Атае Канадалэн Огазеяськем черказ тӧро вал. Соин ик котькуд арня нуналэ ӵукна со монэ но сузэрме черкысь школае келя вал. Собере дас одӥг часын ми соин ӵош черкысь службае мынӥськомы вал. Нош нуназе бере ми анаенымы ӵош Эксэйлык юртэ ветлӥмы. Ми туж умой адӟимы та кык религиослэсь пӧртэмлыксэс.

Анае выль осконэз сярысь вераз умой эшъёсызлы, Бо́б но Мэ́рион Ха́тчесон кузпалъёслы. Соос но Адӟись-Ивортӥсьёс луизы. 1958-тӥ арын Хатчесон кузпалъёс куинь пиосынызы ӵош мынӥзы тямыс нуналъем «Инмарлэн эрикез» калыккуспо конгрессэ, кудӥз Нью-Йоркын ортчытӥськиз. Соос монэ но сьӧразы басьтӥзы. Али мон валасько, ньыль пияшъёсын конгрессэ мыныны капчи ӧй вал шуыса. Но со конгресс улонам бадӟым пытьы кельтӥз.

Быдэ вуытозям, ми семьяеным вордӥмы парсьёсты, ыжъёсты но курегъёсты. Та уж мыным кельше вал. Соин ик мынам дышетскеме потэ вал пудо-животъёсты эмъяны. Анае та сярысь кенешысь тӧролы вераз. Тӧро лякытэн тодам вайытӥз, ми «берпум аръёсы» улӥськомы шуыса (2 Тим. 3:1). Озьы ик со мынэсьтым юаз, кызьы университетын дышетскон Иеговаен кусыпъёсы вылын шӧдӥськоз. Соин ик мон малпай, университетэ уг мыны шуыса.

 Мон весь малпаськыса улӥ, мар мыным кароно школаме йылпумъяме бере. Котькуд шутэтскон нуналъёсы мон тодытон уже пыриськи ке но, та уж мыным уг кельшы вал но мынам пионер луэме уг поты вал. Атае но солэн выныз Адӟись-Ивортӥсьёс ӧй вал. Соос мылкыдме ӝутылӥзы уже интыяськыны Торонтоысь бадӟым страховой компание. Атаелэн выныз отын вылӥ инты басьтэ вал. Соин ик мон соглаш кариськи.

Торонтоын мон трос ужай но трос дырме ортчытъяй Адӟись-Ивортӥсь луисьтэм адямиосын. Соин ик мон кутски кенешлэсь пумиськонъёссэ кельтылыны но шер тодытыны. Нырысь мон улӥ Адӟись-Ивортӥсь луисьтэм песятаеным. Но со кулэм бере мыным выль улон инты утчано луиз.

Хатчесон кузпалъёс, кудъёсыз 1958-тӥ арын монэ конгрессэ сьӧразы нуллӥзы, мыным анай но атай кадь вал. Соос монэ ӧтизы ас доразы улыны но мыным юрттӥзы Иеговаен кусыпъёсме юнматыны. Мон пылатӥськи 1960-тӥ арын Джон пиенызы ӵош. Джон пионер луыса ужаны-тыршыны кутскиз. Со шоры учкыса, мон но тросгес тодытыны кутски. Кенешысь агайёс тае адӟизы но, дыр ортчыса, куризы монэ Инмарлы ужан-тыршон школаез a ортчытъяны.

1966-тӥ арын мон кышно басьтӥ Па́лмер Берг сузэрез. Со ӟырдыт мылкыдын пионер луыса ужаз-тыршиз но мынэмез потэ вал отчы, кытын Адӟись-Ивортӥсьёс ӧжыт вал. Ёросэз чакласьмы милемлы трос саклыксэ висъялляз. Со мылкыдмес ӝутӥз мыныны кенеше, кудӥз интыяськемын вал Ори́ллия карын (Онта́рио провинция). Отын юрттэт кулэ вал. Соин ик ми чемоданъёсмес бичамы но отчы мынӥмы.

Ориллияе вуэммы бере ик, Палмерлэсь ӟырдыт мылкыдын ужам-тыршемзэ адӟыса, мон но пионер луи. Мон вань сюлмысьтым пионер луыса ужай-тырши. Мыным туж кельше вал адямиослы Библиысь кылбуръёсты валэктыны. Куке мон адӟи, кызьы зэмлык соослэсь сюлэмзэс вырӟытэ, мон туж шумпотӥсько вал. Тодӥсько на, кызьы ми одӥг кузпалъёсын Библиез дышетӥмы. Ми туж шумпотӥмы соослы юрттыны улоназы воштӥськонъёс лэсьтыны но Иеговалэн ужась-тыршисьёсыз луыны!

