1. Вералэ, кытын Иисус нырысетӥ паймымон ужзэ лэсьтӥз.

 БЕРЫТСКОМЫ асьме вакытысь 29-тӥ аре. Сӥзьыл. Иисус ужаны-тыршыны кутске. Ӝоген Мария анайзэ, сое ассэ но куд-ог дышетскисьёссэ сюанэ ӧтё. Со ортче Кана карын, Иисуслэн вордскем карезлэсь, Назаретлэсь, уйпалан. Мария эмеспилэн но вылькенлэн семьяосынызы эшъяське но кунооссэс утялтыны юрттэ, вылды. Но сюан дыръя эмеспилэн но вылькенлэн шуг-секытсы кылдэ — соослэн виназы быре b. Таӵе учыр кылдӥз, малы ке шуоно куноос малпамзылэсь тросгес лыктӥзы, луоз. Мария соку ик пиезлы вазиське но шуэ: «Виназы ӧвӧл ни» (Иоанн 2:1—3). Мар каре Иисус? Со паймымон уж лэсьтэ: вуэз «ӟеч виналы» пӧрмытэ (Иоанн 2:9, 10).

2, 3. а) Кыӵе паймымон ужъёсты лэсьтылӥз Иисус? б) Кыӵе пайда ми басьтомы, Иисуслэсь паймымон ужъёссэ эскерыса?

² Ужакуз-тыршкуз Иисус трос мукет паймымон ужъёсты но лэсьтылӥз c. Аслаз кужыменыз со трос сюрс адямиослы юрттӥз. Кылсярысь, огпол Иисус 5 000 пиосмуртъёсты сюдӥз, нош берлогес — эшшо 4 000 пиосмуртъёсты.  Та кык учыръёсын, кышномуртъёсты но нылпиосты лыдэ басьтоно ке, Иисус 27 000 адямиосты сюдӥз, вылды (Матф. 14:15—21; 15:32—38). Кыказ ик учыръёсын Иисус трос висисьёсты бурмытӥз (Матф. 14:14; 15:30, 31). Пуктэ син азяды, макем паймизы адямиос, куке Иисус соосты сюдӥз но бурмытъяз!

³ Иисуслэн паймымон ужъёсыз милемлы бадӟым пайда ваё. Соос осконмес юнматыны быгато. Та статьяын ми эскеромы, малы дышето милемыз та паймымон ужъёс. Озьы ик ми тодомы, кызьы Иисуслэсь зӥбыт-востэм сямзэ но гажан-жалянзэ адӟем карыны быгатӥськомы.

4. Мае ми тодӥськомы Иегова сярысь, Иисуслэн паймымон ужъёсыз сярысь лыдӟыса?

⁴ Иисуслэн паймымон ужъёсыз солы аслыз но, Атаезлы но осконмес юнмато. Малы ке шуоно паймымон ужъёсты лэсьтыны Иисуслы Иегова кужым сётӥз. Апостолъёслэн ужъёсазы 10:38 гожтэмын: «Инмар Назаретысь Иисусэз Святой Духен но кужымен вӧйын зырӟыса пуктӥз... Со ӟеч ужъёс лэсьтылыса, диаволлэн киулаз сюремъёсты ваньзэс бурмытылыса ветлӥз,— малы ке шуоно Инмар Соин валче вал». Со сяна, тодады возе: Иисуслэн вань кылъёсыз но ужъёсыз, озьы ик паймымон ужъёсыз но, возьматӥзы, со Атаезлэсь быдэсак адӟем кариз шуыса (Иоанн 14:9). Эскеромы, малы милемыз дышетыны быгато Иисуслэн паймымон ужъёсыз.

5. Мар Иисуслэсь мылкыдзэ ӝутӥз паймымон ужъёс лэсьтыны? (Матфей 20:30—34).

⁵ Нырысетӥез, Иисус но солэн Атаез милемыз туж ярато. Иеговалэн кужыменыз Иисус курадӟись адямиослы юрттылӥз. Татысь адӟиськиз, Иисус адямиосты туж яратэ шуыса. Огпол кык синтэмъёс солэсь юрттэтсэ куризы. (Лыдӟе Матфейлэсь 20:30—34.) Учке: Иисус соосты жаляз но бурмытӥз. Грек глагол, кудӥз «жаляса» шуыса берыктэмын, возьматэ вань сюлмысь, туж зол гажан-жалянэз. Адямиосты туж гажаса-жаляса, Иисус яратонзэ возьматӥз. Яратон солэсь мылкыдзэ ӝутӥз сютэмъёсты сюдыны но гижлочерен висисез бурмытыны (Матф. 15:32; Марк 1:41). Ми оскыны быгатӥськомы: Иегова, туж гажась-жалясь Инмар, но солэн Пиез милемыз туж ярато но, курадӟонъёсмес адӟыса, соослы вӧсь луэ (Лука 1:78; 1 Пётр 5:7). Соос туж возьмало со дырез, куке адямиосты вань курадӟонъёслэсь мозмытыны быгатозы!

