймымон кылсётонъёсыз, кудъёсыз быдэсмизы» рамкаез.)

¹¹ Эскеромы, мар карыны Иегова кылзэ сётылӥз аслаз ужась-тыршисьёсызлы азьвыл. Та кылсётонъёслы оскыны секыт вал. Авраамез но Сарраез Иегова оскытӥз, арлыдо дыръязы соослэн пизы вордскоз шуыса (Ул.-выл. 17:15—17). Озьы ик Иегова Авраамлы вераз, солэн выжыез Ханаан музъемез киултоз шуыса. Кема дыр ӵоже Авраамлэн выжыысьтыз потэм израиль калык Египетын ляльчи вал. Соин ик Иеговалэн кылсётонэз осконтэм потэ вал, дыр. Но со быдэсмиз. Берлогес Иегова кылзэ сётӥз, арлыдо Елисавета нылпи ваёз шуыса. Нош Мариялы, бызьымтэ кышномуртлы, Иегова вераз, со Инмар Пилэн анаез луоз шуыса. Аслаз Пиезлэн вордскемез сярысь Иегова вераз кӧня ке сюрс ар талэсь азьло, Едем садын. Иеговалэн та кылсётонэз но быдэсмиз! (Ул.-выл. 3:15).

12. Кызьы кылъёс, кудъёсыз гожтэмын Иисус Навинлэн 23:14 но Исаиялэн 55:10, 11, милемыз оскыто, Иеговалэн кылсётонъёссэ быдэстыны кужымез вань шуыса?

¹² Кыӵе пайда вае Иеговалэн кылсётонъёсыз но соосты быдэстэмез сярысь малпаськон? Милям осконмы юнма, Иеговалэн музъемез райлы пӧрмытыны кужымез вань шуыса. (Лыдӟе Иисус Навинлэсь 23:14; Исаиялэсь 55:10, 11.) Нош юн оскон милемлы юрттэ мукетъёсызлы валэктыны, выль дунне — со выжыкыл ӧвӧл шуыса. Выль ин но выль музъем пумысен ачиз Иегова милемыз оскытэ: «Та кылъёс зэмесь, шонересь» (Усьт. 21:1, 5).

ЛЭСЬТЭ УЖЪЁСТЫ, КУДЪЁСЫЗ ИЕГОВАЕН КУСЫПЪЁСТЭС ЮНМАТОЗЫ

13. Кызьы кенешлэн пумиськонъёсыз осконмес юнмато? Валэктэ.

¹³ Осконэз юнматон понна куинетӥез амал — лэсьтоно ужъёсты, кудъёсыз Иеговаен кусыпъёсмес юнматозы. Кылсярысь, эскеромы, кыӵе пайда ваё кенешлэн пумиськонъёсыз. Анна b, кудӥз, дасо аръёс ӵоже вань дырзэ сётыса, ужаз-тыршиз, вера: «Пумиськонъёс юртто мыным осконме юнматыны. Соку но, куке речь верась агай сцена вылысен кемалась уг дышеты на яке агай номыр выльзэ уг вера, мон ӵем кылӥсько малпанъёсты, кудъёсыз юртто мыным Библиысь зэмлыкез умойгес валаны но осконме юнматыны». Со сяна, огъя оскисьёсмылэн пумиськонъёсын сётэм валэктонъёссы но осконмес юнматыны юртто (Рим. 1:11, 12; 10:17).

14. Кызьы тодытон уж осконмес юнматэ?

¹⁴ Озьы ик осконмес юнматэ тодытон уж (Евр. 10:23). Ба́рбара сузэр, кудӥз 70 арлэсь тросгес ини Иеговалы ужа-тырше,  вера: «Тодытон котьку но осконме юнматылӥз. Мукетъёсызлы Иеговалэн паймымон кылсётонъёсыз сярысь вераса, мынам аслам но осконэ юнгес луэ».

15. Кызьы ас поннамы Библиез эскерон осконмес юнматэ? (Озьы ик учке суредэз.)

¹⁵ Вераськомы эшшо одӥг уж сярысь, кудӥз осконмес юнматэ,— ас поннамы Библиез эскерон сярысь. Сью́зан сузэр азьло ик малпа, мае но ку со эскероз. Со вера: «Арнянуналэ мон эскерисько вуоно арнялы „Возьмаськон башняысь“ статьяез. Вордӥськонэ но пуксёнэ мон арня куспысь пумиськонлы дасяськисько. Нош кылем нуналъёсы мон эскерисько юанъёсты, кудъёсыз мыным тужгес но тунсыко пото». Тазьы Сьюзан пичиен-пичиен аслэсьтыз осконзэ юнматэ. Айри́н сузэр, кудӥз кӧня ке дасо аръёс ӵоже ини дунневыл валтӥсь кивалтонниын ужа-тырше, аслэсьтыз осконзэ юнматэ, Библиысь азьпалзэ ивортонъёсты эскерыса. Со вера: «Куке мон адӟисько, кызьы Иеговалэн азьпалзэ ивортонъёсыз пыр-поч быдэсмо, мынам сюлэмы ик бугырске!» c

СО «ОДНО ИК БЫДЭСМОЗ»

16. Малы кылъёс, кудъёссэ Иегова Аввакумлы вераз, милемын но герӟаськемын? (Еврейёслы 10:36, 37).

