1. Мае тӥ тодӥды, куке Библиез дышетыны кутскиды?

 ТОДАДЫ вае, кызьы тӥ Библиез дышетыны кутскиды. Оло нош, тӥ паймиды, Инмарлэн нимыз вань шуыса. Тӥляд сюлэмды капчи луиз, дыр, куке тодӥды, Инмар адямиосты тылын ӝуась адын уг курадӟыты шуыса. Тӥ шумпотӥды, луоз, матысь адямиосыныды, кудъёсыз кулӥзы ини, нош ик адӟиськыны быгатоды но соосын ӵош рай музъем вылын улоды шуыса.

2. Вералэ, кыӵе азинсконъёс тӥ лэсьтӥды, Инмарлэсь Кылзэ эскерыса (Ефесъёслы 5:1, 2).

² Инмарлэсь Кылзэ эскерыса, тӥляд Иеговаез яратонды юнмаз. Та яратон мылкыддэс ӝутӥз басьтэм тодон-валандэс уже кутыны. Тӥ кутскиды Библиысь возетъёсъя улыны но шонер ужпумъёс кутылыны. Тӥляд мылкыдды ӝутскиз Инмарез шумпоттыса улыны. Соин ик тӥ малпаськон амалдэс но ужъёстэс тупатӥды. Нылпи сямен, кудӥзлэн анай-атаез кадь луэмез потэ, тӥ инмысь Атайдылэсь адӟем карыны кутскиды. (Лыдӟе Ефесъёслы 5:1, 2.)

3. Мар сярысь аслэсьтыд юаны луэ?

³ Юалэ асьтэлэсь: «Пылатӥськеме дырысен Иеговаез яратонэ юнгес луиз-а? Луэ-а вераны, малпанъёсы но ужъёсы Иеговалэн малпанъёсызлы но ужъёсызлы али эшшо но золгес тупало шуыса? Кылсярысь, возьматӥсько-а мон вын-агайёсылы но сузэр-апайёсылы эшшо но юн яратонме?» Али яратонды ӧжыт сӥяз ке, мылкыдды медаз куашка. Таӵе ик учыре сюризы нырысетӥ даурысь христианъёс но. Но Иисус соосты ӧз палэнты. Со тӥледыз но уз палэнты  (Усьт. 2:4, 7). Иисус тодэ, яратонэз, кудӥз тӥляд кылдӥз зэмлыкез тодэмды бере, тӥ выльысь ӝуатыны быгатӥськоды шуыса.

4. Мае ми эскеромы та статьяын?

⁴ Та статьяын нырысь ми эскеромы, кызьы быгатӥськомы Иеговаез но матысь адямиосмес эшшо но золгес яратыны. Собере тодомы, кыӵе бакель каронъёс возьмало милемыз но мукетъёсты, яратонмы юнгес луиз ке.

5, 6. а) Кыӵе шуг-секытъёсын пумиськылӥз апостол Павел? б) Мар юрттӥз Павеллы азьланяз но Иеговалы ужаны-тыршыны?

⁵ Апостол Павел шумпотыса Иеговалы ужаз-тыршиз. Но солэн трос шуг-секытъёсыз но вал. Ӵем дыръя со кытчы ке кыдёке ветлылӥз. Со вакытэ кытчы ке мыныны капчи ӧй вал. Сюрес вылын дыръяз со «шуръёс вылын кышкыт учыръёсы» сюрылӥз но «йырвандӥсьёслэсь... кышкаса улоно» луылӥз. Озьы ик зэмлыклы пумит мынӥсьёс сое кӧня ке пол жугылӥзы (2 Кор. 11:23—27). Вын-агайёс но соослы юрттыны сюлмысь тыршемзэ котьку ик ӧз дунъялэ (2 Кор. 10:10; Флп. 4:15).

⁶ Мар юрттӥз Павеллы юн луыны? Священной Гожтэмез лыдӟыса но Инмарлы ужаса-тыршыса, со тодӥз, кыӵе сямо Иегова. Павел валаз, Инмар сое яратэ шуыса (Рим. 8:38, 39; Еф. 2:4, 5). Со ачиз но Иеговаез туж яратӥз. Павел Инмарлы яратонзэ возьматӥз, «вӧсяськись калыклы ӟеч лэсьтыса» (Евр. 6:10).