6. Кыӵе кужым Инмар Иисуслы сётӥз?

⁶ Кыкетӥез, Инмар Иисуслы кужым сётӥз адямиослэсь вань шуг-секытъёссэс сэрттыны-пертчыны. Паймымон ужъёс лэсьтыса, Иисус возьматӥз, вань шуг-секытъёсмес сэрттыны-пертчыны быгатэ шуыса, кудъёсыныз ми асьмеос номыр карыны ум быгатӥське. Кылсярысь, со быгатэ быдтыны курадӟонъёсмылэсь валтӥсь мугзэс — Адамлэсь выжем сьӧлыкез. Озьы ик Иисус быдтоз сьӧлыклэсь бервылъёссэ, висёнъёсты но, кулонэз но (Матф. 9:1—6; Рим. 5:12, 18, 19). Иисуслэн паймымон ужъёсыз возьматӥзы, со адямиосты пӧртэм висёнъёслэсь бурмытыны но кулэмъёсты улӟытыны быгатэ шуыса (Матф. 4:23; Иоанн 11:43, 44). Со сяна, со быгатэ зарезь вылысь кужмо сильтӧлъёсты дугдытыны но адямиосты лек периослэсь мозмытыны (Марк 4:37—39; Лука 8:2). Ми туж шумпотӥськомы, Иегова аслаз Пиезлы сыӵе кужым сётӥз шуыса!

7, 8. а) Кыӵе оскон сёто милемлы Иисуслэн паймымон ужъёсыз? б) Кыӵе паймымон ужез тӥ возьмаськоды выль дуннеын?

 ⁷ Куинетӥез, ми оскыны быгатӥськомы, Инмарлэн вань кылсётонъёсыз Эксэйлыкезлэн кивалтэмез улсын быдэсмозы шуыса. Иисуслэн паймымон ужъёсыз возьмато, мар со кароз быдэс дунне вылын, инмысь Эксэйлыкын Эксэй луыса кивалтыкуз. Малпаське, мар ӝоген луоз. Ми ум висе, малы ке шуоно Иисус быдтоз вань висёнъёсты, кудъёсыз туннэ адямиосты курадӟыто (Ис. 33:24; 35:5, 6; Усьт. 21:3, 4). Ми ноку сютэм ум улэ но инкуазь шимучыръёслэсь ум курадӟе (Ис. 25:6; Марк 4:41). Ми шумпотыса улӟытэм матысь адямиосмес пумиталомы (Иоанн 5:28, 29). Кыӵе паймымон ужез, кудӥз выль дуннеын лэсьтэмын луоз, тӥ тужгес но возьмаськоды?

⁸ Паймымон ужъёссэ лэсьтыкуз, Иисус туж зӥбыт-востэм но гажась-жалясь луэмзэ возьматӥз. Та сямъёсты милемлы но будэтыны кулэ. Ойдолэ эскеромы кык учыръёсты. Кутскомы Канаын ортчем сюанысен.

9. Малы Иисус Канаын ортчем сюанын паймымон уж лэсьтӥз? (Иоанн 2:6—10).

⁹ Лыдӟе Иоаннлэсь 2:6—10. Куке сюанын вина быриз, кулэ вал-а Иисус мар ке но карыны? Кулэ ӧй вал. Библиын ӧвӧл  азьпалзэ ивортонъёс, Мессия паймымон амалэн вина лэсьтоз шуыса. Но кызьы тӥ асьтэды шӧдысалды, сюанады сиён-юон бырысал ке? Иисус эмеспилэсь но вылькенлэсь шӧдонъёссэс валаз, луоз. Солэн уг поты вал, соос асьсэды умойтэм мед шӧдозы шуыса. Соин ик, кызьы вераськиз ини статьялэн кутсконаз, Иисус паймымон уж лэсьтӥз. Ог 390 литр вуэз Иисус туж ӟеч виналы пӧрмытӥз. Вина сокем трос вал, со мукет учыръёслы но тырмысал на. Сое вузаса, егит семья аслыз коньдон поттыны быгатысал. Эмеспилэн но вылькенлэн сюлэмзы ик капчи луиз, дыр!

10. Кыӵе кулэ луись малпанъёс гожтэмын Иоаннлэсь 2-тӥ люкетын? (Озьы ик учке суредэз.)

