ЭСКЕРОН ПОННА СТАТЬЯ 32
Иеговалэсь адӟем каре — валасесь луэ
«Вань адямиос мед адӟозы, тӥ валасесь шуыса» (ФЛП. 4:5, ВД).
89-ТӤ КЫРӞАН Кылзӥськемед бакель ваёз
ТА СТАТЬЯЫН a
Кыӵе писпулы тӥляд кельшемды потэ? (Учке 1-тӥ абзацез.)
1. Маин христиан мурт писпулы тупа? (Озьы ик учке суредэз.)
«НЯКЫРЪЯСЬКИСЬ писпуэз тӧл уз чигты». Та кылъёс возьмато, мар юрттэ писпулы юн сылыны,— со някыръяськон. Христиан муртлы но, юн осконэн улон понна, някыръяськыны кулэ. Мар сярысь татын вераське? Валась луоно — улонысь воштӥськонъёслы тупатсконо но мукет адямиослэсь учконъёссэс но кутэм ужпумъёссэс гажано.
2. Кыӵе сямъёс юрттозы милемлы воштӥськонъёслы тупатскыны но мае ми эскеромы та статьяын?
2 Ми Иеговалы ужаськомы-тыршиськомы бере, милям потэ валасесь луэммы. Со сяна, милям потэ зӥбыт-востэмесь но гажась-жалясесь луэммы. Та статьяысь ми тодомы, кызьы та сямъёс юрттӥзы куд-ог христианъёслы воштӥськонъёслы тупатскыны. Озьы ик ми тодомы, кызьы та сямъёс милемлы юрттозы. Но нырысь ми эскеромы, кызьы Иегова но Иисус валась луэмзэс возьмато но кызьы ми соослэсь адӟем карыны быгатӥськомы.
ИЕГОВА НО ИИСУС ВАЛАСЬ ЛУЭМЗЭС ВОЗЬМАТО
3. Кытысь адӟиське, Иегова валась луэмзэ возьматэ шуыса?
3 Иегова «Изгурезь» шуыса нимамын, малы ке шуоно со туж юн (К. Зак. 32:4). Со дыре ик Инмар валась луэмзэ возьматэ. Та дуннеын югдур ялан вошъяське. Но Инмар, аслэсьтыз эриксэ быдэстон понна, кылдэм югдурлы соку ик тупатскыны дась. Иегова адямиосты аслыз укшатыса кылдытӥз. Соин ик ми быгатӥськомы воштӥськонъёслы тупатскыны. Со сяна, Библиын со сётӥз милемлы валамон возетъёсты, кудъёсыз юртто милемлы шонер ужпумъёс кутыны, кыӵе гинэ шуг-секытъёсын ми медам пумиське. Иеговалэн ассэ воземез но солэн возетъёсыз возьмато, со изгурезь кадь юн ке но, со валась луэмзэ возьматэ шуыса.
4. Вералэ, кызьы Иегова валась луэмзэ возьматӥз (Левит 5:7, 11).
4 Иегова котьку шонер но визьмо ужпумъёс кутэ. Адямиосын со ассэ лек уг возьы. Израиль калыклы но Иегова валась луэмзэ возьматӥз. Со ӧз куры, узыръёс но, куанеръёс но одӥг кадь курбонъёс мед вайылозы шуыса. Котькуд адямилэсь югдурзэ лыдэ басьтыса, куддыръя со лэзиз адямиослы пӧртэм курбонъёс вайылыны. (Лыдӟе Левитэз 5:7, 11.)
5. Вералэ, кызьы Иегова зӥбыт-востэм но гажась-жалясь луэмзэ возьматылӥз.
5 Иегова валась луэмзэ возьматэ, малы ке шуоно со зӥбыт-востэм но гажась-жалясь. Кылсярысь, Иегова зӥбыт-востэм луэмзэ возьматӥз, куке Содомын лек улӥсьёсты быдтыны малпа вал. Кылчинъёс пыр Иегова шонерлыко Лотэз косӥз гурезьёсы пегӟыны. Но Лот кышказ. Со Иеговаез туж куриз лэзьыны солы но семьяезлы Сӥгоре кошкыны. Нош Иегова та пичи карез но быдтыны малпа вал. Иегова Лотэз косыны быгатэ вал аслаз кивалтэтэзлэсь кылзӥськыны. Но Инмар Лотлэсь куронзэ быдэстӥз но Сӥгорез ӧз быдты (Ул.-выл. 19:18—22). Кӧня ке сю аръёс ортчыса, Иегова Ниневияын улӥсьёсты гажаз-жаляз. Инмар Иона пророкез ыстӥз ялыны, та кар но отын улӥсьёс быдтэмын луозы шуыса. Но Ниневияын улӥсьёс ӧпкелизы. Соин ик Иегова соосты гажаз-жаляз но карзэс ӧз быдты (Иона 3:1, 10; 4:10, 11).