7. Мар милемлы юрттэ Иеговаез эшшо но золгес яратыны?

⁷ Ми Инмарез эшшо но золгес яратомы, солэсь Кылзэ мур эскеримы ке. Библиез лыдӟыкуды, валаны тырше, мае вера Иегова сярысь лыдӟем люкет. Юалэ асьтэлэсь: «Кызьы та люкет возьматэ, Иегова монэ яратэ шуыса? Кызьы та кылбуръёс мылкыдме ӝуто Иеговаез яратыны?»

8. Кызьы вӧсяськон юрттэ Инмарез эшшо но золгес яратыны?

⁸ Озьы ик Иеговаез яратонмы юнмалоз, солы котькуд нунал вӧсяськимы ке но шӧдонъёсмы сярысь верамы ке (Пс. 24:4, 5). Нош Иегова вӧсяськонъёсмылы ответ сётылоз (1 Иоанн 3:21, 22). Азиысь Кхан b сузэр вера: «Библиез дышетыса, мон Иеговаез тодӥ но яратӥ. Нош куке мон адӟи, кызьы со вӧсяськонъёсылы ответ сётылэ, мон сое эшшо но золгес яратыны кутски. Мынам мылкыды ӝутскиз Иеговалы котьку но ярамон луыны».

9. Кытысь адӟиське, Тимофей огъя оскисьёссэ эшшо но юнгес яратыны тырше вал шуыса?

⁹ Христиан мурт луэмез бере кӧня ке ар ортчыса, Павел тодматскиз Тимофей нимо туж умой егит пиосмуртэн. Тимофей яратӥз Иеговаез но адямиосты. Со сярысь Филиппы карын улӥсьёслы Павел тазьы гожтӥз: «Мынам ӧвӧл уго мукетыз со кадь тыршисез, тӥ сярысь сокем юн сюлмаськисез» (Флп. 2:20). Татын Павел Тимофеез кыӵе ке ужъёсты радъяны яке умой речьёс вераны быгатэмез понна уг ушъя, дыр. Павелэз туж паймытӥз, луоз, Тимофей огъя оскисьёссэ юн яратэ шуыса. Ми оскиськомы, вын-агайёс но сузэр-апайёс Тимофейлэсь лыктэмзэ туж возьмало вал шуыса (1 Кор. 4:17).

10. Кызьы Анна но солэн картэз яратонзэс возьматӥзы вын-агайёслы но сузэр-апайёслы?

¹⁰ Ми но тыршиськомы вын-агайёсмылы но сузэр-апайёсмылы юрттыны (Евр.  13:16). Тани Анна сузэрлэн учырез, кудӥз сярысь кылем статьяын вераськиз. Кужмо сильтӧл бере соос картэныз ӵош кенешысьтызы одӥг семья доры мынӥзы но адӟизы, корказылэн липетэз куашказ шуыса. Таин сэрен со семьялэн чылкыт дӥськутсы ӧй вал. Анна вера: «Ми соослэсь дӥськутсэс басьтӥмы, миськимы, гладить каримы, умой-умой тыримы но берен вайимы. Милемлы со секыт ӧй вал. Но талы луыса ми туж юн эшъяськимы. Ми али но эшъяськиськомы на». Яратон та кузпалъёслэсь мылкыдзэс ӝутӥз уж вылын юрттыны (1 Иоанн 3:17, 18).

11. а) Мае шӧдо адямиос, куке ми соослы яратонмес возьматӥськомы? б) Мадёнъёсты 19:17 лыдэ басьтыса, мае шӧдэ Иегова, куке ми яратонмес возьматӥськомы?

