ЭСКЕРОН ПОННА СТАТЬЯ 16
«Тынад братэд улӟыса султоз»!
«Иисус... [Марфалы] шуиз: „Тынад братэд улӟыса султоз“» (ИОАНН 11:23).
151-ТӤ КЫРӞАН Со ӧтёз
ТА СТАТЬЯЫН a
1. Кызьы одӥг пияш улӟытонлы юн оскемзэ возьматӥз?
МЭТЬЮ пияшлэн туж секыт висёнэз вань. Солы трос операциос лэсьтӥзы ини. Сизьым арес дыръяз со анай-атаеныз ӵош котькуд толэзе потӥсь JW Broadcasting® программаез учкиз. Программалэн пумаз вал крезьгуро видео со сярысь, кызьы ми выль дуннеын кулэмъёсты пумиталомы b. Программа йылпумъяськем бере Мэтью анай-атаез доры лыктӥз, соосты китӥзы кутӥз но шуиз: «Мама, папа, адӟиськоды-а: мон кулӥ ке но, улӟо. Монэ возьмалэ, ваньмыз умой луоз». Малпалэ гинэ, мае шӧдӥзы солэн анаез но атаез, куке адӟизы, улӟытонлы осконэз туж юн шуыса!
2, 3. Малы малпаськоно кулэмъёсты улӟытыны Инмарлэн кылсётонэз сярысь?
2 Дырын-дырын милемлы ваньмылы малпаськоно кулэмъёсты улӟытыны Инмарлэн кылсётонэз сярысь (Иоанн 5:28, 29). Малы? Малы ке шуоно малпамтэ шорысь ми секыт висьыны яке матысь адямимес ыштыны быгатӥськомы (Екк. 9:11; Иак. 4:13, 14). Нош улӟытонлы оскон юрттоз милемлы таӵе бадӟым шуг-секытъёсты чиданы (1 Фес. 4:13). Инмарлэн Кылыз оскытэ, инмысь Атаймы милемыз умой тодэ но туж яратэ шуыса (Лука 12:7). Малпалэ гинэ: Иегова милемыз таӵе ик сямъёсынымы но таӵе ик тодэ ваёнъёсынымы улӟытоз бере, со милемыз туж умой тодэ. Озьы ик пырак улыны луонлык кузьмаса, со возьматӥз, милемыз туж яратэ шуыса! Ми кулӥмы ке но, Иегова милемыз улӟытоз.
3 Нырысь та статьяын ми эскеромы, малы улӟытонлы оскыны быгатӥськомы. Собере эскеромы Библиысь осконэз юнматӥсь учырез. Сое эскерыку, ми тодамы ваёмы статьямылы валтӥсь кылбурез: «Тынад братэд улӟыса султоз» (Иоанн 11:23). Со сяна, ми тодомы, кызьы улӟытонлы осконмес юнматыны быгатӥськомы.
МАЛЫ МИ УЛӞЫТОНЛЫ ОСКЫНЫ БЫГАТӤСЬКОМЫ
4. Кылсётонлы оскон понна, мае ми валаны кулэ кылсётонэз верась пумысен? Вералэ пример.
4 Кыӵе ке кылсётонлы оскон понна, ми валаны кулэ, кылсётонэз сётӥсьлэн сое быдэстыны мылкыдыз но, кужымез но вань шуыса. Эскеромы тае пример вылын. Шуом, инкуазь шимучыр дыръя коркадылы бадӟым изъян ваемын вал. Тӥ доры эшты лыктэ но шуэ: «Эн сюлмаськы, мон юртто тыныд коркадэ тупатыны». Солэн туж потэ тӥледлы юрттэмез. Соин ик тӥ валаськоды, солэн тӥледлы юрттыны мылкыдыз вань шуыса. Со сяна, со быгатэ пуктӥськыны, озьы ик солэн кулэ луись тӥрлыкъёсыз но вань. Соин ик тӥ валаськоды, со тӥледлы юрттыны быгатоз шуыса. Талы луыса тӥ солэн кылсётонэзлы оскиськоды. Нош мар вераны луоз кулэмъёсты улӟытыны Инмарлэн кылсётонэз сярысь? Вань-а солэн мылкыдыз но кужымез аслэсьтыз кылсётонзэ быдэстыны?
5, 6. Малы ми оскыны быгатӥськомы, Иеговалэн кулэмъёсты улӟытыны мылкыдыз вань шуыса?