Куке ми Торонтоын вал, мон тодматски А́рнолд Макнама́ра агаен. Со вал агайёс пӧлын, кудъёсыз Вефильын ужез радъязы. Со милесьтым юаз, потэ-а милям нимысьтыз пионеръёс луэммы. Мон соку ик верай: «Туж потэ! Квебеке сяна, ми котькытчы мыныны дась!» Мон озьы малпаськи, малы ке шуоно мыным пыӵаз Канадаысь англи кылын вераськись адямиослэн умойтэм мылкыдзы. Канадаын улӥсьёслы уг кельшы вал, Квебекын француз кылын вераськись адямиос бугыръясько шуыса. Соос кивалтӥсьёслы пумит ӝутскизы. Соослэн потэ вал, Квебек провинция Канадалэсь люкемын мед луоз шуыса.

Арнолд вераз: «Али филиал нимысьтыз пионеръёсты Квебеке гинэ ыстылэ». Тае кылыса, мон соку ик соглаш кариськи. Мон тодӥ, кышноелэн отын ужамез-тыршемез потэ шуыса. Берлогес мон валай, та улонамы тужгес но умоез кутэм ужпум вал шуыса!

Вить арня ӵоже ми ветлӥмы француз кылэз дышетонъя курсъёсы. Собере ми кышноеным но эшшо одӥг кузпалъёс мынӥмы Риму́ски каре. Со интыяськемын Монреальлэсь уйпал но шундыӝужан вискын 540 иськем кемын. Ми француз кылын туж ик умой вераськыны ум быгатӥське на вал. Со тужгес но умой адӟиськиз одӥг пумиськонын, куке мон ялонъёсты лыдӟи. Мыным вераны кулэ вал, конгрессын «Австриысь куноос» трос луозы шуыса. Нош мон аслам француз кылыным верай, «страуслэн куноосыз» лыктозы шуыса.

Римуски карын ми ужамы-тыршимы ньыль бызьымтэ ӟырдыт мылкыдо сузэръёсын, озьы ик Юбердо́ кузпалъёсын, кудъёсызлэн кык нылъёссы вал. Та кузпалъёс пионеръёслы бадӟым корка арендовать каризы. Ми сое «тӧдьы корка» шуыса нимамы, малы ке шуоно солэн колоннаосыз но борддоръёсыз тӧдьыесь вал. Отын 12—14 адямиос улӥзы. Мон но Палмер нимысьтыз пионеръёс вал бере, ми ӵукнаысен ӝытозь тодытӥмы. Соин ик ми туж шумпотӥськомы вал, милемын котьку кин ке но ужаны-тыршыны быгатэ вал шуыса, кезьыт тол ӝытъёсы но.

Та оскымон пионеръёсын милям кусыпъёсмы туж юнмазы. Соос милемлы семья кадь луизы. Куддыръя ми соосын тылскем котырын люкаськылӥмы яке пӧртэм пумо вареникъёсты лэсьтылӥмы. Одӥг агай крезьгурчи вал. Соин ик кӧснуналэ ӝытъёсы ми ӵем дыръя кырӟаськомы но эктӥськомы вал.

Римуски карын тросэзлэн мылкыдзы вал Библиез дышетыны. Вить ар куспын куд-ог адямиос, кудъёсыныз ми Библиез дышетӥмы, пылатӥськизы. Нош кенешын ог 35 ивортӥсьёс луизы.

Квебекын милям трос луонлыкъёсмы вал ужан-тыршон быгатонлыкъёсмес умоятыны. Ми адӟимы, кызьы Иегова милемлы тодытыкумы юрттылӥз но улон понна ваньзэ кулэзэ сётылӥз. Со сяна, ми яратӥмы француз кылын вераськись адямиосты, соослэсь кылзэс но сям-йылолъёссэс. Нош та юрттӥз милемлы мукет калыкъёсты но яратыны (2 Кор. 6:13).