¹¹ Куке ми адямиослы яратонмес возьматӥськомы но ӟеч ужъёс лэсьтӥськомы, соос адӟозы, дыр, ми Иеговалэсь адӟем карыны тыршиськомы шуыса. Ӟеч ужъёсмы соослэн сюлмазы ик пырозы. Но ми та сярысь ум но тодэ, вылды. Кхан сузэр, кудӥз сярысь ми вераськимы ини, тодаз вае соосты, кинъёс солы юрттӥзы. Со вера: «Мон туж тау карисько дуно сузэръёслы, кудъёсыз монэн тодытӥзы. Соос мон доры лыктылӥзы, кытын ке сиськыны ӧтьылӥзы но берен дорам вайылӥзы. Табере мон валасько, соос туж тыршизы шуыса. Ваньзэ тае соос яратыса лэсьтӥзы». Валамон, ваньзы ӟеч ужъёсмы понна милемлы тау уз шуэ. Тани мар вера Кхан соос сярысь, кинъёс солы юрттӥзы: «Мынам туж потэ ӟеч ужъёссы понна соослы тау кареме. Но жаляса верано луэ, мон уг тодӥськы, кытын соос али уло. Нош Иегова тодэ. Соин ик мон вӧсяськисько, мон интые, Иегова соосты тау мед кароз шуыса». Кхан туж кулэ малпанэз вераз: Иегова адӟе котькуд  ӟеч ужмес, со туж пичи ке но. Со сое дунъя но аслаз пунэм тыронэныз лыдъя. (Лыдӟе Мадёнъёсты 19:17.)

12. Кызьы агайёс кенешлы яратонзэс возьматыны быгато? (Озьы ик учке суредэз.)

¹² Тон агай ке, кызьы тон быгатӥськод мукетъёсызлы яратондэ возьматыны но соослы юрттыны? Огпол Джо́рдан нимо егит агай тӧролы вераз, кенеш понна тросгес лэсьтэмез потэ шуыса. Тӧро сое ушъяз со понна, мар солэн умой пӧрме ини. Озьы ик куд-ог визь-кенешъёс сётӥз. Кылсярысь, тӧро Джорданлы ӵектӥз Эксэйлык юртэ вазьгес вуылыны но мукетъёссэ пумитаны, кенешлэн пумиськонъёсаз валэктонъёс сётъяны, тодытон понна группаеныз ӵош ялан тодытыны но малпаськыны, кызьы мукетъёсызлы уж вылын юрттыны. Джордан та визь-кенешъёслэсь кылзӥськиз. Со тросэзлы дышетскиз, озьы ик вын-агайёссэ но сузэр-апайёссэ золгес яратыны кутскиз. Джордан валаз: кенешлы юрттӥсь луыса, тон уд кутскиськы, тон азьланьтӥськод мукетъёсызлы юрттыны (1 Тим. 3:8—10, 13).

13. Кызьы яратон юрттӥз Кристианлы нош ик тӧро луыны?

¹³ Нош мар кароно, тон кенешлы юрттӥсь яке тӧро луыса ужамысь-тыршемысь дугдӥд ке? Иегова уг вунэты тынэсьтыд ужъёстэ но яратондэ, кудӥз тынэсьтыд мылкыддэ ӝутэ вал ӟеч ужъёс лэсьтыны (1 Кор. 15:58). Инмар адӟе, тон али но яратондэ возьматӥськод шуыса. Куке Кри́стиан агай дугдӥз тӧро луыса ужамысь-тыршемысь, солэн мылкыдыз туж куашказ. Озьы ке но со вера: «Мон ужпум кутӥ азьланяз но Иеговалы ужаны-тыршыны но лэсьтыны ваньзэ, мае быгатӥсько, тӧро-а мон, ӧвӧл-а». Дыр ортчыса, Кристиан  нош ик тӧро луиз. Со вера: «Нырысь мон ӧжыт сюлмаськисько вал. Но собере мон малпай: Иегова гажам-жаляменыз мыным нош ик тӧро луыны лэзиз бере, мынам пӧрмоз, малы ке шуоно мон сое но огъя оскисьёсме яратӥсько».

14. Малы тӥледыз дышето Грузиысь сузэрлэн кылъёсыз?

