1, 2. Мар милемлы карыны кулэ пылатӥськеммы бере но? Валэктэ.

 ӴЕМ-А тӥ дорады утялскиськоды? Выль корка пырон азяды тӥ сое туж чылкыт миськысалды, дыр. Нош мар луысал, тӥ сое утялтэмысь дугдысалды ке? Ми ваньмы тодӥськомы, тузон нош ик кытысь ке пуксе шуыса. Милям коркамы котьку чылкыт мед луоз шуыса, милемлы сое ялан утялтыса возёно.

² Ӵапак озьы ик милемлы ялан тыршоно малпаськон амалмес но сямъёсмес воштыны. Зэм но, пылатӥськон азямы ми кулэ луись воштӥськонъёс лэсьтӥмы, асьмеды «лулмугорез но духез саптась вань юрӟым макеослэсь» сузян понна (2 Кор. 7:1). Но милемлы тае лэсьтэмысь дугдоно ӧвӧл. Апостол Павеллэн верамезъя, милемлы выльдӥськыны кулэ (Еф. 4:23). Малы? Малы ке шуоно та дуннелэн тузонэз но кырсез ми пушкын люкаськыны быгатэ. Озьы медаз луы шуыса но Иеговалы ярамон мед луомы шуыса, милемлы ялан эскероно малпанъёсмес, мылпотонъёсмес но сямъёсмес.

3. Мар кароно, малпаськон амалмес выльдон понна? (Римъёслы 12:2).

³ Мар кароно, малпаськон амалмес выльдон понна? (Лыдӟе Римъёслы 12:2.) Кӧня ке ӟеч ужъёс лэсьтыны  гинэ тырмыт ӧвӧл. Милемлы ялан чаклано но эскероно, кыӵе сюлэммы. Озьы ик котьку дась луоно воштӥськыны, Иеговалэн курон-косонъёсызъя улон понна.

4. Мар кароно, та дунне ми вылэ медаз пыӵа шуыса?

⁴ Куке ми тырбыдэс луомы, ми Иеговаез вань ужъёсынымы шумпоттыны быгатомы. Нош али милемлы туж тыршыны кулэ Иеговалы ярамон луыны. Висъялэ саклыктэс, Римъёслы 12:2 Павел вераз, Инмарлэсь эриксэ быдэсъян понна, милемлы выльдӥськыны кулэ шуыса. Озьыен, милемлы лэзёно ӧвӧл та дуннелы ми вылэ пыӵаны. Со интые, малпаськоно, милям ужпумъёсмы но ужъёсмы Инмарлы ярамон луо-а шуыса.

5. Вералэ пример, кудӥз валаны юрттэ, шонер-а ми малпаськиськомы. (Учке суредэз.)

⁵ Эскеромы тае пример вылын. Иеговалэн потэ, ми солэсь нуналзэ тодамы мед возёмы но та нуналэз мед возьмаломы шуыса (2 Пётр 3:12). Юалэ асьтэлэсь: «Адӟиське-а мынам улонысьтым, мон валасько шуыса, макем матын ини та дуннелэн пумыз? Куке мон дышетскон яке ужан инты бырйисько, адӟиське-а, Иеговалы ужан-тыршон улонам валтӥсез шуыса? Оскисько-а, Иегова мон сярысь но мынам семьяе сярысь сюлмаськоз шуыса? Яке мон ялан сюлмаськисько коньдон сярысь?» Малпаське, кыӵе шумпотэ Иегова, куке адӟе, ми солэсь эриксэ нырысетӥ интые пуктӥськомы шуыса (Матф. 6:25—27, 33; Флп. 4:12, 13).

6. Мар милемлы ялан карыны кулэ?

⁶ Милемлы ялан чаклано, мар сярысь ми малпаськиськомы, но дась луоно кулэ луись воштӥськонъёс лэсьтыны. Коринфын улӥсьёслы Павел гожтӥз: «Асьтэдыз асьтэос чаклалэ-эскере: осконэн-а  тӥ улӥськоды? Асьтэдыз асьтэос эскере» (2 Кор. 13:5). «Осконэн улыны» веран уг возьматы христиан пумиськонъёсы ветлэмез но дырын-дырын ужан-тыршонэ пыриськемез гинэ. Осконэн улон понна, эскероно малпанъёсмес, сямъёсмес но мылпотонъёсмес. Соин ик милемлы ялан выльдоно малпанъёсмес. Кызьы? Милемлы ялан лыдӟоно Инмарлэсь Кылзэ, дышетсконо малпаськыны озьы ик, кызьы Иегова малпаське, но собере туж тыршоно сое шумпоттыны (1 Кор. 2:14—16).

