1. Мар кариз Иегова Адамлэн но Евалэн сьӧлыкамзы бере ик? (Улон-вылон 3:15).

 АДАМЛЭН но Евалэн сьӧлыкамзы бере ик Иегова туж кулэ луись азьпалзэ ивортон вераз, кудӥз нырысетӥ адямиослэн нылпиоссылы вуоноезлы оскон кузьмаз. Та азьпалзэ ивортон гожтэмын Улон-вылонын 3:15 (лыдӟе).

2. Малы Улон-вылонысь 3:15 азьпалзэ ивортон туж кулэ луэ?

² Та азьпалзэ ивортон Библилэн самой кутсконаз гожтэмын. Но со Библилэн мукет люкетъёсыныз но герӟаськемын. Со быдэс Библиез огазея. Улон-вылонын 3:15 вераське, кызьы Инмар ыстоз Мозмытӥсез, кудӥз Шайтанэз но со пала кариськисьёсты быдтоз b. Соку Иеговаез яратӥсьёс шумпотозы!

3. Мае ми эскеромы та статьяын?

³ Та статьяын ми эскеромы юанъёсты, кудъёсыз герӟаськемын Улон-вылонысь 3:15 азьпалзэ ивортонэн: кин сярысь отын вераське? Кызьы со быдэсме? Малы милемлы сое тодыны кулэ?

4. Кин со «кый» Улон-вылонысь 3:15 но кытысь ми сое тодӥськомы?

⁴ Улон-вылонын 3:14, 15 вераське «кый» но солэн «кидысэз-выжыез» сярысь, озьы ик «кышномурт» но солэн «кидысэз-выжыез»  сярысь. Библия умой валэктэ, кин сярысь вераське та азьпалзэ ивортонын c. Нырысь ойдолэ тодомы, кин со «кый». Огшоры кый ӧй валасал, мар вераз солы Иегова Едем садын. Озьыен, татын вераське кин ке мукетыз сярысь. Усьтӥськон 12:9 та юанлы валамон валэктон сётэ. «Вашкала кый» — со Шайтан. Нош кин со кыйлэн «кидысэз-выжыез»?

5. Кин со Шайтанлэн «кидысэз-выжыез»?

⁵ Куддыръя Библиын «кидыс-выжы» кыл возьматэ соосты, кинъёс кинлэсь ке адӟем каро, кызьы нылпиос атайзылэсь адӟем каро. Шайтанлэн «кидысэз-выжыез» — со кылчинъёс но адямиос, кудъёсыз, Шайтан сямен, Иеговалы но солэн калыкезлы пумит мыно. Кылсярысь, соос пӧлы пыро кылчинъёс, кудъёсыз Ной улон нуналъёсы инмысь музъем вылэ васькизы. Озьы ик соос пӧлы пыро адямиос, кудъёсыз асьсэды Шайтан сямен возё (Ул.-выл. 6:1, 2; Иоанн 8:44; 1 Иоанн 5:19; Иуда 6).

6. Малы азьпалзэ ивортонысь «кышномурт» — со Ева ӧвӧл?

⁶ Кинэ возьматэ «кышномурт» та азьпалзэ ивортонын? Со Ева ӧвӧл. Малы? Малы ке шуоно азьпалзэ ивортонын вераське, солэн «кидысэз-выжыез» кыйлэсь йырзэ сузмытоз шуыса. Нош ми али гинэ тодӥмы, кый — со Шайтан шуыса. Быгато-а Евалэн нылпиосыз, тырбыдэстэм адямиос, Шайтанэз быдтыны? Уг быгато. Соку кин быдтоз Шайтанэз?

7. Кин со «кышномурт», кудӥз сярысь вераське Улон-вылонын 3:15? (Усьтӥськон 12:1, 2, 5, 10).