5 Вань-а Иеговалэн мылкыдыз кулэмъёсты улӟытыны? Одно ик вань! Кӧня ке адямиослэсь со мылкыдзэс ӝутӥз та кылсётонэз Библие гожтыны (Ис. 26:19; Ос. 13:14; Усьт. 20:11—13). Нош Иегова кылзэ сётэ ке, со котьку но сое быдэстэ (Иис. Н. 23:14). Иеговалэн туж потэ кулэмъёсты улӟытэмез. Малы тазьы вераны луоз?
6 Тодады вае Иовлэсь кылъёссэ. Со юн оскиз, кулӥз ке но, Иегова солэсь мӧзмоз но солэн сое улӟытэмез потоз шуыса (Иов 14:14, 15). Ӵапак озьы ик Иеговалэн потэ, вань кулэм ужась-тыршисьёсыз но выльысь мед улозы, медаз висе но шудоесь муд луозы шуыса. Нош мар вераны луоз трос миллиард адямиос сярысь, кудъёсыз, Иегова сярысь зэмлыкез тодытэк, кулӥзы? Яратӥсь Инмармылэн соосты но улӟытэмез потэ (Ап. уж. 24:15). Солэн потэ соослы луонлык сётэмез асэныз эшъяськыны но музъем вылын пырак улыны (Иоанн 3:16). Валамон, Иеговалэн кулэмъёсты улӟытыны мылкыдыз вань шуыса.
7, 8. Малы ми оскыны быгатӥськомы, Иеговалэн кулэмъёсты улӟытыны кужымез вань шуыса?
7 Нош вань-а Иеговалэн кужымез кулэмъёсты улӟытыны? Одно ик вань! Со «Дунне Кутӥсь» бере, со котькинлэсь кужмо Инмар (Усьт. 1:8). Со быгатэ вормыны котькыӵе тушмонзэ, кулонэз но (1 Кор. 15:26). Та малпан милемыз юнматэ но буйгатэ. Тани Эмма Арно́льд сузэрлэн учырез. Кыкетӥ дунневыл ож дыръя со но солэн семьяез лек уйылон-уллянъёсын пумиськизы. Нацистъёслэн концлагерьёсазы соос матысь адямиоссэс ыштӥзы. Аслэсьтыз нылзэ буйгатон понна, Эмма шуиз: «Кулэм адямиос ноку ӧз улӟысалзы ке, та возьматысал, кулон Инмарлэсь кужмогес шуыса. Но со озьы ӧвӧл». Иегова котьмалэсь но котькинлэсь кужмогес! Котькинлэсь кужмо Инмар, кудӥз улонэз кылдытӥз, кулэмъёслы выльысь улон сётыны быгатэ.
8 Вань на мукетыз муг, кудӥз милемыз оскытэ, Инмарлэн кулэмъёсты улӟытэмез луэ шуыса,— со ваньзэ тодаз возьыны быгатэ. Инмар котькуд кизилиез нимызъя вера (Ис. 40:26). Со сяна, со кулэмъёсты но тодаз возе (Иов 14:13; Лука 20:37, 38). Инмар капчиен тодаз ваёз ваньзэ, мар герӟаськемын соосын, кинъёсты со улӟытоз. Кылсярысь, соослэсь вылтуссэс, сямъёссэс, быгатонлыкъёссэс но тодэ ваёнъёссэс.
9. Малы тӥ оскиськоды кулэмъёсты улӟытыны Иеговалэн кылсётонэзлы?
9 Озьыен, ми оскыны быгатӥськомы кулэмъёсты улӟытыны Иеговалэн кылсётонэзлы, малы ке шуоно сое быдэстыны солэн мылкыдыз но, кужымез но вань. Тани эшшо одӥг муг, малы та кылсётонлы оскыны луэ: Иегова адямиосты улӟытъяз ини. Вашкала дыръя со кужым сётылӥз кулэмъёсты улӟытъяны куд-ог оскымон пиосмуртъёслы, озьы ик Иисуслы но. Ойдолэ эскеромы одӥг учырез, куке Иисус адямиез улӟытӥз. Со гожтэмын Иоаннлэсь 11-тӥ люкетын.
ИИСУСЛЭН МАТЫСЬ ЭШЕЗ КУЛӤЗ
10. Мар луиз Вифанияын, куке Иисус Иордан сьӧрын тодытӥз, но мар со кариз? (Иоанн 11:1—3).