7. Мар милемлы эшшо кароно на но малы со секыт луыны быгатэ? (Ефесъёслы 4:31, 32).

⁷ Лыдӟе Ефесъёслы 4:31, 32. Милемлы малпаськон амалмес гинэ воштоно ӧвӧл, озьы ик «выль адями» но луоно (Еф. 4:24). Со понна тыршыны кулэ. Милемлы дугдоно лекъяськемысь, йыркуръяськыса но вожпотыса улэмысь. Малы со секыт луыны быгатэ? Малы ке шуоно куд-ог урод сямъёсмы туж мур пыӵамын. Кылсярысь, Библиын верамын, «адями егит дырысеныз ик сюлмаз урод-лек малпанэн улэ» шуыса (Ул.-выл. 8:21). Урод малпанъёслы медам сётске шуыса, пылатӥськеммы бере но ялан тыршыны кулэ. Тае возьматэ одӥг учыр.

8, 9. Кызьы Стивенлэн учырез возьматэ, милемлы ялан выль адями луыны тыршоно шуыса?

⁸ Стивен агайлы туж секыт вал йыркуръяськытэк улыны. Со вера: «Пылатӥськеме бере но мыным кулэ вал сямъёсме тупатыны. Кылсярысь, одӥг пол, коркась корка ветлыса тодытыкумы, мон уйиськи лушкаськись сьӧры, кудӥз машинаысьтым радиоме лушказ. Куке мон сое сутӥсько вал ини, со радиоме сэрпалтӥз но бызьыса кошкиз. Та учыр сярысь мон мукетъёсызлы верай. Одӥг тӧро мынэсьтым юаз: „Стивен, нош мар тон карысалыд, сое сутысалыд ке?“ Та юан монэ малпаськытӥз но мылкыдме ӝутӥз эшшо но золгес тыршыны тупаса улыны» b.

⁹ Куддыръя ми малпаськомы, урод сямъёсмы ӧвӧл ини шуыса. Но кызьы возьматэ Стивенлэн учырез, умойтэм сямъёсмы малпамтэ шорысь выльысь шарае потыны быгато. Тӥ но та выллем учыръёсын пумиськылӥды ке, мылкыдды медаз куашка. Эн малпалэ, тӥ урод христиан мурт шуыса. Апостол Павел но ачиз сярысь вераз: «Ӟечез лэсьтэме потыку, мон борды урод думиське» (Рим. 7:21—23). Вань христианъёслы нюръяськоно луэ умойтэм сямъёсынызы, кудъёсыз, тузон но кырсь выллем, нош но нош «коркаямы» люкасько. Милемлы ялан тыршоно асьмеды чылкыт возьыны. Мар со понна кароно?

10. Кызьы ми нюръяськыны быгатӥськомы умойтэм сямъёсынымы? (1 Иоанн 5:14, 15).

¹⁰ Вӧсяське Иеговалы, со тӥледлы умойтэм сямъёсыныды нюръяськыны мед юрттоз шуыса. Юн оске: со тӥледыз кылоз. (Лыдӟе 1 Иоаннлэсь 5:14, 15.) Иегова паймымон амалэн тӥлесьтыд сямъёстэс уз вошты, нош со кужым сётоз умойтэм сямъёсыныды нюръяськыны (1 Пётр 5:10). Со дыре ик асьтэлэн вӧсяськонъёстыя лэсьтэ. Но эн лэсьтэ сыӵе ужъёсты, кудъёсыз выль адями луыны люкетысалзы. Кылсярысь, умой-умой малпаське, учконо-а яке лыдӟоно-а сое, мар умоен возьматэ урод сямъёсты, кудъёсыныз тӥ  нюръяськиськоды. Озьы ик умойтэм мылпотонъёстэс палэнтыны тырше (Флп. 4:8; Кол. 3:2).

11. Мар кароно, азьланяз но выль адями луон понна?

