1. Кызьы учконо вӧсяськон шоры?

 ИЕГОВА милемлы туж бадӟым дан сётӥз — милям инлэн но, музъемлэн но Кылдытӥсезлы вӧсяськеммы луэ. Ми быгатӥськомы усьтыны солы сюлэммес котькыӵе дыре но котькыӵе кылын. Кытын гинэ ми медам луэ — эмъяськонниын яке пытсэтын — милям яратӥсь инмысь Атаймы котьку но милемыз кылэ. Ми туж тау кариськомы солы таӵе кузьымез понна!

2. Кызьы Давид эксэй возьматӥз, вӧсяськыны луонлыкез дунъя шуыса?

² Давид эксэй вӧсяськыны луонлыкез дунъяз. Одӥгаз псаломаз со Иеговалы кырӟаз: «Вӧсяськеме, фимиам кадь, Тынад азяд мед мыноз» (Пс. 140:1, 2). Давид улон нуналъёсы священникъёс, Иеговалы ужакузы-тыршыкузы, фимиамез ӵындыто вал. Сое туж тыршыса дасяло вал (Пот. 30:34, 35). Давид вераз фимиам сярысь, малы ке шуоно со умой-умой малпаськиз, мае вералоз инмысь Атаезлы. Милям но туж потэ, вӧсяськонъёсмы Иеговалы мед кельшозы шуыса.

3. Кыӵе мылкыдын Иеговалы вӧсяськыны кулэ но малы?

³ Вӧсяськыкумы милемлы мур гажанэн Иеговалы вазиськоно. Тодады вае, мае адӟизы Исаия, Иезекииль, Даниил но Иоанн. Соослы пӧртэм адӟытонъёс возьматэмын вал ке но, соослэн мар ке огкадез но вал. Вань та адӟытонъёсын Иегова Быдӟым Эксэй кадь возьматэмын  вал. Исаия вера: «Кузё-Инмарез адӟи; Со ӝужыт, ӝутэм престол вылын пуке вал» (Ис. 6:1—3). Иезекииль Иеговаез адӟиз инмысь уробо вылын, кудӥз котырын «вуюисьлэн кыӵе луэ вылтусыз... сыӵе ик чилян-пиштон адӟиськыса улӥз» (Иез. 1:26—28). Даниил адӟиз «пумтэм нуналъёс Улӥсез». Со дӥсяськемын вал тӧдьы дӥсен, нош «Солэн престолэз гомась тыл кадь» вал (Дан. 7:9, 10). Иоанн адӟиз Иеговаез престол вылын, кудӥз котырын «марӟан излы укшась вуюись пиштыса улӥз» (Усьт. 4:2—4). Иеговаен нокин уз ӵошатӥськы! Куке ми та сярысь малпаськиськомы, милям мылкыдмы ӝутске вӧсяськыны луонлык понна тау карыны но Иеговалы мур гажанэн вазиськыны. Нош мар сярысь милемлы вӧсяськыны кулэ?

4. Малы милемыз дышетэ «Инмысь Атаймы» вӧсяськонлэн кутскон кылъёсыз? (Матфей 6:9, 10).

⁴ Лыдӟе Матфейлэсь 6:9, 10. Гурезь йылын тодытыкуз, Иисус дышетскисьёссэ вӧсяськыны дышетӥз. Со валэктӥз, кыӵе вӧсяськонъёс Инмарлы ярамон луо. «Тӥ тазьы вӧсяськелэ» кылъёс бере ик Иисус вераз сое, мар герӟаськемын Иеговалэн эрикеныз. Со вераз Инмарлэсь нимзэ чылкытатон сярысь, Эксэйлыклэн лыктэмез сярысь, кудӥз Иеговалэсь вань тушмонъёссэ быдтоз, но вуоно улон сярысь. Та сярысь вӧсяськыса, ми возьматомы, Иеговалэн эрикез улонамы валтӥсь инты басьтэ шуыса.

5. Кылэ-а милемыз Иегова, куке ми асьмелы мае ке куриськомы?