¹⁴ Иеговалэн ужась-тыршисьёсыз матысь адямиоссылы но яратонзэс возьмато (Матф. 22:37—39). Кылсярысь, Грузиысь Елена вера: «Нырысь мон тодытӥ Иеговаез яратэменым гинэ. Но куке мон инмысь Атайме золгес яратӥ, мон адямиосты но золгес яратыны кутски. Мон тырши син азям пуктыны, кыӵе шуг-секытъёсын соос пумиськыло но мар сярысь соослэн вераськемзы потэ. Та сярысь тросгес малпаськыса, мынам эшшо но золгес потэ вал соослы юрттэме» (Рим. 10:13—15).

15, 16. Учке суредэз. Кыӵе бакель каронъёс возьмало соосты, кинъёс мукетъёсызлы яратонзэс возьмато?

¹⁵ Куке ми вын-агайёсмылы но сузэр-апайёсмылы яратонмес возьматӥськомы, соос гинэ пайда уг басьто. COVID-19 пандемия дыръя Пао́ло агай но солэн кышноез трос арлыдо сузэръёслы юрттӥзы электрон тӥрлыкъёсын ужаны, соосты кутыса, тодытон понна. Кылсярысь, одӥг сузэрлы нырысь планшетэн ужаны секыт вал. Но та кузпалъёслэн юрттэменызы солэн пӧрмиз. Талы луыса со быгатӥз Ӝытанэ аслэсьтыз  ӵыжы-выжыоссэ ӧтьыны. Соос пӧлысь 60 адями Ӝытанэз видеосвязь пыр учкиз! Паоло агайлэн но кышноезлэн тыршемзы пайда вайиз сузэрлы но, солэн ӵыжы-выжыосызлы но. Берлогес сузэр агаймылы гожтӥз: «Тау, милемыз, арлыдоосыз, дышетэмды понна. Мон ноку уг вунэты Иеговалэсь но тӥлесьтыд тыршемдэс!»

¹⁶ Та учырлы луыса Паоло агай валаз, тодон-валанъёсын но быгатонлыкъёсын ӵошатыса, яратон трослы кулэгес шуыса. Со вера: «Азьвыл мон ёросэз чаклась луыса ужай-тырши. Мон малпасько, агайёс но сузэръёс речьёсме вунэтӥзы ини шуыса. Но мон тодӥсько, соос ӧз вунэтэ ӟеч ужъёсме, кудъёссэ мон соос понна лэсьтӥ».

17. Кин эшшо пайда басьтоз, куке ми мукетъёсызлы яратонмес возьматӥськомы?

¹⁷ Куддыръя ми ум но валаське, кыӵе пайда асьмеос басьтомы, мукетъёсызлы юрттыса. Выль Зеландиысь Джо́натан агай тае ас вылаз шӧдӥз. Огпол кӧснуналэ со адӟиз пионерез, кудӥз пӧсь куазен сюрес дурын огназ тодытӥз. Джонатан ужпум кутӥз вуоно кӧснуналысен соин ӵош тодытыны. Со ӧз но малпа, ӟеч ужез солы аслыз юрттоз шуыса. Агай вера: «Соку тодытыны мон туж ик ӧй яраты. Но куке мон кылӥ, кызьы та пионер мукетъёсты дышетэ, но адӟи, кыӵе пайда вае солэн ужан-тыршонэз, мон тодытон ужез яратыны кутски. Со сяна, мон эшъяськи туж умой адямиен, кудӥз юрттӥз мыным осконме юнматыны, ужан-тыршонэз яратыны но Иеговалы матэгес кариськыны».

18. Мае возьма милесьтым Иегова?

¹⁸ Иеговалэн потэ, ми сое но мукетъёссэ эшшо но золгес мед яратомы шуыса. Кызьы ми тодӥмы, Иеговаез яратонмы юнгес луоз, куке ми солэсь Кылзэ лыдӟомы, со вылын малпаськомы но ӵем вӧсяськомы. Нош вын-агайёсмес но сузэр-апайёсмес яратонмы юнмалоз, куке ми соослы уж вылын юрттомы. Соку Иеговаен но духовной семьяенымы кусыпъёсмы юнмалозы но ноку уз сӧриське!