6. Вералэ, кызьы Иисус Иеговалэсь валась луэмзэ адӟем кариз.
6 Иисус, Атаез сямен, валась луэмзэ возьматӥз. Иегова Иисусэз музъем вылэ ыстӥз «Израиль юртлэн бырем ыжъёсыз доры гинэ». Но, та ужзэ быдэстыкуз, Иисус валась луэмзэ возьматӥз. Огпол мукет калыкысь кышномурт сое туж куриз бурмытыны нылзэ, кудӥз пушкын трос периос вал но кудӥз туж курадӟыса улӥз. Иисус та кышномуртэз гажаз-жаляз но нылзэ бурмытӥз (Матф. 15:21—28). Тани мукет учыр. Апостолъёссэ дышетыкуз, Иисус шуиз: «Кин калык азьын Мынэсьтым куштӥськиз ке, солэсь Мон но... куштӥсько» (Матф. 10:33). Но куштӥськиз-а Иисус Пётрлэсь, кудӥз куинь пол вераз, сое уг тоды шуыса? Ӧз. Иисус апостоллэсь ӧпкелемзэ но юн осконзэ адӟиз. Улӟемез бере Иисус Пётрлы возьматскиз но сое оскытӥз, дыр, сое яратэ но простить каре шуыса (Лука 24:33, 34).
7. Кыӵе адями милям луэммы потэ мукетъёсызлэн син азязы? (Филиппыослы 4:5, ВД).
7 Кызьы ми адӟимы, Иегова но Иисус валась луэмзэс возьмато. Нош мар вераны луоз ми сярысь? Иеговалэн потэ, ми но валасесь мед луомы шуыса. Библиын гожтэмын: «Вань адямиос мед адӟозы, тӥ валасесь шуыса» (Флп. 4:5, ВД). Аслэсьтыд юаны луоз: «Малпало-а адямиос, мон валась луыны тыршисько, асме лякыт возисько но мукетъёсызлэсь малпанъёссэс лыдэ басьтӥсько шуыса? Яке мукетъёсызлэн малпамзыя, мон ваменэс, лек но чурыт адями? Потэ-а мынам, ваньмыз монъя гинэ мед луоз шуыса? Яке мон мукетъёсты кылзӥсько но, луэ ке, соослэсь малпанъёссэс лыдэ басьтӥсько?» Ми валасесь луимы ке, соку Иеговалы но Иисуслы кельшомы. Ойдолэ эскеромы кык удысъёсты, кудъёсаз милемлы валасесь луоно: куке югдурмы воштӥське но куке адямиослэн учконъёссы но кутэм ужпумъёссы милям учконъёсмылэсь но кутэм ужпумъёсмылэсь пӧртэм луо.
ВАЛАСЕСЬ ЛУЭ, ЮГДУРДЫ ВОШТӤСЬКЫКУ
8. Мар юрттоз милемлы валасесь луыны, югдурмы воштӥськыку? (Озьы ик учке сноскаез.)
8 Ми валась луэммес возьматомы, воштӥськем югдурлы тупатскыны тыршимы ке. Сыӵе воштӥськонъёсын сэрен малпамтэ шорысь шуг-секытъёс кылдыны быгато. Кылсярысь, тазалыкмы уродмыны быгатэ. Нош коньдонэн яке политикаен герӟаськем бугыръяськонъёсын сэрен улонмы чылкак мукет луыны быгатэ (Екк. 9:11; 1 Кор. 7:31). Озьы ик секыт луэ, куке Иеговалэн организацияз мукет ужъёсты быдэсъяно яке мукет интыын ужано-тыршоно луэ. Кыӵе гинэ шуг-секытъёсын ми медам пумиське, милемлы юрттозы ньыль вамышъёс: 1) валалэ, югдурды воштӥськиз шуыса, 2) азьлань учке, 3) умойзэ адӟыны тырше, 4) мукетъёсызлы юрттэ b. Ойдолэ эскеромы, кызьы та визь-кенешъёс агайёсмылы но сузэръёсмылы юрттӥзы.
9. Мар каризы одӥг кузпалъёс, кудъёсыз миссионеръёс луыса ужало-тыршо, малпамтэ шорысь кылдэм шуг-секытъёссы пыр потон понна?