¹⁰ Висъялэ саклыктэс кулэ луись малпанъёслы, кудъёсыз гожтэмын Иоаннлэсь 2-тӥ люкетын. Тӥ адӟиды-а, излэсь лэсьтэм ву тыронъёсты Иисус ачиз ӧз тырмыты шуыса? Со медоосты куриз (6-тӥ но 7-тӥ кылбуръёс). Малы? Иисуслэн аслыз саклык висъямез уг поты вал. Вуэз виналы пӧрмытэмез бере со сое сюанлэн тӧроезлы ачиз ӧз нуы. Со нош ик медоосты куриз (8-тӥ кылбур). Син азе пуктыны ик уг луы Иисуслэсь, чашаез кутыса, куноос азьын тазьы шуэмзэ: «Веръяса утчалэ ай винаез, кудзэ мон али гинэ лэсьтӥ!»

11. Малы дышетэ милемыз паймымон уж, кудзэ Иисус Канаын лэсьтӥз?

¹¹ Малы дышетэ милемыз Иисуслэн та паймымон ужез? Зӥбыт-востэм луыны. Иисус ӧз ушъяськы, вуэз виналы пӧрмытӥз шуыса. Зэмзэ вераса, аслаз азинсконъёсыныз Иисус ноку ӧз ушъяськы. Со интые, со зӥбыт-востэм вал но котьку аслэсьтыз Атайзэ данъяз (Иоанн 5:19, 30; 8:28). Иисуслэсь зӥбыт-востэм сямзэ адӟем карыса, ми но азинсконъёсынымы ум ушъяське. Иеговалы ужан-тыршонын ми мар гинэ медам лэсьтэ, ми ушъяськомы, Инмарлы ужаны милемлы дан сётэмын шуыса (Иер. 9:23, 24). Ойдолэ котьку Иеговаез данъяломы, кудӥз данэз басьтыны ярась. Быгатысалмы-а ми мае ке лэсьтыны, Иегова милемлы ӧз юрттысал ке? (1 Кор. 1:26—31).

12. Кызьы эшшо ми Иисуслэсь зӥбыт-востэм сямзэ адӟем карыны быгатӥськомы? Вералэ пример.

¹² Кызьы эшшо ми Иисуслэсь зӥбыт-востэм сямзэ адӟем карыны быгатӥськомы? Пуктэ син азяды таӵе учырез. Тӧро трос дырзэ быдтӥз, егит агайлы, кудӥз кенешлы юрттӥсь луыса ужа-тырше, нырысетӥ речьсэ дасяны юрттон понна. Тыршемзылы луыса егит агай умой речь вераз. Быдэс кенеш шумпотэ. Пумиськон бере кин ке но тӧролы шуэ: «Та агай туж умой речь вераз, озьы-а?» Тӧро тазьы шуоз-а: «Зэм. Нош тодӥськод-а, кӧня мон солы дырме быдтӥ?» Яке со зӥбыт-востэмен вералоз: «Озьы. Мон со понна туж шумпотӥсько!»? Ми зӥбыт-востэмесь ке, соку мукетъёсызлэсь ушъямзэс ум возьмалэ. Ми шумпотомы, милесьтым ужъёсмес Иегова адӟе но дунъя шуыса (ӵошатэ Матфейлэсь 6:2—4; Евр. 13:16). Иисуслэсь зӥбыт-востэм сямзэ адӟем карыса, ми Иеговаез шумпоттомы (1 Пётр 5:6).

13. Мае адӟиз Иисус, Наин кар доры вуыкуз, но мар со лэсьтӥз? (Лука 7:11—15).

¹³ Лыдӟе Лукалэсь 7:11—15. Ойдолэ вераськомы учыр сярысь, кудӥз луиз Иисуслэн ог ар но ӝыны ужамез-тыршемез бере. Иисус мынэ Галилеяысь Сонам кар котырысь Наин каре. Татын ик ог 900 ар талэсь азьло Елисей пророк одӥг кышномуртлэсь  пизэ улӟытӥз (4 Экс. 4:32—37). Кар капка доры вуыкуз, Иисус адӟе, кулэм муртэ потто шуыса. Югдур тужгес но секыт вал, малы ке шуоно палкышнолэсь одӥг гинэ пизэ ватыны нуо вал. Соин ӵош трос калык келяськиз. Иисус соосты дугдытӥз но та кышномурт понна паймымон уж лэсьтӥз — солэсь пизэ улӟытӥз! Евангелиосын гожтэмын, кызьы Иисус куинь адямиосты улӟытӥз. Та соос пӧлысь нырысетӥез.

14. Кыӵе кулэ луись малпанъёс гожтэмын Лукалэсь 7-тӥ люкетын? (Озьы ик учке суредэз.)

