1, 2. Малы христиан муртэ туж ӝужыт коркаен ӵошатыны луэ? (1 Коринфъёслы 15:58).

 ТОКИО карын 1970-тӥ аръёслэн пумазы 60 этажъем корка пуктӥзы. Адямиос паймо вал, уз куашка-а со музъемзурканъёс дыръя, кудъёсыз отын туж ӵем луыло. Малы та корка ӧз куашка? Инженеръёслэн тыршемзылы луыса со юн но со дыре ик някырес вал. Соин ик со быгатӥз музъемзурканъёсты чиданы. Христианъёсты таӵе коркаен ӵошатыны луэ. Малы?

² Христиан муртлы та удысын зарни шорзэ шедьтоно. Солы юн луоно, куке вераськон мынэ Иеговалэн катъёсыз но эсэпъёсыз сярысь. (Лыдӟе 1 Коринфъёслы 15:58.) Номыр шоры учкытэк, со кылзӥськыны тырше. Со дыре ик, солы валась луоно, яке кулэ дыръяз тупатскыны тыршоно (Иак. 3:17). Христиан мурт та удысын зарни шорзэ шедьтӥз ке, соку со укыр юн но, укыр ляб но уз луы. Та статьяын нырысь ми вераськомы со сярысь, кызьы юн луоно. Собере эскеромы вить амалъёсты, кудъёсыныз Шайтан тырше милемыз Иеговалэсь палэнтыны. Озьы ик тодомы, мар кароно, Шайтанлы медам сётске шуыса.

3. Иеговалэн кыӵе куронъёсыз гожтэмын Апостолъёслэн ужъёсазы 15:28, 29?

³ Иегова, Закон Сётӥсь, котькинлэсь вылӥ но аслаз калыкезлы котьку валамон курон-косонъёс сётылӥз (Ис.  33:22). Кылсярысь, нырысетӥ даурысь кивалтӥсь кенеш саклыксэ висъяз куинь удысъёслы, кудъёсаз христианъёслы юн луоно. Милемлы кулэ: 1) сульдэр-идолъёслы йыбыртъянлэсь палэнскыны но Иеговалы гинэ ужаны-тыршыны, 2) вирез святоен лыдъяны но 3) Иеговалэн вылӥ эсэпъёсызъя улыны. (Лыдӟе Апостолъёслэсь ужъёссэс 15:28, 29.) Кызьы христианъёс та куинь удысъёсын юн луыны быгато?

4. Кызьы возьматоно Иеговалы гинэ оскымон луэммес? (Усьтӥськон 4:11).

⁴ Ми сульдэр-идолъёслы ум йыбыртъяське но Иеговалы гинэ ужаськомы-тыршиськомы. Инмар косӥз израиль калыкез солы гинэ оскымон луыны (К. Зак. 5:6—10). Инмарлэн Пиез но, куке Шайтан солэсь визьзэ сыназ, валамон возьматӥз, ми Иеговалы гинэ ужаны-тыршыны кулэ шуыса (Матф. 4:8—10). Соин ик ми сульдэр-идолъёслы ум йыбыртъяське. Озьы ик ми адямиосты, кылсярысь, религиозной кивалтӥсьёсты, кузёосты, спортсменъёсты яке мукет нимо-дано адямиосты, инмаръёсын ум лыдъяське. Ми йыбыртъяськомы Иеговалы гинэ, кудӥз ваньзэ кылдытӥз. (Лыдӟе Усьтӥськонэз 4:11.)

5. Малы ми улонэз но вирез святоен лыдъяськомы?

⁵ Иеговалэн косэмезъя, ми улонэз но вирез святоен лыдъяськомы. Малы? Малы ке шуоно вир — со улон, Инмарлэн дуно кузьымез (Лев. 17:14). Куке Иегова адямиослы нырысетӥзэ лэзиз сӥлез сиыны, со ӧз лэзьы вирез сиыны (Ул.-выл. 9:4). Инмар та сярысь эшшо одӥг пол вераз, куке израиль калыклы Моисей пыр Закон сётӥз (Лев. 17:10). Озьы ик Иегова нырысетӥ даурын кивалтӥсь кенешлэсь мылкыдзэ ӝутӥз вань христианъёслы таӵе курон-косон сётыны: «Куштӥськелэ... вирез сиемысь» (Ап. уж. 15:28, 29). Ми та курон-косонлэсь кылзӥськиськомы, куке эмъяськон амалэз бырйиськомы b.