9 Валаны тырше, югдурды воштӥськиз шуыса. Эмануэ́ле агаез но Франче́ска сузэрез кунгож сьӧры миссионеръёс луыса ужаны-тыршыны ыстӥзы. Выль кылэз дышетыны кутскемзы бере но кенешен тодматскемзы бере ик, COVID-19 пандемия кутскиз но соослы мукетъёсызлэсь палэнын возиськоно луиз. Собере шӧдтэк шорысь Франческа сузэрлэн анаез кулӥз. Солэн туж потэ вал со секыт дыре ӵыжы-выжыосыз вӧзын луэмез, но пандемия сэрен со соос доры мыныны ӧз быгаты. Мар юрттӥз солы со секыт дыре юн луыны? Нырысетӥез, та кузпалъёс вӧсяськизы визьлык сярысь, мултэс медаз сюлмаське но шуг-секытсэс сэрттыны-пертчыны мед быгатозы шуыса. Иегова вӧсяськонъёссылы дырыз дыръя ответ сётӥз аслаз организациез пыр. Кылсярысь, соосты туж юнматӥзы агайлэн кылъёсыз, кудӥз сярысь видеороликын возьматэмын вал. Со агай шуиз: «Выль югдуръёсмылы ӝоггес тупатскимы ке, соку шумпотон ӝоггес лыктоз но выль югдуръёсмы пайда ваёзы» c. Кыкетӥез, соос ужпум кутӥзы дышетскыны телефон пыр умойгес тодытыны но кутскизы одӥг адямиен Библиез дышетыны. Куинетӥез, та кузпалъёс дунъязы кенешысьтызы вын-агайёслэсь но сузэр-апайёслэсь юрттэмзэс. Одӥг сюлмаськись сузэр быдэс ар ӵоже котькуд нунал соослы Библиысь вакчиесь малпанъёс ыстылӥз. Ми но, та миссионеръёс сямен, выль югдуръёсмылы тупатскыны тыршимы ке, соку шумпотомы солы, мае лэсьтыны быгатӥськомы.
10. Кызьы одӥг сузэр улонысьтыз бадӟым воштӥськонлы тупатскиз?
10 Азьлань учке но умойзэ адӟыны тырше. Румын калыкысь Кристина сузэр али Япониын улэ. Солэн мылкыдыз туж куашказ, куке агайёс шуизы, англи кенеш, кудаз со ветлэ вал, уз луы ини шуыса. Но Кристина ӝожомыса ӧз улы. Со ужпум кутӥз япон кенеше ветлыны но ӟырдыт мылкыдын тодытон уже пыриськыны. Кристина куриз кышномуртэз, кудӥныз ӵош со азьвыл ужа вал, юрттыны солы япон кылэз дышетыны. Кышномурт соглаш кариськиз. Соос япон кылэз дышетӥзы, Библиез но «Пумтэм вапумъёс ӵоже шумпотыса улэ!» брошюраез кутыса. Та туж бадӟым пайда ваиз. Кристина япон кылэз дышетӥз, нош самой валтӥсез — кышномурт зэмлыкен тунсыкъяськыны кутскиз. Ми азьлань учкиськомы ке но умойзэ адӟыны тыршиськомы ке, соку малпамтэ шорысь кылдэм воштӥськонъёс трос бакель каронъёс вайыны быгато.
11. Мар каризы одӥг кузпалъёс, коньдонэн герӟаськем шуг-секытъёссы пыр потон понна?
11 Мукетъёсызлы юрттэ. Одӥг кузпалъёс уло шаерын, кытын кивалтӥсьёс ужмес нуыны уг лэзё. Куке шаеразы экономика куашказ, соослэн коньдонэн герӟаськем шуг-секытъёссы кылдӥзы. Мар юрттӥз соослы выль югдурлы тупатскыны? Нырысь, соос тыршизы коньдонзэс ӧжытгес быдтыны. Со сяна, соос шуг-секытъёссы сярысь гинэ малпаса ӧз улэ. Соос мукетъёсызлы но юрттӥзы ӟырдыт мылкыдын тодытыны (Ап. уж. 20:35). Картэз вера: «Ми трос ужамы-тыршимы, трос дырмес Иеговалэн ужъёсызлы сӥзимы. Соин ик асьмеды жаляса улыны дырмы ӧй вал». Югдуръёсмы воштӥсько ке, милемлы азьланяз но тыршоно мукетъёсызлы юрттыны. Нош самой умоез, мае ми карыны быгатӥськомы,— адямиослы Эксэйлык сярысь ӟеч иворез вераны.
12. Кызьы апостол Павеллэн примерез юрттоз милемлы ужан-тыршонын валасесь луыны?