¹¹ Урод сямъёстэс палэнтыса, туж кулэ умой сямъёсты будэтыны. Мар со понна кароно? Тырше адӟем карыны Инмарлэсь сямъёссэ (Еф. 5:1, 2). Кылсярысь, куке тӥ Библиысь лыдӟиськоды Инмарлэн простить каремез сярысь, юалэ асьтэлэсь: «Нош мон мукетъёссэ простить карисько-а?» Куке тӥ лыдӟиськоды, кызьы Иегова гажан-жалянзэ возьматӥз соослы, кинъёс шуг-секытэн пумиськизы, юалэ асьтэлэсь: «Нош мон сюлмаськисько-а агайёс но сузэръёс сярысь, кудъёсыз шуг-секытэн пумиськизы?» Азьланяз но тырше выль адями луыны. Со понна чидан кулэ луоз.

12. Кызьы Стивенлы Библия воштӥськыны юрттӥз?

¹² Стивен, кудӥз сярысь вераськиз ини, пумен-пумен выль адями луыны быгатӥз. Со вера: «Пылатӥськеме бере но кылдылӥзы учыръёс, куке мыным секыт вал асме киям кутыны. Мон дышетски асме шонер возьыны, куке кин ке но вожме поттыны тыршиз. Тросэз адямиос, озьы ик кышное но, ушъяло монэ со понна, кызьы мон асме возисько сыӵе учыръёсын. Мон ачим но аслым паймисько! Но мон тодӥсько: ачим воштӥськыны ӧй быгатысал. Мыным Библия воштӥськыны юрттӥз».

13. Мар юрттоз милемлы лэсьтыны сое, мар шонер луэ? (Галатъёслы 5:16).

¹³ Лыдӟе Галатъёслы 5:16. Урод мылпотонъёсынымы нюръяськыны юрттон понна, Иегова милемлы святой духсэ сётэ. Куке ми Библиез эскериськомы, ми лэзиськомы та духлы милемлы юрттыны. Озьы ик Иегова милемлы святой духсэ сётэ, куке ми кенешлэн пумиськонъёсаз ветлӥськомы. Сыӵе пумиськонъёсын ми трос дырмес ортчытъяськомы агайёсынымы но сузэръёсынымы, кудъёсыз, ми сямен ик, шонер ужъёс лэсьтыны тыршо. Та милесьтым мылкыдмес ӝутэ (Евр. 10:24, 25; 13:7). Со сяна, Иегова милемлы святой духсэ сётэ, куке ми солы ӟырдыт вӧсяськиськомы но сое куриськомы юрттыны милемлы кыӵе ке шонертэм мылпотонъёсынымы нюръяськыны. Ваньмыз та милемыз умойтэм мылпотонъёслэсь соку ик уз мозмыты ке но, со юрттоз соослы сётскытэк улыны. Малы ке шуоно Галатъёслы 5:16 верамъя, соос, кинъёс духлы тэрытскыса уло, «лулмугорлэн кулэ каронъёсызлы тэрытскыса» уз улэ.

14. Малы ялан тыршоно лэсьтыны сое, мар шонер луэ?

¹⁴ Азьланяз но тырше Библиез эскерыны, кенешлэн пумиськонъёсаз ветлыны, вӧсяськыны но ялан лэсьтыны сое, мар шонер луэ. Малы со туж кулэ? Малы ке шуоно милям вань тушмонмы, кудӥз милемын нюръяськемысь уг дугды. Со тушмон — шонертэм мылпотонъёсмы. Пылатӥськеммы бере но ми шӧдыны быгатӥськомы, лэсьтэммы потэ шуыса сое, малэсь палэнскыны кулэ, кылсярысь, азартной шудонъёслэсь, вина юонлэсь яке порнографилэсь (Еф. 5:3, 4). Одӥг егит агай вера: «Тужгес но мыным секыт вал нюръяськыны пиосмуртъёсын кӧлан мылкыдын. Мон малпай, таӵе шӧдонъёсы ортчозы шуыса, но со озьы ӧз луы». Мар юрттоз тӥледлы, шонертэм мылпотонъёсты туж юнэсь ке?

15. Кызьы милемыз юнматыны быгатэ малпан, мукет адямиос но шонертэм мылпотонъёсынызы нюръясько шуыса? (Учке суредэз.)