⁵ Собере Иисус возьматӥз, милям асьмелы но мае ке куреммы луэ шуыса. Ми быгатӥськомы курыны Иеговаез та нуналлы сиён сётыны, сьӧлыкъёсмес куштыны, визь сынаськонлы сётскытэк улыны но Шайтанлэсь утьыны (Матф. 6:11—13). Та сярысь вӧсяськыса, ми возьматӥськомы, милемлы Инмарлэн юрттэмез кулэ но милям сое шумпоттэммы потэ шуыса.

6. Кулэ-а милемлы вӧсяськыны ӵапак озьы ик, кызьы Иисус вӧсяськиз? Валэктэ.

⁶ Иисус ӧз возьма, дышетскисьёсыз ӵапак солэн кадь кылъёсын вӧсяськозы  шуыса. Иисус вӧсяськиз со сярысь, мар сое сюлмаськытӥз со дыре (Матф. 26:39, 42; Иоанн 17:1—26). Озьы ик ми но вӧсяськыкумы вераны быгатӥськомы ваньзэ, мар милемыз сюлмаськытэ. Куке милемлы кыӵе ке но ужпум кутоно, ми Иеговалэсь визьлык куриськомы (Пс. 118:33, 34). Нош кыӵе ке ужез быдэстон понна, ми солэсь юрттэт но валан куриськомы (Мад. 2:6). Анай-атайёс вӧсясько пиналъёссы понна, нош пиналъёс — анай-атайёссы понна. Ми ваньмы вӧсяськиськомы дышетскисьёсмы понна но соос понна, кинъёслы тодытӥськомы. Но милемлы Иеговалэсь юрттэт курыса гинэ вӧсяськоно ӧвӧл.

7. Малы вӧсяськонъёсамы Иеговаез данъяно?

⁷ Вӧсяськыкуды эн вунэтэ Иеговаез данъяны. Иегова сяна нокин но сокем данъяны ярамон ӧвӧл. Инмармы «ӟечлыко, туж гажась, жалясь». Озьы ик со «шырыт сямо, лякыт сюлэмо, кема чидась» (Пс. 85:5, 15). Кызьы уд данъя Иеговаез сыӵе ӟеч сямъёсыз но ужъёсыз понна!

8. Мар понна ми Иеговаез тау кариськомы? (Псалтирь 103:12—15, 24).

⁸ Иеговаез данъяны гинэ кулэ ӧвӧл. Озьы ик сое тау кароно трос паймымон кузьымъёсыз понна. Кылсярысь, солы тау шуыны луоз чебересь сяськаос, ческыт сиён но матысь эшъёс понна. Тае но трос мукетсэ яратӥсь Атаймы сётэ милемлы, ми шумпотыса мед уломы шуыса. (Лыдӟе Псалтирез 103:12—15, 24.) Нош тужгес но ми Иеговаез тау кариськомы ваньмыз понна, мар юрттэ осконмес юнматыны, озьы ик вуоноезлы оскиськон понна.

9. Мар кароно, Иеговаез тау карыны медам вунэтэ шуыса? (1 Фессалоникаослы 5:17, 18).

⁹ Куддыръя ми вунэтӥськомы Иеговаез тау карыны. Мар карыны луоз таӵе учыре? Гожтэ, мае тӥ солэсь куриды, но дырын-дырын эскере, кызьы Иегова тӥледлы ответ сётӥз. Собере Иеговаез юрттэмез понна тау каре. (Лыдӟе 1 Фессалоникаослы 5:17, 18.) Милемлы туж кельше, куке милемыз тау каро. Иегова но туж шумпотэ, куке ми тау карыса вӧсяськиськомы  (Кол. 3:15). Но вань на эшшо одӥг муг, малы ми Инмармес тау карыны быгатӥськомы.

10. Малы Иеговаез тау кароно, со музъем вылэ Иисусэз ыстӥз шуыса? (1 Пётр 2:21).

¹⁰ Лыдӟе 1 Пётрлэсь 2:21. Милемлы Иеговаез тау кароно, милемыз дышетон понна, со аслэсьтыз яратоно Пизэ ыстӥз шуыса. Иисуслэсь улонзэ мургес эскерыса, ми тросгес тодӥськомы инмысь Атаймы сярысь, озьы ик со сярысь, кызьы сое шумпоттоно. Иеговаен юн кусыпъёсмы мед луозы шуыса, милемлы Христослэн мозмытӥсь курбонэзлы осконо (Рим. 5:1).