Малпамтэ шорысь филиал милемыз куриз мыныны Тра́кади каре, кудӥз интыяськемын Нью-Бра́нсуик провинцилэн шундыӝужанпалаз. Со туж ик капчи ӧй вал. Ми али гинэ квартираез арендовать карон понна договор гожтӥмы, озьы ик мон ужаны интыяськемын вал школаын, кытын арняяз кӧня ке час дышетӥсь луыса ужай. Со сяна, куд-ог адямиос, кудъёсыныз ми Библиез дышетӥмы, кемалась ӧвӧл ивортӥсьёс луизы. Но та ваньмыз ӧвӧл на. Римуски карын Эксэйлык юрт пуктӥське вал.

Кӧснуналэ но арнянуналэ ми лумбыт вӧсяськимы Тракади каре мынон сярысь. Собере ми отчы  ветлӥмы но адӟимы, та кар Римуски карлэсь туж пӧртэм шуыса. Но ми малпамы: Иегова милемлы отчы мыныны ӵектэ бере, ми мыномы. Ми Иегова вылэ оскиськимы но адӟимы, со сюресмес ӵошкытатӥз шуыса (Мал. 3:10). Азьло кадь ик мукет интые кошкыны туж секыт ӧй вал, малы ке шуоно Палмерлэн Иеговаен юн кусыпъёсыз вал, со ассэ жалятэк ужаз-тыршиз но серекъяны быгатӥз.

Со кенешын одӥг гинэ тӧро вал, Ро́берт Росс агай. Со но Линда кышноез Тракади карын пионеръёс луыса ужазы-тыршизы. Пизы вордӥськем бере но соос отысь ӧз кошке. Соослэн сюлмаськонъёссы трос вал ке но, соос котьку дась вал куно карыны но тодытыны. Та кузпалъёс милемлы умой адӟем карон возьматӥзы.

Тракади карын ми кык ар ӵоже ужамы-тыршимы. Собере милемыз нош ик воштӥськон возьмаз. Монэ куризы ёросэз чаклась луыса ужаны-тыршыны. Сизьым ар ӵоже ми ужамы-тыршимы англи ёросъёсын. Собере милемыз ыстӥзы Квебекысь француз ёросэ. Лео́нс Крепо́ агай b Квебекын улосэз чаклась луыса ужаз-тыршиз. Со котьку но монэ речьёсы понна ушъя вал но юа вал: «Мар тон карыны быгатӥськод, речьёсыд эшшо но тросгес пайда мед ваёзы шуыса?» Солэн юрттэмезлы луыса речьёсы эшшо но пайдаё но валамон луизы.

Мон ноку уг вунэты, кыӵе уж мыным сётӥзы «Вормись оскон» калыккуспо конгрессын. Со ортчытӥськиз 1978-тӥ арын Монреальын. Монэ куризы сюдон ужез радъяны. Ми малпамы, 80 000 адямиос вуозы шуыса. Агайёс веразы, сюдон уж мукет сямен радъямын луоз шуыса. Ваньмыз мукет вал: тӥрлыкъёс, сиён, сиёнэз пӧран амал. Милям вал ог 20 бадӟымесь холодильникъёсмы, кудъёсыз дырын-дырын сӧриськылӥзы. Конгресслэн азьвыл нуналаз, вань тӥрлыкез пуктыны кулэ вал. Но ӵапак со нуналэ спортъя ӵошатскон ортчытӥськиз. Соин ик стадионэ ми уйшор бере гинэ пырыны быгатӥмы. Нош ӵукна куноосты сюдон понна, вань тӥрлык шунды ӝужамлэсь азьло ужаны кулэ вал ини. Ми туж жадимы. Но мон адӟи, агайёс но сузэръёс туж тыршыса ужазы, соослэн осконзы юн но соос серекъяны быгато шуыса. Мон тросэзлы соослэсь дышетски. Куд-огъёсыныз ми али но эшъяськиськомы на. Макем бадӟым шумпотон вайиз Квебекысь конгресс, кытын 40-тӥ но 50-тӥ аръёсы лек уйылон-уллянъёс ортчизы!

 Монреальын ортчись бадӟым конгрессъёс дыръя мон тросэзлы дышетски кылкутӥсь агайёслэсь. Огпол конгресс понна кыл кутӥз Дейвид Сплэйн агай, кудӥз али Кивалтӥсь кенешын ужа-тырше. Мукет дыръя конгресс понна мон кыл кутӥ. Соку Дейвид мыным туж юрттӥз.