⁷ Валан понна, кинэ возьматэ Улон-вылонысь 3:15 «кышномурт», эскеромы  Библилэсь берпуметӥ книгазэ. (Лыдӟе Усьтӥськонэз 12:1, 2, 5, 10.) Усьтӥськон книгаын вераське кышномурт сярысь, кудӥз огшоры ӧй вал. «Солэн пыд улаз толэзь, йыр вылаз дас кык кизилиё венец понэмын». Та кышномуртлэн нуныез но огшоры ӧй вал. Со Инмарлэн Эксэйлыкез. Та Эксэйлык инмын, соин ик кышномурт но инмын луыны кулэ. Со возьматэ Иеговалэн организациезлэсь инмысь люкетсэ, кудаз Инмарлы оскымон кылчинъёс пыро (Гал. 4:26).

8. Кин со кышномуртлэн валтӥсь «кидысэз-выжыез» но ку со потӥз? (Улон-вылон 22:15—18).

⁸ Озьы ик Библия валаны юрттэ, кин луэ кышномуртлэн валтӥсь «кидысэз-выжыез». Со Авраамлэн выжыысьтыз потыны кулэ вал. (Лыдӟе Улон-вылонэз 22:15—18.) Та азьпалзэ ивортон быдэсмиз Иисус вылын, кудӥз Авраамлэн выжыысьтыз потӥз (Лука 3:23, 34). Но «кидыс-выжы», кудӥз сярысь Улон-вылонын 3:15 вераське, огшоры адями луыны уг быгаты, малы ке шуоно солы Шайтанэз быдтоно. Соин ик, куке Иисуслы ог 30 арес вал, Иегова сое святой духеныз зырӟиз. Соку Иисус Инмарлэн духовной Пиез луиз. Святой духен зырӟон дыръя Иисус кышномуртлэн валтӥсь «кидысэз-выжыез» луиз (Гал. 3:16). Кулэмез но улӟемез бере Иегова Иисуслы бадӟым дан сётӥз. Инмар Иисуслы «Инмын но, музъем вылын но... котькыӵе кужым» сётӥз, «Диаволлэсь ужъёссэ куашкатон понна» (Матф. 28:18; 1 Иоанн 3:8; Евр. 2:7).

9, 10. а) Кин эшшо пыре на кышномуртлэн «кидысэз-выжыез» пӧлы но ку соос солэн «кидысэз-выжыез» луо? б) Мае ми эскеромы вуоно абзацъёсын?

⁹ Но кышномуртлэн мукет «кидысэз-выжыез» но луыны кулэ. Апостол Павел та сярысь вераз зырӟем христианъёслы, кудъёсыз еврей калыкысь но, мукет калыкъёсысь но потэмын вал: «Тӥ Христослэн ке, соку тӥ Авраамлэн кидысэз, Инмарлэн сӥзиськонэзъя люкет басьтӥсьёс луиськоды» (Гал. 3:28, 29). Куке Иегова христиан муртэ святой духеныз зырӟе, со кышномуртлэн «кидысэз-выжыез» луэ. Озьыен, кышномуртлэн «кидысэз-выжыез» — со Иисус Христос но соин ӵош 144 000 кивалтӥсьёсыз (Усьт. 14:1). Соос тыршо Иегова Атайзы сямен малпаськыны но асьсэды возьыны.

¹⁰ Табере ми тодӥськомы, кин сярысь вераське Улон-вылонын 3:15. Нош али ойдолэ вакчияк эскеромы, кызьы Иегова та азьпалзэ ивортонэз быдэстэ но кызьы ми сое валаны кулэ.

11. Кызьы валано, кышномуртлэн «кидысэз-выжыез» пыдтышказ лекамын луоз шуыса?

¹¹ Улон-вылонын 3:15 вераське, кый кышномуртлэсь «кидыссэ-выжызэ» пыдтышказ лекалоз шуыса. Та кылъёс быдэсмыны кутскизы, куке Шайтан еврей но рим калыкъёслэсь мылкыдзэс ӝутӥз Инмарлэсь Пизэ казнить карыны (Лука 23:13, 20—24). Адями пыдтышсэ вӧсь каре ке, со кӧня ке дыр ӵоже ветлыны уг быгаты. Озьы ик Иисус но куинь нунал ӵоже номыр карыны ӧз быгаты, малы ке шуоно кулэмын вал (Матф. 16:21).