6. Мар кароно, Иеговалэн вылӥ эсэпъёсызъя улон понна?

⁶ Мы улӥськомы Иеговалэн вылӥ эсэпъёсызъя (Евр. 13:4). Апостол Павел милесьтым мылкыдмес ӝутэ кырсь мылпотонъёсмылэсь куштӥськыны. Ми ум учкиське но ум лэсьтӥське сое, мар азон-калгон сьӧлыке вуттыны быгатэ (Иов 31:1; Кол. 3:5). Мае ке уродзэ лэсьтыны мылкыдмы ӝутске ке, ми соку ик палэнтӥськомы малпанъёсты яке ужъёсты, кудъёсыз Инмарен кусыпъёсмес сӧрыны быгато.

7. Кыӵе мылкыдмы милям луыны кулэ но малы?

⁷ Иегова возьма, ми солэсь вань сюлмысьтымы кылзӥськомы шуыса (Рим. 6:17). Ми ум быгатӥське бырйыны, кыӵе законъёсызлэсь кылзӥськоно, нош кыӵеосызлэсь — ӧвӧл. Тодамы возёно, Иеговалэн вань курон-косонъёсыз милемлы пайда ваё шуыса (Ис. 48:17, 18; 1 Кор. 6:9, 10). Ми туж тыршиськомы Иеговаез шумпоттыны но улыны сыӵе ик мылкыдын, кыӵе вал псаломъёсты гожъясьлэн: «Пумозяз, пумтэм вапумъёс ӵоже законъёстэ быдэсъян пала сюлэмме берыктӥ» (Пс. 118:112). Нош Шайтан туж тырше, ми Иеговалэсь медам кылзӥське шуыса. Кыӵе амалъёсты со кутэ?

8. Кызьы Шайтан уйылон-уллянъёс пыр Иегова палан юн сылыны мылкыдмес лябӟытыны тырше?

⁸ Уйылон-уллянъёс. Иегова палан юн сылыны мылкыдмес лябӟытон понна, Шайтан ми вылэ урдскылэ но милемыз зӥбе. Солэн ужпумез — милемыз «ньылыны», Иеговаен кусыпъёсмы мед сӧриськозы шуыса  (1 Пётр 5:8). Нырысетӥ даурын христианъёсты кышкатылӥзы, жугылӥзы, озьы ик виылӥзы но, асьсэды шонер возьыны юн мылкыдзы понна (Ап. уж. 5:27, 28, 40; 7:54—60). Шайтан али но Инмарлэсь калыксэ уйылэ-улля. Тае адӟыны луэ Россиын но куд-ог мукет шаеръёсын. Зэмзэ вераса, Инмарлэн ужась-тыршисьёсыз пӧлысь ваньзы пӧртэм пумо уйылон-уллянъёсын пумиськыло.

9. Малы милемлы лушкем зӥбемлы дась луоно? Вералэ пример.

⁹ Лушкем зӥбон. Уйылэм-уллям сяна, Шайтан лушкемен но зӥбе. Соин ик милемлы солэн «кескич ужъёсыз» сярысь тодыны кулэ (Еф. 6:11). Тани Ро́берт агайлэн учырез, кудӥзлы секыт операция лэсьтоно вал. Эмъюртын эмъясьёслы со вераз, кыӵе гинэ учыр медам кылды, солы вир лэзёно ӧвӧл шуыса. Хирург солэн быръёнэз шоры гажаса учкиз. Но операция лэсьтон азьын ӝытазе, куке Робертлэн ӵыжы-выжыосыз доразы бертӥзы, со доры палатае анестезиолог пыриз. Со Робертлы вераз, вир кулэ уз луы, дыр, но марысь мар ке, со дась луоз шуыса. Эмъясь малпаз, вылды, ӵыжы-выжыосыз ӧвӧлтэм дыръя Роберт соглаш кариськоз шуыса. Но Роберт юн луэмзэ возьматӥз: кыӵе гинэ югдур медам кылды, вир лэзьыны со соглаш ӧвӧл!