¹⁴ Висъялэ саклыктэс кулэ луись малпанъёслы, кудъёсыз гожтэмын Лукалэсь 7-тӥ люкетын. Учке, куке Иисус адӟиз куректӥсь анаез, Иисуслы со туж жаль потӥз (13-тӥ кылбур). Мукет сямен вераса, куке Иисус адӟиз, кызьы та кышномурт бӧрдыса кулэм пиез вӧзын мынӥз, Иисуслы со туж жаль потӥз. Но жалянэз шӧдэм сяна, Иисус сое уж вылын возьматӥз. Иисус солы лякытэн вераз: «Эн бӧрды». Собере со пияшез улӟытӥз но «анаезлы сётӥз» (14-тӥ но 15-тӥ кылбуръёс).

15. Малы дышетэ милемыз паймымон уж, кудзэ Иисус лэсьтӥз, Наин кар доры мыныкуз?

¹⁵ Малы дышетэ милемыз Иисуслэн та паймымон ужез? Куректӥсь адямиосты гажаны-жаляны кулэ. Валамон, Иисус сямен, ми кулэмъёсты улӟытыны ум быгатӥське. Но ми быгатӥськомы солэсь адӟем карыны но гажаны-жаляны соосты, кинъёс матысь адямиоссэс ыштӥзы. Со понна сак луыны кулэ. Гажан-жалянэз шӧдэм сяна, сыӵе адямиослы юрттоно но соосты буйгатоно (Мад. 17:17; 1 Пётр 3:8; 2 Кор. 1:3, 4) d. Огшоры кылъёс но пичи ужъёс бадӟым пайда вайыны быгато.

16. Малы тӥ дышетскиськоды сузэрлэсь, кудӥзлэн нылыз кулӥз? (Озьы ик учке суредэз.)

¹⁶ Тани одӥг учыр. Кӧня ке ар талэсь азьло, пумиськонын кырӟанэз кырӟаку, одӥг сузэр адӟиз, мукетыз сузэр бӧрдэ шуыса. Кырӟанын вераськиз улӟытонлы оскон сярысь. Нош со сузэр кемалась ик ӧвӧл пичи  нылзэ ыштӥз. Тае тодыса, нырысетӥез сузэр со доры лыктӥз, сое ӟыгыртӥз но соин ӵош кырӟанэз кырӟаз. Берлогес со анай тодаз вайиз: «Мон шӧдӥ, вын-агайёсты но сузэр-апайёсты туж яратӥсько шуыса». Сузэрмы туж шумпотӥз, пумиськонэ лыктӥз шуыса. Со сяна, со вераз на: «Тани кытысь юрттэт шедьтыны луэ — татысь, Эксэйлык юртысь». Ми оскыны быгатӥськомы, куректӥсь адямиосты гажаны-жаляны тыршеммес Иегова адӟе но дунъя шуыса (Пс. 33:19).

17. Мае тӥ тодӥды та статьяысь?

¹⁷ Евангелиосын гожтэм Иисуслэн паймымон ужъёсыз сярысь тросгес тодыса, ми осконмес юнматӥськомы. Та паймымон ужъёс дышето милемыз, Иегова но Иисус милемыз туж ярато но Иисуслэн адямиослэсь вань шуг-секытъёссэс сэрттыны-пертчыны кужымез вань шуыса. Озьы ик соос оскыто милемыз: Инмарлэн кылсётонъёсыз ӝоген быдэсмозы шуыса. Иисуслэсь паймымон ужъёссэ эскерыкуды, малпаське, кызьы тӥ солэсь сямъёссэ адӟем карыны быгатӥськоды. Умой луысал, ас поннады Библиез эскерыкуды яке семьяен йыбырттондэс ортчытыкуды, та паймымон ужъёсты эскерыны. Тӥ трос духовной марӟанъёсты шедьтоды. Соос сярысь одно ик мукетъёсызлы но вералэ. Пуктэ син азяды, кызьы сыӵе вераськонъёс ог-огдэс юнматозы! (Рим. 1:11, 12).

18. Мае ми эскеромы вуоно статьяын?

¹⁸ Библиын гожтэмын куинь учыръёс, куке Иисус кулэм адямиосты улӟытъяз. Куинетӥез луиз Иисуслэн музъем вылын ужан-тыршонэзлэн пумаз. Со мукетъёсызлэсь туж пӧртэм вал. Иисус улӟытӥз матысь эшсэ, кудӥз ньыль нунал ӵоже кулэмын вал ини. Малы милемыз дышетыны быгатэ та паймымон уж? Кызьы со улӟытонлы осконмес юнматоз? Та юанлы валэктон ми вуоно статьяысь шедьтомы.