¹⁶ Иеговалэн куд-ог ужась-тыршисьёсыз та дуннелэсь пумзэ туж кема возьмало ини. Адями синмын учкыса, малпан кылдыны быгатэ, Иегова кылсётонзэ быдэстыны уг дырты шуыса. Но Инмар ужась-тыршисьёсызлэсь шӧдонъёссэс вала. Та адӟиське кылъёсысь, кудъёссэ со Аввакум пророклы вераз: «Уго адӟон возьматэ вуоно, нимысьтыз пуктэм дырез, со пумыз сярысь вера, уз пӧя; со ӝегаса ке но улӥз, возьма сое, уго одно ик быдэсмоз, уз воштӥськы» (Авв. 2:3). Та кылъёсты Инмар Аввакумлы  гинэ вераз-а? Яке соос милемын но герӟаськемын? Святой духлэн валтэмез улсын апостол Павел та кылъёсты герӟаз христианъёсын, кудъёсыз выль дунеез туж возьмало. (Лыдӟе Еврейёслы 10:36, 37.) Соку но, куке милемлы потэ, выль дунне кема уг вуы шуыса, ми юн оскыны быгатӥськомы: Иеговалэн сётэм кылыз «одно ик быдэсмоз, уз воштӥськы».

17. Кызьы одӥг сузэр уже кутӥз Иеговалэсь Аввакумлы верам визь-кенешсэ?

¹⁷ Иеговалэн тросэз ужась-тыршисьёсыз кылзӥсько солэн визь-кенешезлэсь: «Возьма сое». Куд-огъёсыз трос дасо аръёс ӵоже возьмало ини. Кылсярысь, Луиза сузэр 1939-тӥ арын Иеговалы ужаны-тыршыны кутскиз. Со вера: «Соку мон малпай, Армагеддон вуытозь школаме йылпумъяны уг вуы шуыса. Но со озьы ӧз луы. Вань та аръёс ӵоже мыным юрттӥз одӥг книга. Мон сое „вуонозэ возьман книга“ шуыса нимасько. Отчы пыро Нойлэн, Авраамлэн, Иосифлэн но Инмарлэн мукет ужась-тыршисьёсызлэн учыръёссы. Соос но Иеговалэсь мед-кузьымзэ кема возьмано луизы. Мыным но, мукетъёсызлы но вуонозэ возьман юрттэ йырын возьыны, выль дунне ӝоген вуоз шуыса». Та сузэрлэн кылъёсыныз соглаш кариськозы мукет христианъёс но, кудъёсыз трос аръёс ӵоже ини Иеговалы ужало-тыршо.

18. Кызьы кылдытэмъёсты чаклан осконмес юнматэ, выль дунне вуоз шуыса?

¹⁸ Валамон, выль дунне али ӧвӧл на. Но ойдолэ малпаськомы со сярысь, мармы милям вань,— кизилиос, писпуос, пудо-животъёс яке адямиос. Соос куке но ӧй вал ке но, али котькин оске, соос вань шуыса. Соос вань, малы ке шуоно соосты Иегова кылдытӥз (Ул.-выл. 1:1, 26, 27). Ӵапак озьы ик Инмар кылзэ сётэ, музъем вылын рай луоз шуыса. Иегова сётэм кылзэ одно ик быдэстоз. Соку адямиос висьытэк пырак улозы. Ми оскыны быгатӥськомы, выль дунне Иеговаен пуктэм дыре вуоз шуыса (Ис. 65:17; Усьт. 21:3, 4).

19. Кызьы тӥ оскондэс юнматыны быгатӥськоды?

¹⁹ Нош али тырше лэсьтыны ваньзэ, мае быгатӥськоды, оскондэс юнматон понна. Дун тырон понна тау карон мылкыддэс будэтэ. Иеговалэн кужымез сярысь малпаське. Лэсьтэ ужъёсты, кудъёсыз Иеговаен кусыпъёстэс юнматозы. Соку тӥ быгатоды, «ваньзэ чидаса, Инмарлэсь сӥзиськонъёссэ басьтӥсьёс» пӧлын луыны (Евр. 6:11, 12; Рим. 5:5).