12 Эксэйлык сярысь иворез вӧлмытыкумы, милемлы валасесь луоно. Ми пумитаськомы адямиосты, кудъёсыз пӧртэм сямен малпасько, пӧртэм калыкъёсысь потэмын но улон шоры пӧртэм сямен учко. Апостол Павел адямиосъя тупатскыны быгатӥз. Милям солэсь адӟем кареммы луэ. Иисус Павелэз «язычникъёслэн апостолзы» карыса пуктӥз (Рим. 11:13). Павел та ужзэ умой быдэсъяз. Со тодытӥз еврейёслы, со дыре ик грекъёслы, дышетскемъёслы, огшоры адямиослы, кивалтӥсьёслы но эксэйёслы. Котькуд адямилэсь сюлэмзэ вырӟытон понна, Павел «ваньмыз азьын ваньмыз кадь ик» кариськылӥз (1 Кор. 9:19—23). Со лыдэ басьтӥз, кыӵе калыкысь адямиос потэмын, кызьы соос будэтэмын, малы соос оско. Ваньмыз та юрттӥз солы адямиосты Инмар пала берыктыны. Милям но ужан-тыршонмы тросгес пайда ваёз, ми валаны тыршимы ке, кызьы котькуд адямилы юрттоно.
МУКЕТЪЁСЫЗЛЭСЬ УЧКОНЗЭС ГАЖАЛЭ
Ми валась луэммес возьматомы, мукетъёсызлэсь учконъёссэс гажамы ке (Учке 13-тӥ абзацез.)
13. Ми мукетъёсызлэсь учконзэс гажамы ке, кыӵе кышкытлыклэсь палэнскомы, кудӥз сярысь вераське 1 Коринфъёслы 8:9?
13 Ми валась луэммес возьматомы, куке мукетъёсызлэсь учконзэс гажаломы. Кылсярысь, куд-ог сузэръёслы буяськыны кельше, нош мукетъёсызлы уг кельшы. Куд-ог христианъёслы кӧня ке вина юыны кельше, нош мукетъёсыз ужпум кутӥзы воксё юытэк улыны. Вань христианъёслэн тазалыко луэмзы потэ, но ваньзы пӧртэм сямен эмъясько. Ми малпамы ке, ми гинэ шонер эмъяськиськомы шуыса, но мукетъёсты озьы ик эмъяськыны косӥмы ке, соин сэрен вын-агайёс но сузэр-апайёс канжаськыны быгатозы но валамтэос кылдозы. Валамон, милям уг поты, озьы мед луоз шуыса (лыдӟе 1 Коринфъёслы 8:9; 10:23, 24). Ойдолэ эскеромы кык удысъёсты, кудъёсаз Библиысь возетъёс юрттозы милемлы зарни шорзэ шедьтыны но тупаса улыны.
Ми валась луэммес возьматомы, мукетъёсызлэсь учконъёссэс гажамы ке (Учке 14-тӥ абзацез.)
14. Кызьы Библиысь возетъёс юртто валаны, кыӵеесь луыны кулэ дӥськутмы но вылтусмы?
14 Дӥськут но вылтус. Иегова пыр-поч уг вера, кызьы дӥсяськыны яра, нош кызьы — уг яра. Со интые, со милемлы возетъёс сётэ. Милемлы Инмарлэн ужась-тыршисьёсыз кадь дӥсяськоно — зӥбыт-востэм но визьмо луэммы адӟиськыны кулэ (1 Пётр 3:3; 1 Тим. 2:9, 10). Милям уг поты, адямиос милемлы укыр трос саклыксэс мед висъялозы шуыса. Библиысь возетъёс тӧроослы но юртто дӥськут но вылтус пумысен курон-косонъёс пуктылытэк улыны. Одӥг кенешын егит агайёс туала сямен ӵышкиськизы: вакчи но ӝикыттэм. Кызьы тӧроос соослы юрттӥзы, курон-косонъёс пуктылытэк? Соос уже кутӥзы ёросэз чакласьлэсь визь-кенешсэ. Со шуиз: «Вералэ та егит агайёслы: „Сцена вылысен мае ке веракуды, адямиос, кылъёстылы интые, вылтустылы тросгес саклыксэс висъяло ке, соку дӥськутэныды но вылтусыныды мар ке но кароно ӧвӧл-а?“». Та юрттӥз егит агайёслы валаны, мар соослы кароно, нош тӧроослы курон-косонъёс пуктоно ӧз луы d.
Ми валась луэммес возьматомы, мукетъёсызлэсь учконъёссэс гажамы ке (Учке 15-тӥ абзацез.)