10 Лыдӟе Иоаннлэсь 11:1—3. Пуктэ син азяды, мар луиз асьме вакытысь 32-тӥ арлэн пумаз Вифания гуртын. Татын уло Иисуслэн эшъёсыз: Лазарь, озьы ик Мария но Марфа апайёсыз (Лука 10:38—42). Лазарь висьыны усе. Апайёсыз со понна сюлмасько. Та сярысь соос вераны косо Иисуслы, кудӥз кошкемын Иордан сьӧры, Вифаниялэсь ог кык нунал мынон кеме (Иоанн 10:40). Жаляса верано луэ, куке Иисуслы та сярысь верало, Лазарь кулэ ини. Иисус тодӥз ке но, эшез али гинэ кулӥз шуыса, со, кык нунал ортчыса гинэ, Вифанияе мыныны потэ. Озьыен, Вифанияе вуыкуз, Лазарь ньыль нунал кулэмын вал ини. Со, мае Иисус карыны малпа, солэсь эшъёссэ юнматоз но Инмарез данъялоз (Иоанн 11:4, 6, 11, 17).
11. Малы дышетэ милемыз Вифанияын луэм учыр эшъяськон пумысен?
11 Та учыр милемыз дышетэ зэмос эшъёс луыны. Малпаське: Мария но Марфа Иисусэз Вифанияе лыктыны ӧз куре. Соос солы веразы гинэ, матысь эшез висьыны усиз шуыса (Иоанн 11:3). Нош куке Лазарь кулӥз, Иисус быгатэ вал сое кыдёкысен улӟытыны. Но со малпаз Вифанияе лыктыны, Мария но Марфа эшъёсыныз ӵош луон понна. Вань-а тӥляд сыӵе эшты, кудӥз курытэк но тӥледлы юрттыны дась? Сыӵе эш «шуге-леке сюрыку, агай-вын кадь... юрттыны лыктэ» (Мад. 17:17). Ойдолэ ми но, Иисус кадь, мукетъёсызлы умой эшъёс луомы! Мар луиз Вифанияын собере? Ойдолэ учкомы.
12. Мар карыны кылзэ сётӥз Иисус Марфалы но малы солэн кылъёсызлы оскыны луэ вал? (Иоанн 11:23—26).
12 Лыдӟе Иоаннлэсь 11:23—26. Марфа тодэ, Иисус Вифания котырын ини шуыса. Со соку ик пумитаз потэ но шуэ: «Кузё-Инмаре! Тон татын луысалыд ке, мынам братэ ӧй кулысал» (Иоанн 11:21). Зэм, Иисус Лазарез бурмытыны быгатэ вал. Но со эшшо но паймымонзэ лэсьтыны малпа. Иисус кылзэ сётэ: «Тынад братэд улӟыса султоз». Марфалэн вань на эшшо одӥг мугез Иисуслэн кылъёсызлы оскыны. Иисус солы шуэ: «Мон — улӟыса султон но улон». Татысь адӟиське, Инмар Иисуслы улонэн но кулонэн кузёяськыны кужым сётӥз шуыса. Талэсь азьвыл Иисус улӟытӥз вал ини али гинэ кулэм нылашез, озьы ик пияшез, кудзэ со кулон нуналаз ик улӟытӥз, вылды (Лука 7:11—15; 8:49—55). Нош быгатоз-а Иисус улӟытыны адямиез, кудӥз ньыль нунал кулэмын ини но кудӥзлэн мугорыз сӧриськыны кутскиз ини?
«ЛАЗАРЬ! ПОТ ОТЫСЬ»
Иисус туж гажаз-жаляз куректӥсь эшъёссэ (Учке 13-тӥ но 14-тӥ абзацъёсты.)
13. Мае шӧдэ Иисус, куке Мариялэсь но мукет адямиослэсь бӧрдэмзэс адӟе? (Иоанн 11:32—35). (Озьы ик учке суредэз.)
13 Лыдӟе Иоаннлэсь 11:32—35. Мар луэ собере? Лазарьлэн Мария апаез но Иисус доры мынэ. Марфа сямен, со шуэ: «Кузё-Инмаре! Тон татын луысалыд ке, мынам братэ ӧй кулысал». Со но соин ӵош лыктэм адямиос туж куректо. Соослэсь бӧрдэмзэс адӟыса, Иисуслэн пушкыз тыре. Эшъёссэ туж гажаменыз-жаляменыз, со но бӧрдыны кутске. Иисус вала, макем вӧсь матысь адямиез ыштыны. Солэн туж потэ, та адямиос куректыса медаз бӧрдэ ини шуыса!
14. Мае верало Иегова сярысь Иисуслэн шӧдонъёсыз?