11. Малы ми вӧсяськиськомы Иисус Христос пыр?

¹¹ Ми Иеговалы тау шуиськомы, солы Пиез пыр вӧсяськыны быгатӥськомы шуыса. Ми Иисус Христос пыр вӧсяськиськомы ке, Иегова милесьтым куронъёсмес кылэ но сётэ милемлы сое, мар милемлы кулэ. Иисус тае тазьы валэктӥз: «Мынам нимыным Атайлэсь мар гинэ уд куре, ваньзэ сое быдэсто. Озьы, Пи пыр Атай данэ... потоз» (Иоанн 14:13, 14).

12. Малы эшшо Иеговаез тау кароно солэн Пиез понна?

¹² Христослэн мозмытӥсь курбонэзлы луыса Иегова милесьтым сьӧлыкъёсмес куштэ. Библиын Иисус сярысь верамын, со инмысь «Быдӟым Инмарлэн престолэзлэн бурпалаз пуксем Архиереймы» яке Быдӟым священникмы шуыса (Евр. 8:1). Со «Атай азьын Дурбасьтӥсьмы» (1 Иоанн 2:1). Ми туж тау кариськомы Иеговаез, со милемлы сыӵе гажась-жалясь Быдӟым священникез сётӥз шуыса. Иисус милесьтым тырмымтэосмес вала, озьы ик со Инмар азьын «асьме понна дурбасьтэ» (Рим. 8:34; Евр. 4:15). Ми тырбыдэстэмесь, соин ик Христослэн курбонэзлы луыса гинэ ми Инмарлы вӧсяськыны быгатӥськомы. Иеговалэн дуно кузьымез, солэн яратоно Пиез, понна ми номырин берыктыны ум быгатэ.

13. Кызьы кулон азяз уе Иисус возьматӥз, дышетскисьёссэ яратэ шуыса?

¹³ Кулон азяз уе Иисус кема вӧсяськиз дышетскисьёсыз понна но Атаезлэсь куриз соосты Шайтанлэсь утьыны (Иоанн 17:15). Инмарлэн Пиезлы бадӟым шуг-секыт пыр потоно вал ке но, со ачиз сярысь ӧз малпаськы. Со сюлмаськиз апостолъёсыз понна. Татысь адӟиськиз, со соосты туж яратэ шуыса.

14. Кызьы вын-агайёсмылы но сузэр-апайёсмылы яратонмес возьматоно?

¹⁴ Ми Иисуслэсь адӟем карыны тыршиськомы, соин ик асьмеос сярысь гинэ ум малпаськиське. Ми ӵем дыръя вӧсяськиськомы вын-агайёсмы но сузэр-апайёсмы понна. Озьы ми кылзӥськиськомы Иисуслэн курон-косонэзлэсь: «Огдэс огды яратэ» (Иоанн 13:34). Иегова шумпотэ, куке ми ог-огмылы яратонмес возьматӥськомы. Вын-агайёсмы но сузэр-апайёсмы понна вӧсяськонъёсмы соослы юрттыны быгато, малы ке шуоно Инмарлэн Кылаз верамын: «Шонер улӥсьлэн сюлмысь вӧсяськемез трос лэсьтыны быгатэ» (Иак. 5:16).

15. Малы туж кулэ вын-агайёс но сузэр-апайёс понна вӧсяськыны?

¹⁵ Туж кулэ вын-агайёс но сузэр-апайёс понна вӧсяськыны, малы ке шуоно соос  трос шуг-секытъёсын пумиськыло. Ми Иеговалэсь юрттэт курыны быгатӥськомы соос понна, кинъёс курадӟо инкуазь шимучыръёс, ожъёс но уйылон-уллянъёс сэрен, озьы ик соос понна, кинъёс висё яке мукет шуг-секытъёсты чидано луо. Со сяна, вӧсяськыны кулэ вын-агайёс но сузэр-апайёс понна, кудъёсыз, асьсэды жалятэк, секыт югдуре сюремъёслы юртто. Тӥ но тодӥськоды, дыр, сыӵе агайёсты но сузэръёсты. Умой луысал та христианъёс понна вӧсяськыны, соослэсь нимъёссэс вераса. Озьы тӥ зэмос яратондэс возьматоды.