Мон кышноеным 36 ар ӵоже ёросэз чаклась луыса ужай-тыршы. Собере 2011-тӥ арын монэ ӧтизы Кенешысь тӧроослы школаез ортчытъяны. Кык ар куспын ми 75 пӧртэм интыосын улӥмы. Но ми со сярысь ум жаляське. Котькуд арнялэн пумаз тӧроос туж тау каризы, малы ке шуоно адӟизы, Кивалтӥсь кенеш соослэсь осконзэс юнматыны туж тырше шуыса.

Собере мон Эксэйлыкез тодытӥсьёслы школаез ортчытъяй. Отын дышетскыны капчи ӧвӧл. Нуналаз сизьым час ӵоже агайёс но сузэръёс урокъёсын дышетско. Собере ӝытъёсы куинь час ӵоже доразы сётэм ужъёссэс быдэсъяло. Со сяна, котькуд арняе ньыль-вить дышетскон ужъёссэс класс азьын возьматъяло. Ми кыкетӥ дышетӥсен соосты оскытӥськомы вал, Иеговалэн юрттэменыз соослэн ваньмыз пӧрмоз шуыса. Дышетскисьёс туж паймо вал, куке быгато вал лэсьтыны ваньзэ, мар нырысь быдэстонтэм потэ вал! Зэм, Иеговаен ваньзэ быдэстыны луэ.

Анае тунсыкъяське вал соосын, кинъёсын Библиез дышетӥз. Та юрттӥз соослы осконзэс юнматыны. Талы луыса атае но зэмлык шоры мукет сямен учкыны кутскиз — со лякытгес луиз. Анаелэн кулэмез бере куинь нунал ортчыса, ми туж паймимы, куке атае Эксэйлык юртэ лыктӥз вань адямиослы дасям речез кылзыны. Собере 26 ар ӵоже со кенешлэн пумиськонъёсаз ветлӥз. Атае ӧз пылатӥськы ке но, тӧроос веразы мыным, со Эксэйлык юртын ортчись вань пумиськонъёсы котькинлэсь азьло вуэ вал шуыса.

Со сяна, анаймы туж умой адӟем карон возьматӥз мыным но куинь сузэръёсылы. Ваньзы соос картъёсынызы ӵош Иеговалы оскымон ужало-тыршо. Кыкез сузэръёсы филиалъёсын тыршо: одӥгез Португалиын, мукетыз Гаитиын.

Али мон но Палмер нимысьтыз пионеръёс луыса ужаськомы-тыршиськомы Га́мильтонын (Онтарио провинция). Ёросэз чаклась луыса ужакум-тыршыкум, милемлы туж кельше вал агайёсын но сузэръёсын ӵош ветлыны соос доры, кинъёслы зэмлык тунсыко потӥз, озьы ик соос доры, кинъёс Библиез дышетӥзы. Нош али ми туж шумпотӥськомы, асьмелэн дышетскисьёсмы Иеговаен кусыпъёссэс юнмато шуыса. Выль кенешамы ми агайёсын но сузэръёсын эшъяськимы. Ми туж шумпотӥськомы, Иегова умой но, секыт но дыръёсы милемыз уг кельты шуыса.

Ми туж тау карыса тодамы вайылӥськомы трос вын-агайёсты но сузэр-апайёсты, кудъёсыз милемын тунсыкъяськизы. Ми асьмеос но туж тыршимы мукетъёсыз сярысь сюлмаськыны но соослы юрттыны вань сюлмысьтызы Иеговалы ужаны-тыршыны (2 Кор. 7:6, 7). Кылсярысь, одӥг семьяын анайзы, пизы но нылзы, вань дырзэс сётыса, Иеговалы ужазы-тыршизы. Мон атайзылэсь юай, солэн но пионер луэмез уг поты-а шуыса. Со шуиз, куинь пионеръёс сярысь сюлмаське шуыса. Соку мон солэсь юай: «Тон соос сярысь Иеговалэсь умойгес сюлмаськыны быгатод-а?» Мон солы верай, со но пионер луиз ке, семьяез кадь ик шумпотон басьтоз шуыса. Ӝыны ар ортчыса, атайзы пионер луиз.

Милям Палмерен азьланяз но потэ егит агайёслы но сузэръёслы Иеговалэн «паймымон ужъёсыз» сярысь вераммы (Пс. 70:17, 18). Ми оскиськомы, соос но, ми кадь ик, Иеговалы шумпотыса ужалозы-тыршозы шуыса.