14 Та учырын Иисуслэн пушкыз тыремез но бӧрдэмез возьмато, Иегова — туж гажась-жалясь Инмар шуыса. Малы тазьы вераны луоз? Кызьы ми тодӥмы кылем статьяысь, Иисус Атаезлэсь быдэсак адӟем каре (Иоанн 12:45). Эшъёссэ туж гажаменыз-жаляменыз, Иисус бӧрдыны но кутскиз. Озьыен, Иеговалы но, синкылиосмес адӟыса, туж вӧсь луэ (Пс. 55:9). Тае тодыса, уг поты-а тӥляд гажась-жалясь Инмармылы эшшо но матэгес кариськемды?
Иисус возьматӥз, кулонэн кузёяськыны кужымез вань шуыса (Учке 15-тӥ но 16-тӥ абзацъёсты.)
15. Вералэ, мар луиз Лазарьлэн шайгуэз дорын (Иоанн 11:41—44). (Озьы ик учке суредэз.)
15 Лыдӟе Иоаннлэсь 11:41—44. Иисус шайгу доры лыктэ но пыронзэ ворсась изэз басьтыны косэ. Марфа пумитаз вера: «Кузё-Инмаре! Зыныз потэ ини». Иисус солы шуэ: «Ӧй вера-а Мон тыныд, оскид ке, Инмарлэсь пиштӥсь данлыксэ адӟод шуыса?» (Иоанн 11:39, 40). Собере Иисус синъёссэ инме ӝутэ но шара вӧсяське. Солэн потэ, ваньмыз понна Иегова данъямын мед луоз шуыса. Собере Иисус ӧте: «Лазарь! Пот отысь». Лазарь шайгуысь потэ. Али гинэ Иисус лэсьтӥз сое, мар куд-огъёсызлы быдэстонтэм кадь потыны быгатэ вал c.
16. Кызьы Иоаннлэсь 11-тӥ люкетысь учыр улӟытонлы осконмес юнматэ?
16 Иоаннлэсь 11-тӥ люкетысь учыр улӟытонлы осконмес юнматэ. Кызьы? Тодамы ваёмы, мар карыны кылзэ сётӥз Иисус Марфалы: «Тынад братэд улӟыса султоз» (Иоанн 11:23). Иеговалэн сямен ик, Иисуслэн аслэсьтыз кылсётонзэ быдэстыны мылкыдыз но, кужымез но вань. Иисуслэн бӧрдэмез возьматӥз, солэн туж потэ шуыса быдтэмез кулонэз но соин герӟаськем курадӟонъёсты. Нош куке Лазарь шайгуысь потӥз, Иисус эшшо огпол возьматӥз, солэн кулэмъёсты улӟытыны кужымез вань шуыса. Со сяна, малпаське, мар сярысь тодаз вайытӥз Иисус Марфалы: «Ӧй вера-а Мон тыныд, оскид ке, Инмарлэсь пиштӥсь данлыксэ адӟод шуыса?» (Иоанн 11:40). Ми юн оскыны быгатӥськомы, кулэмъёсты улӟытыны Инмарлэн кылсётонэз одно ик быдэсмоз шуыса. Нош мар милям кареммы луэ, улӟытонлы эшшо но юнгес оскон понна?
КЫЗЬЫ ЮНМАТЫНЫ ЛУЭ УЛӞЫТОНЛЫ ОСКОНМЕС
17. Мар сярысь малпаськыны кулэ, Библиысь улӟытэм адямиос сярысь лыдӟыкумы?
17 Лыдӟе но малпаське, кызьы вашкала дыръя адямиос улӟытэмын вал. Библиын вераське тямыс учыръёс, ку адямиос музъем вылын улыны улӟытэмын вал d. Умой луысал та учыръёсты сак эскерыны. Соосты эскерыкуды, тодады возе, та адямиос — пиосмуртъёс, кышномуртъёс но нылпиос — зэм но куке но музъем вылын улӥзы шуыса. Малпаське, малы дышето тӥледыз та учыръёс. Валаны тырше, кызьы котькуд учыр возьматэ, Инмарлэн кулэмъёсты улӟытыны мылкыдыз но, кужымез но вань шуыса. Нырысь ик эскере самой валтӥсь улӟытонэз — Иисусэз улӟытонэз. Тодады возе: улӟем Иисусэз трос сю адямиос адӟизы. Та учыр осконмес юнматэ, азьланяз трос миллиард адямиос улӟытэмын луозы шуыса (1 Кор. 15:3—6, 20—22).