15. Библиысь кыӵе законъёсты но возетъёсты лыдэ басьтоно, эмъяськон амалъёсты бырйыку? (Римъёслы 14:5).
15 Тазалык. Котькуд христиан мурт ачиз быръе, кызьы солы эмъяськоно (Гал. 6:5). Библиын вань кӧня ке законъёс гинэ, кудъёсыз эмъяськон амалэн герӟаськемын, кылсярысь, вирлэсь но спиритизмлэсь палэнсконо шуыса (Ап. уж. 15:20; Гал. 5:19, 20). Мукет эмъяськон амалъёсты котькудӥз ачиз быръе. Кин ке но эмъяськыны эмъюртэ мынэ, кин ке но мукет амалъёсты быръе. Кыӵе гинэ эмъяськон амалэз ми шонерен медам лыдъялэ, агайёслэсь но сузэръёслэсь учконзэс гажаны кулэ. Эн вунэтэ таӵе малпанъёсты: 1) Инмарлэн Эксэйлыкез гинэ быдэсак но пыраклы адямиосты бурмытыны быгатоз (Ис. 33:24); 2) котькуд христиан мурт ачиз быръе, кызьы солы эмъяськоно (лыдӟе Римъёслы 14:5); 3) мукетъёсты судъяно ӧвӧл яке кылъёсынымы но ужъёсынымы мукетъёсызлэсь осконзэс лябӟытоно ӧвӧл (Рим. 14:13); 4) христианъёс ог-огзэс ярато но кенешын огкылысь улонэз асьсэлэн учконъёссылэсь вылӥегес пукто (Рим. 14:15, 19, 20). Ми та малпанъёсты тодамы возимы ке, соку вын-агайёсын но сузэр-апайёсын матысь кусыпъёсмы луозы но кенешмы тупаса улоз.
Ми валась луэммес возьматомы, мукетъёсызлэсь учконъёссэс гажамы ке (Учке 16-тӥ абзацез.)
16. Кызьы тӧро валась луэмзэ возьматоз, куке мукет тӧроосын ӵош кыӵе ке юанъёсты эскере? (Озьы ик учке суредэз.)
16 Тӧроослы адӟем карон возьматоно, кызьы валасесь луоно (1 Тим. 3:2, 3). Кылсярысь, агайлы малпано ӧвӧл, со мукет тӧроослэсь арлыдогес бере, соин котьку но соглаш кариськозы шуыса. Со вала: Иеговалэн духез юрттыны быгатэ шонер ужпум кутыны тӧроослэн кенешазы пырись котькуд агай пыр. Библиысь возетъёс уг тӥясько ке, визьмо тӧро тросэныз шумпотыса соглаш кариськоз, со ачиз мукет сямен малпа ке но.
ВАЛАСЬ ЛУОН ПАЙДА ВАЕ
17. Кыӵе пайда вае валась луон?
17 Валасесь луимы ке, ми трос бакель каронъёс басьтомы. Милям вын-агайёсынымы но сузэр-апайёсынымы умой кусыпъёсмы луозы, нош кенеш тупаса улоз. Ми шумпотомы, ми пӧртэм сямоесь но пӧртэм калыкъёсысь ке но, Иегова милемыз одӥг бадӟым, огкылысь улӥсь семьяе люказ шуыса. Нош самой валтӥсез — милям сюлэммы шумпотоз, ми эшшо но золгес Иегова Инмармылы кельшиськомы шуыса.
90-ТӤ КЫРӞАН Юнматэ ог-огдэс
a Иегова но Иисус валась луэмзэс возьмато. Соослэн потэ, ми но соослэсь адӟем мед каромы шуыса. Ми асьмеды озьы возимы ке, милемлы капчигес луоз тупатскыны, куке улонамы воштӥськонъёс кылдо, кылсярысь, висьыны кутскыкумы яке коньдонэн герӟаськем шуг-секытъёс дыръя. Озьы ик ми валасесь луимы ке, милемлы капчигес луоз кенешын мукетъёсыныз тупаса но огкылысь улыны.
b Учке 2016-тӥ ар понна поттэм «Сайкалэ!» журналысь (№ 4) «Как относиться к изменениям в жизни» статьяез.
c Та видеоез учкон понна, пыре jw.org сайтэ но утчан чуре гожтэ «интервью с Дмитрием Михайловым».
d Дӥськут но вылтус сярысь тросгес тодыны луэ «Пумтэм вапумъёс ӵоже шумпотыса улэ!» книгаысь, 52-тӥ урокысь.