16. Малы милемлы вӧсяськоно агайёс понна, кудъёсызлы кенешын кивалтон уж сётэмын?

¹⁶ Агайёс, кудъёсызлы кенешын кивалтон уж сётэмын, туж тау каро, ми соос понна вӧсяськиськомы шуыса. Милям вӧсяськонъёсмы юртто соослы сётэм ужзэс быдэсъяны. Тани мар та сярысь гожтӥз апостол Павел: «Инмар кыл сярысь вераськыны кутски ке, соку ик мон кышкатэк Ӟеч Иворлэсь ватӥськыса улӥсь зэмлыксэ усьтыны мед быгатом шуыса, мон понна но вӧсяське» (Еф. 6:19). Павел сямен, трос вын-агайёс ӟырдыт мылкыдын Иеговалы ужало-тыршо. Яратон милесьтым мылкыдмес ӝутоз Иеговаез курыны, со соослы мед юрттоз шуыса.

17, 18. Ку милемыз курыны быгато мукетъёсыз азьын шара вӧсяськыны но мар сярысь тодамы возёно?

¹⁷ Куддыръя милемыз куро мукетъёсыз азьын шара вӧсяськыны. Кылсярысь, одӥг сузэр Библия дышетоназ мукет сузэрез ӧте но сое вӧсяськыны куре. Ӧтем сузэр дышетскисьлэсь югдурзэ пыр-поч уг тоды ке, со дышетонлэн пумаз вӧсяськыны мылкыд кароз, дыр. Соку вӧсяськыкуз солы капчигес луоз вераны со сярысь, мар дышетскисез сюлмаськытэ.

¹⁸ Агаез курыны быгато тодытонлы сӥзем пумиськонын яке кенешлэн пумиськоназ вӧсяськыны. Мар сярысь солы тодаз возёно? Нырысь ик лыдэ басьтоно, малы ваньзы та пумиськонэ люкаськизы. Со сяна, вӧсяськонын кулэ ӧвӧл кенешлы визь-кенешъёс сётъяны яке ялонъёс вераны.  Кырӟанлы но вӧсяськонлы ӵем дыръя вить минут гинэ висъяське. Соин ик агай, кудӥз вӧсяське, трос кылъёс вераны кулэ ӧвӧл, тужгес но пумиськонлэн кутсконаз вӧсяськыкуз (Матф. 6:7).

19. Мар юрттоз милемлы Иеговалэн судъян нуналэзлы дась луыны?

¹⁹ Иеговалэн судъян нуналыз матэктэмъя вӧсяськонлы эшшо но тросгес саклык висъяно. Тӥни малы Иисус вераз: «Котькыӵе дыре но сак улэ, вӧсяське, вань шугадӟонъёслэсь утиськыны... мед быгатоды» (Лука 21:36). Ми Иеговалы ялан вӧсяськимы ке, соку осконмы юн луоз но Иеговалэн судъян нуналэзлы дась луомы.

20. Мар кароно, вӧсяськонъёсмы ческыт зыно фимиам кадь мед луозы шуыса?

²⁰ Озьыен, мае ми эскеримы? Милемлы дунъяны кулэ вӧсяськыны луонлыкез. Вӧсяськыкумы валтӥсь инты басьтыны кулэ Иеговалэн эрикез. Озьы ик Инмарез тау кароно солэн Пиез но Эксейлыкез понна, кудаз Христос кивалтэ. Со сяна, милемлы вын-агайёсмы но сузэр-апайёсмы понна вӧсяськоно. Озьы ик ми быгатӥськомы куронъёсмес вераны но, осконмес юнматон понна, юрттэт курыны. Ми азьло ик малпамы ке, мар сярысь вӧсяськомы, соку возьматомы, Иеговалы вазиськыны луонлыкез дунъяськомы шуыса. Соку милям вӧсяськонъёсмы, ческыт зыно фимиам кадь, Иеговалы ярамон луозы (Мад. 15:8).