10. Кыӵе кышкытлык вайыны быгатэ адямиослэн малпаськон амалзы? (1 Коринфъёслы 3:19, 20).

¹⁰ Адямиослэн малпаськон амалзы. Ми та дуннеысь адямиос сямен малпаськыны кутскимы ке, Иегова сярысь но солэн эсэпъёсыз сярысь вунэтыны но быгатомы. (Лыдӟе 1 Коринфъёслы 3:19, 20.) Со, «мае адямиос визьмо шуыса лыдъяло», ӵем дыръя адямиослэсь мылкыдзэс ӝутэ, Инмарлэсь кылзӥськытэк улыны. Пергамысь но Фиатираысь куд-ог христианъёс, котырысьтызы адямиос сямен, азыса-калгыса но сульдэр-идолъёслы йыбыртъяса улыны кутскизы. Иисус та кенешъёслы шонерак визь-кенеш сётӥз, малы ке шуоно соос азон-калгонлэсь ӧз палэнске (Усьт. 2:14, 20). Туннэ но ми пӧртэм шонертэм малпанъёсты кылӥськомы. Семьямы но тодмоосмы вераны быгато, Иеговалэн куронъёсыз укыр чурытэсь но соослэсь кылзӥськоно ӧвӧл шуыса. Кылсярысь, соос вераны быгато, мылпотонъёсмылы сётскыны урод ӧвӧл но Библиысь эсэпъёс вужмизы ини шуыса.

11. Малэсь палэнсконо, юн луон понна?

¹¹ Куддыръя малпан кылдыны быгатэ, Иеговалэн курон-косонъёсыз тырмыт ӧвӧл шуыса. Соин ик мылкыд но ӝутскыны быгатэ Библиын гожтэмлэн «сьӧраз потыны» (1 Кор. 4:6). Озьы лэсьтӥзы Иисус улон дыръя религиозной кивалтӥсьёс. Инмарлэн законэзлы соос курон-косонъёс ватсазы. Таин сэрен огшоры калыклэн улонэз секытгес луиз (Матф. 23:4). Аслаз Кылыз но организациез пыр Иегова милемлы валамон курон-косонъёс сётэ. Милемлы номыр ватсано ӧвӧл ини (Мад. 3:5—7). Соин ик ми Библиын гожтэмлэн сьӧраз ум потӥське но соку, куке котькудӥз ачиз быръён лэсьтыны быгатэ, курон-косонъёс ум ватсаське.

12. Кызьы Шайтан «ӧрекчи дышетонъёсты» кутэ?

¹² Пӧяськон. Шайтан «ӧрекчи дышетонъёс» но «та дуннелэн.... дышетонъёсыз» пыр адямиосты пӧя но люке (Кол. 2:8). Кыӵе амалъёсты со уже кутӥз нырысетӥ даурын? Нырысетӥез — философия, кудӥз адямиослэн малпаськон амалзы вылын пыкиськемын. Кыкетӥез — иудейёслэн дышетонъёссы, кудъёсыз Священной Гожтэм вылэ пыкиськемын ӧй вал. Куинетӥез — дышетон, христианъёслы Моисейлэн законэзъя улоно шуыса. Таӵе дышетонъёс шонертэмесь вал, малы ке шуоно соос адямиосты  палэнтӥзы Иеговалэсь, кудӥз бордысь зэмос визьлык потэ. Туннэ Шайтан адямиосты пӧя телевидение, радио, газетъёс но социальной сетьёс пыр. Соосты кутыса, со вӧлмытэ кивалтӥсьёслэсь малпанъёссэс но соос бордысь потэм зэмос луисьтэм иворъёсты. Ми тае ас выламы шӧдӥмы COVID-19 пандемия дыръя c. Соос, кинъёс зэмос луисьтэм иворъёсты кылзӥзы, мултэс сюлмаськыса улӥзы. Нош Адӟись-Ивортӥсьёс, кудъёсыз Инмарлэн организациезлэн кивалтэтэзлэсь кылзӥськизы, та сьӧлтэтлэсь палэнскизы (Матф. 24:45).