12. Ку но кызьы кыйлэн йырыз сузмытэмын луоз?

¹² Улон-вылонысь 3:15 азьпалзэ ивортон мед быдэсмоз шуыса, Иисуслы шайгуысь потоно вал. Малы? Малы ке шуоно та азьпалзэ ивортонын вераське, кышномуртлэн «кидысэз-выжыез» кыйлэсь йырзэ сузмытоз шуыса. Соин ик Инмарлэн Пиез  улӟыны кулэ вал. Озьы ик луиз! Казнить каремзы бере куинетӥ нуналаз со улӟытэмын вал но солы инмын ноку бырисьтэм улон сётэмын вал. Иеговаен пуктэм дыре Иисус Шайтанэз быдтоз (Евр. 2:14). Со 144 000 кивалтӥсьёсыныз ӵош музъем вылысь Инмарлэсь тушмонъёссэ, Шайтанлэсь «кидыссэ-выжызэ», быдтоз (Усьт. 17:14; 20:4, 10) d.

13. Кыӵе пайда милемлы вае та азьпалзэ ивортонлэн быдэсмемез?

¹³ Тӥ Инмарлы ужаськоды-тыршиськоды ке, та азьпалзэ ивортонлэн быдэсмемез тӥледлы пайда ваёз. Иисус музъем вылын адями кадь улӥз. Со быдэсак Атаезлэсь адӟем кариз (Иоанн 14:9). Со юрттӥз милемлы Иегова Инмарез тодыны но яратыны. Озьы ик милемлы пайда вае Иисуслэн дышетонъёсыз но христиан кенешен кивалтэмез. Иисус дышетэ милемыз Иеговаез шумпоттыса улыны. Со сяна, Иисуслэн кулэмез но милемлы пайда вае. Кыӵе? Улӟемез бере Иисус Иеговалы мозмытӥсь курбон сётӥз, кудӥз «котькыӵе но сьӧлыклэсь асьмеды сузя» (1 Иоанн 1:7).

14. Кытысь ми тодӥськомы, азьпалзэ ивортон, кудзэ Иегова Едем садын сётӥз, соку ик быдэсмыны уг быгаты вал шуыса?

¹⁴ Иеговалэн Едем садын верам кылъёсыз возьматӥзы, азьпалзэ ивортон соку ик уз быдэсмы шуыса. Малы ке шуоно дыр кулэ вал, кышномуртлэн «кидысэз-выжыез» мед потоз шуыса, кылчинъёс но адямиос Шайтан пала мед кариськозы шуыса но соос куспын тушмонъяськон мед кылдоз шуыса. Милемлы та азьпалзэ ивортонэз тодыны кулэ, малы ке шуоно отын алон гожтэмын: Шайтанлэн ки улаз возиськись дунне Иеговалэсь калыксэ адӟемпотостэм кароз. Берлогес та сярысь Иисус но вераз (Марк 13:13; Иоанн 17:14). Ваньмы ми адӟиськомы, кызьы азьпалзэ ивортонлэн та люкетэз быдэсме, уката но берло 100 аръёс ӵоже.

15. Малы та дунне милемыз эшшо но золгес адӟемпотостэм каре но малы милемлы Шайтанлэсь кышкано ӧвӧл?

¹⁵ Иисус 1914-тӥ арын Эксэй луэмез бере Шайтанэз инмысь сэрпалтӥз. Табере Инмарлэн тушмонэз музъем вылын. Со возьма, ку со быдтэмын луоз (Усьт. 12:9, 12). Но Шайтан тэк уг пукы. Йыркурен пачылмыса, со Иеговалэсь калыксэ уйылыса-улляса возе (Усьт. 12:13, 17). Тӥни малы та дунне Инмарлэсь ужась-тыршисьёссэ эшшо но золгес адӟемпотостэм каре. Но ми Шайтанлэсь ум кышкаське. Апостол Павеллэн кадь ик, милям юн мылкыдмы вань. Со вераз: «Инмар асьме палан ке, кин асьмелы пумит луыны быгатоз?» (Рим. 8:31). Ми быдэсак оскиськомы Иеговалы, малы ке шуоно Улон-вылонысь 3:15 азьпалзэ ивортонлэн бадӟымез люкетэз быдэсмиз ини.