 ¹⁵ Тӥ нюръяськиськоды ке шонертэм мылпотонъёсыныды, кудъёсыз туж кужмоесь, тодады возе: тӥ огнады ӧвӧл. Библиын верамын: «Адямиослы чидантэм визь сынаськонъёс тӥ доры ӧз на вуылэ» (1 Кор. 10:13а). Та кылъёс верамын вал Коринфын улӥсь агайёслы но сузэръёслы. Куд-огъёсыз соос пӧлысь зэмлыкез тодэмзылэсь азьло азыса-калгыса но трос вина юыса улӥзы, пиосмуртъёс пиосмуртъёсын кӧлазы, нош кышномуртъёс — кышномуртъёсын (1 Кор. 6:9—11). Малпаськоды-а тӥ, пылатӥськемзы бере соослэн таӵе умойтэм мылпотонъёссы ноку ӧз кылдылэ ни шуыса? Кылдылӥзы, дыр. Ваньзы соос зырӟем христианъёс вал, но соос тырбыдэстэмесь вал. Зэм но, дырын-дырын соослы нюръяськоно вал шонертэм мылпотонъёсынызы. Та малпан милемыз но юнматыны быгатэ. Кызьы? Со возьматэ: кыӵе гинэ урод мылпотонъёсынымы ми медам нюръяське, вань соос, кинъёс таӵе мылпотонзэс вормизы ини. Тӥ но быгатоды юн осконэн улыны, малы ке шуоно тӥ тодӥськоды, «дунне вылын таӵе ик курадӟонъёс тӥляд агай-вынъёсты но чидано луо шуыса» (1 Пётр 5:9).

16. Кызьы малпаськоно ӧвӧл но малы?

¹⁶ Эн малпалэ: нокин но уз вала, маин тӥ нюръяськиськоды. Малы ке шуоно соку тӥ малпалоды, тӥледлы нокин уз юртты но шонертэм мылпотонъёстэс вормыны уз луы шуыса. Но Библия оскытэ милемыз: «Оскиськымон Инмар. Со тӥледлы чиданы луонтэм визь сынаськон уз лэзьы. Чиданы-сылыны мед быгатозы шуыса, Со тӥледлы визь сынаськонэн ӵош утиськон но сётоз» (1 Кор. 10:13б). Озьыен, шонертэм мылпотонъёсмы кужмоесь ке но, ми  быгатӥськомы соосты вормыны. Иеговалэн юрттэменыз ми быгатӥськомы соослы сётскытэк улыны.

17. Шонертэм мылпотонъёсмы кылдылозы ке но, мар ми карыны быгатӥськомы?

¹⁷ Тодады возе: ми тырбыдэстэмесь, соин ик шонертэм мылпотонъёсмы кылдылозы. Юн мылкыдын палэнтэ соосты ӵапак озьы ик, кызьы Иосиф Потифарлэн кышноез дорысь бызьыса кошкиз (Ул.-выл. 39:12). Тӥледыз нокин но уг косы, сьӧлыко мылпотонъёстылы сётскыса улыны!

18, 19. Кыӵе юанъёс вылын малпаськыны кулэ, азьланяз но выль адями луон понна?

¹⁸ Выль адями луон понна, ялан тыршыны кулэ. Милемлы малпаськоно но лэсьтоно озьы, кызьы Иеговалы ярамон луэ. Со понна астэ ялан эскероно. Аслэсьтыд юаны луоз: «Адӟиське-а ужъёсысьтым, мон валасько шуыса, кыӵе дыре ми улӥськомы? Пӧрме-а мынам выль адями луэме? Лэзисько-а мон Иеговалэн духезлы юрттыны мыным сьӧлыко мылпотонъёсылы сётскытэк улыны?»

¹⁹ Та юанъёс вылын малпаськыкуды, асьтэлэсь укыр трос эн возьмалэ. Эн малпалэ, тӥ янгышатэк улоды шуыса. Со интые, саклыктэс висъялэ солы, мар тӥляд умой пӧрме ини. Тӥ адӟиды ке, мае ке умоятоно на шуыса, киостэс эн лэзе. Кылзӥське визь-кенешлэсь, кудӥз гожтэмын Филиппыослы 3:16: «Ма кемозь асьмеос вуимы-будӥмы ни, озьы ик малпаськыны но со куронъёсъя ик улыны но кулэ». Юн оске: выль адями луыны тыршемды понна Иегова тӥледыз бакель кароз.