13. Малы сак луоно?

¹³ Саклыкез ыштон. Милемлы тыршоно «ӟечсэ бырйыны» (Флп. 1:9, 10). Саклыкмес ыштӥмы ке, соку дырмы но кужыммы кулэтэм ужъёслы кошкозы. Огшоры ужъёс но, кылсярысь, сиён, юон, шутэтскон но уж, улонамы нырысетӥ интые потӥзы ке, ми саклыкмес ыштыны быгатӥськомы (Лука 21:34, 35). Со сяна, ми котькуд нунал кылӥськомы бугыръяськонъёс но политикаен герӟаськем споръяськонъёс сярысь трос иворъёсты. Эн вунэтэ: со сьӧлтэт кадь луыны быгатэ. Малы ке шуоно, валаса-а, валатэк-а, ми кин ке пала султыны быгатӥськомы. Шайтан та амалъёсты кутэ одӥг ужпумен гинэ — шонер ужъёс лэсьтыны мылкыдмес лябӟытон понна. Ойдолэ эскеромы, мар кароно, солы медам сётске шуыса.

14. Мар тӥледлы юрттоз Иегова палан юн сылыны?

¹⁴ Малпаське сӥзиськонды но пылатӥськонды сярысь. Малы тӥ та вамышъёсты лэсьтӥды? Малы ке шуоно Иегова пала султэмды потӥз. Тодады вае, мар тӥледыз оскытӥз, тӥ зэмлыкез шедьтӥды шуыса. Тӥ Иегова сярысь шонер тодон валан басьтӥды, инмысь Атайдэс яратыны но гажаны кутскиды. Тӥ оскондэс будэтӥды но азьвыл лэсьтэм сьӧлыкъёсты понна ӧпкелиды. Тӥляд мылкыдды ӝутскиз шонертэм ужъёстэс кельтыны но Иеговалэн эрикезъя улыны. Куке тӥ валады, Инмар тӥледыз простить кариз шуыса, тӥляд сюлэмды капчи  луиз (Пс. 31:1, 2). Тӥ кутскиды христиан пумиськонъёсы ветлыны но басьтэм тодон-валанъёсты сярысь мукетъёсызлы вераны. Собере тӥ сӥзиськиды но пылатӥськиды. Табере тӥ мынӥськоды улонэ нуись сюрес вылтӥ. Тӥляд юн мылкыдды вань азьланяз но та сюрес вылтӥ мыныны (Матф. 7:13, 14).

15. Кыӵе пайда вае Инмарлэсь Кылзэ эскерон но со вылын малпаськон?

¹⁵ Инмарлэсь Кылзэ эскере но со вылын малпаське. Писпу юн сылэ мур выжыосызлы луыса. Ми но ум лябӟе, Иеговалы юн осконмы луиз ке. Писпу будэмъяз выжыоссэ мургес но мургес лэзе. Инмарлэсь Кылзэ эскерыкумы но со вылын малпаськыкумы, ми но осконмес юнматӥськомы но эшшо но умойгес валаськомы, Инмарлэн сюресэз самой умой шуыса (Кол. 2:6, 7). Малпаське, кызьы Иегова азьвыл аслэсьтыз ужась-тыршисьёссэ утьылӥз но кызьы соослы солэн курон-косонъёсыз но визь-кенешъёсыз юрттылӥзы. Кылсярысь, Иезекиильлы возьматэмын вал адӟон, кудаз кылчин храмез мертаз. Пророк та адӟонэз туж сак учкиз. Та сое юнматӥз. Та адӟон милемыз но дышетэ чылкыт йыбырттон пумысен Иеговалэн курон-косонъёсызлэсь кылзӥськыны (Иез. 40:1—4; 43:10—12) d. Милемлы дыр висъяно, Инмарлэн Кылысьтыз мур зэмлыкъёсты эскерон понна но соос вылын малпаськон понна.