18. Мар тӥ карыны быгатӥськоды, улӟытонлы оскон сярысь кырӟанъёс тӥледыз мед юнматозы шуыса? (Озьы ик учке сноскаез.)
18 Кырӟалэ но кылзэ «духовной кырӟанъёсты», кудъёсаз улӟытонлы оскон сярысь вераське (Еф. 5:19) e. Та кырӟанъёс юртто син азямы пуктыны, кызьы улӟытон ортчытӥськоз. Соос улӟытонлы осконмес юнмато. Та кырӟанъёсты кылзэ но кырӟалэ. Семьяен йыбырттонды дыръя эскере, мар сярысь отын вераське. Дышетэ та кырӟанъёсты, соос визьмады но сюлмады мед кылёзы шуыса. Соку, лек уйылон-уллянъёсын пумиськиды ке яке матысь адямидэс ыштӥды ке, Иеговалэн духез тӥледлы юрттоз та кырӟанъёсты тодады вайыны. Соос тӥледыз буйгатозы но юнматозы.
19. Мае син азе пуктыны луэ, улӟытон сярысь малпаськыку? (Озьы ик учке « Мар сярысь тӥ соослэсь юасалды?» рамкаез.)
19 Пуктэ син азяды. Иегова милемлы луонлык сётӥз асьмеды выль дуннеын адӟыны. Одӥг сузэр вера: «Мон туж ӵем асме выль дуннеын адӟисько. Мыным потэ, мон райын сяськаяськись розаослэсь ческыт зынзэс но шӧдӥсько шуыса». Малпаське, кызьы тӥ пумиськоды Инмарлэн вашкала дыръя улэм оскымон ужась-тыршисьёсыныз. Кинэ тӥляд адӟемды потэ? Мар сярысь тӥ солэсь юасалды? Озьы ик малпаське, кызьы тӥ нош ик ӵош луоды матысь адямиосыныды, кудъёсыз улӟытэмын луозы. Пуктэ син азяды, мар тӥ соослы нырысь ик вералоды, кызьы соосты ӟыгыртоды но макем шумпотоды соосты адӟыны.
20. Мар карыны милям мылкыдмы вань?
20 Ми туж тау кариськомы Иеговалы кулэмъёсты улӟытыны кылсётонэз понна! Ми юн оскиськомы, со быдэсмоз шуыса. Малы ке шуоно сое быдэстыны Иеговалэн мылкыдыз но, кужымез но вань. Ойдолэ улӟытонлы осконмес юнматомы. Та юрттоз матэгес луыны Инмарлы, кудӥз котькудмылы кылзэ сётэ: «Тынад матысь адямиосыд улӟыса султозы!»
147-ТӤ КЫРӞАН Инмар оскытэ, ми пырак уломы шуыса
a Тӥ матысь адямидэс ыштӥды ке, тӥледыз туж буйгатэ, дыр, Иеговалэн кылсётонэз кулэмъёсты улӟытыны. Нош кызьы тӥ мукетъёсызлы валэктысалды, малы тӥ та кылсётонлы оскиськоды? Кызьы тӥ улӟытонлы оскондэс юнматыны быгатӥськоды? Та статья ваньмылы милемлы юрттоз юн оскыны, Инмар кулэмъёсты улӟытоз шуыса.
b Та крезьгуро видео нимаське «Этот день очень близко!». Со возьматэмын вал 2016-тӥ арын шуркынмон понна поттэм JW Broadcasting программаын.
c Учке 2008-тӥ арын 1-тӥ толшор понна поттэм «Возьмаськон башняысь» «Тодӥськоды-а тӥ?» рубрикаысь «Почему Иисус пришёл к склепу Лазаря только через четыре дня?» статьяез, 31-тӥ бам.
d Учке 2015-тӥ арын 1-тӥ гудырикошкон понна поттэм «Возьмаськон башняысь» «Восемь случаев воскресения, описанных в Библии» рамкаез, 4-тӥ бам.
e «Иеговалы шумпотыса кырӟалэ» кырӟанъёсын книгаысь учке таӵе кырӟанъёсты: «Адӟы астэ выль дуннеын» (139-тӥ кырӟан), «Учкы осконэн!» (144-тӥ кырӟан) но «Со ӧтёз» (151-тӥ кырӟан). Озьы ик jw.org сайтысь учке таӵе кырӟанъёсты: «Этот день очень близко!», «Мы ждём новый мир» но «Мир любви и гармонии».