16—18. Кыӵе пайда басьтӥзы Кёртис, Урсула но Джессика, куке Улон-вылонысь 3:15 азьпалзэ ивортонэз валазы?

¹⁶ Иеговалэн кылсётонэз, кудӥз гожтэмын Улон-вылонын 3:15, юрттэ милемлы котькыӵе шуг-секытъёсты чиданы. Кёртис агай, кудӥз Гуам шормуӵын миссионер луыса ужа-тырше, вера: «Шуг-секытъёс дыръя Иеговалы оскымон луыны капчи ӧвӧл. Но Улон-вылонысь 3:15 азьпалзэ ивортон вылын малпаськон юрттэ мыным инмысь Атаелы оскиськыса улыны». Кёртис  агай туж возьма, ку Иегова вань курадӟонъёсмес быдтоз.

¹⁷ Бавариысь Урсула сузэр вераз, кызьы Улон-вылонысь 3:15 азьпалзэ ивортон оскытӥз сое, Библия святой духлэн валтэмез улсын гожтэмын вал шуыса. Со адӟиз, кызьы та азьпалзэ ивортон герӟаськемын вал Библиысь мукет азьпалзэ ивортонъёсын. Та солэн сюлмаз ик пыриз. Тани мар со вераз: «Монэ туж паймытӥз, нырысетӥ адямиослэн сьӧлыкамзы бере ик Иегова адямиослы вуоноезлы оскон сётӥз шуыса».

¹⁸ Нош тани мар вераз Микронезиысь Джессика сузэр: «Мон али но тодӥсько на, кызьы нырысьсэ валай, зэмлыкез шедьтӥ шуыса. Мон ас синъёсыным адӟисько, кызьы быдэсме азьпалзэ ивортон, кудӥз гожтэмын Улон-вылонын 3:15. Со юрттэ мыным тодам возьыны: Инмарлэн уг поты вал, ми тазьы мед уломы шуыса. Озьы ик та азьпалзэ ивортон оскытӥз монэ: Иеговалы ужан-тыршон — со самой умой улон али но, вуонояз но».

19. Малы ми оскыны быгатӥськомы, Улон-вылонысь 3:15 азьпалзэ ивортон пумозяз быдэсмоз шуыса?

¹⁹ Ми ас синъёсынымы адӟиськомы, кызьы быдэсме Улон-вылонысь 3:15 азьпалзэ ивортон. Ми тодӥськомы, кин со кышномуртлэн кидысэз-выжыез но кыйлэн кидысэз-выжыез. Иисус, кышномуртлэн валтӥсь кидысэз-выжыез, пыдтышказ лекамын вал. Нош али со ноку кулӥсьтэм, туж кужмо Эксэй. Кышномуртлэн кидысэз-выжыез пӧлысь троссэ Иегова люказ ини. Та азьпалзэ ивортонлэн нырысетӥ люкетэз быдэсмиз бере, ми юн оскиськомы, кыкетӥ люкетэз но быдэсмоз шуыса — кышномуртлэн кидысэз-выжыез кыйлэсь йырзэ сузмытоз. Инмарлы оскымон адямиос туж шумпотозы, куке Шайтан пыраклы быдтэмын луоз. Соин ик, агайёс но сузэръёс, эн сётске! Инмар возьматӥз, солы быдэсак оскыны луэ шуыса. Кышномуртлэн кидысэз-выжыез пыр «дунне вылысь вань калыкъёс» бакель каремын луозы (Ул.-выл. 22:18).