16. Кызьы оскымон сюлэм Робертэз утиз? (Псалтирь 111:7).

¹⁶ Сюлэмды оскымон мед луоз. Давид эксэйлэн юн мылкыдыз вал котьку но Иеговаез яратыны но солы оскымон луыны. Та сярысь со кырӟаз: «Дась сюлмы, Инмаре, дась мынам сюлэмы, кырӟало, данъяло» (Пс. 56:8). Милям но сюлэммы оскымон луоз, ми быдэсак Иеговалы оскиськимы ке. (Лыдӟе Псалтирез 111:7.) Учкомы, кызьы оскымон сюлэм юрттӥз Робертлы, кудӥз сярысь вераськиз ини. Кызьы ми тодӥмы, анестезиолог солы вераз, марысь мар ке, операция дыръя вир дась луоз шуыса. Роберт соку ик шуиз: «Тӥ малпаськоды ке мыным вир лэзьыны, мон эмъюртысь соку ик кошко». Берлогес Роберт тодаз вайиз: «Мынам юн  мылкыды вал Иеговалы оскымон кыльыны. Мынам сюлмы ӧз куалекты».

17. Малы дышетэ милемыз Робертлэн учырез? (Озьы ик учке суредэз.)

¹⁷ Роберт юн вал, малы ке шуоно ужпум кутӥз эмъюртэ сюремезлэсь трослы азьлогес. Нырысь солэн мылкыдыз кылдӥз Иеговаез шумпоттыны. Собере со пыр-поч эскериз, мар вераське Библиын но публикациосамы улон но вир сярысь. Та юрттӥз солы валаны, Иеговалэн курон-косонъёсыз милемлы котьку пайда ваё шуыса. Милям но сюлэммы оскымон луыны быгатэ, кыӵе гинэ шуг-секытэн ми медам пумиське.

18. Кызьы Вараклэн учырез дышетэ милемыз Иеговалы оскыны? (Озьы ик учке вылбамысь суредэз.)

¹⁸ Иеговалы оске. Ойдолэ эскеромы, кызьы Иеговалэн кивалтэтэз Варак судьялы юрттӥз вормон басьтыны. Израиль калыклэн щитъёсыз но, шибодыосыз но ӧй вал. Озьы ке но Иегова Варакез косӥз Ханаанысь Сӥсараен ожмаськыны. Со кивалтӥз ожгарчиосын, кудъёсызлэн трос ожмаськон тӥрлыкъёссы вал (Суд. 5:8). Азьпалзэ тодытӥсь Девора Вараклы шуиз нёжалэ васькыны, кытын Сӥсара 900 ожмаськон уробоосыныз сылӥз. Кыр интыын Сӥсара Варакез капчиен вормыны быгатэ вал. Но Варак кылзӥськиз. Куке солэн ожгарчиосыз Фавор гурезьысь васько вал, Иегова инмысен туж зол зор лэзиз. Сӥсаралэн ожмаськон уробоосыз дэрие нӧдӥзы. Озьы Инмар Вараклы вормон кузьмаз (Суд. 4:1—7, 10, 13—16). Инмар милемлы но вормон кузьмалоз, ми оскимы ке солы но солэн кивалтэтэзлы, кудзэ со аслаз организациез пыр сётэ (К. Зак. 31:6).

19. Малы тӥляд Иегова палан юн сылэмды потэ?

¹⁹ Та вуж дуннеын улытозямы милемлы ялан тыршоно юн сылыны шонер сюрес вылын (1 Тим. 6:11, 12; 2 Пётр 3:17). Уйылон-уллянъёс, лушкем зӥбон, адямиослэн малпаськон амалзы, пӧяськон но саклыкез ыштон Иегова палан юн сылыны мылкыдмес медаз лябӟытэ (Еф. 4:14). Ойдолэ котьку юнэсь, Иеговалы оскымонэсь луомы но солэн кивалтэтэзлэсь кылзӥськомы. Со дыре ик милемлы валасесь луоно. Вуоно статьяысь ми тодомы, кыӵе адӟем карон та пумысен Иегова но Иисус возьмато.